Heng Sophannarith

ប.ស.ស. បន្តចុះផ្សព្វផ្សាយស្តីពីការអនុវត្តរបបសន្ដិសុខសង្គមផ្នែកហានិភ័យការងារ និងផ្នែកថែទាំសុខភាព ជូនដល់ថ្នាក់ដឹកនាំ និងមន្ត្រីរាជការក្រោមឱវាទរដ្ឋបាលខេត្តស្វាយរៀង
------------------------
(ស្វាយរៀង)៖ នាព្រឹកថ្ងៃសុក្រ ទី២៩ ខែឧសភា ឆ្នាំ២០២៦ នេះ ឯកឧត្តមបណ្ឌិត ហេង សុផាន់ណារិទ្ធ អគ្គនាយករង ប.ស.ស. តំណាងឯកឧត្តម ម៉េង ហុង ប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស. នៃក្រសួងការងារ និងបណ្តុះបណ្តាលវិជ្ជាជីវៈ បានអញ្ជើញជាសហអធិបតីក្នុងពិធីបើកសិក្ខាសាលាផ្សព្វផ្សាយស្ដីពី ការអនុវត្តរបបសន្ដិសុខសង្គមផ្នែកហានិភ័យការងារ និងផ្នែកថែទាំសុខភាពសម្រាប់មន្ត្រីសាធារណៈ ជូនដល់ថ្នាក់ដឹកនាំ និងមន្ត្រីរាជការក្រោមឱវាទរដ្ឋបាលខេត្តស្វាយរៀង សរុបប្រមាណ ២៥០នាក់ នៅសាលប្រជុំសាលាខេត្តស្វាយរៀង។

ឯកឧត្តមបណ្ឌិតអគ្គនាយករង ប.ស.ស. បានលើកឡើងថា ប.ស.ស. បានបន្តរៀបចំសិក្ខាសាលាផ្សព្វផ្សាយនេះឡើង ក្នុងគោលបំណងផ្តល់ឱកាសឱ្យមន្ត្រីរាជការថ្នាក់ក្រោមជាតិ អាចស្វែងយល់ឱ្យកាន់តែច្បាស់អំពីវឌ្ឍនភាព នៃការអនុវត្ត និងអត្ថប្រយោជន៍នានា នៃរបបសន្តិសុខសង្គម ដើម្បីយកទៅផ្សព្វផ្សាយបន្តឱ្យកាន់តែទូលំទូលាយ និងមានប្រសិទ្ធភាពដល់មន្ត្រីរាជការនៅតាមមូលដ្ឋាន។

ឯកឧត្តមបណ្ឌិតអគ្គនាយករង បានបន្តទៀតថា រាជរដ្ឋាភិបាលកម្ពុជា បានដាក់ចេញនូវ ក្របខណ្ឌគោលនយោបាយជាតិគាំពារសង្គម ឆ្នាំ២០២៤–២០៣៥ ក្នុងគោលបំណងបន្តអភិវឌ្ឍប្រព័ន្ធគាំពារសង្គមឱ្យកាន់តែរឹងមាំ មានភាពធន់ និងអាចឆ្លើយតបបានល្អប្រសើរចំពោះការប្រែប្រួលអាកាសធាតុ គ្រោះអាសន្ន និងវិបត្តិនានា ព្រមទាំងឆ្លើយតបនឹងហានិភ័យនៃវដ្តជីវិតរបស់មនុស្ស ចាប់ពីដំណាក់កាលមាតុភាព កុមារភាព ជរាភាព រហូតដល់មរណភាព។

ក្នុងនោះ រាជរដ្ឋាភិបាលបានប្រគល់ភារកិច្ចដល់ បេឡាជាតិសន្តិសុខសង្គម (ប.ស.ស.) ជាប្រតិបត្តិករតែមួយគត់ក្នុងការអនុវត្តរបបសន្តិសុខសង្គម រួមមាន ផ្នែកហានិភ័យការងារ ផ្នែកថែទាំសុខភាព ផ្នែកប្រាក់សោធន និងផ្នែកនិកម្មភាពការងារ។

ក្នុងឱកាសជាមួយគ្នានោះដែរ ឯកឧត្តម ម៉ែន អេង អភិបាលរង នៃគណៈអភិបាលខេត្តស្វាយរៀង បានមានមតិសំណេះសំណាល សម្តែងនូវការកោតសរសើរ និងថ្លែងអំណរគុណយ៉ាងជ្រាលជ្រៅចំពោះថ្នាក់ដឹកនាំ ប.ស.ស. ព្រមទាំងបានផ្តាំផ្ញើ និងជំរុញដល់អង្គសិក្ខាសាលាទាំងអស់ ត្រូវយកចិត្តទុកដាក់ស្តាប់បទបង្ហាញពីមន្ត្រីជំនាញ ដើម្បីទទួលបានចំណេះដឹងច្បាស់លាស់ អាចផ្សព្វផ្សាយបន្តទៅកាន់មន្ត្រីក្រោមឱវាទ ពិសេសមន្ត្រីរាជការ ដែលមានសហព័ទ្ធ (ប្ដី ឬប្រពន្ធ) និងកូនក្នុងបន្ទុក ត្រូវទៅចុះឈ្មោះជាសមាជិក ប.ស.ស. នៅសាខាដែលនៅជិតបំផុត ដើម្បីទទួលបានការគាំពារសុខុមាលភាព និងអត្ថប្រយោជន៍នានាស្របតាមបទប្បញ្ញត្តិជាធរមាន៕

បុគ្គលិកអប់រំ និងនិស្សិត នៃសាកលវិទ្យាល័យប៊ែលធី អន្តរជាតិ ទទួលបានការស្វែងយល់អំពីសិទ្ធិជាមូលដ្ឋាននៃការអនុវត្តរបបសន្តិសុខសង្គម ពី ប.ស.ស.
.............
(ភ្នំពេញ)៖ នាព្រឹកថ្ងៃទី២៨ ខែឧសភា ឆ្នាំ២០២៦ នេះ ឯកឧត្តមបណ្ឌិត ហេង សុផាន់ណារិទ្ធ អគ្គនាយករង ប.ស.ស. តំណាង ឯកឧត្តម ម៉េង ហុង ប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស. នៃក្រសួងការងារ និងបណ្តុះបណ្តាលវិជ្ជាជីវៈ បានអញ្ជើញជាអធិបតីក្នុងពិធីបើកសិក្ខាសាលា បញ្ជ្រាបការយល់ដឹងអំពីសិទ្ធិជាមូលដ្ឋាន នៃការអនុវត្តរបបសន្តិសុខសង្គម ជូនដល់បុគ្គលិកអប់រំ និងនិស្សិត នៃសាកលវិទ្យាល័យប៊ែលធី អន្តរជាតិ ដោយមានអ្នកចូលរួមប្រមាណជាង ២០០នាក់។

ក្នុងឱកាសនោះ ឯកឧត្តមបណ្ឌិតអគ្គនាយករង ប.ស.ស. មានប្រសាសន៍ថា សិក្ខាសាលានេះ រៀបចំឡើងក្នុងគោលបំណងដើម្បីផ្តល់ឱកាសឱ្យសិស្ស និស្សិត ដែលជាកម្លាំងពលកម្មមានសក្ដានុពលនាពេលអនាគត បានយល់ដឹងពីសិទ្ធិ និងកាតព្វកិច្ចក្នុងការចូលរួមក្នុងរបបសន្តិសុខសង្គម។

ជាមួយគ្នានោះ ឯកឧត្តមបណ្ឌិតអគ្គនាយករង បានបន្តទៀតថា មន្ត្រីរាជការ និងបុគ្គលិកអប់រំ នឹងបានយល់ដឹងកាន់តែច្បាស់ពីវឌ្ឍនភាព និងគោលនយោបាយថ្មីៗរបស់រាជរដ្ឋាភិបាល ជាពិសេសរបបសន្តិសុខសង្គមផ្នែកថែទាំសុខភាព តាមរបបភាគទានដោយស្ម័គ្រចិត្ត សម្រាប់បុគ្គលស្វ័យនិយោជន៍ និងអ្នកក្នុងបន្ទុកសមាជិក ប.ស.ស.។

ទន្ទឹមនឹងនោះ លោក ភួង ភិរម្យ សាកលវិទ្យាធិការរង នៃសាកលវិទ្យាល័យប៊ែលធី អន្តរជាតិ បានថ្លែងអំណរគុណដល់ថ្នាក់ដឹកនាំ ប.ស.ស. និងជំរុញលើកទឹកចិត្តដល់សិក្ខាកាមទាំងអស់ ឱ្យខិតខំយកចិត្តទុកដាក់ស្តាប់ ក្រេបជញ្ជក់យកចំណេះដឹង បទពិសោធល្អៗ ដើម្បីជាទុនបន្ថែមក្នុងការអភិវឌ្ឍសមត្ថភាពខ្លួនឯងបន្ថែមទៀត។

ជាទីបញ្ចប់ ឯកឧត្តមបណ្ឌិតអគ្គនាយករង បានថ្លែងនូវការផ្ដាំផ្ញើដល់អ្នកចូលរួមទាំងអស់ ត្រូវយកចិត្តទុកដាក់ត្រងត្រាប់ស្ដាប់នូវការធ្វើបទបង្ហាញរបស់មន្រ្តីជំនាញ ប.ស.ស. ដោយស្មារតីទទួលខុសត្រូវខ្ពស់ ព្រមទាំងចូលរួមលើកជាសំណួរ ឬចម្ងល់ផ្សេងៗ ដើម្បីទទួលបានការពន្យល់បន្ថែមឱ្យបានយល់កាន់តែច្បាស់លាស់ ត្រឹមត្រូវ និងអាចយកចំណេះដឹងទាំងនេះ ទៅធ្វើការផ្សព្វផ្សាយបន្តបានយ៉ាងមានប្រសិទ្ធភាព៕

ឯកឧត្តមបណ្ឌិត ហេង សុផាន់ណារិទ្ធ ដឹកនាំកិច្ចប្រជុំបូកសរុបលទ្ធផលការងារសម្រេចបានប្រចាំខែឧសភា និងពិនិត្យទិសដៅអនុវត្តការងារបន្តរបស់នាយកដ្ឋានចំនួន ៣ នៃ ប.ស.ស.
-------------------------
(ភ្នំពេញ)៖ នាសៀលថ្ងៃទី២៦ ខែឧសភា ឆ្នាំ២០២៦នេះ ឯកឧត្តមបណ្ឌិត ហេង សុផាន់ណារិទ្ធ អគ្គនាយករង ប.ស.ស. នៃក្រសួងការងារ និងបណ្ដុះបណ្ដាលវិជ្ជាជីវៈ បានអញ្ជើញដឹកនាំកិច្ចប្រជុំបូកសរុបលទ្ធផលការងារសម្រេចបានប្រចាំខែឧសភា និងពិនិត្យទិសដៅអនុវត្តការងារបន្ត របស់នាយកដ្ឋានចំនួន៣ រួមមាន នាយកដ្ឋានរដ្ឋបាល និងគ្រប់គ្រងធនធានមនុស្ស នាយកដ្ឋានសេវាអតិថិជន និងទំនាក់ទំនងសាធារណ: ព្រមទាំងនាយកដ្ឋានបញ្ជិកា និងភាគទាន នៃ ប.ស.ស. ដើម្បីត្រួតពិនិត្យលទ្ធផលការងារសម្រេចបាន និងលើកឡើងអំពីបញ្ហាប្រឈម សំណូមពរ និងផែនការការងារអនុវត្តបន្ត។

បន្ទាប់ពីបានស្ដាប់នូវរបាយការណ៍ និងការលើកឡើងអំពីបញ្ហាប្រឈមនានា របស់នាយកដ្ឋានទាំង៣ ឯកឧត្តមបណ្ឌិតអគ្គនាយករង ប.ស.ស. បានផ្ដល់អនុសាសន៍ណែនាំទៅតាមនាយកដ្ឋាននីមួយៗ ដោយសម្រាប់នាយកដ្ឋានរដ្ឋបាល និងគ្រប់គ្រងធនធានមនុស្ស ឯកឧត្តមបណ្ឌិតអគ្គនាយករង បានជំរុញឱ្យបន្តសហការសម្របសម្រួល និងផ្ទៀងផ្ទាត់ទិន្នន័យមន្ត្រី និងបុគ្គលិក ដើម្បីពន្លឿនការងារពាក់ព័ន្ធ នឹងការជំរឿនមន្ត្រី បុគ្គលិករបស់ ប.ស.ស. ឱ្យបានត្រឹមត្រូវ និងច្បាស់លាស់ ស្របតាមតម្រូវការជាក់ស្តែងរបស់ក្រសួងមុខងារសាធារណៈ។

ទន្ទឹមនឹងនេះ​ សម្រាប់នាយកដ្ឋានសេវាអតិថិជន និងទំនាក់ទំនងសាធារណៈ ឯកឧត្តមបណ្ឌិតអគ្គនាយករង បានជំរុញក្រុមការងារផ្ដល់ព័ត៌មានតាមរយ:លេខ ១២៨៦ ត្រូវខិតខំដោះស្រាយរាល់បញ្ហា និងចម្ងល់នានារបស់អតិថិជនឱ្យបានទាន់ពេលវេលា ជាពិសេសថ្នាក់ដឹកនាំគ្រប់លំដាប់ថ្នាក់ ត្រូវបន្តចែករំលែកនូវបទប្បញ្ញត្តិថ្មីៗពាក់ព័ន្ធនឹងការងារប្រចាំថ្ងៃ និងរៀបចំការបណ្តុះបណ្តាលបន្ថែម ដើម្បីធានាបានថារាល់ការផ្តល់សេវាដល់សមាជិក ប.ស.ស. បានត្រឹមត្រូវ និងមានប្រសិទ្ធភាពខ្ពស់។

ជាមួយគ្នានេះ សម្រាប់នាយកដ្ឋានបញ្ជិកា និងភាគទាន ឯកឧត្តមបណ្ឌិតអគ្គនាយករង ក៏បានជំរុញដល់មន្ត្រីជំនាញជួរមុខ នៅពេលផ្តល់ប័ណ្ណសមាជិក ប.ស.ស. ជូនដល់ប្រជាពលរដ្ឋ ត្រូវពន្យល់ណែនាំឱ្យបានច្បាស់លាស់អំពីលក្ខខណ្ឌនៃការប្រើប្រាស់ប័ណ្ណ។ ជាពិសេស ត្រូវពន្យល់ដល់ «បុគ្គលស្វ័យនិយោជន៍» ឱ្យបានយល់ច្បាស់ក្នុងករណីខកខានមិនបានបង់ភាគទានចាប់ពី ៦ខែឡើងទៅ នោះប្រព័ន្ធនឹងចាត់ទុកថាសមាជិកបោះបង់សមាជិកភាព ប.ស.ស. តាមរបបភាគទានដោយស្ម័គ្រចិត្តដោយស្វ័យប្រវត្តិ។ ការពន្យល់ឱ្យបានស៊ីជម្រៅនេះ គឺដើម្បីបង្កើនការយល់ដឹង និងជៀសវាងមានបណ្តឹងតវ៉ាណាមួយកើតឡើងជាយថាហេតុ។

បន្ថែមពីការងារខាងលើ ឯកឧត្តមបណ្ឌិតអគ្គនាយករង ក្នុងនាមជាប្រធានក្រុមការងារ ស.ផ.ក ក៏បានបង្ហាញការយកចិត្តទុកដាក់ខ្ពស់លើសុវត្ថិភាពធ្វើដំណើររបស់បងប្អូនកម្មករនិយោជិត ដោយបានចង្អុលបង្ហាញដល់ក្រុមការងារបច្ចេកទេស ត្រូវសហការជាមួយស្ថាប័នពាក់ព័ន្ធ ដើម្បីចុះជួបសំណេះសំណាលផ្ទាល់ជាមួយអ្នកបើកបររថយន្តដឹកកម្មករនិយោជិត ដើម្បីជំរុញការកែលម្អរថយន្តដឹកជញ្ជូនកម្មករនិយោជិតឱ្យកាន់តែមានផាសុកភាព និងសុវត្ថិភាព ស្របតាមលក្ខណៈបច្ចេកទេសឱ្យបានឆាប់រហ័ស ក្នុងន័យការពារ និងកាត់បន្ថយគ្រោះថ្នាក់ចរាចរណ៍លើបងប្អូនកម្មករនិយោជិត ឱ្យស្ថិតនៅកម្រិតទាបបំផុត៕

✨ ជំហានងាយៗ ក្នុងការប្រើប្រាស់ម៉ាស៊ីនស្វ័យសេវា ប.ស.ស. ដោយខ្លួនឯង

⚡️ លឿន | 👍 ងាយស្រួល | 🔒 សុវត្ថិភាព

☎️ សម្រាប់ព័ត៌មានបន្ថែម សូមទំនាក់ទំនងមកកាន់លេខ ១២៨៦ ឬតាមរយៈប្រព័ន្ធផ្សព្វផ្សាយបណ្តាញសង្គមរបស់យើង!

#បសស

ឯកឧត្តមបណ្ឌិត ហេង សុផាន់ណារិទ្ធ អញ្ជើញចូលរួមសិក្ខាសាលាផ្សព្វផ្សាយស្តីពីការងាររបស់គណៈកម្មាធិការសមាគមអតីតយុទ្ធជន និងនិវត្តជនកម្ពុជា អ.ន.ក តាមវិស័យចំនួន៣២ (ក្រសួង ស្ថាប័ន)
----------------------------
(ខេត្តកណ្តាល)៖ នាព្រឹកថ្ងៃអង្គារ ទី២៦ ខែឧសភា ឆ្នាំ២០២៦នេះ ឯកឧត្តមបណ្ឌិត ហេង សុផាន់ណារិទ្ធ អគ្គនាយករង ប.ស.ស. និងជាអនុប្រធានលេខាធិការដ្ឋាននៃគណៈកម្មាធិការ អ.ន.ក. វិស័យការងារ និងបណ្តុះបណ្តាលវិជ្ជាជីវៈ ដឹកនាំដោយលោកជំទាវ សុវណ្ណ វណ្ណារតន៍ រដ្ឋលេខាធិការប្រចាំការក្រសួងការងារ និងបណ្តុះបណ្តាលវិជ្ជាជីវៈ និងជាអនុប្រធានប្រចាំការគណៈកម្មាធិការ អ.ន.ក. វិស័យការងារ និងបណ្តុះបណ្តាលវិជ្ជាជីវៈ ចូលរួមសិក្ខាសាលាផ្សព្វផ្សាយស្តីពីការងាររបស់គណៈកម្មាធិការសមាគមអតីតយុទ្ធជន និងនិវត្តជនកម្ពុជា តាមវិស័យចំនួន៣២ (ក្រសួង ស្ថាប័ន) ដើម្បីពង្រឹងយន្តការការងារ និងលើកកម្ពស់ប្រសិទ្ធភាពក្នុងការគ្រប់គ្រង ក៏ដូចជាការគាំទ្រដល់បងប្អូនអតីតយុទ្ធជន និងនិវត្តជនកម្ពុជា។

សិក្ខាសាលាផ្សព្វផ្សាយនេះ ប្រព្រឹត្តទៅនៅទីស្នាក់ការកណ្តាលសមាគមអតីតយុទ្ធជន និងនិវត្តជនកម្ពុជា ក្រោមអធិបតីភាពដ៏ខ្ពង់ខ្ពស់របស់ឯកឧត្តមនាយឧត្តមសេនីយ៍កិត្តិសង្គហបណ្ឌិត គន់ គីម ទេសរដ្ឋមន្ត្រី អនុប្រធាន និងជាអគ្គលេខាធិការ គណៈអចិន្ត្រៃយ៍នៃគណៈកម្មាធិការកណ្តាលសមាគមអតីតយុទ្ធជន និងនិវត្តជនកម្ពុជា៕

ប.ស.ស. បន្តផ្សព្វផ្សាយ “ច្បាប់ស្តីពីចរាចរណ៍ផ្លូវគោក សុវត្ថិភាពក្នុងការធ្វើដំណើរ និងសុវត្ថិភាពក្នុងការដឹកជញ្ជូន ជូនអ្នកបើកបរយានយន្តដឹកកម្មករ និងកម្មករនិយោជិត” នៅខេត្តតាកែវ
.........
(តាកែវ)៖ នៅព្រឹកថ្ងៃសៅរ៍ ទី២៣ ខែឧសភា ឆ្នាំ២០២៦ នេះ ឯកឧត្តមបណ្ឌិត ហេង សុផាន់ណារិទ្ធ អគ្គនាយករង ប.ស.ស. និងជាប្រធានក្រុមការងារសុវត្ថិភាពចរាចរណ៍ផ្លូវគោកសម្រាប់គាំពារកម្មករនិយោជិត (ស.ផ.ក) តំណាង ឯកឧត្តម ម៉េង ហុង ប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស. នៃក្រសួងការងារ និងបណ្ដុះបណ្ដាលវិជ្ជាជីវ: បានអញ្ជើញជាសហអធិបតីក្នុងពិធីផ្សព្វផ្សាយ “ច្បាប់ស្តីពីចរាចរណ៍ផ្លូវគោក សុវត្ថិភាពក្នុងការធ្វើដំណើររបស់កម្មករ និងសុវត្ថិភាពក្នុងការដឹកជញ្ជូន ដល់អ្នកបើកបរយានយន្តដឹកជញ្ជូនកម្មករនិយោជិត និងកម្មករនិយោជិត” នៅរោងចក្រ I-CHENG (CAMBODIA) CORPORATION។

មានប្រសាសន៍ក្នុងពិធីនោះដែរ ឯកឧត្តមបណ្ឌិតអគ្គនាយករង ប.ស.ស. បានលើកឡើងថា ក្នុងឆ្នាំ២០២៦ នេះ ក្រុមការងារ ស.ផ.ក បានចុះផ្សព្វផ្សាយច្បាប់ស្តីពីចរាចរណ៍ផ្លូវគោកនេះចំនួន ៣ខេត្តរួចមកហើយ រួមមានខេត្តកំពត បន្ទាយមានជ័យ និងកំពង់ស្ពឺ ហើយសម្រាប់ខេត្តតាកែវ គឺជាខេត្តទី៤។ ឯកឧត្តមបណ្ឌិត បានបន្តថា ស្របតាមអនុសាសន៍ណែនាំដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ប.ស.ស. បានកំណត់ផែនការធ្វើបច្ចុប្បន្នភាព និងជំរុញការកែលម្អរថយន្តដឹកកម្មករឱ្យកាន់តែមានផាសុកភាព និងសុវត្ថិភាព ឱ្យបានមុនដំណាច់ឆ្នាំ២០២៧។ ជាក់ស្តែង ក្រុមការងារបានចុះស្ទង់មតិនៅតាមសហគ្រាសចំនួន ២៩០ រួចមកហើយ ដើម្បីស្វែងរកដំណោះស្រាយប្តូរពីរថយន្តប្រភេទដឹកទំនិញ មកជារថយន្តដឹកអ្នកដំណើរ ឬកែលម្អឱ្យមានកៅអី និងដំបូលសមរម្យ ដោយមិនឱ្យប៉ះពាល់ដល់អាជីព និងផលប្រយោជន៍របស់អ្នកបើកបរឡើយ។

តាមរបាយការណ៍គិតត្រឹមសប្តាហ៍ទី២ ខែឧសភា ឆ្នាំ២០២៦ ករណីគ្រោះថ្នាក់ចរាចរណ៍គ្រប់មធ្យោបាយលើកម្មករនិយោជិតទូទាំងប្រទេសកើតមាន ២ ៨០៨ករណី (ស្លាប់ ៤៦នាក់) ដោយឡែកក្នុងខេត្តតាកែវ មានចំនួន ៤៥២ករណី (ស្លាប់ ៥នាក់)។ ចំពោះរថយន្តដឹកកម្មករក្នុងខេត្តតាកែវសរុបមានចំនួន ៣១១គ្រឿង ក្នុងនោះរថយន្តប្រភេទដឹកទំនិញមានរហូតដល់ ២៨៩គ្រឿង ដែលជាគោលដៅត្រូវបន្តជំរុញការកែលម្អ។ ឯកឧត្តមបណ្ឌិត ក៏បានសំណូមពរដល់កម្មករនិយោជិតឱ្យពាក់មួកសុវត្ថិភាព និងជ្រើសរើសឡានដែលមានសុវត្ថិភាព ព្រមទាំងស្នើដល់អ្នកបើកបរឱ្យកែច្នៃឡានឱ្យមានកៅអីអង្គុយ រីឯរោងចក្រ និងអាជ្ញាធរត្រូវជួយសម្រួលសណ្តាប់ធ្នាប់ចរាចរណ៍នៅមុខរោងចក្រផងដែរ។

ថ្លែងក្នុងពិធីនោះដែរ លោកបណ្ឌិត​ មូល វិចិត្រ អភិបាលរង នៃគណៈអភិបាលខេត្តតាកែវ បានក្រើនរំលឹកដល់អ្នកបើកបរយានយន្តទាំងអស់ ត្រូវមានក្រមសីលធម៌លើការបើកបរលើដងផ្លូវ និងត្រូវចូលរួមគោរពច្បាប់ចរាចរណ៍ទាំងអស់គ្នា ព្រមទាំងថ្លែងអំណរគុណដល់ ប.ស.ស. និងអង្គភាពពាក់ព័ន្ធនានា ដែលបានសហការរៀបចំកម្មវិធីនេះឡើងដើម្បីឱ្យបងប្អូនកម្មករនិយោជិតទាំងអស់បានយល់ដឹងបន្ថែម។

ក្នុងឱកាសនេះដែរ ឯកឧត្តមឧត្តមសេនីយ៍ឯក ចេវ ហាក់ អគ្គស្នងការរងនគរបាលជាតិ នៃក្រសួងមហាផ្ទៃ ក៏បានធ្វើការអំពាវនាវដល់កម្មករនិយោជិតទាំងអស់ មេត្តាបង្កើនការប្រុងប្រយ័ត្នឱ្យបានខ្ពស់ក្នុងការធ្វើដំណើរ ទាំងអ្នកធ្វើដំណើរដោយម៉ូតូផ្ទាល់ខ្លួន និងអ្នកជិះរថយន្តដឹកកម្មករ ត្រូវគោរពច្បាប់ស្តីពីចរាចរណ៍ផ្លូវគោក ដើម្បីចៀសវាងករណីគ្រោះថ្នាក់ជាយថាហេតុ និងក្រើនរំលឹកដល់អ្នកបើកបររថយន្ដដឹកកម្មករទាំងអស់ ត្រូវមានស្មារតីទទួលខុសត្រូវខ្ពស់ និងយកចិត្តទុកដាក់រាល់ពេលបើកបរ ដើម្បីធានាសុខសុវត្ថិភាពជូនបងប្អូនកម្មករនិយោជិត៕

នារសៀលថ្ងៃទី២៣ ខែឧសភា ឆ្នាំ២០២៦នេះ ឯកឧត្តមបណ្ឌិត​ ហេង សុផាន់ណារិទ្ធ អគ្គនាយករងបេឡាជាតិសន្តិសុខសង្គម​ បានអញ្ជេីញអមដំណេីរឯកឧត្តម ហេង សួរ រដ្ឋមន្ត្រីក្រសួងការងារនិងបណ្ដុះបណ្ដាលវិជ្ជាជីវៈចូលរួម គោរពវិញ្ញាណក្ខន្ធសព​ និងបានសម្ដែងនូវសមានទុក្ខយ៉ាងជ្រាលជ្រៅ និងក្រៀមក្រំបំផុត ជាមួយក្រុមគ្រួសារសពបងប្អូនកម្មករនិយោជិតចំនួន ៩នាក់ (ស្រី ៨នាក់) ដែលបានទទួលមរណភាព ក្នុងឧបទ្ទវហេតុគ្រោះថ្នាក់ចរាចរណ៍ដ៏រន្ធត់ កាលពីព្រឹកមិញនេះ ស្ថិតនៅភូមិសាលាលេខ៥ ឃុំអូរឫស្សី ស្រុកកំពង់ត្រឡាច ខេត្តកំពង់ឆ្នាំង។

បុគ្គលិកអប់រំ និងសិស្ស និស្សិតប្រមាណ ២០០នាក់ នៅវិទ្យាស្ថានពហុបច្ចេកទេសព្រះកុសុមៈ ទទួលបានការស្វែងយល់អំពីសិទ្ធិជាមូលដ្ឋាននៃការអនុវត្តរបបសន្តិសុខសង្គម ពី ប.ស.ស.
.............
(ភ្នំពេញ)៖ នាព្រឹកថ្ងៃទី២២ ខែឧសភា ឆ្នាំ២០២៦ នេះ ឯកឧត្តមបណ្ឌិត ហេង សុផាន់ណារិទ្ធ អគ្គនាយករង ប.ស.ស. តំណាង ឯកឧត្តម ម៉េង ហុង ប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស. នៃក្រសួងការងារ និងបណ្តុះបណ្តាលវិជ្ជាជីវៈ បានអញ្ជើញជាសហអធិបតីភាពក្នុងពិធីបើកសិក្ខាសាលា បញ្ជ្រាបការយល់ដឹង អំពីសិទ្ធិជាមូលដ្ឋាន នៃការអនុវត្តរបបសន្តិសុខសង្គម ជូនដល់បុគ្គលិកអប់រំ និងសិស្ស និស្សិត នៅវិទ្យាស្ថានពហុបច្ចេកទេសព្រះកុសុមៈ ដោយមានអ្នកចូលរួមប្រមាណជា ២០០នាក់។

ក្នុងឱកាសនោះ ឯកឧត្តមបណ្ឌិតអគ្គនាយករង ប.ស.ស. មានប្រសាសន៍ថា សិក្ខាសាលានេះ រៀបចំឡើងក្នុងគោលបំណងឆ្លើយតប និងផ្តល់ឱកាសឱ្យសិស្ស និស្សិត ដែលជាកម្លាំងពលកម្មមានសក្ដានុពលនាពេលអនាគត បានយល់ដឹងពីសិទ្ធិ និងកាតព្វកិច្ចក្នុងការចូលរួមក្នុងរបបសន្តិសុខសង្គម។

ជាមួយគ្នានោះ ឯកឧត្តមបណ្ឌិតអគ្គនាយករង បានបន្តទៀតថា មន្ត្រីរាជការ និងបុគ្គលិកអប់រំ នឹងបានយល់ដឹងកាន់តែច្បាស់ពីវឌ្ឍនភាព និងគោលនយោបាយថ្មីៗរបស់រាជរដ្ឋាភិបាល ជាពិសេសរបបសន្តិសុខសង្គមផ្នែកថែទាំសុខភាព តាមរបបភាគទានដោយស្ម័គ្រចិត្ត សម្រាប់បុគ្គលស្វ័យនិយោជន៍ និងអ្នកក្នុងបន្ទុកសមាជិក ប.ស.ស.។

ទន្ទឹមនឹងនោះ ឯកឧត្ដមបណ្ឌិត តាំង យឿន នាយកវិទ្យាស្ថានពហុបច្ចេកទេសព្រះកុសុមៈ បានថ្លែងអំណរគុណដល់ថ្នាក់ដឹកនាំ ប.ស.ស. និងជំរុញលើកទឹកចិត្តដល់សិក្ខាកាមទាំងអស់ ឱ្យខិតខំយកចិត្តទុកដាក់ស្តាប់ ក្រេបជញ្ជក់យកចំណេះដឹង បទពិសោធល្អៗ ដើម្បីជាទុនបន្ថែមក្នុងការអភិវឌ្ឍសមត្ថភាពខ្លួនឯងបន្ថែមទៀត។

ជាទីបញ្ចប់ ឯកឧត្តមបណ្ឌិតអគ្គនាយករង បានថ្លែងនូវការផ្ដាំផ្ញើដល់អ្នកចូលរួមទាំងអស់ ត្រូវយកចិត្តទុកដាក់ត្រងត្រាប់ស្ដាប់នូវការធ្វើបទបង្ហាញរបស់មន្រ្តីជំនាញ ប.ស.ស. ដោយស្មារតីទទួលខុសត្រូវខ្ពស់ ព្រមទាំងចូលរួមលើកជាសំណួរ ឬចម្ងល់ផ្សេងៗ ដើម្បីទទួលបានការពន្យល់បន្ថែមឱ្យបានយល់កាន់តែច្បាស់លាស់ ត្រឹមត្រូវ និងអាចយកចំណេះដឹងទាំងនេះ ទៅធ្វើការផ្សព្វផ្សាយបន្តបានយ៉ាងមានប្រសិទ្ធភាព៕

ដល់ម៉ោងបែកញើសទៀតហើយ⚽️⚽️⚽️
-------------
នៅល្ងាចថ្ងៃទី២១ ខែឧសភា ឆ្នាំ២០២៦​ នេះ ខ្ញុំបានដឹកនាំក្រុមបាល់ទាត់​ នៃបេឡាជាតិសន្តិសុខសង្គម​ (ប.ស.ស.)​​ ចូលរួមប្រកួតបាល់ទាត់មិត្តភាព នៅទីលានបាល់ទាត់​វិទ្យាល័យឥន្ទ្ររទេវី​ ក្នុងគោលបំណងធ្វេីការដកស្រង់បច្ចេកទេសគ្នាទៅវិញទៅមក​ និងរឹតចំណងមិត្តភាព។
#កីឡាដើម្បីសុខភាព⚽️
#ចូលនាំគ្នាលេងកីឡា_និងចៀសឆ្ងាយពីគ្រឿងញៀន
#អរគុណសន្តិភាព
#កីឡារស់ក្នុងសន្តិភាព

ឯកឧត្តមបណ្ឌិត ហេង សុផាន់ណារិទ្ធ អញ្ជើញចូលរួមប្រជុំក្រុមការងារបច្ចេកទេសត្រួតពិនិត្យសុវត្ថិភាពយានយន្តដឹកជញ្ជូនកម្មករនិយោជិត និងប្រឡងយកបណ្ណបើកបរ
.............
(ភ្នំពេញ)៖ នាព្រឹកថ្ងៃទី២១ ខែឧសភា ឆ្នាំ២០២៦ នេះ ឯកឧត្តមបណ្ឌិត ហេង សុផាន់ណារិទ្ធ អគ្គនាយករង ប.ស.ស. និងជាប្រធានក្រុមការងារសុវត្ថិភាពចរាចរណ៍ផ្លូវគោកសម្រាប់គាំពារកម្មករនិយោជិត (ស.ផ.ក) តំណាង ឯកឧត្តម ម៉េង ហុង ប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស. នៃក្រសួងការងារ និងបណ្តុះបណ្តាលវិជ្ជាជីវៈ បានអញ្ជើញចូលរួមកិច្ចប្រជុំក្រុមការងារបច្ចេកទេសត្រួតពិនិត្យសុវត្ថិភាពយានយន្តដឹកជញ្ជូនកម្មករនិយោជិត និងប្រឡងយកបណ្ណបើកបរ ដែលដឹកនាំដោយ លោកជំទាវ មឹន មាណវី រដ្ឋលេខាធិការក្រសួងសាធារណការ និងដឹកជញ្ជូន និងជាអគ្គលេខាធិការ នៃអគ្គលេខាធិការដ្ឋាន គណៈកម្មាធិការជាតិសុវត្ថិភាពចរាចរណ៍ផ្លូវគោក (គ.ច.ស.គ)។

កិច្ចប្រជុំនេះដែរ បានលើកយករបៀបវារៈសំខាន់ៗចំនួន២ មកពិភាក្សា ដោយក្នុងនោះរួមមាន៖ ១.ការប្រឡង និងផ្តល់បណ្ណបើកបរ ជូនរថយន្តដឹកជញ្ជូនកម្មករនិយោជិត និង ២.ការត្រួតពិនិត្យលក្ខណៈបច្ចេកទេសរថយន្តដឹកជញ្ជូន (ដោយភ្នែកផ្ទាល់)។

ជាមួយគ្នានោះដែរ ឯកឧត្តមបណ្ឌិតប្រធានក្រុមការងារ ស.ផ.ក បានផ្តល់ជាធាតុចូលសំខាន់ៗមួយចំនួនលើការប្រឡង និងផ្តល់បណ្ណបើកបរ ព្រមទាំងការត្រួតពិនិត្យលក្ខណៈបច្ចេកទេសយានយន្តដែលជាកត្តាដ៏សំខាន់ មិនអាចខ្វះបាន ក្នុងការបង្ការ និងកាត់បន្ថយគ្រោះថ្នាក់ចរាចរណ៍ឱ្យបានអតិបរមា ដើម្បីធានាបាននូវសុវត្ថិភាព អាយុជីវិត និងភាពកក់ក្តៅក្នុងការធ្វើដំណើររបស់បងប្អូនកម្មករនិយោជិត ស្របតាមអនុសាស្រ្តរបស់សម្តេចមហាបរវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។

នៅទីបញ្ចប់នៃកិច្ចប្រជុំ លោកជំទាវអគ្គលេខាធិការ គ.ច.ស.គ បានសម្តែងនូវការឯកភាព និងយល់ស្របទៅលើចំណុចសំខាន់ៗមួយចំនួន ដែលសមាជិកអង្គប្រជុំ បានលើកឡើង ដើម្បីធ្វើជាមូលដ្ឋានក្នុងការរៀបចំផែនការសកម្មភាព និងអនុវត្តការងារយុទ្ធសាស្ត្រពង្រឹងសុវត្ថិភាពយានយន្ត ព្រមទាំងអ្នកបើកបរឱ្យកាន់តែមានប្រសិទ្ធភាព នាពេលខាងមុខ។

សូមបញ្ជាក់ថា កិច្ចប្រជុំនេះ ប្រព្រឹត្តទៅនៅទីស្ដីការក្រសួងសាធារណការ និងដឹកជញ្ជូន ដោយមានការចូលរួមពីសមាជិក សមាជិកា សរុបប្រមាណជា ២០នាក់៕