ក្រសួងការងារ និងបណ្តុះបណ្តាលវិជ្ជាជីវៈ

អបអរសាទរទិវាពិភពលោកគ្មានថ្នាំជក់ លើកទី៣៩ ក្រោមប្រធានបទ " ការលាតត្រដាងពីល្បិចកលទាក់ទាញ៖ ការប្រឆាំងនឹងការញៀននីកូទីន និងថ្នាំជក់ "

៣១ ឧសភា ១៩៨៧ - ៣១ ឧសភា ២០២៦

ឯកឧត្តមរដ្ឋមន្ត្រី ហេង សួរ អញ្ជើញចុះសួរសុខទុក្ខបងប្អូនកម្មករនិយោជិត និងផ្តល់នូវកិច្ចសហការបន្ថែមទៀតជាមួយក្រុមហ៊ុន THACO AGRI នៅតំបន់ពហុកសិកម្មក្នុងស្រុកស្នួល ខេត្តក្រចេះ ដើម្បីឆ្លើយតបនឹងតម្រូវការកម្លាំងពលកម្ម និងបណ្តុះបណ្តាលជំនាញ

(ក្រចេះ)៖ ឯកឧត្តម ហេង សួរ រដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈ បានអញ្ជើញចុះជួបសំណេះសំណាលជាមួយបងប្អូនកម្មករនិយោជិត និងពិនិត្យមើលជាក់ស្តែងនូវខ្សែច្រវាក់ផលិតកម្មរបស់ក្រុមហ៊ុន THACO AGRI នៅតំបន់ពហុកសិកម្មស្នួល ស្ថិតក្នុងឃុំឃ្សឹម ស្រុកស្នួល ខេត្តក្រចេះ នាព្រឹកថ្ងៃសៅរ៍ ទី៣០ ខែឧសភា ឆ្នាំ២០២៦ ដោយមានការអញ្ជើញចូលរួមពីសំណាក់ថ្នាក់ដឹកនាំក្រសួង ថ្នាក់ដឹកនាំរដ្ឋបាលខេត្តក្រចេះ រដ្ឋបាលស្រុកស្នួល និងតំណាងក្រុមហ៊ុនជាច្រើនរូប ដើម្បីឈ្វេងយល់ និងពិនិត្យលទ្ធភាពក្នុងការផ្តល់ការគាំទ្រ ក៏ដូចជាកិច្ចសហការបន្ថែម សំដៅឆ្លើយតបនឹងសំណូមពរ និងតម្រូវការរបស់ក្រុមហ៊ុន និងកម្មករនិយោជិត។

ឯកឧត្តមរដ្ឋមន្ត្រីបានវាយតម្លៃខ្ពស់ចំពោះក្រុមហ៊ុន ថាកូ អាហ្គ្រី (THACO AGRI) ដែលបានបោះទុនវិនិយោគលើការដាំដុះដំណាំកសិកម្មលើផ្ទៃដីដ៏ធំ ដែលផ្តល់ឱកាសការងារដល់កម្មករនិយោជិតប្រមាណជាង ២ម៉ឺននាក់ ជាមួយនឹងលក្ខខណ្ឌការងារស្របតាមច្បាប់ស្តីពីការងារ និងរបបសន្តិសុខសង្គមជូនបងប្អូនកម្មករនិយោជិត។ ក្រុមហ៊ុនបានអនុវត្តលក្ខខណ្ឌការងារសម្រាប់វិស័យកសិកម្ម ផ្នែកការងារចម្ការបានយ៉ាងល្អ ដោយបានផ្តល់អាហារ ៣ពេល, កន្លែងស្នាក់នៅជាមួយនឹងអគ្គិសនីប្រើប្រាស់ប្រចាំថ្ងៃ និងទឹកស្អាតដោយឥតគិតថ្លៃ, មន្ទីរពេទ្យសម្រាប់ព្យាបាល និងពិនិត្យសុខភាពតាមកាលកំណត់, ការហ្វឹកហ្វឺន និងបណ្តុះបណ្តាលបុគ្គលិកថ្មី, ហាងលក់ទំនិញ និងសាលារៀន។ ក្រៅពីនេះ ក្រុមហ៊ុនក៏មានរៀបចំសកម្មភាពកម្សាន្ត និងពិធីផ្សេងៗ ដូចជា ពិធីមង្គលការ ពិធីខួបកំណើត ព្រឹត្តិការណ៍ និងសកម្មភាពវប្បធម៌ ព្រមទាំងការលេងកីឡាជាដើម។
ជាមួយនេះ ក្រុមហ៊ុនពិតជាមានបទពិសោធល្អៗផ្នែកកសិ-ឧស្សាហកម្មប្រកបដោយបច្ចេកទេសទំនើប ហើយកំពុងតែនាំយកមកអនុវត្ត និងចែករំលែក ដែលពិតជាមានសារៈសំខាន់ចំពោះកម្ពុជា ដែលធ្លាប់តែធ្វើកសិកម្មតាមបែបបុរាណ។ ជាយុទ្ធសាស្ត្ររយៈពេលវែង ក្រុមហ៊ុនបានផ្តោតលើ «ការអភិវឌ្ឍបុគ្គលិកមូលដ្ឋាន» ដើម្បីផ្ទេរបច្ចេកទេស និងអភិវឌ្ឍបុគ្គលិកគ្រប់គ្រងបន្តវេន។

ឆ្លើយតបនឹងសំណូមពររបស់ក្រុមហ៊ុនអំពីកង្វះកម្លាំងពលកម្ម ឯកឧត្តម ហេង សួរ បានណែនាំឱ្យបន្តកិច្ចសហការជាមួយទីភ្នាក់ងារជាតិមុខរបរ និងការងារ (NEA) ក្នុងការផ្សព្វផ្សាយជ្រើសរើសកម្មករតាមរយៈវេទិកាការងារ ជាពិសេសផ្តោតលើខេត្តត្បូងឃ្មុំ ដោយរំលេចពីប្រាក់ឈ្នួល និងអត្ថប្រយោជន៍ជាច្រើនដូចគ្នានឹងការងារនៅតាមរោងចក្រ សហគ្រាសផងដែរ។ ចំណែកឯការបណ្តុះបណ្តាលកម្លាំងពលកម្មជំនាញបន្ថែម ឯកឧត្តមបានណែនាំឱ្យអគ្គនាយកដ្ឋាន TVET, វិទ្យាស្ថាន, មន្ទីរការងារខេត្ត ផ្តល់កិច្ចសហការជាមួយក្រុមហ៊ុន ដោយបញ្ជូនគ្រូមកបណ្តុះបណ្តាលនៅសាលាឯក្រុមហ៊ុនដោយផ្ទាល់ ជាពិសេសការអនុវត្តកម្មវិធី TVET ១,៥លាននាក់ ដើម្បីផ្តល់ជំនាញជូនកម្មករនិយោជិតផ្ទាល់នៅទីនេះ។ ទន្ទឹមនឹងនេះ ក្រសួងក៏នឹងពិចារណាប្រសិនបើស្តង់ដាបណ្តុះបណ្តាលរបស់សាលានៅក្រុមហ៊ុនស្របតាមលក្ខណវិនិច្ឆ័យរបស់ក្រសួង នោះក្រសួងនឹងជួយចេញវិញ្ញាបនបត្របញ្ជាក់កម្រិតជូន។ ឯកឧត្តមក៏បានជំរុញឱ្យមានការអនុវត្តគំរូទទួលស្គាល់ជំនាញ និងការសិក្សាផ្អែកលើការងារ (WBL) នៅក្នុងក្រុមហ៊ុន។

ជាចុងក្រោយ ឯកឧត្តមរដ្ឋមន្ត្រី បានណែនាំឱ្យបេឡាជាតិសន្តិសុខសង្គម និងអគ្គនាយកដ្ឋានការងារ មន្ទីរការងារខេត្តក្រចេះ ត្រូវផ្តល់សេវាជូនក្រុមហ៊ុនតាមតម្រូវការជាក់ស្តែងឱ្យកាន់តែល្អប្រសើរថែមទៀត ដើម្បីបង្កលក្ខណៈងាយស្រួលដល់ក្រុមហ៊ុន ក៏ដូចជាបងប្អូនកម្មករនិយោជិតផងដែរ ក្នុងខណៈដែលក្រុមហ៊ុនកំពុងពង្រីកផែនការវិនិយោគ និងតម្រូវការកម្លាំងពលកម្មប្រមាណ ៧ពាន់នាក់ក្នុងឆ្នាំនេះ។

សូមបញ្ជាក់ថា ក្រុមហ៊ុន THACO AGRI បានចាប់ផ្តើមអនុវត្តយុទ្ធសាស្ត្រវិនិយោគដោយផ្អែកលើគោលការណ៍សរីរាង្គ និងមេត្រីភាពបរិស្ថានក្នុងទ្រង់ទ្រាយធំផ្នែកកសិ-ឧស្សាហកម្ម (ដើមកៅស៊ូ, ដំណាំហូបផ្លែ ជាពិសេសផ្លែចេក), សាងសង់រោងចក្រកែច្នៃ និងចិញ្ចឹមសត្វ កាលពីឆ្នាំ២០១៩ លើផ្ទៃដីអាជីវកម្មជាង ៩ម៉ឺនហិកតា នៅក្នុងប្រទេសកម្ពុជា វៀតណាម និងឡាវ ដែលក្នុងនោះ នៅកម្ពុជាមានផ្ទៃដីចំនួន ៤៣ ៧៦៤ ហិកតា រួមមាន៖ នៅស្រុកស្នួល ខេត្តក្រចេះ ចំនួន ១០ ៧០៨ ហិកតា និងស្រុកកូនមុំ ស្រុកលំផាត់ និងក្រុងបានលុង ខេត្តរតនគិរី ចំនួន ៣៣ ០៥៦ ហិកតា។ ក្រុមហ៊ុននាំចេញផលិតផលប្រកបដោយគុណភាពខ្ពស់តាមស្តង់ដាអន្តរជាតិទៅកាន់ប្រទេសជប៉ុន ចិន និងហុងកុង ជាដើម ជាមួយនឹងទស្សនវិស័យក្លាយជាក្រុមហ៊ុនកសិកម្មឈានមុខគេនៅអាស៊ីក្នុងឆ្នាំ២០២៧ ដោយពង្រីកទីផ្សារទៅកាន់ប្រទេសកូរ៉េ តំបន់មជ្ឈិមបូព៌ា និងអាស៊ីកណ្តាល៕

ក្រសួងការងារ បន្តនាំឱកាសការងារជាង ១ម៉ឺនកន្លែងដល់ពលរដ្ឋខេត្តពោធិ៍សាត់ រួមទាំងអត្ថប្រយោជន៍ ប.ស.ស. និងការបណ្តុះបណ្តាលជំនាញឥតគិតថ្លៃ

(ពោធិ៍សាត់)៖ នាព្រឹកថ្ងៃទី២៩ ខែឧសភា ឆ្នាំ២០២៦ ក្រសួងការងារនិងបណ្តុះបណ្តាលវិជ្ជាជីវៈ បានបន្តរៀបចំវេទិកាការងារក្រោមប្រធានបទ «ខ្មែរជួយរកការងារ និងផ្ដល់ការងារឱ្យខ្មែរ» ដែលមានការចូលរួមពីប្រជាពលរដ្ឋ អតីតពលករ និងយុវជនជិត ៨០០នាក់ នៅសាលាស្រុកក្រវាញ ខេត្តពោធិ៍សាត់ ក្រោមអធិបតីភាពរបស់ឯកឧត្តម ឡេង សែ រដ្ឋលេខាធិការ តំណាងដ៏ខ្ពង់ខ្ពស់របស់ ឯកឧត្តម ហេង សួរ រដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈ។

ក្នុងឱកាសនោះ ឯកឧត្តមរដ្ឋលេខាធិការបានជម្រាបជូនអង្គពិធីអំពីកិច្ចខិតខំប្រឹងប្រែងរបស់រាជរដ្ឋាភិបាលក្នុងការសម្របសម្រួលឱកាសការងារក្នុងស្រុកជាង ៩ម៉ឺនកន្លែង ដោយឡែកសម្រាប់ខេត្តពោធិ៍សាត់ផ្ទាល់គឺមានការនាំយកឱកាសការងារចំនួន ១០ ៧៣២ កន្លែង ពីបណ្តារោងចក្រ សហគ្រាស និងតំបន់សេដ្ឋកិច្ចពិសេសក្នុងខេត្ត។ ឯកឧត្តមបានគូសបញ្ជាក់ថា បងប្អូនដែលចុះឈ្មោះធ្វើការងារស្របច្បាប់នឹងទទួលបានអត្ថប្រយោជន៍ពី ប.ស.ស. ដូចមន្ត្រីរាជការ រួមមានរបបហានិភ័យការងារ របបថែទាំសុខភាព និងរបបសោធននិវត្តន៍ ដែលជួយសម្រួលដល់ជីវភាពបានយ៉ាងល្អ។

ទន្ទឹមនឹងនេះ ឯកឧត្តម ឡេង សែ បានក្រើនរំលឹកដល់ពលរដ្ឋឱ្យចៀសវាងការចាញ់បោកការងារនៅក្រៅប្រទេស ហើយប្រសិនបើមានបំណងទៅធ្វើការនៅប្រទេសកូរ៉េ ជប៉ុន និងអូស្ត្រាលីជាដើម សូមពិនិត្យបញ្ជីឈ្មោះក្រុមហ៊ុនស្របច្បាប់ជាមួយអាជ្ញាធរ។ សម្រាប់ព័ត៌មានបន្ថែម ពលរដ្ឋអាចទំនាក់ទំនងតាមរយៈលេខទូរស័ព្ទជំនួយរហ័ស ១២៩៧ សម្រាប់ផ្នែកផ្គូផ្គងការងារ និងលេខ ១២៨៦ សម្រាប់ផ្នែក ប.ស.ស.។

ក្រៅពីឱកាសការងារ ឯកឧត្តមបានលើកទឹកចិត្តយ៉ាងខ្លាំងក្លាដល់យុវជនឱ្យចាប់យកឱកាសចូលរៀនវគ្គបណ្តុះបណ្តាលជំនាញបច្ចេកទេស និងវិជ្ជាជីវៈ (TVET) នៅវិទ្យាស្ថានពហុបច្ចេកទេសខេត្តពោធិ៍សាត់ដោយឥតគិតថ្លៃ និងមានប្រាក់ឧបត្ថម្ភប្រចាំខែ ដើម្បីសម្រេចបាននូវគោលដៅយុទ្ធសាស្ត្រ «ពលរដ្ឋម្នាក់មានជំនាញមួយយ៉ាងតិចប្រចាំជីវិត»។ វគ្គបណ្តុះបណ្តាលទាំងនេះគ្របដណ្តប់លើជំនាញទីផ្សារជាច្រើនដូចជា ការជួសជុលគ្រឿងអគ្គិសនី សំណង់ សេវាកម្មកាហ្វេ និងផ្នែកសេវាកម្មផ្សេងៗទៀត ដែលនឹងធានាបាននូវការងារធ្វើ និងប្រាក់ឈ្នួលសមរម្យ។

សូមបញ្ជាក់ថា វេទិកាការងារដ៏មានសារៈសំខាន់នេះ ទទួលបានការសហការចូលរួមយ៉ាងពេញទំហឹងពីសំណាក់បណ្តារោងចក្រ សហគ្រាស គ្រឹះស្ថានមីក្រូហិរញ្ញវត្ថុ សមាគម និងតំបន់សេដ្ឋកិច្ចពិសេសធំៗ រួមទាំង រោងចក្រ វេនធូរ៉ា លេឌើវែរ អឹមអេហ្វវ៉ាយ, រោងចក្រ ញូ វ៉ាយ អឹភែរឹល, រោងចក្រ អខេធី, រោងចក្រ ស៊ិនគី អឹភឹរឹល, សិប្បកម្ម សាន ពៅ, រោងចក្រ មីនេបៀ, គ្រឹះស្ថានមីក្រូហិរញ្ញវត្ថុ អិលអូអិលស៊ី, តំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ (RGPPSEZ), តំបន់សេដ្ឋកិច្ចពិសេស ចេជាង គម្រោង២ ព្រមទាំងក្រុមហ៊ុន អ៊ែកស៊ល អេស៊ា យូមេន រីសសស៍ ដែលជាក្រុមហ៊ុនជ្រើសរើសកម្លាំងពលកម្មស្របច្បាប់ទៅបម្រើការងារនៅប្រទេសជប៉ុនផងដែរ៕

ខេត្តស្ទឹងត្រែង មានឱកាសការងារជូនបងប្អូនប្រជាពលរដ្ឋ ជាពិសេសអតីតពលករដែលវិលត្រឡប់មកកម្ពុជាវិញ ចំនួន ៩៣៤ កន្លែង

រាជធានីភ្នំពេញ មានឱកាសការងារជូនបងប្អូនប្រជាពលរដ្ឋ ជាពិសេសអតីតពលករដែលវិលត្រឡប់មកកម្ពុជាវិញ ចំនួន ២៣,៤៩៨ កន្លែង

ខេត្តឧត្តរមានជ័យ មានឱកាសការងារជូនបងប្អូនប្រជាពលរដ្ឋ ជាពិសេសអតីតពលករដែលវិលត្រឡប់មកកម្ពុជាវិញ ចំនួន ៧៩ កន្លែង