វេទិការដ្ឋាភិបាលឌីជីថល Digital Government Forum

[English Below] សេចក្ដីប្រកាសព័ត៌មាន ស្ដីពី លទ្ធផលនៃការរៀបចំវេទិការដ្ឋាភិបាលឌីជីថល ឆ្នាំ២០២៥
ពិព័រណ៍បច្ចេកវិទ្យាឌីជីថល និងព្រឹត្តិការណ៍ជាតិ-អន្តរជាតិពាក់ព័ន្ធ
----
ក្រសួងប្រៃសណីយ៍និងទូរគមនាគមន៍ និងគណៈកម្មាធិការរដ្ឋាភិបាលឌីជីថល សូមជម្រាបជូនសាធារណជនទាំងអស់មេត្តាជ្រាបថា វេទិការដ្ឋាភិបាលឌីជីថល ឆ្នាំ២០២៥ ពិព័រណ៍បច្ចេកវិទ្យាឌីជីថល និងព្រឹត្តិការណ៍ជាតិ-អន្តរជាតិពាក់ព័ន្ធ ក្រោមប្រធានបទ “ការពន្លឿនអនាគតឌីជីថល៖ អភិបាលកិច្ច កំណើន និងភាពជាដៃគូសកល” បានប្រព្រឹត្តទៅរយៈពេល ៣ ថ្ងៃ ចាប់ពីថ្ងៃទី ៥-៧ ខែធ្នូ ឆ្នាំ២០២៥ នៅមណ្ឌលសន្និបាតនិងពិព័រណ៍កោះពេជ្រ ប្រកបដោយលទ្ធផលជោគជ័យដ៏ត្រចះត្រចង់ ដោយមានការចូលរួមពីសំណាក់រដ្ឋមន្ត្រីឌីជីថលអាស៊ាននិងអាស៊ី-ប៉ាស៊ីហ្វិក អង្គទូត ទីភ្នាក់ងារនៃអង្គការសហប្រជាជាតិ អង្គការជាតិ-អន្តរជាតិ ដៃគូអភិវឌ្ឍន៍ ក្រសួង ស្ថាប័ន ក្រុមហ៊ុនបច្ចេកវិទ្យាឌីជីថល ធុរកិច្ចថ្មីឌីជីថល គ្រឹះស្ថានអប់រំ និងដៃគូពាក់ព័ន្ធផ្សេងទៀតជាច្រើន ព្រមទាំងមានការចូលរួមទស្សនាពីសាធារណជនជាតិ-អន្តរជាតិ ប្រមាណ ជិត ២០,០០០ នាក់ ដែលកើនឡើងលើសឆ្នាំមុនជិត ២ ដង។

ក្នុងរយៈពេល ៣ ថ្ងៃនេះ វេទិការដ្ឋាភិបាលឌីជីថល ឆ្នាំ២០២៥ ពិព័រណ៍បច្ចេកវិទ្យាឌីជីថល និងព្រឹត្តិការណ៍ជាតិ-អន្តរជាតិពាក់ព័ន្ធ បានប្រព្រឹត្តទៅដោយបែងចែកជា ២ ផ្នែកសំខាន់ៗ ដូចខាងក្រោម៖

ផ្នែកទី១ កិច្ចពិភាក្សា និងបទបង្ហាញគន្លឹះ របស់ថ្នាក់ដឹកនាំជារដ្ឋមន្ត្រី អនុរដ្ឋមន្ត្រី មន្ត្រីជាន់ខ្ពស់ទទួលបន្ទុកវិស័យឌីជីថល វាគ្មិនជាតិនិងអន្តរជាតិមកពីក្រសួង ស្ថាប័ន ដៃគូអភិវឌ្ឍន៍ និងក្រុមហ៊ុនបច្ចេកវិទ្យាឌីជីថលជាតិនិងអន្តរជាតិ ដើម្បីបង្ហាញអំពីវឌ្ឍនភាពនៃដំណើរបរិវត្តកម្មរដ្ឋាភិបាលឌីជីថល និងការអនុវត្តគោលនយោបាយឌីជីថល ការជំរុញកិច្ចសហប្រតិបត្តិការក្នុងតំបន់ ការចែករំលែកឧត្តមានុវត្តន៍ពាក់ព័ន្ធអភិបាលកិច្ចឌីជីថល សន្តិសុខសាយប័រ បញ្ញាសិប្បនិម្មិត បរិយាបន្នឌីជីថល និងបច្ចេកវិទ្យាឌីជីថលឈានមុខថ្មីៗ ជាដើម។ ជាពិសេស វេទិកាឆ្នាំនេះ ក៏មានរៀបចំជា ព្រឹត្តិការណ៍ជាតិនិងអន្តរជាតិអម (Side Events) សំខាន់ៗ ចំនួន ៦ ក្នុងពេលដំណាលគ្នាផងដែរ។ ជារួម វេទិកាឆ្នាំនេះ មានវាគ្មិនជាតិនិងអន្តរជាតិ ចូលរួមសរុបប្រមាណជិត ២០០ នាក់ មកពីប្រមាណ ៣០ ប្រទេស។

ផ្នែកទី២ ពិព័រណ៍បច្ចេកវិទ្យាឌីជីថល ដែលបង្ហាញពីសមិទ្ធផលក្នុងវិស័យឌីជីថលរបស់ក្រសួង ស្ថាប័នរដ្ឋ នវានុវត្តន៍ឌីជីថលនៅក្នុងក្រុមហ៊ុនបច្ចេកវិទ្យាឌីជីថលជាតិនិងអន្តរជាតិ គ្រឹះស្ថានឧត្តមសិក្សា ធុរកិច្ចថ្មីឌីជីថល មានជាអាទិ៍ ថ្នាលនិងកម្មវិធីរដ្ឋាភិបាលឌីជីថល ប្រព័ន្ធ ដំណោះស្រាយ និងឧបករណ៍ឌីជីថលដែលជាបច្ចេកវិទ្យាថ្មីៗ ដូចជា បច្ចេកវិទ្យាក្លោដ បញ្ញាសិប្បនិម្មិត (AI) អ៊ីនធឺណិតនៃវត្ថុ (IoT) ឬឧបករណ៍រ៉ូបូទិក (Robotic) ជាដើម ដែលមានស្ដង់ពិព័រណ៍សរុបចំនួន ២០៩។

អ្វីដែលពិសេស សម្រាប់វេទិការដ្ឋាភិបាលឌីជីថល ឆ្នាំ2025 នេះ គឺ៖
១. ការចុះហត្ថលេខាលើអនុស្សរណៈនៃការយោគយល់ចំនួន ៧ ជាមួយប្រទេសជាមិត្តនិងដៃគូពាក់ព័ន្ធ ក្នុងវិស័យឌីជីថល ដែលបង្ហាញថា នៅពេលនេះ កម្ពុជាមិនត្រឹមតែជាតួអង្គអ្នកប្រើប្រាស់បច្ចេកវិទ្យាឌីជីថលនោះទេ ប៉ុន្តែបានប្រែក្លាយខ្លួនទៅជាតួអង្គដ៏សកម្មក្នុងការរួមចំណែកធ្វើបរិវត្តកម្មឌីជីថលនិងផ្ទេរបច្ចេកវិទ្យាឌីជីថលទាំងក្នុងកម្រិតតំបន់អាស៊ាន ជាពិសេស ឈានដល់តំបន់អាស៊ី-ប៉ាស៊ីហ្វិកបន្ថែមទៀត។

២. ការប្រកាសដាក់ឱ្យដំណើរការជាផ្លូវនៃសេវាទូរសព្ទចល័ត 5G ចាប់ពីឆ្នាំ២០២៦ តទៅ ដែលនឹងអាចជួយបង្កើនផលិតភាពសេដ្ឋកិច្ចរបស់កម្ពុជាក្នុងកម្រិតខ្ពស់ ជាពិសេស ក្នុងវិស័យឧស្សាហកម្ម និងសេវាកម្ម ព្រមទាំងជួយជំរុញល្បឿននៃដំណើរការបរិវត្តកម្មឌីជីថលនៅក្នុងគ្រប់វិស័យ។

៣. វឌ្ឍនភាពដ៏គួរឱ្យកត់សម្គាល់នៃដំណើរការប្រតិបត្តិការថ្នាលផ្ទៀងផ្ទាត់ឯកសារ verify.gov.kh របស់កម្ពុជា ដែលមកដល់ពេលនេះ និម្មាបនកម្មនៃថ្នាលនេះត្រូវបានប្រើប្រាស់យ៉ាងទូលំទូលាយនៅប្រទេសហ៊្វីលីពីន ហើយប្រទេសបង់ក្លាដេសក៏បានស្នើសុំប្រើប្រាស់ថ្នាល verify នៅប្រទេសរបស់ខ្លួនផងដែរ។ ទន្ទឹមនឹងនេះ ក្រសួងប្រៃសណីយ៍និងទូរគមនាគមន៍ ក៏កំពុងជួយរៀបចំដាក់ឱ្យប្រើថ្នាល verify.gov.tl ជាជំហានដំបូង នៅលើបណ្ណបើកបររបស់ប្រទេសទីម័រឡេស្តេផងដែរ។

៤. ថ្នាល DG SuperApp ជំនាន់ទី១ របស់កម្ពុជានឹងមានវត្តមានក្នុងដំណើរការបរិវត្តកម្មឌីជីថលក្នុងឆ្នាំ២០២៦។

៥. វត្តមានរបស់ក្រុមហ៊ុន Plug and Play បានធ្វើឱ្យក្តីសង្ឃឹមរបស់អ្នកបច្ចេកវិទ្យា និងយុវជនដែលចាប់អារម្មណ៍លើធុរកិច្ចថ្មីឌីជីថល មានការកើនឡើងខ្ពស់ ជាពិសេស នៅក្រោយពេលដែលធុរកិច្ចថ្មីឌីជីថលរបស់កូនខ្មែរទី១ គឺ Bamnang Academy ត្រូវបានក្រុមហ៊ុន Plug and Play ជ្រើសរើសដាក់ទុនវិនិយោគ និងមានបំណងជំរុញឱ្យទៅជាក្រុមហ៊ុនកម្រិតអន្តរជាតិ ដែលនេះបញ្ជាក់ឱ្យឃើញច្បាស់ថា “ខ្មែរធ្វើបាន”។ ជាមួយបទពិសោធរបស់ក្រុមហ៊ុន Plug and Play ក្រសួងប្រៃសណីយ៍និងទូរគមនាគមន៍ សង្ឃឹមជឿជាក់យ៉ាងមុតមាំថា Bamnang Academy នឹងមានវត្តមាននៅលើទីផ្សារអន្តរជាតិ ក្នុងពេលឆាប់ៗខាងមុខ។

៦. ក្រសួងប្រៃសណីយ៍និងទូរគមនាគមន៍ ប្តេជ្ញានឹងបន្តជំរុញការអភិវឌ្ឍ សួនឌីជីថល (Digital Park) ឱ្យបានយ៉ាងឆាប់រហ័ស ប្រកបដោយភាពជោគជ័យ ដើម្បីជំរុញឱ្យមានកំណើនការងារ ប្រែក្លាយកម្ពុជាទៅជាមជ្ឈមណ្ឌលបច្ចេកវិទ្យាឌីជីថល (Digital Hub) មួយក្នុងតំបន់។

ការគាំទ្រពីសំណាក់ថ្នាក់ដឹកនាំកំពូល និងថ្នាក់ដឹកនាំជាន់ខ្ពស់នានានៃរាជរដ្ឋាភិបាល ការចូលរួមពីសំណាក់ប្រទេសជាមិត្តនិងដៃគូអភិវឌ្ឍន៍នានា កិច្ចសហការរៀបចំព្រឹត្តិការណ៍អម ការចូលរួមដាក់តាំងពិព័រណ៍ និងការចូលរួមទស្សនាពីសាធារណជនយ៉ាងច្រើនកុះករនេះ បានញ៉ាំងឱ្យវេទិការដ្ឋាភិបាលឌីជីថលឆ្នាំ២០២៥ នេះ កាន់តែមានភាពអធិកអធម និងទទួលបានជោគជ័យ លើសពីការគ្រោងទុក ហើយបានក្លាយទៅជាព្រឹត្តិការណ៍ឌីជីថលដ៏ធំនៅកម្ពុជា មុនដំណាច់ឆ្នាំ២០២៥ នេះ។ ភាពជោគជ័យនេះ បានបង្ហាញជាក់ច្បាស់ថា កម្ពុជាកំពុងបោះជំហានយ៉ាងស្វាហាប់នៅលើវិថីមួយដ៏ត្រឹមត្រូវឆ្ពោះទៅរកដំណើរការបរិវត្តកម្មឌីជីថល ស្របតាមក្របខណ្ឌគោលនយោបាយ សំដៅសម្រេចបានចក្ខុវិស័យកម្ពុជាឆ្នាំ២០៥០ ក្រោមការដឹកនាំប្រកបដោយគតិបណ្ឌិតដ៏ឈ្លាសវៃរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។

អាស្រ័យហេតុនេះ សូមសាធារណជនទាំងអស់ជ្រាបជាព័ត៌មាន។

Press Release On the Outcomes of the Digital Government Forum 2025, Digital Technology Expo, and Related National–International Events

The Ministry of Post and Telecommunications and the Digital Government Committee would like to inform the public that the Digital Government Forum 2025, Digital Technology Expo, and Related National and International Events—held under the theme “Accelerating Digital Future: Governance, Growth, and Global Partnerships”—were organized over three days, from 5 to 7 December 2025, at the Diamond Island Convention and Exhibition Center. The events drew significant participation from ASEAN and Asia-Pacific digital ministers, ambassadors, United Nations agencies, national and international organizations, development partners, government ministries and institutions, digital technology companies, digital startups, educational institutions, and many other stakeholders, as well as national and international visitors, bringing together nearly 20,000 participants, almost double the number from last year.

Over the course of three days, the Digital Government Forum 2025, Digital Technology Expo, and Related National and International Events were organized into two main sections, as follows:
Part I: High-level discussions and keynote presentations from ministers, under secretaries, and senior officials responsible for digital affairs, as well as national and international speakers from government ministries and institutions, development partners, and both national and international digital technology companies to showcase the progress of digital government transformation and the implementation of digital policies, efforts to foster regional cooperation, and the sharing of best practices in digital governance, cybersecurity, artificial intelligence, digital inclusion, and emerging technologies. Particularly, this year’s forum also included six major national and international side events held concurrently. Altogether, nearly 200 national and international speakers from around 30 countries participated.
Part II: Digital Technology Expo showcased digital achievements from ministries and public institutions, as well as digital innovations from national and international tech companies, higher-education institutions, and digital startups. Exhibits included digital government products, systems, solutions, and cutting-edge digital technology tools such as cloud technology, artificial intelligence (AI), the Internet of Things (IoT), and robotics—totaling 209 exhibition booths.

Key Highlights of the Digital Government Forum 2025 include:
1. Signing Ceremonies of 7 Memoranda of Understanding with friendly nations and development partners in the digital sector—demonstrating that Cambodia has evolved from being merely a technology user into an active contributor to digital transformation and technology transfer at the ASEAN and broader Asia-Pacific levels.
2. Official announcement on the launch of the 5G mobile service operation starting in 2026, which will significantly boost Cambodia’s economic productivity—particularly in the industry and services sectors—and accelerate digital transformation across all sectors.
3. Remarkable progress of verify.gov.kh, the national document verification platform of Cambodia. Currently, the architecture of this platform is widely used in the Philippines, while Bangladesh has requested to adopt the Verify platform in their country as well. In addition, the Ministry of Post and Telecommunications is supporting the implementation of verify.gov.tl for Timor-Leste, beginning with the implementation on their driver’s license.
4. Cambodia’s first generation of DGSuperApp will be introduced in Cambodia’s digital transformation journey starting in 2026.
5. The presence of Plug and Play has significantly bolstered aspirations among tech innovators and youth interested in digital startups. Notably, following the Plug and Play’s selection of the first Cambodian digital startup, Bamnang Academy, for investment with the purpose of developing it into an international startup. This milestone clearly demonstrates that “Khmer can do it.” With Plug and Play’s experiences, the Ministry of Post and Telecommunications firmly believes that Bamnang Academy will soon establish its presence on the international market.
6. The Ministry of Post and Telecommunications reaffirms its commitment to rapidly and successfully developing the Digital Park to create more job opportunities and position Cambodia as a digital hub in the region.

The support from the supreme and senior leadership of the Royal Government, the participation from the friendly nations and development partners, the cooperation of organizing side events, and the active participation of exhibitors as well as the public contributed to making the Digital Government Forum 2025 a major success—exceeding expectations and becoming one of the largest digital events in Cambodia before the close of 2025. This success clearly demonstrates that Cambodia is moving confidently along the right path to the digital transformation journey, in alignment with national policy frameworks and the vision for Cambodia 2050, under the wise leadership of Samdech Moha Borvor Thipadei Hun Manet, Prime Minister of the Kingdom of Cambodia.

As outlined above, the general public is hereby informed accordingly.

វេទិការដ្ឋាភិបាលឌីជីថល ២០២៥៖ កិច្ចពិភាក្សាលើប្រធានបទទី១៩ ៖ ហេដ្ឋារចនាសម្ព័ន្ធសម្រាប់ការអភិវឌ្ឍ – បច្ចេកវិទ្យាក្លោដ (Cloud) ការភ្ជាប់បណ្តាញនិងមជ្ឈមណ្ឌលទិន្នន័យ
---
ហេដ្ឋារចនាសម្ព័ន្ធឌីជីថលដ៏រឹងមាំ មានសារៈសំខាន់ណាស់សម្រាប់ឱ្យកម្ពុជា ឈានទៅរកសេដ្ឋកិច្ចឌីជីថលដែលមានភាពប្រកួតប្រជែង និងមានបរិយាបន្ន។ កិច្ចពិភាក្សានេះ បានពិភាក្សាអំពីតួនាទីយុទ្ធសាស្ត្ររបស់បច្ចេកវិទ្យាក្លោដ បណ្តាញតភ្ជាប់ល្បឿនលឿន និងមជ្ឈមណ្ឌលទិន្នន័យដែលមានសុវត្ថិភាព ក្នុងការគាំទ្រនវានុវត្តន៍ និងកាត់បន្ថយគម្លាតឌីជីថល។ អ្នកជំនាញនឹងពិភាក្សាអំពីគោលនយោបាយហេដ្ឋារចនាសម្ព័ន្ធ យុទ្ធសាស្ត្រវិនិយោគ និងកិច្ចសហការថ្នាក់តំបន់ ដើម្បីធានាឱ្យមានការចូលប្រើប្រាស់ដោយមានសមធម៌ និងភាពរឹងមាំ។ ក្នុងវគ្គពិភាក្សាចុងក្រោយនៃវេទិការដ្ឋាភិបាលឌីជីថលឆ្នាំ២០២៥ បានគូសបញ្ជាក់អំពីរបៀបដែលហេដ្ឋារចនាសម្ព័ន្ធជំនាន់ក្រោយអាចជំរុញការអភិវឌ្ឍប្រកបដោយនិរន្តរភាព និងធ្វើឱ្យកម្ពុជាក្លាយជាអ្នកដឹកនាំឌីជីថលក្នុងតំបន់។

កិច្ចពិភាក្សាចុងក្រោយនេះ សម្របសម្រួលដោយ លោក ម៉ុក ខេមរា ប្រធាននាយកដ្ឋានរដ្ឋាភិបាលអេឡិចត្រូនិកនៃអគ្គនាយកដ្ឋានបច្ចេកវិទ្យាគមនាគមន៍និងព័ត៌មាន ក្រសួងប្រៃសណីយ៍និងទូរគមនាគមន៍ ព្រមទាំងមានការអញ្ជើញចូលរួមពីវាគ្មិន៖

- ឯកឧត្តម ជា សេរីវឌ្ឍ អគ្គលេខាធិការ នៃអគ្គលេខាធិការដ្ឋានគណៈកម្មាធិការរដ្ឋាភិបាលឌីជីថល
- ឯកឧត្ដមបណ្ឌិត សំ សិទ្ធិសេរី អគ្គនាយកនៃអគ្គនាយកដ្ឋានបច្ចេកវិទ្យាគមនាគមន៍ និងព័ត៌មាន ក្រសួងប្រៃសណីយ៍និងទូរគមនាគមន៍
- លោក ទេព ប៊ុនបូរេន ប្រធាននាយកដ្ឋាននិយ័តកម្មទូរគមនាគមន៍ នៃនិយ័តករទូរគមនាគមន៍កម្ពុជា
- លោក Victor Zhang នាយកផ្នែកនិម្មាបនកម្មដំណោះស្រាយ, នាយកដ្ឋាន Hybrid Cloud និង KP, ក្រុមហ៊ុន Alibaba Cloud
- លោក Bob Lim នាយកប្រតិបត្តិ (CEO) ក្រុមហ៊ុន ByteDC

រាជធានីភ្នំពេញ | រសៀលថ្ងៃទី៧ ធ្នូ ២០២៥

វេទិការដ្ឋាភិបាលឌីជីថល ២០២៥៖ បទបង្ហាញលើប្រធានបទទី១៨ ស្តីពី "ការសិក្សាផែនទីបង្ហាញផ្លូវរយៈពេល ៥ ឆ្នាំនៃការចាប់ផ្តើមឌីជីថលរបស់កម្ពុជានិងអនុសាសាន៍"
---
ប្រធានបទនេះ បានបង្ហាញនូវទិដ្ឋភាពទូទៅសង្ខេបនៃផែនទីបង្ហាញផ្លូវរយៈពេល ៥ ឆ្នាំរបស់កម្ពុជា ដើម្បីកសាងប្រព័ន្ធអេកូស៊ីស្ទែមនវានុវត្តន៍ដ៏រស់រវើក មានភាពធន់ និងតភ្ជាប់ជាមួយពិភពលោក។ វាបញ្ជាក់ពីបំណងប្រាថ្នាយុទ្ធសាស្ត្ររបស់ជាតិ ទេសភាពនវានុវត្តន៍បច្ចុប្បន្ន និងបញ្ហាប្រឈមសំខាន់ៗ រួមទាំងគម្លាតទេពកោសល្យ ការខ្វះខាតថវិកាដំណាក់កាលដំបូង និងតម្រូវការសម្រាប់ប្រព័ន្ធបទប្បញ្ញត្តិ និងការគាំទ្រកាន់តែរឹងមាំ។

វគ្គនេះក៏គូសបញ្ជាក់អំពីវិធីសាស្ត្របីដំណាក់កាលនៃផែនទីបង្ហាញផ្លូវ៖ ការបង្កើតរចនាសម្ព័ន្ធមូលដ្ឋាន ការពង្រឹងកម្មវិធីទេពកោសល្យ និងប្រព័ន្ធអេកូស៊ីស្ទែម និងជំរុញកំណើនរយៈពេលវែងតាមរយៈការណែនាំ ការស្រាវជ្រាវ និងអភិវឌ្ឍន៍ និងការពង្រីកអន្តរជាតិ។ វានឹងណែនាំផងដែរនូវវិស័យនវានុវត្តន៍អាទិភាពដូចជា FinTech, GreenTech, AgriTech, HealthTech និង EdTech ដោយសង្កត់ធ្ងន់លើរបៀបដែលវិស័យទាំងនេះស្របតាមគោលដៅអភិវឌ្ឍន៍ជាតិកម្ពុជា។

បទបង្ហាញនេះមានការអញ្ជើញចូលរួមដោយ ឯកឧត្តម សូ វិសុទ្ធី រដ្ឋលេខាធិការក្រសួងប្រៃសណីយ៍និងទូរគមនាគមន៍ ព្រមទាំងមានការធ្វើបទបង្ហាញដោយ៖
- លោក Jupe Tan នាយកគ្រប់គ្រង Plug and Play APAC
- លោក Johannes Rott អនុប្រធាន ក្រុមហ៊ុន Plug and Play US

រាជធានីភ្នំពេញ | រសៀលថ្ងៃទី៧ ធ្នូ ២០២៥

វេទិការដ្ឋាភិបាលឌីជីថល ២០២៥៖ កិច្ចពិភាក្សាលើប្រធានបទទី១៧ ស្តីពី កម្មវិធី “Plug and Play Innovate Cambodia Accelerator Program” ការបង្ហាញគម្រោងពីធុរកិច្ចថ្មី
---
ដោយសហការជាមួយក្រសួងប្រៃសណីយ៍និងទូរគមនាគមន៍ និងមជ្ឈមណ្ឌលបច្ចេកវិទ្យា AUPP កម្មវិធី Plug and Play Cambodia មានមោទនភាពក្នុងការបង្ហាញធុរកិច្ចថ្មី ចំនួន ១0 ជំនាន់ដំបូងបង្អស់ ដែលកំពុងជំរុញបរិវត្តកម្មឌីជីថលរបស់កម្ពុជា។ ធុរកិច្ចថ្មីទាំងនេះ នឹងបង្ហាញដំណោះស្រាយបច្ចេកវិទ្យាឈានមុខគេ និងគម្រោងអាជីវកម្មដែលអាចពង្រីកបានដែលឆ្លើយតបទៅនឹងបញ្ហាប្រឈមពិតប្រាកដក្នុងវិស័យផ្សេងៗ។

វគ្គនេះ ជាចំណុចដ៏សំខាន់មួយនៅក្នុងដំណើរនវានុវត្តន៍របស់កម្ពុជា ដោយភ្ជាប់អ្នកស្ថាបនិកក្នុងស្រុកទៅកាន់អ្នកវិនិយោគអន្តរជាតិ ក្រុមហ៊ុន និងគ្រូបង្វិក តាមរយៈបណ្តាញអន្តរជាតិនៃកម្មវិធី Plug and Play។ តាមរយៈការភ្ជាប់នវានុវត្តន៍កម្ពុជាទៅនឹងឱកាសសកលលោក កម្មវិធីនេះមានបំណងលើកកម្ពស់កំណើន ធុរកិច្ចថ្មី ទាក់ទាញវិនិយោគអន្តរជាតិ និងជាចំណែកមួយដែលធ្វើឱ្យកម្ពុជាក្លាយជាមជ្ឈមណ្ឌលដែលកំពុងរីកចម្រើនសម្រាប់សហគ្រិនឌីជីថលក្នុងតំបន់អាស៊ាន។

ជាមួយគ្នានេះ ក៏មានការធ្វើបទបង្ហាញដោយ លោក Jupe Tan នាយកគ្រប់គ្រង Plug and Play APAC និងលោក Jie Lun អ្នកគ្រប់គ្រងការបណ្តាក់ទុន APAC អំពីការធ្វើបច្ចប្បន្នភាពអំពីកម្មវិធី Plug and Play Cambodia។

បន្ថែមលើនេះ កិច្ចពិភាក្សានេះ ក៏មានការសម្របសម្រួលដោយ លោក Manveer Sandhu អ្នកគ្រប់គ្រងកម្មវិធី Plug and Play US ព្រមទាំងមានការអញ្ជើញពីវាគ្មិនធ្វើបទបង្ហាញដោយ ៖

- កញ្ញា សេង រ័ត្នសេដ្ឋាមុនី ស្ថាបនិក Bamnang Academy
- លោក ជា ឡង់ដា ស្ថាបនិកនិងជានាយកប្រតិបត្ត CheckinMe
- លោក ឡី កំថូង ស្ថាបនិក CheckinMe
- លោក Niraj Gupta ស្ថាបនិក Finluy
- កញ្ញា នាក់ សុខគីម សហស្ថាបនិក KonektAgri
- លោក សូ សេដ្ឋី ស្ថាបនិក Jalat Logistics
- លោក ស៊ុំ សុផា ស្ថាបនិក Jobify
- លោក ជា វីរៈ ស្ថាបនិក Pilltech
- លោក សារិន សិរីវុឌ្ឍិ នាយកផ្នែកទីផ្សារក្រុមហ៊ុន និងសហស្ថាបនិក ក្រុមហ៊ុន ភ័ញ ធើ
- លោក សុខ លាប ស្ថាបនិក Salatech

រាជធានីភ្នំពេញ | រសៀលថ្ងៃទី៧ ធ្នូ ២០២៥

ឯកឧត្តមរដ្ឋមន្ត្រី ជា វ៉ាន់ដេត បានអញ្ជើញជាអធិបតីដ៏ខ្ពង់ខ្ពស់ក្នុងពិធីបិទ វេទិការដ្ឋាភិបាលឌីជីថលឆ្នាំ២០២៥ ពិព័រណ៍បច្ចេកវិទ្យាឌីជីថល និងព្រឹត្តិការជាតិ-អន្តរជាតិពាក់ព័ន្ធ
---
រាជធានីភ្នំពេញ៖ នៅរសៀលថ្ងៃទី៧ ខែធ្នូ ឆ្នាំ២០២៥ ឯកឧត្តម ជា វ៉ាន់ដេត រដ្ឋមន្ត្រីក្រសួងប្រៃសណីយ៍និងទូរគមនាគមន៍ បានអញ្ជើញជាអធិបតីភាពដ៏ខ្ពង់ខ្ពស់ក្នុងពិធីបិទ វេទិការដ្ឋាភិបាលឌីជីថល ពិព័រណ៍បច្ចេកវិទ្យាឌីជីថល និងព្រឹត្តិការជាតិ-អន្តរជាតិពាក់ព័ន្ធ ក្រោមប្រធានបទ «ការពន្លឿនអនាគតឌីជីថល៖ អភិបាលកិច្ច កំណើន និងភាពជាដៃគូសកល» ដែលបានប្រព្រឹត្តទៅអស់រយៈពេល៣ថ្ងៃ ចាប់ពីថ្ងៃទី៥ ដល់ថ្ងៃទី៧ ខែធ្នូ ឆ្នាំ២០២៥ នៅមជ្ឈមណ្ឌលសន្និបាត និងពិព័រណ៍កោះពេជ្រ។

ថ្លែងក្នុងឱកាសនេះ ឯកឧត្តមរដ្ឋមន្ត្រី ជា វ៉ាន់ដេត បានមានប្រសាសន៍ថា វេទិការដ្ឋាភិបាលឌីជីថលឆ្នាំ២០២៥ និងព្រឹត្តិការណ៍ជាតិ-អន្តរជាតិពាក់ព័ន្ធ ដែលប្រព្រឹត្តទៅក្នុងរយៈពេល ៣ ថ្ងៃនេះ បានផ្តល់ឱកាសជូនដល់អ្នកចូលរួមទាំងអស់ដែលអញ្ជើញមកពីក្រសួង ស្ថាប័ន វិស័យឯកជន គ្រឹះស្ថានឧត្ដមសិក្សា ដៃគូពាក់ព័ន្ធ និងសាធារណជនទូទៅ ទាំងជាតិនិងអន្តរជាតិ អាចចូលរួមស្វែងយល់អំពីការវិវឌ្ឍន៍ថ្មីៗនៃបច្ចេកវិទ្យាឌីជីថល ការស្រាវជ្រាវនិងនវានុវត្តន៍ឌីជីថល តាមរយៈការចូលរួមស្តាប់កិច្ចពិភាក្សាផ្លាស់ប្ដូរយោបល់ស៊ីជម្រៅ ប្រកបដោយស្មារតីបើកចំហ រវាងថ្នាក់ដឹកនាំទទួលបន្ទុកវិស័យនេះមកពីបណ្តាប្រទេសនិងដៃគូអភិវឌ្ឍន៍នានា វាគ្មិនជាមន្ត្រីជាន់ខ្ពស់ អ្នកជំនាញបច្ចេកទេស និងអ្នករៀបចំគោលនយោបាយមកពីស្ថាប័នជាតិនិងអន្តរជាតិជាច្រើន និងការធ្វើបទបង្ហាញនានា ដោយវាគ្មិនជាតិ និងអន្តរជាតិជាច្រើននាក់។ ឯកឧត្តមរដ្ឋមន្ត្រី បានបន្ថែមថា លទ្ធផលនៃកិច្ចពិភាក្សាទាំងនេះនឹងជួយតម្រង់ទិសលើដំណើរបរិវត្តកម្មឌីជីថលនៅកម្ពុជា ឱ្យកាន់តែលឿន ច្បាស់លាស់ និងមានលទ្ធផលប្រកបដោយផ្លែផ្កាស្របតាមការរំពឹងទុក ហើយអាចឆ្លើយតបទៅនឹងកំណើននៃតម្រូវការប្រើប្រាស់ប្រព័ន្ធឌីជីថលរបស់ប្រជាពលរដ្ឋ។

ជាមួយគ្នានេះ ឯកឧត្តមរដ្ឋមន្ត្រី បានបញ្ជាក់ថា អ្វីដែលពិសេសសម្រាប់វេទិកាឆ្នាំ២០២៥ នេះ គឺ៖
១. ការចុះហត្ថលេខាលើកអនុស្សរណៈយោគយល់ចំនួន ៧ជាមួយប្រទេសជាមិត្តនិងដៃគូពាក់ព័ន្ធ ក្នុងវិស័យឌីជីថល បង្ហាញអំពីតួនាទីសំខាន់របស់កម្ពុជាក្នុងតំបន់ ។
២. ការប្រកាសដាក់ឱ្យដំណើរការជាផ្លូវនៃសេវាទូរសព្ទចល័ត 5G ចាប់ពីឆ្នាំ២០២៦ តទៅ ហើយបន្ទាប់ពីនោះ គឺប្រតិបត្តិករទូរសព្ទចល័តធំៗទាំង ៣ ដែលមានវត្តមានក្នុងពិព័រណ៍ ក៏បាននាំយកឧបករណ៍តេស្តសាកល្បងសម្រាប់សាធារណជនទូទៅ អាចបានឃើញអំពីចំណុះសមត្ថភាពរបស់សេវា 5G នេះដែរ។ ខ្ញុំសង្ឃឹមជឿជាក់យ៉ាងមុតមាំថា សេវា 5G នឹងជួយបង្កើនផលិតភាពសេដ្ឋកិច្ចរបស់កម្ពុជាក្នុងកម្រិតខ្ពស់ ជាពិសេស ក្នុងវិស័យឧស្សាហកម្ម សិប្បកម្ម និងសេវាកម្ម ព្រមទាំងជួយជំរុញល្បឿននៃដំណើរការបរិវត្តកម្មឌីជីថលនៅក្នុងគ្រប់វិស័យទាំងអស់។
៣. ឯកឧត្តម David L. Almirol Jr. អនុរដ្ឋមន្ត្រីក្រសួងបច្ចេកវិទ្យាគមនាគមន៍និងព័ត៌មានហ្វីលីពីន បានលើកឡើងថា ហ្វីលីពីនបានដាក់ឱ្យប្រើនិម្មាបនកម្មរបស់ថ្នាល verify លើអត្តសញ្ញាណឌីជីថល ជូនប្រជាជនជាង ៩០ លាននាក់ និងមានប្រតិបត្តិការជាង ១៧២ លានដង ក្នុងរយៈពេលដ៏ខ្លី ហើយនឹងត្រៀមដាក់នៅលើបណ្ណបើកបរនៅក្នុងឆ្នាំ២០២៦។
៤.ក្រសួងប្រៃសណីយ៍និងទូរគមនាគមន៍កម្ពុជា បានជួយរៀបចំដាក់ឱ្យប្រើថ្នាល verify ជាជំហានដំបូង នៅលើបណ្ណបើកបររបស់ប្រទេសទីម័រឡេស្តេ។
៥. ប្រទេសបង់ក្លាដេស បានស្នើសុំប្រើប្រាស់ថ្នាល verify នៅក្នុងប្រទេសរបស់ខ្លួន ដែលមានប្រជាជនសរុបប្រមាណ ១៧៤ លាននាក់។
៦. ថ្នាល DG SuperApp របស់កម្ពុជា នឹងមានវត្តមានក្នុងដំណើរការបរិវត្តកម្មឌីជីថលក្នុងឆ្នាំ២០២៦។
៧. វត្តមានរបស់ក្រុមហ៊ុន Plug and Play បានធ្វើឱ្យក្តីសង្ឃឹមរបស់អ្នកបច្ចេកវិទ្យា និងយុវជនដែលចាប់អារម្មណ៍លើធុរកិច្ចថ្មីឌីជីថល មានការកើនឡើងខ្ពស់ ក្រោយការប្រកាសអំពីបំណងនៃការវិនិយោគលើ Bamnang Academy ដែលជាធុរកិច្ចថ្មីឌីជីថលរបស់យុវជនខ្មែរ។ នេះបញ្ជាក់ថា “ខ្មែរអាចធ្វើបាន”។ ខ្ញុំសង្ឃឹមថា ជាមួយបទពិសោធរបស់ក្រុមហ៊ុន Plug and Play, Bamnang Academy នឹងមានវត្តមាននៅលើទីផ្សារអន្តរជាតិ ក្នុងពេលឆាប់ៗខាងមុខ។
៨. សួនឌីជីថល (Digital Park) នឹងជំរុញឱ្យមានកំណើនការងារ ប្រែក្លាយកម្ពុជាទៅជាមជ្ឈមណ្ឌលបច្ចេកវិទ្យាឌីជីថល (Digital Hub) មួយក្នុងតំបន់។ ក្រសួងប្តេជ្ញានឹងបន្តជំរុញការអភិវឌ្ឍសួនឌីជីថល ឱ្យបានជោគជ័យ។

មុននឹងបញ្ចប់ ឯកឧត្តមរដ្ឋមន្ត្រី បានថ្លែងអំណរគុណដល់ក្រុមហ៊ុន BYTEDC ក្រុមហ៊ុន CamGSM ក្រុមហ៊ុន HUAWEI Cambodia ក្រុមហ៊ុន MekongNet ក្រុមហ៊ុន Viettel (Cambodia) ក្រុមហ៊ុន Smart Axiata ក្រុមហ៊ុន Online និងក្រុមហ៊ុនដៃគូមួយចំនួនទៀត ដែលបានចូលរួមឧបត្ថម្ភក្នុងវេទិការដ្ឋាភិបាលឌីជីថលឆ្នាំ២០២៥ នេះ ព្រមទាំងបានកោតសរសើរនិងវាយតម្លៃខ្ពស់ចំពោះថ្នាក់ដឹកនាំនិងមន្ត្រីពាក់ព័ន្ធនៃក្រសួងប្រៃសណីយ៍និងទូរគមនាគមន៍ និងអគ្គលេខាធិការដ្ឋានគណៈកម្មាធិការរដ្ឋាភិបាលឌីជីថល ដែលបានខិតខំរៀបចំវេទិការរដ្ឋាភិបាលឌីជីថល ឱ្យប្រព្រឹត្តទៅនិងបញ្ចប់ដោយជោគជ័យគួរជាទីមោទនៈ។

វេទិការដ្ឋាភិបាលឌីជីថល ២០២៥៖ កិច្ចពិភាក្សាលើប្រធានបទទី១៦ ការទាញយកសក្ដានុពលពីនវានុវត្តន៍ហិរញ្ញវត្ថុ - ការកសាងប្រព័ន្ធអេកូឡូស៊ី នៃការទូទាត់លើប្រព័ន្ធឌីជីថលប្រកបដោយទំនុកចិត្ត
---
កិច្ចពិភាក្សាមួយនេះបង្ហាញឱ្យឃើញអំពីសក្តានុពលនៃការវិវត្តន៍នៃបច្ចេកវិទ្យាទូទាត់ឌីជីថលក្នុងការកែលម្អប្រព័ន្ធហិរញ្ញវត្ថុ។ វាគ្មិននាំគ្នាពិភាក្សាទៅលើក្របខណ្ឌច្បាប់និងបទប្បញ្ញត្តិ សុវត្ថិភាពប្រព័ន្ធទូទាត់ឆ្លងដែន និងយន្តការបង្កើតទំនុកចិត្ត ដែលចាំបាច់សម្រាប់ប្រព័ន្ធអេកូឡូស៊ីទូទាត់តាមប្រព័ន្ធឌីជីថលដ៏រឹងមាំដោយផ្តោតសំខាន់លើកិច្ចសហការរវាងក្រុមហ៊ុនបច្ចេកវិទ្យាហរិញ្ញវត្ថុ ធនាគារ និងភាគីពាក់ព័ន្ធផ្សេងៗ ដើម្បីទាញយកកាលានុវត្តភាពពីនវានុវត្តន៍ហិរញ្ញវត្ថុ លើកកម្ពស់បរិយាបន្ន និងគាំទ្រកំណើនសេដ្ឋកិច្ចឱ្យមាននិរន្តរភាពនៅកម្ពុជា និងតាមតំបន់។

កិច្ចពិភាក្សានេះ សម្របសម្រួលដោយ លោក Remi Pell ប្រធានសមាគមន៍ FinTech (CAFT) ព្រមទាំងមានការអញ្ជើញចូលរួមពីវាគ្មិន៖
- លោកជំទាវ ផល ម៉ារីណា អគ្គលេខាធិការរង អគ្គលេខាធិការដ្ឋាននៃគណៈកម្មាធិការសេដ្ឋកិច្ច និងធុរកិច្ចឌីជីថល
- លោក Takeshi Kito សហស្ថាបនិក និងនាយកប្រតិបត្តិ Global Finance & Technology Network (GFTN) ប្រទេសជប៉ុន
- លោកស្រី រឿន និមល តំណាងធនាគារជាតិនៃកម្ពុជា
- លោក Chhay Lin Lim ស្ថាបនិក និងនាយកប្រតិបត្តិ Monflo
- លោក Pitt Wei Zhe នាយកផ្នែកយុទ្ធសាស្ត្រអភិវឌ្ឍន៍និងកិច្ចការរដ្ឋាភិបាល ក្រុមហ៊ុន Alibaba Cloud International

រាជធានីភ្នំពេញ | ព្រឹកថ្ងៃទី៧ ធ្នូ ២០២៥

វេទិការដ្ឋាភិបាលឌីជីថល ២០២៥៖ កិច្ចពិភាក្សាលើប្រធានបទទី១៥ ការភ្ជាប់ប្រព័ន្ធអេកូឡូស៊ីនវានុវត្តន៍ឌីជីថល – ពីសួនឌីជីថល និងការវិនិយោគទៅដល់ការរីកចម្រើននៃធុរកិច្ចថ្មីក្នុងតំបន់
---
កិច្ចពិភាក្សានេះ បានពិភាក្សាអំពីហេដ្ឋារចនាសម្ព័ន្ធ និងយុទ្ធសាស្ត្រស្នូលដែលចាំបាច់ដើម្បីតភ្ជាប់ប្រព័ន្ធអេកូឡូស៊ីនវានុវត្តន៍ទូទាំងតំបន់អាស៊ី ដោយយកចិត្តទុកដាក់សំខាន់លើការអភិវឌ្ឍសួនឧទ្យានឌីជីថល និងមជ្ឈមណ្ឌលបណ្ដុះគំនិតដែលជាកម្លាំងចលករនៃការលូតលាស់។ វាគ្មិនបានជជែកពិភាក្សាអំពីរបៀបដែលមជ្ឈមណ្ឌលទាំងនេះអាចជំរុញនវានុវត្តន៍ក្នុងស្រុក ទាក់ទាញវិនិយោគទុនបរទេស និងបណ្ដុះបណ្ដាលជំនាញថ្មីៗ ព្រមទាំងគូសបង្ហាញគន្លឹះយុទ្ធសាស្ត្រសម្រាប់ធុរកិច្ចថ្មីក្នុងការពង្រីកខ្លួនទៅកាន់ទីផ្សារតំបន់ និងពិភាក្សាអំពីឥទ្ធិពលនៃការតភ្ជាប់ប្រព័ន្ធអេកូឡូស៊ីប្រកបដោយយុទ្ធសាស្ត្រដែលអាចបង្កើនល្បឿននៃការអភិវឌ្ឍដោយនិរន្តរភាព និងជំរុញភាពរីកចម្រើនក្នុងតំបន់។

កិច្ចពិភាក្សានេះ សម្របសម្រួលដោយ លោកស្រី Melanie Mossard, Chief Impact Officer Impact Hub Phnom Penh ព្រមទាំងមានការអញ្ជើញចូលរួមពីវាគ្មិន៖
- ឯកឧត្តម ហាក់ សុខហេង អនុរដ្ឋលេខាធិការក្រសួងប្រៃសណីយ៍និងទូរគមនាគមន៍
- ឯកឧត្តមបណ្ឌិត តាំង ងួនលី នាយកប្រតិបត្តិមជ្ឈមណ្ឌលបណ្តុះធុរកិច្ចថ្មី “តេជោ”
- លោក Ryusuke Komura អគ្គនាយក Venture Cafe Tokyo
- លោក Tea Thierry អនុប្រធាន ក្រុមហ៊ុន OCIC
- លោក Jan Hanken ស្ថាបនិក godeap.ai និងជាដៃគូស្ថាបនិកនៃ ARC Accelerator នៅភ្នំពេញ

រាជធានីភ្នំពេញ | ព្រឹកថ្ងៃទី៧ ធ្នូ ២០២៥

ឯកឧត្តមរដ្ឋលេខាធិការ សូ វិសុទ្ធី បានអញ្ជើញជាអធិបតីប្រកាសជាផ្លូវការ នៃការដាក់ឱ្យដំណើរការថ្នាលភ្ជាប់ធុរកិច្ចថ្មីអាស៊ាន (ASEAN STARTUP CONNECT)
---
រាជធានីភ្នំពេញ៖ នៅព្រឹកថ្ងៃទី៧ ខែធ្នូ ឆ្នាំ២០២៥ ឯកឧត្តម សូ វិសុទ្ធី រដ្ឋលេខាធិការក្រសួងប្រៃសណីយ៍និងទូរគមនាគមន៍ បានអញ្ជើញអធិបតីប្រកាសជាផ្លូវការ នៃការដាក់ឱ្យដំណើរការថ្នាលភ្ជាប់ធុរកិច្ចថ្មីអាស៊ាន (ASEAN STARTUP CONNECT) ក្នុងអំឡុងពេលនៃ វេទិការដ្ឋាភិបាលឌីជីថល ពិព័រណ៍បច្ចេកវិទ្យាឌីជីថល និងព្រឹត្តិការជាតិ-អន្តរជាតិពាក់ព័ន្ធ។ តាមរយៈការប្រកាសការដាក់ឱ្យប្រើប្រាស់ជាផ្លូវការប្រព័ន្ធថ្មីដែលមានប្រសិទ្ធភាពខ្ពស់ និងត្រូវបានរៀបចំឡើងដើម្បីផ្ដល់ជូនស្ថាបនិកនូវបណ្ដាញទំនាក់ទំនង និងក្របខណ្ឌដែលចាំបាច់ដើម្បីឆ្ពោះទៅពង្រីកអាជីវកម្មលើឆាកអន្តរជាតិ។ គំនិតផ្ដួចផ្ដើមនេះត្រូវបានគាំទ្រដោយមូលនិធិសមាហរណកម្មអាស៊ាន-ជប៉ុន (Japanese ASEAN Integration Fund)។

ជាមួយគ្នានេះ ក៏មានការធ្វើបទបង្ហាញ ស្តីពី ការលើកកម្ពស់ប្រព័ន្ធអេកូឡូស៊ីនៃធុរកិច្ចថ្មីអាស៊ាន ដោយ លោក Masato Yonai លេខាធិការទីពីរ នៃស្ថានទូតជប៉ុនប្រចាំអាស៊ាន និង លោក G – Galeno Chua នាយកកម្មវិធី ASEAN Startup Connect ដែលបានបង្ហាញពី តើអ្វីទៅជាភាពខុសប្លែករវាង អាជីវកម្មដែលអាចពង្រីកខ្លួនទៅទូទាំងអាស៊ាន ពីអាជីវកម្មដែលបរាជ័យ? បន្ថែមលើនេះ ក៏មានបង្ហាញពីលទ្ធផលស្រាវជ្រាវដ៏សំខាន់នៅឆ្នាំ២០២៥ ស្ដីពីការពង្រីកខ្លួនទៅឆ្លងប្រទេស និងឌីជីថលលូបនីយកម្ម ផងដែរ។