នាយកដ្ឋានរដ្ឋបាល សរុប

អបអរសាទរ ខួបទី៧៧ ទិវាកុមារអន្តរជាតិ (១មិថុនា) ក្រោមប្រធានបទ៖ «សន្តិភាព ជាមូលដ្ឋានគ្រឹះនៃការគោរពនិងកិច្ចគាំពារសិទ្ធិកុមារ»

១ មិថុនា ១៩៤៩ ~ ១ មិថុនា ២០២៦

👉ឆាណែលTelegram អគ្គនាយកដ្ឋានអត្តសញ្ញាណកម្ម⏬️
-Join Telegram📱 https://t.me/GDI_service_news
-Website🌐 http://www.gdi.gov.kh/
-ដើម្បីសាកសួរព័ត៌មាន រៀងរាល់ម៉ោងធ្វើការ ដោយឥតគិតថ្លៃ☎️1271 ឬ017 898 915

លោក ឧត្ដមសេនីយ៍ទោ ទិត្យ អានធីរ៉ា អញ្ជើញចូលរួមក្នុងពិធីបើកវគ្គបំពាក់បំប៉នពង្រឹងសមត្ថភាព ស្តីពី “ការងារពិធីការ” ជំនាន់ទី៣ ដល់មន្រ្តីចំណុះអគ្គនាយកដ្ឋានអត្តសញ្ញាណកម្ម។

អគ្គនាយកដ្ឋានអត្តសញ្ញាណកម្ម៖ នៅព្រឹកថ្ងៃព្រហស្បតិ៍ ១២កើត ខែជេស្ឋ ឆ្នាំមមី អដ្ឋស័ក ព.ស ២៥៧០ ត្រូវនឹងថ្ងៃទី២៨ ខែឧសភា ឆ្នាំ២០២៦ លោក ឧត្ដមសេនីយ៍ទោ ទិត្យ អានធីរ៉ា អនុប្រធាននាយកដ្ឋាន តំណាង លោកឧត្ដមសេនីយ៍ឯក ប៊ុន ធី ប្រធាននាយកដ្ឋានរដ្ឋបាល សរុប បានអញ្ជើញចូលរួមក្នុងពិធីបើកវគ្គបំពាក់បំប៉នពង្រឹងសមត្ថភាពស្តីពី “ការងារពិធីការ” ជំនាន់ទី៣ ក្រោមអធិបតីភាព ឯកឧត្តម ឧត្តមសេនីយ៍ឯក សាយ ម៉េងឈាង អគ្គនាយករង តំណាង ឯកឧត្តម ឧត្តមសេនីយ៍ឯក បណ្ឌិត តុប នេត អគ្គនាយក នៃអគ្គនាយកដ្ឋានអត្តសញ្ញាណកម្ម ដោយមានការអញ្ជើញចូលរួមពី លោក ឧត្តមសេនីយ៍ទោ ហម សុធានិត គ្រូឧត្តមកម្រិត២ ថ្នាក់លេខ១ អនុប្រធានអាសនៈចំណេះដឹងទូទៅ នៃក្រុមប្រឹក្សាអភិវឌ្ឍន៍គ្រូនគរបាលជាតិ នៃសាលាបណ្ឌិត្យសភានគរបាលកម្ពុជា ជាគ្រូឧទ្ទេស។

វគ្គបំពាក់បំប៉ននេះប្រព្រឹត្តទៅរយៈពេល២ថ្ងៃ គិតចាប់ពីថ្ងៃទី២៨ និង២៩ ខែឧសភា ឆ្នាំ២០២៦ នៅសាលប្រជុំអគ្គនាយកដ្ឋានអត្តសញ្ញាណកម្ម។

ដោយមានការអញ្ជើញចូលរួមពីសំណាក់ លោក វរសេនីយ៍ឯក ស៊ុយ ធឿន នាយការិយាល័យបុគ្គលិក និងបណ្ដុះបណ្ដាល ចំណុះនាយកដ្ឋានរដ្ឋបាល សរុប លោកប្រធាននាយកដ្ឋាន លោក លោកស្រីអនុប្រធាននាយកដ្ឋាន លោកនាយការិយាល័យ ព្រមទាំងអស់លោក លោកស្រី ដែលជាសិក្ខាកាមចំណុះនាយកដ្ឋាននានា នៃអគ្គនាយកដ្ឋានអត្តសញ្ញាណកម្មផងដែរ។

លោក ឧត្ដមសេនីយ៍ឯក ប៊ុន ធី អញ្ជើញចូលរួមក្នុងកិច្ចប្រជុំលើកទី១ របស់គណៈកម្មការជាតិផ្ដល់យោបល់លើការដកសញ្ជាតិខ្មែរពីកំណើត (គ.ជ.ដ.ខ)។

ទីស្តីការក្រសួងមហាផ្ទៃ៖ នៅព្រឹកថ្ងៃអង្គារ ១០កើត ខែជេស្ឋ ឆ្នាំមមី អដ្ឋស័ក ព.ស ២៥៧០ ត្រូវនឹងថ្ងៃទី២៦ ខែឧសភា ឆ្នាំ២០២៦ លោក ឧត្ដមសេនីយ៍ឯក ប៊ុន ធី ប្រធាននាយកដ្ឋានរដ្ឋបាល សរុប រួមដំណើរ ឯកឧត្តម ឧត្តមសេនីយ៍ឯក បណ្ឌិត តុប នេត អគ្គនាយក នៃអគ្គនាយកដ្ឋានអត្តសញ្ញាណកម្ម ព្រមទាំងថ្នាក់ដឹកនាំ នៃអគ្គនាយកដ្ឋានអត្តសញ្ញាណកម្ម អញ្ជើញចូលរួមក្នុងកិច្ចប្រជុំលើកទី១ របស់គ.ជ.ដ.ខ. ដើម្បីប្រកាសសមាសភាព និងអនុម័តលើបទបញ្ជាផ្ទៃក្នុងគណៈកម្មការជាតិផ្ដល់យោបល់លើការដកសញ្ជាតិខ្មែរពីកំណើត ក្រោមអធិបតីភាពដ៏ខ្ពង់ខ្ពស់ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ និងជាប្រធានគ.ជ.ដ.ខ.។

ក្នុងកិច្ចប្រជុំនេះ ក៏មានការអញ្ជើញចូលរួមពី ថ្នាក់ដឹកនាំក្រសួងមហាផ្ទៃ ឯកឧត្តម លោកជំទាវ តំណាងក្រសួង ស្ថាប័ន ដែលជាអនុប្រធានសមាជិក សមាជិកា គ.ជ.ដ.ខ. និងឯកឧត្តម នាយឧត្តមសេនីយ៍ អគ្គស្នងការនគរបាលជាតិ ឯកឧត្តម អគ្គនាយក អគ្គស្នងការរង អគ្គនាយករង ព្រមទាំងលោកប្រធាននាយកដ្ឋាន លោក លោកស្រីអនុប្រធាននាយកដ្ឋាន និងក្រុមការងារពាក់ព័ន្ធ នៃអគ្គនាយកដ្ឋានអត្តសញ្ញាណកម្ម ព្រមទាំងមន្ត្រីជំនាញពាក់ព័ន្ធ។

លោក ឧត្តមសេនីយ៍ឯក ប៊ុន ធី អញ្ជើញចូលរួមកិច្ចប្រជុំពិនិត្យវឌ្ឍនភាពការងាររៀបចំផែនការយុទ្ធសាស្រ្តជាតិ ស្ដីពីអត្តសញ្ញាណកម្ម (ដំណាក់កាលទី២) ២០២៦-២០៣៥។

អគ្គនាយកដ្ឋានអត្តសញ្ញាណកម្ម៖ នៅព្រឹកថ្ងៃព្រហស្បតិ៍ ៥កើត ខែជេស្ឋ ឆ្នាំមមី អដ្ឋស័ក ព.ស ២៥៧០ ត្រូវនឹងថ្ងៃទី២១ ខែឧសភា ឆ្នាំ២០២៦ លោក ឧត្តមសេនីយ៍ឯក ប៊ុន ធី ប្រធាននាយកដ្ឋានរដ្ឋបាល សរុប នៃអគ្គនាយកដ្ឋានអត្តសញ្ញាណកម្ម បានអញ្ជើញចូលរួមកិច្ចប្រជុំពិនិត្យវឌ្ឍនភាពការងាររៀបចំផែនការយុទ្ធសាស្រ្តជាតិ ស្ដីពីអត្តសញ្ញាណកម្ម (ដំណាក់កាលទី២) ២០២៦-២០៣៥ ក្រោមអធិបតីភាព ឯកឧត្តម ឧត្តមសេនីយ៍ឯក បណ្ឌិត តុប នេត អគ្គនាយក នៃអគ្គនាយកដ្ឋានអត្តសញ្ញាណកម្ម

កិច្ចប្រជុំពិនិត្យវឌ្ឍនភាពនេះ ក៏មានការអញ្ជើញចូលរួមពី ឯកឧត្តម អគ្គនាយករង លោកប្រធាននាយកដ្ឋាន លោក លោកស្រីអនុប្រធាននាយកដ្ឋាន តំណាងអង្គការ Vital Strategies លោកនាយ/ប្រធានការិយាល័យ និងក្រុមការងារចំណុះនាយកដ្ឋានពាក់ព័ន្ធ នៃអគ្គនាយកដ្ឋានអត្តសញ្ញាណកម្មផងដែរ។

អគ្គនាយកដ្ឋានអត្តសញ្ញាណកម្ម ក្រសួងមហាផ្ទៃ មានកិត្តិយសសូមជម្រាបជូនសាធារណជន មេត្តាជ្រាបថា កាលពីថ្ងៃទី១៨ ខែឧសភា ឆ្នាំ២០២៦ មានគណនី TikTok ឈ្មោះ “thodanny1” បានផ្សព្វផ្សាយវីដេអូមួយ ដោយបានលើកឡើងអំពីការទាមទារប្រាក់ចំនួន ១០ដុល្លារអាម៉េរិក ជាថ្នូរនឹងការទទួលយកអត្តសញ្ញាណបណ្ណសញ្ជាតិខ្មែរ ដែលអាចធ្វើឱ្យសាធារណជនមានការយល់ច្រឡំថា ជាការទាមទារប្រាក់ក្នុងការផ្តល់សេវាអត្តសញ្ញាណបណ្ណសញ្ជាតិខ្មែរ។

ពាក់ព័ន្ធនឹងករណីខាងលើ អគ្គនាយកដ្ឋានអត្តសញ្ញាណកម្ម សូមបញ្ជាក់ជូនថា ករណីនេះមិនមែនជាការទាមទារប្រាក់ពីមន្ត្រីផ្តល់សេវាអត្តសញ្ញាណកម្មឡើយ។ តាមការស្រាវជ្រាវជាក់ស្តែង បានបង្ហាញថា មានប្រជាពលរដ្ឋមួយចំនួនធ្លាប់ដាក់អត្តសញ្ញាណបណ្ណសញ្ជាតិខ្មែរទុកនៅក្រុមហ៊ុនឯកជន ក្នុងគោលបំណងបំពេញបែបបទធ្វើការងារ។ លុះនៅពេលលាឈប់ពីការងារ និងស្នើសុំយកអត្តសញ្ញាណបណ្ណរបស់ខ្លួនវិញ ត្រូវបានបុគ្គលិកក្រុមហ៊ុនទាមទារថវិកាចំនួន ១០ដុល្លារអាម៉េរិក។

អាស្រ័យហេតុនេះ ការផ្សព្វផ្សាយព័ត៌មានដោយមិនបានបញ្ជាក់ប្រភព និងខ្លឹមសារឱ្យបានច្បាស់លាស់ អាចធ្វើឱ្យសាធារណមតិយល់ច្រឡំ និងប៉ះពាល់ដល់កិត្តិយស និងកេរ្តិ៍ឈ្មោះរបស់អគ្គនាយកដ្ឋានអត្តសញ្ញាណកម្ម ក្រសួងមហាផ្ទៃ ជាពិសេសលើការផ្តល់សេវាអត្តសញ្ញាណបណ្ណសញ្ជាតិខ្មែរ ជូនប្រជាពលរដ្ឋ។

ក្នុងន័យនេះ អគ្គនាយកដ្ឋានអត្តសញ្ញាណកម្ម សូមអំពាវនាវដល់ម្ចាស់គណនី TikTok ឈ្មោះ “thodanny1” ធ្វើការកែតម្រូវ ឬលុបចោលវីដេអូដែលមានខ្លឹមសារមិនត្រឹមត្រូវខាងលើ និងសូមចូលរួមទប់ស្កាត់ការផ្សព្វផ្សាយព័ត៌មានមិនពិត ឬព័ត៌មានដែលអាចបង្កឱ្យមានការភាន់ច្រឡំដល់សាធារណជន។

ជាមួយគ្នានេះ អគ្គនាយកដ្ឋានអត្តសញ្ញាណកម្ម សូមរំលឹកផងដែរថា យោងតាមច្បាប់ស្តីពីអត្រានុកូលដ្ឋាន ស្ថិតិអត្រានុកូលដ្ឋាន និងអត្តសញ្ញាណកម្ម មាត្រា១២៩ បានកំណត់ថា «អត្តសញ្ញាណបណ្ណសញ្ជាតិខ្មែរ ជាឯកសារផ្លូវការសម្រាប់បញ្ជាក់អត្តសញ្ញាណរបស់បុគ្គលដែលមានសញ្ជាតិខ្មែរ ហើយមិនអនុញ្ញាតឱ្យផ្ទេរ ឬយកទៅធ្វើជាវត្ថុធានា ឬបង្កើតសិទ្ធិប្រតិភោគណាមួយឡើយ»។ ដូច្នេះ ប្រជាពលរដ្ឋមិនគួរដាក់អត្តសញ្ញាណបណ្ណសញ្ជាតិខ្មែរទុកជាការធានា ឬប្រគល់ឱ្យភាគីណាមួយរក្សាទុកដោយខុសគោលការណ៍ច្បាប់នោះទេ។
សូមអរគុណ

អនុវត្តតាមគោលការណ៍ណែនាំដ៏ខ្ពង់ខ្ពស់របស់ ឯកឧត្ដម ឧត្ដមសេនីយ៍ឯក បណ្ឌិត តុប នេត អគ្គនាយក នៃអគ្គនាយកដ្ឋានអត្តសញ្ញាណកម្ម។

រាជធានីភ្នំពេញ៖ នៅថ្ងៃពុធ ៤កើត ខែជេស្ឋ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី២០ ខែឧសភា ឆ្នាំ២០២៦ លោក វរសេនីយ៍ទោ រស់ ទិត្យតារា នាយការិយាល័យផ្សព្វផ្សាយអប់រំ ចំណុះនាយកដ្ឋានរដ្ឋបាល សរុប រួមដំណើរជាមួយ លោកឧត្ដមសេនីយ៍ទោ ហម រដ្ឋា អនុប្រធានក្រុមប្រចាំការសេវាកម្មអត្តសញ្ញាណកម្ម និងប្រតិកម្មរហ័ស តំណាង ឯកឧត្តម ឧត្តមសេនីយ៍ឯក សាយ ម៉េងឈាង អគ្គនាយករង និងជាប្រធានក្រុមប្រចាំការសេវាកម្មអត្តសញ្ញាណកម្ម និងប្រតិកម្មរហ័ស នៃអគ្គនាយកដ្ឋានអត្តសញ្ញាណកម្ម បានដឹកនាំក្រុមការងារសហការជាមួយនាយកដ្ឋានជំនាញ និងទីស្នាក់ការផ្ដល់សេវាអត្តសញ្ញាណកម្ម បន្តចុះបើកប្រអប់សំបុត្រទទួលមតិ សំណូមពរប្រជាពលរដ្ឋ ដែលបានដាក់នៅតាមបណ្ដាក្លោងទ្វារមុខអគ្គនាយកដ្ឋានអត្តសញ្ញាណកម្ម, មុខក្លោងទ្វារនាយកដ្ឋានអត្តសញ្ញាណបណ្ណសញ្ជាតិខ្មែរ និងនាយកដ្ឋានលិខិតឆ្លងដែន, បេឡាជាតិសន្តិសុខសង្គម (ប.ស.ស), ទីស្នាក់ការផ្ដល់លិខិតឆ្លងដែនធម្មតា ទីស្នាក់ការផ្ដល់អត្តសញ្ញាណបណ្ណសញ្ជាតិខ្មែរ ផ្សារទំនើបអុីអន២សែនសុខ, និងទីស្នាក់ការផ្ដល់អត្តសញ្ញាណបណ្ណសញ្ជាតិខ្មែរ ទីស្នាក់ការផ្ដល់លិខិតឆ្លងដែនធម្មតា ផ្សារទំនើបអុីអនម៉លមានជ័យ ដើម្បីយកមកពិនិត្យ និងដោះស្រាយ។

ប្រអប់សំបុត្រសេវាអត្តសញ្ញាណកម្មនេះ និងទទួលយកនូវរាល់មតិ យោបល់ ពាក្យបណ្តឹងទាំងអស់របស់ប្រជាពលរដ្ឋ ដើម្បីពិនិត្យ ដោះស្រាយ និងរាយការណ៍ជូនថ្នាក់ដឹកនាំបានជ្រាប បន្ថែមពីលើយន្តការដែលកំពុងអនុវត្តជាប្រចាំថ្ងៃរបស់អគ្គនាយកដ្ឋានអត្តសញ្ញាណកម្ម ដែលមានមន្ត្រីប្រចាំការរង់ចាំទទួលដោះស្រាយ តាមរយៈ App កម្មវិធី GDI eServices លេខទូរស័ព្ទប្រចាំការ ១២៧១ / ០១៧ ៨៩៨ ៩១៥ ឬ ទំព័រហ្វេសប៊ុកផ្លូវការរបស់អគ្គនាយកដ្ឋានអត្តសញ្ញាណកម្ម។

អបអសាទរខួបអនុស្សាវរីយ៍លើកទី ៨១ ថ្ងៃកំណើតនគរបាលជាតិកម្ពុជា
(១៦ ឧសភា ១៩៤៥-១៦ ឧសភា ២០២៦)

នគរបាលជាតិកម្ពុជា ត្រូវបានបង្កើតឡើងនៅថ្ងៃទី១៦ ឧសភា ១៩៤៥ ដែលជាអង្គប្រតិបត្តិច្បាប់ពោរពេញដោយពលានុភាព ប្រសូត្រឡើងក្រោមស្នាព្រះហស្តដ៏ឧត្តុង្គឧត្តមរបស់ ព្រះករុណាព្រះមហាវីរក្សត្រ ព្រះបាទសម្តេចព្រះ នរោត្តម សីហនុ «ព្រះបរមរតនកោដ្ឋ» ជាទីគោរពសក្ការដ៏ខ្ពង់ខ្ពស់បំផុតនៃយើង។

កិច្ចប្រជុំបើកសវនកម្មផ្ទៃក្នុង សម្រាប់ការិយបរិច្ឆេទឆ្នាំ២០២៥ និងបណ្ដាឆ្នាំពាក់ព័ន្ធ របស់នាយកដ្ឋានរដ្ឋបាល សរុប។

អគ្គនាយកដ្ឋានអត្តសញ្ញាណកម្ម៖ នៅរសៀលថ្ងៃពុធ ១២រោច ខែពិសាខ ឆ្នាំមមី អដ្ឋស័ក ព.ស ២៥៧០ ត្រូវនឹងថ្ងៃទី១៣ ខែឧសភា ឆ្នាំ២០២៦ លោក ឧត្តមសេនីយ៍ឯក ប៊ុន ធី ប្រធាននាយកដ្ឋាន ដឹកនាំលោក លោកស្រីអនុប្រធាននាយកដ្ឋាន លោកនាយការិយាល័យទាំង៨ ចំណុះនាយកដ្ឋានរដ្ឋបាល សរុប នៃអគ្គនាយកដ្ឋានអត្តសញ្ញាណកម្ម បានអញ្ជើញចូលរួមក្នុងកិច្ចប្រជុំបើកសវនកម្មផ្ទៃក្នុង សម្រាប់ការិយបរិច្ឆេទឆ្នាំ២០២៥ និងបណ្ដាឆ្នាំពាក់ព័ន្ធ របស់នាយកដ្ឋានរដ្ឋបាល សរុប ចំណុះអគ្គនាយកដ្ឋានអត្តសញ្ញាណកម្ម ក្រោមអធិបតីភាព ឯកឧត្ដម ឧត្ដមសេនីយ៍ទោ ម៉ា និរិទ្ធ អគ្គនាយករង តំណាងឯកឧត្ដម ឧត្ដមសេនីយ៍ឯក ងួន ស្រេង អគ្គនាយក នៃអគ្គនាយកដ្ឋានសវនកម្មផ្ទៃក្នុង ក្រសួងមហាផ្ទៃ។

លោក ឧត្ដមសេនីយ៍ឯក ប៊ុន ធី អញ្ជើញចូលរួមកិច្ចប្រជុំពិនិត្យវឌ្ឍនភាពការងារជំរុញផ្ដល់ឯកសារបញ្ជាក់អត្តសញ្ញាណ ជូនប្រជាពលរដ្ឋខ្មែរដែលទើបវិលត្រលប់ពីប្រទេសថៃ និងប្រជាពលរដ្ឋខ្មែរដែលពុំទាន់មានឯកសារគ្រប់គ្រាន់ និងការផ្ដល់អត្តសញ្ញាណបណ្ណសញ្ជាតិខ្មែរ។

ទីស្ដីការក្រសួងមហាផ្ទៃ៖ នៅព្រឹកថ្ងៃព្រហស្បតិ៍ ៦រោច ខែពិសាខ ឆ្នាំមមី អដ្ឋស័ក ព.ស. ២៥៧០ ត្រូវនឹងថ្ងៃទី៧ ខែឧសភា ឆ្នាំ២០២៦ លោក ឧត្ដមសេនីយ៍ឯក ប៊ុន ធី ប្រធាននាយកដ្ឋាន រួមទាំងលោកអនុប្រធាននាយកដ្ឋាន នាយការិយាល័យ ព្រមទាំងលោក លោកស្រីចំណុះនាយកដ្ឋានរដ្ឋបាល សរុប អមដំណើរ ឯកឧត្តម ឧត្តមសេនីយ៍ឯក បណ្ឌិត តុប នេត អគ្គនាយក នៃអគ្គនាយកដ្ឋានអត្តសញ្ញាណកម្ម បានអញ្ជេីញចូលរួមក្នុងកិច្ចប្រជុំពិនិត្យវឌ្ឍនភាពការងារជំរុញផ្ដល់ឯកសារបញ្ជាក់អត្តសញ្ញាណ ជូនប្រជាពលរដ្ឋខ្មែរដែលទើបវិលត្រលប់ពីប្រទេសថៃ និងប្រជាពលរដ្ឋខ្មែរទូទៅដែលពុំទាន់មានឯកសារគ្រប់គ្រាន់ និងវឌ្ឍនភាព នៃការផ្ដល់អត្តសញ្ញាណបណ្ណសញ្ជាតិខ្មែរ ក្រោមអធិបតីភាព ឯកឧត្តម ប៉ាវ ហម ផាន រដ្ឋលេខាធិការក្រសួងមហាផ្ទៃ ទទួលបន្ទុកអគ្គនាយកដ្ឋានអត្តសញ្ញាណកម្ម។

ក្នុងកិច្ចប្រជុំនេះ មានការអញ្ជើញចូលរួមពី ឯកឧត្តម លោកជំទាវ អគ្គនាយករង លោកប្រធាននាយកដ្ឋាន ព្រមទាំងលោក អនុប្រធាននាយកដ្ឋាន នាយ/ប្រធាន និងនាយរង/អនុប្រធានការិយាល័យ និងមន្ត្រីចំណុះនាយកដ្ឋានពាក់ព័ន្ធ នៃអគ្គនាយកដ្ឋានអត្តសញ្ញាណកម្មផងដែរ។

អបអរសាទរព្រះរាជពិធី ច្រត់ព្រះនង្គ័ល