នាយកដ្ឋានកសិឧស្សាហកម្ម Department of Agro-Industry - MAFF

ថ្នាក់នាំនិងមន្ត្រីរាជការនាយកដ្ឋានកសិឧស្សាហកម្ម នៃក្រសួងកសិកម្ម រុក្ខាប្រមាញ់ និងនេសាទ សូមប្រកាសគាំទ្រពេញទំហឹងចំពោះចំណាត់ការរបស់រាជរដ្ឋាភិបាលកម្ពុជាក្នុងការចាប់ផ្តើមដំណើរការយន្តការផ្សះផ្សាដោយបង្ខំ (Compulsory Conciliation) ដើម្បីទាមទារតំបន់សមុទ្រត្រួតស៊ីគ្នា ក្រោមអនុសញ្ញាអង្គការសហប្រជាជាតិស្តីពីនីតិសមុទ្រ(UNCLOS)។

លោកបណ្ឌិត ចាយ ជីម ប្រធាននាយកដ្ឋានកសិឧស្សាហកម្ម នៃក្រសួងកសិកម្ម រុក្ខាប្រមាញ់ និងនេសាទ បានចុះសិក្សាអំពីសក្តានុពលក្នុងការដាំដុះបន្លែ នៅសហគមន៍បន្លែសុវត្តិភាពបុសម្កាក់ និងបានប្រគល់ឧបករណ៍សម្រាប់វាស់កម្រិតជី សំណើម និងpHក្នុងដី ដល់មន្រ្តីកសិកម្មឃុំចំនួន ១១រូប នៅក្នុងខេត្តកំពង់ធំ។

លោកបណ្ឌិត ចាយ ជីម ប្រធាននាយកដ្ឋានកសិឧស្សាហកម្ម នៃក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងាររាជរដ្ឋាភិបាលចុះជួយឃុំគយម៉ែង បានដឹកនាំក្រុមការងាររៀបចំដាក់បង្គោលសូឡាបន្តចំនួន ៥០ដើម តាមដងផ្លូវនៅក្នុងភូមិស្ទឹងចាស់ និងភូមិគយម៉ែង ឃុំគយម៉ែង និងបានពិភាក្សាជាមួយអាជ្ញាធរឃុំនិងមន្រ្តីកសិកម្មឃុំ ដើម្បីសិក្សាអំពីស្ថានភាពការចិញ្ចឹមត្រី កណ្តូប ការបណ្តុះផ្សិត និងការងារផ្សេងៗពាក់ព័ន្ធនឹងវិស័យកសិកម្ម។

ក្រុមការងារនាយកដ្ឋានកសិឧស្សាហកម្ម នៃក្រសួងកសិកម្ម រុក្ខាប្រមាញ់ និងនេសាទ បានចុះពិនិត្យ និងសិក្សាសក្តានុពលក្នុងការដាំដុះបន្លែប៉េងបោះឈ័ររី ផ្កាខាត់ណាលឿង និងបន្លែផ្សេងៗ របស់សហគមន៍កសិកម្មទំនើបមង្គលបូរី ដើម្បីផ្សារភ្ជាប់ទីផ្សារតាមរយៈយន្តការផលិតកម្មកសិកម្មតាមកិច្ចសន្យា។

លោកស្រី គង់ វួចស៊ីម អនុប្រធានការិយាល័យអភិវឌ្ឍន៍កសិ-ឧស្សាហកម្ម នៃនាយកដ្ឋានកសិឧស្សាហកម្ម បានចូលរួមវគ្គបណ្ដុះបណ្ដាលរយៈពេលខ្លី ក្រោមប្រធានបទ "Sustainable, Resilient and Productive Agri-Food Systems" ក្រោមកិច្ចគាំទ្រដោយកម្មវិធី Manaaki Scholarship នៃក្រសួងការបរទេស និងពាណិជ្ជកម្ម (MFAT) និងសម្របសម្រួលបង្រៀនដោយសាកលវិទ្យាល័យ Massey University នៅទីក្រុងវែលីងតោន ប្រទេសនូវែលសេឡង់ មានរយៈពេល ២៤ថ្ងៃ ចាប់ពីថ្ងៃទី២០ ខែមេសា ដល់ថ្ងៃទី១៣ ខែឧសភា ឆ្នាំ២០២៦ មានសិក្ខាកាមចូលរួមចំនួន ១៥នាក់ (ក្នុងនោះស្ដ្រីមានចំនួន ៨នាក់) មកពីបណ្ដាប្រទេសចំនួន ០៩ នៃបណ្តាប្រទេសសមាជិកអាស៊ីអាគ្នេយ៍ រួមមាន កម្ពុជា ឡាវ មីយ៉ាន់ម៉ា ប្រ៊ុយណេ ម៉ាឡេស៊ី ឥណ្ឌូនេស៊ី ហ្វីលីពីន វៀតណាម និងទីម័រ។

វគ្គបណ្ដុះបណ្ដាលនេះមានគោលបំណង ដេីម្បី ១). បង្កើនចំណេះដឹង និងជំនាញរបស់សិក្ខាកាមឲ្យកាន់តែប្រសើរឡើងអំពីប្រព័ន្ធទីផ្សារកសិចំណីអាហារ ការអនុវត្តកសិកម្មឆ្លាតវៃបន្សុំាជាមួយអាកាសធាតុក្នុងប្រព័ន្ធគ្រប់គ្រងកសិចំណីអាហារ និងការគ្រប់គ្រងខ្សែច្រវ៉ាក់តម្លៃកសិចំណីអាហារប្រកបដោយចីរភាព ធន់ និងមានផលិតភាព ២). ស្វែងយល់ពីភាពជោគជ័យ បញ្ហាប្រឈម និងឱកាស ដើម្បីពង្រឹងប្រព័ន្ធទីផ្សារ ខ្សែច្រវ៉ាក់តម្លៃ និងការច្នៃប្រឌិតបច្ចេកវិទ្យាថ្មីៗនៃកសិចំណីអាហារ នៅក្នុងប្រទេសនូវែលសេឡង់ និងបណ្ដាប្រទេសជាសមាជិកអាស៊ាន និង ៣). ជម្រុញកំណើន និងការអភិវឌ្ឍន៍កសិចំណីអាហារប្រកបដោយចីរភាព និងមានភាពប្រកួតប្រជែង ដោយផ្តោតលើបរិមាណផ្គត់ផ្គង់ តម្លៃ ការចុះកិច្ចសន្យាផ្គត់ផ្គង់ ឬកិច្ចសន្យាផលិតកម្មកសិកម្ម និងសុវត្ថិភាពចំណីអាហារដែលអនុលោមទៅនឹងស្តង់ដារជាតិ និងអន្តរជាតិ។ ជាលទ្ធផល នាយកដ្ឋានកសិឧស្សាហកម្ម នឹងបន្ដផ្សព្វផ្សាយ និងអនុវត្តផលិតកម្មកសិកម្មតាមកិច្ចសន្យា ព្រមទាំងសុវត្ថិភាពចំណីអាហារ ដល់កសិករ ក្រុមផលិត សហគមន៍កសិកម្មទំនើប សហគមន៍កសិកម្ម សហគ្រាសកសិកម្ម សិប្បកម្មកែច្នៃ និងអ្នកពាក់ព័ន្ធនានា នៅក្នុងខ្សែច្រវ៉ាក់តម្លៃផលិតផលកសិកម្ម និងកសិចំណីអាហារ ដើម្បីកសាងភាពជាដៃគូអាជីវកម្មប្រកបដោយបរិយាបន្ន។

អបអរសាទរ សហគមន៍កសិកម្មទំនើបបន្លែផ្ទះសំណាញ់ត្រាំកក់ ខេត្តតាកែវ ដែលបានចុះកិច្ចសន្យាផលិតកម្មកសិកម្ម ជាមួយគិរីទេស ក្នុងការទិញ-លក់បន្លែសុវត្ថិភាពចំនួន ៦តោន/១សប្តាហ៍ (ប្រមូលផលបន្លែ ៦ថ្ងៃ/១សប្តាហ៍) លើមុខបន្លែចំនួន ៤មុខរួមមាន ស្ពៃក្រញ៉ាញ់, ស្ពៃតឿខៀវ, ស្ពៃខ្មៅ និងខាត់ណាដើម ដោយកិច្ចសន្យាអនុវត្តរយៈពេល ១ឆ្នាំ ក្នុងបរិមាណបន្លែសរុប ២៨៨តោន លើទំហំទឹកប្រាក់ប្រមាណ ៥៩០ ៤០០ ០០០រៀល។

អបអរសាទរ សហគមន៍កសិកម្មទំនើបប្រស្នឹបពន្លឺថ្មី ខេត្តកំពង់ឆ្នាំង ដែលបានចុះកិច្ចសន្យាផលិតកម្មកសិកម្ម ជាមួយគិរីទេស ក្នុងការទិញ-លក់បន្លែសុវត្ថិភាពចំនួន ១៨តោន/១ខែ (ប្រមូលផលបន្លែ ៣ដង/១សប្តាហ៍) លើមុខបន្លែចំនួន ៨មុខរួមមាន ស្ពៃក្រញ៉ាញ់, ស្ពៃតឿខៀវ, ស្ពៃចង្កឹះ, ស្ពៃតឿស, ស្ពៃឡៃស៊ីម, ស្ពៃខ្មៅ, សាលាដ៏ និងខាត់ណាដើម ដោយកិច្ចសន្យាអនុវត្តរយៈពេល ៦ខែ ក្នុងបរិមាណបន្លែសរុប ១០៨តោន លើទំហំទឹកប្រាក់ប្រមាណ ២៤៣ ៤៣២ ០០០រៀល។

លោកបណ្ឌិត ចាយ ជីម ប្រធាននាយកដ្ឋានកសិឧស្សាហកម្ម នៃក្រសួងកសិកម្ម រុក្ខាប្រមាញ់ និងនេសាទ និងសហការី បានជួបប្រជុំពិភាក្សាជាមួយអង្គការ GIZ ពីការគាំទ្របច្ចេកទេស សម្ភារៈឧបករណ៍ ហេដ្ឋារចនាសម្ព័ន្ធដែលបម្រើក្នុងវិស័យស្វាយចន្ទី ក្នុងការជំរុញផលិតកម្ម ការស្តុបទុក ការកែច្នៃ គុណភាព និងការពង្រីកទីផ្សារ ដើម្បីបង្កើតប្រាក់ចំណូលបន្ថែមលើពិពិធកម្មដំណាំស្វាយចន្ទី និងការអនុវត្តផលិតកម្មកសិកម្មតាមកិច្ចសន្យារវាងអ្នកលក់ និងអ្នកទិញ ឱ្យកាន់តែមានប្រសិទ្ធភាព និងភាពជឿទុកចិត្តគ្នា។

លោកបណ្ឌិត ចាយ ជីម ប្រធាននាយកដ្ឋានកសិឧស្សាហកម្ម នៃក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងាររាជរដ្ឋាភិបាលចុះជួយឃុំគយម៉ែង បានដឹកនាំក្រុមការងាររៀបចំដាក់បង្គោលសូឡាបន្ត តាមដងផ្លូវនៅក្នុងឃុំគយម៉ែង ស្រុកមង្គលបូរី ខេត្តបន្ទាយមានជ័យ និងបានឧបត្ថម្ភកុំព្យូទ័រយូរដៃ ១គ្រឿងជូនដល់រដ្ឋបាលឃុំគយម៉ែង ដើម្បីសម្រួលការងារផ្តល់សេវាសាធារណៈជូនប្រជាពលរដ្ឋឱ្យបានទាន់ពេលវេលានិងទទួលបានប្រសិទ្ធភាពខ្ពស់។

ក្រុមការងារនាយកដ្ឋានកសិឧស្សាហកម្ម នៃក្រសួងកសិកម្ម រុក្ខាប្រមាញ់ និងនេសាទ បានជួបប្រជុំពិភាក្សាជាមួយកសិដ្ឋានពញាគង់ ស្ថិតនៅភូមិត្រពាំងខ្ទុំ ឃុំស្វាយចចិប ស្រុកបសេដ្ឋ ខេត្តកំពង់ស្ពឺ ក្នុងការរៀបចំផែនការដាំដុះបន្លែ ដែលកសិដ្ឋាននេះបានផលិតជីកំប៉ុស្តិ៍គោកនិងទឹក ព្រមទាំងផលិតថ្នាំបាញ់បណ្តេញសត្វល្អិតដោយខ្លួនឯងផ្ទាល់។
សូមជម្រាបផងដែរថា កសិដ្ឋានពញាគង់ មានការដាំដុះបន្លែសរីរាង្គ ដែលទទួលបានតម្លៃខ្ពស់ជាងបន្លែធម្មតា ៣ដង ។