24/09/2026
ප්‍රජා සහභාගිත්වයෙන් ගොඩනැඟෙන ග්‍රාමීය සංවර්ධන සැලසුම්
ප්‍රජාශක්ති ජාතික ව්‍යාපාරය යටතේ සෑම ග්‍රාම නිලධාරී කොට්ඨාසයක් සඳහාම ග්‍රාමීය සංවර්ධන සැලැස්මක් (Village Development Plan) සකස් කිරීමට අවශ්‍ය ආකෘති පත්‍රය සකස් කිරීම පිළිබඳ විශේෂ සාකච්ඡාවක් 2026 සැප්තැම්බර් 24 දින ග්‍රාමසංවර්ධන අභ්‍යාස හා පර්යේෂණ ආයතනයේදී පැවැත්විණි.
2026 වර්ෂය අවසන් වීමට පෙර සියලුම ග්‍රාම නිලධාරී කොට්ඨාස සඳහා මෙම ග්‍රාමීය සංවර්ධන සැලසුම් සකස් කර අවසන් කිරීමත්, ඒ ඔස්සේ ගම්මානවල සැබෑ සංවර්ධන අවශ්‍යතා සහ ක්‍රියාත්මක කළ යුතු ප්‍රමුඛ ව්‍යාපෘති හඳුනාගැනීමත් අපේක්ෂා කෙරේ.
මෙම සැලසුම්කරණ ක්‍රියාවලිය ඉහළ සිට පහළට (Top-down) සිදුවන ක්‍රියාවලියක් නොව, පහළ සිට ඉහළට (Bottom-up) ගොඩනැඟෙන ප්‍රජා සහභාගිත්ව ක්‍රියාවලියක් විය යුතුය. ඒ අනුව, ප්‍රජා සංවර්ධන සභාවල (CDC) මූලිකත්වයෙන් ගමේ ජනතාවගේ සක්‍රීය සහභාගිත්වය ඇතිව ගමේ අවශ්‍යතා, ගැටලු, සම්පත් සහ සංවර්ධන ප්‍රමුඛතා හඳුනාගෙන, ගමට වඩාත් අවශ්‍ය ව්‍යාපෘති ප්‍රජාව විසින්ම තෝරාගැනීමට අවස්ථාව සැලසේ.
මෙම අරමුණු සාක්ෂාත් කරගත හැකි ප්‍රායෝගික හා ඒකාකාරී ග්‍රාමීය සංවර්ධන සැලසුම් ආකෘතියක් සකස් කිරීම සම්බන්ධයෙන් මෙහිදී පුළුල් ලෙස සාකච්ඡා කරන ලදී.
සාකච්ඡාව සඳහා ග්‍රාමසංවර්ධන අභ්‍යාස හා පර්යේෂණ ආයතනයේ අධ්‍යක්ෂ තිලිණි සුරංගිකා කරස්නාගොඩ මහත්මිය, ප්‍රජාශක්ති ලේකම් කාර්යාලයේ අධ්‍යක්ෂ එන්. පී. කෝරලගේ මහතා, අධ්‍යක්ෂ ජී. සුමේධ මනුජිත් මහතා, සහකාර අධ්‍යක්ෂ ප්‍රවීන් මාධව මහතා, ග්‍රාමීය සංවර්ධන කාර්යාංශයේ අධ්‍යක්ෂ නිලන්ත වික්‍රමනායක මහතා, අධ්‍යක්ෂ ප්‍රදීප් වික්‍රමගේ මහතා සහ ග්‍රාමසංවර්ධන අභ්‍යාස හා පර්යේෂණ ආයතනයේ නියෝජ්‍ය අධ්‍යක්ෂ එච්. එම්. එම්. රුවෙයිත් මහතා, පුහුණු හා පර්යේෂණ නිලධාරී චිත්‍රා මහත්මිය සහභාගි වූහ.
ගම පිළිබඳ තීරණ ගමේ ජනතාව සමඟ—ප්‍රජා සහභාගිත්වයෙන් තිරසර ග්‍රාමීය සංවර්ධනයක් කරා!
#ප්‍රජාශක්ති
#ග්‍රාමීයසංවර්ධනය
