04/10/2026
சிறுபான்மை உரிமைகளைப் பாதுகாக்க “Lawyers for Minority Rights” சட்ட உதவி மையம் அங்குரார்ப்பணம் செய்யப்பட்டது.
இலங்கையில் வாழும் சிறுபான்மை சமூகங்கள் எதிர்கொள்ளும் உரிமைசார் பிரச்சினைகளுக்கு சட்ட ரீதியான தீர்வுகளைப் பெற்றுக்கொடுக்கும் நோக்கில், ஸ்ரீலங்கா முஸ்லிம் காங்கிரஸின் சமூகத் தொண்டின் ஒரு முக்கிய முயற்சியாக “Lawyers for Minority Rights” (LMR) எனும் இலவச சட்ட உதவி மையத்தின் உத்தியோகபூர்வ அங்குரார்ப்பண நிகழ்வு, ஸ்ரீலங்கா முஸ்லிம் காங்கிரஸின் உயர்பீட உறுப்பினரும் கட்சியின் சட்ட விவகாரங்களுக்கான பணிப்பாளருமான சிரேஷ்ட சட்டத்தரணி ஜே.எல். லாஹிர் தலைமையில், மருதமுனை மூன் வில்லேஜ் கேட்போர் கூடத்தில் இன்று (3) நடைபெற்றது.
இந்நிகழ்வின் பிரதம அதிதியாக ஸ்ரீலங்கா முஸ்லிம் காங்கிரஸ் தலைவர் சட்ட முதுமாணி பாராளுமன்ற உறுப்பினர் ரவூப் ஹக்கீம் கலந்துகொண்டார். அத்துடன், பாராளுமன்ற உறுப்பினர்களான கட்சியின் செயலாளர் ஜனாதிபதி சட்டத்தரணி நிசாம் காரியப்பர், கட்சியின் தேசிய அமைப்பாளர் எம்.எஸ். உதுமாலெப்பை, சட்டத்தரணி ஹபீப் ரிபான் ஆகியோரும், முன்னாள் பாராளுமன்ற உறுப்பினரும் கட்சியின் பிரதித் தலைவருமான பைசல் காசிம், கட்சியின் தேசிய இளைஞர் அமைப்பாளரும் பொத்துவில் பிரதேச சபைத் தவிசாளருமான சட்டத்தரணி முஷர்ரப் முதுநபீன், கட்சியின் துணைச் செயலாளர் மன்சூர் ஏ. காதர், கட்சியின் அம்பாறை மாவட்ட செயலாளர் ஏ.சி. சமால்தீன், கலாநிதி முபீசால் அபூபக்கர் உள்ளிட்ட கட்சியின் உயர்பீட உறுப்பினர்கள் மற்றும் சட்டத்தரணிகள் பலரும் நிகழ்வில் கலந்துகொண்டனர்.
இந்நிகழ்வில் கட்சித் தலைமையின் கீழ் சட்டத்தரணிகள் குழுவொன்றும் நிறுவப்பட்டது. அதன் முதற்கட்டப் பொறுப்பாளர்களாக, திருகோணமலை மாவட்டத்திற்கு சிரேஷ்ட சட்டத்தரணி ஜே.எல். லாஹிர், அம்பாறை மாவட்டத்திற்கு சிரேஷ்ட சட்டத்தரணி பஹீஜ் மீரா முஹிடீன், மட்டக்களப்பு மாவட்டத்திற்கு சட்டத்தரணி ஹபீப் ரிபான், கொழும்பு மேன்முறையீட்டு நீதிமன்றம் மற்றும் உயர்நீதிமன்ற வழக்குகளுக்காக சட்டத்தரணி சிபான் மஹ்ரூப் ஆகியோர் நியமிக்கப்பட்டனர்.
