អង្គភាពអ្នកនាំពាក្យរាជរដ្ឋាភិបាល Cambodia Government Spokesperson Unit

ខ្លឹមសារ Press Briefing របស់អ្នកនាំពាក្យរាជរដ្ឋាភិបាល សម្រាប់ថ្ងៃទី៥ ខែមិថុនា ឆ្នាំ២០២៦
........................

ថ្ងៃនេះ អ្នកនាំពាក្យរាជរដ្ឋាភិបាលសូមបន្តជម្រាបជូនអំពីមូលហេតុនៃការសម្រេចចិត្តរបស់កម្ពុជាក្នុងការប្រើប្រាស់យន្តការផ្សះផ្សារដោយបង្ខំ ក្រោមអនុសញ្ញាអង្គការសហប្រជាជាតិ UNCLOS និងជំហររបស់កម្ពុជាក្នុងការការពារអធិបតេយ្យភាពជាតិ និងបូរណភាពទឹកដី៖

ទី១៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី កាលពីថ្ងៃទី២ ខែមិថុនា ឆ្នាំ២០២៦ បានប្រកាសពីការចាប់ផ្តើមប្រើប្រាស់យន្តការផ្សះផ្សារដោយបង្ខំ (Compulsory Conciliation) ក្រោមអនុសញ្ញាអង្គការសហប្រជាជាតិ UNCLOS ដើម្បីដោះស្រាយការទាមទារដែនសមុទ្រត្រួតស៊ីគ្នាជាមួយប្រទេសថៃ។ មូលហេតុ៖ អស់រយៈពេលជាច្រើនឆ្នាំមកហើយ ដែលកម្ពុជានិងថៃមានក្របខណ្ឌទ្វេភាគីដើម្បីស្វែងរកដំណោះស្រាយដោយសន្តិវិធីលើការទាមទារដែនសមុទ្រត្រួតស៊ីគ្នា។ ក្របខណ្ឌទ្វេភាគីនោះ គឺអនុស្សរណៈនៃការយោគយល់គ្នាឆ្នាំ២០០១ ឬហៅកាត់ថា MoU 2001។ អនុស្សរណៈនៃការយោគយល់គ្នានេះ ឆ្លុះបញ្ចំាងពីការយល់ឃើញជាមួយគ្នាថា ប្រទេសទាំងពីរគួរតែធ្វើការរួមគ្នាដើម្បីដោះស្រាយព្រំដែនសមុទ្រ និងអភិវឌ្ឍធនធាននៅក្នុងតំបន់ទាមទារដែនសមុទ្រត្រួតស៊ីគ្នាដោយសន្តិវិធី និងសម្រាប់ផលប្រយោជន៍ទៅវិញទៅមក។

សម្តេចធិបតីបន្តថា នៅពេលដែលរាជរដ្ឋាភិបាលថៃបានប្រកាសថា នឹងដកខ្លួនចេញពីក្របខណ្ឌទ្វេភាគីដ៏យូរអង្វែងនេះ កម្ពុជាបានស្នើឱ្យភាគីថៃពិចារណាឡើងវិញ ប៉ុន្តែ ជាការគួរឱ្យសោកស្តាយ ភាគីថៃនៅតែសម្រេចចិត្តដើរចេញពីក្របខណ្ឌទ្វេភាគីនេះដដែល។ ការណ៍នេះមានន័យថា MoU 2001 ដែលជាក្របខណ្ឌទ្វេភាគីព្រមព្រៀងគ្នាតែមួយគត់សម្រាប់ដោះស្រាយតំបន់ទាមទារដែនសមុទ្រត្រួតស៊ីគ្នាក្នុងរយៈពេលជាង២៥ឆ្នាំកន្លងមក មិនអាចយកមកប្រើប្រាស់ទៀតបានឡើយ។ ការណ៍នេះបង្ហាញយ៉ាងច្បាស់ថា ឱកាសចរចាទ្វេភាគីដើម្បីឈានទៅរកដំណោះស្រាយត្រូវបានប្រើប្រាស់អស់លទ្ធភាពហើយ។ ហេតុដូច្នេះ រាជរដ្ឋាភិបាលកម្ពុជាបានពិចារណាយ៉ាងហ្មត់ចត់បំផុតនូវរាល់ជម្រើសផ្លូវច្បាប់ និងដោយសន្តិវិធីដែលមាន និងដែលអាចអនុវត្តទៅបាន។

អនុសញ្ញាអង្គការសហប្រជាជាតិស្ដីពីនីតិសមុទ្រដែលស្គាល់ជាទូទៅថា UNCLOS ជាសន្ធិសញ្ញាអន្តរជាតិដែលកំណត់នូវសិទ្ធិ និងការទទួលខុសត្រូវរបស់រដ្ឋភាគីនានាពាក់ព័ន្ធនឹងដែនសមុទ្រដែលក្នុងនោះទាំងកម្ពុជានិងថៃជារដ្ឋភាគីនៃអនុសញ្ញានេះ។ ការផ្សះផ្សារដោយបង្ខំ ដែលជាយន្តការផ្លូវច្បាប់ដោយសន្តិវិធីនៅក្រោមអនុសញ្ញា UNCLOS នឹងអនុញ្ញាតឱ្យប្រទេសទាំងពីរបង្ហាញជំហររបស់ខ្លួននៅចំពោះមុខគណៈកម្មការឯករាជ្យមួយដែលមានសមាជិកជាអ្នកផ្សះផ្សារចំនួន៥រូប និងសុទ្ធតែជាអ្នកជំនាញឈានមុខផ្នែកច្បាប់អន្តរជាតិ។ កម្ពុជាសង្ឃឹមយ៉ាងមុតមាំថា ដំណើរការនេះនឹងបង្ហាញជាថ្មីម្ដងទៀតនូវតម្លៃពិតប្រាកដនៃច្បាប់អន្តរជាតិ និងការដោះស្រាយជម្លោះដោយសន្តិវិធី។

សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាប្រមុខរដ្ឋស្តីទី ក៏ធ្លាប់សម្តែងការសោកស្តាយដែលថៃលុបចោល MoU 2001 ហើយសម្តេចបានគូសបញ្ជាក់យ៉ាងច្បាស់ថា កម្ពុជាធ្វើដំណើរទៅកាន់ច្បាប់អន្តរជាតិ ដូច្នេះ សូមកុំចោទប្រកាន់ថា កម្ពុជាធ្វើអន្តរជាតូបនីយកម្មបញ្ហាទ្វេភាគី និងសូមកុំនិយាយថា ធ្លាក់ចូលអន្ទាក់កម្ពុជា ដែលចង់ឱ្យភាគីទី៣ ឬអន្តរជាតិចូលរួម និងក៏សូមកុំបបួលកម្ពុជារៀបចំយន្តការទ្វេភាគីថ្មីជំនួសយន្តការទ្វេភាគីចាស់ដែលថៃលុបចោលជាឯកតោភាគី។ សម្តេចតេជោសង្ឃឹមថា កម្ពុជានិងថៃនឹងដឹកដៃគ្នាទៅកាន់យន្តការអន្តរជាតិ ដែលមានសមត្ថកិច្ចលើបញ្ហាសមុទ្រ។

ជំហររបស់រាជរដ្ឋាភិបាលកម្ពុជា ក្នុងការសម្រេចចាប់ផ្តើមប្រើប្រាស់យន្តការផ្សះផ្សារដោយបង្ខំ (Compulsory Conciliation) ក្រោមអនុសញ្ញា UNCLOS បានទទួលការគាំទ្រយ៉ាងពេញទំហឹងពីស្ថាប័នកំពូលរបស់ជាតិ ក្រសួង ស្ថាប័ន រហូតរដ្ឋបាលថ្នាក់ក្រោមជាតិ និងប្រជាពលរដ្ឋគ្រប់មជ្ឈដ្ឋាន។ អាចនិយាយបានថា ប្រជាជាតិខ្មែរកំពុងឈរនៅលើជំហរឯកភាពជាតិដ៏រឹងមាំមួយឆ្ពោះទៅការដោះស្រាយបញ្ហាដោយសន្តិវិធី តាមរយៈការផ្សះផ្សារដោយភាគីអន្តរជាតិ និងស្របតាមច្បាប់អន្តរជាតិ ដើម្បីទទួលបានដំណោះស្រាយមួយត្រឹមត្រូវ យុត្តិធម៌ និងយូរអង្វែងសម្រាប់ប្រជាជាតិទាំងពីរ ក៏ដូចជាសម្រាប់សន្តិភាព ស្ថិរភាព និងវិបុលភាពក្នុងតំបន់ទាំងមូល។

ទី២៖ ក្នុងការទទួលជំនួបសម្តែងការគួរសម និងពិភាក្សាការងារជាមួយឯកអគ្គរដ្ឋទូតម៉ាឡេស៊ីប្រចាំកម្ពុជាកាលពីថ្ងៃទី៣ ខែមិថុនា ឆ្នាំ២០២៦ ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេសនិងសហប្រតិបត្តិការអន្តរជាតិ បានថ្លែងអំណរគុណយ៉ាងជ្រាលជ្រៅចំពោះកិច្ចខិតខំប្រឹងប្រែងរបស់ម៉ាឡេស៊ីក្នុងការសម្របសម្រួលបញ្ហាព្រំដែនកម្ពុជា-ថៃ និងការដឹកនាំក្រុមអ្នកសង្កេតការណ៍អាស៊ានក្នុងឆ្នាំ២០២៥។ ឯកឧត្តមឧបនាយករដ្ឋមន្ត្រី ក៏បានជម្រាបជូនឯកអគ្គរដ្ឋទូតម៉ាឡេស៊ីអំពីស្ថានការណ៍វិវត្តន៍ថ្មីៗនៅតាមព្រំដែនកម្ពុជា-ថៃ និងសង្ឃឹមជឿជាក់ថា ម៉ាឡេស៊ីនឹងបន្តចូលរួមចំណែកក្នុងបញ្ហានេះ។

ទី៣៖ អ្នកនាំពាក្យរាជរដ្ឋាភិបាលសូមបញ្ជាក់ជូនជនរួមជាតិជាថ្មីថា កម្ពុជាប្រកាន់ជំហរយ៉ាងម៉ឺងម៉ាត់ក្នុងការការពារខ្សែព្រំដែនអន្តរជាតិកម្ពុជា-ថៃ ដែលបន្សល់ទុកដោយគណៈកម្មការព្រំដែនឥណ្ឌូចិន-សៀម ដោយគោរពគោលការណ៍ច្បាប់អន្តរជាតិ គោលការណ៍ខ្សែព្រំដែនមិនកែប្រែ (Uti Possidetis Juris) គោរពអនុសញ្ញា សន្ធិសញ្ញាបារាំង-សៀម ផែនទី និងកំណត់ហេតុបោះបង្គោលព្រំដែនរបស់គណៈកម្មការបោះបង្គោលព្រំដែនឥណ្ឌូចិន-សៀម ព្រមទាំងកិច្ចព្រមព្រៀង និងឯកសារពាក់ព័ន្ធនានាដែលភាគីទាំងពីរបានឯកភាពគ្នានាពេលកន្លងមក។ កម្ពុជាមិនទទួលស្គាល់ជាដាច់ខាតនូវការកែប្រែខ្សែព្រំដែនណាមួយដែលកើតចេញពីការប្រើប្រាស់កម្លាំងនោះឡើយ៕

សូមអរគុណ!

អបអរសាទរ ខួបលើកទី៣០ ទិវាបរិស្ថានជាតិ និងបរិស្ថានពិភពលោក ក្រោមប្រធានបទ៖ «សំណល់សូន្យ»

ទិវានេះ រៀបចំឡើងដើម្បីលើកកម្ពស់ការយល់ដឹងអំពីបរិស្ថាន និងជំរុញចលនាប្រជាពលរដ្ឋ ព្រះសង្ឃ កងកម្លាំងប្រដាប់អាវុធ មន្ត្រីរាជការគ្រប់លំដាប់ថ្នាក់ សិស្ស និស្សិត និងសាធារណជនទាំងអស់ ចូលរួមឱ្យបានផុសផុល ក្នុងកិច្ចគាំពារបរិស្ថាន (គុណភាពខ្យល់ ទឹក សំឡេង) ការគ្រប់គ្រងសំរាម ប្លាស្ទិក និងសំណល់រឹង ដើម្បីរួមគ្នាការពារភពផែនដីយើង ឱ្យមានភាពស្អាត បៃតង និងចីរភាព ជាឧត្តមប្រយោជន៍ ដល់សង្គម និងមនុស្សជាតិគ្រប់ជំនាន់។

៥ មិថុនា ១៩៩៦ - ៥ មិថុនា ២០២៦

Celebrating the 30th Anniversary of National Environment Day and World Environment Day, under the theme, “Zero Waste”

This occasion is organized to raise environmental awareness and encourage citizens, monks, armed forces personnel, civil servants, students, and the public to actively participate in environmental protection (air, water, and noise quality). Together, we can better manage waste, plastic, and other solid waste, keeping our planet clean, green, and sustainable for the benefit of present and future generations.

5 June 1996 - 5 June 2026

#ហ៊ុនម៉ាណែត #កម្ពុជា #សន្តិភាពនៅកម្ពុជា

អង្គភាពអ្នកនាំពាក្យរាជរដ្ឋាភិបាលរៀបចំកម្មវិធីប្រកួតប្រជែងនិយាយជាសាធារណៈសម្រាប់និស្សិតសាកលវិទ្យាល័យ អំពីមុំទី១នៃយុទ្ធសាស្ត្របញ្ចកោណ
...................

«តើយុវជនត្រូវត្រៀមខ្លួនយ៉ាងដូចម្តេចដើម្បីចូលរួមសម្រេចចក្ខុវិស័យកម្ពុជាឆ្នាំ២០៥០ ក្លាយជាប្រទេសមានចំណូលខ្ពស់?»។ នេះគឺជាប្រធានបទនៃការប្រកួតនិយាយជាសាធារណៈសម្រាប់និស្សិតនៅតាមសាកលវិទ្យាល័យ ដែលរៀបចំឡើងដោយអង្គភាពអ្នកនាំពាក្យរាជរដ្ឋាភិបាល។ កម្មវិធីនេះបានឈានដល់ការជម្រុះបញ្ចប់វគ្គទី២ហើយនៅថ្ងៃទី៤ ខែមិថុនា ឆ្នាំ២០២៦ នេះ បន្ទាប់ពីបានប្រកួតរយៈពេលពីរថ្ងៃ។

ការជម្រុះនៅវគ្គទី១ ត្រូវបានធ្វើឡើងរយៈពេល៣ថ្ងៃ ចាប់ពីថ្ងៃទី១៤ ដល់ថ្ងៃទី១៦ ខែឧសភា ឆ្នាំ២០២៦ តាមរយៈប្រព័ន្ធកម្មវិធី Zoom Meeting នៅបន្ទប់១១១ នៃទីស្តីការគណៈរដ្ឋមន្ត្រី។ ការប្រកួតជម្រុះវគ្គទី១ មានបេក្ខជនចូលរួមសរុបចំនួន ៤៦រូប មកពី ១៥សាកលវិទ្យាល័យតាមរាជធានីនិងខេត្ត ដោយគណៈកម្មការសម្រិតសម្រាំងបានបេក្ខជនចំនួន ២១រូប សម្រាប់ឡើងមកប្រកួតជម្រុះវគ្គទី២នេះ ដោយគណៈកម្មការត្រូវបន្តជម្រុះយកតែបេក្ខជនចំនួន ១០រូប ទៅប្រកួតវគ្គផ្តាច់ព្រ័ត្រ នៅអំឡុងខែកក្កដាខាងមុខនេះ។

សូមបញ្ជាក់ជូនថា បេក្ខជនដែលបានចូលរួមប្រកួតនិយាយជាសាធារណៈនេះត្រូវបានជ្រើសរើសក្នុងចំណោមនិស្សិតដែលធ្លាប់បានចូលរួមស្តាប់បាឋកថារបស់ឯកឧត្តម ប៉ែន បូណា រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានអង្គភាពអ្នកនាំពាក្យរាជរដ្ឋាភិបាលស្តីពី«យុវជននិងគោលនយោបាយជាតិ»។

ឯកឧត្តម ប៉ែន បូណា បានឱ្យដឹងថា គោលបំណងនៃការរៀបចំកម្មវិធីនេះ គឺដើម្បីជំរុញឱ្យយុវជនយល់ដឹងពីយុទ្ធសាស្ត្របញ្ចកោណរបស់រាជរដ្ឋាភិបាល នីតិកាលទី៧ នៃរដ្ឋសភា ដឹកនាំដោយសម្តេចមហាបវរធិបតី ហ៊ុន ម៉ាណែត ជាពិសេសមុំទី១ស្តីពី«ការអភិវឌ្ឍន៍មូលធនមនុស្ស» និងចូលរួមដើម្បីឈានទៅសម្រេចចក្ខុវិស័យកម្ពុជាឆ្នាំ២០៥០ ដែលរាជរដ្ឋាភិបាលបានកំណត់។

ឯកឧត្តម ប៉ែន បូណា ពន្យល់ថា និស្សិតមានការចាប់អារម្មណ៍ខ្លាំងចំពោះបទបង្ហាញស្តីពីយុទ្ធសាស្ត្របញ្ចកោណ ជាពិសេសសំណួរថា តើធ្វើដូចម្តេចដើម្បីក្លាយជាមូលធនមនុស្សសម្រាប់ប្រទេសជាតិ? ប៉ុន្តែ បើពួកគេគ្រាន់តែស្តាប់បាឋកថាម្តងម្កាលអាចនឹងភ្លេចទៅវិញ។ ដូច្នេះ ឯកឧត្តមក៏បានផ្តួចផ្តើមគំនិតឱ្យមានការប្រកួតនិយាយជាសាធារណៈអំពីបញ្ហានេះដើម្បីជំរុញយុវជនឱ្យស្រាវជ្រាវ ដើម្បីចងចាំ និងអាចនិយាយជាសាធារណៈបានទើបជាការប្រសើរ។

ការប្រកួតនេះ មានគណៈកម្មការតំណាងមកពីអង្គភាពអ្នកនាំពាក្យរាជរដ្ឋាភិបាល ក្រសួងអប់រំ យុវជន និងកីឡា សហភាពសហព័ន្ធយុវជនកម្ពុជា និង The Perspectives Cambodia។ លទ្ធផលប្រកួតជម្រុះវគ្គទី២នេះ នឹងត្រូវប្រកាសឱ្យដឹងនៅសប្តាហ៍ទី២ នៃខែមិថុនា ឆ្នាំ២០២៦ រីឯការប្រកួតផ្តាច់ព្រ័ត្រនឹងត្រូវធ្វើឡើងដោយផ្ទាល់ គឺមិនមែនតាមប្រព័ន្ធ Zoom ទៀតទេ។ បេក្ខជនដែលទទួលបានជ័យលាភី នៅវគ្គផ្តាច់ព្រ័ត្រ នឹងទទួលបានវិញ្ញាបនបត្រតាមលំដាប់មេដាយពីលេខ១ ដល់លេខ៥ រួមទាំងរង្វាន់លើកទឹកចិត្តផងដែរ៕

ខ្លឹមសារ Press Briefing របស់អ្នកនាំពាក្យរាជរដ្ឋាភិបាល សម្រាប់ថ្ងៃទី៤ ខែមិថុនា ឆ្នាំ២០២៦
........................

ថ្ងៃនេះ អ្នកនាំពាក្យរាជរដ្ឋាភិបាលសូមបន្តជម្រាបជូនព័ត៌មានពាក់ព័ន្ធនឹងការចាប់ផ្តើមដំណើរការយន្តការផ្សះផ្សារដោយបង្ខំក្រោមសន្ធិសញ្ញាអង្គការសហប្រជាជាតិស្តីពីនីតិសមុទ្រ UNCLOS និងព្រឹត្តិការណ៍សំខាន់ៗមួយចំនួនទៀតជូនជនរួមជាតិជ្រាបដូចតទៅ៖

ទី១៖ ក្នុងសារផ្ញើជូនជនរួមជាតិកាលពីព្រឹកថ្ងៃទី២ ខែមិថុនា ឆ្នាំ២០២៦ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីបានបញ្ជាក់ថា ការប្រើប្រាស់យន្តការផ្សះផ្សារដោយបង្ខំនៅក្រោមអនុសញ្ញា UNCLOS មិនមែនមានន័យថា កម្ពុជាងាកចេញពីការសន្ទនានោះទេ។ ផ្ទុយទៅវិញ កម្ពុជាកំពុងនាំយកការសន្ទនាចូលទៅក្នុងក្របខណ្ឌអន្តរជាតិដែលមានរចនាសម្ព័ន្ធច្បាស់លាស់ និងដែលទទួលស្គាល់ដោយប្រទេសទាំងពីរ។ កម្ពុជានិងថៃនឹងទទួលបានផលប្រយោជន៍ពីដំណោះស្រាយយុត្តិធម៌និងយូរអង្វែង ដែលព្រមព្រៀងគ្នាក្រោមការណែនាំរបស់អ្នកជំនាញផ្សះផ្សារអន្តរជាតិ ដែលអនុលោមតាមច្បាប់អន្តរជាតិ។

សម្តេចនាយករដ្ឋមន្ត្រីបន្តថា ដំណោះស្រាយដោយសន្តិវិធី គឺជាផលប្រយោជន៍រួមសម្រាប់ប្រទេសទាំងពីរ និងរួមចំណែកដល់សន្តិភាព ស្ថិរភាពតំបន់ ការពារអធិបតេយ្យភាព ពង្រឹងទំនុកចិត្ត និងបើកឱកាសក្នុងការប្រើប្រាស់ធនធានថាមពល ដើម្បីគាំទ្រការអភិវឌ្ឍក៏ដូចជាបង្កើតឱកាសការងារថ្មី ទាំងសម្រាប់ពេលបច្ចុប្បន្ន និងសម្រាប់ប្រជាជនជំនាន់ក្រោយៗនៃប្រទេសទាំងពីរ។ សម្តេចមហាបវរធិបតី បញ្ជាក់ជាថ្មីថាកម្ពុជាមិនដែលរំលោភបំពានអធិបតេយ្យភាពរបស់ប្រទេសដទៃឡើយ ហើយជាមួយគ្នានេះ កម្ពុជាប្តេជ្ញាចិត្តយ៉ាងដាច់ខាតក្នុងការការពារអធិបតេយ្យជាតិរបស់ខ្លួន។

កម្ពុជាបន្តប្រកាន់គោលជំហរទទួលខុសត្រូវដ៏មុតមាំនេះ ដោយមិនមែនតាមរយៈការប្រើកម្លាំង តែប្រើច្បាប់ ដោយមិនមែនតាមរយៈសកម្មភាពឯកតោភាគី តែតាមរយៈការរួមគ្នាដោះស្រាយដោយសន្តិវិធី។ សម្តេចប្រមុខរាជរដ្ឋាភិបាលកម្ពុជាបានអំពាវនាវដល់បងប្អូនជនរួមជាតិទាំងអស់ ឱ្យបន្តរក្សាសាមគ្គីភាពជាធ្លុងមួយប្រកបដោយទំនុកចិត្តខ្ពស់ និងភាពរឹងមាំ ពីព្រោះការការពារអធិបតេយ្យភាពជាតិ គឺជាកាតព្វកិច្ចរបស់ជាតិយើងទាំងមូល។

ពាក់ព័ន្ធនឹងបញ្ហានេះដែរ ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេសនិងសហប្រតិបត្តិការអន្តរជាតិ បានបញ្ជាក់បន្ថែមថា ទន្ទឹមនឹងការដាក់លិខិតផ្លូវការទៅកាន់ភាគីថៃ និងអង្គការសហប្រជាជាតិ ដើម្បីចាប់ផ្តើមដំណើរការយន្តការផ្សះផ្សារដោយបង្ខំ (Compulsory Conciliation) ក្រោមអនុសញ្ញា UNCLOS និងក្នុងពេលរង់ចាំចម្លើយពីភាគីថៃ កម្ពុជាបានជ្រើសរើសអ្នកផ្សះផ្សារពីររូបរបស់ខ្លួនរួចជាស្រេចហើយដើម្បីចូលរួមក្នុងដំណើរការផ្សះផ្សារនេះ។

ទី២៖ «រាជរដ្ឋាភិបាលគ្មានផែនការកាត់ចំណាយក្នុងវិស័យអប់រំ និងសុខាភិបាលដើម្បីយកទៅបំពេញតម្រូវការវិស័យការពារជាតិទេ។ ផ្ទុយទៅវិញ គម្រោងចំណាយរបស់រាជរដ្ឋាភិបាលក្នុងវិស័យសង្គមកិច្ច ដែលរួមមានវិស័យអប់រំ និងសុខាភិបាលមានតែបន្តកើនឡើងក្នុងរយៈពេលមធ្យម និងរយៈពេលវែង ពីព្រោះការវិនិយោគដើម្បីពង្រឹងធនធានមនុស្សនៅតែជាអាទិភាពទីមួយរបស់រាជរដ្ឋាភិបាល»។ នេះគឺជាការគូសបញ្ជាក់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី កាលពីថ្ងៃទី៣ ខែមិថុនា ឆ្នាំ២០២៦។

សម្តេចប្រមុខរាជរដ្ឋាភិបាលសង្កត់ធ្ងន់ថា ក្នុងបរិការណ៍សកលដែលពោរពេញដោយហានិភ័យ និងភាពមិនប្រាកដប្រជាខ្ពស់ កម្ពុជាត្រូវតែពន្លឿនការកែទម្រង់ឱ្យកាន់តែស៊ីជម្រៅលើវិស័យសេដ្ឋកិច្ច និងវិស័យការពារជាតិ ស្របតាមពាក្យស្លោក «មុជឱ្យជ្រៅ ទៅឱ្យឆ្ងាយ» តាមរយៈការបន្តពូនជ្រុំមូលធនមនុស្សស្របតាមទិសដៅនៃយុទ្ធសាស្រ្តអភិវឌ្ឍជាតិ និងការបន្តលើកកម្ពស់ចំណេះដឹង ចំណេះធ្វើ សីលធម៌ និងវិន័យ របស់ប្រជាពលរដ្ឋខ្មែរ ដើម្បីឆ្លើយតបឱ្យបានកាន់តែប្រសើរ និងទាន់ពេលទៅនឹងសេចក្តីត្រូវការនៃការអភិវឌ្ឍសង្គមសេដ្ឋកិច្ច និងកិច្ចការពារជាតិមាតុភូមិ។

សម្តេចធិបតី នាយករដ្ឋមន្ត្រីបញ្ជាក់ច្បាស់ថា រាជរដ្ឋាភិបាលមានថវិកាគ្រប់គ្រាន់សម្រាប់បង្កើនលើវិស័យការពារជាតិដែលមិនប៉ះពាល់ដល់វិស័យអប់រំនិងសុខាភិបាលនោះឡើយ ពីព្រោះរាជរដ្ឋាភិបាលនៅតែចាត់ទុកធនធានមនុស្ស គឺជាអាទិភាពនៃគោលនយោបាយជាតិ។ ដូច្នេះ ការកសាងនិងការការពារជាតិឱ្យបានរឹងមាំ គឺអាស្រ័យលើកម្ពុជាមានធនធានមនុស្សរឹងមាំ ហើយធនធានមនុស្សរឹងមាំ គឺអាស្រ័យលើការវិនិយោគទាំងក្នុងវិស័យអប់រំ សុខាភិបាល និងសង្គមកិច្ច។

ទី៣៖ សម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្ដីទី បានរម្លឹកដល់អាជ្ញាធរមូលដ្ឋានថា៖ «គ្មានការយោគយល់ណាមួយចំពោះទីតាំងដែលត្រូវបានប្រើប្រាស់ធ្វើជាកន្លែងឆបោកតាមប្រព័ន្ធអនឡាញនោះឡើយ ហើយអ្នកដែលពាក់ព័ន្ធនឹងរឿងនេះក៏មិនត្រូវបានលើកលែងនោះដែរ»។ ការរម្លឹកបែបនេះបានធ្វើឡើងខណៈដែលសម្តេចបានអញ្ជើញជួបសំណេះសំណាលជាមួយក្រុមប្រឹក្សាខេត្ត ក្រុង ស្រុក ឃុំ សង្កាត់ និងថ្នាក់ដឹកនាំមន្ទីរអង្គភាពនានាជុំវិញខេត្តកំពង់ធំចំនួន ១១៨៩នាក់ កាលពីព្រឹកថ្ងៃទី៣ ខែមិថុនា ឆ្នាំ២០២៦។ទន្ទឹមនឹងនោះ សម្ដេចតេជោក៏បន្តក្រើនរម្លឹកឱ្យអាជ្ញាធរមូលដ្ឋានត្រូវបន្តយកចិត្តទុកដាក់ការពារ និងថែរក្សាធនធានធម្មជាតិដែលមានក្នុងមូលដ្ឋានរបស់ខ្លួន ជាពិសេសខេត្តកំពង់ធំ ត្រូវចូលរួមការពារធនធានធម្មជាតិបឹងទន្លេសាប ដោយត្រូវទប់ស្កាត់ការកាប់ទន្ទ្រានព្រៃលិចទឹក និងរួមគ្នាថែរក្សាធនធានដ៏មានតម្លៃទាំងនោះឱ្យបានគង់វង្ស។ សម្តេចតេជោក៏បានក្រើនរំឭកដល់មន្ត្រីរាជការទាំងអស់ ជាពិសេសក្រុមប្រឹក្សាឃុំ សង្កាត់ ឱ្យបន្តយកចិត្តទុកដាក់បំពេញតួនាទីភារកិច្ចបម្រើជាតិ និងប្រជាជនឱ្យបានល្អប្រសើរ ជាពិសេសបន្តយកចិត្តទុកដាក់ផ្តល់សេវាដែលជាតម្រូវការ និងសេវាចាំបាច់នានា ជូនប្រជាពលរដ្ឋឱ្យបានលឿន រហ័ស និងមានប្រសិទ្ធភាព និងត្រូវចងចាំថា «មន្ត្រីមិនមែនជាចៅហ្វាយរបស់ប្រជាជននោះទេ តែគឺជាអ្នកបម្រើដ៏ស្មោះត្រង់របស់ប្រជាជន»៕

សូមអរគុណ!