Khiev Tithsathya/ខៀវ ទិត្យសត្យា

វគ្គបណ្ដុះបណ្ដាលផ្ទាល់ ✥ត្រៀមប្រឡងប្រជែងវិជ្ជាជីវៈច្បាប់✥
បណ្ដុះបណ្ដាលដោយ៖ មេធាវី ខៀវ ទិត្យសត្យា
============✥✥===========
សិក្សារយៈពេល ៤ខែ!!
ទំនាក់ទំនងទូរស័ព្ទលេខ៖ +855 9966 5432
ចុះឈ្មោះសិក្សាTelegram៖ http://t.me/mktclaw

Telegram channel៖ https://t.me/MeakkaktesChhbab

ការបង្ខំដល់រូបកាយ
============
«ការបង្ខំដល់រូបកាយ» គឺជាវិធានការផ្លូវច្បាប់ដែលអនុវត្តដោយស្ថាប័នអយ្យការក្នុងការប្រើប្រាស់អំណាចចាប់ និងឃុំខ្លួន (ដាក់ពន្ធនាគារ) លើបុគ្គលណាម្នាក់ (ទណ្ឌិត សំដៅដល់ជនដែលត្រូវបានតុលាការផ្តន្ទាទោសជាស្ថាពរ) ដើម្បីបង្ខំឱ្យបុគ្គលនោះអនុវត្តកាតព្វកិច្ចបង់ប្រាក់ពិន័យ, ប្រាក់ពន្ធនីតិវិធី និងសងសំណងដល់ដើមបណ្ដឹងរដ្ឋប្បវេណីតាមអំណាចសាលក្រម ឬសាលដីកាស្ថាពររបស់តុលាការ។ មានន័យថា ការបង្ខំដល់រូបកាយ គឺជាការជាប់ពន្ធនាគារ។
ដើម្បីឱ្យកាន់តែជ្រាបច្បាស់ ខាងក្រោមនេះខ្ញុំនឹងពន្យល់អំពីវិធានការនេះ ផ្អែកលើទិដ្ឋភាពច្បាប់ជាធរមាន (ករណីសំណងរដ្ឋប្បវេណី) ៖

១. គោលបំណង
=============
នៅក្នុងរឿងក្តីព្រហ្មទណ្ឌ នៅពេលដែលតុលាការចេញសេចក្ដីសម្រេចស្ថាពរឱ្យដើមបណ្ដឹងរដ្ឋប្បវេណីឈ្នះក្ដី ហើយបង្គាប់ឱ្យទណ្ឌិតសងសំណងដល់ដើមបណ្ដឹងរដ្ឋប្បវេណី ប៉ុន្តែទណ្ឌិតមានចេតនាមិនសង, គេចវេស ឬលាក់បំបាំងទ្រព្យសម្បត្តិ នាំឲ្យដើមបណ្ដឹងរដ្ឋប្បវេណីមិនអាចអនុវត្តដោយបង្ខំបាននោះ គឺច្បាប់ (ក្រមនីតិវិធីព្រហ្មទណ្ឌ) បានផ្តល់អាវុធគតិយុត្តចុងក្រោយមួយដល់ដើមបណ្ដឹងរដ្ឋប្បវេណី គឺការស្នើសុំទៅស្ថាប័នអយ្យការ ដើម្បីចាប់ផ្ដើមការបង្ខំដល់រូបកាយ ក្នុងគោលបំណងដាក់សម្ពាធខាងផ្លូវចិត្ត និងសេរីភាព ដើម្បីបង្ខំឱ្យទណ្ឌិតព្រមសងសំណង។

២. លក្ខខណ្ឌនៃការអនុវត្ត
===============
ការបង្ខំរូបកាយចំពោះសំណងរដ្ឋប្បវេណី មិនមែនធ្វើឡើងដោយស្វ័យប្រវត្តិនោះទេ ដែលនីតិវិធីនេះអាចធ្វើទៅបានលុះត្រាតែមានលក្ខខណ្ឌដូចខាងក្រោម៖
១. មានសេចក្ដីសម្រេចស្ថាពរដែលបង្គាប់ឱ្យសងសំណងដល់ដើមបណ្ដឹងរដ្ឋប្បវេណី។
២. ការអនុវត្តដោយបង្ខំលើទ្រព្យសម្បត្តិមិនអាចធ្វើទៅបាន៖ដើមបណ្ដឹងរដ្ឋប្បវេណីត្រូវបង្ហាញភស្តុតាងជូនដល់តំណាងអយ្យការថាខ្លួនបានប្រើប្រាស់នីតិវិធីរឹបអូសទ្រព្យសម្បត្តិរបស់ទណ្ឌិតយកមកលក់ឡាយឡុងតាមផ្លូវតុលាការហើយ ប៉ុន្តែនៅតែមិនអាចធ្វើទៅបាន (លក់ឡាយឡុងរួចរាល់ហើយតែសងមិនគ្រប់ ឬមិនអាចរកឃើញទ្រព្យតែម្ដង)
៣. មានការស្នើសុំឲ្យអនុវត្ត៖ មានពាក្យសុំឲ្យអនុវត្តការបង្ខំរូបកាយពីដើមបណ្ដឹងរដ្ឋប្បវេណី។
៤. ទណ្ឌិតនៅតែមិនសងសំណងតាមការកំណត់ពេលចុងក្រោយរបស់ព្រះរាជអាជ្ញា ក្រោយមានពាក្យស្នើសុំពីដើមបណ្ដឹងរដ្ឋប្បវេណី។
ករណីបានបំពេញលក្ខខណ្ឌខាងលើនេះ ព្រះរាជអាជ្ញានឹងចេញដីកាបញ្ជាឲ្យចាប់និងឲ្យឃុំខ្លួនលើទណ្ឌិត ដែលជាបញ្ជាដល់មន្ត្រីនគរបាលយុត្តិធម៌ឲ្យចាប់ខ្លួន និងបញ្ជាដល់ប្រធានពន្ធនាគារ ឬមណ្ឌលឃុំខ្លួនឲ្យទទួលឃុំខ្លួនទណ្ឌិតដែលជាកម្មវត្ថុនៃការបង្ខំដល់រូបកាយ។

៣. រយៈពេលនៃការបង្ខំដល់រូបកាយ
================
រយៈពេលនៃការបង្ខំដល់រូបកាយមានកំណត់ច្បាស់លាស់ទៅតាមទំហំទឹកប្រាក់ដែលត្រូវសង។
យោងតាមមាត្រា ៥៣០ ថិរវេលានៃការបង្ខំដល់រូបកាយ នៃក្រមនីតិវិធីព្រហ្មទណ្ឌ ថិរវេលានៃការបង្ខំដល់រូបកាយត្រូវកំណត់ដូចតទៅៈ

-១០ (ដប់) ថ្ងៃ កាលណាទឹកប្រាក់ដែលមិនបង់នោះមានចំនួនមិនលើសពី ២៥០.០០០ (ពីរសែនប្រាំម៉ឺន) រៀល ។

-២០ (ម្ភៃ) ថ្ងៃ ប្រសិនបើទឹកប្រាក់នេះមានចំនួនពី ២៥០.០០១ (ពីរសែនប្រាំម៉ឺន មួយ) រៀល ដល់ ៥០០.០០០ (ប្រាំសែន) រៀល ។

-១ (មួយ) ខែ ប្រសិនបើទឹកប្រាក់នេះមានចំនួនពី ៥០០.០០១ (ប្រាំសែនមួយ) រៀល ដល់ ១.០០០.០០០ (មួយលាន) រៀល ។

-២ (ពីរ) ខែ ប្រសិនបើទឹកប្រាក់នេះមានចំនួនពី ១.០០០.០០១ (មួយលានមួយ)រៀល ដល់ ២.៥០០.០០០ (ពីរលានប្រាំសែន) រៀល ។

-៣ (បី) ខែ ប្រសិនបើទឹកប្រាក់នេះមានចំនួនពី ២.៥០០.០០១ (ពីរលានប្រាំសែន មួយ) រៀល ដល់ ៥.០០០.០០០ (ប្រាំលាន) រៀល ។

-៦ (ប្រាំមួយ) ខែ ប្រសិនបើទឹកប្រាក់នេះមានចំនួនពី ៥.០០០.០០១ (ប្រាំលាន មួយ) រៀល ដល់ ១០.០០០.០០០ (ដប់លាន) រៀល ។

-១ (មួយ) ឆ្នាំ ប្រសិនបើទឹកប្រាក់នេះមានចំនួនពី ១០.០០០.០០១ (ដប់លានមួយ) រៀល ដល់ ២០.៥០០.០០០ (ម្ភៃលានប្រាំសែន) រៀល ។

-១៨ (ដប់ប្រាំបី) ខែ ប្រសិនបើទឹកប្រាក់នេះមានចំនួនពី ២០.៥០០.០០១ (ម្ភៃលាន ប្រាំសែនមួយ) រៀល ដល់ ៥០.០០០.០០០ (ហាសិបលាន) រៀល ។

-២ (ពីរ) ឆ្នាំ ប្រសិនបើទឹកប្រាក់នេះមានចំនួនលើសពី ៥០.០០០.០០០ (ហាសិបលាន) រៀល។

ចំណាំ៖ ទោះបីជាត្រូវជាប់ពន្ធនាគារដល់ផុតកំណត់កាលកំណត់ហើយត្រូវដោះលែងវិញក៏ដោយ ក៏បំណុលនោះនៅតែមិនរលត់ដែរ ពោលគឺប្រសិនបើដើមបណ្ដឹងរដ្ឋប្បវេណីរកឃើញទ្រព្យសម្បត្តិនៅថ្ងៃក្រោយ គេនៅតែអាចរឹបអូសទ្រព្យនោះយកមកសងបំណុលតាមផ្លូវតុលាការបានដដែល។

៤. ករណីលើកលែង
(បុគ្គលដែលមិនអាចដាក់គុកបង្ខំរូបកាយបាន)
ច្បាប់មានលក្ខណៈយោគយល់ផ្អែកលើគោលការណ៍មនុស្សធម៌ ដោយហាមឃាត់មិនឱ្យអនុវត្តវិធានការនេះចំពោះបុគ្គលមួយចំនួនដូចជា៖ ទណ្ឌិតជាបុរសមានអាយុចាប់ពី ៧០ឆ្នាំឡើងទៅ និងស្ត្រីមានអាយុចាប់ពី ៦៥ឆ្នាំឡើងទៅ។

សរុបសេចក្តីមក «ការបង្ខំរូបកាយ» គឺជាវិធានការចុងក្រោយ ដើម្បីការពារផលប្រយោជន៍ស្របច្បាប់របស់ដើមបណ្ដឹងរដ្ឋប្បវេណី ក្នុងការទទួលបានសំណង ដែលបង្ខំឲ្យទណ្ឌិតត្រូវតែខំសងសំណងតាមអំណាចសេចក្ដីសម្រេចស្ថាពររបស់តុលាការ។

ព្រះរាជក្រមលេខ​ នស/រកម/០៥២៦/០០៨​ ចុះថ្ងៃទី២៣​ ខែឧសភា​ ឆ្នាំ​២០២៦​ ប្រកាសឱ្យប្រេីច្បាប់ស្ដីពី កាតព្វកិច្ចយោធា

"​ ឆន្ទានុសិទ្ធិរបស់ចៅក្រមក្នុងរឿងក្ដីរដ្ឋប្បវេណី​ "
រៀបចំ​ដោយៈ​ ឯកឧត្តម​បណ្ឌិត​ ជីវ​ កេង​ ប្រធានតុលាការកំពូល

ព្រះរាជក្រឹត្យ​លេខ​ នស/រកត/០៤១៦/៤១២​ ចុះថ្ងៃទី២០​ ខែមេសា​ ឆ្នាំ២០១៦​ ស្ដីពី​ និមិត្តសញ្ញា​ ត្រា​ រូបសញ្ញា​ សញ្ញាស័ក្តិ​ និង​ឯកសណ្ឋាន​ផ្លូវការក្នុងពិធីបុណ្យជាតិ​ សម្រាប់​ឧត្តមក្រុមប្រឹក្សានៃអង្គចៅក្រម​ និងអង្គការយុត្តាធិការគ្រប់ថ្នាក់។

សេចក្តីណែនាំ ស្តីពីការអនុវត្តសេចក្តីសម្រេចសន្និបាតបូកសរុបលទ្ធផលការងាររបស់តុលាការកំពូល និងមហាអយ្យការអមតុលាការកំពូល ឆ្នាំ២០២៥ និងកំណត់ទិសដៅការងារ ឆ្នាំ២០២៦

ព្រះរាជក្រឹត្យ​លេខ​ នស/រកត/០២១៧/២៥៣​ ចុះថ្ងៃទី២៨​ ខែកុម្ភៈ​ ឆ្នាំ២០១៧ ស្ដីពី​ ឯកសណ្ឋាន​ក្នុងពេលជំនុំជម្រះ​ និង​ឯកសណ្ឋាន​ក្នុងពេលបំពេញមុខងារផ្សេងៗរបស់អង្គចៅក្រម​។

វិធានស្តីពីរបៀបរបបការងារផ្ទៃក្នុងរបស់ក្រុមអធិការកិច្ច នៃឧត្តមក្រុមប្រឹក្សានៃអង្គចៅក្រម។

ប្រកាស​អន្តរក្រសួង​ស្ដីពី " ការផ្ដល់សេវាសាធារណៈរបស់​ក្រសួងរៀបចំ​ដែនដី​នគររូបនីយកម្ម​ និងសំណង់ "