Socio-Economic Planning and Database - SEPD of CMAA

នៅរសៀលថ្ងៃទី១០ ខែកុម្ភៈ ឆ្នាំ២០២៦ តាមការណែនាំរបស់ឯកឧត្តមអគ្គលេខាធិការរង និងឯកឧត្ដមប្រធាននាយកដ្ឋាន SEPD ក្រុមការងារបច្ចេកទេស បានរៀបចំប្រជុំធ្វើបច្ចុប្បន្នភាពទម្រង់ពិនិត្យចម្ការមីន/ស.ផ.ស.បោសសម្អាតរួច (PCM)

កាលពីថ្ងៃទី២៩-៣១ ខែមករា ឆ្នាំ២០២៦ ក្រុមការងារអាជ្ញាធរមីន បានសហការជាមួយអង្គការ APOPO ចុះសិក្សា និងវាយតម្លៃដីដែលបានបោសសម្អាតមីនរួចនៅស្រុកជ័យសែន ខេត្តព្រះវិហារ ដើម្បីធានាសុវត្ថិភាពសហគមន៍ដោយកាត់បន្ថយហានិភ័យមីន និងផលិតភាពកសិកម្មសម្រាប់ប្រជាពលរដ្ឋ ជួយលើកស្ទួយចំណូល និងអភិវឌ្ឍសេដ្ឋកិច្ចក្នុងតំបន់ជនបទ ហើយអនុញ្ញាតឱ្យប្រជាពលរដ្ឋប្រើប្រាស់ដីបានដោយសុវត្ថិភាព និងមានចីរភាព។

ថ្ងៃទី២៧ ខែមករា ឆ្នាំ២០២៦ អាជ្ញាធរមីន និងអង្គការជំនួយប្រជាជនន័រវែស (Norwegian People’s Aid) បានចុះហត្ថលេខាលើអនុស្សរណៈយោគយល់គ្នា (MoU) ដើម្បីពង្រឹងកិច្ចសហប្រតិបត្តិការក្នុងវិស័យសកម្មភាពមីន។
សូមថ្លែងអំណរគុណជាពិសេសដល់អង្គការ NPA សម្រាប់ការជួយគាំទ្រដល់អង្គភាពទិន្នន័យ នៃនាយកដ្ឋាន SEPD តាំងពីដើមរហូតដល់បច្ចុប្បន្ន។

-NPA

សូមអបអរសាទរខួបលើកទី៤៧ ទិវាជ័យជម្នះ ៧មករា, ឆ្នាំ១៩៧៩-២០២៦

ខេត្តកំពត៖ នៅថ្ងៃទី១៩ ខែធ្នូ ឆ្នាំ២០២៥ ឯកឧត្តម តន់ សារ៉ា អគ្គលេខាធិការរង តំណាងថ្នាក់ដឹកនាំអាជ្ញាធរមីន បានចូលរួមកម្មវិធីបើកសិក្ខាសាលាបូកសរុបលទ្ធផលការងាររបស់ក្រុមការងារផែនការសកម្មភាពមីនខេត្ត(ម៉ាពូ)ប្រចាំឆ្នាំ២០២៥ និងលើកទិសដៅការងារឆ្នាំឆ្នាំ២០២៦។

ជាលទ្ធផលក្នុងឆ្នាំ២០២៥ ក្រុមការងារម៉ាពូបានសម្របសម្រួលជាមួយប្រតិបត្តិករជាតិនិងអន្តរជាតិនិងសហគមន៍មូលដ្ឋានរៀរៀបចំផែនការបោសសម្អាតមីននិងសំណល់ជាតិផ្ទះពីសង្រ្គាមលើទំហំផ្ទៃដីប្រមាន២៦០គីឡូម៉ែត្រការ៉េ ដោយគិតត្រឹមខែវិច្ឆិកា ឆ្នាំ២០២៥ ប្រតិបត្តិករជាតិនិងអន្តរជាតិបោសសម្អាតចម្ការមីននិងស.ផ.ស.បានផ្ទៃដីទំហំប្រមាណ២២១គីឡូម៉ែត្រការ៉េ(សម្រេចបាន៨៥%នៃផែនការ) ក្នុងនោះបានរកឃើញនិងកម្ទេចចោលគ្រាប់មីននិងសំណល់ជាតិផ្ទុះពីសង្គ្រាម(ស.ផ.ស.)ប្រមាណចំនួនជិត៥៤០០០គ្រាប់ ដើម្បីគាំទ្រការអភិវឌ្ឍនិងផ្តល់សុវត្ថិភាពដល់សហគមន៍ដែលមានអ្នកទទួលផលលើដីបោសសម្អាតរួចចំនួនជិត៤០ម៉ឺនគ្រួសារ សម្រាប់ប្រើប្រាស់បង្កបង្កើនផល។ ក្នុងចំណោមផ្ទៃដីដែលបានបោសសម្អាតទាំងនោះមានផ្ទៃដីប្រមាណ៧៧%ត្រូវបានប្រើប្រាស់សម្រាប់ដាំដុះដំណាំកសិកម្ម និង២៣%ទៀតគាំទ្រដល់ការសាងសង់លំនៅដ្ឋាននិងគម្រោងអភិវឌ្ឍន៍ហេដ្ឋារចនាសម្ព័ន្ធរូបវ័ន្តផ្សេងៗ។

ក្នុងរយៈពេល១១ខែ ក្នុងឆ្នាំ២០២៥ មានជនរងគ្រោះដោយសារយុទ្ធភណ្ឌគ្រឿងផ្ទុះចំនួន៣៨នាក់ (ជនរងគ្រោះដោយសារមីនចំនួន១៨នាក់ និងដោយសារស.ផ.ស.ចំនួន ២០នាក់) ដោយតួលេខនេះបានថយចុះ១៩% បើប្រៀបធៀបនឹងរយៈពេល១១ខែដូចគ្នានៅឆ្នាំ២០២៤ ដែលមានជនរងគ្រោះដល់ទៅចំនួន៤៧នាក់។

ទិសដៅការងារអាទិភាព ក្រោយបញ្ចប់សង្រ្គាមឈ្លានពានថៃមកលើកម្ពុជា ម៉ាពូចាំបាច់ត្រូវចូលរួមចុះសិក្សាវាយតម្លៃទីតាំងផលប៉ះពាល់នៃការខូចខាត ដើម្បីឆ្លើយតបបន្ទាន់ក្នុងការអប់រំយល់ដឹងអំពីយុទ្ធភ័ណ្ឌគ្រឿងផ្ទុះដើម្បីការពារគ្រោះថ្នាក់ប្រជាជន និងការរៀបចំផែនការបោសសម្អាតដីដែលមានយុទ្ធភ័ណ្ឌគ្រឿងផ្ទុះនិងប្រមូលកំទេចចោល ឈានទៅរៀបចំនិងគ្រប់គ្រងការស្តារជីវភាពនិងស្តារហេដ្ឋារចនាសម្ព័ន្ធឡើងវិញ។

ទីស្តីការក្រសួងការបរទេស៖ នៅថ្ងៃទី៩ ខែធ្នូ ឆ្នាំ២០២៥ ឯកឧត្តម តន់ សារ៉ា តំណាងថ្នាក់ដឹកនាំអាជ្ញាធរមីន បានអញ្ញើញចូលរួមកិច្ចប្រជុំការវិវត្តថ្មីៗ នៃស្ថានការណ៍ព្រំដែនកម្ពុជា-ថៃ ក្រោមអធិបតីភាពលោកជំទាវ អ៊ាត សោភា រដ្ឋលេខាធិការប្រចាំការ នៃក្រសួងការបរទេស និងសហប្រតិបត្តិការអន្តរជាតិ។ កិច្ចប្រជុំមានការចូលរួមពី អង្គទូតបរទេស និងតំណាងទីភ្នាក់ងារអង្គការសហប្រជាជាតិ ប្រចាំកម្ពុជា។

រាជធានីភ្នំពេញ៖ ថ្ងៃទី៥ ខែធ្នូ ឆ្នាំ២០២៥ ឯកឧត្តម ហ៊ាន គឹមស៊ីន ទីប្រឹក្សា និងជាប្រធាននាយកដ្ឋាន បានដឹកនាំកិច្ចប្រជុំផ្ទៃក្នុងនាយកដ្ឋាន ក្នុងគោលបំណងដើម្បីបូកសរុបលទ្ធផលសម្រេចបានក្នុងឆ្នាំ២០២៥ និងលើកទិសដៅការងារឆ្នាំ២០២៦។ ក្នុងនោះក៏បានលើកឡើងនិងពិភាក្សាការងារសំខាន់ៗមួយចំនួន ជាពិសេសការវិភាគមុខងាររបស់មន្ត្រីបុគ្គលិកតាមការិយាល័យនីមួយៗ ក្នុងនាយកដ្ឋានទាំងមូល។

អាជ្ញាធរមីន៖ នៅរសៀល ថ្ងៃទី៣១ ខែតុលា ឆ្នាំ២០២៥ ឯកឧត្ដមប្រធាននាយកដ្ឋាន បានដឹកនាំកិច្ចប្រជុំផ្ទៃក្នុងនាយកដ្ឋាន ដើម្បី​បូក​សរុបវឌ្ឍនភាពការងារ ដោះស្រាយ​បញ្ហាប្រឈម ​ក្នុង​ខែ​តុលា និង​លើកទិសដៅការងារ​បន្ត​ ខែ​វិច្ឆិកា ឆ្នាំ២០២៥។

ខេត្តកំពត៖ នៅថ្ងៃទី២៦-២៧ ខែសីហា ឆ្នាំ២០២៥ ដោយទទួលបានថវិកាគាំទ្រដោយគម្រោងបោសសម្អាតមីនដើម្បីលទ្ធផលដំណាក់កាលទី៤ (CFR-IV) នាយកដ្ឋានផែនការ សេដ្ឋកិច្ចសង្គម និងគ្រប់គ្រងទិន្នន័យ នៃអគ្គលេខាធិការដ្ឋានអាជ្ញាធរមីន បានរៀបចំវគ្គបណ្តុះបណ្តាលបំប៉នសមត្ថភាព ស្តីពីជំនាញគ្រប់គ្រងព័ត៌មាន/ទិន្នន័យវិស័យសកម្មភាពមីន ដើម្បីរៀបចំផែនការបោសសម្អាតមីន/សំណល់ជាតិផ្ទុះពីសង្គ្រាម សម្រាប់មន្ត្រីម៉ាពូ មន្ត្រី CMVIS និងមន្រ្តី-បុគ្គលិកអាជ្ញាធរមីន។

នៅព្រឹកថ្ងៃទី២៨ ខែឧសភា ឆ្នាំ២០២៥៖ ឯកឧត្តម តន់ សារ៉ា អគ្គលេខាធិការរង តំណាងថ្នាក់ដឹកនាំអាជ្ញាធរមីន បានចូលរួមកិច្ចប្រជុំអន្តរក្រសួង កម្រិតថ្នាក់ដឹកនាំ ដើម្បីពិនិត្យ និងពិភាក្សាលើសេចក្តីព្រាងកម្មវិធីវិនិយោគសាធារណៈ (ក.វ.ស.) ៣ឆ្នាំរំកិល ២០២៦-២០២៨ រៀបចំដោយក្រសួងផែនការ នៅសណ្ឋាគារហ៊ីម៉ាវ៉ារី រាជធានីភ្នំពេញ។ កិច្ចប្រជុំនេះដឹកនាំដោយ ឯកឧត្តម ប៊ិន ត្រឈៃ រដ្ឋមន្រ្តីក្រសួងផែនការ ដោយមានសមាសភាពថ្នាក់ដឹកនាំមកពីក្រសួង ស្ថាប័ន ដែលជាសមាជិកនៃគណៈកម្មការអន្តរក្រសួងសម្រាប់រៀបចំកម្មវិធីវិនិយោគសាធារណៈ ៣ឆ្នាំរំកិល សរុបប្រមាណ១០០នាក់។

កម្មវិធីវិនិយោគសាធារណៈ៣ឆ្នាំរំកិលនេះ គឺជាឧបករណ៍ផ្នែកគោលនយោបាយមួយ សម្រាប់អនុវត្តផែនការយុទ្ធសាស្ត្រអភិវឌ្ឍន៍ជាតិ(ផ.យ.អ.ជ.)របស់រាជរដ្ឋាភិបាល នីតិកាលទី៧នៃរដ្ឋសភា តាមរយៈការស្នើឡើងនូវ គម្រោងវិនិយោគសាធារណៈ ដែលអាចឆ្លើយតបទៅនឹងអាទិភាពដែលមានចែងក្នុងយុទ្ធសាស្ត្របញ្ចកោណ ដំណាក់កាលទី១ និងផ.យ.អ.ជ.របស់រាជរដ្ឋាភិបាល នីតិកាលទី៧នៃរដ្ឋសភា។

ព្រឹកថ្ងៃទី២២ ខែឧសភា ឆ្នាំ២០២៥៖ ឯកឧត្តម ហ៊ាន គឹមស៊ីន ប្រធាននាយកដ្ឋានផែនការ សេដ្ឋកិច្ចសង្គម និងគ្រប់គ្រងទិន្នន័យ នៃអាជ្ញាធរមីន បានចូលរួមកិច្ចប្រជុំអន្តរក្រសួង កម្រិតបច្ចេកទេស ដើម្បីពិនិត្យ និងពិភាក្សាលើសេចក្តីព្រាងកម្មវិធីវិនិយោគសាធារណៈ (ក.វ.ស.) ៣ឆ្នាំរំកិល ២០២៦-២០២៨ រៀបចំដោយក្រសួងផែនការ នៅសណ្ឋាគារហ៊ីម៉ាវ៉ារី រាជធានីភ្នំពេញ។

កម្មវិធីវិនិយោគសាធារណៈ(PIP)៣ឆ្នាំរំកិល នេះ ត្រូវបានរៀបចំឡើងជារៀងរាល់ឆ្នាំ ដើម្បីបង្ហាញពីគម្រោងវិនិយោគសាធារណៈដែលមានអាទិភាពខ្ពស់របស់ក្រសួង ស្ថាប័ន ឆ្លើយតបទៅនឹងអាទិភាពរបស់រាជរដ្ឋាភិបាលកម្ពុជាសម្រាប់តម្រូវការជំនួយវិនិយោគជាទុន និងជំនួយបច្ចេកទេស ក្នុងការអនុវត្តផែនការយុទ្ធសាស្ត្រអភិវឌ្ឍន៍ជាតិ(NSDP)។