Department of International Cooperation and ASEAN Affairs-moeys

កម្មវិធីវេទិកាអប់រំពិភពលោកឆ្នាំ២០២៦ (Education World Forum 2026) នៅចក្រភពអង់គ្លេស

ចក្រភពអង់គ្លេស៖ លោកស្រី សេង ហ្សានីន ប្រធាននាយកដ្ឋាន និងសហការីនៃនាយកដ្ឋានសហប្រតិបត្តិការអន្តរជាតិ និងកិច្ចការអាស៊ាន បានចូលរួមជាប្រតិភូអម និងសម្របសម្រួលដំណើរបេសកកម្មរបស់ គណៈប្រតិភូក្រសួងអប់រំ យុវជន និងកីឡា ដឹកនាំដោយ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រី្ត រដ្ឋមន្រ្តីក្រសួងអប់រំ យុវជន និងកីឡា និងអមដំណើរដោយឯកឧត្តមបណ្ឌិត អ៊ុង បូរាត រដ្ឋលេខាធិការ ឯកឧត្តម ទេព ភិយ្យោរិទ្ធ អគ្គលេខាធិការ នៃអគ្គលេខាធិការដ្ឋាន និងលោកជំទាវ ស្រូយ សុជាតិ អគ្គនាយក នៃអគ្គនាយកដ្ឋានយុវជន ក្នុងការចូលរួមកម្មវិធី “វេទិកាអប់រំពិភពលោកឆ្នាំ២០២៦” (Education World Forum 2026) ដែលបានប្រព្រឹត្តទៅចាប់ពីថ្ងៃទី១៧ ដល់ថ្ងៃទី២០ ខែឧសភា ឆ្នាំ២០២៦ ក្រោមប្រធានបទ “ការអប់រំសម្រាប់អនាគតរួមគ្នា៖ សន្តិភាព ភពផែនដី គោលបំណង និងមាគ៌ា” (Educating for a Shared Future: Peace, Planet, Purpose, and Pathways) នៅចក្រភពអង់គ្លេស។ កម្មវិធីនេះ មានការចូលរួមពីសំណាក់គណៈប្រតិភូថ្នាក់រដ្ឋមន្ត្រី និងតំណាងក្រសួងអប់រំនៃបណ្ដាប្រទេសមួយចំនួន តំណាងស្ថាប័នមួយចំនួនក្នុងចក្រភពអង់គ្លេស និងនៅជុំវិញពិភពលោក អង្គការ ក្រុមហ៊ុនអន្តរជាតិ និងភ្ញៀវកិត្តិយសជាច្រើនទៀតផងដែរ។

នៅក្នុងដំណើរបេសកកម្មនេះ ឯកឧត្តមបណ្ឌិតសភាចារ្យ ឧបនាយករដ្ឋមន្រី្ត និងគណៈប្រតិភូកម្ពុជាបានចូលរួមកិច្ចពិភាក្សា និងទស្សនកិច្ចសំខាន់ៗសរុបចំនួន ១៣ កម្មវិធី ដែលជាឱកាសដ៏មានតម្លៃក្នុងការសិក្សាស្វែងយល់ពីប្រព័ន្ធអប់រំឈានមុខ និងចែករំលែកបទពិសោធន៍ល្អៗ ក៏ដូចជាកិច្ចខិតខំប្រឹងប្រែងលើការកែទម្រង់វិស័យអប់រំនៅកម្ពុជា។

នៅក្នុងអនុវិស័យអប់រំកុមារតូច និងកម្រិតមូលដ្ឋាន ឯកឧត្តមបណ្ឌិតសភាចារ្យ ឧបនាយករដ្ឋមន្រី្ត បានសង្កត់ធ្ងន់លើការផ្តល់សេវាអប់រំកុមារតូច ដើម្បីកសាងគ្រឹះស្ថានដ៏រឹងមាំក្នុងការអភិវឌ្ឍខួរក្បាល និងកាត់បន្ថយអត្រាបោះបង់ការសិក្សា។ ជាមួយគ្នានេះ ក្រសួងអប់រំ យុវជន និងកីឡាបានជំរុញកំណែទម្រង់វិធីសាស្ត្របង្រៀនអំណាន និងគណិតវិទ្យាថ្នាក់ដំបូង ព្រមទាំងការយកចិត្តទុកដាក់លើអាហារូបត្ថម្ភ និងអនាម័យសាលារៀន។

ចំពោះអនុវិស័យបឋមសិក្សា ឯកឧត្តមបណ្ឌិតសភាចារ្យ ឧបនាយករដ្ឋមន្រី្ត បានចែករំលែកពីលទ្ធផលតេស្ត SEA-PLM ឆ្នាំ២០២៤ ដែលផ្ដោតលើការវាយតម្លៃ និងលើកកម្ពស់គុណភាពសិក្សា។ ស្របពេលជាមួយគ្នានេះ ក្រសួងអប់រំ យុវជន និងកីឡាបានដាក់ចេញនូវគោលនយោបាយកែទម្រង់គ្រូបង្រៀនស៊ីជម្រៅ ដូចជាការដំឡើងប្រាក់បៀវត្ស ការបង្កើតអាជ្ញាប័ណ្ណគ្រូបង្រៀន ការធ្វើជាតូបនីយកម្មប្រព័ន្ធអភិវឌ្ឍវិជ្ជាជីវៈជាប្រចាំ (CDP) និងការពង្រឹងគណនេយ្យភាពរបស់ថ្នាក់ដឹកនាំសាលារៀនជាមួយសហគមន៍។

ចំពោះអនុវិស័យឧត្តមសិក្សា និងកិច្ចសហប្រតិបត្តិការអន្តរជាតិក្នុងវិស័យអប់រំ គណៈប្រតិភូកម្ពុជាបានពិភាក្សាជាមួយលោកស្រី លោកជំទាវ Georgia Gould OBE MP រដ្ឋមន្ត្រីទទួលបន្ទុកស្តង់ដារសាលារៀននៃចក្រភពអង់គ្លេស លើការបន្តគាំទ្រអាហារូបករណ៍ ការបណ្តុះបណ្តាលជំនាញរយៈពេលខ្លី និងការបង្កើតកម្មវិធីសិក្សារួមគ្នា (Sandwich Program)។ លើសពីនេះ ក្នុងជំនួបពិភាក្សាជាមួយសាកលវិទ្យាល័យ Cambridge, ជំនួបពិភាក្សាជាមួយសាកលវិទ្យាល័យ De Montfort និងជំនួបពិភាក្សាជាមួយធនាគារពិភពលោក (World Bank) ឯកឧត្តមបណ្ឌិតសភាចារ្យ ឧបនាយករដ្ឋមន្រី្តបានពិភាក្សាជាមួយភាគីតំណាងស្ថាប័ននីមួយៗលើប្រធានបទមួយចំនួនរួមមាន៖ ការបង្កើតភាពជាដៃគូយុទ្ធសាស្ត្ររយៈពេលវែង ដើម្បីបញ្ចូលមុខវិជ្ជាអក្ខរកម្មហិរញ្ញវត្ថុ ពង្រឹងជំនាញឌីជីថល បច្ចេកវិទ្យា និងវិជ្ជាជីវៈ (TVET) សំដៅកសាងកម្លាំងពលកម្មជំនាញ និងជំរុញកំណើនសេដ្ឋកិច្ចសង្គមកម្ពុជាប្រកបដោយនិរន្តរភាព និងសមធម៌។

សូមគូសបញ្ជាក់ផងដែរថា វេទិកាអប់រំពិភពលោកលើកទី២២ គឺជាការប្រមូលផ្តុំប្រចាំឆ្នាំដ៏ធំបំផុតសម្រាប់កម្រិតរដ្ឋមន្ត្រីអប់រំ និងអ្នកជំនាញក្នុងវិស័យអប់រំ ដើម្បីជួបពិភាក្សាគ្នាអំពីបញ្ហាប្រឈមនៅក្នុងវិស័យអប់រំ ការផ្លាស់ប្តូរទស្សនៈ និងបទពិសោធន៍ក្នុងការឆ្លើយតបបញ្ហាសំខាន់ៗជុំវិញការអភិវឌ្ឍប្រព័ន្ធអប់រំ ព្រមទាំងជំរុញកំណើនសេដ្ឋកិច្ចសង្គមប្រកបដោយសមធម៌ និងនិរន្តរភាព។ វេទិកាអប់រំពិភពលោកលើកទី២២ ឆ្លុះបញ្ចាំងលើដំណោះស្រាយបញ្ហាប្រឈមជាសកលកំពុងជួបនាពេលបច្ចុប្បន្ននេះ ប្រកបដោយភាពច្នៃប្រឌិត និងផ្តោតលើការប្រើប្រាស់បច្ចេកវិទ្យា ភាពជាដៃគូរវាងរដ្ឋ និងឯកជន និងកិច្ចសហប្រតិបត្ដិការរអន្តរជាតិ។

១៧-២០ ឧសភា ២០២៦ | ចក្រភពអង់គ្លេស

ការចុះពិនិត្យតាមដានសកម្មភាព និងប្រមូលទិន្នន័យពីដៃគូ នៅខេត្តក្រចេះ

ខេត្តស្ទឹងត្រែង៖ នៅថ្ងៃទី២៦ ខែឧសភា ឆ្នាំ២០២៦ បុគ្គលិកអប់រំនៃនាយកដ្ឋានសហប្រតិបត្តិការអន្តរជាតិ និងកិច្ចការអាស៊ាន បានចុះពិនិត្យតាមដាននូវសកម្មភាព និងប្រមូលទិន្នន័យពីដៃគូអភិវឌ្ឍន៍ក្នុងវិស័យអប់រំ ដោយបានជួបពិភាក្សាការងារជាមួយបុគ្គលិកអប់រំ ក្នុងការិយាល័យផែនការនៃមន្ទីរអប់រំ យុវជន និងកីឡាខេត្តស្ទឹងត្រែង ពាក់ព័ន្ធនឹងកិច្ចសហប្រតិបត្តិការផ្ទាល់ជាមួយដៃគូអភិវឌ្ឍន៍ក្នុងវិស័យអប់រំ និងការប្រមូលទិន្នន័យផ្សេងៗ។

ការចុះពិនិត្យនេះ មានគោលបំណងពិនិត្យតាមដាននូវរាល់កិច្ចសហការ និងការអនុវត្តសកម្មភាពនានារបស់ដៃគូ ព្រមទាំងប្រមូលទិន្នន័យសំខាន់ៗ រួមទាំងរបាយការណ៍ពាក់ព័ន្ធនឹងសកម្មភាព ដើម្បីបន្តជំរុញ និងពង្រឹងកិច្ចសហប្រតិបត្តិការអភិវឌ្ឍន៍សំដៅធានានូវប្រសិទ្ធិភាព និងគុណភាពស្របតាមគោលនយោបាយអប់រំរបស់ក្រសួងអប់រំ យុវជន និងកីឡា។

២៦ ឧសភា ២០២៦ | ខេត្តក្រចេះ

ការចុះពិនិត្យតាមដានសកម្មភាព និងប្រមូលទិន្នន័យពីដៃគូ នៅខេត្តកំពង់ចាម

ខេត្តកំពង់ចាម៖ នៅថ្ងៃទី២៥ ខែឧសភា ឆ្នាំ២០២៦ បុគ្គលិកអប់រំនៃនាយកដ្ឋានសហប្រតិបត្តិការអន្តរជាតិ និងកិច្ចការអាស៊ាន បានចុះពិនិត្យតាមដាននូវសកម្មភាព និងប្រមូលទិន្នន័យពីដៃគូអភិវឌ្ឍន៍ក្នុងវិស័យអប់រំ ដោយបានជួបពិភាក្សាការងារជាមួយបុគ្គលិកអប់រំ ក្នុងការិយាល័យផែនការនៃមន្ទីរអប់រំ យុវជន និងកីឡាខេត្តកំពង់ចាម ពាក់ព័ន្ធនឹងកិច្ចសហប្រតិបត្តិការផ្ទាល់ជាមួយដៃគូអភិវឌ្ឍន៍ក្នុងវិស័យអប់រំ និងការប្រមូលទិន្នន័យផ្សេងៗ។

ការចុះពិនិត្យនេះ មានគោលបំណងពិនិត្យតាមដាននូវរាល់កិច្ចសហការ និងការអនុវត្តសកម្មភាពនានារបស់ដៃគូ ព្រមទាំងប្រមូលទិន្នន័យសំខាន់ៗ រួមទាំងរបាយការណ៍ពាក់ព័ន្ធនឹងសកម្មភាព ដើម្បីបន្តជំរុញ និងពង្រឹងកិច្ចសហប្រតិបត្តិការអភិវឌ្ឍន៍សំដៅធានានូវប្រសិទ្ធិភាព និងគុណភាពស្របតាមគោលនយោបាយអប់រំរបស់ក្រសួងអប់រំ យុវជន និងកីឡា។

២៥ ឧសភា ២០២៦ | ខេត្តកំពង់ចាម

សកម្មភាពចុះពិនិត្យតាមដាន និងវាយតម្លៃស្ដីពី «ចំណេះដឹងអាស៊ាន» នៅខេត្តកែប

ខេត្តកែប៖ នៅថ្ងៃទី១១ និងថ្ងៃទី១២ ខែឧសភា ឆ្នាំ២០២៦ មន្ត្រីជំនាញ នៃនាយកដ្ឋានសហប្រតិបត្តិការអន្តរជាតិ និងកិច្ចការអាស៊ាន បានចុះពិនិត្យតាមដាន និងវាយតម្លៃស្ដីពី «ចំណេះដឹងអាស៊ាន» នៅខេត្តកែប។ ក្នុងឱកាសនៃការចុះពិនិត្យតាមដាន និងវាយតម្លៃនេះក្រុមការងារបានជួបសំណេះសំណាលជាមួយ គណៈគ្រប់គ្រងសាលា និងបុគ្គលិកអប់រំ នៃវិទ្យាល័យទាំងពីរ ក្នុងគោលបំណងជម្រាបជូនពីវត្ថុបំណងនៃការចុះពិនិត្យតាមដាន និងស្នើសុំកិច្ចសហការក្នុងការចុះវាស់ស្ទង់ចំនេះដឹងអាស៊ាន។ តាមរយៈការសម្របសម្រួល និងកិច្ចសហការរបស់គណៈគ្រប់គ្រង និងបុគ្គលិកអប់រំ ក្រុមការងារនៃនាយកដ្ឋានសហប្រតិបត្តិការអន្តរជាតិ និងកិច្ចការអាស៊ាន បាននាំយកកម្រងសំណួរជូនសិស្សនុសិស្ស នៅគ្រឹះស្ថានអប់រំចំនួនពីរ រួមមាន៖
១) វិទ្យាល័យហ៊ុនសែន ចំការដូង និង
២) វិទ្យាល័យប៊ុន រ៉ានី ហ៊ុន សែន ចរិយាវង្ស
ដែលមានសមាសភាពចូលរួមសរុបចំនួន ១៧៧ នាក់។

សូមបញ្ជាក់ផងដែរថា ក្រុមការងារនាយកដ្ឋាន បាននិងកំពុងបន្តចុះប្រមូលទិន្នន័យនៅតាមបណ្តារាជធានីខេត្តគោលដៅនានា តាមរយៈការនាំយកកម្រងសំណួរ ដើម្បីវាយតម្លៃកម្រិតនៃការយល់ដឹងទាក់ទងនឹងអាស៊ាន ក្នុងចំណោមសិស្សវិទ្យាល័យកម្ពុជា កំណត់គម្លាតក្នុងការយល់ដឹងរបស់ពួកគេ និងលើកទឹកចិត្តសិស្សានុសិស្សបង្កើនការចាប់អារម្មណ៍លើកិច្ចការអាស៊ាន ភាពជាពលរដ្ឋអាស៊ាន និងកិច្ចសហប្រតិបត្តិការក្នុងតំបន់ដើម្បីក្លាយជាពលរដ្ឋ ដែលពោរពេញទៅដោយចំណេះដឹង បញ្ញា ស្មារតី សីលធម៌ សក្តានុពល និងក្លាយជាកម្លាំងចលករក្នុងការចូលរួមអភិវឌ្ឍសង្គមជាតិ និងតំបន់ និងការចេះរស់នៅដោយសុខដុម។

១១-១២ ឧសភា ២០២៦ | ខេត្តកែប

សកម្មភាពចុះប្រមូលទិន្នន័យនិងពិនិត្យសកម្មភាព និងវឌ្ឍនភាពនៃការអនុវត្តគម្រោងរបស់អង្គការក្រៅរដ្ឋាភិបាលនៅខេត្តស្ទឹងត្រែង

ស្ទឹងត្រែង៖ នៅថ្ងៃទី០៦-០៧ ខែឧសភា ឆ្នាំ២០២៦ មន្ទ្រីជំនាញ​ នៃនាយកដ្ឋានសហប្រតិបត្តិការ​អន្តរជាតិ​ និងកិច្ចការអាស៊ាន​ បានចុះប្រមូលទិន្នន័យនិងពិនិត្យសកម្មភាព និងវឌ្ឍនភាពនៃការអនុវត្តគម្រោងរបស់អង្គការក្រៅរដ្ឋាភិបាលនៅខេត្តស្ទឹងត្រែង។ ក្រុមការងារបានជួបសំណេះសំណាលជាមួយ បុគ្គលិកអប់រំ នៃមន្ទីរអប់រំ យុវជន និងកីឡា ខេត្ត​ស្ទឹងត្រែង ក្នុងគោលបំណងជម្រាបជូនពីវត្ថុបំណងនៃ ចុះប្រមូលទិន្នន័យនិងពិនិត្យសកម្មភាព និងស្នើសុំកិច្ចសហការក្នុងការចុះប្រមូលទិន្នន័យនិងពិនិត្យសកម្មភាព តាមអង្គការដៃគូរនានាក្នុងខេត្ត។ ក្រោមការសម្របសម្រួល និងកិច្ចសហការយ៉ាងជិតស្និទ្ធពីសំណាក់បុគ្គលិកអប់រំ និងភាគីពាក់ព័ន្ធក្រុមការងារទទួលបានអង្គការចំនួន ០២ រួមមាន៖
1.អង្គការឌីវីវី
2.អង្គការ United World Schools
ដែលជាអង្គការដៃគូអភិវឌ្ឍជាមួយក្រសួងអប់រំ យុវជន និងកីឡា ក្នុងគោលបំណងសហការជួយអភិវឌ្ឍវិស័យអប់រំនៅតំបន់ជួបការលំបាក និងជួយផ្តល់លទ្ធភាពឱ្យសិស្សក្រីក្របានទទួលនូវការអប់រំ។

សូមបញ្ជាក់ផងដែរថា ការធ្វើកិច្ចសហប្រតិបត្តិការ​ របស់អង្គការដៃគូគឺជាការសហការមួយដ៏ល្អប្រសើរក្នុងការចូលរួមចំណែកជួយវិស័យអប់រំសម្រាប់ការបំពេញបន្ថែមពីលើក្រសួង ដែលបច្ចុប្បន្នកំពុងស្វែងរកដៃគូល្អៗដើម្បីជួយដល់សិស្ស និងនិស្សិតក្រីក្រដែលរស់នៅតំបន់ដាច់ស្រយាល ដោយពុំមានលទ្ធភាពក្នុងការបន្តការសិក្សាដោយសារស្ថិតក្នុងគ្រួសារក្រីក្រឱ្យបានរៀនបន្តយកជំនាញផ្សេងៗ ដើម្បីអាចឱ្យពួកគេមានលទ្ធភាពចិញ្ចឹមជីវិតនិងគ្រួសារព្រមទាំងមានលទ្ធភាពជួយដល់សហគមន៍របស់ពួកគេ។

០៦-០៧ ឧសភា​ ២០២៦​ | ខេត្តស្ទឹងត្រែង

សកម្មភាពចុះពិនិត្យតាមដាន និងវាយតម្លៃចំណេះដឹងអំពី «អង្គការរដ្ឋមន្រ្តីអប់រំអាស៊ីអាគ្នេយ៍» នៅខេត្តតាកែវ

ខេត្តតាកែវ៖ នៅថ្ងៃទី១២ និងទី១៣ ខែឧសភា ឆ្នាំ២០២៦ ក្រុមការងារជំនាញ នៃនាយកដ្ឋានសហប្រតិបត្តិការអន្តរជាតិ និងកិច្ចការអាស៊ាន បានចុះពិនិត្យតាមដាន និងវាយតម្លៃចំណេះដឹងអំពី «អង្គការរដ្ឋមន្រ្តីអប់រំអាស៊ីអាគ្នេយ៍» ដែលហៅកាត់ថា ស៊ីមេអូ (SEAMEO) នៅក្នុងខេត្តតាកែវ។ ក្រុមការងារបានជួបសំណេះសំណាលជាមួយ លោកប្រធានការិយាល័យរដ្ឋបាល និងបុគ្គលិកអប់រំ នៃមន្ទីរអប់រំ យុវជន និងកីឡា ខេត្តតាកែវ ក្នុងគោលបំណងជម្រាបជូនពីវត្ថុបំណងនៃការចុះពិនិត្យតាមដាន និងស្នើសុំកិច្ចសហការក្នុងការចុះពិនិត្យតាមដាន តាមស្ថាប័ន និងគ្រឹះស្ថានអប់រំនានាក្នុងខេត្ត។ ក្រោមការសម្របសម្រួល និងកិច្ចសហការយ៉ាងជិតស្និទ្ធពីសំណាក់បុគ្គលិកអប់រំ និងភាគីពាក់ព័ន្ធ ក្រុមការងារបាននាំយកកម្រងសំណួរជូនគណៈគ្រប់គ្រងសាលា និងលោកគ្រូ អ្នកគ្រូ នៅស្ថាប័ន និងគ្រឹះស្ថានអប់រំ មួយចំនួនរួមមាន៖
១. មន្ទីរអប់រំ យុវជន និងកីឡា ខេត្តតាកែវ
២. សាលាបឋមសិក្សា ហ៊ុន សែន អនុវត្តតាកែវ
៣. សាលាបឋមសិក្សាតាកែវក្រុង
៤. សាលាបឋមសិក្សាឈើទាល
៥. វិទ្យាល័យ ហ៊ុន សែន ឈើទាល
៦. វិទ្យាល័យ ជា ស៊ីម តាកែវ និង
៧. វិទ្យាល័យ ព្រះនរោត្តមសីហនុរាជា និង សម្តេចព្រះវររាជមាតា នរោត្តម មុនីនាថ សីហនុ តុំ។
ក្នុងនោះដែរ ក្រុមការងារបានទទួលកម្រងសំណួរពីសមាសភាពចូលរួមសរុបចំនួន ១១៩ នាក់។

តាមរយៈលទ្ធផលនៃការបំពេញកម្រងសំណួរខាងលើ បុគ្គលិកអប់រំ គណៈគ្រប់គ្រងសាលា និងលោកគ្រូ​ អ្នកគ្រូ ក្នុងខេត្តតាកែវ នៅមិនទាន់បានជ្រួតជ្រាបពីស៊ីមេអូនៅឡើយ។ សមាសភាពចូលរួមបានសំណូមពរដល់ក្រុមការងារបន្តរៀបចំការចុះពិនិត្យតាមដាន វាយតម្លៃ និងចែករំលែកផ្សព្វផ្សាយដល់ខេត្ត អំពីចំណេះដឹងស៊ីមេអូ ក៏ដូចជាឱកាស និងបទពិសោធន៍នានាដែលស៊ីមេអូកំពុងផ្តល់ឱ្យដល់បុគ្គលិកអប់រំឱ្យបានកាន់តែទូលំទូលាយ ដែលជាកត្តាចាំបាច់ក្នុងការជំរុញកិច្ចសហប្រតិបត្តិការក្នុងតំបន់ ជាពិសេសចូលរួមចំណែកបន្តលើកកម្ពស់វិស័យអប់រំនៅប្រទេសកម្ពុជា។

១២-១៣ ឧសភា ២០២៦ | ខេត្តតាកែវ

កម្មវិធីបណ្តុះបណ្តាលនៃវគ្គបណ្តុះបណ្តាលទី២ នៃកម្មវិធី Collège international de Villers-Cotterêts – Filière des cadres éducatifs

ប៊ុលហ្ការី ៖ ចាប់ពីថ្ងៃទី១២ ដល់ថ្ងៃទី១៥ ខែឧសភា ឆ្នាំ២០២៦ មន្ត្រីអប់រំនៃនាយកដ្ឋានសហប្រតិបត្តិការអន្តរជាតិ និងកិច្ចការអាស៊ាន និងនាយកដ្ឋានមធ្យមសិក្សាចំណេះទូទៅ នៃក្រសួងអប់រំ យុវជន និងកីឡា បានអញ្ជើញចូលរួមកម្មវិធីបណ្តុះបណ្តាលនៃក្រុមបណ្តុះបណ្តាលទី២ នៃកម្មវិធី Collège international de Villers-Cotterêts – Filière des cadres éducatifs ដែលសហការរៀបចំឡើងដោយអង្គការអន្តរជាតិហ្វ្រង់កូហ្វូនី (OIF) និងទីភ្នាក់ងារឧត្តមសិក្សាប្រើប្រាស់ភាសាបារាំង (AUF) នៅទីក្រុងសូហ្វ៊ីយ៉ា ប្រទេសប៊ុលហ្ការី។

កម្មវីធីបណ្តុះបណ្តាលខាងលើត្រូវបានរៀបចំឡើងក្នុងគោលបំណងដើម្បីពង្រឹងសមត្ថភាពការអប់រំនៅកម្រិតឧត្តមសិក្សា ដែលផ្តោតលើបញ្ហាយុទ្ធសាស្ត្រនៃគោលនយោបាយអប់រំ ការលើកកម្ពស់កិច្ចផ្លាស់ប្តូរបទពិសោធន៍នានា រួមទាំងកិច្ចសហការស្វែងរកដំណោះស្រាយស្របទៅនឹងបរិបទនៃបណ្តាប្រទេសនីមួយៗ និងការជំរុញនវានុវត្តន៍ផ្នែកគរុកោសល្យ ការគ្រប់គ្រង និងកិច្ចផ្លាស់ប្តូររវាងស្ថាប័នអប់រំតាមរយៈការបណ្តុះបណ្តាល។

ទន្ទឹមនឹងនេះដែរ ការបណ្តុះបណ្តាលនេះរៀបចំឡើងដោយផ្តោតលើប្រធានបទសំខាន់ៗ រួមមាន៖
• ភាសាបារាំង ភាសាសម្រាប់ការអប់រំ និងសម្រាប់ហ្វ្រង់កូហ្វូនី
• ការយល់ដឹងពីសក្តានុពលនៃបច្ចេកវិទ្យាឌីជីថល
• ការលើកកម្ពស់សមភាពយេនឌ័រក្នុងវិស័យអប់រំ
• ការកែលម្អលទ្ធផលសិក្សារបស់សិស្សានុសិស្ស តាមរយៈការបណ្តុះបណ្តាលបន្តដ៏ល្អសម្រាប់គ្រូបង្រៀន
• ការដឹកនាំ និងការធ្វើផែនការនៃប្រព័ន្ធអប់រំ
• ការអប់រំអំពីប្រែប្រួលអាកាសធាតុ។

សូមបញ្ជាក់ផងដែរថា កម្មវិធីបណ្តុះបណ្តាលនៃវគ្គបណ្តុះបណ្តាលទី២ ត្រូវបានរៀបចំឡើងតាមរយៈបីដំណាក់កាល ដូចខាងក្រោម៖
• ដំណាក់កាលទី១៖ ចាប់ពីថ្ងៃទី១២ ដល់ថ្ងៃទី១៥ ខែឧសភា ឆ្នាំ២០២៦ នៅទីក្រុងសូហ្វ៊ីយ៉ា ប្រទេសប៊ុលហ្ការី
• ដំណាក់កាលទី២៖ ចាប់ពីថ្ងៃទី២២ ដល់ថ្ងៃទី២៥ ខែកញ្ញា ឆ្នាំ២០២៦ នៅទីក្រុងហាណូយ ប្រទេសវៀតណាម
• ដំណាក់កាលទី៣៖ ចាប់ពីថ្ងៃទី២៦ ដល់ថ្ងៃទី២៩ ខែមករា ឆ្នាំ២០២៧ នៅរាជធានីភ្នំពេញ ប្រទេសកម្ពុជា។

កម្មវិធីបណ្តុះបណ្តាលនេះមានការចូលរួមពីបណ្តាប្រទេសដែលជាសមាជិកអង្គការ OIF ចំនួន៨ រួមមាន៖ សហរដ្ឋអាមេរិក (Louisiane) ប្រទេសកាណាដា (Ontario) ប្រទេសកម្ពុជា ប្រទេសអាមេនី ប្រទេសអង់ហ្គោឡា ប្រទេសកាប់វែរ ប្រទេសប៊ុលហ្ការី និងប្រទេសវៀតណាម ដែលមានសមាសភាពសិក្ខាកាម និងអ្នកជំនាញអន្តរជាតិចូលរួមសរុបចំនួន ៣៣រូប។

១៥ ឧសភា ២០២៦ | ប៊ុលហ្ការី A

កិច្ចប្រជុំផ្ទៃក្នុងនាយកដ្ឋានសហប្រតិបត្តិការអន្តរជាតិ និងកិច្ចការអាស៊ាន

រាជធានីភ្នំពេញ៖ នាព្រឹកថ្ងៃចន្ទ ទី៤ ខែឧសភា ឆ្នាំ២០២៦ លោកស្រី សេង ហ្សានីន ប្រធាននាយកដ្ឋានសហប្រតិបត្តិការអន្តរជាតិ និងកិច្ចការអាស៊ាន បានដឹកនាំកិច្ចប្រជុំផ្ទៃក្នុងនាយកដ្ឋាន ដោយមានការចូលរួមពីសំណាក់លោក លោកស្រីអនុប្រធាននាយកដ្ឋាន រួមទាំងលោក លោកស្រីប្រធានការិយាល័យ​ នៅសាលប្រជុំ នៃនាយកដ្ឋានសហប្រតិបត្តិការអន្តរជាតិ និងកិច្ចការអាស៊ាន។

កិច្ចប្រជុំនេះ បានផ្ដោតសំខាន់លើការពិភាក្សាលើចំណុចមួយចំនួន ដូចខាងក្រោម៖
១. វឌ្ឍនភាពការងារតាមការិយាល័យនីមួយៗ ក្នុងត្រីមាសទី១ នៃឆ្នាំ២០២៦
២. ការរៀបចំឡើងវិញនូវការបែងចែង និងកត់ត្រាទ្រព្យសម្បត្តិរដ្ឋរបស់នាយកដ្ឋាន
៣. ការពិនិត្យ និងពិភាក្សាលើសំណើសុំមេដាយការងារជូនថ្នាក់ដឹកនាំ និងបុគ្គលិកអប់រំ នៃនាយកដ្ឋាន

នៅក្នុងឱកាសនេះផងដែរ លោកស្រីប្រធាន បានថ្លែងអំណរគុណដល់សហការីទាំងអស់ ដែលបានលះបង់ទាំងកម្លាំងកាយ ចិត្ត និងពេលវេលា ដើម្បីបំពេញការងារប្រកបដោយប្រសិទ្ធភាព សមស្របទៅតាមចក្ខុវិស័យ គោលបំណង និងបេសកកម្ម របស់នាយកដា្ឋន។

៤ ឧសភា ២០២៦ | នាយកដ្ឋានសហប្រតិបត្ដិការអន្តរជាតិ និងកិច្ចការអាស៊ាន

កិច្ចប្រជុំស្ដីពីការពិនិត្យឡើងវិញទៅលើតារាងសកម្មភាព (Activity Matrix) នៃផែនការការងារអាស៊ានស្ដីពីការអប់រំ ២០២៦-២០៣០ (ASEAN Work Plan on Education 2026-2030)

អនឡាញ៖ នារសៀលថ្ងៃទី២៨ ខែមេសា ឆ្នាំ២០២៦ ថ្នាក់ដឹកនាំ និងមន្ត្រីនៃនាយកដ្ឋានសហប្រតិបត្តិការអន្តរជាតិ និងកិច្ចការអាស៊ាន និងជាក្រុមការងារមន្ត្រីបង្គោលសម្រាប់កិច្ចការអប់រំអាស៊ាន (SOM-ED Focal Point) បានសម្របសម្រួលរៀបចំកិច្ចប្រជុំស្ដីពី «ការពិនិត្យឡើងវិញទៅលើតារាងសកម្មភាព (Activity Matrix) នៃផែនការការងារអាស៊ានស្ដីពីការអប់រំ ២០២៦-២០៣០ (ASEAN Work Plan on Education 2026-2030) ក្រោមអធិបតីភាពរបស់លោកជំទាវសាស្ត្រាចារ្យបណ្ឌិត បូ ច័ន្ទគុលិកា អនុរដ្ឋលេខាធិការ និងជាឧត្តមមន្ត្រីអប់រំអាស៊ានសម្រាប់កម្ពុជា (SOM-ED Leader for Cambodia)។ កិច្ចប្រជុំនេះមានការចូលរួមពីថ្នាក់ដឹកនាំ មន្ត្រីបង្គោលសម្រាប់កិច្ចការអប់រំអាស៊ាន ក៏ដូចជាមន្ត្រីជំនាញតំណាងនាយកដ្ឋានពាក់ព័ន្ធផងដែរ។

គោលបំណងនៃកិច្ចប្រជុំនេះរួមមាន៖
១) ពង្រឹងភាពជាម្ចាស់ (Ownership) នៃសកម្មភាពដែលប្រទេសកម្ពុជានឹងដឹកនាំ (Lead) និងសហការដឹកនាំ (Co-Lead)
២) ពិនិត្យ ពិភាក្សា និងកែសម្រួលលើសកម្មភាពដែលប្រទេសកម្ពុជានឹងដឹកនាំ និងសហការដឹកនាំ ក្នុងតារាងសកម្មភាព (Activity Matrix) ជាមួយនាយកដ្ឋានជំនាញ និង
៣) ទទួលយកមតិយោបល់ និងធាតុចូលពីនាយកដ្ឋានពាក់ព័ន្ធក្នុងការកំណត់សកម្មភាពដែលនឹងត្រូវអនុវត្ត ជាមួយនឹងការដាក់ចេញនូវក្របខ័ណ្ឌពេលវេលាក្នុងការអនុវត្ត។

ក្នុងឱកាសនេះផងដែរ លោកជំទាវសាស្ត្រាចារ្យបណ្ឌិត អនុរដ្ឋលេខាធិការ បានថ្លែងអំណរគុណដល់ថ្នាក់ដឹកនាំ មន្ត្រីបង្គោល និងមន្ត្រីជំនាញដែលបានអញ្ជើញចូលរួមកិច្ចប្រជុំនេះដើម្បីធានាថាខ្លឹមសារនៃតារាងសកម្មភាពពិតជាមានភាពត្រឹមត្រូវ ជាក់លាក់ ច្បាស់លាស់ និងអាចអនុវត្តក្រោមក្របខ័ណ្ឌពេលវេលាសមស្រប។

សូមបញ្ជាក់ផងដែរថា បន្ទាប់ពីទទួលបានធាតុចូល និងការពិនិត្យចុងក្រោយពីប្រទេសជាសមាជិកទាំង១១ លេខាធិការដ្ឋានអាស៊ាន និងប្រទេសសិង្ហបុរី​ក្នុងនាមជាប្រធានកិច្ចប្រជុំឧត្តមមន្ត្រីអប់រំអាស៊ាន នឹងធ្វើបន្ដនីតិវិធីបន្ទាប់ដោយរៀបចំការពិគ្រោះយោបល់ចុងក្រោយស្ដីពីសេចក្ដីព្រាងចុងក្រោយនៃ ផែនការការងារអប់រំអាស៊ានស្ដីពីការអប់រំ ២០២៦-២០៣០ (ជំពូកទី១ ដល់ទី៤ និងតារាងសកម្មភាព) សម្រាប់គោរពជូនឧត្តមមន្ត្រីអប់រំអាស៊ាននៃប្រទេសជាសមាជិកអនុម័ត៕

តាមប្រព័ន្ធអនឡាញ | ២៨ មេសា ២០២៦