ក្រសួងសុខាភិបាលនៃព្រះរាជាណាចក្រកម្ពុជា

សិក្ខាសាលាស្ដីពី ការបិទបញ្ចប់ការអនុវត្តគម្រោងអាហារូបត្ថម្ភនៅកម្ពុជា
——

សៀមរាប៖ នាថ្ងៃព្រហស្បតិ៍ ៤រោច ខែជេស្ឋ ឆ្នាំមមី អដ្ឋស័ក ព.ស២៥៧០ ត្រូវនឹងថ្ងៃទី៤ ខែមិថុនា ឆ្នាំ២០២៦ លោកជំទាវវេជ្ជបណ្ឌិត ប្រាក់ សោភ័ណនារី រដ្ឋលេខាធិការក្រសួងសុខាភិបាល និងជានាយកគម្រោងអាហារូបត្ថម្ភនៅកម្ពុជា បានអញ្ជើញជាអធិបតីក្នុងពិធីសិក្ខាសាលាស្ដីពី ការបិទបញ្ចប់ការអនុវត្តគម្រោងអាហារូបត្ថម្ភនៅកម្ពុជា នៅខេត្តសៀមរាប។

គួរជម្រាបផងដែរថា សិក្ខាសាលានេះ ធ្វើឡើងក្នុងគោលបំណងដើម្បី៖
១. បូកសរុបលទ្ធផលដែលគម្រោងសម្រេចបាន ធៀបនឹងគោលដៅគម្រោង
២. ចែករំលែកបទពិសោធន៍ និងមេរៀនដែលទទួលបាន និងអនុសាសន៍នានា ដើម្បីយកទៅរៀបចំ និងអនុវត្តសម្រាប់គម្រោងក្រោយៗទៀត និង
៣. យន្តការផ្ទេរភារកិច្ចជូនដល់អាជ្ញាធរមូលដ្ឋាន ឬដៃគូពាក់ព័ន្ធ ដើម្បីធានាថាប្រតិបត្តិការមួយចំនួននឹងនៅតែបន្ត និងមាននិរន្តរភាពក្រោយពេលគម្រោងបានបិទបញ្ចប់។

ជាកិច្ចចាប់ផ្តើម លោកជំទាវនាយកគម្រោង ក៏បានថ្លែងអំណរគុណដល់អង្គភាពពាក់ព័ន្ធទាំងអស់រួមមាន ក្រសួងសេដ្ឋកិច្ចនិងហិរញ្ញវត្ថុ លេខាធិការដ្ឋានគ.ជ.អ.ប WB, GFF, DFAT, KfW, ទីភ្នាក់ងារជាតិបញ្ជាក់ចំណាយ នាយកដ្ឋាន និងមជ្ឈមណ្ឌលជាតិនៃក្រសួងសុខាភិបាល មន្ទីរសុខាភិបាលខេត្ត និងអាជ្ញាធរថ្នាក់ក្រោមជាតិ ដែលបានចូលរួមសហការ ឧបត្ថម្ភ គាំទ្រដល់ការអនុវត្តគម្រោងអាហារូបត្ថម្ភនៅកម្ពុជា ក្នុងរយះពេល ៦ឆ្នាំកន្លងមកនេះ។ ទន្ទឹមនឹងនោះ លោកជំទាវក៏បានថ្លែងនូវការកោតសរសើរ ចំពោះការសម្រេចបាននូវលទ្ធផលគួរជាទីមោទន ដែលមិនត្រឹមតែឆ្លើយតបទៅតាមគោលដៅរបស់គម្រោងប៉ុណ្ណោះទេ ប៉ុន្តែថែមទាំងសូចនាកស្ទើរតែទាំងអស់ សម្រេចបានលើសពីគោលដៅដែលបានរំពឹងទុក។

ជាចុងក្រោយ លោកជំទាវនាយកគម្រោងបានផ្ដាំផ្ញើរ និងជម្រុញដល់អង្គភាពអនុវត្តទាំងអស់ ឱ្យពន្លឿនសកម្មភាពដែលនៅសេសសល់ ឱ្យបានចប់សព្វគ្រប់ត្រឹមបំណាច់ខែមិថុនានេះ។ លោកជំទាវនាយកគម្រោង ក៏បានសំណូមពរដល់រដ្ឋបាលឃុំសង្កាត់ និងមន្ត្រីសុខាភិបាលគ្រប់ជាន់ថ្នាក់រក្សានូវកិច្ចសហការ និងបន្តយន្តការអនុវត្តការងារដោយប្រើប្រាស់វិធីសាស្ត្រ ចំណេះដឹង និងសម្ភារដែលគម្រោងបានផ្ដល់ជូនយកទៅធ្វើការអប់រំសុខភាពដល់ប្រជាពលរដ្ឋឱ្យបានជាប់ជាប្រចាំ ពិសេសពង្រឹងការចូលរួមរបស់អ្នកថែទាំកុមារ ក៏ដូចជាការតាមដាន និងលើកកម្ពស់ការលូតលាស់របស់កុមារ និងជម្រុញការមកប្រើប្រាស់សេវានៅមូលដ្ឋានសុខាភិបាលឱ្យបានច្រើន។

សូមជម្រាបជូនថាកិច្ចប្រជុំនេះ មានការអញ្ជើញចូលរួមពី ឯកឧត្តម នី គឹមសាន អនុប្រធានលេខាធិការដ្ឋាន គ.ជ.អ.ប និងជានាយកគម្រោងអាហារូបត្ថម្ភនៅកម្ពុជា លោកស្រី CHIHO SUZIKI តំណាងធនាគាពិភពលោក, តំណាងគម្រោងហិរញ្ញប្បទានសកលគាំទ្រស្រ្តីគ្រប់រូប កុមារគ្រប់រូប (GFF), តំណាងក្រសួងការបរទេស និងពាណិជ្ជកម្មអូស្ត្រាលី (DFAT), តំណាងទីភ្នាក់ងារបញ្ជាក់ចំណាយ, តំណាងក្រសួងសេដ្ឋកិច្ច និងហិរញ្ញវត្ថុ លោកស្រីអភិបាលរងនៃគណៈអភិបាលខេត្តទាំង៩ ឯកឧត្តមប្រធាន និងអនុប្រធានមន្ទីរសុខាភិបាល នៃរដ្ឋបាលខេត្តទាំង៩ និងលោក លោកស្រី ប្រធាន ការិយាល័យស្រុកប្រតិបត្តិទាំង២៣, ថ្នាក់ដឹកនាំ និងមន្ត្រីអង្គភាពអនុវត្តគម្រោង, ទីប្រឹក្សាសម្របសម្រួលខេត្ត និង មន្ត្រីរដ្ឋបាលស្រុកទទួលបន្ទុកស្រ្តី និងកុមារ និងលោក លោកស្រី ជាមន្ត្រីសុខាភិបាលនៃមន្ទីរពេទ្យបង្អែកថ្នាក់ស្រុកកម្រិត១ និង២ សរុប ចំនួន ២៣០រូប។

សេចក្តីជូនព័ត៌មាន ស្តីពីការសរុបស្ថានភាពជំងឺកូវីដ-១៩ ក្នុងព្រះរាជាណាចក្រកម្ពុជា សម្រាប់ថ្ងៃទី៤ ខែមិថុនា ឆ្នាំ២០២៦៖
-ករណីឆ្លងថ្មី ០នាក់
-ករណីជាសះស្បើយ ០នាក់
-ករណីស្លាប់ ០នាក់

ការចុះពិនិត្យវឌ្ឍនភាពការងារ និងពង្រឹងគុណភាព នៃការបម្រើសេវាសុខាភិបាល នៅមន្ទីរពេទ្យបង្អែកខេត្តកណ្ដាល។
—

ខេត្តកណ្ដាល៖ ពីថ្ងៃទី៣-៤ ខែមិថុនា ឆ្នាំ២០២៦ ឯកឧត្តមសាស្រ្តាចារ្យ ធា គ្រុយ និងលោកជំទាវវេជ្ជបណ្ឌិត ប៉ែន រិកស៊ី រដ្ឋលេខាធិការក្រសួងសុខាភិបាល បានចុះពិនិត្យវឌ្ឍនភាពការងារ និងពង្រឹងគុណភាព នៃការបម្រើសេវាសុខាភិបាល នៅមន្ទីរពេទ្យបង្អែកខ្សាច់កណ្ដាល និងមន្ទីរពេទ្យតេជោសែនកោះធំ ជុំទី៤ ឆ្នាំ២០២៦។

គោលបំណងបេសកកម្មផ្តោតសំខាន់លើការងារ៖ (១)ផ្នែកគ្រប់គ្រងហេដ្ឋារចនាសម្ព័ន្ធ (២)ផ្នែកគ្រប់គ្រង រដ្ឋបាល ធនធានមនុស្ស និងបដិសណ្ឋារកិច្ច (៣)ផ្នែកគ្រប់គ្រងបច្ចេកទេសវេជ្ជសាស្ត្រ-អមវេជ្ជសាស្ត្រ និង(៤)ផ្នែកគ្រប់គ្រងឱសថ សម្ភារៈ បរិក្ខារពេទ្យ។

ក្នុងឱកាសនោះដែរ ឯកឧត្តម និងលោកជំទាវរដ្ឋលេខាធិការ បានពាំនាំនូវការផ្ដាំផ្ញើសួរសុខទុក្ខ ពីឯកឧត្តមសាស្រ្តាចារ្យរដ្ឋមន្រ្តី ព្រមទាំងថ្លែងអំណរគុណដល់មន្រ្តីសុខាភិបាលទាំងអស់ ដែលបានខិតខំបម្រើសេវាថែទាំ និងព្យាបាលជម្ងឺជូនប្រជាពលរដ្ឋ យ៉ាងយកចិត្តទុកដាក់ និងទំនួលខុសត្រូវខ្ពស់។

គួរបញ្ជាក់ផងដែរថា បេសកកម្មខាងលើមានការចូលរួមពីប្រធានមន្ទីរសុខាភិបាលខេត្តកណ្តាល ថ្នាក់ដឹកនាំស្រុកប្រតិបត្តិ ថ្នាក់ដឹកនាំមន្ទីរពេទ្យបង្អែក និងមន្ត្រីសុខាភិបាលក្រោមឱវាទរបស់មន្ទីរពេទ្យបង្អែកខ្សាច់កណ្ដាល និងមន្ទីរពេទ្យតេជោសែនកោះធំ ។

អបអរសាទរ ខួបលើកទី៣០ ទិវាបរិស្ថានជាតិ និងបរិស្ថានពិភពលោក ក្រោមប្រធានបទ៖ «សំណល់សូន្យ»

៥ មិថុនា ១៩៩៦ - ៥ មិថុនា ២០២៦

ព្រះរាជក្រឹត្យ ស្តីពី លក្ខន្តិកៈនៃអង្គសុខាភិបាល
ព្រះរាជក្រឹត្យនេះ កំណត់អំពីលក្ខន្តិកៈនៃអង្គសុខាភិបាល ដើម្បីប្រមូលផ្តុំនិងគ្រប់គ្រងមន្ត្រីសុខាភិបាល ដែលជាអ្នកវិជ្ជាជីវៈបានទទួលការអប់រំ ការបណ្តុះបណ្តាល បទពិសោធការងារ ចំណេះដឹង និងបំពេញការងារ ក្នុងវិស័យសុខាភិបាល។

សេចក្តីជូនព័ត៌មាន ស្តីពីការសរុបស្ថានភាពជំងឺកូវីដ-១៩ ក្នុងព្រះរាជាណាចក្រកម្ពុជា សម្រាប់ថ្ងៃទី៣ ខែមិថុនា ឆ្នាំ២០២៦៖
-ករណីឆ្លងថ្មី ០នាក់
-ករណីជាសះស្បើយ ០នាក់
-ករណីស្លាប់ ០នាក់

កិច្ចប្រជុំស្តីពី «ការពិភាក្សាពីការរៀបចំបង្កើត កម្រិតថែទាំព្យាបាលទារក និងធ្វើបច្ចុប្បន្នភាព គោលការណ៏ថែទាំព្យាបាលទារកថ្នាក់ជាតិ»។
——

រាជធានីភ្នំពេញ៖ ថ្ងៃពុធ ទី៣ ខែមិថុនា ឆ្នាំ២០២៦ លោកជំទាវសាស្រ្តាចារ្យ អុឹម សិទ្ធិការ្យ រដ្ឋលេខាធិការក្រសួងសុខាភិបាល និងជាប្រធានគណៈកម្មការ គណៈកម្មការសម្របសម្រួលក្នុងការពង្រឹងគុណភាពថែទាំ ព្យាបាល សុខមាលភាពមាតា ទារក កុមារ និងរោគស្រ្តី ក្នុងព្រះរាជាណាចក្រកម្ពុជា បានដឹកនាំកិច្ចប្រជុំ ដើម្បីពិភាក្សាពីការរៀបចំបង្កើតកម្រិតថែទាំព្យាបាលទារក និងធ្វើបច្ចុប្បន្នភាពគោលការណ៏ថែទាំព្យាបាលទារកថ្នាក់ជាតិ។

គោលបំណងនៃអង្គប្រជុំគឺ បូកសរុបការងារ និងពិនិត្យពិភាក្សា ការរៀបចំបង្កើតកម្រិតថែទាំ ព្យាបាលទារក និងធ្វើបច្ចុប្បន្នភាពគោលការណ៍ថែទាំព្យាបាលទារកថ្នាក់ជាតិ ទៅតាមកម្រិត CPA1, CPA2 និងCPA3 ដែលជាផែនការសកម្មភាពមួយ ក្នុងផែនទីបង្ហាញផ្លូវសម្រាប់ពន្លឿនការកាត់បន្ថយអត្រាមរណភាពមាតា និងទារក (២០២៥-២០៣០) របស់ក្រសួងសុខាភិបាល ឱ្យសម្រេចបានតាមផែនការនៅឆ្នាំ២០៣០។

លោកជំទាវសាស្រ្តាចារ្យ បានផ្ដល់ជាអនុសាសន៍ដូចខាងក្រោម៖
១.សម្រាលដោយការវះកាត់ ត្រូវតែមាននិយាមច្បាស់លាស់
២.ថ្នាក់ដឹកនាំគ្រប់ជាន់ថ្នាក់ ជាពិសេសមន្ទីរពេទ្យជាតិ និងមន្ទីរពេទ្យសម្ព័ន្ធមេត្រីភាព ត្រូវតែសហការគ្នាទៅវិញទៅមក លើការគាំទ្របច្ចេកទេសថែទាំ ព្យាបាលទារកជុំវិញកំណើត និងក្រោយកំណើតឲ្យបានល្អប្រសើរ
៣.ពង្រឹងលើប្រព័ន្ធបញ្ជូនឲ្យមានប្រសិទ្ធភាព និងសុវត្ថិភាព
៤.ការរៀបចំ និងបង្កើតមេគ្គុទេសន៍ព្យាបាល ទារក នឹងជួយពង្រឹងសមត្ថភាពគ្រូពេទ្យ នៅក្នុងប្រព័ន្ធសុខាភិបាលតែមួយ ដើម្បីទទួលបានគុណភាព និងមានប្រសិទ្ធភាព ជាពិសេសកាត់បន្ថយអត្រាមរណភាពទារកក្នុងព្រះរាជាណាចក្រកម្ពុជា។

កិច្ចប្រជុំនេះ មានសមាសភាពចូលរួមពី ថ្នាក់ដឹកនាំក្រសួងសុខាភិបាល ថ្នាក់ដឹកនាំមន្ទីរពេទ្យជាតិ មន្ទីរពេទ្យក្រោមជាតិ វេជ្ជបណ្ឌិតឯកទេស វេជ្ជបណ្ឌិតជំនាញ ទារក និងកុមារនិង តំនាងអង្គការ JICA សរុបចំនួន២០រូប

ឯកឧត្តមសាស្ត្រាចារ្យ ឈាង រ៉ា រដ្ឋមន្រ្តីក្រសួងសុខាភិបាល បានអញ្ជើញចូលរួមសម្ពោធដាក់ឱ្យប្រើប្រាស់ជាផ្លូវការអគារកម្ពស់ ៣ជាន់ សមិទ្ធផលនានា និងប្រគល់សញ្ញាបត្រគ្រូបង្រៀនកម្រិតមូលដ្ឋាន និងសញ្ញាបត្របរិញ្ញាបត្រអប់រំ ឯកទេសអប់រំកាយ ជូនដល់គរុសិស្ស គរុនិស្សិតនៅវិទ្យាស្ថានជាតិអប់រំកាយ និងកីឡា ក្រោមអធិបតីភាពដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា។

រាជរដ្ឋាភិបាលកម្ពុជាគ្រប់អាណត្តិ តែងផ្តល់ការលើកកម្ពស់វិស័យអប់រំជាអាទិភាព ដោយធ្វើការពង្រឹងគុណភាព និងធ្វើការកែទម្រង់ជាបន្តបន្ទាប់ជាច្រើនដំណាក់កាល ដើម្បីប្រែក្លាយប្រព័ន្ធអប់រំឱ្យទៅជាកាតាលីករ ក្នុងការអភិវឌ្ឍសេដ្ឋកិច្ច និងសង្គម។ នៅក្នុងយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាលអាណត្តិទី៧ ក៏បានកំណត់យក ការអភិវឌ្ឍមូលធនមនុស្ស ជាបញ្ចកោណទី១ ដោយផ្តោតលើការកែទម្រង់ប្រព័ន្ធអប់រំ វិទ្យាសាស្ត្រ បច្ចេកវិទ្យា និងការធ្វើទំនើបកម្មជាអាទិភាពគន្លឹះ ដែលមានគោលដៅបង្កើតបរិយាកាសអប់រំប្រកបដោយគុណភាពខ្ពស់។

ការរីកចម្រើនជាលំដាប់របស់វិទ្យាស្ថានជាតិអប់រំកាយ និងកីឡា ទាំងលើផ្នែកហេដ្ឋារចនាសម្ព័ន្ធរូបវ័ន្ត និងបច្ចេកវិទ្យា ការកែលម្អកម្មវិធី និងវិធីសាស្ត្របណ្តុះបណ្តាល ការអភិវឌ្ឍសមត្ថភាពគ្រូលើការស្រាវជ្រាវ និងការបង្រៀន និងការពង្រឹងពង្រីកកិច្ចសហប្រតិបត្តិការជាមួយដៃគូពាក់ព័ន្ធ សំដៅឆ្លើយតបនឹងការកើនឡើង ទាំងបរិមាណ និងគុណភាពនៃតម្រូវការរបស់សង្គមជាតិក្នុងវិស័យអប់រំកាយ និងកីឡា។

រាជធានីភ្នំពេញ៖ ព្រឹកថ្ងៃពុធ ទី៣ ខែមិថុនា ឆ្នាំ២០២៦

កិច្ចប្រជុំលេខាធិការដ្ឋាន នៃគណៈកម្មាធិការទទួលបន្ទុកការងារព្យាបាល និងស្តារនីតិសម្បទាអ្នកញៀនគ្រឿងញៀន។
——

រាជធានីភ្នំពេញ៖ សៀលថ្ងៃទី២ ខែមិថុនា ឆ្នាំ២០២៦ ឯកឧត្តមវេជ្ជបណ្ឌិត ហុក គឹមចេង អគ្គនាយកបច្ចេកទេសសុខាភិបាល និងជាប្រធានលេខាធិការដ្ឋាន គ.ព.ស.គ.ញ បានដឹកនាំកិច្ចប្រជុំលេខាធិការដ្ឋាន ដោយមានការចូលរួមពីតំណាងក្រសួង ស្ថាប័នពាក់ព័ន្ធ និងសមាជិកលេខាធិការដ្ឋាន សរុប២៧រូប ដើម្បីពិនិត្យ និងពិភាក្សាលើលទ្ធផលនៃការចុះត្រួតពិនិត្យ និងវាយតម្លៃមជ្ឈមណ្ឌលព្យាបាល និងស្តារនីតិសម្បទាអ្នកញៀនគ្រឿងញៀន នៅខេត្តព្រះសីហនុ និងខេត្តបាត់ដំបង ព្រមទាំងវឌ្ឍនភាពនៃការអនុវត្តនិយាមនីតិវិធីប្រតិបត្តិ សម្រាប់មជ្ឈមណ្ឌលទាំងនោះ។

តាមរយៈលទ្ធផលនៃការវាយតម្លៃ កិច្ចប្រជុំបានកំណត់នូវចំណុចអាទិភាព ដែលត្រូវបន្តពង្រឹង ជាពិសេសការអភិវឌ្ឍសមត្ថភាពធនធានមនុស្ស និងការបណ្តុះបណ្តាលបន្តដល់បុគ្គលិកសុខាភិបាល លើការព្យាបាលអ្នកញៀនគ្រឿងញៀន និងការផ្តល់ប្រឹក្សាផ្លូវចិត្ត ដើម្បីលើកកម្ពស់គុណភាព សុវត្ថិភាព និងប្រសិទ្ធភាព នៃសេវាព្យាបាល និងស្តារនីតិសម្បទា ស្របតាមស្តង់ដារបច្ចេកទេសដែលបានកំណត់។

ឯកឧត្តមវេជ្ជបណ្ឌិត បានគូសបញ្ជាក់ថា ការព្យាបាល និងស្តារនីតិសម្បទាអ្នកញៀនគ្រឿងញៀន ត្រូវផ្តោតលើជនរងគ្រោះដោយសារធាតុញៀន ជាចំណុចកណ្តាល ដោយធានាការផ្តល់សេវាប្រកបដោយមនុស្សធម៌ គុណភាព និងការគោរពសិទ្ធិរបស់អ្នកញៀនគ្រឿងញៀន ព្រមទាំងគាំទ្រដល់ការធ្វើសមាហរណកម្មឱ្យវិលត្រឡប់ទៅរស់នៅក្នុងគ្រួសារ សហគមន៍ និងសង្គមវិញប្រកបដោយគុណភាពជីវិតល្អប្រសើរ។

កិច្ចប្រជុំក៏បានឯកភាពបន្តពង្រឹងកិច្ចសហការរវាងស្ថាប័នពាក់ព័ន្ធ និងដៃគូអភិវឌ្ឍន៍ ដើម្បីលើកកម្ពស់គុណភាព និងប្រសិទ្ធភាពនៃសេវាព្យាបាល និងស្តារនីតិសម្បទាឱ្យកាន់តែមានប្រសិទ្ធភាព និងចីរភាព។

សេចក្តីជូនព័ត៌មាន ស្តីពីការសរុបស្ថានភាពជំងឺកូវីដ-១៩ ក្នុងព្រះរាជាណាចក្រកម្ពុជា សម្រាប់ថ្ងៃទី២ ខែមិថុនា ឆ្នាំ២០២៦៖
-ករណីឆ្លងថ្មី ១នាក់
-ករណីជាសះស្បើយ ០នាក់
-ករណីស្លាប់ ០នាក់