Kittisethabindit Cheam Yeap, 1st VP of the National Assembly of Cambodia

ឯកឧត្តមវេជ្ជបណ្ឌិត អ៊ុក ផល្លា តំណាងដ៏ខ្ពង់ខ្ពស់ ឯកឧត្តមកិត្តិសេដ្ឋាបណ្ឌិត ជាម យៀប អនុប្រធានទី១ នៃរដ្ឋសភា បាននាំយកថវិកាឧបត្ថម្ភជូនកាកបាទក្រហមកម្ពុជារាជធានីភ្នំពេញ
--------

រាជធានីភ្នំពេញ៖ នារសៀលថ្ងៃទី២ ខែមិថុនា ឆ្នាំ២០២៦ នេះ នៅទីស្នាក់ការកាកបាទក្រហមកម្ពុជា រាជធានីភ្នំពេញ មានរៀបចំពិធីប្រគល់ និងទទួលថវិកាឧបត្ថម្ភ ក្នុងស្មារតីសាមគ្គីភាព និងការចែករំលែកដើម្បីការងារមនុស្សធម៌ក្នុងកម្មវិធីខួប១៦៣ ទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ២០២៦ ។

នៅក្នុងឱកាសដ៏ថ្លៃថ្លានោះ ឯកឧត្តមវេជ្ជបណ្ឌិត អ៊ុក ផល្លា ប្រធានក្រុមទីប្រឹក្សា និងជំនួយការ ឯកឧត្តមកិត្តិសេដ្ឋាបណ្ឌិត ជាម យៀប អនុប្រធានទី១ រដ្ឋសភា និងជាតំណាងដ៏ខ្ពង់ខ្ពស់ ឯកឧត្តមកិត្តិសេដ្ឋាបណ្ឌិត ជាម យៀប អនុប្រធានទី១ រដ្ឋសភា អមដោយឯកឧត្តមបណ្ឌិត ផល្លា សុជាតាមុនី នាយករងខុទ្ទកាល័យ ឯកឧត្តម លោកជំទាវ លោក លោកស្រី ជាទីប្រឹក្សា និងជំនួយការ បាននាំយកថវិកាផ្ទាល់ខ្លួនរបស់ ឯកឧត្តមកិត្តិសេដ្ឋាបណ្ឌិត ចំនួន ១២,០០០,០០០រៀល (ដប់ពីរលានរៀល) ទៅប្រគល់ជូនកាកបាទក្រហមកម្ពុជា។

ពិធីប្រគល់ និងទទួលនេះ បានប្រព្រឹត្តទៅក្រោមអធិបតីភាព លោកជំទាវ ពុំ ចន្ទីនី អគ្គលេខាធិការកាកបាទក្រហមកម្ពុជា៕

ឯកឧត្តមកិត្តិសេដ្ឋាបណ្ឌិត ជាម យៀប អញ្ជើញបើកសន្និសីទសភាជាតិ ស្តីពី «អភិបាលកិច្ចអាកាសធាតុ» ក្នុងគោលដៅជំរុញសកម្មភាពបៃតងនៅតំបន់អាស៊ាន
-------

វិមានរដ្ឋសភា៖ នាព្រឹកថ្ងៃទី២៦ ខែឧសភា ឆ្នាំ២០២៦ នេះ សន្និសីទសភាជាតិស្តីពី «អភិបាលកិច្ចអាកាសធាតុ» ត្រូវបានប្រារព្ធបើកឡើងយ៉ាងឱឡារិក នៅវិមានរដ្ឋសភា ក្រោមអធិបតីភាពដ៏ខ្ពង់ខ្ពស់ ឯកឧត្តមកិត្តិសេដ្ឋាបណ្ឌិត ជាម យៀប អនុប្រធានទី១ នៃរដ្ឋសភា និងជាតំណាងដ៏ខ្ពង់ខ្ពស់ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា នៃព្រះរាជាណាចក្រកម្ពុជា។

សន្និសីទដ៏មានសារៈសំខាន់កម្រិតតំបន់នេះ មានការអញ្ជើញចូលរួមពីថ្នាក់ដឹកនាំជាន់ខ្ពស់ និងតំណាងសភានៃបណ្តាប្រទេសក្នុងតំបន់អាស៊ាន រួមមាន៖
-ឯកឧត្តម Eddy Soeparno អនុប្រធានរដ្ឋសភា នៃសាធារណរដ្ឋឥណ្ឌូនេស៊ី
-លោកជំទាវ Anna Victoria Veloso-Tuazon អនុប្រធានគណៈកម្មាធិការពិសេសស្តីពីកិច្ចការអាស៊ាន គោលដៅអភិវឌ្ឍន៍ប្រកបដោយចីរភាព និងកិច្ចការសេដ្ឋកិច្ចនៃរដ្ឋសភាហ្វីលីពីន
-សាស្ត្រាចារ្យ Louis Ng សមាជិកជាន់ខ្ពស់នៃមូលនិធិ Tara Climate។

ដោយឡែក ភាគីម្ចាស់ផ្ទះកម្ពុជា រួមមានការអញ្ជើញចូលរួមពី៖ ឯកឧត្តមសន្តិបណ្ឌិត ឡូយ សុផាត ប្រធានគណៈកម្មការផែនការ វិនិយោគ កសិកម្ម រុក្ខាប្រមាញ់ នេសាទ អភិវឌ្ឍន៍ជនបទ បរិស្ថាន ធនធានទឹក និងឧតុនិយមនៃរដ្ឋសភា សមាជិក សមាជិកា រដ្ឋសភា ព្រឹទ្ធសភា ថ្នាក់ដឹកនាំ និងមន្រ្តីនៃអគ្គលេខាធិការដ្ឋានសភា ព្រមទាំងភ្ញៀវកិត្តិយសជាតិ-អន្តរជាតិ និងមន្ត្រីជំនាញពាក់ព័ន្ធជាច្រើនរូបទៀត។

សន្និសីទសភាជាតិនេះ ត្រូវបានរៀបចំឡើងក្នុងគោលបំណង ដើម្បីពង្រឹងយន្តការ «អភិបាលកិច្ចអាកាសធាតុ» ក៏ដូចជាការផ្លាស់ប្តូរបទពិសោធ បង្កើនកិច្ចសហប្រតិបត្តិការលើការបង្កើតច្បាប់ និងគោលនយោបាយរវាងស្ថាប័ននីតិប្បញ្ញត្តិក្នុងតំបន់។ នេះគឺជាយន្តការឆ្លើយតបទៅនឹងការប្រែប្រួលអាកាសធាតុ ដែលជាបញ្ហាប្រឈមជាសកល និងដើម្បីរួមគ្នាជំរុញការអភិវឌ្ឍប្រកបដោយចីរភាព។

ឯកឧត្តមកិត្តិសេដ្ឋាបណ្ឌិត ជាម យៀប អញ្ជើញចូលរួមក្នុងពិធីសំណេះសំណាលជាមួយថ្នាក់ដឹកនាំក្រសួង ស្ថាប័ន និងថ្នាក់ដឹកនាំក្នុងរាជធានីភ្នំពេញ
-----

(ភ្នំពេញ)៖ នៅព្រឹកថ្ងៃអាទិត្យ ទី២៤ ខែឧសភា ឆ្នាំ២០២៦នេះ ឯកឧត្តមកិត្តិសេដ្ឋាបណ្ឌិត ជាម យៀប អនុប្រធានទី១ រដ្ឋសភា បានអញ្ជើញចូលរួមក្នុងពិធីសំណេះសំណាលជាមួយថ្នាក់ដឹកនាំក្រសួង ស្ថាប័ន និងថ្នាក់ដឹកនាំក្នុងរាជធានីភ្នំពេញក្រោមអធិបតីភាពដ៏ខ្ពង់ខ្ពស់ សម្តេចតេជោ ហ៊ុន សែន ប្រមុខរដ្ឋស្តីទី នៃ ព្រះ រាជាណាចក្រកម្ពុជា ដោយមានអ្នកចូលរួមសរុបជាង៤ពាន់នាក់ ។

ពិធីសំណេះសំណាលនេះ មានការអញ្ជើញចូលរួមពីសំណាក់ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា សម្តេចមហាបវរធិបតី ហ៊ុន ម៉ា ណែត នាយករដ្ឋមន្ត្រី ឧត្តមប្រឹក្សាផ្ទាល់ព្រះមហាក្សត្រ ថ្នាក់ដឹកនាំ និងសមាជិកព្រឹទ្ធសភា រដ្ឋ សភា រាជរដ្ឋាភិបាល ថ្នាក់ដឹកនាំតាមក្រសួង ស្ថាប័ន ក្រុមប្រឹក្សារាជធានី ខណ្ឌ សង្កាត់ និងថ្នាក់ដឹកនាំមន្ទីរ អង្គភាព ជុំវិញ រដ្ឋបាលរាជធានីភ្នំពេញ។

ឯកឧត្តមកិត្តិសេដ្ឋាបណ្ឌិត ជាម យៀប អញ្ជើញចុះជួបសំណេះសំណាលជាមួយអាជ្ញាធរដែនដី និងប្រជាពលរដ្ឋនៅស្រុកពាមរក៍​ ខេត្តព្រៃវែង
---------

ខេត្តព្រៃវែង៖ នាព្រឹកថ្ងៃទី២៣ ខែឧសភា ឆ្នាំ២០២៦ ឯកឧត្តមកិត្តិសេដ្ឋាបណ្ឌិត ជាម យៀប អនុប្រធានទី១ នៃរដ្ឋសភា និងជាតំណាងរាស្ត្រមណ្ឌលខេត្តព្រៃវែង បានអញ្ជើញជាអធិបតីក្នុងពិធីជួបសំណេះសំណាលជាមួយអាជ្ញាធរដែនដី និងប្រជាពលរដ្ឋប្រមាណជាង ៣០០នាក់ នៅស្រុកពាមរក៍ ខេត្តព្រៃវែង។

ពិធីនេះមានការអញ្ជើញចូលរួមពីតំណាងរាស្ត្រមណ្ឌលខេត្តព្រៃវែង ក្រុមប្រឹក្សាខេត្ត ព្រមទាំងក្រុមការងាររាជរដ្ឋាភិបាលចុះជួយស្រុកពាមរក៍យ៉ាងច្រើនកុះករ៕

ឯកឧត្តមកិត្តិសេដ្ឋាបណ្ឌិត ជាម យៀប ទទួលជួបសម្តែងការគួរសម និងធ្វើសវនាការជាមួយប្រធានគណៈឃោសនាអប់រំ និងចលនាមហាជនមជ្ឈិមបក្សកុម្មុយនីស្តវៀតណាម
-----------------------

នៅវិមានរដ្ឋសភា នារសៀលថ្ងៃទី១៣ ខែឧសភា ឆ្នាំ២០២៦ ឯកឧត្តមកិត្តិសេដ្ឋាបណ្ឌិត ជាម យៀប អនុប្រធានទី១ រដ្ឋសភា តំណាងដ៏ខ្ពង់ខ្ពស់​ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា បានទទួលជួបសម្តែងការគួរសម និងធ្វើសវនាការជាមួយ ឯកឧត្តម ត្រិញ វ៉ាន់ក្វៀត (Trinh Van Quyet) សមាជិកការិយាល័យនយោបាយ សមាជិកគណៈលេខាធិការមជ្ឈិមបក្ស និងជាប្រធានគណៈឃោសនាអប់រំ និងចលនាមហាជនមជ្ឈិមបក្សកុម្មុយនីស្តវៀតណាម៕

ឯកឧត្តមកិត្តិសេដ្ឋាបណ្ឌិត ជាម យៀប អញ្ជើញចូលរួមប្រជុំរដ្ឋសភាជាវិសាមញ្ញ នីតិកាលទី៧
---------------

ឯកឧត្តមកិត្តិសេដ្ឋាបណ្ឌិត ជាម យៀប អនុប្រធានទី១ រដ្ឋសភា បានអញ្ជើញចូលរួមប្រជុំរដ្ឋសភាជាវិសាមញ្ញ នីតិកាលទី៧ ក្រោមអធិបតីភាពដ៏ខ្ពង់ខ្ពស់ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា នៅព្រឹកថ្ងៃអង្គារ ទី១២ ខែឧសភា ឆ្នាំ២០២៦ ដេីម្បីពិភាក្សា និងអនុម័ត​ លេីរបៀបវារៈចំនួនពីរ រួមមាន÷
របៀបវារៈទី១-សេចក្តីព្រាងច្បាប់ស្តីពី កាតព្វកិច្ចយោធា។
របៀបវារៈទី២-សេចក្តីព្រាងច្បាប់ស្តីពី ការអនុម័តយល់ព្រមលើការធានាទូទាត់របស់រាជរដ្ឋាភិបាលនៃព្រះរាជាណាចក្រកម្ពុជាឱ្យក្រុមហ៊ុនអគ្គិសនីវៀតណាម នៃសាធារណរដ្ឋសង្គមនិយមវៀតណាមសម្រាប់ការធានាលើការទិញថាមពលអគ្គិសនីពីប្រទេសវៀតណាម៕

ឯកឧត្តម កិត្តិសេដ្ឋាបណ្ឌិត ជាម យៀប អញ្ជើញចូលរួមកិច្ចប្រជុំគណៈកម្មាធិការអចិន្ត្រៃយ៍រដ្ឋសភា
-------

នៅព្រឹកថ្ងៃទី៨ ខែឧសភា ឆ្នាំ២០២៦ នាវិមានរដ្ឋសភា ឯកឧត្តម កិត្តិសេដ្ឋាបណ្ឌិត ជាម យៀប អនុប្រធានទី១ រដ្ឋសភា បានអញ្ជើញចូលរួមកិច្ចប្រជុំគណៈកម្មាធិការអចិន្ត្រៃយ៍រដ្ឋសភា ក្រោមអធិបតីភាពដ៏ខ្ពង់ខ្ពស់ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា នៃព្រះរាជាណាចក្រកម្ពុជា ដើម្បីពិនិត្យនិងពិភាក្សារបៀបវារៈចំនួន៤ គឺ÷
១-ការពិនិត្យសេចក្តីស្នើសុំកោះប្រជុំរដ្ឋសភាជាវិសាមញ្ញ នីតិកាលទី៧ ដើម្បីពិនិត្យ និងអនុម័តសេចក្តីព្រាងច្បាប់ចំនួន២ គឺ៖
១.១-សេចក្តីព្រាងច្បាប់ស្តីពី កាតព្វកិច្ចយោធា។
១.២-សេចក្តីព្រាងច្បាប់ស្តីពី ការអនុម័តយល់ព្រមលើការធានាទូទាត់របស់រាជរដ្ឋាភិបាលនៃព្រះរាជាណាចក្រកម្ពុជាឱ្យក្រុមហ៊ុនអគ្គិសនីវៀតណាមនៃសាធារណរដ្ឋសង្គមនិយមវៀតណាមសម្រាប់ការធានាលើការទិញថាមពល អគ្គិសនីពីប្រទេសវៀតណាម។
២-ការពិនិត្យសំណើសុំបញ្ចូលក្នុងរបៀបវារៈសម័យប្រជុំរដ្ឋសភាជាវិសាមញ្ញ នីតិកាលទី៧ នូវ៖
២.១-សេចក្តីព្រាងច្បាប់ស្តីពី កាតព្វកិច្ចយោធា។
២.២-សេចក្តីព្រាងច្បាប់ស្តីពី ការអនុម័តយល់ព្រមលើការធានាទូទាត់របស់រាជរដ្ឋាភិបាលនៃព្រះរាជាណាចក្រកម្ពុជាឱ្យក្រុមហ៊ុនអគ្គិសនីវៀតណាមនៃសាធារណរដ្ឋសង្គមនិយមវៀតណាមសម្រាប់ការធានាលើការទិញថាមពល អគ្គិសនីពីប្រទេសវៀតណាម។
៣-ការពិនិត្យ និងអនុម័តសមាសភាពលេខាធិការសម័យប្រជុំរដ្ឋសភាជាវិសាមញ្ញ នីតិកាលទី៧ ចំនួន ៣រូប៖
-ឯកឧត្តម ឃុត ចាន់ដារ៉ា អាយុ ៤៦ឆ្នាំ
-ឯកឧត្តម ម៉ាត់ សេត អាយុ ៤៦ឆ្នាំ
-ឯកឧត្តម សេង ញ៉ក់ អាយុ ៤៦ឆ្នាំ
៤-ការពិនិត្យ និងអនុម័តសេចក្តីព្រាងរបៀបវារៈទី១ ទី២ និងកាលបរិច្ឆេទបើកសម័យប្រជុំរដ្ឋសភាជាវិសាមញ្ញ នីតិកាលទី៧៕

ឯកឧត្តមកិត្តិសេដ្ឋាបណ្ឌិត ជាម យៀប ជំរុញការរៀបចំខ្លឹមសារបច្ចេកទេសឱ្យបានហ្មត់ចត់បំផុត ដើម្បីត្រៀមចូលរួមមហាសន្និបាត AIPA លើកទី៤៧ និងកិច្ចប្រជុំនានា នៅប្រទេសហ្វីលីពីន
........................

វិមានរដ្ឋសភា៖ ឯកឧត្តមកិត្តិសេដ្ឋាបណ្ឌិត ជាម យៀប អនុប្រធានទី១ រដ្ឋសភា និងជាប្រធានក្រុម រដ្ឋសភាកម្ពុជានៃស្ថាប័នអន្តរសភាអាស៊ាន(AIPA) នាព្រឹកថ្ងៃទី២៣ ខែមេសា ឆ្នាំ២០២៦ បានអញ្ជើញដឹកនាំកិច្ចប្រជុំផ្ទៃក្នុង ដើម្បីពិនិត្យវឌ្ឍនភាពការងារ និងកំណត់ទិសដៅយុទ្ធសាស្ត្រ ត្រៀមលក្ខណៈសម្រាប់ការចូលរួមមហាសន្និបាតអន្តរសភាអាស៊ាន លើកទី៤៧ និងកិច្ចប្រជុំនានា ដែលនឹងប្រព្រឹត្តទៅនៅប្រទេសហ្វីលីពីន នាពេលខាងមុខ។

កិច្ចប្រជុំនេះមានការអញ្ជើញចូលរួមពីសំណាក់ ឯកឧត្តម ជាអនុប្រធាន ក្រុមរដ្ឋសភាកម្ពុជានៃស្ថាប័នអន្តរសភាអាស៊ាន(AIPA) ឯកឧត្តមអគ្គលេខាធិការរដ្ឋសភា ព្រមទាំងថ្នាក់ដឹកនាំ និងមន្ត្រីជំនាញនៃអគ្គលេខាធិការដ្ឋានរដ្ឋសភាជាច្រើនរូប។

កិច្ចប្រជុំបានលើកយករបៀបវារៈសំខាន់ៗ មកពិភាក្សា រួមមាន៖

ការរៀបចំផែនការសកម្មភាព៖ ពិនិត្យលើប្រតិទិនការងារ និងកំណត់កម្មវិធីឱ្យបានច្បាស់លាស់ ដើម្បីធានាបាននូវប្រសិទ្ធភាពខ្ពស់បំផុតក្នុងការចូលរួមមហាសន្និបាតនិងកិច្ចប្រជុំនានារបស់អាយប៉ា។

ការគ្រប់គ្រងឯកសារ លំហូរឯកសារ និងនីតិវិធីនានា៖ ផ្ដោតលើនីតិវិធី លំហូរឯកសារ ជាពិសេសការរៀបចំខ្លឹមសារបច្ចេកទេស និង ការបញ្ជូនឯកសារនានាទៅកាន់លេខាធិការដ្ឋានAIPA ឱ្យបានទាន់ពេលវេលា។

ការពង្រឹងមជ្ឈភាពអាស៊ាន៖ ការត្រៀមខ្លឹមសារមតិយោបល់ និងគោលជំហររបស់កម្ពុជា ក្នុងន័យពង្រឹងសាមគ្គីភាព និងកិច្ចសហប្រតិបត្តិការរវាងសមាជិកអន្តរសភាអាស៊ានទាំងអស់។

ក្នុងឱកាសនោះ ឯកឧត្តមកិត្តិសេដ្ឋាបណ្ឌិតប្រធានអង្គប្រជុំ បានសង្កត់ធ្ងន់ថា ការត្រៀមលក្ខណៈដ៏ល្អ និងគ្រប់ជ្រុងជ្រោយ គឺជាគន្លឹះដ៏សំខាន់ ដើម្បីធានាថាការចូលរួមរបស់សភាកម្ពុជា នឹងសម្រេចបានលទ្ធផលផ្លែផ្កា និងឆ្លុះបញ្ចាំងពីឆន្ទៈដ៏មោះមុតរបស់កម្ពុជា ក្នុងការលើកកម្ពស់សាមគ្គីភាព និងមជ្ឈភាពអាស៊ាន ក្នុងវេទិកាតំបន់មួយនេះ។

សារលិខិតឯកឧត្តមកិត្តិសេដ្ឋាបណ្ឌិត ជាម យៀប អនុប្រធានទី១ រដ្ឋសភា ក្រាបបង្គំទូលថ្វាយព្រះពរសម្ដេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជាជាទីគោរពសក្ការៈដ៏ខ្ពង់ខ្ពស់បំផុត សូមព្រះអង្គឆាប់បានជាសះស្បើយពីព្រះរោគ។

ឯកឧត្តមកិត្តិសេដ្ឋាបណ្ឌិត ជាម យៀប អញ្ជើញចុះជួបសំណេះសំណាលជាមួយអាជ្ញាធរដែនដី និងប្រជាពលរដ្ឋប្រមាណជាង ៣០០នាក់ ក្នុងក្រុងព្រៃវែង ខេត្តព្រៃវែង
...............

ក្នុងស្មារតីយកចិត្តទុកដាក់ខ្ពស់លើសុខទុក្ខរបស់ប្រជាពលរដ្ឋនៅមូលដ្ឋាន នាព្រឹកថ្ងៃទី៤ ខែមេសា ឆ្នាំ២០២៦ ឯកឧត្តមកិត្តិសេដ្ឋាបណ្ឌិត ជាម យៀប អនុប្រធានទី១ នៃរដ្ឋសភា និងជាតំណាងរាស្ត្រមណ្ឌលខេត្តព្រៃវែង បានអញ្ជើញចុះជួបសំណេះសំណាលជាមួយអាជ្ញាធរដែនដី និងប្រជាពលរដ្ឋប្រមាណជាង ៣០០នាក់ ក្នុងក្រុងព្រៃវែង ខេត្តព្រៃវែង។

ពិធីសំណេះសំណាលនេះ មានការអញ្ជើញចូលរួមពី ឯកឧត្តម លោកជំទាវជាអ្នកតំណាងរាស្រ្តមណ្ឌលខេត្តព្រៃវែង ឯកឧត្តម អ៊ុំ ប៊ុនឡេង អនុប្រធានគណៈអចិន្រ្តៃយ៍បក្សខេត្តព្រៃវែង ឯកឧត្តមបណ្ឌិត គឹម សន្តិភាព នាយកខុទ្ទកាល័យ ឯកឧត្តមកិត្តិសេដ្ឋាបណ្ឌិត ជាម យៀប អនុប្រធានទី១ រដ្ឋសភា ឯកឧត្តម លោកជំទាវ ប្រធាន អនុប្រធានក្រុមការងាររាជរដ្ឋាភិបាលចុះជួយក្រុងព្រៃវែង និងអាជ្ញាធរដែនដី និងប្រជាពលរដ្ឋក្រុងព្រៃវែងយ៉ាងច្រើនកុះករ។

ឯកឧត្តមកិត្តិសេដ្ឋាបណ្ឌិត បានលើកបង្ហាញនូវមោទនភាពយ៉ាងខ្លាំងចំពោះវឌ្ឍនភាពនៃស្ថាប័ននីតិប្បញ្ញត្តិ ដែលសម្រេចបានសមិទ្ធផលធំៗជាច្រើនក្នុងរយៈពេលជាង ២ឆ្នាំកន្លងមកនេះ។
ឯកឧត្តមអនុប្រធានទី ១ បានបន្តថា រដ្ឋសភាកម្ពុជាកំពុងវិវត្តខ្លួនយ៉ាងសកម្មក្នុងរបត់ថ្មីគួរឱ្យមោទនៈ ក្រោមការដឹកនាំដ៏ឈ្លាសវៃរបស់ សម្តេចមហារដ្ឋសភាធិការធិបតី ឃួន សុដារី ដែលជាស្ត្រីដំបូងគេក្នុងប្រវត្តិសាស្ត្រកម្ពុជាកាន់តំណែងជាប្រធានរដ្ឋសភា។ ក្រោមការដឹកនាំរបស់សម្តេចប្រធាន រដ្ឋសភាបាននិងកំពុងជំរុញការធ្វើទំនើបកម្មស្ថាប័នយ៉ាងស៊ីជម្រៅ ដើម្បីបង្កើនប្រសិទ្ធភាពការងារ និងបម្រើផលប្រយោជន៍ប្រជាពលរដ្ឋឱ្យកាន់តែប្រសើរឡើង។

ឯកឧត្តមកិត្តិសេដ្ឋាបណ្ឌិត ជាម យៀប បានវាយតម្លៃខ្ពស់ចំពោះកិច្ចសហការយ៉ាងរឹងមាំរវាងស្ថាប័ននីតិប្បញ្ញត្តិ និងស្ថាប័ននីតិប្រតិបត្តិ ជាពិសេស ក្រោមការដឹកនាំរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា រាជរដ្ឋាភិបាល ដែលបានអនុវត្ត "យុទ្ធសាស្ត្របញ្ចកោណ-ដំណាក់កាលទី១" យ៉ាងស្វាហាប់ ដោយផ្ដោតលើអាទិភាពគន្លឹះចំនួន៥ គឺ៖ មនុស្ស ផ្លូវ ភ្លើង ទឹក និងបច្ចេកវិទ្យា ដើម្បីកសាងគ្រឹះដ៏រឹងមាំក្នុងការប្រែក្លាយកម្ពុជាឱ្យទៅជាប្រទេសមានចំណូលខ្ពស់នៅឆ្នាំ២០៥០។

ដើម្បីឱ្យប្រជាពលរដ្ឋកាន់តែយល់ច្បាស់ពីតួនាទីរបស់តំណាងរាស្ត្រ ឯកឧត្តមអនុប្រធានទី១ រដ្ឋសភាបានពន្យល់ពីភារកិច្ចស្នូលចំនួន ៣ របស់អ្នកតំណាងរាស្ត្រ រួមមាន ការពិភាក្សា និងអនុម័តច្បាប់តាមរយ:ការបង្កើតក្របខណ្ឌគតិយុត្តសម្រាប់ជាតិ,មុខងារការតាមដានការអនុវត្តច្បាប់ដោយ ធានាធ្វើឱ្យមានតម្លាភាព និងប្រសិទ្ធភាពក្នុងរដ្ឋបាលសាធារណៈនិងមុខងារភាពជាតំណាង ដែលជានិច្ចកាលអ្នកតំណាងរៀបទាំងអស់តែងតែចុះមូលដ្ឋានជាប់ជាប្រចាំដើម្បីស្តាប់ និងជួយដោះស្រាយរាល់សំណូមពររបស់ប្រជាពលរដ្ឋ។

ពាក់ព័ន្ធនឹងសភាពការណ៍ព្រំដែនកម្ពុជា-ថៃ ឯកឧត្តមកិត្តិសេដ្ឋាបណ្ឌិត សង្កត់ធ្ងន់លើ ឆន្ទៈនយោបាយមុតស្រួច របស់សម្តេចធិបតីនាយករដ្ឋមន្ត្រី ដែលបានដោះស្រាយបញ្ហាដោយសន្តិវិធី និងការតម្កល់ផលប្រយោជន៍ជាតិជាធំ រហូតសម្រេចបាននូវបទឈប់បាញ់ទាំងស្រុង និងភាពស្ងប់ស្ងាត់តាមបន្ទាត់ព្រំដែនកាលពីចុងឆ្នាំ២០២៥ ដែលជាជោគជ័យដ៏ធំធេងក្នុងការការពារបូរណភាពទឹកដី។

ជាកិច្ចបញ្ចប់ ឯកឧត្តមកិត្តិសេដ្ឋាបណ្ឌិត ជាម យៀប បានសម្តែងនូវការដឹងគុណយ៉ាងជ្រាលជ្រៅចំពោះបងប្អូនប្រជាពលរដ្ឋម្ចាស់ឆ្នោត ដែលបានផ្តល់សេចក្តីទុកចិត្តយ៉ាងលើសលប់ជូនគណបក្សប្រជាជនកម្ពុជា ដើម្បីបន្តបេសកកម្មដឹកនាំនាវាកម្ពុជាឆ្ពោះទៅរកសន្តិភាព និងការអភិវឌ្ឍន៍៕