គម្រោងពិពិធកម្មកសិកម្មកម្ពុជា Mowram/piu-casdp

លោក ហ៊ុយ វ៉ាន់ថា អញ្ជើញបើកវគ្គបណ្តុះបណ្តាលស្តីពីការថែទាំប្រព័ន្ធស្រោចស្រពដោយថាមពលពន្លឺព្រះអាទិត្យ នៅខេត្តសៀមរាប

=========

​នាថ្ងៃអង្គារ-ពុធ ៥-៦រោច ខែចេត្រ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី៧-៨ ខែមេសា ឆ្នាំ២០២៦ លោក ហ៊ុយ វ៉ាន់ថា ប្រធាននាយកដ្ឋានសហគមន៍កសិករប្រើប្រាស់ទឹក និងជាប្រធានគ្រប់គ្រងគម្រោងពិពិធកម្មកសិកម្មកម្ពុជា ក្នុងនាមតំណាងដ៏ខ្ពង់ខ្ពស់ ឯកឧត្តម ថោ ជេដ្ឋា រដ្ឋមន្រ្តីក្រសួងធនធានទឹក និងឧតុនិយម បានអញ្ជើញជាអធិបតីក្នុងពិធីបើកវគ្គបណ្តុះបណ្តាលស្តីពីកិច្ចដំណើរការ និងការថែទាំប្រព័ន្ធស្រោចស្រពដោយថាមពលពន្លឺព្រះអាទិត្យ (Solar) នៅការិយាល័យកសិកម្មទំនើបស្រូវនាងអំ ស្ថិតក្នុងស្រុកស្វាយលើ ខេត្តសៀមរាប។

​ថ្លែងក្នុងឱកាសនោះ លោកប្រធាននាយកដ្ឋានបានបញ្ជាក់ថា វគ្គបណ្ដុះបណ្តាលនេះរៀបចំឡើងក្នុងគោលបំណងពង្រឹងសមត្ថភាព និងចែករំលែកចំណេះដឹងបច្ចេកទេសដល់សមាជិកសហគមន៍ លើការគ្រប់គ្រង និងថែទាំហេដ្ឋារចនាសម្ព័ន្ធប្រព័ន្ធធារាសាស្ត្រឱ្យចំគោលដៅ។ ខ្លឹមសារសំខាន់ៗនៃវគ្គបណ្តុះបណ្តាល បានផ្តោតលើបច្ចេកទេសថែទាំប្រអប់បញ្ជា ផ្ទាំងសូឡា និងម៉ូទ័របូមទឹកដើរដោយថាមពលពន្លឺព្រះអាទិត្យ ដើម្បីធានាបាននូវប្រសិទ្ធភាព និងនិរន្តរភាពនៃការប្រើប្រាស់យូរអង្វែង ក្រោមការបង្ហាត់បង្ហាញផ្ទាល់ពីមន្ត្រីបច្ចេកទេសគម្រោង និងអ្នកជំនាញមកពីក្រុមហ៊ុនសាងសង់។

​ទន្ទឹមនឹងនោះ លោកប្រធាននាយកដ្ឋាន និងក្រុមការងារ ក៏បានចុះពិនិត្យជាក់ស្តែងនូវវឌ្ឍនភាពការដ្ឋានសាងសង់ចំនួន ០២ កន្លែង ដែលបានសម្រេចលទ្ធផល ១០០% រួមមាន៖ ទី)១. នៅសហគមន៍កសិកម្មទំនើបស្រូវនាងអំ ស្ថិតក្នុងស្រុកស្វាយលើ ៖ សំណង់ស្ទាក់ទឹក ស្ថានីយបូមទឹកសូឡា ការស្តារអូរ និងខ្នងទំនប់ក្រាលក្រួសក្រហម។ ទី)២. នៅសហគមន៍កសិកម្មកន្ទ្រាំងបល្ល័ង្គរស្មីស្ត្រីសាមគ្គី ស្ថិតក្នុងស្រុកប្រាសាទបាគង៖ ការស្តារអូរធម្មជាតិ ការដំឡើងស្ថានីយបូមទឹកសូឡា និងប្រព័ន្ធបណ្តាញទុយោចែកចាយទឹក៕

លោក ហ៊ុយ វ៉ាន់ថា អញ្ជើញបើកវគ្គបណ្តុះបណ្តាលស្តីពីកិច្ចដំណើរការ និងការថែទាំប្រព័ន្ធស្រោចស្រព ដោយថាមពលពន្លឺព្រះអាទិត្យ នៅខេត្តតាកែវ
=============
នាព្រឹកថ្ងៃពុធ ១៤កើត ខែចេត្រ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី១ ខែមេសា ឆ្នាំ២០២៦ លោក ហ៊ុយ វ៉ាន់ថា ប្រធាននាយកដ្ឋានសហគមន៍កសិករប្រើប្រាស់ទឹក និងជាប្រធានគ្រប់គ្រងគម្រោងពិពិធកម្មកសិកម្មកម្ពុជា ក្នុងនាមតំណាងដ៏ខ្ពង់ខ្ពស់ ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បានអញ្ជើញជាអធិបតីក្នុងពិធីបើកវគ្គបណ្តុះបណ្តាលស្តីពី «កិច្ចដំណើរការ និងការថែទាំប្រព័ន្ធស្រោចស្រពដោយថាមពលពន្លឺព្រះអាទិត្យ (សូឡា)» នៅខេត្តតាកែវ។
វគ្គបណ្តុះបណ្តាលនេះបានរៀបចំឡើងនៅការិយាល័យសហគមន៍កសិកម្មទំនើបបន្លែផ្ទះសំណាញ់ត្រាំកក់ ខេត្តតាកែវ ដោយមានការអញ្ជើញចូលរួមពីសំណាក់អាជ្ញាធរមូលដ្ឋាន តំណាងមន្ទីរធនធានទឹក និងឧតុនិយម មន្ទីរកសិកម្ម រុក្ខាប្រមាញ់ និងនេសាទ មន្ត្រីបច្ចេកទេសគម្រោង តំណាងក្រុមហ៊ុនសាងសង់ ព្រមទាំងថ្នាក់ដឹកនាំ និងសមាជិកសហគមន៍យ៉ាងច្រើន។
ថ្លែងក្នុងឱកាសនោះ លោកប្រធាននាយកដ្ឋាន បានគូសបញ្ជាក់ថា វគ្គបណ្តុះបណ្តាលនេះរៀបចំឡើងក្នុងគោលបំណងចែករំលែកចំណេះដឹងបច្ចេកទេសលើការគ្រប់គ្រង ប្រតិបត្តិការ និងការថែទាំហេដ្ឋារចនាសម្ព័ន្ធប្រព័ន្ធធារាសាស្ត្រ ឱ្យមានប្រសិទ្ធភាព និងនិរន្តរភាព។ ក្នុងនោះរួមមាន ការថែទាំប្រអប់បញ្ជា ផ្ទាំងសូឡា និងម៉ូទ័របូមទឹកដើរដោយថាមពលពន្លឺព្រះអាទិត្យ ដោយមានការធ្វើបទបង្ហាញដោយផ្ទាល់ពីមន្ត្រីបច្ចេកទេសផ្នែកសហគមន៍ និងអ្នកជំនាញមកពីក្រុមហ៊ុនសាងសង់ ដើម្បីធានាបាននូវការប្រើប្រាស់បានយូរអង្វែង។
បន្ទាប់ពីបញ្ចប់ពិធីបើកវគ្គបណ្តុះបណ្តាល លោក ហ៊ុយ វ៉ាន់ថា ក៏បានដឹកនាំក្រុមការងារបច្ចេកទេស ចុះពិនិត្យវឌ្ឍនភាពនៃការដ្ឋានសាងសង់ដោយផ្ទាល់ ដែលរហូតមកដល់ពេលនេះ វឌ្ឍនភាពការងារសម្រេចបានស្ទើរតែទាំងស្រុង។ សមិទ្ធផលដែលបានបញ្ចប់រួមមាន៖ ការស្តារអាងទឹក ការរៀបចំបណ្តាញទុយោចែកចាយមេ ការសាងសង់បន្ទប់ប្រតិបត្តិការ ព្រមទាំងការដំឡើងជើងទម្រស្ថានីយបូមទឹក ម៉ូទ័រ និងផ្ទាំងសូឡា ដែលត្រៀមនឹងដាក់ឱ្យដំណើរការបម្រើដល់ការស្រោចស្រពផ្ទៃដីកសិកម្មក្នុងតំបន់នាពេលឆាប់ៗខាងមុខនេះ៕

លោក ហ៊ុយ វ៉ាន់ថា អញ្ជើញបើកវគ្គបណ្តុះបណ្តាលស្តីពីកិច្ចដំណើរការ និងការថែទាំប្រព័ន្ធស្រោចស្រពដោយថាមពលពន្លឺព្រះអាទិត្យ (សូឡា) នៅខេត្តពោធិ៍សាត់។

=========

ថ្ងៃចន្ទ ៥កើត ខែចេត្រ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី២៣ ខែមីនា ឆ្នាំ២០២៦ លោក ហ៊ុយ វ៉ាន់ថា ប្រធាននាយកដ្ឋានសហគមន៍កសិករប្រើប្រាស់ទឹក និងជាប្រធានគ្រប់គ្រងគម្រោងពិពិធកម្មកសិកម្មកម្ពុជា បានអញ្ជើញជាអធិបតីបើកវគ្គបណ្តុះបណ្តាលស្តីពីកិច្ចដំណើរការ និងការថែទាំប្រព័ន្ធស្រោចស្រពដោយថាមពលពន្លឺព្រះអាទិត្យ(សូឡា) ដោយមានការចូលរួមពី មេឃុំ មេភូមិ មន្រ្តីមន្ទីរធនធានទឹក កសិកម្ម មន្រ្តីផ្នែកសហគមន៍ មន្រ្តីបច្ចេកទេស តំណាងក្រុមហ៊ុន ប្រធានសហគមន៍ និងសមាជិក ជាច្រើនរូប នៅការិយាល័យសហគមន៍កសិកម្មទំនើបម្ទេសដំណាក់ទ្រយឹងស្រុកភ្នំក្រវាញ ខេត្តពោធិ៍សាត់។

លោកប្រធាននាយកដ្ឋាន បានបញ្ជាក់ឱ្យដឹងថា វគ្គបណ្ដុះបណ្តាលនេះមានគោលបំណង ដើម្បីចែករំលែកចំណេះដឹង លើកិច្ចដំណើរការ និងការថែទាំហេដ្ឋារចនាសម្ព័ន្ធប្រព័ន្ធធារាសាស្រ្ត ឱ្យមានប្រសិទ្ធិភាព ធានាបាននូវនិរន្តរភាព ប្រើប្រាស់បានយូរអង្វែងរួមមាន ការថែទាំប្រអប់បញ្ជាសូឡា ផ្ទាំងសូឡា ថែទាំម៉ូទ័របូមទឹកដើរដោយថាមពលពន្លឺព្រះអាទិត្យ ដែលការបណ្តុះបណ្តាលនឹងមានបទបង្ហាញពី មន្រ្តីផ្នែកសហគមន៍គម្រោង អ្នកបច្ចេកទេសប្រព័ន្ធសូឡា និងអ្នកបច្ចេកទេសតំណាងក្រុមហ៊ុនសាងសង់។

នៅថ្ងៃជាមួយគ្នានេះដែរ លោកប្រធានបានចុះពិនិត្យការដ្ឋានសាងសង់ ដែលបានបញ្ចប់ស្ទើរតែទាំងស្រុង មានស្តារអាងទឹក តទុយោបណ្តាញចែកចាយមេ បន្ទប់ប្រតិបត្តិការ ដំឡើងជើងទម្រស្ថានីយបូមទឹក ម៉ូទ័របូមទឹក និងជើងទម្រផ្ទាំងសូឡា។

លោក ហ៊ុយ វ៉ាន់ថា អញ្ជើញចុះពិនិត្យវឌ្ឍនភាពការងារសាងសង់ គម្រោងអភិវឌ្ឍន៍ហេដ្ឋារចនាសម្ព័ន្ធធារាសាស្រ្ត សម្រាប់សហគមន៍កសិកម្មតាសីសាមគ្គី ស្ថិតក្នុងភូមិសាស្រ្ត ខេត្តបាត់ដំបង

============

នៅថ្ងៃអាទិត្យ ៤កើត ខែចេត្រ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី២២ ខែមីនា ឆ្នាំ២០២៦ លោក ហ៊ុយ វ៉ាន់ថា ប្រធាននាយកដ្ឋានសហគមន៍កសិករប្រើប្រាស់ទឹក និងជាប្រធានគ្រប់គ្រងគម្រោងពិពិធកម្មកសិកម្មកម្ពុជា ដោយមានការចូលរួមពីមន្រ្តីបច្ចេកទេស ទីប្រឹក្សាវិស្វករគ្រោងប្លង់ និងតំណាងក្រុមហ៊ុនសាងសង់ អញ្ជើញចុះពិនិត្យជាក់ស្តែងវឌ្ឍនភាពការងារសាងសង់គម្រោងអភិវឌ្ឍន៍ហេដ្ឋារចនាសម្ព័ន្ធធារាសាស្រ្ត សម្រាប់សហគមន៍កសិកម្មតាសីសាមគ្គី ស្ថិតក្នុងឃុំរូងជ្រៃ និងឃុំតាម៉ឺន ស្រុកថ្មគោល ខេត្តបាត់ដំបង រួមមាន៖ ការងារស្តារស្រះ ការដំឡើងជើងទម្រផ្ទាំងសឡា ការដំឡើងជើងស្ថានីយ៍បូមទឹក អណ្តូងទឹកក្រោមដី និងបន្ទប់ប្រតិបត្តិការ បាននឹងកំពុងអនុវត្តការងារសាងសង់ដោយក្រុមហ៊ុន Taing Cheng Oing Construction and Import Co., Ltd ដែលគិតមកដល់ពេលនេះ លទ្ធផលការងារសាងសង់ជារួមសម្រេចបានប្រមាណជា ៧៨%។

លោកប្រធាន​បានវាយតម្លៃខ្ពស់ចំពោះវឌ្ឍនភាពការងារដែលភាគីក្រុមហ៊ុនសម្រេចបានមកដល់ពេលនេះ និងបានណែនាំដល់ក្រុមហ៊ុនឱ្យបន្តបង្កើនការយកចិត្តទុកដាក់បន្ថែមទៀតលើ គុណភាពសំណង់ បទដ្ឋានបច្ចេកទេស និងជំរុញល្បឿនក្នុងការអនុវត្តការងារ​ ដើម្បីសម្រេចបានជោគជ័យតាមផែនការកំណត់កិច្ចសន្យា​នាខែមេសាខាងមុខនេះ៕

លោក តាំង សុផាត អគ្គនាយករង អញ្ជើញបើកវគ្គបណ្តុះបណ្តាលស្តីពីកិច្ចដំណើរការ និងការថែទាំប្រព័ន្ធស្រោចស្រពពីទឹកក្រោមដីដោយថាមពលពន្លឺព្រះអាទិត្យ(សូឡា) នៅខេត្តកំពង់ស្ពឺ

=========

ថ្ងៃចន្ទ ១៣រោច ខែផល្គុន ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី១៦ ខែមីនា ឆ្នាំ២០២៦ លោក តាំង សុផាត អគ្គនាយករងនៃអគ្គនាយកដ្ឋានកិច្ចការបច្ចេកទេស និងជានាយកគម្រោងពិពិធកម្មកសិកម្មកម្ពុជា ក្នុងនាមតំណាងដ៏ខ្ពង់ខ្ពស់ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បានអញ្ជើញជាអធិបតីបើកវគ្គបណ្តុះបណ្តាលស្តីពីកិច្ចដំណើរការ និងការថែទាំប្រព័ន្ធស្រោចស្រពពីទឹកក្រោមដីដោយថាមពលពន្លឺព្រះអាទិត្យ(សូឡា) ដែលទទួលហិរញ្ញប្បទានពីធនាគារពិភពលោក (WB) នៅការិយាល័យសហគមន៍កសិកម្មរីកចម្រើនទួលអំពិល។

លោកអគ្គនាយករង បានបញ្ជាក់ឱ្យដឹងថា វគ្គបណ្ដុះបណ្តាលនេះគឺក្នុងគោលបំណង ដើម្បីចែករំលែកចំណេះដឹងដែលមានសារៈប្រយោជន៍ជូនដល់សហគមន៍កសិកម្មរីកចម្រើនទួលអំពិល និងអ្នកពាក់ព័ន្ធនៃគម្រោងពិពិធកម្មកសិកម្មកម្ពុជា លើកិច្ចដំណើរការ និងការថែទាំហេដ្ឋារចនាសម្ព័ន្ធគាំទ្រដល់ការងារស្រោចស្រព។ លើសពីនេះ ការចូលរួមពីអ្នកទទួលផលរបស់សហគមន៍ធ្វើឱ្យកិច្ចដំណើរការប្រព័ន្ធស្រោចស្រពកាន់តែមានប្រសិទ្ធភាព ហើយធានាបាននូវនិរន្តរភាពនៃប្រព័ន្ធធារាសាស្រ្តបន្ទាប់ពីបញ្ចប់គម្រោង៕