លេខាធិការដ្ឋាន គជអប - NCDDS

កិច្ចពិភាក្សាតុមូល ដើម្បីពិនិត្យ និងផ្ដល់មតិត្រឡប់ទៅលើរបកគំហើញសំខាន់ៗ លើការធ្វើវិមជ្ឈការហិរញ្ញវត្ថុនៅកម្ពុជារបស់ក្រុមបេសកកម្មពិគ្រោះយោបល់ថ្នាក់ដឹកនាំកម្រិតខ្ពស់
----------------------
រាជធានីភ្នំពេញ៖ នៅថ្ងៃសុក្រ ៥រោច ខែជេស្ឋ ឆ្នាំមមី អដ្ឋស័ក ពស. ២៥៧០ ត្រូវនឹងថ្ងៃទី៥ ខែមិថុនា ឆ្នាំ២០២៦ ឯកឧត្តម ចាន់ សុធា រដ្ឋលេខាធិការក្រសួងមហាផ្ទៃ និងជាប្រធានលេខាធិការដ្ឋាន គ.ជ.អ.ប. បានអញ្ជើញចូលរួមជាអធិបតីភាពដ៏ខ្ពង់ខ្ពស់ក្នុងកិច្ចពិភាក្សាតុមូល ដើម្បីពិនិត្យ និងផ្ដល់មតិត្រឡប់ទៅលើរបកគំហើញសំខាន់ៗ លើការធ្វើវិមជ្ឈការហិរញ្ញវត្ថុនៅកម្ពុជារបស់ក្រុមបេសកកម្មពិគ្រោះយោបល់ថ្នាក់ដឹកនាំកម្រិតខ្ពស់ ដែលបានលើកឡើងនៅក្នុងសិក្ខាសាលចែករំលែកចំណេះដឹង និងបទពិសោធន៍ស្ដីពីការធ្វើវិមជ្ឈការហិរញ្ញវត្ថុ ដែលប្រព្រឹត្តទៅកាលពីទី ៤ ខែមិថុនា ឆ្នាំ២០២៦ នៅសណ្ឋាគារណូវីតែល រាជធានីភ្នំពេញ។

ក្នុងឱកាសនៃកិច្ចពិភាក្សានេះ ឯកឧត្តមចាន់ សុធា បានថ្លែងការកោតសរសើរ និងវាយតម្លៃខ្ពស់ចំពោះការធ្វើបទបង្ហាញរបស់ Werner Gatzer ទាក់ទងនឹងការចែករំលែកបទពិសោធន៍នៃការធ្វើវិមជ្ឈការហិរញ្ញវត្ថុនៅប្រទេសអាល្លឺម៉ង ដែលពិតជាមេរៀនដ៏មានតម្លៃ និងជាធាតុចូលដ៏សំខាន់ក្នុងការពង្រឹងការធ្វើវិមជ្ឈការនៅកម្ពុជាឱ្យកាន់តែប្រសើរឡើង ធ្វើយ៉ាងណាឆ្លើយតបទៅនឹងតម្រូវការជាក់ស្ដែងរបស់ប្រជាពលរដ្ឋ។ ឯកឧត្តមក៏បានបង្ហាញការគាំទ្រ លើការលើកឡើងរបស់លោក Werner Gatzer នូវការបែងចែកឱ្យបានច្បាស់លាស់នូវមុខងាររវាងថ្នាក់ជាតិ និងថ្នាក់ក្រោមជាតិ ដែលនៅតាមបណ្ដាប្រទេសមួយចំនួន ការបែងចែកមុខងារជាក់លាក់នេះគឺបានចែងនៅក្នុងច្បាប់របស់ពួកគេតែម្ដង។

តាមរយៈបទបង្ហាញរបស់លោក Werner Gatzer បានបង្ហាញឱ្យឃើញពីការកំណត់រចនាសម្ព័ន្ធចំណូលសារពើរពន្ធ ការបែងចែកប្រភេទពន្ធរវាងរដ្ឋបាលសហព័ន្ធ និងរដ្ឋបាលមូលដ្ឋានដែលបាននិងកំពុងអនុវត្តន៍នៅប្រទេសអាល្លឺម៉ង់។ ទោះជាយ៉ាងនេះក្ដីលោក Werner Gatzer ក៏បានគូសបញ្ជាក់ពីភាពខុសគ្នាមួយចំនួនរវាងប្រទេសអាល្លឺម៉ង់ និងប្រទេសកម្ពុជាដោយផ្អែកលើបរិបទ ច្បាប់ នយោបាយ និងប្រវត្តិសាស្ត្រនៃប្រទេសទាំងពីរ ដូចនេះរាល់ការផ្ដល់អនុសាសន៍នានា ត្រូវតែស្របទៅនឹងស្ថានការជាក់ស្ដែងរបស់កម្ពុជាដោយផ្ទាល់។ បន្ថែមពីនេះលោក Werner Gatzer ក៏បានលើកឡើងនូវសំណើរសម្រាប់សាកល្បងនូវគោលនយោបាយ និងគំនិតថ្មីៗតាមរយៈ៖ ១. ឯកភាពលើការសាកល្បងនូវគោលនយោបាយ និងគំនិតថ្មីៗ ២. ការអនុវត្តគម្រោងសាកល្បងនៅរដ្ឋបាលរាជធានី ខេត្តគោលដៅចំនួន២ ឬ៣ ៣. តាមដាន ត្រួតពិនិត្យ និងវាយតម្លៃ ៤. ការកែសម្រួលដោយផ្អែកលើសមិទ្ធផលដែលទទួលបាន ៥. ឈានទៅរកការអនុវត្តទូទាំងប្រទេស។

បន្ថែមលើលទ្ធផលខាងលើ អង្គប្រជុំក៏បានឯកភាពលើការរៀបចំឱ្យមានដំណើរទស្សនកិច្ចសិក្សារបស់គណៈប្រតិភូជាន់ខ្ពស់របស់កម្ពុជាទៅកាន់ប្រទេសអាល្លឺម៉ង់នាពេលខាងមុខនេះផងដែរ។

កិច្ចពិភាក្សាតុមូលនេះ ក៏មានការអញ្ជើញចូលរួមពីអញ្ជើញចូលរួមពីតំណាងក្រសួងសេដ្ឋកិច្ច ហិរញ្ញវត្ថុ ក្រសួងមុខងារសាធារណៈ ក្រសួងមហាផ្ទៃ លេខាធិការដ្ឋាន គ.ជ.អ.ប. គណៈកម្មាធិការកែទម្រង់ទាំង៥របស់រាជរដ្ឋាភិបាល តំណាងស្ថានទូតអាល្លឺម៉ង់ ស្វីស លុចហ្សាំបួរ ធនាគារពិភពលោក ធនាគារអភិវឌ្ឍន៍អាស៊ី អង្គការសង្គមស៊ីវិលសរុបចំនួន ៣០រូប (ស្រី ៩រូប)។

ជំនួបពិភាក្សាការងារលើសេក្ដីព្រាងក្របខណ្ឌផែនការប្រចាំប្រទេសកម្ពុជា (CPF) ឆ្នាំ២០២៦-២០២៨ ជាមួយអ្នកតំណាងវិទ្យាស្ថានអភិវឌ្ឍន៍បៃតងសកល (GGGI) ប្រចាំនៅកម្ពុជា

ទីស្តីការក្រសួងមហាផ្ទៃ៖ នៅថ្ងៃព្រហស្បតិ៍ ទី៤ ខែមិថុនា ឆ្នាំ២០២៦ នេះ ឯកឧត្តម ឆេង វឌ្ឍនៈ អនុប្រធានលេខាធិការដ្ឋាន គ.ជ.អ.ប. បានអញ្ជើញអមឯកឧត្តម អ៊ុំ ម៉ារ៉ា រដ្ឋលេខាធិការក្រសួងមហាផ្ទៃទទួលជួបពិភាក្សាការងារ ជាមួយលោកស្រី Natalie Andre តំណាងវិទ្យាស្ថានអភិវឌ្ឍន៍បៃតងសកលប្រចាំនៅកម្ពុជា ដើម្បីពិភាក្សាទៅលើសេចក្ដីព្រាងក្របខណ្ឌផែនការប្រចាំប្រទេសកម្ពុជា ក្នុងការធានាបាននូវសង្គតិភាពទៅនឹងផែនការអាទិភាពជាតិ និងផែនការយុទ្ធសាស្ត្ររបស់ក្រសួងមហាផ្ទៃ និងលេខាធិការដ្ឋាន គ.ជ.អ.ប.។

កិច្ចពិភាក្សាបានផ្តោតលើប្រធានបទស្នូលចំនួន៤ រួមមាន (១) ហេដ្ឋារចនាសម្ព័ន្ធ​ទីក្រុងឆ្លាតវៃ (២) ប្រព័ន្ធសុវត្ថិភាពកសិ-ចំណីអាហារប្រកបដោយចីរភាព ​(៣) ផែនការធន់នឹងការប្រែប្រួលអាកាសធាតុ និង(៤) ការអន្តរកាលថាមពលស្អាត។ កិច្ចពិភាក្សានេះ មានការអញ្ជេីញចូលរួមពីឯកឧត្តម រដ្ឋលេខាធិការ ឯកឧត្តមអនុប្រធានលេខាធិការដ្ឋាន គ.ជ.អ.ប. អស់លោក លោកស្រីតំណាងអង្គភាពពាក់ព័ន្ធ ព្រមទាំងលោកស្រី ជាគណៈប្រតិភូនៃវិទ្យាស្ថានអភិវឌ្ឍន៍បៃតងសកលសរុបចំនួន១២រូប៕

សិក្ខាសាលាស្តីពីការបិទបញ្ចប់ការអនុវត្តគម្រោងអាហារូបត្ថម្ភនៅកម្ពុជា
----------------

ខេត្តសៀមរាប ៖ នាព្រឹកថ្ងៃព្រហស្បតិ៍ ៤ រោច ខែជេស្ឋ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី៤ ខែមិថុនា ឆ្នាំ២០២៦ សិក្ខាសាលាស្តីពីការបិទបញ្ចប់គម្រោងអាហារូបត្ថម្ភនៅកម្ពុជាបានសហការរៀបចំ រួមគ្នារវាងក្រសួងសុខាភិបាល និងលេខាធិការដ្ឋានគ.ជ.អ.ប. ក្រោមអធិបតីភាពដ៏ខ្ពស់ខ្ពស់ លោកជំទាវ វេជ្ជបណ្ឌិត ប្រាក់ សោភ័ណនារី រដ្ឋលេខាធិការក្រសួងសុខាភិបាល និងជានាយកគម្រោងអាហារូបត្ថម្ភនៅកម្ពុជា ឯកឧត្តម នី គឹមសាន អនុរដ្ឋលេខាធិការក្រសួងមហាផ្ទៃ និងជាអនុប្រធានលេខាធិការដ្ឋាន គ.ជ.អ.ប. តំណាងដ៏ខ្ពង់ខ្ពស់ ឯកឧត្តម ចាន់ សុធា រដ្ឋលេខាធិការក្រសួងមហាផ្ទៃ និងជាប្រធានលេខា ធិការដ្ឋាន គ.ជ.អ.ប. និងលោកស្រី ជីហូ ហ្ស៊ូស៊ូគី Chiho Suzuki តំណាងធនាគារពិភពលោក និងដៃគូអភិវឌ្ឍន៍នៅក្នុងពិធីបើកសិក្ខាសាលានេះ។

សិក្ខាសាលានេះមានការអញ្ជើញចូលរួមពីឯកឧត្តម លោកជំទាវ លោក លោកស្រី និងអ្នកនាងកញ្ញាមកពីក្រសួងសេដ្ឋកិច្ច និងហិរញ្ញវត្ថុ ភ្នាក់ងារជាតិបញ្ជាក់ការទូទាត់ចំណាយ រដ្ឋបាលខេត្ត មន្ទីរសុខាភិបាលខេត្ត រដ្ឋបាលក្រុង ស្រុកគោលដៅរបស់គម្រោង និងក្រុមការងារនៃក្រសួងសុខាភិបាល និងលេខាធិការដ្ឋាន គ.ជ.ប.អ. សរុបប្រមាណ២៣១រូប (ស្រ្តី៧៥រូប)។ សិក្ខាសាលានេះមានគោលបំណង (ក) បូកសរុបលទ្ធផលសំខាន់ៗសម្រេចបាននៃការអនុវត្តគម្រោងអាហារូបត្ថម្ភនៅកម្ពុជារយៈពេលជិត ៧ឆ្នាំ, (ខ) ចែករំលែកមេរៀន និងបទពិសោធន៍ និងគូសបញ្ជាក់ចំណុចខ្លាំង បញ្ហាប្រឈម និងដំណោះស្រាយក្នុងចំណោមថ្នាក់ដឹកនាំ ដៃគូអភិវឌ្ឍន៍ និងស្ថាប័នអនុវត្តទាំងថ្នាក់ជាតិ និងថ្នាក់ក្រោមជាតិ និង (គ) ពិភាក្សាយន្តការ និងយុទ្ធសាស្ត្រសំខាន់ៗ ដើម្បីធានានិរន្តរភាពនៃការអនុវត្តសកម្មភាពនានាពាក់ព័ន្ធការលើកកម្ពស់សុខភាពមាតា ទារក កុមារ និងអាហារូបត្ថម្ភជាអាទិភាពនៅមូលដ្ឋានសុខាភិបាល និងនៅក្នុងសហគមន៍ ក្រោមការដឹកនាំ ចាត់ចែង និងសម្របសម្រួលរបស់ស្ថាប័ន និងអង្ភភាពរបស់រដ្ឋាភិបាល ក្រោយបញ្ចប់គម្រោងអាហារូបត្ថម្ភនៅកម្ពុជានៅក្នុងពេលដ៏ខ្លីខាងមុខ។

ក្នុងពិធីបើកសិក្ខាសាលានេះ ឯកឧត្តម នី គឹមសាន បានកោតសរសើរ គូសបញ្ជាក់ និងវាយតម្លៃខ្ពស់ចំពោះកិច្ចខិតប្រឹងប្រែង និងកិច្ចសហការដ៏ល្អប្រសើររបស់ថ្នាក់ដឹកនាំ និងក្រុមការងារគម្រោងអាហារូបត្ថម្ភនៅកម្ពុជារបស់ក្រសួងសុខាភិបាល និងលេខាធិការដ្ឋាន គ.ជ.អ.ប. និងការគាំទ្រយ៉ាងពេញទំហឹងរបស់ដៃគូអភិវឌ្ឍន៍នានាក្រោមការសម្របសម្រួលពីធនាគារពិភពលោក និងសមិទ្ធផលចម្បងៗរបស់គម្រោងដែលបានចាក់គ្រឹះយ៉ាងរឹងមាំនៅក្នុងស្ថាប័នរដ្ឋាភិបាលទាំងនៅថ្នាក់ជាតិ និងថ្នាក់ក្រោមជាតិរួមមាន ការលើកកម្ពស់គុណភាព ភាពជឿទុកចិត្ត និងភាពពេញចិត្តនៃការផ្តល់សេវាសុខាភិបាល តាមរយៈការលើកកម្ពស់សុខភាពមាតា ទារក កុមារ និងអាហារូបត្ថម្ភជាអាទិភាពនៅមូលដ្ឋានសុខាភិបាល និងសេវារដ្ឋបាលនៅសាលាឃុំ សង្កាត់ សាលាក្រុង ស្រុក និងសាលាខេត្ត រួមទាំងនៅក្នុងសហគមន៍ផងដែរ។ លើសពីនេះ ឯកឧត្តម អនុរដ្ឋលេខាធិការក៏បានគូសបញ្ជាក់ការរួមចំណែករបស់គម្រោងអាហារូបត្ថម្ភនៅកម្ពុជា ក្នុងការបង្កើនការយកចិត្តទុកដាក់ខ្ពស់ក្នុងការអនុវត្តមុខងារសុខាភិបាលដែលបានផ្ទេរ និងប្រគល់ឱ្យទៅរដ្ឋបាលថ្នាក់ក្រោមជាតិនាពេលកន្លងមករបស់រាជរដ្ឋាភិបាល ក្នុងក្របខណ្ឌកំណែទម្រង់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិតាមរយៈកំណែទម្រង់វិមជ្ឈការ និងវិសហមជ្ឈការ និងការលើកកម្ពស់អភិបាលកិច្ចមូលដ្ឋាន។ ចុងក្រោយ ឯកឧត្តមក៏បានរម្លឹកជូនគណៈអធិបតី និងអ្នកចូលរួមទាំងអស់សាជាថ្មីអំពីវឌ្ឍនភាពនៃការអនុវត្តកម្មវិធីជាតិដំណាក់កាលទី២ និងការចាប់ផ្តើមរំកឹលផែនការអនុវត្ត៥ឆ្នាំដំណាក់កាលទី២ ដែលបានបង្ហាញលទ្ធផលគួរជាទីមោទនៈតាមរយៈរបាយការណ៍៣សំខាន់គឺ (១) សន្ទស្សន៍អភិបាលកិច្ច (២) សន្ទស្សន៍ការផ្តល់សេវា និង (៣) សន្ទស្សន៍សមត្ថភាពរដ្ឋបាលថ្នាក់ក្រោមជាតិដែលបានផ្សព្វផ្សាយជាផ្លូវការជូនដល់ក្រសួង ស្ថាប័ន រដ្ឋបាលថ្នាក់ក្រោមជាតិ ដៃគូអភិវឌ្ឍន៍ និងអង្គការសង្គមស៊ីវិលពាក់ព័ន្ធនាថ្ងៃទី២២ ខែឧសភា ឆ្នាំ២០២៦ កន្លងទៅ៕

នៅក្នុងឱកាសនៃពិធីបើកសិក្ខាសាលាបិទបញ្ចប់គម្រោងនេះ លោកជំទាវ ប្រាក់ សោភ័ណ្ឌនារី រដ្ឋលេខាធិការក្រសួងសុខាភិបាល និងជានាយកគម្រោងអាហារូបត្ថម្ភនៅកម្ពុជាក៏បានគូសបញ្ជាក់សាជាថ្មីថាថ្វីត្បិតតែគម្រោងអាហារូបត្ថម្ភនៅកម្ពុជានឹងបញ្ចប់នៅថ្ងៃទី៣០ ខែមិថុនា ឆ្នាំ២០២៦ ក៏ពិតមែន តែសកម្ម ភាពផ្តល់សេវាសុខាភិបាលតាមរយៈការលើកកម្ពស់ និងការផ្សព្វផ្សាយសុខភាពមាតា ទារក កុមារ និងអាហារូបត្ថម្ភជាអាទិភាពនឹងនៅតែបន្តជាប្រក្រតីនៅតាមមូលដ្ឋានសុខាភិបាល និងក្នុងសហគមន៍ជូនប្រជាពលរដ្ឋជាពិសេស ស្ត្រីមានផ្ទៃពោះ ស្ត្រីក្រោយសម្រាល និងកុមារអាយុក្រោម២ឆ្នាំ តាមរយៈយន្តការរបស់ រដ្ឋាភិបាលចាប់ពីថ្នាក់ជាតិដល់ថ្នាក់ក្រោមជាតិ និងថវិកាគាំទ្រផ្នែកសេវាសង្គមរបស់មូលនិធិក្រុង ស្រុក និងឃុំ សង្កាត់។ លើសពីនេះ ប្រព័ន្ធ គោលការណ៍ និតិវិធី មេរៀន និងបទពិសោធន៍ និងសម្ភារៈផ្សព្វផ្សាយ និងលើកកម្ពស់ការផ្លាស់ប្តូរឥរិយាបថ និងសង្គម ដែលគម្រោងបានផលិតនឹងត្រូវបន្តប្រើប្រាស់ជាមធ្យោ បាយក្នុងការអនុវត្តសកម្មភាពផ្នែកសេវាសង្គម ដើម្បីធានានិរន្តភាពសេវាសុខភាពមាតា ទារក កុមារ និងអាហារូបត្ថម្ភជាអាទិភាពនៅមូលដ្ឋានសុខាភិបាល និងនៅក្នុងសហគមន៍។

នៅក្នុងឱកាសដ៏វិសេសវិសាលនៃព្រឹត្តិការណ៍ជួបជុំចុងក្រោយរបស់គម្រោង ថ្នាក់ដឹកនាំគម្រោង ធនាការពិភពលោក និងតំណាងដៃគូអភិវឌ្ឍន៍បានចូលរួមប្រគល់ប័ណ្ណសរសើរដល់អង្ភភាពអនុវត្តគម្រោងថ្នាក់ជាតិ រដ្ឋបាលខេត្ត មន្ទីរសុខាភិបាលខេត្ត រដ្ឋបាលក្រុង ស្រុក ក្រុមការងារគម្រោងអាហារូបត្ថម្ភរបស់ក្រសួងសុខាភិបាល និងលេខាធិការដ្ឋាន គ.ជ.អ.ប. និងទីប្រឹក្សាដែលបម្រើការងារនៅក្នុ្ងងគម្រោងនេះទាំងអស់ជាការតបស្នងនូវគុណូបការៈដ៏ថ្លៃថ្លា និងជាអនុស្សាវរីយ៍ចំពោះកិច្ចខិតខំប្រឹងប្រែង និងការលះបង់កំលាំងកាយ ប្រាជ្ញា ស្មារតីចូលរួមក្នុងបុព្វហេតុពាក់ព័ន្ធការលើកកម្ពស់សុខភាពមាតា ទារក កុមារ និងអាហារូបត្ថម្ភជាអាទិភាពក្រោមពាក្យស្លោក “ថែរក្សាកូនយើង” តាមរយៈគម្រោងអាហារូបត្ថម្ភនៅកម្ពុជារយៈពេលជិត៧ឆ្នាំ៕

សិក្ខាសាលាចែករំលែកចំណេះដឹង និងបទពិសោធន៍ស្តីពី ការធ្វើវិមជ្ឈការហិរញ្ញវត្ថុនៅបណ្តាប្រទេសក្នុងតំបន់ និងប្រទេសអាល្លឺម៉ង់
…………………………………………

រាជធានីភ្នំពេញ៖ នៅថ្ងៃព្រហស្បតិ៍ ៤រោច ខែជេស្ឋ ឆ្នាំមមី អដ្ឋស័ក ពស. ២៥៧០ ត្រូវនឹងថ្ងៃទី៤ ខែមិថុនា ឆ្នាំ២០២៦ ឯកឧត្តម សក់ សេដ្ឋា ទេសរដ្ឋមន្ត្រីទទួលបន្ទុកបេសកកម្មពិសេស និងជាអនុប្រធានអចិន្ត្រៃយ៍នៃគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប.) បានអញ្ជើញជាអធិបតីភាពដ៏ខ្ពង់ខ្ពស់ក្នុងពិធីបើកសិក្ខាសាលាចែករំលែកចំណេះដឹង និងបទពិសោធន៍ ស្តីពីការធ្វើវិមជ្ឈការហិរញ្ញវត្ថុនៅបណ្តាប្រទេសក្នុងតំបន់និងប្រទេសអាល្លឺម៉ង់ នៅសណ្ឋាគារណូវីតែល រាជធានីភ្នំពេញ។

ថ្លែងក្នុងសុន្ទរកថាបើកអង្គសិក្ខាសាលានាព្រឹកនេះ ឯកឧត្តមទេសរដ្ឋមន្ត្រីបានមានប្រសាសន៍ថា រយៈពេលជាង ២ទសវត្សមកនេះ តាមរយៈកម្មវិធីកំណែទម្រង់វិមជ្ឈការ វិសហមជ្ឈការ និងកំណែទម្រង់ហិរញ្ញវត្ថុសាធារណៈ ដោយបានជួយឱ្យរដ្ឋបាលថ្នាក់ក្រោមជាតិមានសិទ្ធិអំណាច ធនធាន និងលទ្ធភាពគ្រប់គ្រាន់ក្នុងបម្រើតម្រូវការសេវាសាធារណៈជូនប្រជាពលរដ្ឋក្នុងមូលដ្ឋានឱ្យកាន់តែមានភាពល្អប្រសើរ ជាពិសេសគឺការឆ្លើយតបដោះស្រាយបញ្ហាកើតឡើងបន្ទាន់ៗដូចជា ជំងឺរាតត្បាតកូវីដ-១៩ និងគ្រោះមហន្តរាយធម្មជាតិនានាតាមមូលដ្ឋាន។ សិក្ខាសាលាដែលបានរៀបចំនៅថ្ងៃនេះ ពិតជាមានសារៈសំខាន់ក្នុងការចែករំលែកបទពិសោធន៍ និងការផ្តល់ធាតុចូលល្អៗពាក់ព័ន្ធនឹងកំណែទម្រង់វិមជ្ឈការ វិសហមជ្ឈការ និងកំណែទម្រង់ហិរញ្ញវត្ថុសាធារណៈ ដល់គ្រប់តួអង្គពាក់ព័ន្ធទាំងអស់ ទាំងថ្នាក់ជាតិ រដ្ឋបាលថ្នាក់ក្រោមជាតិ និងគ្រប់ភាគីពាក់ព័ន្ធនានា ដើម្បីស្វែងរកជម្រើសការលើកកម្ពស់ប្រព័ន្ធគ្រប់គ្រងរដ្ឋបាល ការផ្តល់សេវាសាធារណៈ ការសិក្សាជម្រើសក្នុងការកែសម្រួលរដ្ឋបាលរាជធានីទៅជារដ្ឋបាលទីក្រុងមេត្រូប៉ូលីតែន រដ្ឋបាលខេត្តទៅជារដ្ឋបាលតំបន់ និងរដ្ឋបាលក្រុង ស្រុក ខណ្ឌ ឃុំ សង្កាត់ទៅជារដ្ឋបាលមូលដ្ឋានឱ្យស្របតាមតម្រូវការរបស់ប្រជាពលរដ្ឋ។

ជាមួយគ្នានេះ លោក Christof Weigelmeier ប្រធានកិច្ចសហប្រតិបត្តិការអភិវឌ្ឍនៃនៃស្ថានទូតអាល្លឺម៉ង់ប្រចាំកម្ពុជា បានថ្លែងអំណរគុណដល់លេខាធិការដ្ឋាន គ.ជ.អ.ប. ក្រសួងសេដ្ឋកិច្ច និងហិរញ្ញវត្ថុ និងទីភ្នាក់ងារសហប្រតិបត្តិការអភិវឌ្ឍនៃសហព័ន្ធអាល្លឺម៉ង់ (GIZ) ដោយបានសហការក្នុងការរៀបចំសិក្ខាសាលាដ៏មានសារសំខាន់នេះឡើង។ លោកបានថ្លែងថា រដ្ឋាភិបាលអាល្លឺម៉ង់នៅតែបន្តគាំទ្រលើការងារកំណែទម្រង់របស់រដ្ឋាភិបាលកម្ពុជា ជាបន្តបន្ទាប់ដើម្បីលើកកម្ពស់អភិបាលកិច្ច និងការផ្តល់សេវាសាធារណៈប្រកបដោយសមធម៌ បរិយាប័ន្ន និងចីរភាពនៅប្រទេសកម្ពុជា។

នៅក្នុងអង្គសិក្ខាសាលារយៈពេលពេញមួយថ្ងៃនេះ មានការធ្វើបទបង្ហាញសំខាន់ចំនួនបី រួមមាន៖
១. ការចែករម្លែកបទពិសោធន៍ពីបណ្តាប្រទេសនានា និងសាធារណរដ្ឋសហព័ន្ធអាល្លឺម៉ង់ ស្តីពីវិមជ្ឈការហិរញ្ញវត្ថុ (ប្រភពចំណូលនៅមូលដ្ឋាន ការផ្ទេរធនធានហិរញ្ញវត្ថុ និងការខ្ចីប្រាក់) និងការគ្រប់គ្រងហិរញ្ញវត្ថុថ្នាក់ក្រោមជាតិ និងគណនេយ្យភាព
២.បទបង្ហាញ ស្តីពីការអនុវត្តនៅប្រទេសមួយចំនួនក្នុងតំបន់អាស៊ីអាគ្នេយ៍ អំពីការធ្វើវិមជ្ឈការហិរញ្ញវត្ថុ និងការគ្រប់គ្រងហិរញ្ញវត្ថុរបស់រដ្ឋបាលថ្នាក់ក្រោមជាតិ និង
៣.បទបង្ហាញអំពីរបកគំហើញបឋមរបស់ក្រុមបេសកកម្មអាល្លឺម៉ង់។

ក្រៅអំពីការចែករំលែកមេរៀនបទបទពិសោធន៍ការអនុវត្តល្អៗពីបណ្តាប្រទេសនានា អង្គសិក្ខាសាលាបានរៀបចំនូវវេទិកាសំនួរចំលើយ ដោយមានការចូលរួមពីសំណាក់វាគ្មិនកិត្តិយសបីរូប រួមមាន៖
១.លោក Werner Gatzer អតីតរដ្ឋលេខាធិការនៃក្រសួងសេដ្ឋកិច្ចហិរញ្ញវត្ថុ សហព័ន្ធប្រទេសអាល្លឺម៉ង់
២.លោកស្រី Stefanie Teggemann ប្រធានគ្រប់គ្រងមូលនិធិ GIZ ប្រទេសអាលឺម្លង់ និង
៣.លោកស្រី Friederike Burkert ប្រធានគ្រប់គ្រងកម្មវិធី (GIZ/ISD II)។

សិក្ខាសាលានេះមានសមាភាពអញ្ជើញចូលរួមពីតំណាងក្រសួងសេដ្ឋកិច្ច ហិរញ្ញវត្ថុ ក្រសួងមុខងារសាធារណៈ ក្រសួងមហាផ្ទៃ លេខាធិការដ្ឋាន គ.ជ.អ.ប. គណៈកម្មាធិការកែទម្រង់ទាំង៥របស់រាជរដ្ឋាភិបាល តំណាងស្ថានទូតអាល្លឺម៉ង់ ស្វីស លុចហ្សាំបួរ ធនាគារពិភពលោក ធនាគារអភិវឌ្ឍន៍អាស៊ី អង្គការសង្គមស៊ីវិល និងសិស្សមន្រ្តីជាន់ខ្ពស់សាលាភូមិន្ទរដ្ឋបាល សរុបចំនួន ១២៣រូប ៕

កិច្ចប្រជុំលើកទី១៤ របស់គណៈកម្មាធិការគ្រប់គ្រងការអនុវត្តផែនការយុទ្ធសាស្ត្រគណនេយ្យភាពសង្គមនៅថ្នាក់ក្រោមជាតិ (គ.គ.អ.ស.)
-----
ទីស្តីការក្រសួងមហាផ្ទៃ៖ ថ្ងៃពុធ​ ៣រោច ខែជេស្ឋ​ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី៣ ខែមិថុនា ឆ្នាំ២០២៦ ឯកឧត្តម ចាន់ សុធា រដ្ឋលេខាធិការក្រសួងមហាផ្ទៃ និងជាប្រធានគណៈកម្មាធិការគ្រប់គ្រងការអនុវត្តផែនការយុទ្ធសាស្ត្រគណនេយ្យភាពសង្គមនៅថ្នាក់ក្រោមជាតិ (គ.គ.អ.ស.) បានដឹកនាំកិច្ចប្រជុំលើកទី១៤ របស់ គ.គ.អ.ស. ដើម្បីពិនិត្យមើលវឌ្ឍនភាពការអនុវត្តការងារគណនេយ្យភាពសង្គម និងពិភាក្សាលើសេចក្ដីព្រាងយុទ្ធសាស្ត្រនិរន្តរភាពការងារគណនេយ្យភាពសង្គមនៅថ្នាក់ឃុំ សង្កាត់។

ក្នុងកិច្ចប្រជុំ ឯកឧត្តម ចាន់ សុធា បានថ្លែងកោតសរសើរចំពោះកិច្ចខិតខំប្រឹងប្រែងរបស់ក្រសួង ស្ថាប័នពាក់ព័ន្ធ រដ្ឋបាលថ្នាក់ក្រោមជាតិ ដៃគូអភិវឌ្ឍន៍ និងអង្គការសង្គមស៊ីវិល ដែលបានរួមចំណែកជំរុញការងារគណនេយ្យភាពសង្គមឱ្យទទួលបានលទ្ធផលជាវិជ្ជមានគួរឱ្យកត់សម្គាល់ ដែលកិច្ចការនេះ រួមចំណែកយ៉ាងសំខាន់ដល់កំណែទម្រង់វិមជ្ឈការ និងវិសហមជ្ឈការនៅកម្ពុជា។
ឯកឧត្តមក៏បានជម្រាបជូនអង្គប្រជុំអំពីការរៀបចំយុទ្ធសាស្រ្តនិរន្តរភាពការងារគណនេយ្យភាពសង្គមនៅថ្នាក់ឃុំ សង្កាត់ និងផែនការអនុវត្តការងារគណនេយ្យភាពសង្គមដំណាក់កាលទី៣ (២០២៦-២០៣០) ដែលជាឯកសារក្នុងការគាំទ្រកម្មវិធីជាតិដំណាក់កាលទី២ របស់រាជរដ្ឋាភិបាល។

ក្នុងនោះផងដែរ តំណាងក្រសួង ស្ថាប័ន ដៃគូអភិវឌ្ឍន៍ និងអង្គការសង្គមស៊ីវិល បានលើកឡើងពីសារៈសំខាន់នៃការអនុវត្តការងារគណនេយ្យភាពសង្គម ក្នុងការលើកកម្ពស់ការចូលរួមរបស់ប្រជាពលរដ្ឋ ការផ្តល់សេវាសាធារណៈ និងការឆ្លើយតបទៅនឹងបញ្ហាតម្រូវការនៅមូលដ្ឋាន ព្រមទាំងបង្ហាញការប្តេជ្ញាចិត្តក្នុងការគាំទ្រដល់ការងារគណនេយ្យភាពសង្គម ជាពិសេសការធានានិរន្តរភាពការងារគណនេយ្យភាពសង្គមនៅថ្នាក់ឃុំ សង្កាត់នាពេលអនាគត។

កិច្ចប្រជុំនេះមាន​ការអញ្ជើញចូលរួមពីឯកឧត្តម លោកជំទាវ លោក លោកស្រី តំណាងលេខាធិការដ្ឋាន គ.ជ.អ.ប. ក្រសួងមហាផ្ទៃ ក្រសួងអប់រំ យុវជន និងកីឡា ក្រសួងសុខាភិបាល ក្រសួងសេដ្ឋកិច្ច និងហិរញ្ញវត្ថុ ក្រសួងផែនការ ក្រសួងសាធារណការ និងដឹកជញ្ជូន ក្រសួងឧស្សហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ ស្ថានទូតអូស្រ្តាលីប្រចាំកម្ពុជា ស្ថានទូតជប៉ុនប្រចាំកម្ពុជា ធនាគារពិភពលោកប្រចាំកម្ពុជា អង្គការមូលនិធិអាស៊ី អង្គការទស្សនៈពិភពលោកអន្តរជាតិប្រចាំកម្ពុជា អង្គការឃែរអន្តរជាតិប្រចាំកម្ពុជា អង្គការស្តារកម្ពុជា អង្គការសម្ព័ន្ធសុខភាពកុមារ និងសុខភាពបន្តពូជ អង្គការគណៈកម្មាធិការសហប្រតិបត្តិការដើម្បីកម្ពុជា អង្គការសង្រ្គោះកុមារ អង្គការវិទ្យាស្ថានបម្រើអ្នកសម្របសម្រួលការងារអភិវឌ្ឍន៍ អង្គការ GIZ អង្គការអុកស្វាមកម្ពុជា សរុបចំនួន ៦០រូប ស្រី ១២រូប។

កិច្ចប្រជុំបានបញ្ចប់ដោយលទ្ធផលផ្លែផ្កា ដោយមានការប្តេជ្ញាចិត្តរួមពីក្រសួង ស្ថាប័ន ដៃគូអភិវឌ្ឍន៍ និងអង្គការសង្គមស៊ីវិលាក្នុងការបន្តពង្រឹងការងារគណនេយ្យភាពសង្គម ឱ្យក្លាយជាយន្តការសំខាន់មួយក្នុងការលើកកម្ពស់សេវាសាធារណៈនៅថ្នាក់មូលដ្ឋានប្រកបដោយប្រសិទ្ធភាព តម្លាភាព គណនេយ្យភាព បរិយាបន្ន និងសមធម៌សង្គម ស្របតាមចក្ខុវិស័យគោលនយោបាយកំណែទម្រង់វិមជ្ឈការ និងវិសហមជ្ឈការរបស់រាជរដ្ឋាភិបាល៕

សិក្ខាសាលាពិគ្រោះយោបល់ស្តីពីការបញ្ចប់ការរៀបចំគម្រោងអភិវឌ្ឍន៍សេដ្ឋកិច្ចកសិករខ្នាតតូចដែលធន់នឹងអាកាសធាតុ
--------------------------
ខេត្តសៀមរាប ៖ ថ្ងៃពុធ ៣រោច ខែជេស្ឋ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី៣ ខែមិថុនា ឆ្នាំ២០២៦ ឯកឧត្តម នី គឹមសាន អនុប្រធានលេខាធិការដ្ឋាននៃគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប.) និងជានាយកគម្រោងអភិវឌ្ឍន៍សេដ្ឋកិច្ចកសិករខ្នាតតូចដែលធន់នឹងអាកាសធាតុ (SRED-SP) តំណាងដ៏ខ្ពង់ខ្ពស់ ឯកឧត្តម ចាន់ សុធា រដ្ឋលេខាធិការក្រសួងមហាផ្ទៃ និងជាប្រធានលេខាធិការដ្ឋាន គ.ជ.អ.ប បានអញ្ជើញជាអធិបតីក្នុងកម្មវិធីសិក្ខាសាលាពិគ្រោះយោបល់ស្តីពីការបញ្ចប់ការរៀបចំគម្រោងអភិវឌ្ឍន៍សេដ្ឋកិច្ចកសិករខ្នាតតូចដែលធន់នឹងអាកាសធាតុ។

សិក្ខាសាលាពិគ្រោះយោបល់នេះមានការអញ្ជើញចូលរួមពីតំណាងក្រសួង ស្ថាប័នពាក់ព័ន្ធ តំណាងរដ្ឋបាលថ្នាក់ក្រោមជាតិដែលជាគោលដៅអនុវត្តរបស់គម្រោង តំណាងធនាគារអភិវឌ្ឍន៍អាស៊ី ADB តំណាងដៃគូអភិវឌ្ឍន៍ វិស័យធានារ៉ាប់រង គ្រឹះស្ថានមីក្រូហិរញ្ញវត្ថុ ក្រុមកែលម្អជីវភាពកសិករ និងក្រុមការងារលេខាធិការដ្ឋាន គ.ជ.អ.ប. សរុបចំនួន៧១រូប (ស្រ្តី១៥រូប)។

សិក្ខាសាលាពិគ្រោះយោបល់ស្តីពីការបញ្ចប់ការរៀបចំគម្រោងអភិវឌ្ឍន៍សេដ្ឋកិច្ចកសិករខ្នាតតូចដែលធន់នឹងអាកាសធាតុនេះមានគោលបំណង ដើម្បីជួយកសិករខ្នាតតូច និងសហគមន៍ជនបទនៅកម្ពុជា ដោយផ្តោតលើលទ្ធផលរំពឹងទុកសំខាន់ៗចំនួន០៤ រួមមាន៖ (១). សេវាបច្ចេកទេស និងការវិនិយោគបៃតង (២). ហេដ្ឋារចនាសម្ព័ន្ធធន់នឹងអាកាសធាតុ (៣). ពង្រឹងភាពធន់រយៈពេលវែង និង(៤). លើកកម្ពស់សិទ្ធិ និងសេដ្ឋកិច្ចស្ត្រី៕

កិច្ចប្រជុំពិភាក្សាលើផែនការចាកចេញ និងនិរន្តរភាពនៃគម្រោងគណនេយ្យភាពសង្គម
------
ធនាគារពិភពលោក៖ នាព្រឹកថ្ងៃអង្គារ ២រោច ខែជេស្ឋ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី០២ ខែមិថុនា ឆ្នាំ២០២៦ ឯកឧត្តម ម៉ាអុន ម៉ាអូណាត អនុប្រធានលេខាធិការដ្ឋាន គ.ជ.អ.ប. និងជានាយកគម្រោងគណនេយ្យភាពសង្គម បានអញ្ជើញដឹកនាំកិច្ចប្រជុំពិភាក្សាផ្តោតលើផែនការចាកចេញ (Exit Plan) និងយុទ្ធសាស្ត្រនិរន្តរភាពរបស់គម្រោង ព្រមទាំងវិធានការសំខាន់ៗ ដើម្បីធានាការបន្តអនុវត្ត ការរក្សាទុកសមិទ្ធផល និងផលប៉ះពាល់ជាវិជ្ជមានរយៈពេលវែង បន្ទាប់ពីការបញ្ចប់គម្រោង។

កិច្ចប្រជុំនេះមានការអញ្ជើញចូលរួមពី ឯកឧត្តម ឆឹម សំអ៊ែល ប្រធានអង្គភាពត្រួតពិនិត្យ វាយតម្លៃ និងព័ត៌មាន ព្រមទាំងឯកឧត្តម លោក លោកស្រី តំណាងលេខាធិការដ្ឋាន គ.ជ.អ.ប. ស្ថានទូតអូស្ត្រាលី ធនាគារពិភពលោក និងអង្គការទស្សនៈពិភពលោកអន្តរជាតិ សរុបចំនួន ១៥ រូប ក្នុងនោះស្រី ៣ រូប។

ក្នុងកិច្ចប្រជុំ អង្គប្រជុំបានពិភាក្សាយ៉ាងស៊ីជម្រៅលើផែនការយុទ្ធសាស្ត្រចាកចេញ និងនិរន្តរភាពរបស់គម្រោង ដោយផ្តោតលើការពង្រឹងភាពជាម្ចាស់របស់ស្ថាប័នពាក់ព័ន្ធនៅថ្នាក់ជាតិ និងថ្នាក់ក្រោមជាតិ ការបន្តអនុវត្តយន្តការ និងដំណើរការសំខាន់ៗនៃការងារគណនេយ្យភាពសង្គម ព្រមទាំងការកៀរគរធនធាន និងការកសាងសមត្ថភាព ដើម្បីធានាការបន្តអនុវត្តប្រកបដោយប្រសិទ្ធភាព និងចីរភាពបន្ទាប់ពីការបញ្ចប់ការគាំទ្រពីគម្រោង៕

លេខាធិការដ្ឋាន គ.ជ.អ.ប. ស្វាគមន៍លោក David Williams
.....................................
ទីស្តីការក្រសួងមហាផ្ទៃ ៖ នារសៀលថ្ងៃចន្ទ ១រោច ខែជេស្ឋ ឆ្នាំមមី អដ្ឋស័ក ព.ស. ២៥៧០ ត្រូវនឹងថ្ងៃទី០១ ខែមិថុនា ឆ្នាំ២០២៦ ឯកឧត្តម ឆឹម សំអ៊ែល ប្រធានអង្គភាពត្រួតពិនិត្យ វាយតម្លៃ និងព័ត៌មាន (MEID) តំណាងដ៏ខ្ពង់ខ្ពស់របស់ ឯកឧត្តម ចាន់ សុធា ប្រធានលេខាធិការដ្ឋាន គ.ជ.អ.ប. បានទទួលស្វាគមន៍យ៉ាងកក់ក្តៅចំពោះ លោក David Williams នាយកព័ត៌មានវិទ្យា នៃសាលាក្រុង Hampton រដ្ឋ Virginia សហរដ្ឋអាមេរិក នៅទីស្តីការក្រសួងមហាផ្ទៃ។

លោក David Williams បានមកបំពេញទស្សនកិច្ចនៅលេខាធិការដ្ឋាន គ.ជ.អ.ប. ក្រោមកម្មវិធី YSEALI Professional Fellows Program ដើម្បីគាំទ្រដល់គម្រោង “Digital Empowerment Initiative: Advancing Digital Literacy for Smart NCDDS”។

ក្នុងជំនួបពិភាក្សានោះ ភាគីទាំងពីរបានផ្លាស់ប្តូរយោបល់យ៉ាងស៊ីជម្រៅលើការងារកំណែទម្រង់វិមជ្ឈការ និងវិសហមជ្ឈការ ព្រមទាំងតួនាទីគន្លឹះរបស់ការិយាល័យព័ត៌មានវិទ្យា (IT) នៃអង្គភាព MEID លើប្រព័ន្ធគ្រប់គ្រងព័ត៌មានរបស់ គ.ជ.អ.ប។ ជាមួយគ្នានេះ ភាគីទាំងក៏បានពិភាក្សាអំពីឱកាសក្នុងការពង្រឹងជំនាញឌីជីថល ការកែលម្អប្រព័ន្ធ គុណភាពទិន្នន័យ សន្តិសុខព័ត៌មាន និងការគាំទ្រផ្នែកព័ត៌មានវិទ្យាប្រកបដោយនិរន្តរភាព។

ជាទីបញ្ចប់តំណាងលេខាធិការដ្ឋាន គ.ជ.អ.ប. បានសម្តែងការថ្លែងអំណរគុណយ៉ាងជ្រាលជ្រៅចំពោះ លោក David Williams សម្រាប់ការចូលរួមចែករំលែក និងផ្លាស់ប្តូរបទពិសោធន៍ដ៏មានតម្លៃ ដែលជាការរួមចំណែកយ៉ាងសំខាន់ដល់ការគាំទ្របរិវត្តកម្មឌីជីថល ក្នុងក្របខណ្ឌលេខាធិការដ្ឋាន គ.ជ.អ.ប. ឱ្យកាន់តែប្រសើរឡើង៕

ឯកឧត្តម សក់ សេដ្ឋា ទេសរដ្ឋមន្ត្រីទទួលបន្ទុកបេសកកម្មពិសេស និងជាអនុប្រធានអចិន្ត្រៃយ៍នៃ គ.ជ.អ.ប. ទទួលជួបសម្តែងការគួរសមជាមួយក្រុមបេសកកម្មពិគ្រោះយោបល់ស្តីពីវិមជ្ឈការហិរញ្ញវត្ថុ និងការគ្រប់គ្រងហិរញ្ញវត្ថុរបស់រដ្ឋបាលថ្នាក់ក្រោមជាតិនៅកម្ពុជា
_______

លេខាធិការដ្ឋាន គ.ជ.អ.ប. (អគារ V)៖ នៅព្រឹកថ្ងៃចន្ទ ១រោច ខែជេស្ឋ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី១ ខែមិថុនា ឆ្នាំ២០២៦
ឯកឧត្តម សក់ សេដ្ឋា ទេសរដ្ឋមន្ត្រីទទួលបន្ទុកបេសកកម្មពិសេស និងជាអនុប្រធានអចិន្ត្រៃយ៍នៃ គ.ជ.អ.ប. អមដោយ ឯកឧត្តម ចាន់ សុធា រដ្ឋលេខាធិការក្រសួងមហាផ្ទៃ និងជាប្រធានលេខាធិការដ្ឋាន គ.ជ.អ.ប. ទទួលជួបសម្តែងការគួរសមជាមួយក្រុមបេសកកម្មពិគ្រោះយោបល់ស្តីពីវិមជ្ឈការហិរញ្ញវត្ថុ និងការគ្រប់គ្រងហិរញ្ញវត្ថុរបស់រដ្ឋបាលថ្នាក់ក្រោមជាតិនៅកម្ពុជា ដឹកនាំដោយលោក Werner Gatzer អតីតរដ្ឋលេខាធិការនៃក្រសួងហិរញ្ញវត្ថុសហព័ន្ធអាល្លឺម៉ង់ និងមានការចូលរួមពីតំណាងកម្មវិធី GIZ-ISD ព្រមទាំងថ្នាក់ដឹកនាំនៃលេខាធិការដ្ឋាន គ.ជ.អ.ប. និងអគ្គនាយកដ្ឋានរដ្ឋបាលនៃក្រសួងមហាផ្ទៃ។

ក្នុងជំនួបនេះ ឯកឧត្តមទេសរដ្ឋមន្ត្រី បានជម្រាបជូនអំពីវឌ្ឍនភាពនៃការអនុវត្តកំណែទម្រង់វិមជ្ឈការ និងវិសហមជ្ឈការ ជាពិសេសការធ្វើវិមជ្ឈការហិរញ្ញវត្ថុ និងការគ្រប់គ្រងហិរញ្ញវត្ថុនៅរដ្ឋបាលថ្នាក់ក្រោមជាតិ ព្រមទាំងបានលើកឡើងអំពីបញ្ហាប្រឈមសំខាន់ៗមួយចំនួនពាក់ព័ន្ធនឹងការបែងចែកធនធានហិរញ្ញវត្ថុ ប្រភពចំណូលផ្ទាល់របស់រដ្ឋបាលថ្នាក់ក្រោមជាតិ និងយន្តការត្រួតពិនិត្យផ្ទៃក្នុង និងសវនកម្ម។

ក្រុមបេសកកម្មបានវាយតម្លៃខ្ពស់ចំពោះសមិទ្ធផលដែលរាជរដ្ឋាភិបាលកម្ពុជាសម្រេចបានក្នុងការជំរុញកំណែទម្រង់វិមជ្ឈការ និងវិសហមជ្ឈការ និងបានបង្ហាញការចាប់អារម្មណ៍ជាពិសេសលើយន្តការផ្ទេរធនធានហិរញ្ញវត្ថុ ការគ្រប់គ្រងចំណូលរបស់រដ្ឋបាលថ្នាក់ក្រោមជាតិ ការរៀបចំប្រព័ន្ធថវិកា និងគណនេយ្យភាពហិរញ្ញវត្ថុ ព្រមទាំងលទ្ធភាពនៃការពង្រឹងស្វ័យភាពហិរញ្ញវត្ថុរបស់រដ្ឋបាលថ្នាក់ក្រោមជាតិ ស្របតាមបរិបទកម្ពុជា។

ភាគីទាំងពីរបានផ្លាស់ប្តូរយោបល់ និងបទពិសោធន៍លើគោលនយោបាយ និងការអនុវត្តវិមជ្ឈការហិរញ្ញវត្ថុ ព្រមទាំងបានឯកភាពលើសារៈសំខាន់នៃការបន្តពង្រឹងកិច្ចសហការរវាងរាជរដ្ឋាភិបាលកម្ពុជា និងដៃគូអភិវឌ្ឍន៍ ក្នុងការគាំទ្រដល់ការអនុវត្តកម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ និងកម្មវិធីកំណែទម្រង់ការគ្រប់គ្រងហិរញ្ញវត្ថុសាធារណៈ ដើម្បីធានាឱ្យរដ្ឋបាលថ្នាក់ក្រោមជាតិមានធនធានហិរញ្ញវត្ថុគ្រប់គ្រាន់ ស្វ័យភាពកាន់តែប្រសើរ និងសមត្ថភាពខ្ពស់ក្នុងការផ្តល់សេវាសាធារណៈ និងអភិវឌ្ឍមូលដ្ឋានឱ្យកាន់តែមានប្រសិទ្ធភាព៕

កិច្ចពិគ្រោះយោបល់ស្តីពីកិច្ចសហប្រតិបត្តិការរវាងរាជរដ្ឋាភិបាលកម្ពុជា និងរាជរដ្ឋាភិបាលលុចសំបួរ
_____________

ទីស្តីការក្រុមប្រឹក្សាអភិវឌ្ឍន៍កម្ពុជា (ក.អ.ក.) ៖ នៅថ្ងៃសុក្រ ១៣កើត ខែជេស្ឋ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី២៩ ខែឧសភា ឆ្នាំ២០២៦ ឯកឧត្តម នី គឹមសាន អនុរដ្ឋលេខាធិការក្រសួងមហាផ្ទៃ និងឯកឧត្តម ឆេង វឌ្ឍនៈ អនុប្រធានលេខាធិការដ្ឋាន គ.ជ.អ.ប. តំណាងដ៏ខ្ពង់ខ្ពស់ឯកឧត្តម ចាន់ សុធា រដ្ឋលេខាធិការក្រសួងមហាផ្ទៃ និងជាប្រធានលេខាធិការដ្ឋាន គ.ជ.អ.ប. បានអញ្ជើញចូលរួមកិច្ចពិគ្រោះយោបល់​​អន្តរក្រសួង ដើម្បីពិភាក្សាលើកម្មវិធីណែនាំស្តីពី កិច្ចសហប្រតិបត្តិការរវាងរាជរដ្ឋាភិបាលកម្ពុជា និងរាជរដ្ឋាភិបាលលុចសំបួរ (Indicative Cooperation Programme – ICP ក្រោមអធិបតីដឹកនាំកិច្ចប្រជុំដោយ ឯកឧត្តម ឈៀង យ៉ាណារ៉ា ទេសរដ្ឋមន្រ្តីទទួលបន្ទុកបេសកកម្មពិសេស អនុប្រធានទី២ ក្រុមប្រឹក្សាអភិវឌ្ឍន៍កម្ពុជា (ក.អ.ក.) តំណាងឱ្យភាគីកម្ពុជា និងលោក Thomas Lammar ភារធារីនៃស្ថានទូតប្រទេសលុចសំបួរប្រចាំប្រទេសឡាវនិងជាប្រធានការិយាល័យសហប្រតិបត្តិការអភិវឌ្ឍន៍ប្រចាំប្រទេសឡាវ មីយ៉ាន់ម៉ា វៀតណាម និងកម្ពុជា ស្ថានទូតលុចសំបួរប្រចាំសាធារណរដ្ឋប្រជាធិបតេយ្យប្រជាមានិតឡាវ តំណាងឱ្យភាគីលុចសំបួរ។

កិច្ចពិគ្រោះយោបល់នេះ មានគោលបំណងពិភាក្សាលើទិសដៅយុទ្ធសាស្ត្រ និងវិស័យអាទិភាពដែលបានស្នើឡើងក្នុងសេចក្តីព្រាងកម្មវិធីណែនាំស្ដីពីកិច្ចសហប្រតិបត្តិការ (ICP) ក្នុងនោះ រួមមាន វិស័យអាទិភាពស្នូលបីគឺ វិស័យសុខាភិបាល វិស័យអប់រំបណ្តុះបណ្តាលបច្ចេកទេស និងវិជ្ជាជីវៈ (TVET) និងវិស័យអភិវឌ្ឍន៍ជនបទ ។ ក្រៅពីវិស័យស្នូលទាំងបីនេះ បានរួមបញ្ចូលនូវកិច្ចការជាអន្តរវិស័យមួយចំនួនផងដែរ រួមមាន ការលើកកម្ពស់សិទ្ធិមនុស្ស ការលើកម្ពស់សមភាពយេនឌ័រ បរិស្ថាន និងការប្រែប្រួលអាកាសធាតុ អភិបាលកិច្ច និងឌីជីថលូបនីយកម្ម។

កិច្ចពិគ្រោះយោបល់នេះ មានការចូលរួមពីលោកជំទាវ ឯកឧត្តម លោក លោកស្រី តំណាងជាន់ខ្ពស់ពីក្រសួង និងស្ថាប័នពាក់ព័ន្ធ សរុបប្រមាណ ៤៥នាក់៕