អគ្គនាយកដ្ឋានក្សេត្រសាស្រ្ត/ General Directorate of Agronomy

សកម្មភាព​ចុះត្រួតពិនិត្យការគ្រប់គ្រងជី-ថ្នាំកសិកម្ម ចាប់ពីថ្ងៃទី២៥ ដល់ ២៩ ខែឧសភា ឆ្នាំ២០២៦
=======================
មន្ត្រីជំនាញនៃអគ្គនាយក​ដ្ឋានក្សេត្រ​សាស្ត្រ​ និងមន្រ្តីនីតិកម្មកសិកម្ម​ខេត្ត បានយក​ចិត្ត​ទុកដាក់​ចុះត្រួតពិនិត្យទីតាំងឃ្លាំងសន្និធិជី-ថ្នាំកសិកម្ម និងដេប៉ូជី-ថ្នាំកសិកម្ម​ នៅ​រាជធានី​ភ្នំពេញ​ និងតាមបណ្ដា​​ខេត្ត​មួយ​ចំនួន​។

តាម​រយៈ​ការចុះត្រួតពិនិត្យនេះ​ មន្រ្តីជំនាញ​បានធ្វើការណែនាំដល់ក្រុមហ៊ុន និង​ដេប៉ូ​ឱ្យរៀបចំទុកដាក់ជី-ថ្នាំកសិកម្មឱ្យបានត្រឹមត្រូវតាមបច្ចេកទេសដើម្បីធានាបាននូវសុខុមាលភាព និងភាតរភាព​បរិស្ថានដល់ក្រុម​គ្រួសារ​ផ្ទាល់​ និង​ប្រជាពលរដ្ឋដែលរស់នៅជុំវិញទីតាំងនោះ ក៏​ដូច​ជា​ការ​ធ្វើ​អាជីវកម្ម​ជី​-ថ្នាំ​កសិកម្ម​ដែល​បាន​ចុះ​បញ្ជិកា​ត្រឹមត្រូវ​តាម​នីតិ​វិធី​ជា​ធរមាន​ ។

បងប្អូនអាជីវករមានសេចក្ដីសោមនស្សរីករាយចំពោះមតិណែនាំខាងលើនេះ និងខិតខំបំពេញអាជីពរបស់ខ្លួនប្រកបដោយមនសិការវិជ្ជាជីវៈ​ ។ ជា​ពិសេស​ការ​​គោរពតាមបទដ្ឋានបច្ចេកទេស​ និងការធ្វើពាណិជ្ជកម្មជី-ថ្នាំ​កសិកម្ម​ ស្របតាម​ច្បាប់​ស្ដីពី​ការ​គ្រប់គ្រង​ថ្នាំ​កសិកម្ម​ និង​ជី​កសិកម្ម​ជា​ធរមាន​ ៕

នាព្រឹកថ្ងៃទី២៨ ខែឧសភា ឆ្នាំ២០២៦ អគ្គនាយកដ្ឋានក្សេត្រសាស្រ្ត បានរៀបចំកិច្ចប្រជុំស្តីពី ការរៀបចំផែនការយុទ្ធសាស្ត្រថវិកា ៣ឆ្នាំរំកិល (២០២៧-២០២៩) ព្រមទាំងផែនការសកម្មភាព និងថវិកាឆ្នាំ២០២៧ របស់អគ្គនាយកដ្ឋានក្សេត្រសាស្រ្ត

កិច្ចប្រជុំនេះ ត្រូវបានសម្របសម្រួលដោយឯកឧត្តមបណ្ឌិត ងិន ឆាយ អគ្គនាយកនៃអគ្គនាយកដ្ឋានក្សេត្រសាស្រ្ត និងមានការអញ្ជើញចូលរួមពីសំណាក់ ឯកឧត្តមរដ្ឋលេខាធិការ ឯកឧត្តម លោកជំទាវអនុរដ្ឋលេខាធិការទទួលបន្ទុកការងារអគ្គនាយកដ្ឋានក្សេត្រសាស្រ្ត ព្រមទាំងថ្នាក់ដឹកនាំ និងមន្រ្តីក្រោមឱវាទអគ្គនាយកដ្ឋានកសិកម្មសរុបចំនួន ៣៦ នាក់ (ស្រី ៦នាក់)។
គោលបំណងនៃកិច្ចប្រជុំ គឺពិនិត្យ និងតម្រង់ទិសលើការរៀបចំផែនការយុទ្ធសាស្រ្តថវិកា ៣ឆ្នាំរំកិល ដែលបានរៀបចំឡើងដោយនាយកដ្ឋានជំនាញ ដើម្បីធានាបាននូវផែនការថវិកាមួយដែលមានលក្ខណៈគ្រប់ជ្រុងជ្រោយ ឆ្លើយតបទៅនឹងគោលនយោបាយ និងយុទ្ធសាស្រ្តរបស់ក្រសួងកសិកម្ម រុក្ខាប្រមាញ់ និងនេសាទ ក៏ដូចជាស្របតាមគោលនយោបាយថ្មីៗ របស់រាជរដ្ឋាភិបាល។

យោងតាមការណែនាំរបស់ឯកឧត្តមអគ្គនាយកនៃអគ្គនាយកដ្ឋានក្សេត្រសាស្រ្តបានចាត់តាំងលោកបណ្ឌិត សេង វ៉ាង ប្រធាននាយកដ្ឋានគ្រប់គ្រងធនធានដីនិងជីកសិកម្មនិងសហការី ព្រមទាំងមានការចូលរួមពីមន្រ្តីការិយាល័យនីតិកម្មកសិកម្មខេត្តត្បូងឃ្មុំ បានចុះធ្វើអធិការកិច្ចពង្រឹងការអនុវត្តច្បាប់ស្តីពីការគ្រប់គ្រងថ្នាំកសិកម្ម និងជីកសិកម្មនៅខេត្តត្បូងឃ្មុំ កាលពីថ្ងៃទី២៥-២៦ ខែឧសភា ឆ្នាំ២០២៦។ ក្នុងនោះបង្រ្កាបបាននូវទីតាំងស្តុកបទល្មើសជីកសិកម្មមួយកន្លែង និងដេប៉ូប្រព្រឹត្តល្មើសមួយកន្លែង ដោយអនុវត្តតាមនីតិវិធីច្បាប់តាមបទដ្ឋានគតិយុត្តជាធរមាន។
ចំពោះការងារការធ្វើអធិការកិច្ចជីឬថ្នាំកសិកម្មនេះ ទាមទារឱ្យមានការចូលរួមពីសមត្ថកិច្ចពាក់ព័ន្ធ ដេប៉ូអាជីវករ និងអ្នកប្រើប្រាស់ជីថ្នាំកសិកម្ម។ គោលបំណងសំខាន់ៗនៃការធ្វើអធិការកិច្ចនេះ រួមមានការត្រួតពិនិត្យ ស្រាវជ្រាវ តាមដាន និងបង្រ្កាបដើម្បីរក្សាបាននូវគុណភាពជីនិងថ្នាំកសិកម្ម ការពារផលប្រយោជន៍ស្របច្បាប់របស់ក្រុមហ៊ុនឬគ្រឹះស្ថានលក់ដុំលក់រាយជីនិងថ្នាំកសិកម្មដែលទទួលបានការអនុញ្ញាតពីក្រសួងកសិកម្ម រុក្ខាប្រមាញ់ និងនេសាទ។ល។

ដោយឡែកក្រុមការងារក៍បានចុះពិនិត្យទីតាំងមួយកន្លែងរបស់កសិករដែលប្រកបរបរផលិតជីសរីរាង្គមួយកន្លែង ក្នុងនោះក្រុមការងារបានពាំនាំប្រសាសន៍ណែនាំដ៍ខ្ពង់ខ្ពស់របស់ថ្នាក់ដឹកនាំក្រសួងក្នុងការចូលរួមគាំទ្រជម្រុញលើកទឹកចិត្តចំពោះពាណិជ្ជករដែលមានបំណងធ្វើពាណិជ្ជកម្មផលិតជីកសិកម្មក្នុងស្រុក និងត្រូវគោរពតាមបទដ្ឋានបច្ចេកទេសនិងនីតិវិធីស្តីពីការធ្វើពាណិជ្ជកម្មជីកសិកម្ម។

សកម្មភាពចុះអធិការកិច្ចពូជដំណាំ នៅក្នុងខែឧសភា ឆ្នាំ២០២៦
=======================

មន្ត្រីជំនាញនាយកដ្ឋានគ្រប់គ្រងពូជដំណាំ នៃអគ្គនាយកដ្ឋានក្សេត្រសាស្ត្រ បានសហការជាមួយមន្ទីរកសិកម្ម រុក្ខាប្រមាញ់ និងនេសាទរាជធានីភ្នំពេញ និងខេត្តមួយចំនួន ចុះត្រួតពិនិត្យអាជីវករពូជដំណាំ តាមបណ្តាដេប៉ូ ទីតាំងអាជីវកម្មគ្រាប់ពូជដំណាំ ដេប៉ូកូនដំណាំ និងរុក្ខជាតិលម្អដេីម្បីធ្វើការផ្សព្វផ្សាយ និងពង្រឹងការអនុវត្តច្បាប់ស្តីពីការគ្រប់គ្រងពូជដំណាំ និងសិទ្ធិអ្នកបង្កាត់ពូជដំណាំសំដៅធានានូវការចរាចរគ្រាប់ពូជដំណាំ កូនដំណាំ និងរុក្ខជាតិលម្អនៅលើទីផ្សារប្រកបដោយគុណភាព ដើម្បីផលប្រយោជន៍សង្គម សេដ្ឋកិច្ច និងបរិស្ថាន។

ក្នុងសកម្មភាពនេះ មន្ត្រីជំនាញបានពន្យល់ និងអប់រំណែនាំដល់អាជីវករ ដែលជាម្ចាស់អាជីវកម្មឱ្យយល់ដឹងកាន់តែច្បាស់ពីផលិតផលពូជដំណាំដែលត្រូវត្រួតពិនិត្យ និងការបំពេញលក្ខខណ្ឌភូតគាមអនាម័យនៅពេលនាំចូល ការអនុវត្តឱ្យបានត្រឹមត្រូវតាមវិធានបច្ចេកទេស មិនមានហានិភ័យដល់ផ្ទៃដីដាំដុះដំណាំ។

ជាពិសេស ត្រូវផ្គត់ផ្គង់ ចែកចាយតែផលិតផលដែលបានចុះបញ្ជិកា និងបញ្ជាក់គុណភាពត្រឹមត្រូវ ជៀសវាងការប្រព្រឹត្តល្មើសលេីអាជីវកម្មពូជដំណាំ ការផ្សព្វផ្សាយព័ត៌មានអវិជ្ជមាននៅក្នុងបណ្ដាញសង្គមដែលផ្ទុយនឹងលិខិតបទដ្ឋានគតិយុត្តជាធរមាន។ បងប្អូនអាជីវករមានសេចក្ដីសោមនស្សរីករាយចំពោះមតិណែនាំខាងលើនេះ និងខិតខំបំពេញអាជីពរបស់ខ្លួនប្រកបដោយមនសិការវិជ្ជាជីវៈ។

វគ្គបណ្តុះបណ្តាលស្តីពី ផ្ទេរបច្ចេកទេសដំណាំកៅស៊ូដល់មន្ត្រីកសិកម្មឃុំ នៅខេត្តក្រចេះ
==============================================

នាថ្ងៃទី២៦-២៧ ខែឧសភា ឆ្នាំ២០២៦ ក្រុមការងារនាយកដ្ឋានអភិវឌ្ឍន៍ដំណាំកៅស៊ូ នៃអគ្គនាយកដ្ឋានក្សេត្រសាស្ត្រ ក្រោមការដឹកនាំសម្របសម្រួលដោយលោក ឃុន កក្កដា អគ្គនាយករងនៃអគ្គនាយកដ្ឋានក្សេត្រសាស្ត្រ បានរៀបចំវគ្គបណ្តុះបណ្តាលស្តីពី ផ្ទេរបច្ចេកទេសដំណាំកៅស៊ូដល់មន្ត្រីកសិកម្មឃុំ នៅខេត្តក្រចេះ ដោយមានការអញ្ជើញចូលរួមដោយលោក អោក ដារុណ អនុប្រធានមន្ទីរកសិកម្ម រុក្ខាប្រមាញ់ និងនេសាទខេត្ត មន្រ្តីការិយាល័យកៅស៊ូ និងមន្ត្រីកសិកម្មឃុំ សរុបចំនួន ៥០រូប (ស្រី២២រូប)។
គោលបំណងនៃវគ្គបណ្តុះបណ្តាលនេះ គឺដើម្បីលើក​កម្ពស់​​ការយល់ដឹងអំពី​បច្ចេកទេសដំណាំ​កៅ​ស៊ូ ​ដូចជា​ការដាំដុះ ​ ការថែទាំ​ ការកា​​​​រ​ពារ និងព្យាបាលជំងឺ​និងការយកផលទឹកជ័រឱ្យបានល្អប្រសើរ និងមាននិរន្តរភាព ដល់​មន្ត្រី​កសិកម្មឃុំ​សម្រាប់យកទៅចែករំលែក​ ណែនាំ​ និងផ្សព្វផ្សាយបន្ត ជូនដល់កសិករកៅស៊ូគ្រួសារ។

សកម្មភាព​ចុះត្រួតពិនិត្យការគ្រប់គ្រងជី-ថ្នាំកសិកម្ម​ ពីថ្ងៃទី១៨ ដល់ ២២ ខែឧសភា ឆ្នាំ២០២៦
=======================
មន្ត្រីជំនាញនៃអគ្គនាយក​ដ្ឋានក្សេត្រ​សាស្ត្រ​ និងមន្រ្តីនីតិកម្មកសិកម្ម​ខេត្ត បានយក​ចិត្ត​ទុកដាក់​ចុះត្រួតពិនិត្យទីតាំងឃ្លាំងសន្និធិជី-ថ្នាំកសិកម្ម និងដេប៉ូ​ជី-ថ្នាំកសិកម្ម​នៅ​រាជធានី​ភ្នំពេញ​ និង​តាម​បណ្ដា​ខេត្ត​មួយ​ចំនួន​។

តាម​រយៈ​ការចុះត្រួតពិនិត្យនេះ​ មន្រ្តីជំនាញ​បានធ្វើការណែនាំដល់ក្រុមហ៊ុន និង​ដេប៉ូ​ឱ្យរៀបចំទុកដាក់ជី-ថ្នាំកសិកម្មឱ្យបានត្រឹមត្រូវតាមបច្ចេកទេសស្របតាមបមាណីយដើម្បីធានាបាននូវសុខុមាលភាព និងភាតរភាព​បរិស្ថានដល់ក្រុម​គ្រួសារ​ផ្ទាល់​ និង​ប្រជាពលរដ្ឋដែលរស់នៅជុំវិញទីតាំងនោះ ។

ជា​ពិសេស​ បង​ប្អូន​អាជីវករ​ត្រូវ​ជួយពន្យល់ណែនាំដល់កសិករ​ ដោយ​សហការ​ជាមួយ​មន្ត្រី​កសិកម្ម​ឃុំ​ អំពីការ​ប្រើប្រាស់ជី និងថ្នាំកសិកម្មឱ្យបានត្រឹមត្រូវតាមបច្ចេកទេស ដែល​ធានា​បាន​នូវ​គុណភាព​សម្រាប់​ការ​ដាំដុះ​ ក៏ដូចជាចូលរួមកាត់បន្ថយថ្លៃដើមផលិត ដើម្បីបង្កើនប្រាក់ចំណេញ​របស់ប្រជាកសិករ​ និង​ត្រូវ​លក់​ដូរ​តែ​ជី​-ថ្នាំ​កសិកម្ម​ដែល​បាន​ចុះ​បញ្ជិកា​ត្រឹមត្រូវ​​ ដោយ​អនុលោម​តាម​ច្បាប់​ស្ដីពី​ការ​គ្រប់គ្រង​ថ្នាំ​កសិកម្ម​ និង​ជី​កសិកម្ម​ក្នុង​ការ​បំពេញ​អា​ជីព​របស់​ខ្លួន​ប្រកប​ដោយ​មនសិការ​វិជ្ជាជីវៈ​ ៕

ការចុះពិនិត្យស្ថានភាពសមាសភាពចង្រៃលើដំណាំដូងក្រអូប ស្ថិតនៅភូមិអណ្តូងប្រេង ឃុំឈានឡើង ស្រុកសាមគ្គីមានជ័យ ខេត្តកំពង់ឆ្នាំង

កាលពីថ្ងៃទី១៧ ខែឧសភា ឆ្នាំ២០២៦ លោក ហេង ឈុនហ៊ី អនុប្រធាននាយកដ្ឋានការពារដំណាំ អនាម័យ និងភូតគាមអនាម័យ បានដឹកនាំសហការីចំនួន៤រូប ចុះពិនិត្យស្ថានភាពសមាសភាពចង្រៃលើដំណាំដូងក្រអូប ក្នុងចម្ការមួយកន្លែងដែលស្ថិតនៅភូមិអណ្តូងប្រេង ឃុំឈានឡើង ស្រុកសាមគ្គីមានជ័យ ខេត្តកំពង់ឆ្នាំង។

យោងតាមលទ្ធផលនៃការចុះពិនិត្យជាក់ស្តែងឃើញថា ចម្ការដូងក្រអូបដែលមានផ្ទៃដីសរុបប្រមាណ១៧ហិកតា និងមានដើមដូងសុរបប្រមាណ ៣ ២០០ដើម ដែលបច្ចុប្បន្នដើមដូងមួយចំនួនកំពុងទទួលរងការបំផ្លាញពីដង្កូវស៊ីស្លឹកដូង។

រោគសញ្ញានៃការបំផ្លាញ រួមមាន៖ ស្លឹកប្រែជាពណ៌ត្នោត មានលក្ខណៈក្រៀម ដែលមើលពីចម្ងាយមានសភាពដូចជាត្រូវភ្លើងឆេះ ហើយស្លឹកដូងមិនអាចធ្វើរស្មីសំយោគបាន និងបណ្តាលឱ្យងាប់ដើមតែម្តង។ ការបំផ្លាញនេះ ចាប់ផ្តើមដំបូងពីធាងស្លឹកចាស់ៗ (ផ្នែកខាងក្រោម) រួចទើបរាលដាលឡើងទៅផ្នែកខាងលើ។

អនុសាសន៍៖
- ត្រូវកាត់ធាងស្លឹកដែលរងការបំផ្លាញខ្លាំង យកទៅដុតចោលជាបន្ទាន់ ដើម្បីកម្ចាត់ដង្កូវ និងដក់ដឿ (Pupa) ដែលលាក់ខ្លួននៅក្នុងនោះ
- ត្រូវសម្អាតស្មៅទាំងជុំវិញគល់ និងនៅក្នុងចម្ការទាំងមូលឱ្យបានស្អាតល្អ។
- ជីករណ្តៅជុំវិញគល់ចំនួន ៣កន្លែង និងដាក់ថ្នាំប្រភេទ Fipronil 0.3% ក្នុងកម្រិត ២០០ ក្រាម ទៅ ២៥០ ក្រាម ក្នុងមួយដើម (បរិមាណប្រែប្រួលទៅតាមទំហំអាយុកាលរបស់ដើមដូង ចៀសវាងការប្រើប្រាស់វិធានការគីមីនេះលើដើមដូងណាដែលជិតប្រមូលផល (ដូងខ្ចីសម្រាប់ហូបទឹក) និងត្រូវទុកចន្លោះពេលរង់ចាំ (Pre-Harvest Interval) យ៉ាងតិច ៣០ ថ្ងៃ ទៅ ៤៥ ថ្ងៃ ក្រោយពេលដាក់ថ្នាំ ដើម្បីធានាសុវត្ថិភាពដល់អ្នកបរិភោគ។

សកម្មភាពចុះត្រួតពិនិត្យការគ្រប់គ្រងជី-ថ្នាំកសិកម្ម
========================
ចាប់ពីថ្ងៃទី១១ ដល់ ១៥ ខែឧសភា ឆ្នាំ២០២៦ មន្ត្រីជំនាញនៃអគ្គនាយកដ្ឋានក្សេត្រសាស្ត្រ និងមន្រ្តីនីតិកម្មកសិកម្មខេត្ត បានយកចិត្តទុកដាក់ចុះត្រួតពិនិត្យទីតាំងលាយផ្សំ វេចខ្ចប់ជាថ្មីជីកសិកម្ម និងដេប៉ូជី-ថ្នាំកសិកម្មនៅរាជធានីភ្នំពេញ និងតាមបណ្ដាខេត្តមួយចំនួន ។

តាមរយៈការចុះត្រួតពិនិត្យនេះ មន្រ្តីជំនាញបានធ្វើការណែនាំដល់ក្រុមហ៊ុន និងដេប៉ូឱ្យរៀបចំទុកដាក់ជី-ថ្នាំកសិកម្មឱ្យបានត្រឹមត្រូវតាមវិធានបច្ចេកទេសដើម្បីធានាបាននូវសុខុមាលភាព និងភាតរភាពបរិស្ថានដល់ក្រុមគ្រួសារផ្ទាល់ និងប្រជាពលរដ្ឋដែលរស់នៅជុំវិញទីតាំងនោះ និងការប្រកបមុខរបរអាជីវកម្មរបស់ខ្លួនឱ្យបានសមស្របតាមនីតិវិធីជាធរមានដេីម្បីជួយផ្ដល់ផលប្រយោជន៍ដល់ប្រជាកសិករ ។

បងប្អូនអាជីវករមានសេចក្ដីសោមនស្សរីករាយបន្ទាប់ពីទទួលបានការអប់រំណែនាំនេះ ដោយខិតខំបំពេញអាជីពរបស់ខ្លួនឱ្យបានល្អប្រសើរស្របតាមច្បាប់ស្តីពីការគ្រប់គ្រងថ្នាំកសិកម្ម និងជីកសិកម្ម និងប្រកបដោយមនសិការវិជ្ជាជីវៈ ៕

វគ្គបណ្តុះបណ្តាលស្តីពី ជំនាញចៀរជ័រកៅស៊ូដល់កសិករកៅស៊ូគ្រួសារ នៅខេត្តមណ្ឌលគីរី
==============================================

នាថ្ងៃទី១៣-១៤ ខែឧសភា ឆ្នាំ២០២៦ ក្រុមការងារ នាយកដ្ឋានអភិវឌ្ឍន៍ដំណាំកៅស៊ូ នៃអគ្គនាយកដ្ឋានក្សេត្រសាស្ត្រ ក្រោមការដឹកនាំសម្របសម្រួលដោយលោក ញាណ សុភា ប្រធាននាយកដ្ឋានអភិវឌ្ឍន៍ដំណាំកៅស៊ូ បានរៀបចំវគ្គបណ្តុះបណ្តាលស្តីពី ជំនាញចៀរជ័រកៅស៊ូដល់កសិករកៅស៊ូគ្រួសារ នៅខេត្តមណ្ឌលគីរី ដោយមានការអញ្ជើញចូលរួមពីលោក តេះ សេន ប្រធានសហគមន៍កសិកម្មកៅស៊ូគ្រួសារពេជ្រាដា និងសហការី មន្រ្តីកសិកម្មឃុំ និងកសិករ សរុបចំនួន ៤០រូប។

គោលបំណងនៃវគ្គបណ្តុះបណ្តាលនេះ គឺបង្រៀនពីបច្ចេកទេសជំនាញចៀរជ័រដល់កសិករ ស្វែងយល់ពីសារៈប្រយោជន៍នៃដំណាំកៅស៊ូ ការថែទាំ ការបង្ការនិងការព្យាបាលជំងឺ បច្ចេកទេសបើកមុខចៀរដំបូង ការគ្រប់គ្រងផ្ទាំងចៀរ ការព្យាបាលជំងឺលើផ្ទាំងមុខចៀរ ក្នុងគោលដៅរក្សារស្ថេរភាពនៃការប្រមូលផល និងប្រសិទ្ធភាពសេដ្ឋកិច្ច។

សកម្មភាពចុះអធិការកិច្ចពូជដំណាំ
នាដើមខែឧសភា ឆ្នាំ២០២៦
=======================
មន្ត្រីជំនាញនាយកដ្ឋានគ្រប់គ្រងពូជដំណាំ នៃអគ្គនាយកដ្ឋានក្សេត្រសាស្ត្រ បានសហការជាមួយមន្ទីរកសិកម្ម រុក្ខាប្រមាញ់ និងនេសាទរាជធានីភ្នំពេញ និងខេត្តមួយចំនួន ចុះត្រួតពិនិត្យអាជីវករពូជដំណាំ តាមបណ្តាដេប៉ូ ទីតាំងអាជីវកម្មគ្រាប់ពូជដំណាំ ដេប៉ូកូនដំណាំ និងរុក្ខជាតិលម្អមួយចំនួនដេីម្បីធ្វើការផ្សព្វផ្សាយ និងពង្រឹងការអនុវត្តច្បាប់ស្តីពីការគ្រប់គ្រងពូជដំណាំ និងសិទ្ធិអ្នកបង្កាត់ពូជដំណាំសំដៅធានានូវការចរាចរគ្រាប់ពូជដំណាំ កូនដំណាំ និងរុក្ខជាតិលម្អនៅលើទីផ្សារប្រកបដោយគុណភាព ដើម្បីផលប្រយោជន៍សង្គម សេដ្ឋកិច្ច និងបរិស្ថាន។

ក្នុងសកម្មភាពនេះ មន្ត្រីជំនាញបានពន្យល់ និងអប់រំណែនាំដល់អាជីវករ ដែលជាម្ចាស់អាជីវកម្មឱ្យយល់ដឹងកាន់តែច្បាស់ពីផលិតផលពូជដំណាំដែលត្រូវត្រួតពិនិត្យ និងការបំពេញលក្ខខណ្ឌភូតគាមអនាម័យនៅពេលនាំចូល ការអនុវត្តឱ្យបានត្រឹមត្រូវតាមវិធានបច្ចេកទេស មិនមានហានិភ័យដល់ផ្ទៃដីដាំដុះដំណាំ។ ជាពិសេស ត្រូវផ្គត់ផ្គង់ ចែកចាយតែផលិតផលដែលបានចុះបញ្ជិកា និងបញ្ជាក់គុណភាពត្រឹមត្រូវ ជៀសវាងការប្រព្រឹត្តល្មើសលេីអាជីវកម្មពូជដំណាំ ការផ្សព្វផ្សាយព័ត៌មានអវិជ្ជមាននៅក្នុងបណ្ដាញសង្គមដែលផ្ទុយនឹងលិខិតបទដ្ឋានគតិយុត្តជាធរមាន ។

បងប្អូនអាជីវករមានសេចក្ដីសោមនស្សរីករាយចំពោះមតិណែនាំខាងលើនេះ និងខិតខំបំពេញអាជីពរបស់ខ្លួនប្រកបដោយមនសិការវិជ្ជាជីវៈ។