ក្រុមការងារបញ្ជ្រាបយេនឌ័រក្រសួងសេដ្ឋកិច្ចនិងហិរញ្ញវត្ថុ ក.ប.យ MEF Gender WG

ថ្ងៃទី២៦ ខែឧសភា ឆ្នាំ២០២៦ លោកជំទាវ កែវ ចរិយា រដ្ឋលេខាធិការក្រសួងសេដ្ឋកិច្ចនិងហិរញ្ញវត្ថុ និងលោកស្រី ស្រី កណ្ណិការ បានចូលរួមសិក្ខាសាលាតម្រង់ទិសនិងប្រមូលធាតុចូលលើរបាយការណ៍វាយតម្លៃពាក់កណ្តាលអាណត្តិនៃការអនុវត្តគោលនយោបាយជាតិស្តីពីមនុស្សវ័យចាស់ឆ្នាំ២០១៧-២០៣០។

ព្រឹកថ្ងៃទី២៦ ខែឧសភា ឆ្នាំ២០២៦ លោកជំទាវ កែវ ចរិយា រដ្ឋលេខាធិការនិងជាប្រធានក្រុមប្រឹក្សាភិបាលសមាគមសង្គហមិត្ត បុគ្គលិក មន្រ្តីរាជការនៃក្រសួងសេដ្ឋកិច្ចនិងហិរញ្ញវត្ថុ និងសហការី បានអញ្ជើញចូលរួមវគ្គបណ្តុះបណ្តាលស្តីពីការងាររបស់គណ:កម្មាធិការសមាគមអតីតយុទ្ធជន និងនិវត្តជនកម្ពុជាតាមវិស័យចំនួន៣២ ក្រសួង-ស្ថាប័ន នៅសាលប្រជុំធំ ទីស្នាក់ការកណ្តាលសមាគមអតីតយុទ្ធជន និងនិវត្តជនកម្ពុជា។

រសៀលថ្ងៃទី២១ ខែឧសភា ឆ្នាំ២០២៦ ក្រុមការងារលេខាធិការ បានរៀបចំប្រជុំផ្ទៃក្នុងដើម្បីពិភាក្សាស្តីពីខ្លឹមសារ(ប្រធានបទ)នៃការរៀបចំសិក្ខាសាលានៅតាមខេត្តគោលដៅចំនូន ៥ ការត្រៀមរៀបចំប្រកាសសមាសភាពសមាគមនារី និងផ្សេងៗ ។

ថ្ងៃចន្ទ ១០រោច ខែពិសាខ ឆ្នាំមមី អដ្ឋស័ក ព.ស. ២៥៧០ ត្រូវនឹង ថ្ងៃទី១១ ខែឧសភា ឆ្នាំ២០២៦ លោកជំទាវ កែវ ចរិយា រដ្ឋលេខាធិការក្រសួងសេដ្ឋកិច្ចនិងហិរញ្ញវត្ថុ បានអញ្ជើញចូលរួម«កិច្ចប្រជុំពិភាក្សាកម្រិតខ្ពស់ស្តីពីផែនទីបង្ហាញផ្លូវ ឆ្ពោះទៅកាន់ផែនការសកម្មភាពជាតិស្ដីពីស្ត្រី សន្តិភាព និងសន្តិសុខ (NAP-WPS) នៅកម្ពុជា» ក្រោមអធិបតីភាពដ៏ខ្ពង់ខ្ពស់របស់ លោកជំទាវកិត្តិបណ្ឌិត អុឹង កន្ថាផាវី រដ្ឋមន្ត្រីក្រសួងកិច្ចការនារី នៅសណ្ឋាគារ Hyatt Regency Phnom Penh ។
កិច្ចប្រជុំពិភាក្សាកម្រិតខ្ពស់នេះមានការចូលរួមពីថ្នាក់ដឹកនាំ និងសមាសភាពមកពីក្រសួង-ស្ថាប័នពាក់ព័ន្ធ អង្គការសង្គមសុីវិល និងដៃគូអភិវឌ្ឍន៍សរុបចំនួនប្រមាណ ១១២ នាក់ (ស្ត្រី ៩៦នាក់)។
កម្មវិធីនេះ ប្រព្រឹត្តទៅក្នុងគោលបំណងដើម្បីជំរុញផែនទីបង្ហាញផ្លូវជាយុទ្ធសាស្ត្រដែលគាំទ្រដោយឆន្ទៈនយោបាយ និងមានភាពរឹងមាំផ្នែក បច្ចេកទេស សម្រាប់ការត្រៀមរៀបចំនូវផែនការសកម្មភាពថ្នាក់ជាតិ (NAP-WPS) របស់កម្ពុជា ដោយធានាបាន នូវមាគ៌ាដ៏ច្បាស់លាស់ ស៊ីសង្វាក់គ្នា និងមានភាពម្ចាស់ការថ្នាក់ជាតិ ឆ្ពោះទៅរកការអភិវឌ្ឍ និងការរៀបចំ សេចក្តីព្រាងផែនការសកម្មភាព។

ព្រឹកថ្ងៃទី៥ ខែឧសភា ឆ្នាំ២០២៦ លោកជំទាវ កែវ ចរិយា រដ្ឋលេខាធិការនិងជាសមាជិកានៃគណ:កម្មាធិការជាតិលើកកម្ពស់សីលធម៌សង្គម តម្លៃស្រ្តី និងគ្រួសារខ្មែរ និងសហការី បានចូលរួមសន្និបាតបូកសរុបលទ្ធផលការងារឆ្នាំ២០២៤-២០២៥ និងលើកទិសដៅឆ្នាំ២០២៦-២០២៧ ក្រោមអធិបតីភាពលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ប្រធានកិត្តិយសគណៈកម្មាធិការជាតិលើកកម្ពស់សីលធម៌សង្គម តម្លៃស្ត្រី និងគ្រួសារខ្មែរ។

លោកជំទាវបណ្ឌិត បានមានប្រសាសន៍ដឹងគុណយ៉ាងជ្រាលជ្រៅជូន សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និង សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងជាអតីតប្រធានកិត្តិយសរបស់គណៈកម្មាធិការ ដែលកន្លងមក សម្តេចទាំងទ្វេតែងតែបានគាំទ្រទាំងផ្នែកស្មារតី និងធនធានដើម្បីធានាដល់កិច្ចការលើកកម្ពស់តម្លៃ និងសីលធម៌សង្គម។

បន្ថែមពីនេះ លោកជំទាវបណ្ឌិត បានកោតសរសើរ ចំពោះការខិតខំរបស់គណៈកម្មាធិការជាតិក្នុងការអនុវត្តអនុសាសន៍ទាំង ៦ចំណុច របស់ សម្តេចកិត្តិព្រឹទ្ធបណ្ឌិត រួមទាំងការបំពេញតួនាទីភារកិច្ចយ៉ាងសកម្មស្របតាមយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល ក្នុងការលើកកម្ពស់សីលធម៌សង្គម និងទប់ស្កាត់រាល់សកម្មភាពទាំងឡាយណាដែលធ្វើឱ្យប៉ះពាល់ដល់សេចក្តីថ្លៃថ្នូរ និងវប្បធម៌ប្រពៃណីខ្មែរ ជាពិសេសគឺការធ្វើបច្ចុប្បន្នភាពលើសកម្មភាពរបស់គណៈកម្មាធិការដើម្បីឆ្លើយតបទៅនឹងបរិការណ៍ និងការវិវត្តថ្មីរបស់សង្គម។

សូមបញ្ជាក់ផងដែរថា គណៈកម្មាធិការជាតិលើកកម្ពស់សីលធម៌សង្គម តម្លៃស្ត្រី និងគ្រួសារខ្មែរ ហៅកាត់ថា គ.ជ.ស.ស.ខ. ត្រូវបានបង្កើតឡើងនៅឆ្នាំ២០០៦ ក្នុងគោលបំណងថែរក្សា ការពារវប្បធម៌ជាតិ ធានាដល់ការគោរពសីលធម៌និងសុភមង្គលគ្រួសារ ដោយការលើកកម្ពស់ស្ថានភាព តម្លៃ និងសុខុមាលភាពស្ត្រីខ្មែរ។ ជារៀងរាល់ ២ឆ្នាំម្តង គណៈកម្មាធិការជាតិប្រារពសន្និបាតបូកសរុបលទ្ធផល និងលើកទិសដៅការងារ ហើយក្នុងរយៈពេល ២០ឆ្នាំមកនេះ គណៈកម្មាធិការជាតិសម្រេចបានសមិទ្ធផលជាច្រើនដូចជា យុទ្ធនាការផ្សព្វផ្សាយអប់រំយ៉ាងទូលំទូលាយ ការលើកកម្ពស់សីលធម៌ សុជីវធម៌ក្នុងការរស់នៅប្រចាំថ្ងៃ ការបង្ការនិងបង្ក្រាបបទល្មើសភាពយន្ត ការជំរុញការអនុវត្តច្បាប់ដែលមានស្រាប់ ការទប់ស្កាត់អំពើហិង្សានិងការជួញដូរមនុស្សដល់ទីតាំងផ្ទាល់ និងការលើកកម្ពស់សីលធម៌សង្គមតាមរយៈប្រព័ន្ធឌីជីថល។

ថ្ងៃទី០៤ ខែឧសភា ឆ្នាំ២០២៦ លោកជំទាវ កែវ ចរិយា រដ្ឋលេខាធិការនិងជាប្រធានគណ:កម្មាធិការអេដស៍ និងជំងឺអេដស៍ក្រសួងសេដ្ឋកិច្ចនិងហិរញ្ញវត្ថុ បានអញ្ជើញចូលរួម​សិក្ខាសាលា​ផ្តល់​សុពលភាព​លេីផែនទីបង្ហាញផ្លូវធានាចីរភាពនៃការឆ្លេីយតបមេរោគអេដស៍ឆ្នាំ2026-2029 នៅសណ្ឋាគារសាន់វេ។

ថ្ងៃសុក្រ ១៥កើត ខែពិសាខ ឆ្នាំមមី សប្តស័ក ព.ស. ២៥៧០ ត្រូវនឹងថ្ងៃទី០១ ខែឧសភា ឆ្នាំ២០២៦ លោកជំទាវ កែវ ចរិយា រដ្ឋលេខាធិការក្រសួងសេដ្ឋកិច្ចនិងហិរញ្ញវត្ថុ ជាប្រធានប្រតិភូ លោកជំទាវអនុរដ្ឋលេខាធិការ លោក លោកស្រី អ្នកនាងកញ្ញា ដែលជាមន្រ្តីរាជការក្រសួងសេដ្ឋកិច្ចនិងហិរញ្ញវត្ថុ ចំនួន ៣១ រូប (ស្រ្តី ១៦រូប) បានអញ្ជើញចូលរួមពិធីបុណ្យវិសាខបូជា នៅបរិវេណឧបដ្ឋានសាលាមុខព្រះមហាសក្យមុនីចេតិយភ្នំព្រះរាជទ្រព្យ (ឧត្តុង្គ) ស្រុកពញាឮ ខេត្តកណ្តាល សូមសុខចម្រើននិងបានជាបច្ច័យនៃសេចក្តីរួចផុតចាកទុក្ខ សូមអនុមោទនាបុណ្យដោយក្តីជ្រះថ្លាក្រៃលែង🙏🙏🙏🙏🙏

ថ្ងៃទី២៩ ខែមេសា ឆ្នាំ២០២៦ លោកជំទាវ កែវ ចរិយា រដ្ឋលេខាធិការនិងជាប្រធានគណ:កម្មាធិការប្រយុទ្ធនឹងជំងឺអេដស៍ក្រសួងសេដ្ឋកិច្ចនិងហិរញ្ញវត្ថុ បានចូលរួមអមដំណើរបំពេញបេសកកម្មរបស់ប្រតិភូអន្តរក្រសួងនៅសាលាខេត្តសៀមរាប ដើម្បីជំរុញគោលនយោបាយជាតិបញ្ចប់អេដស៍ និងចីរភាពកម្មវិធីអេដស៍សម្រាប់ឆ្នាំ២០២៣-២០២៨ និងសារាចរលេខ២០សារា ចរលេខ២០ សរ ចុះទី១៩ ខែធ្នូ ឆ្នាំ២០២៥ ស្តីពីការជំរុញការប្រើប្រាស់ស្រោមអនាម័យឱ្យបាន១០០ភាគរយ ដើម្បីបង្ការមេរោគអេដស៍ និងជំងឺអេដស៍របស់រាជរដ្ឋាភិបាល។