ក្រសួងមុខងារសាធារណៈ Ministry of Civil Service Cambodia

លោកគ្រូ អ្នកគ្រូ ប្រមាណ៣០រូប ចាប់ផ្តើមដំណើការកែសន្លឹកកិច្ចការបេក្ខជនប្រឡងក្របខ័ណ្ឌក្រសួងយុត្តិធម៌

ក្រោយការកាត់ក្បាលសន្លឹកកិច្ចការ និងការចុះលេខ នៃសន្លឹកកិច្ចការរបស់បេក្ខជនប្រឡងក្របខ័ណ្ឌក្រសួងយុត្តិធម៌បានដំណើរការរួចរាល់ ខណៈនេះ លោកគ្រូ អ្នកគ្រូ ប្រមាណ៣០រូប បានកំពុងចាប់ផ្តើមដំណើការកែសន្លឹកកិច្ចការបេក្ខជន នៅក្នុងបន្ទប់នៃមណ្ឌលកំណែសាលាភូមិន្ទរដ្ឋបាល។ សម្រាប់វិញ្ញាសាដែល លោកគ្រូ អ្នកគ្រូ នឹងធ្វើកំណែនាពេលនេះរួមមាន៖ (១)វិញ្ញាសាសរសេររដ្ឋប្បវេណី (២)វិញ្ញាសាសរសេរព្រហ្មទណ្ឌ (៣)វិញ្ញាសាសរសេរទំនាក់ទំនងអន្តរជាតិ (៤)វិញ្ញាសាសរសេរភាសាអង់គ្លេស និង (៥)វិញ្ញាសាសរសេរចំណេះដឹងទូទៅ។

ដំណើរការកែសន្លឹកកិច្ចការ ស្ថិតក្រោមការឃ្លាំមើលជាប់ជាប្រចាំពី អង្គភាពប្រឆាំងអំពើពុករលួយ អនុគណៈកម្មការត្រួតពិនិត្យ និងវាយតម្លៃ ព្រមទាំងអ្នកសង្កេតការណ៍ តំណាងសកលវិទ្យាល័យ និងតំណាងសាធារណជនស្ម័គ្រចិត្ត។

ឯកឧត្តមឧបនាយករដ្ឋមន្រ្តី ហ៊ុន ម៉ានី អញ្ជើញបើកសន្លឹកកិច្ចការបេក្ខជន និងចាប់ផ្តើមធ្វើកំណែ

ព្រលឹមម៉ោង៧ព្រឹក ឯកឧត្តមឧបនាយករដ្ឋមន្រ្តី ហ៊ុន ម៉ានី ក្នុងនាមជាប្រធានគណៈកម្មការរៀបចំការប្រឡងប្រជែង បានអញ្ជើញដឹកនាំក្រុមការងារ ព្រមទាំងមានការអញ្ជើញចូលរួមពីតំណាងក្រសួង ស្ថាប័នសាមីទាំង៣ និងអង្គភាពពាក់ព័ន្ធ បើកសន្លឹកកិច្ចការរបស់បេក្ខជនដែលបានចូលរួមប្រឡងប្រជែងជ្រើសរើសមន្ត្រីរាជការ ឱ្យចូលបម្រើការងារក្នុងក្របខ័ណ្ឌ (១)ក្រសួងយុត្តិធម៌ (២)រដ្ឋលេខាធិការដ្ឋានកិច្ចការព្រំដែន និង (៣)ក្រសួងការបរទេស និងសហប្រតិបត្តិការអន្តរជាតិ ដើម្បីចាប់ផ្តើមអនុវត្តនីតិវិធីកែសន្លឹកកិច្ចការរបស់បេក្ខជន នៅមណ្ឌលកំណែសាលាភូមិន្ទរដ្ឋបាល។

ដើម្បីធានាសុក្រឹត្យភាព និងផ្តល់ទំនុកចិត្តខ្ពស់នៅក្នុងដំណើរការកែសន្លឹកកិច្ចការបេក្ខជន តាមរយៈការកាត់ក្បាលសន្លឹកកិច្ចការ ការចុះលេខ និងការអនុវត្តនីតិវិធីនានា គឺស្ថិតក្រោមការឃ្លាំមើលជាប់ជាប្រចាំពី អង្គភាពប្រឆាំងអំពើពុករលួយ(ACU) អនុគណៈកម្មការត្រួតពិនិត្យ និងវាយតម្លៃ ព្រមទាំងអ្នកសង្កេតការណ៍តំណាងសកលវិទ្យាល័យ និងសាធារណជនស្ម័គ្រចិត្ត។

អបអរសាទរ ខួបលើកទី៧៧ ទិវាកុមារអន្តរជាតិ ១មិថុនា ខួបលើកទី២៥ ទិវាពិភពលោកប្រឆាំងពលកម្មកុមារ ១២មិថុនា និងទិវាកុមារកម្ពុជាឆ្នាំ២០២៦

ខួបលើកទី៧៧ ទិវាកុមារអន្តរជាតិ ១មិថុនា ខួបលើកទី២៥ ទិវាពិភពលោកប្រឆាំងពលកម្មកុមារ ១២ មិថុនា​ និងទិវាកុមារកម្ពុជាឆ្នាំ២០២៤ ត្រូវបានប្រារព្ធឡើងក្រោមប្រធានបទ «សន្តិភាពជាមូលដ្ឋានគ្រឹះនៃការគោរព និងកិច្ចគាំពារសិទ្ធិកុមារ» និង «បេជ្ញាលុបបំបាត់ទម្រង់ធ្ងន់ធ្ងរ នៃពលកម្មកុមារនៅគ្រប់ខ្សែច្រវ៉ាក់ផលិតកម្ម ដើម្បីកសាងភាពធន់ និងការងារសមរម្យ»។

​ទិវា​កុមារ​អន្តរជាតិ​ ១​មិថុនា ត្រូវបានបង្កើតឡើង ក្នុងគោលបំណងលើកកម្ពស់ការការពារសិទ្ធិកុមារ ទប់ស្កាត់រាល់អំពើហឹង្សា និងរួមគ្នាថែរក្សាសន្តិភាពពិភពលោក ដើម្បីធានាឱ្យកុមារគ្រប់រូបរស់នៅក្នុងសុខសុវត្ថិភាព និងការអភិវឌ្ឍ។

ចំពោះ​ការ​ប្រារព្ធ​ទិវា​ពិភពលោក​ប្រឆាំង​ពលកម្ម​កុមារ​ ១២​មិថុនា​ គឺជាយុទ្ធនាការ និងចលនាប្រជាជាតិសកល ដើម្បីលើកកម្ពស់ការយល់ដឹង និងកៀរគរការគាំទ្រពីសាធារណជន ក្នុងដំណើរឆ្ពោះទៅរកការលុបបំបាត់ទម្រង់ធ្ងន់ធ្ងរនៃពលកម្មកុមារ ដែលបានស្តែងឱ្យឃើញតាមរយៈការផ្តល់សច្ចាប័នដោយប្រទេសជាច្រើនលើសកលលោក។

សម្រាប់​កម្ពុជា​ ​ប្រារព្ធ​ទិវាកុមារអន្តរជាតិ ១មិថុនា និងទិវា​កុមារ​កម្ពុជា​នេះ​ឡើង ដើម្បី​លើកកម្ពស់សុខុមាលភាព សុវត្ថិភាព និងការអភិវឌ្ឍកុមារ ព្រមទាំងការពារកុមារពីការរំលោភបំពានគ្រប់រូបភាព។ ជាពិសេស​រម្លឹកនូវ​មហា​វិនាសកម្ម​ដ៏​ធ្ងន់ធ្ងរ ដែល​បង្កឡើង​ដោយ​របប​ប្រល័យពូជសាសន៍ ប៉ុល ពត ដែល​កាលនោះ​កុមារ​ត្រូវ​បំបិទ​សិទ្ធិ​ទាំងស្រុង​ ​ទទួលរង​ការកាប់​សម្លាប់ ធ្វើ​ទារុណកម្ម បង្ខំ​ឱ្យធ្វើ​​ការ​ជា​ទម្ងន់ បង្អត់អាហារ រស់នៅ​យ៉ាង​លំបាក​វេទនា​ដោយ​អ​យុ​ត្តិ​​ធម៌ ​ព្រមទាំង​បាន​បន្សល់ទុក​ផល​​ពិបាក​យ៉ាងធ្ងន់ធ្ងរ​បំផុត​៕

ការប្រឡងប្រជែងជ្រើសរើសមន្ត្រីរាជការឱ្យចូលបម្រើការងារក្នុងក្របខ័ណ្ឌក្រសួងយុត្តិធម៌ រដ្ឋលេខាធិការដ្ឋានកិច្ចការព្រំដែន និងក្រសួងការបរទេស និងសហប្រតិបត្តិការអន្តរជាតិ រយៈពេល ៣ថ្ងៃពេញ ដែលមានបេក្ខជនចូលរួមសរុបជាង ៤២០០នាក់ បានបញ្ចប់ទៅដោយរលូន ប្រកបដោយស្មារតីទទួលខុសត្រូវខ្ពស់ និងមានប្រសិទ្ធភាព។

សូមអរគុណដល់ប្រធាន អនុប្រធាន និងសមាជិក សមាជិកាទាំងអស់នៃគណៈកម្មការ និងអនុគណៈកម្មការនានា ព្រមទាំងភាគីពាក់ព័ន្ធ ដែលបានបំពេញការងារយ៉ាងសស្រាក់សស្រាំ ប្រកបដោយទំនួលខុសត្រូវខ្ពស់ និងមានប្រសិទ្ធភាពគួរជាទីមោទនៈ ក្នុងគោលដៅផ្តល់សេវាសាធារណៈគាប់ចិត្តជូនបេក្ខជន និងប្រជាពលរដ្ឋ។

សូមជម្រាបថា ថ្ងៃស្អែកវេលាម៉ោង ៧:៣០នាទីព្រឹក នឹងចាប់ផ្តើមដំណើរការកំណែសន្លឹកកិច្ចការរបស់បេក្ខជនប្រឡងប្រជែងជ្រើសរើសមន្ត្រីរាជការឱ្យចូលបម្រើការងារនៅ​ក្រសួង ស្ថាប័នទាំង៣។

បេក្ខជន៖ “ខំមកប្រឡងស្ងាត់ៗ បែរជាមានរូបលើផេកក្រសួង 😂។"

សូមជូនកម្រងរូបភាពរបស់បេក្ខជនដែលបានចូលរួមប្រឡងប្រជែងជ្រើសរើសមន្ត្រីរាជការឱ្យចូលបម្រើការងារក្នុងក្របខ័ណ្ឌក្រសួង ស្ថាប័នទាំង៣ រយៈពេល ៣ថ្ងៃ កន្លងមក។ ទិដ្នភាពរបស់បេក្ខជននាពេលនេះ អាចជាការដកស្រង់បទពិសោធក៏ថាបាន ឬអាចការកែប្រែអាជីពក្នុងជីវិតរបស់ខ្លួន ដោយក្លាយខ្លួនជាមន្ត្រីរាជការនៅក្នុងក្រសួង ស្ថាប័នណាមួយក៏ថាបាន។

សូមជូនពរបេក្ខជនទាំងអស់ ទទួលបានលទ្ធផលល្អ និងសម្រេចបានតាមការប៉ងប្រាថ្នារៀងៗខ្លួន។

បេក្ខជនជាង ៤ពាន់នាក់ ចូលរួមប្រឡងប្រជែងចូលក្របខ័ណ្ឌរដ្ឋចំនួន៣ ខណៈ ១១១នាក់សម្រេចប្រឡងទាំង ៣ស្ថាប័នតែម្តង

ការប្រឡងប្រជែងជ្រើសរើសមន្ត្រីរាជការ ឱ្យចូលបម្រើការងារក្នុងក្របខ័ណ្ឌក្រសួង និងស្ថាប័នរដ្ឋចំនួន៣ មានបេក្ខជនចុះឈ្មោះចូលរួមប្រឡងសរុបចំនួន ៤ ២៥៧នាក់។ ការប្រឡងនេះ ត្រូវបានរៀបចំឡើងរយៈពេល ៣ថ្ងៃជាប់ៗគ្នា ពោលគឺចាប់ពីថ្ងៃទី២៩ ដល់ថ្ងៃទី៣១ ខែឧសភា ឆ្នាំ២០២៦។ ក្រសួង និងស្ថាប័នរដ្ឋទាំង៣ រួមមាន ក្រសួងយុត្តិធម៌, រដ្ឋលេខាធិការដ្ឋានកិច្ចការព្រំដែន និងក្រសួងការបរទេស និងសហប្រតិបត្តិការអន្តរជាតិ។

យោងតាមទិន្នន័យនៃគណៈកម្មការរៀបចំការប្រឡង បានបង្ហាញឱ្យដឹងថា ក្នុងចំណោមបេក្ខជនសរុបទាំងអស់ មានបេក្ខជនចំនួន ១១១នាក់ (ស្មើនឹង ២,៦%) បានចាប់យកឱកាសចូលរួមប្រឡងប្រជែងក្នុងក្រសួង និងស្ថាប័នទាំង៣ តែម្តង។

ដោយឡែក សម្រាប់បេក្ខជនដែលត្រូវចូលរួមប្រឡងប្រជែងឆ្លងស្ថាប័នចំនួន២ វិញមានតួលេខដូចខាងក្រោម៖

- ក្រសួងយុត្តិធម៌ និងរដ្ឋលេខាធិការដ្ឋានកិច្ចការព្រំដែន៖ មានបេក្ខជនចូលរួមប្រឡងសរុបចំនួន ៣០១នាក់ (ស្មើនឹង ៧% នៃបេក្ខជនសរុប)។

- ក្រសួងយុត្តិធម៌ និងក្រសួងការបរទេស៖ មានបេក្ខជនចូលរួមប្រឡងសរុបចំនួន ១៩២នាក់ (ស្មើនឹង ៤,៥% នៃបេក្ខជនសរុប)។

- រដ្ឋលេខាធិការដ្ឋានកិច្ចការព្រំដែន និងក្រសួងការបរទេស៖ មានបេក្ខជនចូលរួមប្រឡងសរុបចំនួន ៤៥៨នាក់ (ស្មើនឹង ១០,៧% នៃបេក្ខជនសរុប)។

គួរបញ្ជាក់ផងដែរថា ដំណើរការនៃការប្រឡងប្រជែងជ្រើសរើសមន្ត្រីរាជការទាំង៣ ក្រសួង ស្ថាប័ននេះ ប្រព្រឹត្តទៅយ៉ាងរលូនចាប់ពីថ្ងៃទី២៩ ដល់ថ្ងៃទី៣១ ខែឧសភា ឆ្នាំ២០២៦ នេះ៕

អ្នកសង្កេតការណ៍ជាង ៣៥០ អង្គ/នាក់ ចូលរួមឃ្លាំមើលការប្រឡងប្រជែងជ្រើសរើសមន្ត្រីរាជការសម្រាប់ក្រសួង-ស្ថាប័នចំនួន៣ ដើម្បីធានាតម្លាភាព និងយុត្តិធម៌

ដំណើរការប្រឡងប្រជែងជ្រើសរើសមន្ត្រីរាជការថ្មី ឱ្យចូលបម្រើការងារនៅក្រសួង-ស្ថាប័នចំនួន៣ បានប្រព្រឹត្តទៅដោយរលូន ក្រោមការឃ្លាំមើលយ៉ាងយកចិត្តទុកដាក់ពីសំណាក់អ្នកសង្កេតការណ៍ចម្រុះចំនួន ៣៥៩រូប ដើម្បីធានាឱ្យបាននូវគោលការណ៍តម្លាភាព យុត្តិធម៌ និងគុណាធិបតេយ្យ។

ក្រសួងមុខងារសាធារណៈ បានរៀបចំការប្រឡងប្រជែងនេះឡើងរយៈពេល ៣ថ្ងៃ គឺចាប់ពីថ្ងៃទី២៩ ដល់ថ្ងៃទី៣១ ខែឧសភា ឆ្នាំ២០២៦ ដោយបានកំណត់យកមណ្ឌលប្រឡងចំនួនពីរទីតាំង រួមមាន៖ សាលាភូមិន្ទរដ្ឋបាល និងសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច។ ការប្រឡងទាំង៣នេះ ធ្វើឡើងដើម្បីជ្រើសរើសមន្ត្រីក្របខ័ណ្ឌឱ្យចូលបម្រើការងារនៅក្នុងក្រសួងយុត្តិធម៌ ស្ថាប័នរដ្ឋលេខាធិការដ្ឋាន និងក្រសួងការបរទេសនិងសហប្រតិបត្តិការអន្តរជាតិ។

ការប្រឡងនេះមានបេក្ខជនចូលរួមសរុបចំនួន ៤ ២៥៧ អង្គ/នាក់ ដោយប្រើប្រាស់បន្ទប់ប្រឡងចំនួន ១២១បន្ទប់។ ដើម្បីធានាបាននូវភាពសុក្រឹត និងយុត្តិធម៌ ក្នុងរយៈពេល ៣ថ្ងៃនេះ មានវត្តមានអ្នកសង្កេតការណ៍ចូលរួមសរុបចំនួន ៣៥៩ អង្គ/នាក់ ដែលមកពីស្ថាប័ន និងភាគីពាក់ព័ន្ធផ្សេងៗគ្នា។ ក្នុងចំណោមនោះរួមមាន៖ អ្នកសង្កេតការណ៍ពីអង្គភាពប្រឆាំងអំពើពុករលួយ (ACU) ចំនួន ២២៣ នាក់ អ្នកសង្កេតការណ៍ពីសហភាពសហព័ន្ធយុវជនកម្ពុជា (ស.ស.យ.ក.) ចំនួន ៤៥ នាក់ អ្នកសង្កេតការណ៍ជាតំណាងសាកលវិទ្យាល័យ ចំនួន ២៤ នាក់ និងអ្នកសង្កេតការណ៍មកពីសាធារណជន ចំនួន ២៦ អង្គ/នាក់។

គួរជម្រាបផងដែរថា វត្តមានរបស់អ្នកសង្កេតការណ៍ទាំងអស់នេះ គឺមានតួនាទីយ៉ាងសំខាន់ក្នុងការឃ្លាំមើលរាល់សកម្មភាព និងដំណើរការនៃការប្រឡងប្រជែង តាំងពីការចាប់ផ្តើម រហូតដល់ដំណើរការនៃការកែសន្លឹកកិច្ចការរបស់បេក្ខជនត្រូវបានបញ្ចប់ជាស្ថាពរ។ ការចូលរួមនេះ គឺដើម្បីជាសាក្សី និងជាការធានាថា ដំណើរការប្រឡងទាំងមូលពិតជាប្រព្រឹត្តទៅស្របតាមគោលការណ៍ដែលបានកំណត់ ក្នុងនិយាមនីតិវិធីប្រតិបត្តិស្តីពីការប្រឡងប្រជែងជ្រើសរើសមន្ត្រីរាជការស៊ីវិល ដោយឈរលើស្មារតី «គុណាធិបតេយ្យ តម្លាភាព យុត្តិធម៌ បរិយាបន្ន និងប្រសិទ្ធភាព»៕