14/10/2026
චිර ජීවන යුගය දිගු දිවියක් උදෙසා වූ අපේ ක්‍රම ගැන නැවත සිතමු ..................................................................................................................
මෙවර 2026 ජාත්‍යන්තර වැඩිහිටි දින තේමාව වශයෙන් චිර ජීවන යුගය දිගු දිවියක් උදෙසා වූ අපේ ක්‍රම ගැන නැවත සිතමු යන තේමාව ග්‍රාමීය සංවර්ධන සමාජ ආරක්ෂණ සහ ප්‍රජා සවිබල ගැන්වීමේ අමාත්‍යංශය විසින් ප්‍රකාශයට පත් කර ඇත. වෛද්‍ය විද්‍යාවේ සහ තාක්ෂණයේ දියුණුවත් සමඟ වර්තමානය වන විට මිනිසුන්ගේ ආයු අපේක්ෂාව ඉහළ ගොස් ඇත. එහෙත්, ආයු කාලය දිගු වීම පමණක් ප්‍රමාණවත් නොවන අතර, එම අතිරික්ත ජීවිතය සෞඛ්‍ය සම්පන්න සහ සතුටුදායක ලෙස ගත කිරීම අප හමුවේ පවතින ප්‍රධානතම අභියෝගයවේ. මෙම තේමාව විසින් අපට නියෝග කරන්නේ ලාංකේය සංස්කෘතිකත්වයට ආවේණික පැරැණි ජීවන රටාව වරක් හැරී බලා, අර්ථවත් දිගු දිවියක් සඳහා අවශ්‍ය ශාරීරික, මානසික හා සමාජීය පසුබිම සකස් කර ගැනීමටය.
දිගු දිවියක් සුවදායක කර ගැනීමේ පළමු පියවර වන්නේ අපගේ සෞඛ්‍ය පුරුදු සහ ජීවන රටාවන් පිළිබඳව නැවත සිතා බැලීමයි. විවෘත ආර්ථිකය සහ නව ලිබරල්වාදී සමාජ වයුහය තුළ කෘත්‍රිම ආහාර සහ යාන්ත්‍රික ජීවන රටාවකට හුරුවී සිටියද, අතීත ගැමි ජීවන රටාව තුළ අනුගමනය කළ ස්වාභාවික සහ පෝෂ්‍යදායී ආහාර රටාවකට නැඹුරු වීම , ශරීරය සහ මනස යන දෙකම වෙහෙසවන ලෙස ජීවනෝපාය ක්‍රම සකසා ගැනීම, සොබාදහමට සමීප ජීවන ක්‍රමය, තාක්ෂණය තුළ හුදකළා නොව සාමාජීය වශයෙන් පුද්ගලාබද්ධ සම්බන්ධතා තුළ ප්‍රායෝගික මිනිසකු වීමට ළමා වියේ සිට පුරුදු පුහුණු කිරීම, පවුල නැමැති ඒකකය තුළ වැඩිහිටියාට හිමි වූ ගෞරවනීය සහ ආදරණීය ස්ථානය යළි තහවුරුකිරීම මිනිසෙකුට කායික සහ මානසික වශයෙන් නිරෝගී චිර ජීවනයක් අත් කර ගැනීම සඳහා කළ හැකි සාර්ථකම ආයෝජනයයි.
වැඩිහිටි ප්‍රජාව යනු සමාජයට බරක් නොව, අමිල අත්දැකීම් සහ ජීවන පරිචයක් සහිත වටිනා මානව සම්පතකි. චිර ජීවන යුගයක් නිර්මාණය කිරීමේදී, ඔවුන්ගේ මේ දැනුම් සම්භාරය සමාජයේ උන්නතිය වෙනුවෙන් ඵලදායී ලෙස යොදා ගැනීමේ ක්‍රමවේද අප විසින් සකස් කළ යුතුය. විශ්‍රාම යෑමෙන් පසු නිවසට වී සිටීමට ඉඩ නොදී, ඔවුන්ගේ හැකියාවන්ට ගැළපෙන කුඩා ස්වයං රැකියා, සමාජ සත්කාරක වැඩසටහන් හෝ උපදේශන සේවාවන් සඳහා ඔවුන්ව යොමු කරවා ගැනීම තුළින් ඔවුන්ට මූල්‍යමය ස්වාධීනත්වයක් මෙන්ම විශාල මානසික තෘප්තියක්ද ලබා ගත හැක. රජය සහ සමාජය එක්ව වැඩිහිටියන්ට පහසුකම් සපයන "වැඩිහිටි හිතකාමී" පරිසරයක් සහ සුරක්ෂිත සමාජ ආර්ථික වටපිටාවක් ගොඩනැගීම මෙහිදී අනිවාර්ය වේ. , එසේම, වත්මන් ඩිජිටල් යුගයට ගැළපෙන පරිදි නව තාක්ෂණය වැඩිහිටි ප්‍රජාව වෙත හුරු කරවීම තුළින් නූතන සමාජයෙන් හුදෙකලා වීම වළක්වා, සමාජයේ සක්‍රීය කොටස්කරුවන් ලෙස ඔවුන්ව රඳවා ගැනීම ද අතිශය වැදගත් වේ.
"චිර ජීවන යුගය: දිගු දිවියක් උදෙසා වූ අපේ ක්‍රම ගැන නැවත සිතමු" යනු අහේතුකව මතු වූ වචන පෙළක් නොව, සමස්ත සමාජයම එකමුතුව ක්‍රියාත්මක විය යුතු ප්‍රායෝගික වැඩපිළිවෙළකි. ජීවිතයට වසර ගණනාවක් එකතු කිරීම පමණක් නොව, ඒ එකතු වන වසර ගණනාවට ජීවයක් සහ අර්ථයක් ලබා දීම අප සැමගේ වගකීම වේ. අපේ පාරම්පරික සාරධර්ම යළි ඔප්නංවා ගනිමින්, ආදරය, රැකවරණය සහ ගෞරවය පිරි සමාජයක් ගොඩනැගීමෙන් පමණක් අපට සැබෑ අර්ථයෙන්ම සතුටුදායක සහ අභිමානවත් චිර ජීවන යුගයකට පා තැබිය හැකි වනු ඇත.
