នាយកដ្ឋាន សង្គ្រោះជនពិការដោយសារមីន - Victim Assistance Department

អាជ្ញាធរមីន ចុះសួរសុខទុក្ខ និងផ្តល់អំណោយជូនដល់កុមាររងគ្រោះដោយសារយុទ្ធភណ្ឌសល់ពីសង្គ្រាម នៅខេត្តបាត់ដំបង
====================================
បាត់ដំបង៖ នៅរសៀលថ្ងៃទី០៣ ខែមីនា ឆ្នាំ២០២៦ ឯកឧត្តម ម៉ៅ ប៊ុនញ្ញាត្ត ទីប្រឹក្សា និងជាប្រធាននាយកដ្ឋានសង្គ្រោះជនពិការដោយសារមីន តំណាងថ្នាក់ដឹកនាំអាជ្ញាធរមីន បានអញ្ជើញចុះសួរសុខទុក្ខ និងនាំយកអំណោចជាគ្រឿងឧបភោគបរិភោគ ព្រមទាំងថវិកាមួយចំនួន ផ្តល់ជូនដល់កុមាររងគ្រោះដោយសារយុទ្ធភណ្ឌសល់ពីសង្គ្រាម។

កុមាររងគ្រោះមានឈ្មោះ សុខុម ឡុងឌី អាយុ ១៣ឆ្នាំ ដែលបានជួបឧប្បត្តិហេតុផ្ទុះគ្រាប់កាលពីថ្ងៃទី២៧ ខែកុម្ភៈ ឆ្នាំ២០២៦ នៅភូមិបុះខ្នុរ ឃុំចែងមានជ័យ ស្រុកបាណន់ ខេត្តបាត់ដំបង បណ្តាលឱ្យរងរបួសធ្ងន់ពេញដងខ្លួន។ បច្ចុប្បន្ន កុមាររងគ្រោះកំពុងស្ថិតក្រោមការតាមដាន និងព្យាបាលយ៉ាងយកចិត្តទុកដាក់នៅក្នុងបន្ទប់សង្គ្រោះបន្ទាន់ នៃមន្ទីរពេទ្យបង្អែកខេត្តបាត់ដំបង។

ខេត្តបាត់ដំបង៖ ថ្ងៃទី២៦ ខែកុម្ភៈ ឆ្នាំ២០២៦ ឯកឧត្តម ម៉ៅ ប៊ុនញ្ញាត្ត ទីប្រឹក្សា និងជាប្រធាននាយកដ្ឋានសង្រ្គោះជនពិការដោយសារមីន តំណាងថ្នាក់ដឹកនាំអាជ្ញាធរមីន លោក នាង ចាន់ណារ៉ា អភិបាលស្រុកសង្កែ និងលោក សេក ចិន្រ្តា អភិបាលរងក្រុងបាត់ដំបង បានចូលរួមជាអធិបតីភាពក្នុងកិច្ចប្រជុំផ្សព្វផ្សាយច្បាប់ស្តីពីកិច្ចការពារ និងលើកកម្ពស់សិទ្ធិជនពិការ គោលនយោបាយ និងសេវាកម្មនានាដែលគាំទ្រដល់ជនមានពិការភាពជាមួយអាជ្ញាធរមូលដ្ឋានភូមិ ឃុំ/សង្កាត់ ស្រុក/ក្រុង ក្នុងខេត្តបាត់ដំបង ដែលមានគោលបំណងដើម្បីបង្កើនការយល់ដឹងបន្ថែមទៀតដល់អាជ្ញាធរមូលដ្ឋាន ក្នុងការលើកកម្ពស់ ការគិតគូរយកចិត្តទុកដាក់ និងជួយជម្រុញឲ្យមានការចូលរួមធ្វើការផ្សព្វផ្សាយបន្តដល់ជនមានពិការភាពក្នុងដែនសមត្ថកិច្ចរបស់ខ្លួន។ កិច្ចប្រជុំផ្សព្វផ្សាយនេះ មានការចូលរួមពីសំណាក់មន្រ្តីសាលាក្រុង/ស្រុក ការិយាល័យសង្គមកិច្ចក្រុង/ស្រុក តំណាងមជ្ឈមណ្ឌលស្តារលទ្ធភាពពលកម្មកាយសម្បទា ជនបង្គោលជាបណ្តាញអ្នកស្ម័គ្រជនមានពិការភាពអាជ្ញាធមីនប្រចាំស្រុក/ក្រុង អាជ្ញាធរមូលដ្ឋាន មេឃុំ/ចៅសង្កាត់ មេភូមិ/អនុភូមិ សមាជិកភូមិ ចំនួន ៥៦នាក់ (ស្ត្រី ០៨នាក់)។ កិច្ចប្រជុំនេះ បានរៀបចំធ្វើឡើងនៅសណ្ឋាគារខេមរាបាត់ដំបង១ ខេត្តបាត់ដំបង ដោយមានការគាំទ្រថវិកាបដិភាគរបស់រាជរដ្ឋាភិបាល ក្នុងគម្រោងបោសសម្អាតមីនដើម្បីលទ្ធផលដំណាក់កាលទី៥ (CFR-V)។

ត្បូងឃ្មុំ៖ នៅព្រឹកថ្ងៃទី២៣ ខែធ្នូ ឆ្នាំ២០២៥ ឯកឧត្តម ម៉ៅ ប៊ុនញ្ញាត្ត ទីប្រឹក្សា និងជាប្រធាននាយកដ្ឋានសង្គ្រោះជនពិការដោយសារមីន តំណាងថ្នាក់ដឹកនាំអាជ្ញាធរមីនបាននាំយកគ្រឿងឧបភោគបរិភោគ និងថវិកាមួយចំនួនដើម្បីផ្តល់ជូនដល់ស្រ្តីរងគ្រោះឈ្មោះ វ៉ាន់ ស្រីនាង ភេទស្រី អាយុ៣៦ឆ្នាំ មានប្តីឈ្មោះ នូ ត្រា ជាវរៈកងទ័ពជួរមុខប្រចាំទិសអូរស្មាច (រងរបួសដាច់ជេីងស្ដាំ-ឆ្វេង មុខនិងដងខ្លួន) ដែលបានទទួលរងគ្រោះថ្នាក់កាលពីថ្ងៃទី២៨ ខែវិច្ឆិកា ឆ្នាំ២០២៥ នៅចំណុចភូមិកូវ ឃុំក្រែក ស្រុកពញាក្រែក ខេត្តត្បូងឃ្មុំ នៅដែលជនរងគ្រោះប្រមូលសម្រាមដុតនៅមុខផ្ទះ។ បច្ចុប្បន្នស្រ្តីរងគ្រោះបានមកសម្រាកព្យាបាលមុខរបួសបន្តនៅភូមិ/ឃុំកើតហេតុខាងលើ។

បាត់ដំបង៖ នៅរសៀលថ្ងៃទី២២ ខែធ្នូ ឆ្នាំ២០២៥ ឯកឧត្តម ម៉ៅ ប៊ុនញ្ញាត្ត ទីប្រឹក្សា និងជាប្រធាននាយកដ្ឋានសង្គ្រោះជនពិការដោយសារមីន តំណាងថ្នាក់ដឹកនាំអាជ្ញាធរមីនបាននាំយកគ្រឿងឧបភោគបរិភោគ និងថវិកាមួយចំនួនដើម្បីផ្តល់ជូនដល់ជនរងគ្រោះឈ្មោះ ប៉ុន សំហឿន ភេទប្រុស អាយុ៣៣ឆ្នាំ (រងរបួសដាច់ជេីងស្ដាំត្រឹមភ្លៅ និងដៃស្ដាំដាច់ម្រាមទាំងអស់) ដែលបានទទួលរងគ្រោះថ្នាក់កាលពីថ្ងៃទី១៩ ខែធ្នូ ឆ្នាំ២០២៥ នៅចំណុចភូមិអន្លង់ស្ដី ឃុំបួរ ស្រុកភ្នំព្រឹក ខេត្តបាត់ដំបង នៅដែលជនរងគ្រោះកំពុងតែភ្ជួរដីចម្ការរបស់គាត់ប៉ះចំមីនតោន។ បច្ចុប្បន្នជនរងគ្រោះកំពុងសម្រាកព្យាបាលមុខរបួសនៅមន្ទីរពេទ្យបង្អែកខេត្តបាត់ដំបង។

ខេត្តបាត់ដំបង៖ ថ្ងៃទី២០ ខែវិច្ឆិកា ឆ្នាំ២០២៥ ឯកឧត្តម ព្រំ សុភមង្គល អនុប្រធានអាជ្ញាធរមីន បានអញ្ជើញចូលរួមជាអធិបតីភាពក្នុងពិធីបើកសិក្ខាសាលាថ្នាក់ជាតិ ស្តីពីកិច្ចសង្រ្គោះជនរងគ្រោះថ្នាក់ដោយសារមីន និងស.ផ.ស ក្នុងគោលបំណង ដើម្បីពិភាក្សារួមគ្នាលើការអនុវត្តសកម្មភាពការងារ ការចែករំលែកចំណេះដឹង បទពិសោធន៍ និងរួមគ្នាដោះស្រាយបញ្ហាប្រឈមផ្សេងៗ ក្នុងការជួយដល់ជនរងគ្រោះថា្នក់ដោយសារមីន និងស.ផ.ស. ក្រុមគ្រួសាររបស់ពួកគាត់ និងជនមានពិការភាព ពីគ្រប់ភាគីពាក់ព័ន្ធ នឹងជួយជម្រុញលើកទឹក ចិត្តដល់ប្រតិបត្តិករសកម្មភាពមីនជាតិ និងអន្តរជាតិឱ្យគិតគូររៀបចំកម្មវិធីជួយដល់ជនរងគ្រោះថ្នាក់ដោយសារមីន និងស.ផ.ស. ដើម្បីធ្វើឱ្យប្រសើរឡើងនូវស្ថានភាពនៃការរស់នៅ ការគោរពសិទ្ធ និងការធ្វើបរិយាបន្នពួកគាត់ទៅក្នុងសង្គម។ សិក្ខាសាលានេះមានការចូលរួមដោយផ្ទាល់ និងតាមប្រព័ន្ធអនឡាញ (Zoom Metting) ពីតំណាងក្រសួង ស្ថាប័នពាក់ព័ន្ធ ប្រតិបត្តិករបោសសម្អាតមីនជាតិ អន្តរជាតិ និងដៃគូរពាក់ព័ន្ធ សរុបចំនួន ៧២នាក់ (ស្រី ១០នាក់ ជនមានពិការភាព ០៦នាក់)។ សិក្ខាសាលានេះរៀបចំធ្វើឡើងរយៈពេល០២ ថ្ងៃ ចាប់ពីថ្ងៃទី២០-២១ ខែវិច្ឆិកា ឆ្នាំ២០២៥ នៅសណ្ឋាគារក្លាស់ស៊ី ខេត្តបាត់ដំបង ដោយមានការគាំទ្រថវិកាដោយគម្រោងបោសសម្អាតមីនដើម្បីលទ្ធផលដំណាក់កាលទី៤ (CFR-IV)។

ព្រះវិហារ៖ រសៀលថ្ងៃទី២៦ ខែតុលា ឆ្នាំ២០២៥ ឯកឧត្តម ម៉ៅ ប៊ុនញ្ញាត្ត ទីប្រឹក្សា និងជាប្រធាននាយកដ្ឋានសង្គ្រោះជនពិការដោយសារមីន តំណាងថ្នាក់ដឹកនាំអាជ្ញាធរមីនបាននាំយកគ្រឿងឧបភោគបរិភោគ និងថវិកា/បច្ច័យមួយចំនួនដើម្បីផ្តល់ជូនជនរងគ្រោះ និងគ្រួសារកុមារារងគ្រោះ រួមមាន៖
១-ឈ្នោះ សៀន សុវណ្ណ ភេទប្រុស អាយុ១០ឆ្នាំ (ត្រូវជាកូនស្លាប់)
២-ឈ្នោះ សៀន ស៊ុន ភេទប្រុស អាយុ៤៣ឆ្នាំ (ត្រូវជាឳពុករងរបួសជើង និងដងខ្លួន) ដែលបានទទួលរងគ្រោះថ្នាក់កាលពីថ្ងៃទី២៥ ខែតុលា ឆ្នាំ២០២៥ នៅវេលាម៉ោង១៧៖២០នាទីល្ងាច នៅក្នុងភូមិបង្គោ៨ ឃុំស្រអែម ស្រុកជាំក្សាន្ត ខេត្តព្រះវិហារ
នៅពេលដែលកូនប្រុសជនរងគ្រោះ បានរើសយកគ្រាប់បែកចង្កោមដែលសល់ពីការបាញ់ប្រយុទ្ធគ្នាពីភាគីថៃកាលពីកំឡុងថ្ងៃទី២៤-២៨ កក្កដា ឆ្នាំ២០២៥ ។ បច្ចុប្បន្ន ជនរងគ្រោះ សៀន ស៊ុន (ត្រូវជាឳពុក) កំពុងសម្រាកព្យាបាលមុខរបួសនៅមន្ទីរពេទ្យបង្អែក ១៦មករា ខេត្តព្រះវិហារ។ ចំណែកឯសពកុមារា សឿន សុវណ្ណ( ត្រូវជាកូន) កំពុងរៀបចំធ្វើបុណ្យសពតាមប្រពៃណីនៅភូមិ/ឃុំកើតហេតុខាងលើ។

ខេត្តបាត់ដំបង៖ ថ្ងៃទី២៤ ខែតុលា ឆ្នាំ២០២៥ ឯកឧត្តម ម៉ៅ ប៊ុនញ្ញាត្ត ទីប្រឹក្សា និងជាប្រធាននាយកដ្ឋានសង្រ្គោះជនពិការដោយសារមីន តំណាងថ្នាក់ដឹកនាំអាជ្ញាធរមីន បានចូលរួមជាអធិបតីភាពក្នុងកិច្ចប្រជុំបញ្ចប់ការបកប្រែភាសាលើសេចក្តីព្រាងគោលការណ៍ណែនាំថ្នាក់ជាតិ ស្តីពីកិច្ចសង្គ្រោះជនរងគ្រោះដោយសារយុទ្ធភណ្ឌគ្រឿងផ្ទុះ ក្នុងគោលបំណងបំពេញបន្ថែមនូវធាតុចូលផ្សេងៗឱ្យបានគ្រប់ជ្រុងជ្រោយពីគ្រប់ភាគីពាក់ព័ន្ធដែលបម្រើការងារលើវិស័យពិការភាព។ កិច្ចប្រជុំនេះមានការចូលរួមពីស្ថាប័នពាក់ព័ន្ធ អង្គការជាតិ អន្តរជាតិ ប្រតិបត្តិករបោសសម្អាតមីនជាតិ អន្តរជាតិ និងដៃគូរពាក់ព័ន្ធ សរុបចំនួន ៣៥នាក់ (ស្រី ០៥នាក់ ជនមានពិការភាព ០១នាក់)។

ខេត្តបាត់ដំបង៖ ថ្ងៃទី១៧ ខែតុលា ឆ្នាំ២០២៥ ឯកឧត្តម ម៉ៅ ប៊ុនញ្ញាត្ត ទីប្រឹក្សា និងជាប្រធាននាយកដ្ឋានសង្រ្គោះជនពិការដោយសារមីន តំណាងថ្នាក់ដឹកនាំអាជ្ញាធរមីន និងលោក ហឿន ឌឿ អភិបាលរងនៃគណៈអភិបាលក្រុងបាត់ដំបង តំណាងលោកអភិបាលក្រុងបាត់ដំបង បានអញ្ជើញចូលរួមជាអធិបតីក្នុងកិច្ចប្រជុំផ្សព្វផ្សាយរបាយការណ៍លទ្ធផលស្តីពីគម្រោងសិក្សាពីគុណតម្លៃនៃគុណភាពជីវិតរបស់ជនរងគ្រោះដោយសារមីន និងស.ផ.ស. ដល់អាជ្ញាធរមូលដ្ឋាននៅក្នុងក្រុងបាត់ដំបង ស្រុករតនមណ្ឌល ស្រុកថ្មគោល និងស្រុកឯកភ្នំ នៃខេត្តបាត់ដំបង ក្នុងគោលបំណងដើម្បីផ្តល់ឲ្យអាជ្ញាធរមូលដ្ឋានទទួលបាននូវព័ត៌មានលម្អិតនៃលទ្ធផលពីការគម្រោងសិក្សា ដោយរំលេចចេញអំពីតម្រូវការ បញ្ហាប្រឈម ដំណោះស្រាយ និងប្រភេទសេវាកម្មចំគោលដៅរបស់ជនមានពិការភាព ក្នុងន័យដើម្បីស្នើសុំកិច្ចសហការសម្របសម្រួលពីអាជ្ញាធរ ដែនដីពាក់ព័ន្ធ និងស្វែងរកការជួយឧបត្ថម្ភគាំទ្រដល់ពួកគាត់ពីថ្នាក់ជាតិ និងអន្តរជាតិ ដៃគូរ និងអង្គការ ស្ថាប័ននានា ។ កិច្ចប្រជុំខាងលើ មានការចូលរួមពីសំណាក់លោក លោកស្រី ចៅសង្កាត់ មេឃុំ មេភូមិ/អនុភូមិ នៅក្នុងក្រុងបាត់ដំបង ស្រុករតនមណ្ឌល ស្រុកថ្មគោល និងស្រុកឯកភ្នំ សាខាមូលធិនិជនពិការខេត្តបាត់ដំបង តំណាងមជ្ឈមណ្ឌលស្តារលទ្ធភាពពលកម្មកាយសម្បទា ជនបង្គោលជាបណ្តាញអ្នកស្ម័គ្រចិត្តជនពិការអាជ្ញាធរមីនប្រចាំក្រុង/ស្រុក ក្នុងខេត្តបាត់ដំបង និងខេត្តប៉ៃលិន សរុបចំនួន ៦៥នាក់ (ស្ត្រី០៤នាក់ និងជនមានពិការភាព០១នាក់)។ កិច្ចប្រជុំផ្សព្វផ្សាយនេះ រៀបចំធ្វើឡើងនៅសណ្ឋាគារខេមរាបាត់ដំបង១ ខេត្តបាត់ដំបង។

ភ្នំពេញ៖ ថ្ងៃទី០៦ ខែតុលា ឆ្នាំ២០២៥ ឯកឧត្តម ម៉ៅ ប៊ុនញ្ញាត្ត ទីប្រឹក្សា និងជាប្រធាននាយកដ្ឋានសង្រ្គោះជនពិការដោយសារមីន និងក្រុមការងារនាយកដ្ឋាន បានជួបប្រជុំ និងសម្របសម្រួលដំណើរទស្សកិច្ចរបស់គណៈប្រតិភូមកពីទីភ្នាក់ងារសហប្រតិបត្តិការអន្តរជាតិ
ប្រទេសតួរគី (TIKA) ក្នុងការចុះសិក្សាស្វែងយល់អំពីការងារផ្តល់សេវាកម្មរបស់មជ្ឈមណ្ឌលស្តារលទ្ធភាពពលកម្មកាយសម្បទាគៀនឃ្លាំង និង ខេត្តសៀមរាប ក្នុងគោលបំណងដើម្បីធ្វើការសិក្សា និងវាយតម្លៃលើសំណើសុំក្នុងការជួយជួសជុលកែលម្អអគារមជ្ឈមណ្ឌលស្តារ ផ្តល់ការបណ្តុះបណ្តាលអ្នកជំនាញផលិតអវៈយវៈសិប្បនិម្មិត/ព្យាបាលដោយចលនា និងធ្វើឲ្យប្រសើរឡើងនូវសម្ភារៈបរិក្ខាចាំបាច់មួយចំនួនក្នុងការផលិតអវៈយវៈសិប្បនិម្មិត និងផ្តល់រទេះរុញ ដល់មជ្ឈមណ្ឌលស្តារលទ្ធភាពពលកម្មកាយសម្បទាគៀនឃ្លាំង និងខេត្តសៀមរាប។

ខេត្តបាត់ដំបង៖ ថ្ងៃទី១៧ ខែកញ្ញា ឆ្នាំ២០២៥ ឯកឧត្តម ម៉ៅ ប៊ុនញ្ញាត្ត ទីប្រឹក្សា និងជាប្រធាននាយកដ្ឋានសង្រ្គោះជនពិការដោយសារមីន តំណាងថ្នាក់ដឹកនាំអាជ្ញាធរមីន បានចូលរួមសម្របសម្រួល និងដឹកនាំកិច្ចប្រជុំពិគ្រោះយោបល់លើសេចក្តីព្រាងចុងក្រោយនៃគោលការណ៍ណែនាំថ្នាក់ជាតិស្តីពីកិច្ចសង្គ្រោះជនរងគ្រោះដោយសារយុទ្ធភណ្ឌគ្រឿងផ្ទុះ ក្នុងគោលបំណងដើម្បីធ្វើការប្រមូលធាតុចូល និងមតិយោបល់បន្ថែមចុងក្រោយ ឱ្យបានគ្រប់ជ្រុងជ្រោយពីគ្រប់ភាគីពាក់ព័ន្ធដែលបម្រើការងារលើវិស័យសកម្មភាពមីន និងពិការភាព។ កិច្ចប្រជុំនេះមានការចូលរួមពីមន្ទីរ/អង្គភាព អង្គការជាតិ អន្តរជាតិ ប្រតិបត្តិករបោសសម្អាតមីនជាតិ អន្តរជាតិ និងដៃគូរពាក់ព័ន្ធ សរុបចំនួន ៣៥នាក់ (ស្រី ០៥នាក់) និងជនមានពិការភាព០១នាក់។ កិច្ចប្រជុំនេះបានរៀបចំធ្វើឡើងនៅសណ្ឋាគារក្លាស់ស៊ី ខេត្តបាត់ដំបង ដោយមានការគាំទ្រថវិកាដោយគម្រោងបោសសម្អាតមីនដើម្បីលទ្ធផលដំណាក់កាលទី៤ (CFR-IV)។

ខេត្តពោធិ៍សាត់៖ ថ្ងៃទី១២ ខែកញ្ញា ឆ្នាំ២០២៥ ឯកឧត្តម ម៉ៅ ប៊ុនញ្ញាត្ត ទីប្រឹក្សា និងជាប្រធាននាយកដ្ឋានសង្រ្គោះជនពិការដោយសារមីន តំណាងថ្នាក់ដឹកនាំអាជ្ញាធរមីន និងលោកជំទាវ ប៉ុក ណាឌី អភិបាលរងខេត្តពោធិ៍សាត់ តំណាងឯកឧត្តមអភិបាលខេត្តពោធិ៍សាត់ បានចូលរួមជាអធិបតីភាពក្នុងកិច្ចប្រជុំផ្សព្វផ្សាយច្បាប់ស្តីពីកិច្ចការពារ និងលើកកម្ពស់សិទ្ធិជនពិការ ផែនការយុទ្ធសាស្រ្តជាតិស្តីពីពិការភាព គោលនយោបាយ ស្តង់ដារ បទដ្ឋាន និងសេវាកម្មនានាដែលគាំទ្រដល់ជនមានពិការភាពជាមួយអាជ្ញាធរមូលដ្ឋានភូមិ ឃុំ/សង្កាត់ ស្រុក/ក្រុង ក្នុងខេត្តពោធិ៍សាត់ ដែលមានគោលបំណងដើម្បីបង្កើនការយល់ដឹងបន្ថែមទៀតដល់អាជ្ញាធរមូលដ្ឋាន ក្នុងការជួយលើកកម្ពស់ការយល់ដឹង ការគិតគូរយកចិត្តទុកដាក់ និងជួយជម្រុញឲ្យមានការចូលរួមធ្វើការផ្សព្វផ្សាយបន្តដល់ជនមានពិការភាពក្នុងដែនសមត្ថកិច្ចរបស់ខ្លួន។ កិច្ចប្រជុំផ្សព្វផ្សាយនេះមានការចូលរួមពីសំណាក់មន្ទីរពាក់ព័ន្ធជុំវិញខេត្ត ក្រុមការងារផែនការសកម្មភាពកំចាត់មីនខេត្ត មន្រ្តីសាលាក្រុង ការិយាល័យសង្គមកិច្ចក្រុង អង្គការសេវាកម្មអភិវឌ្ឍន៍ជនពិការអង្គការសេវាកម្មអភិវឌ្ឍន៍ជនពិការ អង្គការ PAFID មជ្ឈមណ្ឌលស្តារលទ្ធភាពពលកម្មកាយសម្បទា និងអាជ្ញាធរមូលដ្ឋាន មេឃុំ/ចៅសង្កាត់ មេភូមិ/អនុភូមិ សមាជិកភូមិ នៅក្នុងក្រុងពោធិ៍សាត់ ខេត្តពោធិ៍សាត់ សរុបចំនួន ៧៥នាក់ (ស្រី១៥នាក់) ។ កិច្ចប្រជុំនេះបានរៀបចំធ្វើឡើងនៅសណ្ឋាគារសេនជូរី ខេត្តពោធិ៍សាត់ ដោយមានការគាំទ្រថវិកាដោយគម្រោងបោសសម្អាតមីនដើម្បីលទ្ធផលដំណាក់កាលទី៤ (CFR-IV) ។

ខេត្តបាត់ដំបង៖ ថ្ងៃទី០៥ ខែកញ្ញា ឆ្នាំ២០២៥ ឯកឧត្តម ម៉ៅ ប៊ុនញ្ញាត្ត ទីប្រឹក្សា និងជាប្រធាននាយកដ្ឋានសង្រ្គោះជនពិការដោយសារមីន តំណាងថ្នាក់ដឹកនាំអាជ្ញាធរមីន បានចូលរួមសម្របសម្រួល និងដឹកនាំកិច្ចប្រជុំក្រុមការងារបច្ចេកទេសស្តីពីកិច្ចសង្រ្គោះជនរងគ្រោះក្នុងគោលបំណង ដើម្បីពិនិត្យតាមដានលើវឌ្ឍភាពការងារនៃកិច្ចសង្រ្គោះជនរងគ្រោះដោយសារមីន/ស.ផ.ស. ដើម្បីធ្វើការកំណត់អំពីបញ្ហាប្រឈម ការស្វែងរកដំណោះស្រាយ ការកំណត់នូវតម្រូវការ និងជម្រុញកាតផ្តល់ជូននូវសេវាកម្មនានាក្នុងការជួយគាំទ្រដល់ពួកគាត់ និងធ្វើការស្វែងរកធាតុចូលបន្ថែមពីភាគីពាក់ព័ន្ធផ្នែកពិការភាព និងវិស័យសកម្មភាពមីន។កិច្ចប្រជុំនេះមានការចូលរួមដោយផ្ទាល់ និងតាមប្រព័ន្ធអនឡាញ (Zoom Meting) ពីស្ថាប័នជាតិ អង្គការ ជាតិ-អន្តរជាតិ ដែលបម្រើការងារលើវិស័យពិការភាព មន្ទីរពាក់ព័ន្ធជុំវិញខេត្ត ក្រុមការងារផែនការសកម្មភាពកំចាត់មីនខេត្តបាត់ដំបង ប្រតិបត្តិករដោះមីនជាតិ-អន្តរជាតិ មជ្ឈមណ្ឌលស្តារលទ្ធភាពពលកម្មកាយសម្បទាខេត្តបាត់ដំបង សាខាមូនិធិជនពិការខេត្តបាត់ដំបង និងជនបង្គោលជាបណ្តាញអ្នកស្ម័គ្រជនមានពិការភាពអាជ្ញាធរមីន ប្រចាំស្រុកគោលដៅ សរុបចំនួន ៧៦នាក់ (ស្រី០៩នាក់ ជនមានពិការភាព០៤នាក់) ។ កិច្ចប្រជុំនេះរៀបចំធ្វើឡើងនៅសណ្ឋាគារក្លាស់ស៊ី ខេត្តបាត់ដំបង ដោយមានការគាំទ្រថវិកាដោយគម្រោងបោសសម្អាតមីនដើម្បីលទ្ធផលដំណាក់កាលទី៤ (CFR-IV)