រដ្ឋបាលខេត្តសៀមរាប/Siem Reap Provincial Administration

ក្រសួងពាណិជ្ជកម្មចេញសេចក្តីជូនដំណឹង ស្តីពីថ្លៃលក់រាយប្រេងឥន្ធនៈនៅតាមស្ថានីយសម្រាប់ការអនុវត្តជារៀងរាល់សប្ដាហ៍ ដោយផ្តើមអនុវត្តពីសប្ដាហ៍នេះតទៅ ចាប់ពីវេលាម៉ោង ១ រសៀលថ្ងៃទី២ ខែមិថុនា ឆ្នាំ២០២៦ រហូតដល់ថ្ងៃទី៩ ខែមិថុនា ឆ្នាំ២០២៦
…

កិច្ចប្រជុំគណៈកម្មការរដ្ឋបាល ជំរុញការចុះបញ្ចីដីធ្លីមានលក្ខណៈជាប្រព័ន្ធនៅក្នុងភូមិសាស្ត្រខេត្តសៀមរាប ដើម្បីពន្លឿនការចេញវិញ្ញាបនបត្រសម្គាល់ម្ចាស់អចលនវត្ថុស្របតាមផែនការ

នៅថ្ងៃទី១ ខែមិថុនា ឆ្នាំ២០២៦ នៅសាលប្រជុំធំសាលាខេត្តសៀមរាប បានរៀបចំកិច្ចប្រជុំគណៈកម្មការរដ្ឋបាល ជំរុញការចុះបញ្ចីដីធ្លីមានលក្ខណៈជាប្រព័ន្ធនៅក្នុងភូមិសាស្ត្រខេត្តសៀមរាប ដើម្បីពន្លឿនការចេញវិញ្ញាបនបត្រសម្គាល់ម្ចាស់អចលនវត្ថុស្របតាមផែនការ និងរៀបចំបែបបទ ឯកសារអនុវត្តនីតិវិធីស្នើសុំអនុប្បយោគ និងប្រទានកម្មជូនប្រជាពលរដ្ឋ ដែលបានកាន់កាប់ដីគម្របព្រៃឈើឆ្នាំ២០០២ ទៅរាជរដ្ឋាភិបាល។​ កិច្ចប្រជុំនេះ ប្រព្រឹត្តទៅក្រោមអធិបតីភាពលោក ហែន ពុទ្ធី អភិបាលរង នៃគណៈអភិបាលខេត្ត និងជាប្រធានគណៈកម្មការរដ្ឋបាល តំណាងឯកឧត្តម ប្រាក់ សោភ័ណ អភិបាលនៃគណៈអភិបាលខេត្តសៀមរាប ដោយមានការចូលរួមពីលោក នាយករងរដ្ឋបាលសាលាខេត្ត លោក អភិបាល អភិបាលរង នៃគណៈអភិបាលក្រុង ស្រុកទាំង១៣ លោក ប្រធានមន្ទីរ ជំនាញពាក់ព័ន្ធ លោក នាយករងទីចាត់ការអន្តរវិស័យសាលាខេត្ត លោក ប្រធានការិយាល័យគ្រប់គ្រងការអភិវឌ្ឍ និងសំណង់សាលាខេត្ត លោក ប្រធានការិយាល័យរៀបចំដែនដី នគរូបនីយកម្ម សំណង់ និងភូមិបាលក្រុង ស្រុកទាំង១៣ និងមន្រ្តីជំនាញពាក់ព័ន្ធ។

ក្នុងនោះលោក ប្រធានអង្គប្រជុំបានធ្វើការណែនាំបន្ថែម ដូចខាងក្រោម៖
១-ពន្លឿន និងជំរុញការងារចុះបញ្ជីដីធ្លីឱ្យបានរួចរាល់ស្របតាមផែនការរបស់ក្រសួងរៀបចំដែនដី នគរូបនីយកម្ម និងសំណង់ ដើម្បីចេញវិញ្ញាបនបត្រសម្គាល់ម្ចាស់អចលនវត្តជូនប្រជាពលរដ្ឋ ឱ្យបានមុនដំណាច់ឆ្នាំ២០២៦ ខាងមុននេះ។
២-ពន្លឿន និងជំរុញការងារដោះស្រាយទំនាស់ដីធ្លីជូនប្រជាពលរដ្ឋឱ្យបានរួចរាល់ស្របតាមផែនការ។
៣-ពន្លឿន និងជំរុញការងាររៀបចំផែនការប្រើប្រាស់ដីឃុំ សង្កាត់ ឱ្យបានរួចរាល់ស្របតាមការផែនការ។

កិច្ចប្រជុំតាមដានការអនុវត្តគម្រោងគ្រប់គ្រងសំណល់ភក់បង្គន់ ដំណាក់កាលទី២

នៅរសៀលថ្ងៃចន្ទ ១រោច ខែជេស្ឋ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី១ ខែមិថុនា ឆ្នាំ២០២៦ លោក អ៉ឹង គឹមលាង អភិបាលរងខេត្ត តំណាងដ៏ខ្ពង់ខ្ពស់ ឯកឧត្តម ប្រាក់ សោភ័ណ អភិបាល នៃគណៈអភិបាលខេត្ត បានដឹកនាំកិច្ចប្រជុំតាមដានការអនុវត្តគម្រោងគ្រប់គ្រងសំណល់ភក់បង្គន់ ដំណាក់កាលទី២ ដោយមានការចូលរួមពីសំណាក់ លោកស្រី Arianna ARDESI នាយិកាកិច្ចសហប្រតិបត្តិការ និងភាពជាដៃគូ នៃសមាគម AIMF លោក នាយករងរដ្ឋបាលសាលាខេត្ត ប្រធាន-អនុប្រធានមន្ទីរជំនាញពាក់ព័ន្ធ តំណាងទីចាត់ការពាក់ព័ន្ធ ប្រធានអង្គការអាគ្រីស៊ុតប្រចាំប្រទេសកម្ពុជា ក្រុមហ៊ុនហ្គ្រីនប្រូហ្វើទីល ជំនួយការបច្ចេកទេសអន្តរជាតិ តំណាងទីភ្នាក់ងារ Service Public de l’Assainissement Francilien (SIAAP) ចូលរួមដោយផ្ទាល់ និងតាមប្រព័ន្ធអនឡាញ សរុបចំនួន ១៤នាក់ ស្រី ០២នាក់។ កិច្ចប្រជុំនេះមានគោលបំណងដើម្បីពិនិត្យលើវឌ្ឍនភាព បញ្ហាប្រឈម ដំណោះស្រាយ មេរៀនបទពិសោធន៍ល្អៗនៃការអនុវត្តការងារគ្រប់គ្រងសំណល់ភក់បង្គន់ ដំណាក់កាលទី២(PROFERTIL-II) ដើម្បីផលិតជាជីមមោក និងជាពិសេសដើម្បីប្រមូលជាធាតុចូលក្នុងការអនុវត្តផែនការ សកម្មភាពឆ្នាំ២០២៦ ឱ្យទទួលបានលទ្ធផលល្អប្រសើរ។

គួររម្លឹកបញ្ជាក់ជូនផងដែរថា ចាប់តាំងពីឆ្នាំ២០១៨ រដ្ឋបាលខេត្តសៀមរាប និងសមាគមអន្តរជាតិនៃអភិបាលក្រុងនិយាយភាសាបារាំង (AIMF) បានសហការគ្នាលើការអភិវឌ្ឍខ្សែច្រវាក់ការគ្រប់គ្រងសំណល់ភក់បង្គន់ (FSM) នៅខេត្តសៀមរាប ក្រោមគំនិតផ្តួចផ្តើមសុខភាព និងអនាម័យក្នុងទីក្រុង ដែលបានគាំទ្រថវិកាដោយ AIMF និងមូលនិធិ Bill & Melinda Gates (BMGF)។

សូមបញ្ជាក់ថា ក្រោយពីទទួលបានជោគជ័យក្នុងការសាងសង់ស្ថានីយចម្រោះសម្អាតសំណល់ភក់បង្គន់ (FSTP) ដំបូងបង្អស់ក្នុងដំណាក់កាលទី១ គម្រោងនឹងបន្តដំណាក់កាលទី២ (២០២៤-២០២៧) ផ្អែកលើមូលដ្ឋានគ្រឹះដែលបានដាក់ចេញក្នុងដំណាក់កាលទី១ ដោយបន្តពង្រឹងសេវាកម្មដែលបានអភិវឌ្ឍ (ការគ្រប់គ្រងទិន្នន័យ ការកសាងសមត្ថភាព ការសម្របសម្រួលនៃវិស័យ) ព្រមទាំងអភិវឌ្ឍ និងផលិតជីដែលបានមកពីសំណល់ភក់បង្គន់ និងបង្កើតបទប្បញ្ញត្តិចាំបាច់សម្រាប់ការបញ្ជាក់ និងប្រើប្រាស់ផលិតផលជីនេះប្រកបដោយសុវត្ថិភាព។

បន្ថែមពីនេះ នៅខែមេសា ឆ្នាំ២០២៥ ជីត្រូវបានប្រមូលចេញពីអាងចំនួន២ ដែលប្រមូលបានប្រមាណ ១៥តោន ដោយជីត្រូវបានស្ដុកនៅក្នុងឃ្លាំងដើម្បីសម្ងួត និងត្រៀមយកទៅប្រើប្រាស់បន្ទាប់ពីបញ្ចប់ការតេស្ដលើគុណភាពជីរួចរាល់ស្របទៅតាមស្ដង់ដារដើម្បីធានាបាននូវការប្រើប្រាស់ប្រកបដោយសុវត្ថិភាពខ្ពស់។ និងលើកទី២ នៅដើមខែឧសភា ឆ្នាំ២០២៦នេះ ជីត្រូវបានប្រមូលចេញពីអាងចំនួន៤ ដែលប្រមូលបានមានប្រមាណ ៨៩តោន ដោយជីត្រូវបានស្ដុកនៅក្នុងឃ្លាំងដើម្បីសម្ងួតផងដែរ។

កិច្ចប្រជុំពិភាក្សាការងារជាមួយក្រុមការងារអនុគណៈកម្មការការពារនៃគណៈកម្មការរៀបចំកិច្ចប្រជុំប្រចាំឆ្នាំអគ្គនាយកដ្ឋានអន្តោប្រវេសន៍ និងប្រធានកុងសុលអាស៊ានលើកទី២៩ (29th DGICM) ដែលគ្រោងនឹងរៀបចំឡើងនៅលើទឹកដីអង្គរខេត្តសៀមរាប

នាព្រឹកថ្ងៃទី១ ខែមិថុនា ឆ្នាំ២០២៦ លោក សំកុល សុចិត្រា អភិបាលរងខេត្ត តំណាង ឯកឧត្តម ប្រាក់ សោភ័ណ អភិបាលនៃគណៈអភិបាលខេត្តសៀមរាប បានអញ្ជើញចូលរួមដឹកនាំកិច្ចប្រជុំពិភាក្សាការងារជាមួយក្រុមការងារអនុគណៈកម្មការការពារនៃគណៈកម្មការរៀបចំកិច្ចប្រជុំប្រចាំឆ្នាំអគ្គនាយកដ្ឋានអន្តោប្រវេសន៍ និងប្រធានកុងសុលអាស៊ានលើកទី២៩ (29th DGICM) ដែលដឹកនាំដោយ ឯកឧត្តមនាយឧត្តមសេនីយ៍ ឃុន សំបូរ អគ្គនាយករងអន្តោប្រវេសន៍ និងជាប្រធានអនុគណៈកម្មការការពារ រួមជាមួយប្រតិភូអមដំណើរដែលអញ្ជើញមកពីអគ្គនាយកដ្ឋានអន្តោប្រវេសន៍ និងមានការអញ្ជើញចូលរួមពី លោកស្រីនាយករងរដ្ឋបាលខេត្ត លោកនាយកទីចាត់ការ លោកស្នងការនៃស្នងការដ្ឋាននគរបាលខេត្ត តំណាងកងរាជអាវុធហត្ថខេត្ត គ្រឹះស្ថានអង្គរ អាជ្ញាធរជាតិអប្សរា តំណាងអគ្គិសនីខេត្ត មន្ទីរសុខភិបាលខេត្ត រដ្ឋបាលក្រុងសៀមរាប មន្ទីរប្រៃសនីយ៍ និងទូរគមនាគមន៍ខេត្ត សរុបប្រមានជាង៤៥ រូបចូលរួម ដែលរៀបចំឡើងនៅសាលប្រជុំរដ្ឋបាលខេត្តសៀមរាប ។

តង់ចំនួន​ ២៥០តង់​ ត្រូវបានឯកឧត្តម​ អភិបាលខេត្តផ្តល់ជូនបន្ថែមលើតង់ដែលមានស្រាប់ ដល់បងប្អូនជនភៀសសឹកសម្រាប់ប្រើប្រាស់ជាជម្រកការពារទឹកភ្លៀងក្នុងរដូវវស្សា

ដោយមានការយកចិត្តទុកដាក់ដ៏ខ្ពង់ខ្ពស់ពីឯកឧត្តម ប្រាក់​ សោភ័ណ​ អភិបាល​ នៃគណ:អភិបាលខេត្តចំពោះបងប្អូនជនភៀសសឹកដែលកំពុងបន្តស្នាក់នៅក្នុងមូលដ្ឋានស្រុកស្រីស្នំ បានចាត់ក្រុមការងាដឹកនាំដោយលោក យុន លីនណេ អភិបាលរងខេត្ត និងលោក ឌុច គឹមដម នាយករងរដ្ឋបាលសាលាខេត្ត នាំយកតង់ចំនួន​ ២៥០តង់​ ផ្តល់ជូនបន្ថែមលើតង់ដែលមានស្រាប់ ដើម្បីឱ្យបងប្អូនជនភៀសសឹកអាចប្រើប្រាស់ជាជម្រកការពារទឹកភ្លៀងក្នុងរដូវវស្សា។

ក្នុងនាមបងប្អូនជនភៀសសឹក​ និងរដ្ឋបាលស្រុកស្រីស្នំសូមថ្លែងអំណរគុណយ៉ាងជ្រាលជ្រៅចំពោះឯកឧត្តម​ ប្រាក់​ សោភ័ណ​ អភិបាល​ នៃគណៈអភិបាលខេត្តដែលតែងតែគិតគូខ្ពស់ចំពោះសុខមាលភាព​ ស្បៀងអាហារ​ និងសម្ភារប្រេីប្រាស់ដល់ពួកគាត់ដែលកំពុងស្នាក់នៅក្នុងភូមិសាស្ត្រខេត្តសៀមរាប។

អបអរសាទរ ទិវាកុមារអន្តរជាតិ លើកទី៧៧ ក្រាមប្រធានបទ ”សន្តិភាព ជាមូលដ្ឋានគ្រឹះនៃការគោរព និងកិច្ចគាំពារសិទ្ធិកុមារ” ១ មិថុនា ១៩៤៩-១ មិថុនា ២០២៦។