នាយកដ្ឋានប្រឆាំងបទល្មើសបច្ចេកវិទ្យា Anti Cyber Crime Department

នាពេលកន្លងមក នាយកដ្ឋានប្រឆាំងបទល្មើសបច្ចេកវិទ្យា បានបង្ហោះផ្សព្វផ្សាយករណីការឆបោកតាមប្រព័ន្ធបច្ចេកវិទ្យា ក្រោមរូបភាពការផ្សព្វផ្សាយល្បែងផ្សងសំណាងឆ្នោតកោសតាមអនឡាញ ក្នុងគោលបំណងបង្កាទប់ស្កាត់ និងកាត់បន្ថយនូវការឆបោកតាមប្រព័ន្ធបច្ចេកវិទ្យា ប៉ុន្តែនៅតែឃើញមានការផ្សព្វផ្សាយល្បែងផ្សងសំណាង និងល្បែងភ្នាល់តាមអនឡាញ តាមរយៈ ទំព័រហ្វេកប៊ុករបស់ជនខិលខូច ដែលបណ្តាលអោយមានប្រជាពលរដ្ឋបានទទួលរងការឆបោកចំពោះករណីនេះ។

ថ្មីៗនេះ កម្លាំងចម្រុះ នៃអគ្គស្នងការនគរបាលជាតិ បានចុះឆែកឆេរអគារមួយកន្លែង ស្ថិតក្នុងខេត្តបន្ទាយមានជ័យ ដោយរកឃើញ ក្រុមឆបោកតាមបច្ចេកវិទ្យា កំពុងធ្វើការ live នៅលើផេក ឆ្នោតកោស និងបានកំពុងឆបោកប្រជាពលរដ្ឋជាច្រើននាក់។ ក្នុងប្រត្តិបត្តការចុះបង្រ្កាបនេះ មន្រ្តីជំនាញ នៃនាយកដ្ឋានប្រឆាំងបទល្មើសបច្ចេកវិទ្យា បានរកឃើញថា ផេកដែលធ្វើការ Live ឆបោកមានដូចជា “ថ្ងៃនេះឈ្នះ- Wintodayjh, ឈ្នះភ្លាមៗរាល់ថ្ងៃ-Quickwindaily, សំណាងថ្មីថ្ងៃនេះ-Newlucky88, សំណាងរាល់ថ្ងៃ- everydayluck88, កិសសំណាង-LuckyScratch88, រង្វាន់ថ្ងៃនេះ- GiftToday88, សំណាងភ្លាមៗ- InstandLuck88, កោះហើយឈ្នះរាល់ថ្ងៃ- Scratch WinDaily” ក្រោមរូបភាពឈ្នះរង្វាន់ឆ្នោតកោស ហើយឱ្យជនរងគ្រោះផ្ញើប្រាក់ដើម្បីបានទទួលរង្វាន់ធំ។

តាមការស្រាវជ្រាវ របស់មន្រ្តីជំនាញ ល្បិចឆបោកមានដូចតទៅ៖
➡️ ក្រុមជនឆបោកបានណែនាំឱ្យអ្នកទស្សនាពេល Live ឆ្នោតកោស អោយទិញកញ្ចប់ឆ្នោតកោសចំនួន២ប្រភេទ រួមមាន៖ CAMBO ទី១ ទទួលបានឆ្នោតកោសចំនួន២៥សន្លឹកឆ្នោត ក្នុងតំលៃ២០$ និង CAMBO ទី២ ទទួលបានឆ្នោតកោសចំនួន៤០សន្លឹកឆ្នោត ក្នុងតំលៃ៣០$ និងបានណែនាំឱ្យទាក់ទងតាមរយៈប្រអប់សារ របស់ទំព័រហ្វេសប៊ុក និងការផ្ទេរប្រាក់តាមប្រព័ន្ឋ KHQR ដើម្បីទិញកញ្ចប់ឆ្នោត។
➡️ បន្ទាប់ពីទទួលបានប្រាក់រួច ក្រុមជនឆបោកនឹងហៅឈ្មោះជនរងគ្រោះក្នុងការផ្សាយបន្តផ្ទាល់ ហើយធ្វើការកោសឆ្នោតភ្លាមៗ (ជាទូទៅជនរងគ្រោះតែងតែទទួលបានលទ្ធផលឈ្នះរង្វាន់ជានិច្ច ដែលជាវិធីសាស្រ្តបង្កើនទំនុកចិត្ត និងជំរុញឱ្យជនរងគ្រោះបន្តចូលរួម)។
➡️ បន្ទាប់មកក្រុមជនឆបោកនឹងណែនាំឱ្យជនរងគ្រោះទាក់ទងក្រុមការងារដើម្បីដំណើរការទទួលប្រាក់រង្វាន់ដែលមានទំហំចាប់ពី១០,០០០$ ជនរងគ្រោះត្រូវបង់ប្រាក់ចំនួន៣៥៩$ ជាមុនសិន។
➡️ បន្ទាប់មកជនរងគ្រោះត្រូវបានណែនាំឱ្យចុះឈ្មោះ និងបង្កើតគណនីលើគេហទំព័រ hksclc-khr.com ដែលក្រុមជនឆបោកអះអាងថាជាគេហទំព័ររបស់ក្រុមហ៊ុនឆ្នោតហុងកុង ដោយតម្រូវឱ្យផ្ទៀងផ្តាត់ព័ត៌មាន និងអនុវត្តតាមនីតិវិធីដែលបានកំណត់។
➡️ ក្រោយពេលជនរងគ្រោះបង្កើត គណនីរួច ក្រុមជនឆបោកនឹងបញ្ចូលទិន្នន័យប្រាក់រង្វាន់ទៅក្នុងគណនីរបស់ជនរងគ្រោះហើយណែនាំ ឱ្យស្នើសុំដកប្រាក់តាមប្រព័ន្ធដើម្បីអោយជនរងគ្រោះទុកចិត្ត។
➡️ ដើម្បីដកប្រាក់បាន ជនរងគ្រោះតម្រូវឱ្យបង់ថ្លៃសេវាដកប្រាកចំនួន២% នៃទឹកប្រាក់រង្វាន់ បង់ថ្លៃប្តូរប្រាក់ពីដុល្លារហុងកុង ទៅជាដុល្លារអាមេរិកចំនួន១% និងត្រូវបង់ប្រាក់ចំនួន៧% បន្ថែមទៀតជាថ្លៃពន្ឋរបស់ក្រុមហ៊ុននៅហុងកុង។
➡️ បន្ទាប់ពីជនរងគ្រោះបានបង់ប្រាក់ទាំងអស់ តាមការទាមទារ ក្រុមជនឆបោក នឹងអនុញ្ញាតឱ្យដំណើរការស្នើសុំដកប្រាក់តាមប្រព័ន្ឋ ប៉ុន្តែពួកគេនឹងបង្កើតបញ្ហាថ្មីបន្ថែមទៀត ដោយបង្ហាញសារកំហុសលើគណនីរបស់ជនរងគ្រោះ ដូចជាករណី “ការស្នើសុំដកប្រាក់មានបញ្ហាខុសប្រទេស“ ឬ បញ្ហាបច្ចេកទេសផ្សេងៗ ហើយដកហូតសិទ្ឋក្នុងការដកប្រាក់ជាបណ្តោះអាសន្ន។ ក្នុងករណីនេះ ជនរងគ្រោះត្រូវបានតម្រូវឱ្យបង់ប្រាក់បន្ថែម ចំនួន៧៨២$ ដើម្បីស្តារសិទ្ឋិស្នើសុំដកប្រាក់ឡើងវិញ។
➡️ ជាបន្តបន្ទាប់ ក្រុមជនឆបោកនឹងប្រើប្រាស់លេស និងមូលហេតុផ្សេងៗទៀត ដូចជាថ្លៃសេវាបន្ថែម ថ្លៃផ្ទៀងផ្តាត់គណនី ថ្លៃធានាសុវត្ថិភាព ឬការបង់ពន្ឋបន្ថែម ដើម្បីដាក់សម្ពាធឱ្យជនរងគ្រោះបន្តផ្ទេរប្រាក់ ទោះបីជាជនរងគ្រោះបានបង់ប្រាក់តាមការទាមទារច្រើនដងក៏ដោយ ក្រុមជនឆបោកមិនផ្តល់ប្រាក់រង្វាន់ ឬអនុញ្ញាតឱ្យជនរងគ្រោះដកប្រាក់បានពិតប្រាកដឡើយ។

នាយកដ្ឋាន សូមក្រើនរំលឹកដល់សារធារណជន សូមមានការប្រុងប្រយ័ត្ន ចំពោះការផ្សព្វផ្សាយល្បែងផ្សងសំណាង និងល្បែងភ្នាល់អនឡាញខុសច្បាប់គ្រប់ប្រភេទ ដែលអាចឈានទៅដល់ការឆបោកតាមអនឡាញនានាផងដែរ និងសូមជៀសអោយឆ្ងាយពីការប្រព្រឹត្តល្បែងផ្សងសំណាង ល្បែងភ្នាល់តាមអនឡាញដែលជាទង្វើខុសច្បាប់ ត្រង់មាត្រា៥ នៃច្បាប់ស្តីពីការបង្រ្កាបល្បែងស៊ីសង ដែលអ្នកបើកកន្លែងលេងល្បែងស៊ីសង អ្នកកាន់កាប់ល្បែងស៊ីសង អ្នកចាត់ចែង និងភ្នាក់ងារស៊ីសង ត្រូវផ្តន្ទាទោសពិន័យជាប្រាក់ ៥,០០០,០០០រៀល ដល់ ២០,០០០,០០០រៀល និងដាក់គុកពី ១ឆ្នាំ ដល់ ៥ឆ្នាំ។

🌐 នាយកដ្ឋានប្រឆាំងបទល្មើសបច្ចេកវិទ្យា
🌐 នាយកដ្ឋានប្រឆាំងបទល្មើសបច្ចេកវិទ្យា
🌐 ACCD

ដោយទទួលបានការអនុញ្ញាត្តដ៏ខ្ពង់ខ្ពស់ពី ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ នាថ្ងៃអង្គារ ២រោច ខែជេស្ឋ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី២ខែឧសភា គ.ស.២០២៦ នាយកដ្ឋានប្រឆាំងបទល្មើសបច្ចេកវិទ្យា បានចាត់លោកវរសេនីយ៍ទោ ថោង ពេជ្រពន្លឺ តំណាងលោក ឧត្តមសេនីយ៍ទោ សុខ នីត្យា ប្រធាននាយកដ្ឋានប្រឆាំងបទល្មើសបច្ចេកវិទ្យា ចូលរួមប្រជុំ និងធ្វើបទបង្ហាញអំពីស្ថានភាព និង វឌ្ឍនភាពការប្រយុទ្ធប្រឆាំងបទល្មើសឆបោកតាមប្រព័ន្ធបច្ចេកវិទ្យាក្នុងប្រទេសកម្ពុជា តាមរយៈ Interpol Operation First Light នៅក្នុងខេត្តយូណាន សាធារណរដ្ឋប្រជាមានិតចិន ដោយមានការចូលរួមពីបណ្តាប្រទេសមួយចំនួន ដើម្បីរឹតចំណងសាមគ្គីភាពកាន់តែរឹងម៉ាំ លើការចែករំលែកបទពិសោធន៍។

ថ្នាក់ដឹកនាំ និងមន្រ្តីក្រោមឱវាទ នាយកដ្ឋានប្រឆាំងបទល្មើសបច្ចេកវិទ្យា ផ្ញើសារលិខិតគោរពជូនពរ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ ក្នុងឱកាសដ៏ថ្លៃថ្លានៃពិធីចម្រើនជន្មាយុ នាថ្ងៃទី៤ ខែមិថុនា ឆ្នាំ២០២៦នេះ។

ដោយទទួលបានការអនុញ្ញាត្តដ៏ខ្ពង់ខ្ពស់ពី ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ នាថ្ងៃសុក្រ ១៣កើត ខែជេស្ឋ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី២៩ខែឧសភា គ.ស.២០២៦ នាយកដ្ឋានប្រឆាំងបទល្មើសបច្ចេកវិទ្យា បានចាត់លោកឧត្ដមសេនីយ៍ទោ ស៊ីវ ឈាន់ តំណាងលោក ឧត្តមសេនីយ៍ទោ សុខ នីត្យា ប្រធាននាយកដ្ឋានប្រឆាំងបទល្មើសបច្ចេកវិទ្យា និងមន្ត្រីជំនាញចូលរួម និងធ្វើបទបង្ហាញអំពីស្ថានភាព និង វឌ្ឍនភាពការប្រយុទ្ធប្រឆាំងបទល្មើសឆបោកតាមប្រព័ន្ធបច្ចេកវិទ្យាក្នុងប្រទេសកម្ពុជា នៅសកលវិទ្យាល័យនគរបាលសន្តិសុខសាធារណៈ ក្នុងរដ្ឋធានីប៉េកាំង សាធារណរដ្ឋប្រជាមានិតចិន ដោយមានការចូលរួមពីបណ្តាប្រទេសមួយចំនួន និង បានទទួលជួបសំណេះសំណាល ជាមួយតំណាងសកលវិទ្យាធិការ ដើម្បីរឹតចំណងសាមគ្គីភាពកាន់តែរឹងម៉ាំ លើការចែករំលែកបទពិសោធន៍ និងវគ្គបណ្តុះបណ្តាលដល់កងកម្លាំងនគរបាលជាតិកម្ពុជា។

ដោយទទួលបានការអនុញ្ញាតដ៏ខ្ពង់ខ្ពស់ពី ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ នៅព្រឹកថ្ងៃទី២៧ ខែឧសភា ឆ្នាំ២០២៦ លោកឧត្តមសេនីយ៍ទោ សុខ នីត្យា ប្រធាននាយកដ្ឋានប្រឆាំងបទល្មើសបច្ចេកវិទ្យា និងសហការី បានទទួលជួបសម្ដែងការគួរសម និងពិភាក្សាការងារជាមួយ ឯកឧត្តម វង្សសៃ ផាន់ថាវង់ (VONSAY PHANTHAVONG) អគ្គលេខាធិការរង នៃមជ្ឈមណ្ឌលសហប្រតិបត្តិការសន្តិសុខ និងសមាហរណកម្មអនុវត្តច្បាប់ មេគង្គ-ឡានឆាង (LMLECC) និងសហការី នៅបន្ទប់ប្រជុំ នៃនាយកដ្ឋានប្រឆាំងបទល្មើសបច្ចេកវិទ្យា។

នាថ្ងៃទី២៥ ខែឧសភា ឆ្នាំ២០២៦ លោកឧត្តមសេនីយ៍ទោ ហេង សំណាង តំណាងលោកឧត្តមសេនីយ៍ទោ សុខ នីត្យា ប្រធាននាយកដ្ឋានប្រឆាំងបទល្មើសបច្ចេកវិទ្យា បានដឹកនាំ លោកអនុប្រធាននាយកដ្ឋាន នាយ នាយរងការិយាល័យ និងមន្ត្រីពាក់ព័ន្ធ នៃនាយកដ្ឋានប្រឆាំងបទល្មើសបច្ចេកវិទ្យា ចំនួន ២០រូប ចូលរួមកិច្ចប្រជុំផ្សព្វផ្សាយសេចក្តីណែនាំ លេខ០៧៤ សនណ ស្តីពីការផ្សព្វផ្សាយព័ត៎មានសន្តិសុខសណ្តាប់ធ្នាប់សង្គមសម្រាប់មន្ត្រីមានសមត្ថកិច្ចក្របខ័ណ្ឌក្រសួងមហាផ្ទៃ ដែលធ្វើបទបង្ហាញដោយលោកបណ្ឌិត ទូច សុឃៈ អ្នកនាំពាក្យរងក្រសួងមហាផ្ទៃ និងជាប្រធានក្រុមការងារតាមដានគោលការណ៍ណែនាំ ឯកឧត្តមអភិសន្តិបណ្ឌិត ស សុខា តាមប្រព័ន្ធអនឡាញ ZOOM នៅសាលប្រជុំនាយកដ្ឋានប្រឆាំងបទល្មើសបច្ចេកវិទ្យា៕

ដោយទទួលបានការអនុញ្ញាត្តដ៏ខ្ពង់ខ្ពស់ពី ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ លោកឧត្តមសេនីយ៍ទោ សុខ នីត្យា ប្រធាននាយកដ្ឋានប្រឆាំងបទល្មើសបច្ចេកវិទ្យា និងសហការី បានចូលរួមកិច្ចប្រជុំក្រុមថ្នាក់ដឹកនាំកិច្ចការងារប្រឆាំងបទល្មើសបច្ចេកវិទ្យា (CLWG) លើកទី២ ដែលមានរយៈពេល ៥ថ្ងៃ គិតចាប់ពីថ្ងៃទី១៨ ដល់ថ្ងៃទី២២ ខែឧសភា ឆ្នាំ២០២៦ នៅទីក្រុងដាណាំង នៃសាធារណៈរដ្ឋសង្គមនិយមវៀតណាម ដោយមានសមាសភាពចូលរួមពីភ្នាក់ងារអនុវត្តច្បាប់ជាថ្នាក់ដឹកនាំនៃអង្គភាពនគរបាល ស្ថាប័នបម្រើការងារលើវិស័យសន្តិសុខជាតិ និងស្ថាបនហិរញ្ញវត្ថុឯកជន របស់ប្រទេសដែលស្ថិតនៅក្នុងតំបន់អាស៊ីអាគ្នេយ៍ មានចំនួន ១២ ប្រទេស។

កិច្ចប្រជុំនេះធ្វើឡើងដោយមានការគាំទ្រផ្ទាល់ពី នគរបាលសហព័ន្ធអូស្ត្រាលី (AFP) ក្នុងគោលបំណងចែករំលែកបទពិសោធន៍ថ្មីៗ ការបញ្ជ្រាបការយល់ដឹងអំពីបញ្ហាប្រឈមរួមគ្នា ក្នុងតំបន់អាស៊ីអាគ្នេយ៍ ពាក់ព័ន្ធនឹងការវិឌ្ឍន៍នៃបទល្មើសបច្ចេកវិទ្យា បទពិសោធន៍នៃស្រាវជ្រាវ និងការបង្ក្រាបទីតាំងឆបោកអនឡាញ បញ្ហាប្រឈមរបស់មន្ត្រីអនុវត្តន៍ច្បាប់ជាមួយវិស័យឯកជន ក៏ដូចជាកិច្ចពិភាក្សារលម្អិតអំពីគោលដៅជាយុទ្ធសាស្ត្រសម្រាប់ប្រទេសនីមួយៗដែលនឹងត្រូវអនុវត្តបន្ត ដើម្បីឆ្លើយតបទៅនឹងសភាពការវិឌ្ឍន៍នៃបទល្មើស ការឆ្លើយតបឲ្យបានទាន់ពេលវេលា ជាពិសេសវិធីសាស្ត្រគ្រប់គ្រងហនិភ័យនានានៅពេលដែលបទល្មើសបានកើតមានឡើង។

ដោយទទួលបានការអនុញ្ញាតដ៏ខ្ពង់ខ្ពស់ពី ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ នាថ្ងៃព្រហស្បតិ៍ ៥កើត ខែជេស្ឋ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី២១ ខែឧសភា គ.ស.២០២៦ នាយកដ្ឋានប្រឆាំងបទល្មើសបច្ចេកវិទ្យា បានចាត់លោកឧត្ដមសេនីយ៍ទោ ស៊ីវ ឈាន់ តំណាងលោក ឧត្តមសេនីយ៍ទោ សុខ នីត្យា ប្រធាននាយកដ្ឋានប្រឆាំងបទល្មើសបច្ចេកវិទ្យា ដឹកនាំមន្ត្រីជំនាញចូលរួម និងធ្វើបាឋកថាជាវាគ្មិនក្នុងការធ្វើបទបង្ហាញចែករំលែកអំពីបទល្មើសឆបោកតាមប្រព័ន្ធបច្ចេកវិទ្យា នៅបណ្ឌិត្យសភានគរបាលកម្ពុជា លើសិក្ខាកាមចំនួន ០៣វគ្គ រួមមាន៖ វគ្គបំប៉នជំនាញគ្រប់គ្រងច្រកទ្វារអន្តរជាតិនិងទ្វេភាគី វគ្គបំប៉នជំនាញប្រឆាំងឧក្រិដ្ឋកម្មឆ្លងដែន និងវគ្គបំប៉នជំនាញអត្តសញ្ញាណកម្ម សិក្ខាកាមសរុបចំនួន ១២២រូប។

នាព្រឹកថ្ងៃទី២០ ខែឧសភា ឆ្នាំ២០២៦ ដោយទទួលបានការអនុញ្ញាតដ៏ខ្ពង់ខ្ពស់ពី ឯកឧត្តម នាយឧត្តមសេនីយ៍ អគ្គស្នងការនគរបាលជាតិ លោកវរសេនីយ៍ទោ ឆាយ ប៊ុនរម្យម៉ានិត តំណាងលោកឧត្តមសេនីយ៍ទោ សុខ នីត្យា ប្រធាននាយកដ្ឋានប្រឆាំងបទល្មើសបច្ចេកវិទ្យា បានចូលរួមជាវាគ្មិនក្នុងកិច្ចពិភាក្សាលើប្រធានបទ សន្តិសុខឌីជីថល និងការគម្រាមកំហែងក្នុងយុគ្គសម័យបច្ចេកវិទ្យា ក្នុងព្រឹត្តិការណ៍ “ទិវាសុវត្ថិភាពឌីជីថល លើកទី៣” ក្រោមមូលបទ «ការពង្រឹងភាពធនលើសុវត្ថិភាពឌីជីថល ក្នុងវិស័យធនាគារ និងហិរញ្ញវត្ថុនៅប្រទេសកម្ពុជា ដែលរៀបចំឡើង ដោយសមាគមធនាគារនៅកម្ពុជា នៅសណ្ឋាគារសុខាភ្នំពេញ។

ដោយទទួលបានការអនុញ្ញាត្តដ៏ខ្ពង់ខ្ពស់ពី ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ នៅថ្ងៃទី២១ ខែឧសភា ឆ្នាំ២០២៦ នាយកដ្ឋានប្រឆាំងបទល្មើសបច្ចេកវិទ្យា បានរៀបចំវគ្គបណ្តុះបណ្តាល តាមប្រព័ន្ធអនឡាញ ZOOM ស្តីពី “ការប្រមូលភស្តុតាង និងកោសល្យវិច័យបច្ចេកវិទ្យាលើឧបករណ៍អេឡិចត្រូនិក” នៅទីស្តីការក្រសួងមហាផ្ទៃ ក្រោមអធិបតីភាពរបស់ ឯកឧត្តម ឧត្តមសេនីយ៍ឯក ជា ពៅ អគ្គស្នងការរងនគរបាលជាតិ តំណាងដ៏ខ្ពង់ខ្ពស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ
ដោយមានការចូលរួម ពីបណ្តាស្នងការដ្ឋាននគរបាល រាជធានី ខេត្តទាំង២៥ នាយកដ្ឋាន មន្ទីរ និងអង្គភាពជំនាញដែលពាក់ព័ន្ធតាមប្រព័ន្ធហ្សូម (Zoom)។ ក្រោយបញ្ចប់ការធ្វើបទបង្ហាញពីមន្រ្តីជំនាញនៃនាយកដ្ឋានប្រឆាំងបទល្មើសបច្ចេកវិទ្យា ស្នងការដ្ឋាននគរបាលមួយចំនួនបានលើកជាសំណួរយ៉ាងផុលផុសជំវិញប្រធានបទកោសល្យវិច័យបច្ចេកវិទ្យាលើឧបករណ៍អេឡិចត្រូនិក និងទទួលបានការបកស្រាយយ៉ាងក្បោះក្បាយពីមន្រ្តីជំនាញផងដែរ។

ជាចុងបញ្ចប់ ឯកឧត្តម ឧត្តមសេនីយ៍ឯក អគ្គស្នងការរង មានមតិផ្តាំផ្ញើទៅដល់បណ្តាស្នងការដ្ឋាននគរបាល រាជធានី ខេត្តទាំង២៥ ក្រោយពីបានចូលរួមវគ្គបណ្តុះបណ្តាលនេះ សូមយកនូវជំនាញទាំងនេះយកទៅអនុវត្តផ្ទាល់ពេលមានករណីបង្រ្កាបបទល្មើសតាមប្រព័ន្ធបច្ចេកវិទ្យាក្នុងមូលដ្ឋានរបស់ខ្លួន និងត្រូវបន្តបណ្តុះបណ្តាលដល់មន្រ្តីក្រោមឱវាទបន្ថែមទៀត។