មជ្ឈមណ្ឌលសកម្មភាពកំចាត់មីនកម្ពុជា - CMAC

អបអរសាទរទិវាកុមារអន្តរជាតិខួបលើកទី៧៧។ ទិវានេះត្រូវបានប្រារព្ធឡើងក្នុងគោលបំណងដើម្បីលើកកម្ពស់សិទ្ធិកុមារនៅជុំវិញពិភពលោក ជាពិសេសគឺដើម្បីការពារកុមារពីការជិះជាន់ កេងប្រវ័ញ្ចកម្លាំងពលកម្ម ការជួញដូរផ្លូវភេទ ការប្រើប្រាស់អំពើហិង្សា ការរំលោភបំពានសិទ្ធិ និងអសមភាពសង្គម ដែលតែងកើតមានឡើងចំពោះកុមារ។

នៅថ្ងៃទី២៧ ខែឧសភា ឆ្នាំ២០២៦ នៅស្រុកមោងឫស្សី ខេត្តបាត់ដំបង មានករណីគ្រោះថ្នាក់ដោយសំណល់សង្គ្រាមគ្រាប់៦០មីលីម៉ែត្រមិនទាន់ផ្ទុះ ដោយសារការដុតសម្អាតដីដាំដំណាំបានបង្កផ្ទុះបណ្តាលឱ្យយុវជនម្នាក់រងរបួសធ្ងន់។ នៅក្នុងខែឧសភានេះ មានករណីគ្រោះថ្នាក់ដោយសារគ្រាប់សំណល់សង្គ្រាម៣-៤ករណីហេីយ ដែលបណ្តាលមកពីការលេីកដាក់ឬវាយដុំដុតគ្រាប់មិនទាន់ផ្ទុះ។ សូមចូលរួមសោកស្តាយនិងមរណទុក្ខជាមួយជនរងគ្រោះនិងក្រុមគ្រួសារ ព្រមទាំងសូមអំពាវនាវប្រជាពលរដ្ឋទាំងអស់ ចូលរួមប្រុងប្រយត្ន័និងកុំប៉ះពាល់ វាយដុំដុតគ្រាប់មិនទាន់ផ្ទុះ និងត្រូវរាយការណ៍មកសមត្ថកិច្ចនគរបាលប៉ុស្តឬអាជ្ញាធរមូលដ្ឋានភូមិ/ឃុំ និងជាពិសេសមកអង្គភាពCMAC ដេីម្បីសុខសុវត្ថិភាពខ្លួនឯងនិងអ្នកជុំវិញខ្លួន។

តើមានបងប្អូនណាខ្លះធ្លាប់បានមកទទួលការបណ្តុះបណ្តាលនៅវិទ្យាស្ថានបច្ចេកទេសសកម្មភាពកំចាត់មីន ខេត្តកំពង់ឆ្នាំង? អគារថ្មីៗ បរិក្ខាថ្មីៗ កំពុងរង់ចាំទទួលលោកអ្នកដើម្បីបណ្តុះបណ្តាលក្នុងវិស័យសកម្មភាពមីន!

ថ្ងៃចន្ទ ២កើត ខែជេស្ឋ ឆ្នាំមមី អដ្ឋស័ក ព.ស២៥៧០ ត្រូវនឹងថ្ងៃទី១៨ ខែឧសភា ឆ្នាំ២០២៦ នៅមណ្ឌលអភិវឌ្ឍន៍ស៊ីម៉ាក់មរតកតេជោ ខេត្តបាត់ដំបង បានរៀបចំប្រារឰពិធីផ្ទេរ-ប្រគល់សមិទ្ធផល នៃគម្រោងសមាហរណកម្មការបោសសម្អាតមីន និងជួយសង្គ្រោះជនពិការដោយសារមីន ដំណាក់កាលទី២ និងការបើកកិច្ចប្រតិបត្តិការគម្រោងថ្មី ដំណាក់កាលទី៣ ដែលជាហិរញ្ញប្បទានឥតសំណងរបស់រដ្ឋាភិបាលជប៉ុន ផ្ដល់ជូនរាជរដ្ឋាភិបាលកម្ពុជា គាំទ្រអង្គភាពCMAC ក្រោមអធិបតីភាពដ៏ខ្ពង់ខ្ពស់ឯកឧត្តម ប្រាក់ សុខុន ឧបនាយករដ្ឋមន្រ្តី រដ្ឋមន្រ្តីក្រសួងការបរទេស និងសហប្រតិបត្តិការអន្ដរជាតិ និងលោក​ជំទាវ​ ខេង​ សំវ៉ាដា​ តំណាងដ៏ខ្ពង់ខ្ពស់បំផុត សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា​ និងលោកជំទាវ​បណ្ឌិត​ ពេជ​ ចន្ទមុន្នី​ ហ៊ុន​ ម៉ាណែត រួមជាមួយឯកឧត្តម UENO Atsushi ឯកអគ្គរដ្ឋទូតជប៉ុនប្រចាំកម្ពុជា។
សូមជម្រាបថា គម្រោងសមាហរណកម្មការបោស​សម្អាតមីន និងជួយសង្គ្រោះ​ជន​ពិការ​ដោយ​សារមីនដំណាក់កាលទី២នេះ រដ្ឋាភិបាលជប៉ុនបានសម្រេចផ្តល់ជំនួយហិរញប្បទានឥតសំណងមានទឹកប្រាក់សរុបចំនួន២.០០០លានយ៉េន ស្មើនឹងជិត​១៧លានដុល្លារអាម៉េរិក សម្រាប់រយៈពេល៤៥ខែ (០១ មេសា ២០២២ ដល់ថ្ងៃទី៣១ ធ្នូ ២០២៥) ដែលត្រូវអនុវត្តគម្រោងនៅខេត្តបាត់ដំបង ខេត្តពោធិ៍សាត់ និងខេត្តប៉ៃលិន ព្រមទាំងសម្រេចបានសមិទ្ធផលមានជាអាទិ៍៖ បោសសម្អាតផ្ទៃដីចម្ការមីន/គ្រាប់បានចំនួន១២.០១១ហិកតា ស្មើនឹង១២៧% ធៀបនឹងផែនការ។ រុករក​ឃើញនិងកម្ទេចចោលគ្រាប់មីន&គ្រាប់យុទ្ធភណ្ឌមិនទាន់ផ្ទុះគ្រប់ប្រភេទចំនួន២៧.៨៤៧គ្រាប់ និង​​ផ្ដល់សារអប់រំយល់ដឹងពីមីនបានចំនួន១២.៥៨២លើក មានប្រជាពលរដ្ឋចូលរួមសរុបចំនួន៣៤៣.២០៩​​នា​ក់។ ប្រជាពលរដ្ឋទទួលផលពីគម្រោងនេះមានចំនួន៧៦៣.៦០២នាក់។ សាងសង់ផ្លូវគ្រួសក្រហមប្រវែង៩.៨០០ម៉ែត្រ និងសំណង់រំដោះទឹកគ្រប់ប្រភេទចំនួន២៩កន្លែង ទិញសម្ភារបោសសម្អាត​​មីន​មួយចំនួន​រួមមាន៖ ម៉ាស៊ីនរាវមីន ALIS ចំនួន១២គ្រឿង គ្រឿងចក្របោសសម្អាតមីនKomatsu ចំនួន១គ្រឿង រថយន្តសណ្តោងចំនួន១គ្រឿង និងគ្រឿបន្លាស់ផងដែរ។
ដោយឡែកសម្រាប់គម្រោងថ្មី ដំណាក់កាលទី៣ ដែលត្រូវសម្ពោធបើកការដ្ឋាននៅថ្ងៃនេះ មានហិរញ្ញប្បទានឥតសំណងចំនួន១.៧០០លានយ៉េន ស្មើនឹងប្រមាណ១១លានដុល្លារអាមេរិក សម្រាប់រយៈពេល២៤ខែ(១៩ មករា ២០២៦-១៨ មករា ២០២៨) ដើម្បីគាំទ្រអង្គភាពCMAC លើគោលដៅដូចជា បោសសម្អាតផ្ទៃដីចម្ការមីន/គ្រាប់ចំនួន៤.៩៣៩ហិកតា ក្នុងភូមិសាស្រ្ដខេត្តពោធិ៍សាត់ ខេត្តបាត់ដំបង និងខេត្តកោះកុង ព្រមទាំងឆ្លើយតបសំណើសុំអន្ដរាគមន៍បន្ទាន់ក្នុងខេត្តប៉ៃលិន។ ការជួយសង្គ្រោះជនរងគ្រោះដោយសារមីន និងការអភិវឌ្ឍសហគមន៍ក្រោយបោសសម្អាតមីនរួច។ ទិញម៉ាស៊ីនរាវមីនALIS និងកសាងប្រព័ន្ធទិន្នន័យបញ្ញាសិប្បនិមិ្មត(AI)។
ឆ្លៀតក្នុងឱកាសនោះដែរ ឯកឧត្តមប្រតិភូ ហេង រតនា បានគោរពថ្លែងអំណរគុណយ៉ាងជ្រាលជ្រៅចំពោះរដ្ឋាភិបាលនិងប្រជាជនជប៉ុន​ដែលបានផ្តល់ជំនួយទាំងសម្ភារៈ និងថវិកា​ ដើម្បីគាំទ្រអង្គភាពCMAC ក្នុងការបោសសម្អាតមីននៅកម្ពុជា ជាពិសេសសម្ដេចមហាបវរ​ធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា​ ដែលបានផ្តល់ការគាំទ្រយ៉ាងពេញទំហឹងដល់អង្គភាពCMAC និងគោរពថ្លែងអំណរចំពោះឯកឧត្តម ឧបនាយករដ្ឋមន្រ្តី ដែ​លបានផ្ដល់ការគាំទ្រ និងតែងតែជួយសម្របសម្រួលគម្រោងនេះ។ ​ ក៏ដូចជាថ្លែងអំណរគុណចំពោះដៃគូអភិវឌ្ឍ និងម្ចាស់ជំនួយទាំងអស់ ដែលបានចូលរួមចំណែកក្នុងការអនុវត្តផែនការយុទ្ធសាស្រ្ដរបស់រាជរដ្ឋាភិបាល សំដៅឆ្ពោះទៅរកកម្ពុជាអស់ការគំរាមកំហែងដោយសារគ្រាប់មីនប្រឆាំងមនុស្ស​នៅត្រឹមចុងឆ្នាំ២០៣០ និងកាត់បន្ថយការគំរាមកំហែងដោយ​សារបញ្ហាសំណល់គ្រាប់យុទ្ធភណ្ឌសង្គ្រា​ម​ត្រឹមឆ្នាំ២០៣៥។

ថ្នាក់ដឹកនាំ មន្រ្តី-បុគ្គលិកទាំងអស់នៃមជ្ឈមណ្ឌលសកម្មភាពកំចាត់មីនកម្ពុជា សូមព្រះបរមរាជានុញ្ញាតសម្តែងគារវកិច្ចក្នុងមនោសញ្ចេតនារំភើបរីករាយក្រៃលែងថ្វាយ ព្រះករុណាជា អម្ចាស់ជីវិតលើត្បូង ជាទីគោរពសក្ការៈដ៏ខ្ពង់ខ្ពស់បំផុត ក្នុងឱកាសប្រកបដោយអភិសិរីមង្គលនៃព្រះរាជពិធីបុណ្យចម្រើនព្រះជន្មាយុរបស់ ព្រះករុណាជាអម្ចាស់ជីវិតលើត្បូង គម្រប់៧៣ យាង​ចូល៧៤ព្រះវស្សា សូមថ្វាយព្រះពរព្រះអង្គឆាប់ជាសះស្បើយពីព្រះរោ​គា និងមានព្រះរាជសុខភាពល្អបរិបូរណ៍ ព្រះកាយពលមាំមួន ព្រះបញ្ញាញាណភ្លឺថ្លានិងព្រះជន្មាយុយឺន​យូរ។
នាឱកាសដ៏មហានក្ខត្តឫក្សវិសេសវិសាលនេះ ទូលព្រះបង្គំសូមលើកហត្ថប្រណម្យបួងសួងដល់គុណបុណ្យព្រះរតនត្រ័យ វត្ថុស័ក្ដិសិទ្ធិទាំងឡាយក្នុងលោក មានទេវតារក្សាព្រះមហាស្វេតច្ឆត្រ ព្រមទាំងទេវតាឆ្នាំថ្មីព្រះនាម រាក្យសាទេវី សូមជួយប្រោះព្រំសព្ទសាធុការពរ សិរីសួស្ដី ជ័យមង្គល វិបុលសុខ បវរមហាប្រសើរថ្វាយ
ព្រះករុណាជាអម្ចាស់ជីវិតលើត្បូង ជាទីគោរពសក្ការៈដ៏ខ្ពង់ខ្ពស់បំផុត សូមព្រះអង្គបានប្រកបដោយព្រះពុទ្ធពរទាំងបួនប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ។