អាជ្ញាធរជាតិប្រយុទ្ធនឹងជំងឺអេដស៍

ឯកឧត្តមទេសរដ្ឋមន្រ្តី អៀង មូលី អញ្ជើញជាអធិបតីក្នុងសិក្ខាសាលាស្តីពីការផ្តល់សុពលភាពល់ផែនទីបង្ហាញផ្លូវចីរភាពនៃការឆ្លើយតបនឹងមេរោគអេដស៍និងជំងឺអេដស៍

នៅព្រឹកថ្ងៃចន្ទ ៤រោច ខែពិសាខ ឆ្នាំមមី អដ្ឋស័ក ព.ស.២៨៧០ ត្រូវនឹងថ្ងៃទី៤ ខែឧសភា ឆ្នាំ២០២៦ នៅសណ្ឋាគារ សាន់វ៉េ ឯកឧត្តមទេសរដ្ឋមន្រ្តី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍អញ្ជើញធ្វើជាអធិបតីក្នុងសិក្ខាសាលាផ្តល់សុពលភាពលើ ផែនទីបង្ហាញផ្លូវចីរភាពនៃកម្មវិធីអេដស៍(២០២៦-២០២៩)។ សិក្ខាសាលានេះមានការចូលរួមពីឯកឧត្តម លោកជំទាវ លោក លោកស្រី នាងកញ្ញា ជារដ្ឋលេខាធិការ និងជាប្រធាន/តំណាងគណៈកម្មាធិការប្រយុទ្ធនឹងជំងឺអេដស៍ក្រសួង សេដ្ឋកិច្ចនិងហិរញ្ញវត្ថុ ក្រសួងមហាផ្ទៃ និងក្រសួងសុខាភិបាល នាយិកាអង្គការយូអិនអេដស៍ប្រចាំកម្ពុជា ឡាវ និងម៉ាឡេស៊ី, DFAT, មជ្ឈមណ្ឌលជាតិប្រយុទ្ធនឹងជំងឺអេដស៍ សើស្បែក និងកាមរោគ អង្គការសង្គមស៊ីវិលធ្វើការងារអេដស៍HACC, CPN+, KHANA, RHAC, FHI360, បណ្តាញចតុមុខ, MHC, MHSS, AUA, និងថ្នាក់ដឹកនាំអាជ្ញាធរជាតិប្រយុទ្ធនឹងជំងឺអេដស៍។

មានប្រសាសន៍បើកសិក្ខាសាលាឯកឧត្តមទេសរដ្ឋមន្រ្តីបានថ្លែងថា ដំណើរឆ្ពោះទៅរកចីរភាពរបស់យើងបានចាប់ផ្តើមតាំងពីឆ្នាំ២០១៨ ហើយថ្ងៃនេះ យើងបានមកដល់ចំណុចរបត់ដ៏សំខាន់មួយក្នុងការធានានូវការឆ្លើយតបដែលបានធ្វើឱ្យកម្ពុជាក្លាយជា អ្នកដឹកនាំសកលក្នុងការប្រយុទ្ធនឹងជំងឺអេដស៍។ ក្នុងនោះ សមិទ្ធផលរួមគ្នារបស់យើង គឺជាសក្ខីភាពនៃការព្យាយាមដែលសម្រេចបានរួមមាន៖
ការកាត់បន្ថយការឆ្លងថ្មីរហូតដល់៤៥%។
អត្រាបង្ក្រាបមេរោគ(Viral suppression) ដែលបច្ចុប្បន្ននេះមានលើសពី៩៨%។
កម្ពុជាកំពុងស្ថិតនៅលើផ្លូវឆ្ពោះទៅសម្រេចបានគោលដៅ៩៥-៩៥-៩៥ មុនកាលកំណត់។

ឯកឧត្តមទេសរដ្ឋមន្រ្តីបានបញ្ជាក់ថា ដើម្បីជម្នះបញ្ហាប្រឈមបច្ចុប្បន្ន អាជ្ញាធរជាតិប្រយុទ្ធនឹងជំងឺ អេដស៍ និងក្រសួងសុខាភិបាលត្រូវតែផ្លាស់ប្តូរតួនាទីពីគ្រាន់តែជាអ្នកគ្រប់គ្រងជំនួយ ទៅជាអ្នកកសាងប្រព័ន្ធសុខាភិបាលជាតិដ៏រឹងមាំ»។ យើងកំពុងផ្លាស់ប្តូរពីការធ្វើការបែបដាច់ដោយឡែកពីគ្នា ទៅជាស្ថាបត្យកម្មសុខាភិបាលជាតិរួមតែមួយ។ ការណ៍នេះតម្រូវឱ្យមានការដឹកនាំជាយុទ្ធសាស្ត្រដែលយន្តការសម្របសម្រួលកម្រិតជាតិ(CCM) ធានាថាគ្រប់សកម្មភាពទាំងអស់បម្រើឱ្យចក្ខុវិស័យអធិបតេយ្យភាពរបស់កម្ពុជា។

មុននឹងប្រកាសបើសិក្ខាសាលា ឯកឧត្តមទេសរដ្ឋមន្រ្តីបានបន្ថែមថា ជោគជ័យរបស់យើងនឹងមិនត្រូវបានវាស់វែងដោយចំនួនទឹកប្រាក់ជំនួយនោះទេ។ ប៉ុន្តែ ត្រូវធ្វើការវាស់វែងដោយប្រសិទ្ធភាពដែលយើងបញ្ជ្រាបសេវាសង្គ្រោះជីវិតទាំងនេះ ទៅក្នុងប្រព័ន្ធជាតិរបស់យើង។ យើងត្រូវមាន : ទិន្នន័យច្បាស់លាស់ ផែនទីបង្ហាញផ្លូវរួចរាល់ និងមុខងារដែលត្រូវបំពេញនៅក្នុងដៃរួចហើយ។ បន្ថែមលើនេះ ឯកឧត្តមទេសរដ្ឋមន្រ្តីបានស្នើថា «ដំណាក់កាលធានាចីរភាព» ត្រូវបានកំណត់ដោយភាពជាម្ចាស់ទាំងស្រុងរបស់កម្ពុជា និងការប្តេជ្ញាចិត្តមិនងាករេឆ្ពោះទៅកាន់ជំនាន់ដែលគ្មានអេដស៍។ ចូរយើងយកមេរៀនដែលទទួលបានពីការឆ្លើយតបនឹងជំងឺអេដស៍ មកពង្រឹងប្រព័ន្ធសុខាភិបាលទាំងមូលរបស់យើង និងពន្លឿនវឌ្ឍនភាពឆ្ពោះទៅសម្រេចបាននូវការគ្របដណ្តប់សុខភាពជាសកលសម្រាប់ប្រជាជនកម្ពុជាគ្រប់រូប។

ឯកឧត្តមទេសរដ្ឋមន្រ្តី អៀង មូលី អញ្ជើញជាអធិបតីដឹកនាំកិច្ចប្រជុំ
គណៈកម្មាធិការប្រយុទ្ធនឹងជំងឺអេដស៍ខេត្តសៀមរាប

នៅព្រឹកថ្ងៃពុធ ១៣កើត ខែពិសាខ ឆ្នាំមមី អដ្ឋស័ក ព.ស.២៥៦៩ ត្រូវនឹងថ្ងៃទី២៩ ខែមេសា ឆ្នាំ២០២៦ នៅសាលប្រជុំរដ្ឋបាលខេត្តសៀមរាប ឯកឧត្តមទេសរដ្ឋមន្រ្តី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍អញ្ជើញជាអធិបតីដ៏ ខ្ពង់ខ្ពស់ដឹកនាំ កិច្ចប្រជុំគណៈកម្មាធិការប្រយុទ្ធនឹងជំងឺអេដស៍ខេត្តសៀមរាប។ កិច្ចប្រជុំនេះរៀបចំឡើងដើម្បីពិនិត្យការឆ្លើយតបនឹងមេរោគអេដស៍នៅខេត្តសៀមរាប តាមគោលនយោបាយជាតិបញ្ចប់អេដស៍ និងចីរភាពកម្មវិធីអេដស៍ សម្រាប់ឆ្នាំ២០២៣-២០២៨ ព្រមទាំងជំរុញផ្សព្វផ្សាយការប្រើប្រាស់ស្រោម អនាម័យឱ្យបាន១០០%។

ចូលរួមក្នុងកិច្ចប្រជុំរួមមាន ឯកឧត្តម នាក់ ណេរ៉ុន អភិបាលរង និងជាប្រធានគណៈកម្មាធិការប្រយុទ្ធនឹងជំងឺអេដស៍ខេត្តសៀមរាប ឯកឧត្តម លោកជំទាវ រដ្ឋលេខាធិការនិងជាប្រធាន/តំណាងគណៈកម្មាធិការ ប្រយុទ្ធនឹងជំងឺអេដស៍ ទីស្តីការគណៈរដ្ឋមន្ត្រី ក្រសួងសេដ្ឋកិច្ចនិងហិរញ្ញវត្ថុ ក្រសួងសុខាភិបាល ក្រសួងមហាផ្ទៃ ក្រសួងព័ត៌មាន ក្រសួងទេសចរណ៍ ប្រធានមន្ទីរសុខាភិបាល ប្រធានកម្មវិធីអេដស៍ខេត្តសៀមរាប លោក លោកស្រីប្រធាន/តំណាងមន្ទីរ អង្គភាពជុំវិញខេត្ត ស្នងការនគរបាល មេបញ្ជាការកងរាជអាវុធហត្ថ មេបញ្ជាការតំបន់ប្រតិបត្តិការសឹករង អភិបាល/អភិបាលរងក្រុង ស្រុក លោកនាយកប្រចាំតំបន់អាស៊ី អង្គការមូលនិធិថែទាំ សុខភាពអ្នកជំងឺអេដស៍(AHF) តំណាងអង្គការធ្វើការងារអេដស៍ (AHF, RHAC, PSI, FHI360, DFonPam, CRS, MHSS) និងតំណាងក្រុមប្រជាជនគន្លឹះ ព្រមទាំងថ្នាក់ដឹកនាំអាជ្ញាធរជាតិប្រយុទ្ធនឹងជំងឺអេដស៍។

របៀបវារៈនៃកិច្ចប្រជុំរួមមាន៖
១-សុន្ទរកថាស្វាគមន៍ដោយឯកឧត្តមអភិបាលរងខេត្តសៀមរាប
២-លទ្ធផលការងារកម្មវិធីអេដស៍នៅខេត្តសៀមរាប ដោយលោកវេជ្ជបណ្ឌិត អឿន សាអែម ជាប្រធានកម្មវិធីអេដស៍ខេត្ត
៣-មតិបើក និងដឹកនាំកិច្ចប្រជុំដោយឯកឧត្តមទេសរដ្ឋមន្រ្តី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍
៤-បទបង្ហាញស្តីពីការរៀបចំផែនការសកម្មភាពរួមសម្រាប់កិច្ចឆ្លើយតប នឹងមេរោគអេដស៍ និងជំងឺអេដស៍ នៅថ្នាក់ក្រោមជាតិ ដោយឯកឧត្តមវេជ្ជបណ្ឌិត ទា ផលា អនុប្រធានអាជ្ញាធរជាតិប្រយុទ្ធនឹងជំងឺអេដស៍
៥-បទបង្ហាញស្តីពីសារាចរអន្តរក្រសួងលេខ០០៧ សហវ.ស.រ.អហក ចុះថ្ងៃទី២៥ ខែមេសា ឆ្នាំ២០២៥ ស្តីពីការគ្រប់គ្រង ការចាត់ចែង និងការកំណត់មុខសញ្ញាចំណាយថវិកាសេវាសង្គមនិងអនាម័យបរិស្ថាននៃមូលនិធិក្រុង ស្រុក ខណ្ឌ និងមូលនិធិឃុំ សង្កាត់ ដោយឯកឧត្តមបណ្ឌិត ឈឹម ឃិនដារ៉េត អគ្គលេខាធិការអាជ្ញាធរជាតិប្រយុទ្ធនឹងជំងឺអេដស៍
៦-កិច្ចពិភាក្សារួម
៧-អនុសាសន៍ណែនាំ និងបិទកិច្ចប្រជុំដោយឯកឧត្តមទេសរដ្ឋមន្រ្តី។

នៅល្ងាចថ្ងៃអង្គារ ១២កើត ខែពិសាខ ឆ្នាំមមី អដ្ឋស័ក ព.ស.២៥៦៩ ត្រូវនឹងថ្ងៃទី២៨ ខែមេសា ឆ្នាំ២០២៦ ចាប់ពីម៉ោង៥:១៥ ឯកឧត្តមទេសរដ្ឋមន្ត្រី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍បានបន្ដ ដឹកនាំគណៈប្រតិភូអន្តរក្រសួងទៅជួបសំណេះសំណាលជាមួយក្រុមប្រជាជនគន្លឹះដែលប្រឈមមុខខ្ពស់នឹងការឆ្លងមេរោគអេដស៍ នៅហាងស្វាយមាស ភោជនីយដ្ឋានផ្ទះគន្ធាយ និងមណ្ឌលកម្សាន្តផ្លាទីនឹមKTV នាក្រុងសៀមរាប ខេត្តសៀមរាប។ ចូលរួមក្នុងកម្មវិធីនេះរួមមាន ឯកឧត្តម លោកជំទាវ រដ្ឋលេខាធិការនិងជាប្រធាន/តំណាងគណៈកម្មាធិការប្រយុទ្ធនឹងជំងឺអេដស៍ ទីស្តីការគណៈរដ្ឋមន្ត្រី ក្រសួងសេដ្ឋកិច្ចនិងហិរញ្ញវត្ថុ ក្រសួងសុខាភិបាល ក្រសួងមហាផ្ទៃ ក្រសួងព័ត៌មាន លោកអនុប្រធានមន្ទីរសុខាភិបាលខេត្តសៀមរាប លោកនាយកប្រតិបត្តិអង្គការAHFប្រចាំកម្ពុជា និងអស់លោក លោកស្រីតំណាងអង្គការRHAC, PSI, FHI360 ព្រមទាំងថ្នាក់ដឹកនាំអាជ្ញាធរជាតិប្រយុទ្ធនឹងជំងឺអេដស៍។

បន្ទាប់ពីការស្វាគមន៍ ឯកឧត្តមទេសរដ្ឋមន្ត្រីបានបញ្ជាក់ថា ក្រុមបេសកកម្មអន្តរក្រសួងចុះដល់ភោជនីយដ្ឋាន និងខារ៉ាអូខេនេះគឺដើម្បីផ្សព្វផ្សាយបង្ការកុំឱ្យឆ្លងមេរោគអេដស៍។ ទន្ទឹមនឹងនេះ ឯកឧត្តមទេសរដ្ឋមន្ដ្រីបានសាកសួរអ្នកគ្រប់គ្រងអំពីបញ្ហាសុខភាព ការចុះឈ្មោះដើម្បីទទួលបានប័ណ្ណសមាជិកបេឡាជាតិសន្តិសុខសង្គម(បសស) ប័ណ្ណមូលនិធិសមធម៌សុខាភិបាល(មសស) វិធីការពារពីការឆ្លងមេរោគអេដស៍ និងការទទួលបានសេវាបង្ការអេដស៍របស់បុគ្គលិក។ បន្ថែមលើនេះ ឯកឧត្តមទេសរដ្ឋមន្ត្រីបានសង្កត់ធ្ងន់ថា វិធីល្អដើម្បីកុំឱ្យឆ្លងអេដស៍គឺការបង្ការដោយការប្រើស្រោមអនាម័យជាប់ជានិច្ច។ ប៉ុន្តែ បើសង្ស័យថាអាចឆ្លងមេរោគអេដស៍ត្រូវប្រញាប់ទៅធ្វើតេស្ត។ បើមានលទ្ធផលតេស្តវិជ្ជមាននឹងទទួលបានការព្យាបាលដោយឥតគិតថ្លៃ ព្រមទាំងទទួលបានប័ណ្ណក្រីក្រផងដែរ។

មុននឹងបញ្ចប់ ឯកឧត្តមទេសរដ្ឋមន្ត្រីបានគូសបញ្ជាក់ថា ទីកន្លែងសេវាកម្សាន្តដែលមានរក្សាស្រោមអនាម័យត្រូវលើកសរសើរដោយបានចូលរួមក្នុងការបង្ការការចម្លងមេរោគអេដស៍។

នៅទីបញ្ចប់ ឯកឧត្តមទេសរដ្ឋមន្ដ្រីបានផ្តល់ប័ណ្ណសរសើរ សារាចរស្តីពីការជំរុញការប្រើប្រាស់ស្រោមអនាម័យឱ្យបាន១០០%ដើម្បីបង្ការមេរោគអេដស៍និងជំងឺអេដស៍ ព្រមទាំងស្រោមអនាម័យដល់អ្នកគ្រប់គ្រងទីតាំងទាំង៣កន្លែងផងដែរ។

ឯកឧត្តមទេសរដ្ឋមន្រ្តី អៀង មូលី អញ្ជើញជាអធិបតីដឹកនាំកិច្ចប្រជុំគណៈកម្មាធិការប្រយុទ្ធនឹងជំងឺអេដស៍ខេត្តបន្ទាយមានជ័យ

នៅព្រឹកថ្ងៃអង្គារ ១២កើត ខែពិសាខ ឆ្នាំមមី អដ្ឋស័ក ព.ស.២៥៦៩ ត្រូវនឹងថ្ងៃទី២៨ ខែមេសា ឆ្នាំ២០២៦ នៅសាលប្រជុំរដ្ឋបាលខេត្តបន្ទាយមានជ័យ ឯកឧត្តមទេសរដ្ឋមន្រ្តី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍អញ្ជើញជាអធិបតីដ៏ខ្ពង់ខ្ពស់ដឹកនាំ កិច្ចប្រជុំគណៈកម្មាធិការប្រយុទ្ធនឹងជំងឺអេដស៍ខេត្តបន្ទាយមានជ័យ។ កិច្ចប្រជុំនេះរៀបចំឡើងដើម្បីពិនិត្យការឆ្លើយតបនឹងមេរោគអេដស៍នៅខេត្តបន្ទាយមានជ័យ តាមគោលនយោបាយជាតិបញ្ចប់អេដស៍ និងចីរភាពកម្មវិធីអេដស៍ សម្រាប់ឆ្នាំ២០២៣-២០២៨ ព្រមទាំងជំរុញផ្សព្វផ្សាយការប្រើប្រាស់ស្រោមអនាម័យឱ្យបាន១០០%។

ចូលរួមក្នុងកិច្ចប្រជុំរួមមាន ឯកឧត្តម អ៊ុំ រាត្រី អភិបាលនិងជាប្រធានគណៈកម្មាធិការប្រយុទ្ធនឹងជំងឺអេដស៍ខេត្តបន្ទាយមានជ័យ ឯកឧត្តម លោកជំទាវ រដ្ឋលេខាធិការនិងជាប្រធាន/តំណាងគណៈកម្មាធិការប្រយុទ្ធនឹងជំងឺអេដស៍ ទីស្តីការគណៈរដ្ឋមន្ត្រី ក្រសួងសេដ្ឋកិច្ចនិងហិរញ្ញវត្ថុ ក្រសួងសុខាភិបាល ក្រសួងមហាផ្ទៃ ក្រសួងព័ត៌មាន ក្រសួងទេសចរណ៍ ប្រធានមន្ទីរសុខាភិបាល ប្រធានកម្មវិធីអេដស៍ខេត្តបន្ទាយមានជ័យ លោក លោកស្រីប្រធាន/តំណាងមន្ទីរអង្គភាពជុំវិញខេត្ត ស្នងការនគរបាល មេបញ្ជាការកងរាជអាវុធហត្ថ មេបញ្ជាការតំបន់ប្រតិបត្តិការសឹករង អភិបាល/អភិបាលរងក្រុង ស្រុក លោកនាយកប្រចាំតំបន់អាស៊ី អង្គការមូលនិធិថែទាំសុខភាពអ្នកជំងឺអេដស៍(AHF) តំណាងអង្គការធ្វើការងារអេដស៍(RHAC, PSI, FHI360, HACC, MHSS) និងតំណាងក្រុមប្រជាជនគន្លឹះ ព្រមទាំងថ្នាក់ដឹកនាំអាជ្ញាធរជាតិប្រយុទ្ធនឹងជំងឺអេដស៍។

របៀបវារៈនៃកិច្ចប្រជុំរួមមាន៖
១-សុន្ទរកថាស្វាគមន៍ដោយឯកឧត្តម អ៊ុំ រាត្រី អភិបាលនិងជាប្រធានឡណៈកម្មាធិការប្រយុទ្ធនឹងជំងឺអេដស៍ខេត្តបន្ទាយមានជ័យ
២-បទបង្ហាញស្តីពីលទ្ធផលការងារកម្មវិធីអេដស៍នៅខេត្តបន្ទាយមានជ័យ ដោយលោកវេជ្ជបណ្ឌិត គីលីន ពិសី អនុប្រធានមន្ទីរសុខាភិបាល និងជាប្រធានលេខាធិការដ្ឋានអេដស៍ខេត្ត
៣-មតិបើក និងដឹកនាំកិច្ចប្រជុំដោយឯកឧត្តមទេសរដ្ឋមន្រ្តី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍
៤-បទបង្ហាញស្តីពីការរៀបចំផែនការសកម្មភាពរួមសម្រាប់កិច្ចឆ្លើយតបនឹងមេរោគអេដស៍និងជំងឺអេដស៍ នៅថ្នាក់ក្រោមជាតិ ដោយឯកឧត្តមវេជ្ជបណ្ឌិត ទា ផលា អនុប្រធានអាជ្ញាធរជាតិប្រយុទ្ធនឹងជំងឺអេដស៍
៥-បទបង្ហាញស្តីពីសារាចរអន្តរក្រសួងលេខ០០៧ សហវ.ស.រ.អហក ចុះថ្ងៃទី២៥ ខែមេសា ឆ្នាំ២០២៥ ស្តីពីការគ្រប់គ្រង ការចាត់ចែង និងការកំណត់មុខសញ្ញាចំណាយថវិកាសេវាសង្គមនិងអនាម័យបរិស្ថាននៃមូលនិធិក្រុង ស្រុក ខណ្ឌ និងមូលនិធិឃុំ សង្កាត់ ដោយឯកឧត្តមបណ្ឌិត ឈឹម ឃិនដារ៉េត អគ្គលេខាធិការអាជ្ញាធរជាតិប្រយុទ្ធនឹងជំងឺអេដស៍
៦-កិច្ចពិភាក្សារួម
៧-អនុសាសន៍ណែនាំ និងបិទកិច្ចប្រជុំដោយឯកឧត្តមទេសរដ្ឋមន្រ្តី។

បន្ទាប់ពីសុន្ទរកថាស្វាគមន៍ដោយឯកឧត្តមអភិបាលខេត្ត និងបទបង្ហាញរបស់លោកប្រធានកម្មវិធីអេដស៍ខេត្ត ឯកឧត្តមទេសរដ្ឋមន្រ្តីបានមានប្រសាសន៍បើកកិច្ចប្រជុំ ដោយថ្លែងនូវការកោតសរសើរចំពោះខេត្តបន្ទាយមានជ័យ ថាមានវឌ្ឍនភាព ជាពិសេសការងារឆ្លើយតបនឹងមេរោគអេដស៍និងជំងឺអេដស៍ ដោយសម្រេចបាន៨៦-១០០-៩៨ នៃគោលដៅ៩៥-៩៥-៩៥។ ឯកឧត្តមទេសរដ្ឋមន្រ្តីបានបញ្ជាក់បន្ថែមថា គណៈប្រតិភូអន្តរក្រសួងដែលចុះបំពេញបេសកកម្មនៅខេត្តបន្ទាយមានជ័យនៅពេលនេះ គឺដើម្បីឱ្យទាន់ពេលវេលសម្រាប់ខេត្តក្នុងរៀបចំកញ្ចប់ថវិកាសម្រាប់ឆ្នាំ២០២៧។ ក្នុងការឆ្លើយតបនឹងមេរោគអេដស៍និងជំងឺអេដស៍ កម្ពុជាជាប្រទេសឈានមុខគេមួយទាំងនៅក្នុងតំបន់និងពិភពលោក។ ប៉ុន្តែ និន្នាការថវិកាជំនួយពីខាងក្រៅបាននិងកំពុងកាត់បន្ថយ ហើយឈានទៅបញ្ចប់។ ដូច្នេះ ការងារសំខាន់របស់យើង គឺគិតគូរពីចីរភាពកម្មវិធីអេដស៍នៅថ្នាក់ក្រោមជាតិ ជាពិសេសការឆ្លើយតប នៅតាមឃុំ សង្កាត់។

នៅក្នុងដំណើរការកិច្ចប្រជុំបន្ត ឯកឧត្តមវេជ្ជបណ្ឌិត ទា ផលា និងឯកឧត្តមបណ្ឌិត ឈឹម ឃិនដារ៉េត បានធ្វើបទបង្ហាញទៅតាមរបៀបវារៈ ហើយនៅក្នុងកិច្ចពិភាក្សារួម ឯកឧត្តម លោកជំទាវ ប្រធានគណៈកម្មាធិការប្រយុទ្ធនឹងជំងឺអេដស៍ ដែលជាសមាជិកគណៈប្រតិភូអន្តរក្រសួងបានមានមតិ និងសួរបញ្ជាក់អំពីចំណុច ដែលបានលើកឡើង។ មុននឹងបញ្ចប់កិច្ចប្រជុំ ឯកឧត្តមទេសរដ្ឋមន្រ្តីបានមានប្រសាសន៍ថា នៅខេត្តបន្ទាយមានជ័យដោយអត្រាគោលដៅ៩៥ទី១នៅទាបជាងថ្នាក់ជាតិ ដូច្នេះ ត្រូវពង្រឹងការធ្វើតេស្ត និងការបង្ការ។ ក្នុងនោះ សូមជំរុញការធ្វើតេស្តឱ្យបានច្រើន កាត់បន្ថយការឆ្លងឱ្យទាបបំផុត ដោយប្រើវិធីបង្ការរួមមាន៖ ស្រោមអនាម័យ អប់រំណែនាំឱ្យមានដៃគូមួយទល់នឹងមួយ និងសេវាប្រឹព ប៉ិប។ ទន្ទឹមនឹងនេះ សូមខេត្តជួយពង្រឹងការងារពហុវិស័យ ជាពិសេសអាជ្ញាធរមូលដ្ឋាន ឃុំ សង្កាត់ដែលមានអ្នកផ្ទុកមេរោគអេដស៍រស់នៅ។

នៅទីបញ្ចប់ ឯកឧត្តមទេសរដ្ឋមន្រ្តីបានអំណរគុណឯកឧត្តមអភិបាលខេត្តដែលបានរៀបចំឱ្យមានកិច្ចប្រជុំនេះ និងបានផ្តល់ថវិកាចំនួន៤លានរៀលជូនរដ្ឋបាលខេត្តដើម្បីឧបត្ថម្ភជនភៀសសឹក ព្រមទាំងអាវយឺត និងស្រោមអនាម័យផងដែរ។

នៅល្ងាចថ្ងៃចន្ទ ១១កើត ខែពិសាខ ឆ្នាំមមី អដ្ឋស័ក ព.ស.២៥៦៩ ត្រូវនឹងថ្ងៃទី២៧ ខែមេសា ឆ្នាំ២០២៦ ចាប់ពីម៉ោង៥:៣០ ឯកឧត្តមទេសរដ្ឋមន្ត្រី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍បានដឹកនាំគណៈប្រតិភូអន្តរក្រសួងទៅជួបសំណេះសំណាលជាមួយក្រុមប្រជាជនគន្លឹះដែលប្រឈមមុខខ្ពស់នឹងការឆ្លងមេរោគអេដស៍ នៅសណ្ឋាគារនិងKTVរុងរឿង និងចិត្រា ម៉ាស្សា កោសជប់ នាក្រុងសិរីសោភ័ណ ខេត្តបន្ទាយមានជ័យ។ ចូលរួមក្នុងកម្មវិធីនេះរួមមាន ឯកឧត្តម លោកជំទាវ រដ្ឋលេខាធិការនិងជាប្រធាន/តំណាង គណៈកម្មាធិការប្រយុទ្ធនឹងជំងឺអេដស៍ ទីស្តីការគណៈរដ្ឋមន្ត្រី ក្រសួងសេដ្ឋកិច្ចនិងហិរញ្ញវត្ថុ ក្រសួងសុខាភិបាល ក្រសួងមហាផ្ទៃ ក្រសួងព័ត៌មាន ក្រសួងទេសចរណ៍ លោកអនុប្រធានមន្ទីរសុខាភិបាលខេត្តបន្ទាយមានជ័យ លោកនាយកប្រតិបត្តិអង្គការAHF និងអស់លោក លោកស្រីតំណាងអង្គការRHAC, PSI, FHI360 និងMHSS ព្រមទាំងថ្នាក់ដឹកនាំអាជ្ញាធរជាតិប្រយុទ្ធនឹងជំងឺអេដស៍។

បន្ទាប់ពីការស្វាគមន៍ ឯកឧត្តមទេសរដ្ឋមន្ត្រីបានបញ្ជាក់ថា ក្រុមបេសកកម្មអន្តរក្រសួងចុះដល់ទីកន្លែងសណ្ឋាគារ និងម៉ាស្សា កោសជប់នេះគឺដើម្បីផ្សព្វផ្សាយបង្ការកុំឱ្យឆ្លងមេរោគអេដស៍។ ទន្ទឹមនឹងនេះ ឯកឧត្តមទេសរដ្ឋមន្ដ្រីបានសាកសួរមេការអំពីបញ្ហាសុខភាព ការចុះឈ្មោះដើម្បីទទួលបានប័ណ្ណមូលនិធិសមធម៌សុខាភិបាល(មសស) វិធីការពារពីការឆ្លងមេរោគអេដស៍ និងការទទួលបានសេវាបង្ការអេដស៍របស់បុគ្គលិក។ បន្ថែមលើនេះ ឯកឧត្តមទេសរដ្ឋមន្ត្រីបានសង្កត់ធ្ងន់ថា វិធីល្អដើម្បីកុំឱ្យឆ្លងអេដស៍គឺការបង្ការដោយការប្រើស្រោមអនាម័យជាប់ជានិច្ច។ ប៉ុន្តែ បើសង្ស័យថាអាចឆ្លងមេរោគអេដស៍ត្រូវប្រញាប់ទៅធ្វើតេស្ត។ បើមានលទ្ធផលតេស្តវិជ្ជមាននឹងទទួលបានការព្យាបាលដោយឥតគិតថ្លៃ ព្រមទាំងទទួលបានប័ណ្ណក្រីក្រផងដែរ។

មុននឹងបញ្ចប់ ឯកឧត្តមទេសរដ្ឋមន្ត្រីបានគូសបញ្ជាក់ថា ទីកន្លែងសេវាកម្សាន្តដែលមានរក្សាស្រោមអនាម័យត្រូវលើកសរសើរដោយបានចូលរួមក្នុងការបង្ការការចម្លងមេរោគអេដស៍។

នៅទីបញ្ចប់ ឯកឧត្តមទេសរដ្ឋមន្ដ្រីបានផ្តល់ប័ណ្ណសរសើរ សារាចរស្តីពីការជំរុញការប្រើប្រាស់ស្រោមអនាម័យឱ្យបាន១០០%ដើម្បីបង្ការមេរោគអេដស៍និងជំងឺអេដស៍ ព្រមទាំងស្រោមអនាម័យដល់មេការ និងម្ចាស់ទីតាំងទាំង២កន្លែងផងដែរ។

នៅរសៀលថ្ងៃពុធ ៦កើត ខែពិសាខ ឆ្នាំមមី អដ្ឋស័ក ព.ស.២៥៦៩ ត្រូវនឹងថ្ងៃទី២២ ខែមេសា ឆ្នាំ២០២៦ ចាប់ពីម៉ោង៤ ឯកឧត្តមទេសរដ្ឋមន្រ្តី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍ បានជួបពិភាក្សាជាមួយក្រុមការងារ នៃមូលនិធិសកល។ កិច្ចប្រជុំនេះមានការចូលរួមពីក្រុមការងារមូលនិធិសកល (អ្នកជំនាញសុខាភិបាល និងត្រួតពិនិត្យនិងវាយតម្លៃ, គ្រប់គ្រងផលិតផលសុខាភិបាល និងហិរញ្ញវត្ថុ) ព្រមទាំងអនុប្រធាន និងអគ្គលេខាធិការអាជ្ញាធរជាតិប្រយុទ្ធនឹងជំងឺអេដស៍។

មានប្រសាសន៍ទៅកាន់ក្រុមការងារមូលនិធិសកល ឯកឧត្តមទេសរដ្ឋមន្រ្តីបានជម្រាបជូនអំពីការដាក់ចេញនូវគោលនយោបាយជាតិបញ្ចប់អេដស៍និងចីរភាពកម្មវិធីអេដស៍សម្រាប់ឆ្នាំ២០២៣-២០២៨ កាលពីឆ្នាំ២០២៤ និងការរៀបចំនូវរបាយកាណ៍វឌ្ឍនភាពស្តីពីការឆ្លើយតបនឹងមេរោគអេដស៍ឆ្នាំ២០២៤ កាលពីឆ្នាំ២០២៥កន្លងទៅ។ បន្ថែមលើនេះ ឯកឧត្តមទេសរដ្ឋមន្រ្តីបានបញ្ជាក់ជូនពីវឌ្ឍនភាពនៃការឆ្លើយតបនឹងមេរោគអេដស៍ ដោយសម្រេចបាន៩២-១០០-៩៨ នៃគោលដៅ៩៥-៩៥-៩៥។

បន្ទាប់ពីការធ្វើបទបង្ហាញដោយឯកឧត្តម ទា ផលា អនុប្រធានអាជ្ញាធរជាតិប្រយុទ្ធនឹងជំងឺអេដស៍ និងការសួរបញ្ជាក់ពីក្រុមការងារ ឯកឧត្តមទេសរដ្ឋមន្រ្តីបានបញ្ជាក់បន្ថែមអំពីការជំរុញសកម្មភាពការងារពហុវិស័យឆ្ពោះទៅបញ្ចប់អេដស៍ និងបានស្នើថា ក្នុងជុំផ្តល់ថវិកាលើកទី៨ខាងមុខ សូមមូលនិធិសកលជួយពង្រឹងប្រព័ន្ធជាតិ ដើម្បីធានាចីរភាពនៃការឆ្លើយតបនឹងមេរោគអេដស៍និងជំងឺអេដស៍។