នាយកដ្ឋានបុគ្គលិក នៃក្រសួងសេដ្ឋកិច្ចនិងហិរញ្ញវត្ថុ Personnel Department

សេចក្ដីជូនដំណឹង ស្ដីពីការជ្រើសរើសបេក្ខជនជាProgrammer ០២រូប ដើម្បីចូលបម្រើការងារជាមន្ត្រីជាប់កិច្ចសន្យា នៅនាយកដ្ឋានបុគ្គលិក នៃអគ្គលេខាធិការដ្ឋាន ក្រសួងសេដ្ឋកិច្ច និងហិរញ្ញវត្ថុ។

នាព្រឹកថ្ងៃចន្ទ ២កើត ខែជេស្ឋ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី១៨ ខែឧសភា ឆ្នាំ២០២៦នៅសាលាខេត្តព្រះវិហារ, លោកស្រី ថោង វណ្ណសុជីវី អនុប្រធាននាយកដ្ឋានបុគ្គលិក និងសហការីតំណាងអគ្គលេខាធិការដ្ឋានក្រសួងសេដ្ឋកិច្ចនិងហិរញ្ញវត្ថុ បានអញ្ជើញចូលរួមក្នុងពិធីប្រកាសចូលកាន់មុខតំណែងលោក ជា សុជាតិ ប្រធានរតនាគារខេត្តព្រះវិហារ ក្រោមអធិបតីភាពរបស់ឯកឧត្តម វ៉ាន់ ពុទ្ធិពល អនុរដ្ឋលេខាធិការ តំណាងដ៏ខ្ពង់ខ្ពស់របស់ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រីរដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ និងឯកឧត្តម ប្រាក់ សុវណ្ណ ប្រធានក្រុមប្រឹក្សាខេត្តវិហារ ឯកឧត្តម គីម រិទ្ធី អភិបាល នៃគណៈអភិបាលខេត្តព្រះវិហារ ។ ក្នុងពិធីនេះក៏មានការចូលរួមពីថ្នាក់ដឹកនាំព្រមទាំងលោក លោកស្រីតំណាងមន្ទីរជំនាញជុំវិញខេត្ត, មេបញ្ជាការកងកម្លាំងប្រដាប់អាវុធទាំង ៣ប្រភេទ, នាយករដ្ឋបាលខេត្ត, ប្រធានច្រកទ្វារព្រំដែនអន្តរជាតិ,អភិបាលក្រុង ស្រុក មេឃុំ ចៅសង្កាត់, តំណាងសាខាគយ ពន្ធដារ រតនាគារខេត្ត និងមន្ត្រីរាជការនៃអង្គភាពជំនាញជុំវិញខេត្តមួយចំនួនទៀត។

នាព្រឹកថ្ងៃសុក្រ ៧រោច ខែពិសាខ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី៨ ខែឧសភា ឆ្នាំ២០២៦ នៅទីស្ដីការក្រសួងសេដ្ឋកិច្ចនិងហិរញ្ញវត្ថុ, លោកប្រធាននាយកដ្ឋានបុគ្គលិក និងជាប្រធានលេខាធិការដ្ឋានក្រុមការងារទទួលបន្ទុកការធ្វើបច្ចុប្បន្នភាពរចនាសម្ព័ន្ធ និងជំរឿនមន្ត្រីជាក់ស្តែងនៅតាមរចនាសម្ព័ន្ធរបស់ក្រសួងសេដ្ឋកិច្ចនិងហិរញ្ញវត្ថុ (ក.ប.ជ) បានដឹកនាំកិច្ចប្រជុំពិភាក្សាកម្រិតបច្ចេកទេសលើវឌ្ឍនភាពនៃការអនុវត្តការងារធ្វើបច្ចុប្បន្នភាពរចនាសម្ព័ន្ធ និងជំរឿនមន្ត្រីជាក់ស្ដែងនៅតាមរចនាសម្ព័ន្ធរបស់ កសហវ. ដោយមានការចូលរួមពីលោក លោកស្រីអនុប្រធាននាយកដ្ឋាន លោក លោកស្រីប្រធានការិយាល័យ និងមន្ត្រីជំនាញពាក់ព័ន្ធ។ កិច្ចប្រជុំនេះ ត្រូវបានរៀបចំឡើងក្នុងគោលបំណងតាមដាននូវវឌ្ឍនភាពដែលសម្រេចបាន និងពិនិត្យពិភាក្សាលើបញ្ហាប្រឈមនានារបស់បណ្តាអង្គភាព ដើម្បីរកដំណោះស្រាយឆ្លើយតបសមស្រប ក្នុងន័យធានាបាននូវប្រសិទ្ធភាពការងារ និងអាចសម្រេចបានតាមពេលវេលាដែលបានកំណត់។

នារសៀលថ្ងៃព្រហស្បតិ៍ ១៤កើត ខែពិសាខ ឆ្នាំមមី អដ្ឋស័ក ព.ស.២៥៦៩ ត្រូវនឹងថ្ងៃទី៣០ ខែមេសា ឆ្នាំ២០២៦ នៅទីស្ដីការក្រសួងសេដ្ឋកិច្ចនិងហិរញ្ញវត្ថុ, លោកប្រធាននាយកដ្ឋានបុគ្គលិក តំណាងឯកឧត្តមអគ្គលេខាធិការក្រសួងសេដ្ឋកិច្ចនិងហិរញ្ញវត្ថុ បានដឹកនាំកិច្ចប្រជុំពិភាក្សាកម្រិតបច្ចេកទេសជាមួយថ្នាក់ដឹកនាំ និងមន្ត្រីជំនាញនៃអគ្គនាយកដ្ឋានរតនាគារជាតិ ដឹកនាំដោយលោកប្រធាននាយកដ្ឋានហិរញ្ញវត្ថុនិងបុគ្គលិក ដោយមានការចូលរួមពីលោក លោកស្រីអនុប្រធាននាយកដ្ឋាន លោក លោកស្រីប្រធានការិយាល័យ និងមន្ត្រីជំនាញពាក់ព័ន្ធ ដើម្បីពិនិត្យពិភាក្សាលើស្ថានភាពធនធានមនុស្សរបស់អគ្គនាយកដ្ឋានរតនាគារជាតិ។ កិច្ចប្រជុំនេះ ត្រូវបានរៀបចំឡើងក្នុងគោលបំណងពិនិត្យពិភាក្សា និងវិនិច្ឆ័យបន្ថែមលើស្ថានភាពនៃធនធានមនុស្សនៅតាមរចនាសម្ព័ន្ធរបស់អង្គភាពក្រោមឱវាទអគ្គនាយកដ្ឋានរតនាគារជាតិទាំងថ្នាក់កណ្តាល និងថ្នាក់មូលដ្ឋាន ក្នុងន័យគិតគូររៀបចំបំពេញមន្ត្រីឱ្យបានសមស្របទៅតាមតម្រូវការជាក់ស្តែង ដើម្បីធានានិរន្តរភាព និងប្រសិទ្ធភាពនៃការអនុវត្តការងាររបស់អង្គភាព ព្រមទាំងអនុលោមតាមទិសដៅនៃការកែទម្រង់រដ្ឋបាលសាធារណៈរបស់រាជរដ្ឋាភិបាលក្នុងការប្រើប្រាស់ធនធានមនុស្ស។

កិច្ចប្រជុំចែករំលែកបទពិសោធន៍ពាក់ព័ន្ធនឹងការពិនិត្យឡើងវិញនិងការវិភាគមុខងារនិងរចនាសម្ព័ន្ធក្រសួងសេដ្ឋកិច្ចនិងហិរញ្ញវត្ថុ (ក.ស.ហ.វ.)
- - - -
នាព្រឹកថ្ងៃទី២៤ ខែមេសា ឆ្នាំ២០២៦ លោកប្រធាននាយកដ្ឋានបុគ្គលិក ក្នុងនាមក្រុមការងារកែទម្រង់រដ្ឋបាលសាធារណៈនៃក្រសួងសេដ្ឋកិច្ចនិងហិរញ្ញវត្ថុ (ក.រ.ស.កសហវ.) និងលោកប្រធាននាយកដ្ឋានបច្ចេកវិទ្យាព័ត៌មាន នៃអគ្គលេខាធិការដ្ឋាន កសហវ. ព្រមទាំងក្រុមការងារកែទម្រង់រដ្ឋបាលសាធារណៈនៃ កសហវ. បានអញ្ជើញចូលរួមកិច្ចប្រជុំចែករំលែកបទពិសោធពាក់ព័ន្ធនឹងការអនុវត្តការងារក្នុងក្របខណ្ឌកែទម្រង់រដ្ឋាបាលសាធារណៈរបស់ក្រសួងសេដ្ឋកិច្ចនិងហិរញ្ញវត្ថុ ជូនថ្នាក់ដឹកនាំ និងមន្ត្រីជំនាញនៃមជ្ឈមណ្ឌលបច្ចេកវិទ្យាហិរញ្ញវត្ថុនិងជាអង្គភាពបរិវត្តកម្មឌីជីថលនៃ អ.ស.ហ.។
តាមរយៈកិច្ចប្រជុំនេះ លោកប្រធាននាយកដ្ឋានបុគ្គលិក និងជាប្រធានលេខាធិការដ្ឋាន ក.រ.ស.កសហវ. បានចែករំលែកជូនអង្គប្រជុំនូវបទពិសោធនៃការធ្វើការពិនិត្យឡើងវិញ និងវិភាគមុខងារនិងរចនាសម្ព័ន្ធរបស់ក្រសួងសេដ្ឋកិច្ចនិងហិរញ្ញវត្ថុ និងគោលការណ៍ណែនាំ យន្តការនីតិវិធី អភិក្រមនៃការអនុវត្តការងារ ស្មារតីរួមរបស់រាជរដ្ឋាភិបាល ព្រមទាំងសមិទ្ធផលនានាដែលសម្រេចបានក្រោមការសម្របសម្រួលរបស់ក្រសួងមុខងារសាធារណៈ ក្នុងនាមជាលេខាធិការដ្ឋាននៃ គ.វ.រ ដើម្បីជាធាតុចូល និងជាគុណប្រយោជន៍ដល់ការពិនិត្យឡើងវិញនិងវិភាគមុខងារនិងរចនាសម្ព័ន្ធរបស់ អ.ស.ហ. ពាក់ព័ន្ធនឹងបច្ចេកវិទ្យាហិរញ្ញវត្ថុនិងបរិវត្តកម្មឌីជីថល។
កិច្ចប្រជុំនេះ ក៏មានការធ្វើបទបង្ហាញចំនួន ២ រួមមាន៖
១. បទបង្ហាញស្តីពីការពិនិត្យឡើងវិញនិងការវិភាគមុខងារនិងរចនាសម្ព័ន្ធពាក់ព័ន្ធនឹងបច្ចេកវិទ្យាហិរញ្ញវត្ថុនិងបរិវត្តកម្មឌីជីថលរបស់ អ.ស.ហ.” និង
២. បទបង្ហាញស្តីពីវឌ្ឍនភាពការងារ ការពិនិត្យឡើងវិញនិងវិភាគមុខងារនិងរចនាសម្ព័ន្ធរបស់ ក.ស.ហ.វ.”។

នាព្រឹកថ្ងៃទី២០ ខែមេសា ឆ្នាំ២០២៦ នៅទីស្ដីការក្រសួងសេដ្ឋកិច្ចនិងហិរញ្ញវត្ថុ, លោកប្រធាននាយកដ្ឋានបុគ្គលិក បានដឹកនាំកិច្ចប្រជុំផ្ទៃក្នុងរបស់នាយកដ្ឋាន ដោយមានការចូលរួមពី លោក លោកស្រីអនុប្រធាននាយកដ្ឋាន លោក លោកស្រីប្រធានការិយាល័យ លោក លោកស្រីអនុប្រធានការិយាល័យ និងមន្ត្រីជំនាញពាក់ព័ន្ធ នៃនាយកដ្ឋានបុគ្គលិក ក្នុងគោលបំណង ពិនិត្យ ពិភាក្សា លើរបៀបវារៈដូចខាងក្រោម៖
១. ពិនិត្យលើកិច្ចការងារទូទៅ, វឌ្ឍនភាពការងារកែទម្រង់, ការងារអភិវឌ្ឍស្ថាប័ន, ការងារប្រចាំថ្ងៃ
២.ពិនិត្យលើគោលការណ៍ណែនាំផ្ទៃក្នុងនិង បែបបទនៃការត្រួតពិនិត្យនិងវាយតម្លៃសមិទ្ធកម្មបុគ្គលិក
៣. ផ្សេងៗ
ឆ្លៀតក្នុងឱកាសនោះដែរ លោកប្រធាននាយកដ្ឋានក៏បានផ្ដល់អនុសាសន៍បន្ថែមលើកិច្ចការការងារផ្ទៃក្នុងរបស់នាយកដ្ឋានក្នុងន័យពង្រឹងកិច្ចការងារបុគ្គលិកឱ្យកាន់តែមានប្រសិទ្ធភាព។

សេចក្ដីជូនដំណឹងស្ដីពីការកែសម្រួលមុខវិជ្ជាមួយចំនួនរបស់អាហារូបករណ៍នៅប្រទេសនូវែលសេឡង់ក្រោមប្រធានបទ"Mid-Level Public Sector Leadership" ។
តំណភ្ជាប់សម្រាប់ទាញយកឯកសារ ៖ https://pd.mef.gov.kh//storage/files/April2026/EjjL0pNfWeVpVlCYjvRB.pdf

នាព្រឹកថ្ងៃពុធ ៦រោច ខែចេត្រ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី៨ ខែមេសា ឆ្នាំ២០២៦នៅសាលាជាតិគយ, ក្រុមការងារនៃនាយកដ្ឋានបុគ្គលិក បានចូលរួមសម្របសម្រួលគាំទ្រដល់កិច្ចដំណើរការរៀបចំ “ពិធីសំណេះសំណាលជាមួយនិវត្តជនរបស់សមាគមសង្គហៈមិត្ត បុគ្គលិក មន្ត្រីរាជការនៃក្រសួងសេដ្ឋកិច្ចនិងហិរញ្ញវត្ថុ” ក្រោមអធិបតីភាពដ៏ខ្ពង់ខ្ពស់របស់ លោកជំទាវ កែវ ចរិយា រដ្ឋលេខាធិការ និងជាប្រធានក្រុមប្រឹក្សាភិបាល នៃសមាគមសង្គហៈមិត្ត បុគ្គលិក មន្ត្រីរាជការ នៃក្រសួងសេដ្ឋកិច្ច និងហិរញ្ញវត្ថុ តំណាងដ៏ខ្ពង់ខ្ពស់របស់ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រីរដ្ឋមន្ត្រី ក្រសួងសេដ្ឋកិច្ចនិងហិរញ្ញ និងជាប្រធាន សមាជិកកិត្តិយស សមាគមសង្គហៈមិត្ត បុគ្គលិក មន្ត្រីរាជការ និងមានការអញ្ជើញចូលរួមពីឯកឧត្ដម លោកជំទាវ ជាថ្នាក់ដឹកនាំក្រសួងសេដ្ឋកិច្ចនិងហិរញ្ញវត្ថុ និងថ្នាក់ដឹកនាំអង្គភាពក្រោមឱវាទក្រសួងសេដ្ឋកិច្ចនិងហិរញ្ញវត្ថុ ព្រមទាំងឯកឧត្តម លោកជំទាវ លោក លោកស្រី ជាប្រធាន អនុប្រធាន និងសមាជិកក្រុមប្រឹក្សាភិបាល គណៈកម្មការប្រតិបត្តិ និងលោក លោកស្រី ប្រធានមន្ទីរសេដ្ឋកិច្ចនិងហិរញ្ញវត្ថុរាជធានី ខេត្ត និងនិវត្តជននៃក្រសួងសេដ្ឋកិច្ចនិងហិរញ្ញវត្ថុ សរុបអ្នកចូលរួមប្រមាណជិត ៥០០ រូប។

នាព្រឹកថ្ងៃទី២ ខែមេសា ឆ្នាំ២០២៦ នៅទីស្ដីការក្រសួងសេដ្ឋកិច្ចនិងហិរញ្ញវត្ថុ, លោកប្រធាននាយកដ្ឋានបុគ្គលិក បានដឹកនាំកិច្ចប្រជុំផ្ទៃក្នុងនាយកដ្ឋានដោយមានការចូលរួមពីលោក លោកស្រីជាថ្នាក់ដឹកនាំនាយកដ្ឋាន និងមន្ត្រីជំនាញ ក្នុងគោលបំណង ពិនិត្យ ពិភាក្សាពីវឌ្ឍនភាព និងដោះស្រាយបញ្ហាប្រឈមនានាតាមរបៀបវារៈដូចខាងក្រោម៖
១.បទបង្ហាញស្ដីពីវឌ្ឍនភាពនៃការរៀបចំប្រព័ន្ធគ្រប់គ្រងចំណេះដឹង និងអភិវឌ្ឍសមត្ថភាពមន្ត្រីរាជការរបស់ កសហវ. (KMS)
២.បទបង្ហាញស្តីពី ការចែករំលែកចំនេះដឹង និងបទពិសោធន៍នៃការចូលរួមវគ្គបណ្តុះបណ្តាលស្ដីពី “អភិបាលកិច្ច និងគោលនយោបាយសាធារណៈ” នៅប្រទេសឥណ្ឌា
៣.ផ្សេងៗ
ក្នុងឱកាសនោះ លោកប្រធាននាយកដ្ឋាន ក៏បានផ្ដល់អនុសាសន៍ណែនាំបន្ថែមចំពោះគ្រប់បុគ្គលិក-មន្ត្រីរាជការនៃនាយកដ្ឋាន ត្រូវបន្តពង្រឹងការអនុវត្តមុខងារភារកិច្ច កិច្ចសហការល្អ និងពង្រឹងសាមគ្គីភាពផ្ទៃក្នុងនាយកដ្ឋានផងដែរ ដើម្បីធានានូវប្រសិទ្ធភាពការងារគ្រប់គ្រងធនធានមនុស្សជារួម និងត្រូវប្រកាន់ខ្ជាប់នូវវិន័យ សីលធម៌ និងការទទួលខុសត្រូវ ផ្ដល់ភាពជាគំរូសម្រាប់គ្រប់បណ្ដាអង្គភាព និងបុគ្គលិក-មន្ត្រីរាជការដទៃទៀត ។