04/04/2022
ජනාධිපති මාධ්ය අංශය නිෂ්පාදනය කරන “අභියෝග මැද හැදෙන රට” ප්රවෘත්තිමය විශේෂාංගය මේ සතියේ වෙන් වන්නේ බ්රෝඩ්ලන්ඩ්ස් ජලවිදුලි බලාගාරය පිළිබඳ විමසා බැලීමටයි...
දිනෙන් දින ඉහළ යන විදුලිබල අවශ්යතාවට සරිලන පරිදි විදුලි ජනනය සඳහා නව විදුලි බලාගාර ඉදිකිරීම අත්යාවශ්ය සාධකයක් වේ. පුනර්ජනනීය බලශක්ති ප්රභවයන් මගින් විදුලි උත්පාදනය සඳහා වැඩි අවධානයක් යොමුව ඇති වකවානුවක කැළණි ගඟ ආශ්රිතව පොල්පිටිය, කිතුල්ගල ප්රදේශයේ ඉදිකල ලක්ෂපාන සංකීර්ණයේ අවසාන ජලවිදුලි බලාගාරය ලෙස 2013 වසරේ ඉදිකිරීම් කටයුතු ආරම්භ කල බ්රෝඩ්ලන්ඩ්ස් ජලවිදුලි බලාගාරය මේවන විට ජාතික විදුලිබල පද්ධතියට එක් කිරීමට සූදානම් කර තිබේ.
බ්රෝඩ්ලන්ඩ්ස් බලාගාරයේ ධාරිතාවය මෙගාවොට් 35ක් වන අතර එමඟින් වාර්ෂිකව ගිගාවොට් පැය 126ක් නිෂ්පාදනය කළ හැකි වේ.
මෙහි ප්රධාන වේල්ල පොල්පිටිය සමනල බලාගාරයට පහළින් මස්කෙළි ඔය හරස්කර ඉදිකර ඇති අතර කෙහෙල්ගමු ඔය හරස්කර ඉදිකල කුඩා වේල්ලක් මඟින් එහි ජලයද 800m දිග උමගක් තුළින් ප්රධාන ජලාශය වෙත යොමුකර තිබේ. මස්කෙළිය ඔය හරස් කොට ඉදිකර ඇති ප්රධාන ජලාශයේ ජලය කි. මි. 3.3ක පමණ දිගින් යුත් උමං මාර්ගයක් මඟින් කිතුල්ගල කලුකොහුතැන්න ප්රදේශයේ ඇති ජලවිදුලි බලාගාරය වෙත ගෙන යන අතර විදුලිය නිපදවීමෙන් පසු එම ජලය නැවත කැළණි ගඟ වෙත මුදාහැරේ.
මෙහි ඉදිකිරීම් කටයුතු චීන සමාගමක් විසින් සිදුකළ අතර ව්යාපෘතියේ උපදේශන හා අධීක්ෂණ කටයුතු කිසිදු විදේශීය සහභාගීත්වයකින් තොරව ශ්රී ලංකාවේ ඉංජිනේරුමය කාර්යයන් පිළිබඳ මධ්යම උපදේශන කාර්යාංශය (CECB) මඟින් සිදුකරන ලදී.
මෙම බලාගාරය ඉදිකිරීම මඟින් පරිසරයට වාර්ෂිකව නිකුත් වන කාබන්ඩයොක්සයිඩ් (Co2) වායු මෙට්රික් ටොන් 88,000 ප්රමානයක් වළක්වාගත හැකි වන අතර එය ජාත්යන්තර කියෝටෝ සම්මුතිය යටතේ (Kyoto Protocol) පිහිටුවා ඇති පිවිතුරු සංවර්ධන යාන්ත්රණය (Clean Development Mechanism) හා බැඳුනු ලංකාවේ ප්රථම මහා පරිමාන ජලවිදුලි ව්යාපෘතිය වේ.
ව්යාපෘතියෙහි බලාගාරය ඉදිකර ඇති කලුකොහුතැන්න ප්රදේශයේ කැලණි ගඟ හරහා ඉදිකල නව පාලම අතීතයෙහි මෙම ස්ථානය අසල තිරගත කරන ලද සුප්රසිද්ධ විදෙස් චිත්රපටයක් වන “බ්රිජ් ඔන් ද රිවර් ක්වායි” නමැති චිත්රපටයෙහි ඇති පාලමෙහි අනුරුවක් ලෙස ම ඉදිකර ඇත.
Reinvigorating Amidst Challenges - Broadlands Power Plant - Episode 17
