07/10/2026
මෙරට පළමුවරට සංවිධානය කරන ධීවර ජංගම සේවා වැඩසටහන ගාල්ල දිස්ත්‍රික්කය කෙන්ද්‍ර කරගනිමින් පැවැත්වීමට සියලු කටයුතු සුදානම්ව පවතී. ඔක්තොම්බර් මස 16 වැනි දින ගාල්ල දොඩම්දුව ධීවර වරාය පරිශ්‍රයේ මෙම එක් දින ජංගම සේවා වැඩසටහන පැවත්වීමට නියමිතව ඇත.
ඒ පිළිබඳව ආදාළ ආයතන දැනුම්වත් කරලීම වෙනුවෙන් සිදු කළ විශේෂ සාකච්ඡාවක් ඊයේ දින(06) ගාල්ල දිස්ත්රික් ලේකම් කාර්යාලයේදී පැවත්වූයේ ධීවර නියෝජ්‍ය අමාත්‍ය රත්න ගමගේ මහතාගේ ප්‍රධානත්වයෙනි.
ධීවර ප්‍රජාවට ඝෘජුව සහ වක්‍රව බලපාන ක්ෂේත්‍රයේ ගැටළු සඳහා නොවිසඳුනූ කඩිනම් විසඳුම් ලබා දීම මෙහි අරමුණයි.
විශේෂයෙන්ම ධීවර බලපත්‍ර ලබාදීම, මොහෙයුම් බලපත්‍ර, ලියාපදිංචි බලපත්‍ර සහ රේඩීයෝ බලපත්‍ර ආදී සේවාවන් එදිනට ධීවර ප්‍රජාවට ලබා ගැනිමේ හැකියාව පවතී.
මිරිදිය ධීවර ප්‍රජාව සහ විසිතුරු මත්ස්‍ය ව්‍යවාසායකත්වය මුහුණ දෙන ,ක්ෂේත්‍රයේ ගැටළු කඩිනමින් විසඳාලීමත් මෙම ජංගම සේවාවේ තවත් එක් අපේක්ෂාවකි.
මිරිදිය ධීවර ක්ෂේත්‍රයේ නියුතු වූවන් ගාල්ල දිස්ත්‍රික්කයේ වෙරළබඩ කලාපයේ බහුලව සිය ජීවිකාව සිදුකරගෙන යන අතර, කරන්දෙණිය , ඉමදුව ,ගෝනපීනුවල යන කොට්ඨාසයන්හිද එම වෘත්තින් ප්‍රචලිතව පවතී.
මෙම ක්ෂේත්‍රයේ නියුතු වූවන් විධිමත්ව හදුනාගැනිමේ අවශ්‍යතාව අමාත්‍යවරයා විසින් වැඩිදුරටත් පෙන්වා දෙන්නට විය.
ඔවුන්ගෙන් මෙරට ජාතික ආර්ථිකයට ලැබෙන දායකත්වය නිවැරදිව හදුනාගත යුතු බවයි අමාත්‍යවරයා සඳහන් කළේ.
මෙම ජංගම සේවාව මගින් ධීවර විශ්‍රාම වැටුප්, ධීවර රක්ෂණාවරණය, සහ ඔවුන්ට මේ වන විටත් ලබා ගැනිමට නොහැකි වූ ජාතික හැදුනුම්පත්, උප්පැන්න සහතික වැනි ලියාපදිංචි සහතික පත්‍ර ලබා ගැනිමටද මෙම ජංගම සේවාව මගින් හැකියාව පවතී.
වෛද්‍ය සායන, ඉඩම් සම්බන්ධ ගැටළු, ජීවිතාරක්ෂක පුහුණු සැසි, බෝ නොවන රෝග සායන මෙහිදි පැවත්වීමට නියමිතය.
දිය යට කිමිදුම් කරුවන් සම්බන්ධව විශේෂ සෞඛ්‍ය සායනයක් පැවත්වීමට නියමිතව පවතී.
එසේම ධීවර ප්‍රජාවට අවශ්‍ය තාක්ෂණික දැනුම ලබා දීමද මෙහි තවත් අදියරයකි. විශේෂයෙන්ම මත්ද්‍රව්‍ය නාශක කාර්යාංශය , ශ්‍රි ලංකා නාවුක හමුදාව, කාළගුණ විද්‍යා දෙපාර්තමෙන්තුව යන ආයතන ඇතුළු ආයතන 60කට ආසන්න සංඛ්‍යාවක් මෙම ජංගම සේවයට එක් වීමට නියමිතය.
මෙම විශේෂ සාකච්ඡාව සඳහා, ගාල්ල දිස්ත්රික් ලේකම් කේ යූ චන්ද්‍රලාල් මහතා, ධීවර දේපාර්තමේන්තුවේ අධ්‍යක්ෂ ජනරාල් සුසන්ත කහවත්ත මහතා ධීවර ක්ෂේත්‍රය නියෝජනය කරන නිලධාරීන් රැසක්ද සහ ධීවර නියෝජිතයින්ද මෙයට එක්ව සිටියහ.
