អគ្គនាយកដ្ឋានបច្ចេកទេស-General Department of Technical Affairs/MRD

ឯកឧត្តម ឈឹម សៅគី អញ្ជើញចុះត្រួតពិនិត្យ វាយតម្លៃបញ្ចប់សុពលភាព លេីការងារថែទាំខួបផ្លូវដោយក្រាលកៅស៊ូ (DBST) បន្ថែមពីលេី (Reseal DBST) ប្រវែង ៩ ២៧០ ម៉ែត្រ នៅស្រុករលាប្អៀរ ខេត្តកំពង់ឆ្នាំង

(ខេត្តកំពង់ឆ្នាំង) ឯកឧត្តម ឈឹម សៅគី រដ្ឋលេខាធិការប្រចាំការ តំណាងដ៏ខ្ពង់ខ្ពស់ឯកឧត្ដម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានអញ្ជើញដឹកនាំគណៈកម្មការអន្តរក្រសួង រួមមាន ក្រសួងអភិវឌ្ឍន៍ជនបទ និងក្រសួងសេដ្ឋកិច្ច និងហិរញ្ញវត្ថុ ចុះត្រួតពិនិត្យ វាយតម្លៃបញ្ចប់សុពលភាព លេីការងារថែទាំខួបផ្លូវដោយក្រាលកៅស៊ូ (DBST) បន្ថែមពីលេី (Reseal DBST) ចំនួន ១កំណត់ ប្រវែង ៩ ២៧០ ម ទទឺង ៥,៥ម គូសគំនូសចរាចរណ៍ទំហំ ១ ៨៥៤ម ចាប់ពី គម០៧+៦០០ ដល់គម១៦+៨៧០ ស្ថិតនៅក្នុងឃុំពង្រ ឃុំបន្ទាយព្រាល និងឃុំក្រាំងស្គារ ស្រុករលាប្អៀរ ខេត្តកំពង់ឆ្នាំង អនុវត្តដោយនាយកដ្ឋានផ្លូវលំជនបទ កាលពីថ្ងៃសុក្រ ៥រោច ខែជេស្ឋ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី៥ ខែមិថុនា ឆ្នាំ២០២៦។

កិច្ចត្រួតពិនិត្យ និងវាយតម្លៃមានការចូលរួមពី ឯកឧត្តម ឈន សេដ្ឋា និងលោកជំទាវ ឯក គន្ធវារី អនុរដ្ឋលេខាធិការ ក្រុមការ គ.ត.វ. នៃក្រសួងអភិវឌ្ឍន៍ជនបទ តំណាងនាយកដ្ឋានផ្លូវលំជនបទ និងតំណាងអង្គភាពលទ្ធកម្ម។

ទន្ទឹមនេះ ឯកឧត្តមរដ្ឋលេខាធិការប្រចាំការ បានជួបសំណេះសំណាលជាមួយប្រជាពលរដ្ឋរស់នៅតាមដងផ្លូវទាំងនេះ ហើយពួកគាត់បង្ហាញនូវសេចក្តីរំភើបរីករាយដែលទទួលបាននូវសមិទ្ធផលថ្មីបន្ថែមទៀតពីរាជរដ្ឋាភិបាលកម្ពុជា តាមរយៈក្រសួងអភិវឌ្ឍន៍ជនបទ បានស្ថាបនាឡើងក្រោមគោលនយោបាយ និងយុទ្ធសាស្រ្តអភិវឌ្ឍន៍ប្រទេសជាតិ ដើម្បីជំរុញការអភិវឌ្ឍ សេដ្ឋកិច្ច និងសង្គមកម្ពុជា ក្នុងគោលដៅសម្រេចឱ្យបានចក្ខុវិស័យ “កម្ពុជាក្លាយជាប្រទេសមានប្រាក់ចំណូលខ្ពស់ក្នុងឆ្នាំ២០៥០”។

បន្ទាប់ពីបានត្រួតពិនិត្យ និងប្រជុំពិភាក្សាជាមួយអ្នកទទួលការ អ្នកបច្ចេកទេស និងគណៈកម្មការអន្តរក្រសួងរួចមក គណៈកម្មការបានឯកភាពទទួលយកបញ្ចប់សុពលភាពការងារគម្រោងខាងលើ និងសូមឱ្យអ្នកទទួលការបន្តការងារថែទាំផ្លូវនេះបន្ថែមទៀត៕

ឯកឧត្តម ឆាយ ឫទ្ធិសែន អញ្ជើញដឹកនាំកិច្ចប្រជុំពិនិត្យ និងជ្រើសរើសខ្សែផ្លូវសម្រាប់ផែនការ ៣ឆ្នាំរំកិល របស់ក្រសួងអភិវឌ្ឍន៍ជនបទ

ភ្នំពេញ៖ នាថ្ងៃព្រហស្បតិ៍ ៤រោច ខែជេស្ឋ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី៤ ខែមិថុនា ឆ្នាំ២០២៦ នៅទីស្ដីការក្រសួង ឯកឧត្ដម ឆាយ ឫទ្ធិសែន រដ្ឋមន្រ្ដីក្រសួងអភិវឌ្ឍន៍ជនបទ បានអញ្ជើញដឹកនាំកិច្ចប្រជុំពិនិត្យ និងជ្រើសរើសខ្សែផ្លូវសម្រាប់ដាក់បញ្ចូលទៅក្នុងគម្រោងឆ្នាំ ២០២៧ និងផែនការ ៣ឆ្នាំរំកិល (ឆ្នាំ២០២៧-២០២៩) របស់ក្រសួងអភិវឌ្ឍន៍ជនបទ ដោយប្រើប្រាស់ថវិការបស់រាជរដ្ឋាភិបាល។

កិច្ចប្រជុំមានការអញ្ជើញចូលរួមដោយផ្ទាល់ពីសំណាក់ ឯកឧត្តមរដ្ឋលេខាធិការប្រចាំការ ឯកឧត្តម ថ្នាក់ដឹកនាំ និងមន្ដ្រីបច្ចេកទេសនៃនាយកដ្ឋានផ្លូវលំជនបទ ដោយឡែកមន្ទីរអភិវឌ្ឍន៍ជនបទទាំង២៥ រាជធានី-ខេត្ត អញ្ជើញចូលរួមតាមរយៈប្រព័ន្ធនិម្មិត (Zoom Meeting)។ អង្គប្រជុំបានពិនិត្យយ៉ាងល្អិតល្អន់លើគម្រោងសំណើខ្សែផ្លូវដែលបានស្នើឡើងដោយផ្អែកលើអាទិភាពសំខាន់ៗ ដែលស្របតាមផែនការខ្សែផ្លូវមេរបស់ក្រសួងដែលមានសក្កានុពលខ្ពស់ បម្រើដល់គ្រប់វិស័យរបស់រាជរដ្ឋាភិបាល។

អញ្ជើញមានប្រសាសន៍ដឹកនាំកិច្ចប្រជុំ ឯកឧត្តមរដ្ឋមន្ដ្រី បានគូសបញ្ជាក់ជូនថា ដើម្បីចូលរួមអភិវឌ្ឍសង្គមជាតិឱ្យមានការរីកចម្រើន ប្រកបដោយបរិយាបន្ន និងដើម្បីកាត់បន្ថយគម្លាតរវាងទីប្រជុំជន និងតំបន់ជនបទ ក្រសួងអភិវឌ្ឍន៍ជនបទ បាននិងកំពុងយកចិត្តទុកដាក់ក្នុងការអភិវឌ្ឍហេដ្ឋារចនាសម្ព័ន្ធជនបទ ដើម្បីឱ្យមានការតភ្ជាប់ និងមានភាពប្រទាក់ក្រឡា ក្នុងគោលដៅជួយជំរុញឱ្យមានកំណើនសកម្មភាពសេដ្ឋកិច្ច និងបង្កការងាយស្រួយដល់ប្រជាពលរដ្ឋទទួលបានសេវាសាធារណៈផងដែរ។

ជាចុងក្រោយ ឯកឧត្តមរដ្ឋមន្ដ្រី បានផ្ដល់អនុសាសន៍ដល់ថ្នាក់ដឹកនាំ និងមន្ដ្រីបច្ចេកទេសទាំងអស់ឱ្យបន្ដអនុវត្តការងារសាងសង់ហេដ្ឋារចនាសម្ព័ន្ធគមនាគមន៍ជនបទឱ្យមានគុណភាព និងប្រកបដោយភាពធន់ ដើម្បីរួមចំណែកក្នុងការបង្កើនប្រសិទ្ធភាពនៃកំណែទម្រង់លើគម្រោងវិនិយោគសាធារណៈរបស់រាជរដ្ឋាភិបាល ក៏ដូចជាធ្វើឱ្យសម្រេចបាននូវគោលដៅនៃគោលនយោបាយជាតិស្ដីពីការអភិវឌ្ឍជនបទឆ្នាំ២០២៥-២០៣៥ និងចូលរួមចំណែកសម្រេចនូវយុទ្ធសាស្ត្របញ្ចកោណ-ដំណាក់កាលទី១ របស់រាជរដ្ឋាភិបាល អាណត្តិទី៧ នៃរដ្ឋសភា ក្រោមការដឹកនាំបន្ដវេនប្រកបដោយគតិបណ្ឌិតរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ៕

ឯកឧត្តម ឆាយ ឫទ្ធិសែន អញ្ជើញដឹកនាំកិច្ចប្រជុំត្រួតពិនិត្យវឌ្ឍនភាពការរៀបចំឯកសារស្ដីពី ការកំណត់និងការពិពណ៌នាមុខតំណែងវិជ្ជាជីវៈអភិវឌ្ឍន៍ជនបទ

[English Below] រាជធានីភ្នំពេញ៖ នាព្រឹកថ្ងៃសុក្រ ៥រោច ខែជេស្ឋ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី៥ ខែមិថុនា ឆ្នាំ២០២៦ នៅទីស្តីការក្រសួង ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានអញ្ជើញដឹកនាំកិច្ចប្រជុំត្រួតពិនិត្យវឌ្ឍនភាពការរៀបចំឯកសារស្ដីពីការកំណត់ និងការពិពណ៌នាមុខតំណែងវិជ្ជាជីវៈអភិវឌ្ឍន៍ជនបទ ដោយមានការអញ្ជើញចូលរួមពីសំណាក់ ឯកឧត្ដមរដ្ឋលេខាធិការប្រចាំការ ឯកឧត្ដម លោកជំទាវ ជាថ្នាក់ដឹកនាំ និងមន្ដ្រីជំនាញ ព្រមទាំងក្រុមការងារលេខាធិការដ្ឋានកែទម្រង់សាធារណៈនៃក្រសួងអភិវឌ្ឍន៍ជនបទ ។

អង្គប្រជុំបានធ្វើការពិនិត្យ ពិភាក្សាយ៉ាងល្អិតល្អន់ និងផ្ដល់ធាតុចូលដ៏មានសារសំខាន់ជាច្រើន ដើម្បីបំពេញបន្ថែមលើឯកសារស្ដីពីការកំណត់និងការពិពណ៌នាមុខតំណែងវិជ្ជាជីវៈអភិវឌ្ឍន៍ជនបទ ដែលក្រុមការងារលេខាធិការដ្ឋានបានរៀបចំ ឱ្យបានគ្រប់ជ្រុងជ្រោយ មានសង្គតិភាពជាមួយអនុក្រឹត្យលេខ ២៣៧ អនក្រ.បក ស្ដីពី ការរៀបចំនិងការប្រព្រឹត្តទៅរបស់ក្រសួងអភិវឌ្ឍន៍ជនបទ និងឱ្យស្របតាមវិធានការគន្លឹះក្នុងការកែទម្រង់រដ្ឋបាលសាធារណៈរបស់រាជរដ្ឋាភិបាលក្នុងនីតិកាលទី៧ នៃរដ្ឋសភា ក្រោមការដឹកនាំប្រកបដោយគតិបណ្ឌិតរបស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃព្រះរាជាណាចក្រកម្ពុជា៕

Phnom Penh: On the morning of Friday, June 5, 2026, at the Ministry’s headquarters, H.E. Chhay Rithisen, Minister of Rural Development, chaired a meeting to review progress on drafting documents concerning the definition and job descriptions of professional positions in rural development. The session was attended by the Permanent Secretary of State, senior leaders and technical specialists, and the working group of the Secretariat for Public Administration Reform of the Ministry of Rural Development.
The meeting conducted a careful review and discussion, providing numerous substantive inputs to refine and complete the draft documents so they are comprehensive and coherent with Sub Decree No. 237 ANKr.BK on the organization and functioning of the Ministry of Rural Development, and aligned with the key measures of the Royal Government’s public administration reform in the Seventh Legislature of the National Assembly, under the principled leadership of Samdech Moha Bovor Thipadei Hun Manet, Prime Minister of the Kingdom of Cambodia.

ឯកឧត្ដម ឆាយ ឫទ្ធិសែន អញ្ជើញជាកិត្តិយសក្នុងពិធីសម្ពោធអគារកម្ពស់៣ជាន់ សមិទ្ធផលនានា នៅវិទ្យាស្ថានជាតិអប់រំកាយ និងកីឡា

[English Below] រាជធានីភ្នំពេញ៖ នាព្រឹកថ្ងៃពុធ ៣រោច ខែជេស្ឋ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី៣ ខែមិថុនា ឆ្នាំ២០២៦ ឯកឧត្ដម ឆាយ ឫទ្ធិសែន រដ្ឋមន្រ្ដីក្រសួងអភិវឌ្ឍន៍ជនបទ បានអញ្ជើញជាកិត្តិយសក្នុងពិធីសម្ពោធអគារកម្ពស់៣ជាន់ និងសមិទ្ធផលនានា នៅក្នុងវិទ្យាស្ថានជាតិអប់រំកាយ និងកីឡា ក្រោមអធិបតីភាពដ៏ខ្ពង់ខ្ពស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ស្ថិតក្នុងសង្កាត់ស្វាយប៉ាក ខណ្ឌឫស្សីកែវ រាជធានីភ្នំពេញ។

ជាមួយនឹងការសម្ពោធសមិទ្ធផលនានា នាឱកាសនោះ ក៏មានពិធីប្រគល់សញ្ញាបត្រគ្រូបង្រៀនកម្រិតមូលដ្ឋាន និងសញ្ញាបត្របរិញ្ញាបត្រអប់រំឯកទេសអប់រំកាយ ជូនដល់គរុសិស្ស គរុនិស្សិតជ័យលាភីសរុបចំនួន ៣៨០នាក់ នារីចំនួន ៦៨នាក់។ ក្នុងនោះគរុសិស្សបញ្ចប់ការបណ្ដុះបណ្ដាលគ្រូបង្រៀនកម្រិតមូលដ្ឋាន(១២+២) ឯកទេសអប់រំកាយ និងកីឡា ចំនួន ៣១៤នាក់ នារីចំនួន ៥៨នាក់ និងគរុនិស្សិតបញ្ចប់ការបណ្ដុះបណ្ដាលគ្រូបង្រៀនកម្រិតមូលដ្ឋាន(១២+៤) ថ្នាក់បរិញ្ញាបត្រឯកទេសអប់រំកាយ និងកីឡា ចំនួន ៦៦នាក់ នារីចំនួន ១០នាក់។ ក្នុងឱកាសអញ្ជើញសម្ពោធសមិទ្ធផលថ្មី និងប្រគល់សញ្ញាបត្រដល់គរុសិស្ស-គរុនិស្សិតអប់រំកាយ សម្តេចធិបតី ហ៊ុន ម៉ាណែត បានថ្លែងថា ការកសាងនូវសាលា និងសមិទ្ធផលនានានូវពេលនេះ គឺជាការខិតខំរបស់រាជរដ្ឋាភិបាល ក្នុងការលើកកម្ពស់វិស័យអប់រំ ការអប់រំកាយ និងកីឡា។ សម្ដេចធិបតី បានមានប្រសាសន៍បញ្ជាក់បន្ថែមទៀតថា ការកសាង និងការការពារជាតិរឹងមាំ គឺអាស្រ័យទៅលើមនុស្សរឹងមាំ, មនុស្សរឹងមាំ គឺអាស្រ័យទៅលើការវិនិយោគទៅលើធនធានមនុស្ស នៅក្នុងសង្គមកិច្ច ទាំងវិស័យអប់រំ និងវិស័យសុខាភិបាលនេះឯង។

គួររំលឹកជូនដែរថា ក្នុងស្មារតីចូលរួមអនុវត្តយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាលកម្ពុជា ក្រសួងអប់រំ យុវជន និងកីឡា បន្តផ្តល់អាទិភាពដល់អនុវិស័យអប់រំកាយ និងកីឡា ដោយផ្សាភ្ជាប់នឹងការអប់រំ និងការបន្តជំរុញចលនា “យុវជនម្នាក់ ចេះកីឡាមួយប្រភេទយ៉ាងតិចប្រចាំជីវិត”៕

Phnom Penh: On Wednesday morning, June 3, 2026, H.E. Chhay Rithisen, Minister of Rural Development, attended as guest of honor the inauguration of a three story building and other achievements at the National Institute of Physical Education and Sports, under the high presidency of Samdech Moha Bovor Thipadei Hun Manet, Prime Minister of the Kingdom of Cambodia, in Svay Pak Sangkat, Russei Keo District, Phnom Penh.

Alongside the inaugurations, a ceremony was held to confer basic teacher certificates and bachelor’s degrees in physical education to a total of 380 graduating teacher trainees, including 68 women. Of these, 314 graduates (including 58 women) completed the basic teacher training program (12+2) specializing in physical education and sports, and 66 graduates (including 10 women) completed the basic teacher training program (12+4) at the bachelor’s level in physical education and sports.

In his remarks marking the inauguration and the conferment of degrees, Prime Minister Hun Manet stated that the construction of the new facilities and the broader achievements reflect the Royal Government’s efforts to advance education, physical education, and sports. He emphasized that building and safeguarding a strong nation depends on strong people—and strong people, in turn, depend on sustained investment in human resources across society, particularly in the education and health sectors.

It should be recalled that, within the spirit of implementing Phase I of the Royal Government’s Pentagonal Strategy, the Ministry of Education, Youth and Sport continues to prioritize physical education and sports in connection with general education, while promoting the nationwide movement “Each youth masters at least one sport for life.”

លោក ជំទាវ ម៉ាត់ ម៉ារ៉ា បានអញ្ជើញជាអធិបតីក្នុងកិច្ចប្រជុំប្រចាំខែឧសភា នៃក្រុមការងារយេនឌ័រ និងផែនការយុទ្ធសាស្ត្របញ្ជ្រាបយេនឌ័រ ឆ្នាំ២០២៥-២០៣០ របស់ក្រសួងអភិវឌ្ឍន៍ជនបទ

រាជធានីភ្នំពេញ៖ នាព្រឹកថ្ងៃអង្គារ ២រោច ខែជេស្ឋ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី២ ខែមិថុនា ឆ្នាំ២០២៦ លោក ជំទាវ ម៉ាត់ ម៉ារ៉ា រដ្ឋលេខាធិការ និងជាប្រធានក្រុមការងារយេនឌ័រ តំណាងដ៏ខ្ពង់ខ្ពស់ ឯកឧត្តម ឆាយ ប្ញទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានអញ្ជើញជាអធិបតីក្នុងកិច្ចប្រជុំប្រចាំខែឧសភា នៃក្រុមការងារយេនឌ័រ និងផែនការយុទ្ធសាស្ត្របញ្ជ្រាបយេនឌ័រ ឆ្នាំ២០២៥-២០៣០ របស់ក្រសួងអភិវឌ្ឍន៍ជនបទ ក្នុងកិច្ចប្រជុំនេះក៏មានការអញ្ជើញចូលរួមជាកិត្តិយសដោយ ឯកឧត្ដម ថេ ឈុនហាក់ អគ្គនាយក នៃអគ្គនាយកដ្ឋានសមភាពយេនឌ័រ និងអភិវឌ្ឍន៍សេដ្ឋកិច្ច លោកស្រី សេងផល ដាវីន អគ្គនាយករង នៃអគ្គនាយកដ្ឋានសមភាពយេនឌ័រ និង អភិវឌ្ឍន៍សេដ្ឋកិច្ច នៃក្រសួងកិច្ចការនារី ព្រមទាំង លោកជំទាវ រដ្ឋលេខាធិការ អនុរដ្ឋលេខាធិការ ឯកឧត្ដម អគ្គនាយកបច្ចេកទេស លោក លោកស្រី ជាសមាជិកនៃក្រុមការងារយេនឌ័រ ក្រសួងអភិវឌ្ឍន៍ជនបទ ចំនួន៣៤រូប ស្រី២៧រូប។
កិច្ចប្រជុំនេះរៀបចំឡើង ក្នុងគោលបំណងដើម្បីត្រួតពិនិត្យលទ្ធផលនៃការអនុវត្តការងាររបស់ក្រុមការងារយេនឌ័ររបស់ក្រសួងអភិវឌ្ឍន៍ជនបទ និងផែនការយុទ្ធសាស្ត្របញ្ជ្រាបយេនឌ័រ ឆ្នាំ២០២៥-២០៣០ ដែលលបានអនុវត្ត និងស្វែងរកដំណោះស្រាយ ព្រមទាំងបញ្ហាប្រឈមនានាដែលជួបប្រទះនាពេលកន្លងមក។

អនុស្សរណៈនៃការយោគយល់គ្នា ស្តីពី “កិច្ចសហប្រតិបត្តិការភាពជាដៃគូលើការជំរុញការងារអភិវឌ្ឍវិស័យទេសចរណ៍ និងវិស័យអភិវឌ្ឍន៍ជនបទ” រវាងក្រសួងអភិវឌ្ឍន៍ជនបទ និងក្រសួងទេសចរណ៍

ពិធីចុះហត្ថលេខាលើអនុស្សរណៈនៃការយោគយល់គ្នារវាង ក្រសួងទេសចរណ៍ និងក្រសួងអភិវឌ្ឍន៍ជនបទ

រាជធានីភ្នំពេញ៖ នាព្រឹកថ្ងៃចន្ទ ១រោច ខែជេស្ឋ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី១ ខែមិថុនា ឆ្នាំ២០២៦ ក្រសួងអភិវឌ្ឍន៍ជនបទ និងក្រសួងទេសចរណ៍ ក្នុងនាមជាសេនាធិការឱ្យរាជរដ្ឋាភិបាលនីតិកាលទី៧ នៃរដ្ឋសភា និងក្រោមអភិក្រម “ជវភាពនៃប្រព័ន្ធតួអង្គតែមួយ” បានរៀបចំពិធីចុះហត្ថលេខាលើអនុស្សរណៈនៃការយោគយល់គ្នាស្តីពី ”កិច្ចសហប្រតិបត្តិការភាពជាដៃគូលើការជំរុញការងារអភិវឌ្ឍវិស័យទេសចរណ៍ និងវិស័យអភិវឌ្ឍន៍ជនបទ” ក្រោមអធិបតីភាពដ៏ខ្ពង់ខ្ពស់របស់ ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ និង ឯកឧត្តម ហួត ហាក់ រដ្ឋមន្រ្តីក្រសួងទេសចរណ៍ នៅទីស្តីការក្រសួងអភិវឌ្ឍន៍ជនបទ។ ពិធីដ៏មានសារៈសំខាន់ និងប្រកបដោយអត្ថន័យនេះ មានការអញ្ជើញចូលរួមពីសំណាក់ ឯកឧត្តមរដ្ឋលេខាធិការប្រចាំការ ឯកឧត្តម លោកជំទាវ លោក លោកស្រី ថ្នាក់ដឹកនាំ និងប្រតិភូអមដំណើរនៃក្រសួងទាំងពីរ។

ពិធីចុះហត្ថលេខាលើអនុស្សរណៈនៃការយោគយល់គ្នានាពេលនេះគឺដើម្បីពង្រឹង និងពង្រីកកិច្ចសហប្រតិបត្តិការរវាងក្រសួងទាំងពីរឱ្យកាន់តែល្អប្រសើរបន្ថែមទៀត និងសំដៅជំរុញការអភិវឌ្ឍសហគមន៍ទេសចរណ៍ និងសហគមន៍នៅជនបទ ឱ្យកាន់តែរីកចម្រើន ប្រកបដោយចីរភាព និងបរិយាបន្ន។ តាមរយៈយន្តការសហថាមពលនេះ ក្រសួងទាំងពីរនឹងជំរុញការអភិវឌ្ឍសេដ្ឋកិច្ច សង្គមកិច្ច និងវប្បធម៌នៅតាមសហគមន៍ជនបទ និងតំបន់គោលដៅទេសចរណ៍ទាំងអស់នៅក្នុងព្រះរាជាណាចក្រកម្ពុជាដែលត្រូវបានចាត់ទុកជា “មាសបៃតង” របស់កម្ពុជា ដោយប្រើប្រាស់ធនធានដែលមានស្រាប់ឱ្យអស់លទ្ធភាព និងប្រកបដោយប្រសិទ្ធភាពខ្ពស់។ អនុស្សរណៈនេះមានគោលបំណងចម្បងចំនួន ៣ ដូចខាងក្រោម៖

ទី១. ពង្រឹង និងពង្រីកកិច្ចសហប្រតិបត្តិការរវាងគូភាគី ដើម្បីជំរុញការអភិវឌ្ឍវិស័យទេសចរណ៍នៅតំបន់ជនបទ តាមរយៈការតភ្ជាប់ផ្លូវគមនាគមន៍ជនបទប្រកបដោយភាពធន់ ការជំរុញការងារផ្គត់ផ្គង់ទឹកស្អាត និងអនាម័យជនបទ ការជំរុញការងារអភិវឌ្ឍន៍សហគមន៍ជនបទ និងភូមិគំរូ ព្រមទាំងការធ្វើពិពិធកម្មសេដ្ឋកិច្ចដើម្បីបង្កើនប្រាក់ចំណូលគ្រួសារនៅជនបទ។
ទី២. បង្កើនប្រសិទ្ធភាពក្នុងការផ្តល់សេវាសាធារណៈ និងលើកកម្ពស់លក្ខខណ្ឌនៃការរស់នៅរបស់ ប្រជាជននៅតំបន់ជនបទ និងភ្ញៀវទេសចរ សំដៅធានាឱ្យបាននូវការអភិវឌ្ឍប្រកបដោយចីរភាព និងបរិយាបន្ន។
ទី៣. ផ្លាស់ប្តូរ និងចែករំលែកបទពិសោធ បច្ចេកទេស និងព័ត៌មានពាក់ព័ន្ធនឹងការអភិវឌ្ឍជនបទ និងទេសចរណ៍ ដើម្បីជំរុញការអភិវឌ្ឍតាមបែបសហថាមពល និងប្រើប្រាស់ធនធានដែលមានស្រាប់ឱ្យអស់លទ្ធភាព៕

ខេត្តក្រចេះ ៖ ថ្ងៃព្រហស្បតិ៍ ១២កើត ខែជេស្ឋ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី២៨ ខែឧសភា ឆ្នាំ២០២៦ លោក ឃួច លីននី អគ្គនាយករងបច្ចេកទេស និងជាអនុប្រធានអចិន្រ្តៃយ៍ក្រុមជនបង្គោលសម្រាប់ការពង្រឹងសមត្ថភាពលើកម្មវិធីទឹកស្អាត និងអនាម័យដែលមានភាពធន់នឹងអាកាសធាតុ (CR-WASH) នៃក្រសួងអភិវឌ្ឍន៍ជនបទ បានអញ្ជើញចូលរួមជាធិបតីក្នុងសិក្ខាសាលាផ្សព្វផ្សាយស្តីពីការសិក្សារៀនសូត្រកម្មវិធីទឹកស្អាត និងអនាម័យដែលមានភាពធន់នឹងអាកាសធាតុតាមប្រព័ន្ធអនឡាញរបស់ក្រសួងអភិវឌ្ឍន៍ជនបទ។ សិក្ខាសាលានេះមានការចូលរួមពី លោក លោកស្រីជាសមាជិកក្រុមជនបង្គោល(CR-WASH)សមាជិកលេខាធិការដ្ឋាននៃក្រុមការងារបរិវត្តកម្មឌីជីថលក្រសួងអអភិវឌ្ឍន៍ជនបទ និងលោក លោកស្រីជនបង្គោលមកពីមន្ទីរអភិវឌ្ឍន៍ជនបទរាជធានី-ខេត្ត សរុបចំនួន ២៨នាក់ ស្រី ០៩នាក់ នៅខេត្តក្រចេះ។

ខេត្តមណ្ឌលគិរី ៖ នាថ្ងៃអង្គារ ១០កើត ខែជេស្ឋ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី២៦ ខែឧសភា ឆ្នាំ២០២៦ លោក ឃួច លីននី អគ្គនាយករងបច្ចេកទេស និងជាអនុប្រធានអចិន្រ្តៃយ៍ក្រុមជនបង្គោលសម្រាប់ការពង្រឹងសមត្ថភាពលើកម្មវិធីទឹកស្អាត និងអនាម័យដែលមានភាពធន់នឹងអាកាសធាតុ (CR-WASH) នៃក្រសួងអភិវឌ្ឍន៍ជនបទ បានអញ្ជើញចូលរួមជាធិបតីក្នុងសិក្ខាសាលាផ្សព្វផ្សាយស្តីពីការសិក្សារៀនសូត្រកម្មវិធីទឹកស្អាត និងអនាម័យដែលមានភាពធន់នឹងអាកាសធាតុតាមប្រព័ន្ធអនឡាញរបស់ក្រសួងអភិវឌ្ឍន៍ជនបទនៅខេត្តមណ្ឌលគិរី។ សិក្ខាសាលានេះមានការចូលរួមពី លោក លោកស្រីជាសមាជិកក្រុមជនបង្គោល(CR-WASH) សមាជិកលេខាធិការដ្ឋាននៃក្រុមការងារបរិវត្តកម្មឌីជីថលក្រសួងអអភិវឌ្ឍន៍ជនបទ និងជនបង្គោលទឹកស្អាត អនាម័យមកពីមន្ទីរអភិវឌ្ឍន៍ជនបទរាជធានី-ខេត្ត សរុបចំនួន ២៤នាក់ ស្រី ០៣នាក់។

ឯកឧត្ដម ឆាយ ឫទ្ធិសែន អញ្ជើញដឹកនាំកិច្ចប្រជុំបូកសរុបលទ្ធផលការងារប្រចាំខែឧសភា និងលើកទិសដៅការងារខែមិថុនា ឆ្នាំ២០២៦ របស់ក្រសួងអភិវឌ្ឍន៍ជនបទ

រាជធានីភ្នំពេញ៖ នាព្រឹកថ្ងៃអង្គារ ១០កើត ខែជេស្ឋ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី២៦ ខែឧសភា ឆ្នាំ២០២៦ នៅទីស្ដីការក្រសួង ឯកឧត្ដម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានអញ្ជើញដឹកនាំកិច្ចប្រជុំបូកសរុបលទ្ធផលការងារប្រចាំខែឧសភា និងលើកទិសដៅការងារខែមិថុនា ឆ្នាំ២០២៦ របស់ក្រសួងអភិវឌ្ឍន៍ជនបទ។ កិច្ចប្រជុំនេះមានការអញ្ជើញចូលរួមពីសំណាក់ ឯកឧត្តមរដ្ឋលេខាធិការប្រចាំការ ឯកឧត្តម លោកជំទាវ ថ្នាក់ដឹកនាំក្រសួង ឯកឧត្តម លោកជំទាវ ទីប្រឹក្សាក្រសួង មន្ដ្រីរាជការនៅទីស្ដីការក្រសួង និងមន្ទីរអភិវឌ្ឍន៍ជនបទទាំង ២៥ រាជធានី-ខេត្ត ដោយផ្ទាល់ និងតាមរយៈប្រព័ន្ធនិម្មិត (Zoom Meeting)។

កិច្ចប្រជុំបានដំណើរការទៅតាមរបៀបវារៈដែលបានគ្រោងទុក ដោយជាកិច្ចចាប់ផ្តើមជាការអានសេចក្ដីព្រាងរបាយការណ៍វឌ្ឍនភាពការងារប្រចាំខែឧសភា ដោយ ទូច ស៊ីផាត អគ្គនាយករងរដ្ឋបាល និងហិរញ្ញវត្ថុ។ តាមរយៈរបាយការណ៍បានបង្ហាញឱ្យឃើញថា ក្រសួងអភិវឌ្ឍន៍ជនបទ បានយកចិត្តទុកដាក់អនុវត្តការងារយ៉ាងសកម្ម ទៅតាមផែនការសកម្មភាព និងប្រតិទិនការងារ ដែលបានកំណត់ និងតាមតម្រូវការការងារចាំបាច់នានាក្នុងក្របខ័ណ្ឌតួនាទី និងភារកិច្ច របស់ក្រសួង ដោយសម្រេចបានលទ្ធផលក្នុងខែប្រកបដោយភាពវិជ្ជមាន និងមានប្រសិទ្ធភាព។ អង្គប្រជុំ ក៏បានពិនិត្យនិងពិភាក្សាយ៉ាងលម្អិតលើសេចក្ដីព្រាងរបាយការណ៍លើបញ្ហា និងការប្រឈមនានា ព្រមទាំងកំណត់ទិសដៅបន្តដើម្បីជំរុញការអនុវត្តផែនការសកម្មភាពឱ្យបានជោគជ័យស្របតាមផែនការដែលបានគ្រោងទុក។

ក្នុងឱកាសនោះផងដែរ ឯកឧត្តមរដ្ឋមន្ដ្រី បានថ្លែងអំណរគុណចំពោះថ្នាក់ដឹកនាំ និងមន្ដ្រីរាជការគ្រប់លំដាប់ថ្នាក់ ដែលបានយកចិត្តទុកដាក់អនុវត្តតួនាទី និងភារកិច្ចរបស់ខ្លួនយ៉ាងសកម្ម ប្រកបដោយការទទួលខុសត្រូវ រហូតធ្វើឱ្យសម្រេចបានសមិទ្ធផលស្របតាមផែនការដែលបានកំណត់។ ជាមួយគ្នានោះដែរ ឯកឧត្តមរដ្ឋមន្ដ្រី ក៏បានថ្លែងការកោតសរសើរ និងវាយតម្លៃខ្ពស់ចំពោះសមិទ្ធផលដែលក្រសួងសម្រេចបានជាបន្ដបន្ទាប់ ស្របតាមផែនការយុទ្ធសាស្ដ្ររបស់ក្រសួងអភិវឌ្ឍន៍ជនបទ និងគោលនយោបាយជាតិស្ដីពីការអភិវឌ្ឍជនបទឆ្នាំ២០២៥-២០៣៥។ ជាចុងក្រោយ ឯកឧត្តមរដ្ឋមន្ត្រី បានផ្តល់ជាអនុសាសន៍មួយចំនួនដែលជាការតម្រង់ទិសជូនដល់ថ្នាក់ដឹកនាំ និងមន្ដ្រីរាជការគ្រប់លំដាប់ថ្នាក់ ទាំងនៅថ្នាក់កណ្តាល និងមន្ទីរអភិវឌ្ឍន៍ជនបទរាជធានី ខេត្ត ឱ្យបន្តអនុវត្តតួនាទីភារកិច្ចឱ្យល្អ ដើម្បីកសាងសមិទ្ធផលថ្មីៗបន្ថែមទៀត ក្នុងគោលដៅចូលរួមសម្រេចឱ្យបានជោគជ័យនូវយុទ្ធសាស្ត្របញ្ចកោណដំណាក់កាលទី១ ក្រោមការដឹកនាំប្រកបដោយគតិបណ្ឌិតរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា៕