Tuol Sleng Genocide Museum

តាងនាមថ្នាក់ដឹកនាំ មន្រ្តី បុគ្គលិកនៃសារមន្ទីរទួលស្លែង យើងខ្ញុំមានសេចក្តីរន្ធត់ និងក្រៀមក្រំជាទីបំផុត ចំពោះមរណភាពរបស់ ឯកឧត្តម ជុំ សុភមករា អគ្គនាយករងអាជ្ញាធរជាតិអប្សរា ដែលបានទទួលមរណភាព នៅថ្ងៃចន្ទ ១រោច ខែជេស្ឋ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី១ ខែមិថុនា ឆ្នាំ២០២៦ ក្នុងជន្មាយុ ៤៤ឆ្នាំ ដោយជួបឧបទ្ទវហេតុគ្រោះថ្នាក់ចរាចរណ៍។
សូមដួងវិញ្ញាណក្ខន្ធ ឯកឧត្តម បានទៅកាន់សុគតិភព។

ទស្សនកិច្ចស្វែងយល់ពីប្រវត្តិសាស្ត្រ និងកំណាយស្រាវជ្រាវនៅទីតាំង ម-១៣
-------------------------------------

នៅថ្ងៃទី២៩ ខែឧសភា ឆ្នាំ២០២៦ លោក ហង្ស និស្ស័យ បានសម្របសម្រួលទទួលស្វាគមន៍លោក Flavio Bonetti ប្រធានការិយាល័យអង្គការយូណេស្កូប្រចាំទីក្រុងភ្នំពេញ និង លោកស្រី Lee Sejin នាយករងទីភ្នាក់ងារKOICA ប្រចាំកម្ពុជា ព្រមទាំងប្រតិភូអម នៅទីតាំងអតីត ម-១៣។ ការធ្វើទស្សនកិច្ចនេះ គឺដើម្បីស្វែងយល់ពីប្រវត្តិសាស្រ្ត និងលទ្ធផលនៃការធ្វើកំណាយស្រាវជ្រាវលើកទី២ នៅទីតាំងអតីត ម-១៣។ ក្នុងដំណើរទស្សនកិច្ចនេះដែរ ក៏មានការពិភាក្សាផ្លាស់ប្ដូរបទពិសោធន៍លើចក្ខុវិស័យក្នុងការរៀបចំទីតាំង ម-១៣ ដែលបានក្លាយជាទីតាំងបេតិកភណ្ឌពិភពលោកនៃអង្គការយូណេស្កូ។ ជាមួយគ្នានេះ ប្រតិភូនិងក្រុមការងារ បានពិភាក្សាអំពីគម្រោងថតចម្លងបណ្ណសារសារមន្ទីរទួលស្លែងជំហានទី២ ដែលគាំទ្រដល់ការបកស្រាយប្រវត្តិសាស្ត្រនៃទីតាំងបេតិកភណ្ឌ ការអភិរក្សអដ្ឋិធាតុ ព្រមទាំងចក្ខុវិស័យនៃការស្រាវជ្រាវនាពេលអនាគត។

សូមបញ្ជាក់ថា ទីតាំងបូជនីយដ្ឋានចងចាំនៃកម្ពុជា៖ ពីទីតាំងឧក្រិដ្ឋកម្មមកជាមណ្ឌលផ្សះផ្សានិងសន្តិភាព" បានចុះក្នុងបញ្ជីបេតិកភណ្ឌពិភពលោករបស់អង្គការយូណេស្កូពិភពលោក នៅទីក្រុងប៉ារីស សាធារណរដ្ឋបារាំង តាមរយៈសេចក្ដីសម្រេចលេខ 47 COM 8B.14។ បូជនីយដ្ឋានចងចាំនៃកម្ពុជា រួមមានទីតាំងប្រវត្តិសាស្រ្តចំនួន ៣ គឺ អតីត ម-១៣ (កំពង់ឆ្នាំង-កំពង់ស្ពឺ) សារមន្ទីរឧក្រិដ្ឋកម្មប្រល័យពូជសាសន៍ទួលស្លែង និងមជ្ឈមណ្ឌលប្រល័យពូជសាសន៍ជើងឯក (រាជធានីភ្នំពេញ)៕


Project

“រួមគ្នាលើកកម្ពស់ការអានពីប្រវត្តិសាស្ត្រមន្ទីរស-២១ និងចងចាំពីជនរងគ្រោះនៃរបបខ្មែរក្រហម”
---------------------------------
ចាប់ពីថ្ងៃទី២៦ ដល់២៩ ខែឧសភា ឆ្នាំ២០២៦ សារមន្ទីរទួលស្លែងរៀបចំស្ដង់សៀវភៅលើកទី២ នៅមជ្ឈមណ្ឌលប្រល័យពូជសាសន៍ជើងឯក។

ក្នុងគោលបំណងរួមចំណែកនិងលើកកម្ពស់ការចងចាំពីជនរងគ្រោះ ដែលបាត់បង់ជីវិតនៅក្នុងសម័យខ្មែរក្រហម សារមន្ទីរនាំយកស្នាដៃស្រាវជ្រាវថ្មីៗ សៀវភៅបទពិសោធន៍ជនរងគ្រោះ នៅក្នុងរបបកម្ពុជាប្រជាធិបតេយ្យមួយចំនួន ទៅផ្សព្វផ្សាយនិងដាក់ជូនសាធារណជនស្វែងយល់។

📅 កាលបរិច្ឆេទ៖ ថ្ងៃទី២៦ ដល់ថ្ងៃទី២៩ ខែឧសភា ឆ្នាំ២០២៦
🕐 ពេលវេលា៖ ៨ព្រឹក ដល់ ៥ ល្ងាច
📍 ទីតាំង៖ មជ្ឈមណ្ឌលប្រល័យពូជសាសន៍ជើងឯក


www.tuolsleng.gov.kh
https://archives.tuolsleng.gov.kh

ចងចាំគ្មានថ្ងៃភ្លេចឧក្រិដ្ឋកម្មដែលបានកើតឡើងក្នុងសម័យខ្មែរក្រហម!
_____________________________________

នៅថ្ងៃទី២៥ ខែឧសភា ឆ្នាំ២០២៦ សារមន្ទីរឧក្រិដ្ឋកម្មប្រល័យពូជសាសន៍ទួលស្លែង បានប្រារព្ធ “ទិវាជាតិនៃការចងចាំ” នៅទីតាំងអតីតមន្ទីរឃុំឃាំង ១៣ (ម-១៣) ស្ថិតក្នុងភូមិព្រៃជ្រៅ ឃុំក្បាលទឹក ស្រុកទឹកផុស ខេត្តកំពង់ឆ្នាំង ជាប់ព្រំប្រទល់នឹងឃុំអមលាំង ស្រុកថ្ពង ខេត្តកំពង់ស្ពឺ។ ពិធីនេះ រៀបចំឡើងក្នុងគោលបំណង៖ ១)- ដើម្បីឧទ្ទិសកុសលជូនវិញ្ញាណក្ខន្ធជនរងគ្រោះសម័យខ្មែរក្រហម ជាពិសេសជនរងគ្រោះបាត់បង់ជីវិតនៅអតីត ម-១៣ ២)- រួមចំណែកក្នុងការរំឭកនូវទុក្ខវេទនារបស់ប្រជាជនកម្ពុជាក្នុងរបបកម្ពុជាប្រជាធិបតេយ្យ ៣)- ផ្សាភ្ជាប់ទំនាក់ទំនងរវាងអាជ្ញាធរមូលដ្ឋាន សហគមន៍ជុំវិញទៅនឹងទីតាំងអតីត ម-១៣ ឱ្យស្គាល់កាន់តែទូលំទូលាយពីប្រវត្តិទីតាំង ជាពិសេសជំរុញឱ្យមានការចូលរួមចំណែកក្នុងការផ្សព្វផ្សាយ និងអភិរក្សទីតាំង។

ពិធីនេះ មានការអញ្ជើញចូលរួមពី តំណាងរដ្ឋបាលស្រុកថ្ពង ខេត្តកំពង់ស្ពឺ ព្រះសង្ឃ សាច់ញាតិជនរងគ្រោះដែលត្រូវខ្មែរក្រហមចាប់ខ្លួនមកឃុំឃាំង ធ្វើទារុណកម្ម និងសម្លាប់នៅ ម-១៣ សិស្សានុសិស្ស ប្រជាពលរដ្ឋដែលរស់ជុំវិញទីតាំង ម-១៣ សរុបចំនួន ៧៩នាក់។ ក្នុងពីធីនេះ ក៏មានកិច្ចសូត្រមន្ត បង្សុកូល ឧទ្ទិសកុសលដល់ជនរងគ្រោះដែលបានបាត់បង់ជីវិត ព្រមទាំងទស្សនាស្វែងយល់ពីប្រវត្តិទីតាំង និង ការធ្វើកំណាយស្រាវជ្រាវនៅលើទីតាំងផ្ទាល់ផងដែរ។



www.tuolsleng.gov.kh

www.tuolsleng.gov.kh

ពិព័រណ៍សៀវភៅរយៈពេល ៤ថ្ងៃ បានបញ្ចប់ជាស្ថាពរ
---------------------------------
ចាប់ពីថ្ងៃទី២០ ដល់២៣ ខែឧសភា ឆ្នាំ២០២៦ សារមន្ទីរទួលស្លែងបានចូលរួមពិព័រណ៍សៀវភៅ អ.វ.ត.ក. លើកទី១ ក្នុងឱកាសទិវាជាតិនៃការចងចាំ ២០ ឧសភា។

ជារៀងរាល់ឆ្នាំ សារមន្ទីរទួលស្លែងតែងស្រាវជ្រាវប្រធានបទថ្មីៗ ស្ដីពីបទពិសោធន៍ជនរងគ្រោះ និងប្រវត្តិទីតាំងឧក្រិដ្ឋកម្មនានានៅក្នុងរបបកម្ពុជាប្រជាធិបតេយ្យ។ អាស្រ័យហេតុនេះ សារមន្ទីរទួលស្លែងបានចូលរួមផ្សព្វផ្សាយអំពីស្នាដៃស្រាវជ្រាវ និងបោះពុម្ពផ្សាយខាងលើក្នុងកម្មវិធីសាធារណៈនានា ដើម្បីជំរុញការអាននិងលើកកម្ពស់ការចងចាំពីជនរងគ្រោះ ដែលបាត់បង់ជីវិតនៅក្នុងសម័យខ្មែរក្រហម។

សារមន្ទីរទួលស្លែងសូមថ្លែងអំណរគុណដល់សាធារណជនទាំងអស់ ដែលបានស្វែងយល់ពីសារមន្ទីរទួលស្លែង ក្នុងព្រឹត្តិការណ៍ខាងលើ។ សារមន្ទីរទួលស្លែងក៏សូមថ្លែងអំណរគុណដល់ អ.វ.ត.ក. ដែលបានផ្ដួចផ្ដើមកម្មវិធីនេះឡើង។

ក្នុងករណីសាធារណជនមានបំណងចង់មកទស្សនា ឬស្វែងយល់ព័ត៌មានបន្ថែមអំពីសារមន្ទីរទួលស្លែង សូមទាក់ទងមកកាន់គេហទំព័រនិងទំព័រហ្វេសប៊ុកសារមន្ទីរ ឬអញ្ជើញមកផ្ទាល់នៅផ្លូវលេខ ១១៣ កែង៣៥០ សង្កាត់បឹងកេងកង៣ ខណ្ឌបឹងកេងកង រាជធានីភ្នំពេញ។ សម្រាប់ជនជាតិខ្មែរ ការចូលទស្សនាសារមន្ទីរ ពុំតម្រូវឲ្យបង់ប្រាក់នោះទេ។


www.tuolsleng.gov.kh
https://archives.tuolsleng.gov.kh

ប្រតិភូជប៉ុនទស្សកិច្ចនៅសារមន្ទីរទួលស្លែង
-----------------------------------------

នៅរសៀលថ្ងៃទី២១ ខែឧសភា ឆ្នាំ២០២៦ លោកស្រី KIMURA Hidemi ប្រធានវិទ្យាស្ថានស្រាវជ្រាវគោលនយោបាយ នៃក្រសួងហិរញ្ញវត្ថុ ប្រទេសជប៉ុន និងប្រតិភូអមចំនួន ១០រូប អញ្ជើញមកទស្សនាសារមន្ទីរទួលស្លែង ដើម្បីស្វែងអំពីប្រវត្តិសាស្ដ្រខ្មែរក្រហម និងមន្ទីរ ស-២១។ ក្នុងដំណើរទស្សនកិច្ចនេះ លោកស្រី និងគណៈប្រតិភូ បានទទួលការស្វាគមន៍យ៉ាងកក់ក្ដៅពីថ្នាក់ដឹកនាំ និងអមដោយមន្រ្តីមគ្គុទេសក៍នៃសារមន្ទីរទួលស្លែង។

ក្នុងឱកាសនេះ លោកស្រី KIMURA Hidemi និងគណៈប្រតិភូបានទស្សនាពិព័រណ៍ ស្លាកស្នាមប្រវត្តិសាស្ត្រ រូបថតជនរងគ្រោះ និងសម្តែងក្តីសោកស្តាយដល់ជនរងគ្រោះបាត់បង់ជីវិតនៅក្នុងសម័យខ្មែរក្រហម និងអតីតមន្ទីរ ស-២១។


www.tuolsleng.gov.kh

កំណាយស្រាវជ្រាវលើកទី២ នៅទីតាំងអតីត ម-១៣
------------------------------

នៅថ្ងៃទី១៨ ខែឧសភា ឆ្នាំ២០២៦ ក្រុមការងារសារមន្ទីរទួលស្លែង សហការជាមួយនាយកដ្ឋានបុរាណវិទ្យា និងសាកលវិទ្យាល័យ Flinders ប្រទេសអូស្ត្រាលី បានរៀបចំពិធីបើកការដ្ឋានដំណើរការកំណាយស្រាវជ្រាវលើកទី២ និងកំណាយបង្ការ នៅទីតាំងអតីតមន្ទីរឃុំឃាំង១៣។ ក្នុងពិធីបើកការដ្ឋានកំណាយនេះ ក៏មានការអញ្ជើញចូលរួមពីលោកអភិបាលស្រុកថ្ពង ខេត្តកំពង់ស្ពឺ អាជ្ញាធរមូលដ្ឋាន និងប្រជាពលរដ្ឋ ។ ការធ្វើកំណាយនេះ មានបំណងសំខាន់ៗរួមមាន ១)- សិក្សា និងផ្ទៀងផ្ទាត់រវាងសក្ខីកម្ម ឯកសារនានា ជាមួយនឹងទីតាំងជាក់ស្ដែងដើម្បីបញ្ជាក់ឱ្យកាន់តែច្បាស់ សម្រាប់បំពេញបន្ថែមឱ្យការចងក្រងប្រវត្តិសាស្រ្ត ព្រមទាំងរៀបចំចរន្តទស្សនា ២)- ធ្វើកំណាយបង្ការ ត្រង់ចំណុចទីតាំងដែលគ្រោងរៀបចំហេដ្ឋារចនាសម្ព័ន្ធនានាដើម្បីធានាការពារ បង្ការកុំឱ្យប៉ះពាល់លើស្លាកស្នាម តឹកតាងប្រវត្តិសាស្រ្តរបស់ទីតាំង និង ៣)- អនុវត្តតាមគោលការណ៍ណែនាំរបស់គណៈកម្មការបេតិកភណ្ឌពិភពលោកនៃអង្គការយូណេស្កូ។

ម-១៣ ជាអតីតមន្ទីរឃុំឃាំងរបស់ខ្មែរក្រហម ដែលដំណើរការចាប់ពី ឆ្នាំ១៩៧១ ដល់ឆ្នាំ១៩៧៥ និងមានតួនាទីចាប់ខ្លួនឃុំឃាំង ធ្វើទារុណកម្ម ព្រមទាំងសម្លាប់មនុស្សដែលត្រូវចោទថាជា “គិញ” ឬ “ក្បត់បដិវត្តន៍”។ វន វ៉េត បានជ្រើសរើសនិងចាត់តាំង កាំង ហ្កេកអ៊ាវ ហៅ ឌុច ឱ្យដឹកនាំមន្ទីរឃុំឃាំងនេះ។ នៅក្រោយពេលខ្មែរក្រហម ដណ្តើមបានទីក្រុងភ្នំពេញនាថ្ងៃទី១៧ ខែមេសា ឆ្នាំ១៩៧៥ ម-១៣ ក៏ត្រូវបោះបង់ចោល ឬលែងមានដំណើរការ។ ឌុច បានដកស្រង់បទពិសោធពី ម-១៣ ដើម្បីជំរុញឱ្យការដឹកនាំនៅ ស-២១ (បច្ចុប្បន្នសារមន្ទីរ ទួលស្លែង) កាន់តែមានភាពឃោរឃៅ និងប្រតិបត្តិការយ៉ាងម៉ត់ចត់។ អំឡុងពេលប្រតិបត្តិការ មានប្រជាជន ឬជនរងគ្រោះជាច្រើនត្រូវខ្មែរក្រហមចាប់ខ្លួន ហើយក្នុងនោះមានតែ ប្រាំ ឬប្រាំមួយនាក់ប៉ុណ្ណោះដែលអាចរស់រានមានជីវិត។

សូមបញ្ជាក់ជូនផងដែរថា ទីតាំងបូជនីយដ្ឋានចងចាំនៃកម្ពុជា៖ ពីទីតាំងឧក្រិដ្ឋកម្មមកជា មណ្ឌលផ្សះផ្សានិងសន្តិភាព" បានចុះក្នុងបញ្ជីបេតិកភណ្ឌពិភពលោករបស់អង្គការយូណេស្កូពិភពលោក នៅទីក្រុងប៉ារីស សាធារណរដ្ឋបារាំង តាមរយៈសេចក្ដីសម្រេចលេខ 47 COM 8B.14។ បូជនីយដ្ឋានចងចាំនៃកម្ពុជា រួមមានទីតាំងប្រវត្តិសាស្រ្តចំនួន ៣ គឺ អតីត ម-១៣ (កំពង់ឆ្នាំង-កំពង់ស្ពឺ) សារមន្ទីរឧក្រិដ្ឋកម្មប្រល័យពូជសាសន៍ទួលស្លែង និងមជ្ឈមណ្ឌលប្រល័យពូជសាសន៍ជើងឯក (រាជធានីភ្នំពេញ)៕