08/08/2026
අවුරුදු 178 කට පසුවත් පුරන් අප්පු තරුණයාගේ වීරත්වය අපිට දැනෙනවා. ඒ වීරත්වයේ ආශ්වාදය අපිට අදටත් අවශ්‍යයයි. ජාතික විමුක්ති සටන කුළුගන්වන්න , අධිරාජ්‍යවාදින්ට එරෙහිව සටන් කරන්න පුරන් අප්පුලගේ චරිතයෙන් අපිට ඒ හයිය ගන්න ඕනේ. ජාතික නිදහස් සටන කවදාවත් අවසානයක් දකින්නේ නෑ. අපි කවදාවත් විදේශිය සතුරන්ට යටත් වුන ජාතියක් නෙමේ.
අපි නිදහස වෙනුවෙන් අඛණ්ඩව සටන් කරපු ජාතියක්. මේ පොළව පෝෂණය වෙලා තියෙන්නේ රණබිමේ මිය ගිය රණවිරුවන්ගේ ලෙයින් සහ දහඩියෙන්. නිදහස් සටන අඛණ්ඩ , අනවරත අරගලයක්. ඒ අරගලයේ ජීව ගුණය උද්දීපනය කරන්න විරපුරන් අප්පු වැනි චරිත සිහිකිරිම ඉතා වැදගත්.
එදා පුරන් අප්පු සටන් කලේ ලංකාවෙන් ආපු ආදායම නැතිවෙන කොට බ්‍රිතාන්‍ය ඉන්දියා වෙළඳ සමාගමේ උපදෙස් මත කරත්ත බදු, තුවක්කු බදු , ඇඟ බදු විතරක් නෙමේ ගෙදර සුරතලේට ඇතිකරපු බලු කුක්කටත් බදු ගහපු ටොරින්ටන් ආණ්ඩුකාරයාගේ ආණ්ඩුවට එරෙහිව. අදත් වෙනසක් නෑ. අද ජාත්‍යන්තර මුල්‍ය අරමුදලේ උපදෙස් අරගෙන අපි මත බදු බර පටවන අධිරාජ්‍යවාදයේ එජන්තයෝ තමයි මේ රට පාලනය කරන්නෙ...
තිස්ස විහාරයේ ඉඩම මැද්දෙන් පාරක් කපන කොට ඇස් කන් පියාගෙන නිවටව ඉන්න ආණ්ඩුව අපේ ආණ්ඩුවක් ද? 09 වෙනි වගන්තියේ බුදු දහම පෝෂණය කරන්න රාජ්‍යයේ යුතුකම ඉටුවෙනවද? ඊයේ පෙරේදා ඉන්දියාවේ විදේශ ලේකම් ඇවිල්ලා පළාත් සභා මැතිවරණය තියන්න කියලා අපේ ආණ්ඩුවට උපදෙස් දෙනවා. අපේ ජනතාවගේ පරමාධිපත්‍යය බලය ක්‍රියාත්මක කල යුත්තෙ කොයි වෙලාවෙද? කොහොමද? කියලා අපිට කියලා දෙන්නත් ඔවුන් එනවා. අදත් තියෙන්නේ එදා වගේම අධිරාජ්‍යවාදි පාලනයට සහ ඔවුන්ගේ අතකොළු වලට එරෙහිව සටන් කල යුතු යුගයක්.
සටන් බිම වෙනස්, සටනේ ආයුධ වෙනස් වෙලා, උපාය මාර්ග විකාශනය වෙලා. හැබැයි එදත් අදත් අපිට තිබුනේ එකම අරමුණක්. ඒ සම්බුද්ධ ශාසනයේ චිරස්තිතිය මේ ලක්දෙරණ තුල ආරක්ෂා කරන්න. පුරන්අප්පු අන්තිම කිවුවේ මොකක්ද? අපේ අම්මට මං වගේ පුත්තු දහ දෙනෙක් හිටිය නම්, උඩරට එක සුද්දෙක් ඉතිරි වෙන්නේ නෑ කියලා. දැන් නම් පුත්තු දහ දෙනෙක් නෙමේ.අපිට පුරන් අප්පුලාගෙ පරම්පරාවක් අවශ්‍යයි. සුද්දගේ ඊනීයා අධ්‍යාපන ක්‍රමයෙන් රට ජාතිය ගැන හැඟිමක් නැති පරපුරක් ඇති වෙලා. හමේ කලුපාට විතරයි සිංහල. සිතුවිලි ආකල්ප වලින් අපි බටහිර වෙලා. පහුගිය කාලේ දේශපාලන ව්‍යාපාර සංඝරත්නය ගැන, දෙමාපියන් , ගුරුවරුන් ගැන අලුත් පරම්පරාවට තියෙන ගෞරවය විනාශ කරලා.එහෙමයි ඔවුන් සමාජ සංස්ථාව ගඩොලින් ගඩොල ගලවලා බිඳ දමන්නේ. සුද්දාගේ උපාය මාර්ගය තමයි තවමත් යටින් ක්‍රියාත්මක වෙන්නේ. මේ අලුත් පරම්පරාව ඉපදෙන කොට ජෙන්සිලා උනේ නැ. ඒ දරුවෝ හුදකලා උනේ මේ අධ්‍යාපන ක්‍රමය ,සමාජ ආර්ථික වැඩ පිළිවෙල නිසා. ඒ නිසා වරද තියෙන්නේ මේක පෙරලන්න කටයුතු නොකරපු අපේ අතේ මිසක් ඒ දරුවන්ගේ අතේ නෙමේ. අද පුරන් අප්පු වීරයා සමරන මේ මොහොතේ අපේ අධිෂ්ඨානය වෙන්න ඕනේ පුරන් අප්පු ජිවිත පරිත්‍යාගයෙන් සටන් කරපු අධිරාජ්‍යවාදය සහ එහි ඉතිරි වුන නටබුන් උන මේ අධ්‍යාපනය, පාර්ලිමේන්තු ක්‍රමය ,මිනිස්සු බෙදන මජර පක්ෂ ක්‍රමය පරාජය කරන්න.
නීතීඥ නුවන් බැල්ලන්තුඩාව නායක , දේශප්‍රේමි ජාතික පෙරමුණ.
