គណបក្សប្រជាជនកម្ពុជា Cambodian People's Party

តួកគីយ៉េ សន្យាបង្កើនចំនួនអាហារូបករណ៍បន្ថែមទៀត ជូនដល់និស្សិតកម្ពុជាទាំងការសិក្សានៅក្នុងស្រុក និងនៅតួកគីយ៉េ
=======================
នៅព្រឹកថ្ងៃទី៤ ខែមិថុនា ឆ្នាំ២០២៦ ឯកឧត្តមបណ្ឌិត អូស្មាន ហាស្សាន់ ទេសរដ្ឋមន្ត្រីទទួលបន្ទុកបេសកកម្មពិសេស ជួបពិភាក្សាការងារជាមួយ ជាមួយឯកឧត្ដម MESUT OZCAN ឯកអគ្គរដ្ឋទូតតែងតាំងថ្មីនៃសាធារណរដ្ឋតួកគីយ៉េ ប្រចាំព្រះរាជាណាចក្រកម្ពុជា នៅវិមានសន្តិភាព។

ជំនួបពិភាក្សាការងារនាឱកាសនេះ គឺធ្វើឡើងក្នុងគោលបំណងរឹតចំណងមិត្តភាព និងស្វែងរកឱកាសពង្រីកកិច្ចសហប្រតិបត្តិការរវាងប្រទេសទាំងពីរ (កម្ពុជា-តួកគីយ៉េ) ឱ្យកាន់តែរឹងមាំ និងរីកចម្រើនបន្ថែមទៀត លើលើវិស័យអប់រំ មនុស្សធម៌ កសិកម្ម សុខាភិបាល ទេសចរណ៍ ។ល។

ក្នុងឱកាសនោះ ឯកឧត្តមទេសរដ្ឋមន្ត្រី អូស្មាន ហាស្សាន់ បានអបអរសាទចំពោះ ឯកឧត្តម ឯកអគ្គរដ្ឋទូត របស់តួកគីយ៉េថ្មីដែលត្រូវបានតែងតាំងជា ឯកអគ្គរដ្ឋទូតប្រចាំនៅព្រះរាជាណាចក្រកម្ពុជា ហើយសង្ឃឹមថា វត្តមានរបស់ឯកឧត្តម ក្នុងបេសកកម្មជា ឯកអគ្គរដ្ឋទូត នឹងពង្រឹងទំនាក់ទំនងរវាងកម្ពុជា និងតួកគីយ៉េឱ្យកាន់តែរីកចម្រើនបន្តទៀត។

ឯកឧត្តមទេសរដ្ឋមន្ត្រី ក៏បានថ្លែងអំណរគុណយ៉ាងជ្រាលជ្រៅចំពោះរាជរដ្ឋាភិបាល និងប្រជាជនតួកគីយ៉េ ដែលតែងតែផ្តល់ការគាំទ្រ និងជំនួយមនុស្សធម៌នានាដល់កម្ពុជា ជាពិសេសតាមរយៈគម្រោងអភិវឌ្ឍសហគមន៍ ការផ្តល់អាហាររូបករណ៍ដល់និស្សិតកម្ពុជា ដែលបានផ្តល់ផលប្រយោជន៍យ៉ាងពិតប្រាកដដល់ប្រជាជនកម្ពុជា ។

ឯកឧត្តមបានបញ្ជាក់ដែរថា បច្ចុប្បន្ននិសិ្សតកម្ពុជាចំនួន ៧៧ នាក់ កំពុងបន្តការសិក្សាលើមុខជំនាញផ្សេងៗនៅសាធារណរដ្ឋតួកគីយ៉េ មានទាំងនិស្សិតឥស្លាម និងមិនមែនឥស្លាម។ ឯកឧត្តមទេសរដ្ឋមន្ត្រី បានបញ្ជាក់ដែរថា ក្នុងរយៈពេលប្រមាណជាង ១០ឆ្នាំចុងក្រោយនេះ និស្សិតកម្ពុជាជាច្រើនបានបញ្ចប់ការសិក្សាពីប្រទេសតួកគីយ៉េ ហើយពួកគេបានត្រឡប់មកវិញ ជាមួយសមត្ថភាព ចំណេះជំនាញគ្រប់គ្រាន់ ក្នុងការបំពេញការងារក្នុងផ្នែកផ្សេងៗ និងជួយអភិវឌ្ឍប្រទេសកម្ពុជាផងដែរ។ តាមរយៈឯកឧត្តមឯកអគ្គរដ្ឋទូតថ្មី ឯកឧត្តមទេសរដ្ឋមន្ត្រី បានស្នើឱ្យតួកគីយ៉េ បន្តគាំទ្រផ្តល់ជំនួយមនុស្សធម៌ផ្សេងៗ អាហារូបករណ៍ ជំរុញអ្នកវិនិយោគមកធ្វើការវិនិយោគលើវិស័យហាឡាល និងកសិកម្ម នៅកម្ពុជា ព្រោះនៅទីនេះកម្លាំងពលកម្មមានតម្លៃទាប ហើយរដ្ឋក៏បានច្បាប់អនុគ្រោះជាច្រើនសម្រាប់អ្នកវិនិយោគផងដែរ ហើយកាន់តែងាយស្រួលនោះ គឺប្រទេសយើងទាំងពីរក៏មានការតភ្ជាប់ជើងហោះហើរត្រង់ផងដែរ។

ជាមួយគ្នាដែរ ឯកឧត្តមទេសរដ្ឋមន្ត្រី បានរំលេចពីវឌ្ឍនភាពសហគមន៍ឥស្លាមនៅកម្ពុជា សុខដុមនីយកម្មជាតិសាសន៍ និងសាសនា នៅកម្ពុជា ក្រោមការដឹកនាំដ៏គតិបណ្ឌិត របស់សម្តេចតេជោ ហ៊ុន សែន អតីតនាយករដ្ឋមន្ត្រី ប្រធានព្រឹទ្ធសភា និងបន្តមកសម្ដេចធិបតី នាយករដ្ឋមន្ត្រី ក៏នៅតែបន្តផ្តល់គោលនយោបាយ រៀបចំឱ្យមានបងប្អូនមុស្លិម បានចូលរួមបម្រើកិច្ចការជូនជាតិនៅក្នុងស្ថាប័ននីតិប្បញ្ញតិ នីតិប្រតិបត្តិ រដ្ឋបាល ថ្នាក់ជាតិ ថ្នាក់ក្រោមជាតិ ហើយរដ្ឋក៏បានបញ្ចូលគ្រូបង្រៀនខ្មែរឥស្លាមចំនួន ១៥០០ នាក់ ចូលទៅក្នុងក្របខណ្ឌក្រសួងអប់រំយុវជន និងកីឡា។

ជាការឆ្លើយតប ឯកឧត្ដមឯកអគ្គរដ្ឋទូត MESUT OZCAN វាយតម្លៃខ្ពស់ចំពោះតួនាទីដ៏សំខាន់របស់សហគមន៍ឥស្លាមកម្ពុជាទាំងក្នុងឆាកនយោបាយ សេដ្ឋកិច្ច និងលទ្ធិប្រជាធិបតេយ្យនៅកម្ពុជា។ លោកបានកោតសរសើរចំពោះកិច្ចខិតខំប្រឹងប្រែងរបស់ឯកឧត្តមទេសរដ្ឋមន្ត្រី អូស្មាន ហាស្សាន់ ដែលធ្វើឱ្យសហគមន៍ឥស្លាមកម្ពុជាមានឥទ្ធិពល និងការទទួលស្គាល់កាន់តែខ្លាំង។ ឯកឧត្តមបានបញ្ជាក់ដែរថា អង្គការមូលនិធិ Diyanet ដែលបានគាំទ្រសហគមន៍ខ្មែរឥស្លាមជាង ៣០ ឆ្នាំមកហើយនោះ បានសន្យាថានឹងបង្កើនចំនួនអាហារូបករណ៍បន្ថែមទៀត ដល់និស្សិតកម្ពុជាផងដែរ។ ឯកឧត្តមក៏បានបង្ហើបដែរថា គាត់បានពិភាក្សាជាមួយក្រសួងអប់រំ យុុវជន និងកីឡា ដើម្បីរៀបចំកម្មវិធីសិក្សា និងការអប់រំសម្រាប់សហគមន៍ឥស្លាមនៅកម្ពុជា ឱ្យកាន់តែមានប្រសិទ្ធភាពស្របតាមប្រព័ន្ធអប់រំជាតិ។

ជាចុងក្រោយ ក្នុងនាមជាឯកអគ្គរដ្ឋទូតថ្មីប្រចាំនៅកម្ពុជា ឯកឧត្តម បានប្ដេជ្ញាចិត្តយ៉ាងមុតមាំថានឹងខិតខំប្រឹងប្រែងឱ្យអស់ពីកម្លាំងកាយចិត្ត និងសមត្ថភាព ដើម្បីពង្រឹង ព្រមទាំងពង្រីកចំណងមិត្តភាពទ្វេភាគីរវាងតួកគីយ៉េ និងកម្ពុជា ឱ្យកាន់តែរឹងមាំ និងស៊ីជម្រៅបន្ថែមទៀត៕

សម្តេចតេជោ ហ៊ុន សែន ៖ ខ្ញុំទើបរកឃើញចំណាររបស់ខ្ញុំលើលិខិតរបស់ ឯកឧត្តម គង់ វិបុល ទាក់ទងដល់កំណែទម្រង់ហិរញ្ញវត្ថុសាធារណៈ ពិសេសការប្រមូលចំណូលចូលថវិកាជាតិ។ ការលូកដៃរបស់នាយករដ្ឋមន្ត្រី ចូលគាំទ្រអង្គភាពពន្ធដារមិនត្រឹមតែមិនមែនជាកំហុសនោះទេ ប៉ុន្តែវាបង្ហាញនូវចំណុចខ្លាំងដើម្បីជោគជ័យកំណែទម្រង់រដ្ឋដែលក្នុងនោះ កំណែទម្រង់ហិរញ្ញវត្ថុសាធារណៈជាគន្លឹះសម្រាប់ជោគជ័យនៃកំណែទម្រង់វិស័យផ្សេងទៀត។

ចំណារទាំង៤នេះជាចលកររុញច្រានកម្ពុជាឲ្យចេញផុតពីកង្វះសាច់ប្រាក់បើកបៀវត្តន៍ (ប្រាក់ខែតិចហើយអត់សាច់ប្រាក់បើកជូនទៀត) មកជាមានសាច់ប្រាក់បើកជាមួយ និងការបង្កើនបៀវត្តន៍ជូនមន្ត្រីរាជការ កងកម្លាំង ប្រដាប់អាវុធ។ យើងមានសាច់ប្រាក់សម្រាប់ការវិនិយោគសាធារណៈដូចជា ផ្លូវស្ពាន ប្រឡាយទឹក សាលារៀន មន្ទីរពេទ្យ និងការចំណាយលើការអនុវត្តន៍គោលនយោបាយគាំពារសង្គម ។ល។
ភាពធន់ខាងសេដ្ឋកិច្ចរបស់យើងបង្ហាញច្បាស់ពីដំណាក់ការកូវីដ១៩ ឆ្នាំ២០២០ រហូតមកដល់នេះដែលយើងមានសាច់ប្រាក់គ្រប់គ្រាន់ដំឡើងបៀវត្តន៍ និងបើកបៀវត្តន៍២ដងក្នុងមួយខែ ជាមួយនិងការអនុវត្តន៍គោលនយោបាយគាំពារសង្គម និងការវិនិយោគសាធារណៈផ្សេងទៀត។

ចំណាររបស់ខ្ញុំនាពេលនោះមុតជាងផ្លែដាវទៅទៀត តែខ្ញុំមិនខ្លាច មិនចុះញ៉ម ព្រោះវាជាផលប្រយោជន៍ជាតិ និងប្រជាជន។ ម្យ៉ាងទៀតប្រទេសកម្ពុជាខុសប្លែកពី ប្រទេសផ្សេងទៀត ព្រោះយើងត្រូវរៀបចំឡើងវិញទាំងអស់ក្រោយរបបប៉ុលពត ដូចនេះតម្រូវឲ្យនាយករដ្ឋមន្ត្រី មានសេចក្តីក្លាហានហ៊ានធ្វើ និងហ៊ានទទួលខុសត្រូវ។សូមអធ្យាស្រ័យដោយចំណាររបស់ខ្ញុំអក្សរមិនស្អាតថែមទាំងខុសអក្ខរាវិរុទ្ធទៀតផង (សូមមើលអត្ថបទចម្លង)។

ឯកឧត្តម ស្បោង សារ៉ាត អញ្ជើញជាអធិបតីដឹកនាំកិច្ចប្រជុំក្រុមប្រឹក្សាខេត្តព្រៃវែង
=========
ព្រឹកថ្ងៃទី០៤ ខែមិថុនា ឆ្នាំ២០២៦
ឯកឧត្តម ស្បោង សារ៉ាត ប្រធានក្រុមប្រឹក្សាខេត្ត អញ្ជើញជាកនអធិបតីដ៏ខ្ពង់ខ្ពស់ ដឹកនាំកិច្ចប្រជុំសាមញ្ញលើកទី២៥ អាណត្តិទី៤ របស់ក្រុមប្រឹក្សាខេត្តព្រៃវែង តាមរបៀបវារ: រួមមាន÷
១-ពិនិត្យ និងអនុម័ត លើសេចក្តីព្រាងកំណត់ហេតុនៃកិច្ចប្រជុំសាមញ្ញលើកទី២៤ អាណត្តិទី៤ របស់ក្រុមប្រឹក្សាខេត្ត
២-ពិនិត្យ ពិភាក្សា និងអនុម័ត លើសេចក្តីព្រាងរបាយការណ៍ប្រចាំឧសភា ឆ្នាំ២០២៦ និងទិសដៅការងារខែបន្ទាប់របស់រដ្ឋបាលខេត្តព្រៃវែង
៣-ពិនិត្យ និងអនុម័ត លើសេចក្តីព្រាង សេចក្តីសម្រេចស្តីពី ប្រតិទិននៃកិច្ចប្រជុំសាមញ្ញរបស់ក្រុមប្រឹក្សាខេត្តព្រៃវែង អាណត្តិទី៤ ឆ្នាំទី៣
៤-សេចក្តីរាយការណ៍របស់ការិយាល័យប្រជាពលរដ្ឋ និងគណៈកម្មាធិការនានារបស់ក្រុមប្រឹក្សាខេត្ត ៖
-ការិយាល័យប្រជាពលរដ្ឋ
-គណៈកម្មាធិការពិគ្រោះយោបល់កិច្ចការស្ត្រី និងកុមារខេត្ត
៥-បញ្ហាផ្សេងៗ
- មតិឯកឧត្តមអភិបាលនៃគណ:អភិបាលខេត្ត
-មតិឯកឧត្តមប្រធានក្រុមប្រឹក្សាខេត្ត និងបិទកិច្ចប្រជុំ

សាកលវិទ្យាល័យអានហួយ នៃសាធារណរដ្ឋប្រជាមានិតចិន ត្រៀមបង្កើនអាហារូបករណ៍ និងទទួលយកនិស្សិតកម្ពុជាទៅបន្តការសិក្សាបន្ថែមទៀត
===============
នាព្រឹកថ្ងៃទី២ ខែមិថុនា ឆ្នាំ២០២៦ ឯកឧត្តម ឡាវ វ៉ាន់ ប្រធានការិយាល័យគ្រឹះស្ថានសិក្សា នៃគណៈកម្មាធិការអាហារូបករណ៍ អ.ម.ត និងជាប្រធានការិយាល័យកិច្ចការនិស្សិតក្រៅប្រទេស នៃសមាគម អ.ម.ត បានអញ្ជើញដឹកនាំគណៈប្រតិភូ ជួបពិភាក្សាការងារជាមួយ លោក Wang Shouguo សាកលវិទ្យាធិការរង នៃសាកលវិទ្យាល័យអានហួយ និងសហការី។

ថ្លែងក្នុងជំនួបនេះ ឯកឧត្តម ឡាវ វ៉ាន់ បានគូសបញ្ជាក់ថា រាជរដ្ឋាភិបាលកម្ពុជាតែងតែចាត់ទុកស្ថាប័នដែលបានចូលរួមក្នុងវិស័យអប់រំ ជាដៃគូសហការដ៏សំខាន់ និងមិនអាចខ្វះបាន ក្នុងការចូលរួមតម្រង់ទិសអនាគតយុវជនកម្ពុជា ឱ្យមានជំនាញរឹងមាំ ភាពធន់ និងសមត្ថភាពបត់បែនខ្ពស់ ស្របតាមការវិវត្តនៃបច្ចេកវិទ្យា និងតម្រូវការទីផ្សារការងារក្នុងតំបន់ និងសកលលោក។ ក្នុងន័យនេះ សាកលវិទ្យាល័យអានហួយ ជាដៃគូសហការដ៏ជិតស្និទ្ធរបស់គណៈកម្មាធិការអាហារូបករណ៍ អ.ម.ត កំពុងរួមគ្នាកសាងមូលធនមនុស្ស ប្រកបដោយសក្តានុពល ចំណេះដឹង ជំនាញ អាកប្បកិរិយា សម្រាប់បម្រើឱ្យការអភិវឌ្ឍប្រទេសជាតិ។

ជាមួយគ្នានេះ លោក Wang Shouguo បានបង្ហាញអំពីការប្តេជ្ញាចិត្តខ្ពស់ក្នុងការផ្តល់កិច្ចសហការជាមួយគណៈកម្មាធិការអាហារូបករណ៍ អ.ម.ត និងស្ថាប័នពាក់ព័ន្ធ ដោយបង្កើនបរិមាណអាហារូបករណ៍ដល់និស្សិតកម្ពុជា ទាំងការបណ្តុះបណ្តាលថ្នាក់ភាសា និងជំនាញឯកទេស ដើម្បីរួមចំណែកកសាងមូលធនមនុស្សកម្ពុជា។

ពិធីសម្ពោធអគារមត្តេយ្យសិក្សា និងសមិទ្ធផលនានា នៅក្នុងស្រុកបាភ្នំខេត្តព្រៃវែង
=========
នៅថ្ងៃទី០៣ ខែមិថុនា ឆ្នាំ២០២៦ នេះ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តព្រៃវែង និងលោកជំទាវ កែ សួនសុភី ស សុខា អញ្ជើញជាអធិបតីក្នុងពិធីសម្ពោធដាក់ឱ្យប្រើប្រាស់ជាផ្លូវការនូវអគារមត្តេយ្យសិក្សាចំនួន ១ខ្នង ៤បន្ទប់ បន្ទប់កុំព្យូទ័រ ស្រះទឹក ខ្លោងទ្វារបឋមសិក្សា និងសមិទ្ធផលនានា នៅសាលាបឋមសិក្សា ហ៊ុន សែន ឈើកាច់ រួមទាំងខ្លោងទ្វារ វត្តព្រះវិហារគុហ៍ ដែលស្ថិតនៅក្នុងភូមិរោងដំរី ឃុំជើងភ្នំ ស្រុកបាភ្នំ ខេត្តព្រៃវែង។

ពិធីដ៏មហោឡារិកនេះ ត្រូវបានប្រារព្ធឡើងក្រោមអធិបតីភាពដ៏ខ្ពង់ខ្ពស់របស់ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តព្រៃវែង និងលោកជំទាវ កែ សួនសុភី ស សុខា ដោយមានការអញ្ជើញចូលរួមយ៉ាងកុះករពីសំណាក់មន្ត្រីរាជការ លោកគ្រូ អ្នកគ្រូ សិស្សានុសិស្ស និងប្រជាពលរដ្ឋក្នុងមូលដ្ឋាន។

ក្នុងនោះដែរ ឯកឧត្តមបណ្ឌិត ងិន បាណាល់ ប្រធានក្រុមការងាររាជរដ្ឋាភិបាលចុះមូលដ្ឋានស្រុកបាភ្នំ ក៏បានអញ្ជើញចូលរួមអបអរសាទរ ពិធីនេះផងដែរ។ សមិទ្ធផលថ្មីៗដែលត្រូវបានដាក់សម្ពោធនាឱកាសនេះ មិនមែនត្រឹមតែជាការផ្លាស់ប្តូររូបរាងរូបវន្តដ៏ស្រស់ស្អាតនៃគ្រឹះស្ថានសិក្សាប៉ុណ្ណោះទេ ប៉ុន្តែវាគឺជាការបោះជំហានទៅមុខយ៉ាងរឹងមាំក្នុងការលើកកម្ពស់គុណភាពអប់រំ ចាប់តាំងពីកម្រិតដំបូងមក។

ការកសាងអគារមត្តេយ្យសិក្សាថ្មីចំនួន ៤បន្ទប់ គឺជាការវិនិយោគចំគោលដៅបំផុត ព្រោះការអប់រំកុមារតូច គឺជាឫសគល់នៃការអភិវឌ្ឍខួរក្បាល និងស្មារតីរបស់កុមារ។ បរិយាកាសរៀនសូត្រប្រកបដោយស្តង់ដារ និងសុវត្ថិភាព នឹងជួយដុសខាត់កុមារតូចៗឱ្យត្រៀមខ្លួនរួចជាស្រេចសម្រាប់ការឈានទៅរកការអប់រំកម្រិតបឋមសិក្សា។

ទន្ទឹមនឹងនេះ វត្តមាននៃបន្ទប់កុំព្យូទ័រថ្មី គឺជាស្ពានចម្លងដ៏សំខាន់សម្រាប់សិស្សានុសិស្សនៅជនបទ ឱ្យមានឱកាសស្មើភាពគ្នាក្នុងការក្រេបជញ្ជក់ចំណេះដឹងបច្ចេកវិទ្យា ដែលជាតម្រូវការមិនអាចខ្វះបាននៅក្នុងសតវត្សរ៍ទី២១ ស្របតាមយុទ្ធសាស្ត្របញ្ចកោណរបស់រាជរដ្ឋាភិបាលកម្ពុជា។

ក្រៅពីការអភិវឌ្ឍចំណេះដឹងទូទៅតាមរយៈសាលារៀន ការកសាងខ្លោងទ្វារវត្តព្រះវិហារគុហ៍ ក៏បានបង្ហាញពីការផ្សារភ្ជាប់គ្នាយ៉ាងជិតស្និទ្ធរវាងពុទ្ធចក្រ និងអាណាចក្រផងដែរ។

វត្តអារាមនៅតែដើរតួនាទីយ៉ាងសំខាន់ក្នុងការអប់រំទូន្មានផ្នែកសីលធម៌ គុណធម៌ និងវប្បធម៌រស់នៅដល់យុវជនជំនាន់ក្រោយ ជួយឱ្យពួកគេក្លាយជាពលរដ្ឋល្អទាំងចំណេះដឹង និងចរិយាសម្បត្តិ។

សម្ដេចធិបតី ហ៊ុន ម៉ាណែត អញ្ជើញសម្ពោធសមិទ្ធផល និងប្រគល់សញ្ញាបត្រគ្រូបង្រៀនជូនគរុសិស្ស និស្សិត នៅវិទ្យាស្ថានជាតិអប់រំកាយ និងកីឡា
===============
សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃព្រះរាជាណាចក្រកម្ពុជា អញ្ជើញជាអធិបតីក្នុងពិធីសម្ពោធអគារកម្ពស់៣ជាន់ សមិទ្ធផលនានា និងប្រគល់សញ្ញាបត្រគ្រូបង្រៀនកម្រិតមូលដ្ឋាន និងសញ្ញាបត្របរិញ្ញាបត្រអប់រំ ឯកទេសអប់រំកាយ ជូនដល់គរុសិស្ស គរុនិស្សិត នៅវិទ្យាស្ថានជាតិអប់រំកាយ និងកីឡា រាជធានីភ្នំពេញ នាព្រឹកថ្ងៃទី៣ ខែមិថុនា ឆ្នាំ២០២៦។

រាជរដ្ឋាភិបាលកម្ពុជាគ្រប់អាណត្តិ តែងផ្តល់ការលើកកម្ពស់វិស័យអប់រំជាអាទិភាព ដោយធ្វើការពង្រឹងគុណភាព និងធ្វើការកែទម្រង់ជាបន្តបន្ទាប់ជាច្រើនដំណាក់កាល ដើម្បីប្រែក្លាយប្រព័ន្ធអប់រំឱ្យទៅជាកាតាលីករ ក្នុងការអភិវឌ្ឍសេដ្ឋកិច្ច និងសង្គម។ នៅក្នុងយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាលអាណត្តិទី៧ ក៏បានកំណត់យក ការអភិវឌ្ឍមូលធនមនុស្ស ជាបញ្ចកោណទី១ ដោយផ្តោតលើការកែទម្រង់ប្រព័ន្ធអប់រំ វិទ្យាសាស្ត្រ បច្ចេកវិទ្យា និងការធ្វើទំនើបកម្មជាអាទិភាពគន្លឹះ ដែលមានគោលដៅបង្កើតបរិយាកាសអប់រំប្រកបដោយគុណភាពខ្ពស់។

ការរីកចម្រើនជាលំដាប់របស់វិទ្យាស្ថានជាតិអប់រំកាយ និងកីឡា ទាំងលើផ្នែកហេដ្ឋារចនាសម្ព័ន្ធរូបវ័ន្ត និងបច្ចេកវិទ្យា ការកែលម្អកម្មវិធី និងវិធីសាស្ត្របណ្តុះបណ្តាល ការអភិវឌ្ឍសមត្ថភាពគ្រូលើការស្រាវជ្រាវ និងការបង្រៀន និងការពង្រឹងពង្រីកកិច្ចសហប្រតិបត្តិការជាមួយដៃគូពាក់ព័ន្ធ សំដៅឆ្លើយតបនឹងការកើនឡើង ទាំងបរិមាណ និងគុណភាពនៃតម្រូវការរបស់សង្គមជាតិក្នុងវិស័យអប់រំកាយ និងកីឡា។

សម្តេចតេជោ ហ៊ុន សែន អញ្ជើញជួបសំណេះសំណាលជាមួយអាជ្ញាធរដែនដី និងអង្គបោះឆ្នោតព្រឹទ្ធសភា នៅមណ្ឌលភូមិភាគទី៨ ក្នុងខេត្តកំពង់ធំ
===========
នាព្រឹកថ្ងៃពុធ ៣រោច ខែជេស្ឋ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី៣ ខែមិថុនា ឆ្នាំ២០២៦ សម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្ដីទីនៃព្រះរាជាណាចក្រកម្ពុជា និងជាប្រធានក្រុមឧត្តមប្រឹក្សាផ្ទាល់ព្រះមហាក្សត្រ បានអញ្ជើញជួបសំណេះសំណាលជាមួយអាជ្ញាធរដែនដី និងអង្គបោះឆ្នោតព្រឹទ្ធសភា នៅមណ្ឌលភូមិភាគទី៨ ក្នុងខេត្តកំពង់ធំ។

ពិធីសំណេះសំណាលនេះ មានការអញ្ជើញចូលរួមពីសមាជិកព្រឹទ្ធសភា រដ្ឋសភា ប្រធាន អនុប្រធានក្រុមការងារថ្នាក់ជាតិចុះជួយខេត្តកំពង់ធំ សមាជិកក្រុមប្រឹក្សាខេត្ត ក្រុង ស្រុក ឃុំ សង្កាត់ ព្រមទាំងថ្នាក់ដឹកនាំមន្ទីរ អង្គភាពនានាជុំវិញខេត្តកំពង់ធំសរុប១១៨៩នាក់។

ការអញ្ជើញចុះជួបសំណេះសំណាលនេះ ជាវេលាដ៏មានសារៈសំខាន់មួយសម្រាប់សម្តេចតេជោ ហ៊ុន សែន ក្នុងការក្រើនរំលឹក និងជំរុញដល់មន្ត្រីនៅមូលដ្ឋានឱ្យបង្កើនការយកចិត្តទុកដាក់ទៅលើកិច្ចការជាដែនសមត្ថកិច្ចរបស់ខ្លួន ជាពិសេសការផ្តល់សេវាទាំងឡាយជូន ដល់ប្រជាពលរដ្ឋ ក៏ដូចជាការដោះស្រាយបញ្ហាទាំងឡាយដែលជាក្តីកង្វល់របស់ប្រជាពលរដ្ឋ។

ការចុះជួបសំណេះសំណាលជាមួយអាជ្ញាធរដែនដី និងអង្គបោះឆ្នោតព្រឹទ្ធសភានេះ បានចាប់ផ្តើមកាលពីថ្ងៃទី២៥ ខែមេសា ឆ្នាំ២០២៦ រួមមាន នៅខេត្តកំពង់ចាម ត្បូងឃ្មុំ កំពង់ស្ពឺ តាកែវ កំពត កែប ស្វាយរៀង ព្រៃវែង រាជធានីភ្នំពេញ ខេត្តកំពង់ឆ្នាំង និងខេត្តពោធិ៍សាត់។

ឯកឧត្តមបណ្ឌិត អូស្មាន ហាស្សាន់ អញ្ជើញចែកកញ្ចប់អាហាររបស់ក្រុមហ៊ុន Smart ជូនបងប្អូនជនភៀសសឹកចំនួន១៥០០ គ្រួសារ នៅខេត្តបន្ទាយមានជ័យ
======================
បន្ទាយមានជ័យ៖ នៅព្រឹកថ្ងៃទី២ ខែមិថុនា ឆ្នាំ២០២៦ ឯកឧត្តមបណ្ឌិត អូស្មាន ហាស្សាន់ សមាជិកគណៈអចិន្ត្រៃយ៍គណៈកម្មាធិការកណ្តាលគណបក្សប្រជាជនកម្ពុជា និងជាប្រធានគណៈចលនាសាសនិកឥស្លាមរបស់គណបក្សប្រជាជនកម្ពុជា និងឯកឧត្តមកិត្តិសង្គហបណ្ឌិត គន់ គីម ទេសរដ្ឋមន្ត្រី អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ និងជាអគ្គលេខាធិការសមាគមអតីតយុទ្ធជន និងនិវត្តជនកម្ពុជា បានអញ្ជើញជាអធិបតីក្នុងពិធីសំណេះសំណាល និងចែកកញ្ចប់អាហារចំនួន ១៥០០ កញ្ចប់ ជូនបងប្អូនជនភៀសសឹក ដែលកំពុងស្នាក់បណ្ដោះអាសន្ន (ផ្ទះអតីតយុទ្ធជន) នៅស្នាក់ការ ភូមិបន្ទាយមានរិទ្ធិ និងភូមិសាមគ្គី ឃុំស្លក្រាម ស្រុកស្វាយចេក ខេត្តបន្ទាយមានជ័យ។

ក្នុងឱកាសនោះ ឯកឧត្តមទេសរដ្ឋមន្ត្រី អូស្មាន ហាស្សាន់ បានលើកឡើងថា រាជរដ្ឋភិបាលកម្ពុជា ក្រោមការដឹកនាំដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី និងជាប្រធានព្រឹទ្ធសភានៃព្រះរាជាណាចក្រកម្ពុជា និងសម្តេចធិបតី ហ៊ុន ម៉ាណែត នាយករដ្ឋមន្ត្រី តែងតែយកចិត្តទុកដាក់ជានិច្ចចំពោះសុខទុក្ខ និងការរស់នៅរបស់បងប្អូនប្រជាពលរដ្ឋភៀស
សឹកទាំងអស់ ដែលបង្ខំចិត្តចាកចេញពីលំនៅឋានរបស់ខ្លួន នៅក្នុងគ្រាដ៏លំបាកនេះ ហើយរាជរដ្ឋាភិបាលបានកំណត់ទិសដៅអាទិភាពចម្បងក្នុងការដោះស្រាយបញ្ហាលំនៅឋានស្នាក់នៅបណ្តោះអាសន្នជូនប្រជាពលរដ្ឋ ខណៈដែលរដ្ឋាភិបាលក៏កំពុងបន្តធ្វើការតវ៉ាយ៉ាងសកម្មជាមួយសហគមន៍អន្តរជាតិ ដើម្បីស្វែងរកយុត្តិធម៌ក្នុងការទាមទារទឹកដីដែលរងការរំលោភបំពានត្រឡប់មកវិញ។

ជាមួយគ្នានេះ ឯកឧត្តមទេសរដ្ឋមន្ត្រី បានសម្តែងនូវការកោតសរសើរ និងថ្លែងអំណរគុណយ៉ាងជ្រាលជ្រៅចំពោះសហការីមកពីបណ្តារាជធានីភ្នំពេញ និងខេត្តផ្សេងៗ ព្រមទាំងក្រុមហ៊ុន Smart ដែលបាននាំយកអំណោយមនុស្សធម៌មកចែកជូន ដើម្បីជួយសម្រាលការលំបាក របស់បងប្អូនភៀសសឹក ។ ឯកឧត្តមទេសរដ្ឋមន្ត្រី ក៏បានអរគុណដល់ប្រតិភូជាបងប្អូនសាសនិកឥស្លាម និងនិស្សិតយ៉ាងច្រើនដែលបានចូលរួមនាថ្ងៃនេះ គឺដើម្បីសិក្សា និងស្វែងយល់បន្ថែមអំពីស្ថានភាពរស់នៅជាក់ស្តែងរបស់ប្រជាពលរដ្ឋ សំដៅរកវិធីសាស្ត្រ ឬលទ្ធភាពផ្សេងៗទៀតក្នុងការបន្តជួយផ្គត់ផ្គង់ទៅថ្ងៃមុខ។

ចំណែកលោកស្រី ខាក់ ចិន្តា នាយកប្រតិបត្តិផ្នែកធនធានមនុស្ស នៃក្រុមហ៊ុន Smart បានលើកឡើងថា ក្រុមហ៊ុនបានបង្កើតមូលនិធិបម្រុងមួយ ដើម្បីជួយសម្រាលការលំបាក ផ្គត់ផ្គង់ និងសម្រួលដល់ស្ថានភាពរស់នៅរបស់ប្រជាពលរដ្ឋ ដែលបានឆ្លងកាត់ និងប្រឈមមុខនឹងគ្រាលំបាក ជាពិសេសក្រោយពេលមានសង្គ្រាម និងការភៀសខ្លួន។ ជាមួយគ្នាដែរ លោកស្រី បានថ្លែងអំណរគុណដល់ ឯកឧត្តមបណ្ឌិតទេសរដ្ឋមន្ត្រី អូស្មាន ហាស្សាន់ និងឯកឧត្តមកិត្តិសង្គហបណ្ឌិត គន់ គីម ដែលបានផ្តល់ឱកាសឱ្យក្រុមហ៊ុន Smart អាចចូលរួមចំណែកក្នុងការជួយសម្រាលទុក្ខលំបាកប្រជាពលរដ្ឋនាពេលនេះ។

គួររម្លឹកដែរថា នេះជាលើកទី២ ហើយដែល ឯកឧត្តមទេសរដ្ឋមន្ត្រី អូស្មាន ហាស្សាន់ និងឯកឧត្តមកិត្តិសង្គហបណ្ឌិត គន់ គីម បានអញ្ជើញចែកអំណោយជូនបងប្អូនជនភៀសសឹកនៅតំបន់ខាងលើ ដោយកាលពីថ្ងៃទី២៧ ខែមេសា កន្លងទៅនេះ បានចែកចំនួន ១៦០០គ្រួសាររួចហើយ នៅភូមិជោគជ័យ និងភូមិព្រៃចាន់ ឃុំស្លក្រាម ដែលជាការឧបត្ថម្ភរបស់អង្គការសម្ព័ន្ធពិភពឥស្លាម(MWL) នៃព្រះរាជាណាចក្រអារ៉ាប៊ីសាអូឌីត។

អំណោយខាងលើ ខាងលើទទួលបានឧបត្ថម្ភ ពីក្រុមហ៊ុន Smart Axitata ក្នុង១កញ្ចប់នីមួយៗមាន អង្ករ 25 គក្រ ,មី 1 កេះ 24 កញ្ចប់ ,ត្រីខ 1 យួរ 10 កំប៉ុង ,ទឹកត្រី 750 ml 6 ដប និងទឹកសុីអុីវ 450 ml 6 ដប ។ ក្រុមហ៊ុន Smart ជាក្រុមហ៊ុន របស់រដ្ឋម៉ាឡេស៊ី ហើយក៏ជាក្រុមហ៊ុនដែលធ្វើអាជីវកម្មមានការរីកចម្រើនលូតលាស់ខ្លាំង និងជាក្រុមហ៊ុនជាប់ចំណាត់ថ្នាក់លេខ ៣ ក្នុងការបង់ពន្ធជូនរដ្ឋ ។ លើសពីនេះ ក្រុមហ៊ុនក៏ធ្លាប់ទទួលបានលិខិតថ្លែងអំណរគុណពីប្រមុខរាជរដ្ឋាភិបាលសម្ដេចធិបតី ហ៊ុន ម៉ាណែត ផងដែរ។

ឯកឧត្តម ចាន់ ស៊ីណាត ដឹកនាំពិនិត្យកម្មវិធី “បរិស្ថានបៃតង លំនៅឋានស្អាត” ព្រមទាំងចុះសំណេះសំណាល និងពិនិត្យសុខាភិបាលក្នុងឃុំចំណាលើ ស្រុកស្ទោង
===========================
ថ្ងៃអង្គារ ២រោច ខែជេស្ឋ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី២ ខែមិថុនា ឆ្នាំ២០២៦​ ឯកឧត្តម ចាន់ ស៊ីណាត ប្រធានក្រុមការងារគណបក្សចុះមូលដ្ឋានឃុំចំណាលើ តំណាងដ៏ខ្ពង់ខ្ពស់ ឯកឧត្តម ថោ ជេដ្ឋា អនុប្រធានក្រុមការងារគណបក្សចុះមូលដ្ឋានខេត្តកំពង់ធំ និងជាប្រធានក្រុមការងារគណបក្សចុះមូលដ្ឋានស្រុកស្ទោង បានអញ្ជើញដឹកនាំក្រុមការងារបើកកិច្ចប្រជុំពិនិត្យលើការអនុវត្តកម្មវិធី «បរិស្ថានបៃតង លំនៅឋានស្អាត» ព្រមទាំងបានអញ្ជើញចុះជួបសំណេះសំណាលជាមួយលោកគ្រូ អ្នកគ្រូ សិស្សានុសិស្ស និងចុះពិនិត្យមណ្ឌលសុខភាពបង្អែក ព្រមទាំងដំណាំរួមផ្សំរបស់ប្រជាពលរដ្ឋ ស្ថិតក្នុងភូមិសាស្ត្រឃុំចំណាលើ។

ក្នុងកិច្ចប្រជុំនោះ ឯកឧត្តមប្រធានក្រុមការងារ បានពិនិត្យវឌ្ឍនភាពកម្មវិធីប្រលងប្រណាំង «បរិស្ថានបៃតង លំនៅឋានស្អាត» និងបានពាំនាំអនុសាសន៍ណែនាំរបស់ ឯកឧត្តមរដ្ឋមន្ត្រី ថោ ជេដ្ឋា ដែលបានបង្កើតកម្មវិធីនេះឡើងក្នុងគោលបំណងលើកកម្ពស់សោភ័ណភាព និងបរិស្ថានមូលដ្ឋាន។ កម្មវិធីនេះចាប់ផ្តើមអនុវត្តពីស្នាក់ការគណបក្សឃុំ និងតាមផ្ទះរបស់ប្រជាពលរដ្ឋនៅសងខាងអគារបក្ស ដោយក្នុងមួយគ្រួសារដាំដើមទុរ៉េន ១ដើម ដើម្បីបង្កើតគម្របបៃតង ផ្ដល់ចំណូលបន្ថែមលើកកម្ពស់ជីវភាព និងបំផុសស្មារតីរួមគ្នាសម្រេចឱ្យបានតាមទស្សនៈ «ភូមិ-ឃុំស្អាត គ្មានសំរាម បរិស្ថានល្អ»។

បន្ទាប់មក ឯកឧត្តមប្រធានក្រុមការងារ បានអញ្ជើញចុះជួបសំណេះសំណាលជាមួយលោកគ្រូ អ្នកគ្រូ និងសិស្សានុសិស្សនៅសាលារៀនហ៊ុនសែនចំណាលើ ដើម្បីណែនាំ និងបញ្ជ្រាបការយល់ដឹងពីកម្មវិធី «បរិស្ថានបៃតង លំនៅឋានស្អាត» សំដៅរួមគ្នាថែរក្សាអនាម័យបរិស្ថាន ដែលជាកត្តាគន្លឹះលើកកម្ពស់សុខភាពសាធារណៈ និងកាត់បន្ថយការចំណាយក្នុងគ្រួសារ ព្រមទាំងចុះពិនិត្យតាមខ្នងផ្ទះពលរដ្ឋដែលមានដាំដើមទុរ៉េន ដើម្បីទាញរកចំណូលបន្ថែម និងបានបន្តដំណើរចុះពិនិត្យការផ្តល់សេវាសុខាភិបាលនៅមណ្ឌលសុខភាពបង្អែកឃុំចំណាលើផងដែរ។

ក្នុងឱកាសនោះដែរ ឯកឧត្តមប្រធានក្រុមការងារ ក៏បានឧបត្ថម្ភគ្រឿងកុំព្យូទ័រ ម៉ាស៊ីនព្រីនធ័រ និងសម្ភារការិយាល័យមួយចំនួន ជូនដល់រដ្ឋបាល និងក្រុមប្រឹក្សាឃុំចំណាលើ ដើម្បីសម្រួលដល់ការបំពេញការងារ និងលើកកម្ពស់ប្រសិទ្ធភាពនៃការបម្រើសេវាសាធារណៈជូនប្រជាពលរដ្ឋក្នុងមូលដ្ឋាន៕