Cambodian Human Rights Committee

05/10/2026

01/10/2026

ខេត្តស្វាយរៀង៖ នៅរសៀលថ្ងៃទី៣០ ខែកញ្ញា ឆ្នាំ២០២៦ ​ឯកឧត្តម នូ ស្ថាបត្យា សមាជិកគណៈ​កម្មាធិការសិទ្ធិមនុស្ស​កម្ពុជា (គ.ស.ម.ក.) បានដឹកនាំក្រុមការងារ គ.ស.ម.ក. ចូលជួបពិភាក្សា​ការងារ​ជាមួយ​ក្រុមការងារ​រដ្ឋបាលខេត្ត​ស្វាយ​រៀង​​ដឹកនាំ​ដោយ ឯកឧត្តម ញ៉ែម សារី អភិបាលរង​នៃគណៈអភិបាលខេត្តស្វាយរៀង ដោយ​មាន​ការ​អញ្ជើញ​ចូលរួម​ពី​មន្ទីរ ​​ស្ថាប័នពាក់ព័ន្ធ សរុប​ប្រមាណ​ជាង​ ៣០នាក់ ស្តីពី​កិច្ច​សហការ​ក្នុងការត្រៀមរៀបចំព្រឹត្តិការណ៍រត់ពាក់កណ្តាលម៉ារ៉ាតុងដើម្បីសប្បុរសធម៌ អបអរសាទរខួបលើកទី៧៨ ទិវាសិទ្ធិមនុស្ស​អន្តរជាតិ ១០ធ្នូ ឆ្នាំ​២០២៦ ដែលនឹង​ប្រព្រឹត្តិទៅនៅថ្ងៃទី២៨ ខែវិច្ឆិកា ឆ្នាំ២០២៦ នៅខេត្តស្វាយរៀង។

គ.ស.ម.ក. ក៏សូមជម្រាបជូន និង​អញ្ជើញសាធារណជន​ចូលរួម​ព្រឹត្តិការណ៍រត់​ដើម្បីសប្បុរសធម៌នេះ តាមរយៈ​ការចុះឈ្មោះតាមដំណខាងក្រោម។

https://forms.gle/EUnj56pDEwGZYeKv9

ទំនាក់ទំនងព័តមានលំអិត៖ 099 444 247 / 095 978 881 / 077 622 966 / 098 827 279
ឬអាចតាមរយៈតេឡេក្រាម៖ https://t.me/chrc4charity2026

30/09/2026

ឯកឧត្តម ប៉ា ប៉ុណ្ណារ៉ាដា ចូលរួមថ្លែងសុន្ទរកថាស្វាគមន៍ ក្នុងសិក្ខាសាលាអាស៊ាន លើកទី៧ ស្តីពីចំណុចប្រសព្វរវាងជម្លោះនិងសិទ្ធិមនុស្ស៖ មាគ៌ា និងវិធីសាស្រ្ត ដើម្បីសន្តិភាពក្នុងតំបន់អាស៊ាន នៅទីក្រុងគូឡាឡាំពួ ប្រទេសម៉ាឡេស៊ី។

======================

ទីក្រុងគូឡាឡាំពួ៖ ដោយទទួលបានការចាត់តាំងដ៏ខ្ពង់ខ្ពស់ពីឯកឧត្តម កែវ រ៉េមី ទេសរដ្ឋមន្រ្តី ប្រធានគណៈកម្មាធិការសិទ្ធិមនុស្សកម្ពុជា (គ.ស.ម.ក.) និងជាតំណាងប្រទេសកម្ពុជាប្រចាំគណៈកម្មការអន្តររដ្ឋាភិបាលអាស៊ានទទួលបន្ទុកសិទ្ធិមនុស្ស (អាយឆា) ឯកឧត្តម ប៉ា ប៉ុណ្ណារ៉ាដា សមាជិក គ.ស.ម.ក. និងជាតំណាងរងប្រទេសកម្ពុជាប្រចាំអាយឆា និងឯកឧត្តម រ៉េតដា រតនៈ សមាជិក គ.ស.ម.ក. បានចូលរួមសិក្ខាសាលាអាស៊ាន លើកទី៧ ស្តីពីចំណុចប្រសព្វរវាងជម្លោះនិងសិទ្ធិមនុស្ស៖ តម្រាយផ្លូវ និងវិធីសាស្រ្ត ដើម្បីសន្តិភាពក្នុងតំបន់អាស៊ាន ដែលបានប្រព្រឹត្តទៅនៅថ្ងៃទី២៨-២៩ ខែកញ្ញា ឆ្នាំ២០២៦ នៅទីក្រុងគូឡាឡាំពួ ប្រទេសម៉ាឡេស៊ី។

សិក្ខាសាលានេះ មានគោលបំណង (១) ផ្តល់វេទិកាដល់ភាគីពាក់ព័ន្ធ ដើម្បីចែករំលែក និងផ្លាស់ប្តូរមតិយោបល់អំពីវិធីសាស្ត្រជាក់ស្តែង ក្នុងការពង្រឹងកិច្ចសហការ និងការទប់ស្កាត់ គ្រប់គ្រង និងដោះស្រាយជម្លោះ ដោយផ្អែកលើសិទ្ធិមនុស្ស និង (២) ផ្តោតលើការវិភាគ និងការប្រើប្រាស់សូចនាករផ្អែកលើសិទ្ធិមនុស្ស ដើម្បីកំណត់សញ្ញាព្រមាន និងវាយតម្លៃហានិភ័យនៃជម្លោះ និងវិបត្តិដែលអាចកើតឡើង ព្រមទាំងពង្រឹងការគាំទ្រឱ្យបានទាន់ពេលវេលា និងការចែករំលែកព័ត៌មានប្រកបដោយប្រសិទ្ធភាព។

ក្នុងឱកាសនេះ ឯកឧត្តម ប៉ា ប៉ុណ្ណារ៉ាដា បានថ្លែងសុន្ទរកថាស្វាគមន៍​ ដោយបានគូសបញ្ជាក់ពីទំនាក់ទំនងរវាងសន្តិភាព និងសិទ្ធិមនុស្ស។ នៅពេលជម្លោះកើតឡើង សិទ្ធិមនុស្សជាមូលដ្ឋានត្រូវបានរំលោភបំពាន សូម្បីតែសិទ្ធិរស់រានមានជីវិត ក៏មិនត្រូវបានធានានោះដែរ។ ក្នុងស្ថានភាពបែបនេះ ការការពារប្រជាជនស៊ីវិល និងសេចក្តីថ្លៃថ្នូររបស់មនុស្សជាតិ ត្រូវតែការពារជាអាទិភាព ហើយអនុញ្ញាតឱ្យប្រជាជនត្រឡប់ទៅលំនៅឋានវិញប្រកបដោយសុវត្ថិភាព និងសេចក្តីថ្លៃថ្នូរ ក្នុងពេលជម្លោះត្រូវបានបញ្ចប់ ដូចមានចែងក្នុងច្បាប់សិទ្ធិមនុស្សអន្តរជាតិ និងច្បាប់មនុស្សធម៌អន្តរជាតិ ជាពិសេសអនុសញ្ញាទីក្រុងហ្សឺណែវឆ្នាំ១៩៤៩។

ទន្ទឹមនឹងនេះ ឯកឧត្តម ក៏បានលើកឡើងថា ប្រទេសកម្ពុជាបានឆ្លងកាត់សង្គ្រាមស៊ីវិលជាច្រើនទសវត្សរ៍ និងយល់ច្បាស់ពីផលវិបាកកើតចេញពីភ្លើងសង្គ្រាម។ តាមរយៈនយោបាយឈ្នះ-ឈ្នះរបស់ សម្តេចអគ្គមហាសេនាបតីតេជោ ហ៊ុន សែន ប្រទេសកម្ពុជាទទួលបានសុខសន្តិភាពពេញបរិបូរណ៍ ឯកភាពជាតិ ឯកភាពទឹកដីទាំងស្រុង និងសម្រេចបានការអភិវឌ្ឍគ្រប់វិស័យ រូមទាំងការអនុវត្តលទ្ធិប្រជាធិបតេយ្យសេរីពហុបក្ស សិទ្ធិមនុស្ស និងនីតិរដ្ឋ។ ដោយផ្អែកលើបទពិសោធន៍នេះ ជម្លោះគួរត្រូវបានដោះស្រាយដោយសន្តិវិធី តាមរយៈកិច្ចសន្ទនា និងការផ្សះផ្សា ដោយផ្អែកលើច្បាប់អន្តរជាតិ ច្បាប់សិទ្ធិមនុស្សអន្តរជាតិ និងច្បាប់មនុស្សធម៌អន្តរជាតិ។ វិធីសាស្ត្រទាំងនេះ មិនត្រឹមតែជួយស្តារ និងរក្សាសន្តិភាព និងស្ថិរភាពប៉ុណ្ណោះទេ ប៉ុន្តែថែមទាំងបង្កើតលក្ខខណ្ឌអំណោយផលសម្រាប់ការគោរព ការការពារ និងការអនុវត្តសិទ្ធិមនុស្សផងដែរ។

ជាកិច្ចបញ្ចប់ ឯកឧត្តម ជឿជាក់ថា អាស៊ាននៅតែអាចបន្តពង្រឹងការទប់ស្កាត់ជម្លោះ និងវិធីសាស្រ្តកសាងសន្តិភាព តាមរយៈកិច្ចសន្ទនា ការកសាងទំនុកចិត្ត ការអប់រំសិទ្ធិមនុស្ស និងកិច្ចសហប្រតិបត្តិការរវាងភាគីពាក់ព័ន្ធ។ #យុទ្ធសាស្ត្របញ្ចកោណ #ធនធានមនុស្សស
https://chrc.gov.kh/
https://x.com/Cambodian_Human
www.tiktok.com/
https://www.youtube.com/
https://t.me/joinchat/QGc1YaLDAYgwOD

29/09/2026

ឯកឧត្តមទេសរដ្ឋមន្រ្តី កែវ រ៉េមី​ ប្រធាន​គណៈកម្មាធិការ​សិទ្ធិ​មនុស្ស​កម្ពុជា​ ចុះសួរសុខទុក្ខកងទ័ព កងពលតូចថ្មើរជើងលេខ៤២
ប្រចាំទិសប្រាសាទតាមាន់​ ក្នុង​ឱកាសបុណ្យ​ភ្ជុំបិណ្ឌ​។

==============

នៅថ្ងៃទី២៨ ខែកញ្ញា​ ឆ្នាំ២០២៦​ ឯកឧត្តមទេសរដ្ឋមន្ត្រី កែវ រ៉េមី ប្រធានគណៈកម្មាធិការសិទ្ធិមនុស្សកម្ពុជា បានដឹកនាំប្រតិភូ ចុះសួរសុខទុក្ខ ឯកឧត្តម ឧត្តមសេនីយ៍ត្រី នាក់ វង្ស មេបញ្ជាការកងពលតូចថ្មើរជើងលេខ៤២ យោធភូមិភាគទី៤ មេទ័ពខ្លាំងជួរមុខ ដែលតែងតែឈរជើងនៅមុខសមរភូមិ ដើម្បីការពារអធិបតេយ្យភាព បូរណភាពទឹកដី និងសន្តិភាពជូន ជាតិ មាតុភូមិ ពេលជួបប្រទះស្ថានការណ៍ប្រឈមនឹងសង្រ្គាម។

ឆ្លៀតក្នុងឱកាសនោះ ឯកឧត្តមទេសរដ្ឋមន្ត្រី បានពាំនាំការផ្តាំផ្ញើសាកសួរសុខទុក្ខ និងការយកចិត្តទុកដាក់បំផុតពីសំណាក់ សម្តេចអគ្គមហាសេនាបតីតេជោ ហ៊ុន សែន សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ដល់វីរកងទ័ព ដោយបានបញ្ជាក់ថា ការចុះមកសួរសុខទុក្ខនេះគឺជាការលើកទឹកចិត្ត និងគោរពដឹងគុណចំពោះគុណូបការៈពុំអាចកាត់ថ្លៃបាន ដែលវីរកងទ័ពយើង ក៏ដូចជាក្រុមគ្រួសារ បានលះបង់សាច់ស្រស់ ឈាមស្រស់ក្នុងបុព្វហេតុការពារជាតិមាតុភូមិ និងបូរណភាពទឹកដីរបស់កម្ពុជា ពីសត្រូវឈ្លានពាន។

ឯកឧត្តម​ទេសរដ្ឋមន្រ្តី​ បានកោតសរសេីរ​ ឯកឧត្ដម​ នាក់ វង្ស ថាជាមេទ័ពឆ្នេីម​ តាមរយៈ ភាពឈ្លាសវៃ ក្លាហាន មានគំនិត មានវិន័យ ស្គាល់ចិត្តសាស្ត្រសង្រ្គាម ស្គាល់ខ្លួនឯង ស្គាល់សត្រូវ មានឆន្ទ: មោះមុតការពារទឹកដី​ ដែលស្តែងចេញយ៉ាងច្បាស់តាមវិន័យនៃកងកម្លាំងទ័ពរបស់គាត់។

សូម​បញ្ជាក់​ផងដែថា​ នេះជាលេីកទី៤​ ហេីយ​ដែល​គណៈកម្មាធិការ​សិទ្ធិ​មនុស្ស​កម្ពុជា​បាន​ចុះសួរសុខទុក្ខកងពលតូចថ្មើរជើងលេខ៤២
ប្រចាំទិសប្រាសាទតាមាន់​ ហេីយនឹង​បន្តកៀរគរ​សប្បុរសជន​ជួយ​ឧបត្ថម្ភ​គាំទ្រ​ដល់កងទ័ពជាបន្តបន្ទាប់ទៀត។ #យុទ្ធសាស្ត្របញ្ចកោណ #ធនធានមនុស្សស
https://chrc.gov.kh/
https://x.com/Cambodian_Human
www.tiktok.com/
https://www.youtube.com/
https://t.me/joinchat/QGc1YaLDAYgwOD