What are the opening hours?

Monday 09:00 - 15:00 Tuesday 09:00 - 15:00 Wednesday 09:00 - 15:00 Thursday 09:00 - 15:00 Friday 09:00 - 15:00

District Secretariat Mannar, Mannar Town (2026)

04/11/2026

வடமாகாண தரப்படுத்தல் மதிப்பீட்டில் மன்னார் மாவட்டம் சாதனை: மக்கள் மயப்படுத்தப்பட்ட சேவைக்குக் கிடைத்த வெற்றி!

வடமாகாண கிராம அபிவிருத்தித் திணைக்களத்தினால் கிராம மற்றும் மாதர் கிராம அபிவிருத்திச் சங்கங்களின் செயல்பாடுகள் தொடர்பில் மேற்கொள்ளப்பட்ட தரப்படுத்தல் மற்றும் சான்றிதழ் வழங்கும் விழா (11.04.2026) இன்று யாழ்ப்பாணம் திருவள்ளுவர் பண்பாட்டு மையத்தில் மிகச் சிறப்பாக நடைபெற்றது.
மன்னார் மாவட்ட அரசாங்க அதிபர் திரு. கே. கனகேஸ்வரன் அவர்கள் சிறப்பு விருந்தினராகக் கலந்துகொண்ட இந்நிகழ்வில், மன்னார் மாவட்டம் பெரும்பாலான முக்கிய விருதுகளைக் கைப்பற்றிப் பெரும் சாதனையைப் படைத்துள்ளது.

மாகாண மட்டத்தில் முதலிடம்:
தரப்படுத்தல் மதிப்பீட்டில் 80 புள்ளிகளைப் பெற்று மாகாண மட்டத்தில் முதலிடத்தைப் பிடித்த மூன்று மாதர் கிராம அபிவிருத்திச் சங்கங்களில், மன்னார் நகர பிரதேச செயலகப் பிரிவைச் சேர்ந்த கீரி மாதர் கிராம அபிவிருத்திச் சங்கம் மற்றும் உப்புகுளம் வடக்கு மாதர் கிராம அபிவிருத்திச் சங்கம் ஆகிய இரண்டும் அடங்குகின்றன.
அதேபோல், மாகாண மட்டத்திலான கிராம அபிவிருத்திச் சங்கங்களுக்கான முதலிடத்தை மன்னார் நகர பிரதேச செயலகப் பிரிவின் பள்ளமுனை மேற்கு கிராம அபிவிருத்திச் சங்கம் தட்டிச்சென்றதோடு, மூன்றாம் இடத்தை உயிர்தராசன்குளம் கிராம அபிவிருத்திச் சங்கம் பெற்றுக்கொண்டது.

மாவட்ட மட்ட விருதுகளைக் அள்ளிய மன்னார் நகர பிரதேச செயலகம்:
மாவட்ட ரீதியிலான மதிப்பீட்டிலும் மன்னார் நகர பிரதேச செயலகப் பிரிவின் சங்கங்களே அனைத்து முதன்மை இடங்களையும் தன்வசப்படுத்தின:
கிராம அபிவிருத்திச் சங்கங்கள்:
பள்ளமுனை மேற்கு (முதலிடம்)
உயிர்த்தரசன்குளம் (இரண்டாம் இடம்)
சின்னக்கடை (மூன்றாம் இடம்)
மாதர் கிராம அபிவிருத்திச் சங்கங்கள்:
உப்புகுளம் வடக்கு & கீரி மாதர் கிராம அபிவிருத்திச் சங்கங்கள் (இணைந்த முதலிடம்)
ஜீவபுரம் மாதர் கிராம அபிவிருத்திச் சங்கம் (மூன்றாம் இடம்)

சிறந்த அலுவலர்களுக்கான கௌரவம்:
சங்கங்களுடன் இணைந்து சிறந்த ஒத்துழைப்பை வழங்கியதற்காக பட்டித்தோட்டம் (MN-71) மற்றும் உப்புகுளம் வடக்கு (MN-82) ஆகிய கிராம நிலதாரிகளுக்குச் சிறந்த கிராம நிலதாரி விருதுகள் வழங்கி கௌரவிக்கப்பட்டது.
மேலும், மாகாண மட்டத்திலான சிறந்த கிராம அபிவிருத்தி அலுவலருக்கான முதலிடத்தை மன்னார் நகர பிரதேச செயலக கிராம அபிவிருத்தி அலுவலரும், சிறந்த மாவட்ட கிராம அபிவிருத்தி அலுவலருக்கான விருதை மன்னார் மாவட்ட கிராம அபிவிருத்தி அலுவலரும் பெற்றனர். சங்கங்களைச் சிறந்த முறையில் வழிநடத்தியமைக்காக மாகாண மட்டத்திலான பிரதேச செயலாளர் விருதுகளில் மன்னார் நகர பிரதேச செயலாளர் முதலிடத்தைப் பெற்றுக்கொண்டார்.

மக்கள் மயப்படுத்தப்பட்ட சேவைக்குக் கிடைத்த வெற்றி:
இவ் மதிப்பீட்டில் மன்னார் மாவட்டம் பெற்றுக்கொண்ட இந்த மகத்தான வெற்றி, மாவட்டத்தில் முன்னெடுக்கப்பட்டு வருகின்ற மக்கள் மயப்படுத்தப்பட்ட அரசாங்கத்திற்கும், மக்களின் தேவைகளை மையமாகக் கொண்டு இயங்கும் அலுவலக நடைமுறைகளுக்கும் கிடைத்த ஒரு தலைசிறந்த வெற்றியாகப் பார்க்கப்படுகிறது.

04/11/2026

மன்னாரில் டிஜிட்டல் மற்றும் செயற்கை நுண்ணறிவுத் தொழில்நுட்பம் தொடர்பான அறிவுப் பகிர்வு நிகழ்வு!

டிஜிட்டல் மற்றும் செயற்கை நுண்ணறிவு (Digital & AI) தொழில்நுட்பங்களைப் பொதுத்துறையில் பயன்படுத்துவதற்கான சிறந்த நடைமுறைகள் தொடர்பான அறிவுப் பகிர்வு நிகழ்வு இன்று (04.11.2026) மன்னார் மாவட்டச் செயலகத்தில் நடைபெற்றது.

தேசிய உற்பத்தித்திறன் செயலகம் (National Productivity Secretariat), தூய்மையான இலங்கை செயலகம் (Clean Sri Lanka Secretariat) மற்றும் மன்னார் மாவட்டச் செயலகம் ஆகியவற்றின் ஏற்பாட்டில், மன்னார் மாவட்டச் செயலகத்தின் மருதம் மாநாட்டு மண்டபத்தில் காலை 9.00 மணிக்கு இந்நிகழ்வு இடம்பெற்றது.

பொதுத்துறையின் டிஜிட்டல் செயற்பாடுகளை வலுப்படுத்துதல், நவீன தொழில்நுட்பங்களை அரச அலுவலகங்களின் அன்றாடப் பணிகளில் பயனுள்ள வகையில் பயன்படுத்துதல் மற்றும் செயற்கை நுண்ணறிவுத் தொழில்நுட்பத்தின் ஊடாக அரச சேவைகளின் வினைத்திறன் மற்றும் தரத்தை மேம்படுத்துதல் ஆகிய நோக்கங்களுடன் இந்நிகழ்வு ஏற்பாடு செய்யப்பட்டது.

மேலும், டிஜிட்டல் தொழில்நுட்பப் பயன்பாட்டில் சிறந்த நடைமுறைகள் மற்றும் அனுபவங்களைப் பகிர்ந்துகொள்வதற்கான வாய்ப்பாகவும் இந்நிகழ்வு அமைந்தது.

குறித்த நிகழ்வில் தேசிய உற்பத்தித்திறன் திணைக்களத்தின் பிரதிப் பணிப்பாளர், மேலதிக அரசாங்க அதிபர்கள், பிரதம உள்ளகக் கணக்காய்வாளர், திட்டமிடல் பணிப்பாளர், துறைசார் உயர் அதிகாரிகள், திணைக்களத் தலைவர்கள் மற்றும் மாவட்டச் செயலக உத்தியோகத்தர்கள் உள்ளிட்ட பலர் கலந்துகொண்டனர்.

பொதுத்துறையில் டிஜிட்டல் மாற்றத்தை ஊக்குவித்து, நவீன தொழில்நுட்பங்களின் ஊடாக அரச சேவைகளை மேலும் வினைத்திறனுடனும் பயனுறுதியுடனும் முன்னெடுப்பதற்கான முக்கியத்துவத்தை இந்நிகழ்வு வலியுறுத்தியது.

04/11/2026

மன்னார் மாவட்டத்தின் பெரியமுறிப்பு கிராம சேவையாளர் பிரிவில் அனர்த்தக் குறைப்புத் திட்டத்தின் கீழ் அவசர பதிலிறுப்பு உபகரணங்கள் வழங்கி வைப்பு.

மன்னார் மாவட்ட அனர்த்த முகாமைத்துவ ஒருங்கிணைப்புப் பிரிவினால் முன்னெடுக்கப்படும் அனர்த்தக் குறைப்புத் திட்டத்தின் கீழ், OPEnE நிறுவனத்தின் அனுசரணையுடன், 2026.11.03 ஆம் திகதி மடு பிரதேச செயலகப் பிரிவிற்குட்பட்ட பெரியமுறிப்பு கிராம சேவையாளர் பிரிவில், கிராம மட்ட அனர்த்த முகாமைத்துவக் குழுவிற்கு அவசர பதிலிறுப்பு உபகரணங்கள் வழங்கி வைக்கப்பட்டன.

மாவட்ட அனர்த்த முகாமைத்துவ ஒருங்கிணைப்புப் பிரிவின் பிரதிப் பணிப்பாளர் திரு. ரி.என். சூரியராஜா அவர்களினால் இவ்வுபகரணங்கள் உத்தியோகபூர்வமாகக் கையளிக்கப்பட்டன.

இந்நிகழ்வில் கிராம சேவையாளர், OPEnE நிறுவனத்தின் திட்ட இணைப்பாளர் திரு. ஜெயந்திரன் மற்றும் அபிவிருத்தி உத்தியோகத்தர்கள், அனர்த்த முகாமைத்துவ குழு உறுப்பினர்கள் உள்ளிட்டோர் கலந்து கொண்டனர்.

கிராம மட்ட அனர்த்த முகாமைத்துவக் குழுக்களின் செயற்பாட்டுத் திறனை வலுப்படுத்துதல், அனர்த்தங்களை எதிர்கொள்வதற்கான தயார்நிலையை மேம்படுத்துதல், அவசரநிலைகளின் போது விரைவாகவும் வினைத்திறனாகவும் பதிலளிக்கும் ஆற்றலை அதிகரித்தல் ஆகிய நோக்கங்களைக் கருத்திற்கொண்டு இந்நடவடிக்கை முன்னெடுக்கப்பட்டது.

இவ்வாறான செயற்பாடுகள் மூலம் கிராம மட்டத்தில் அனர்த்த முகாமைத்துவப் பொறிமுறைகளை மேலும் வலுப்படுத்தி, அனர்த்த அபாயங்களைக் குறைப்பதுடன், பாதுகாப்பான மற்றும் மீள்திறன் மிக்க சமூகங்களைக் கட்டியெழுப்புவதற்கும் பங்களிப்பு வழங்க முடியும் என எதிர்பார்க்கப்படுகிறது.

03/11/2026

மன்னார் புனித சவேரியார் ஆண்கள் பாடசாலையின் மாணவர்களின் சாதனைப் பெருவிழா:
மாவட்ட அரசாங்க அதிபர் க. கனகேஸ்வரன் திருக்கரங்களால் சாதனையாளர்கள் கௌரவிப்பு!

மன்னார் புனித சவேரியார் ஆண்கள் பாடசாலையின் (தேசிய பாடசாலை) மாணவர்கள் பல்வேறு துறைகளில் ஈட்டிய குறிப்பிடத்தக்க சாதனைகளைக் கொண்டாடும் பெருவிழா இன்று இடம்பெற்றது. பாடசாலை அதிபரின் தலைமையில் நடைபெற்ற இந்நிகழ்வில், மன்னார் மாவட்ட அரசாங்க அதிபர் திரு. க. கனகேஸ்வரன் அவர்கள் பிரதம விருந்தினராகக் கலந்துகொண்டு, சர்வதேச மற்றும் தேசிய மட்டங்களில் வெற்றி பெற்ற மாணவர்களைக் கௌரவித்தார்.
சர்வதேச கணிதப் போட்டிகள், தேசிய மட்ட தடகளப் போட்டிகள், அகில இலங்கைப் பாடசாலை கால்பந்தாட்டப் போட்டிகள் மற்றும் சர்வதேச கரத்தே போட்டிகள் எனப் பல்வேறு தளங்களில் பதக்கங்களையும் அங்கீகாரங்களையும் வென்று, மன்னார் மண்ணுக்கும் பாடசாலைக்கும் பெருமை சேர்த்த இளம் சாதனையாளர்களை அரசாங்க அதிபர் பாராட்டி, நினைவுச் சின்னங்களையும் பரிசில்களையும் வழங்கி வைத்தார்கள்.
நிகழ்வில் உரையாற்றிய மாவட்ட அரசாங்க அதிபர் க. கனகேஸ்வரன் அவர்கள், மாணவர்கள் தங்களது இந்த வெற்றிகளுடன் நின்றுவிடாமல், எதிர்காலத்திலும் இதுபோன்ற தொடர்ச்சியான வெற்றிகளைப் பெற்று மன்னார் புனித சவேரியார் பாடசாலைக்கும், ஒட்டுமொத்த மன்னார் மாவட்டத்திற்கும் மேலும் மேலும் பெருமை சேர்க்க வேண்டும் என அன்புடன் கேட்டுக்கொண்டார்.
இந்தச் சிறப்பான நிகழ்வில் பாடசாலையின் ஆசிரியர்கள், பெற்றோர்கள் மற்றும் கல்விச் சமூகம் பெருமளவில் கலந்துகொண்டு மாணவர்களை ஊக்கப்படுத்தியமை குறிப்பிடத்தக்கது.

03/11/2026

மன்னாரில் சிறப்பாக நடைபெற்ற சர்வதேச முதியோர் தினக் கொண்டாட்டம்
===============================

சர்வதேச முதியோர் தினத்தை முன்னிட்டு, முதியோர் தேசிய செயலகத்தின் அனுசரணையுடன் மன்னார் நகரப் பிரதேச செயலகத்தினால் ஏற்பாடு செய்யப்பட்ட சர்வதேச முதியோர் தின நிகழ்வு இன்று (03)மன்னார் நகர சபை மண்டபத்தில் சிறப்பாக நடைபெற்றது.

இதன்போது, மன்னார் பட்டித்தோட்டம் புதிய உதயம் முதியோர் சங்கம், புனித வளனார் முதியோர் சங்கம், தாழ்வுபாடு புதிய வளனார் முதியோர் பகல்நேரப் பராமரிப்பு நிலையம், தலைமன்னார் கிராமம் புனித லோரன்சியார் முதியோர் சங்கம், உயிர்த்தராசன்குளம் முதியோர் சங்கம் உள்ளிட்ட முதியோர் அமைப்புகளைச் சேர்ந்தவர்கள் நாடகம், வில்லுப்பாட்டு, நடனம் உள்ளிட்ட கலை நிகழ்ச்சிகளை வழங்கினர்.

மேலும், “நமது நாட்டிற்கு முதியோர் இல்லங்கள் அவசியமா? அவசியமில்லையா?” என்ற தலைப்பில் மன்னார் சித்தி விநாயகர் பாடசாலை மற்றும் மன்னார் கௌரி அம்பாள் பாடசாலை மாணவர்களின் பட்டிமன்றமும் நடைபெற்றது.

இதன்போது, முதியோர் சமாச நிர்வாகத்தின் சார்பில் மாவட்ட அரசாங்க அதிபருக்கு வாழ்த்துக் கவிதை வாசிக்கப்பட்டதுடன்,

முதியோர் சங்கங்களின் செயற்பாட்டாளர்களுக்கு மன்னார் மாவட்ட அரசாங்க அதிபர் கே. கனகேஸ்வரன் பொன்னாடை அணிவித்து கௌரவித்தார். அவர்களுக்கான பரிசில்களை மன்னார் நகர பிரதேச செயலாளர் கே. காந்தீபன் வழங்கி வைத்தார்.

மன்னார் நகரப் பிரதேச செயலாளர் கே. காந்தீபன் தலைமையில், காலை 9.30 க்கு ஆரம்பிக்கப்பட்டு பகல் ஒரு மணி வரை நடைபெற்ற இந்நிகழ்வில், மன்னார் மாவட்ட அரசாங்க அதிபர் கே. கனகேஸ்வரன் பிரதம விருந்தினராகவும், மன்னார் நகர சபைத் தலைவர் டேனியல் வசந்தன் சிறப்பு விருந்தினராகவும் கலந்து கொண்டனர்.

அத்துடன், ஓய்வுநிலை கிராம நிர்வாக அலுவலர் ஏ. விமலேந்திரகுமார், வலயக் கல்விப் பணிமனையின் ஆசிரிய ஆலோசகர் எஸ். ரமேஷ், மாவட்ட முதியோர் சமாச செயலாளர் எல்.பி. ஏனஸ்ட் குரூஸ், மாவட்ட மற்றும் பிரதேச செயலகங்களின் முதியோர் உரிமைகள் மேம்பாட்டு உத்தியோகத்தர்கள், கலாசார உத்தியோகத்தர்கள், முதியோர் சங்கங்களின் பிரதிநிதிகள் மற்றும் முதியோர்கள் எனப் பலரும் கலந்து கொண்டனர்.

03/11/2026

மன்னாரில் 16 பாடசாலைகளைச் சேர்ந்த மாணவர்களுக்கான தேசிய மாணவர் தூதுவர் பயிற்சித் திட்டம் வெற்றிகரமாக முன்னெடுப்பு

மன்னார் | 03.11.2026

தேசிய சிறுவர் பாதுகாப்பு அதிகாரசபையின் தேசிய மாணவர் தூதுவர் திட்டத்தின் கீழ், மாணவர்களின் தலைமைத்துவ ஆற்றல், சிறுவர் பாதுகாப்பு விழிப்புணர்வு, உளநலம் மற்றும் நல்வாழ்வை மேம்படுத்தும் நோக்கில் மாணவர் தூதுவர் பயிற்சித் திட்டம் 2026 நவம்பர் 03ஆம் திகதி மன்/ஆண்டான்குளம் றோமன் கத்தோலிக்க தமிழ் மகா வித்தியாலயத்தில் நடைபெற்றது.

இந்நிகழ்வில் மன்னார் மாவட்டத்திலுள்ள 16 பாடசாலைகளைச் சேர்ந்த மாணவர் தலைவர்கள், அதிபர்கள் மற்றும் ஆசிரியர்கள் பங்கேற்றனர்.

சிறுவர் உரிமைகள், சிறுவர் பாதுகாப்பு, துஷ்பிரயோகத் தடுப்பு, உளநலம், உணர்ச்சி நல்வாழ்வு, தலைமைத்துவம், தொடர்பாடல் மற்றும் தீர்மானம் மேற்கொள்ளுதல் தொடர்பாக பல்வேறு துறைகளைச் சேர்ந்த வளவாளர்களால் பயிற்சி அமர்வுகள் முன்னெடுக்கப்பட்டன.

கல்வி, சுகாதாரம், உளசமூக சேவை, நன்னடத்தை, சிறுவர் பாதுகாப்பு மற்றும் பொலிஸ் துறைகளின் ஒருங்கிணைந்த பங்களிப்புடன் இந்நிகழ்வு நடைபெற்றது.

இந்நிகழ்வின் ஒருங்கிணைப்புப் பணிகளை மன்னார் மாவட்டச் செயலக மாவட்ட சிறுவர் பாதுகாப்பு உத்தியோகத்தர் திரு. S. I. பெர்னான்டோ மற்றும் மாவட்ட உள சமூக உத்தியோகத்தர் திரு. தர்மகுலசிங்கம் சிவனந்தன் ஆகியோர் மேற்கொண்டனர்.

பாடசாலை மட்டத்தில் சிறுவர் பாதுகாப்பு வலையமைப்பை வலுப்படுத்தி, பொறுப்புமிக்க மாணவர் தலைவர்களை உருவாக்கும் முக்கியமான முன்னெடுப்பாக இப்பயிற்சித் திட்டம் அமைந்தது.

பாதுகாப்பான சிறுவர்கள் – வலுவான மாணவர் தலைமைத்துவம் – ஆரோக்கியமான எதிர்காலம்!

02/11/2026

அறிவித்தல்: TIN (வரி அடையாள எண்) இலகுவாகப் பெறுவதற்கான வழிமுறைகள்

2026 ஆம் ஆண்டு நவம்பர் 1ம் திகதி முதல் அனைத்து விதமான செயற்பாடுகளுக்கும் TIN (Taxpayer Identification Number - வரி அடையாள எண்) கட்டாயமாக்கப்பட்டுள்ளது.
பொதுமக்கள் இதனை மிக எளிதாகவும் விரைவாகவும் பெற்றுக்கொள்வதற்காக பின்வரும் ஏற்பாடுகள் செய்யப்பட்டுள்ளன:
நேரடி சேவை (விசேட கருமபீடம்):
அனைத்து மாவட்ட செயலகங்கள் மற்றும் பிரதேச செயலகங்களில் விசேட கருமபீடங்கள் நிறுவப்பட்டுள்ளன.
பொதுமக்கள் தங்கள் அருகில் உள்ள செயலகங்களின் விசேட கருமபீடத்திற்கு நேரில் சென்று தங்களுக்கான TIN இலக்கத்தைப் பெற்றுக்கொள்ள முடியும்.
இணையவழிச் சேவை (Online Method):
நேரில் வர முடியாதவர்கள், கீழே குறிப்பிடப்பட்டுள்ள வழிமுறைகளைப் பின்பற்றி (Steps) இணையதளம் மூலமாகவும் தங்களுக்கான TIN இலக்கத்தை சுயமாகப் பெற்றுக்கொள்ள முடியும்.
பொதுமக்கள் அனைவரும் இந்த வசதியைப் பயன்படுத்தி தங்களது TIN இலக்கத்தைப் பெற்றுக்கொள்ளுமாறு அன்புடன் கேட்டுக்கொள்ளப்படுகிறீர்கள்.

===============================================================
இலங்கை வருமான வரித் திணைக்களத்தின் (IRD) TIN இலக்கம் பெறுவதற்கான வழிகாட்டி
====================================================================

【 1. ஏற்கனவே TIN இலக்கம் உள்ளவர்கள் அதனை ஆன்லைனில் அறியும் முறை 】
--------------------------------------------------------------------
நீங்கள் ஏற்கனவே வருமான வரித் திணைக்களத்தில் பதிவு செய்திருந்தாலோ அல்லது உங்கள் TIN இலக்கம் மறந்துபோயிருந்தாலோ, அதை ஆன்லைனில் சரிபார்த்து பெறலாம்:

படி 1: அதிகாரப்பூர்வ இ-சேவைகள் (e-Services) தளத்திற்குச் செல்லவும்.
👉 https://eservices.ird.gov.lk

படி 2: முகப்புப் பக்கத்தில் "e-Services" பிரிவில் உள்ள "Inquire TIN" அல்லது "Check TIN" என்பதைத் தேர்வு செய்யவும்.

படி 3: உங்கள் தேசிய அடையாள அட்டை (NIC) இலக்கம் மற்றும் திரையில் தோன்றும் பாதுகாப்புக் குறியீட்டை (Captcha) உள்ளிடவும்.

படி 4: விவரங்கள் சரியாக இருந்தால், உங்கள் TIN இலக்கம் திரையில் தோன்றும்.

*(குறிப்பு: ஆன்லைனில் கிடைக்கவில்லை என்றால், உங்கள் அருகிலுள்ள வருமான வரித் திணைக்களத்தின் பிராந்திய அலுவலகத்திற்குச் சென்று NIC ஐக் காண்பித்தும் பெற முடியும்.)*

【 2. புதிய TIN இலக்கத்திற்கு விண்ணப்பிக்கும் முறை (TIN இல்லாதவர்கள்) 】
--------------------------------------------------------------------
இன்னும் TIN இலக்கம் பெறாதவர்கள் ஆன்லைன் மூலம் விண்ணப்பித்து பெறலாம்:

படி 1: போர்ட்டலுக்குச் செல்லுதல்
👉 https://eservices.ird.gov.lk

படி 2: விண்ணப்பத்தைத் தொடங்குதல்
- "e-Services" மெனுவில் "Taxpayer Registration" என்பதியைக் கிளிக் செய்யவும்.
- அதில் "Individual" (தனிநபர்) என்ற பிரிவைத் தேர்ந்தெடுக்கவும்.

படி 3: தனிநபர் தகவல்களைப் பதிவிடுதல்
- NIC இல் உள்ளவாறு முழுப் பெயர்.
- தேசிய அடையாள அட்டை (NIC) எண் அல்லது கடவுச்சீட்டு (Passport) எண்.
- பிறந்த தேதி மற்றும் பாலினம்.

படி 4: தொடர்பு விவரங்களை உள்ளிடுதல்
- நிரந்தர மற்றும் தற்போதைய முகவரி.
- செல்லுபடியாகும் மின்னஞ்சல் முகவரி (E-mail) மற்றும் கைப்பேசி எண் (Mobile Number).

படி 5: ஆவணங்களைப் பதிவேற்றுதல் (Upload Documents)
- தேசிய அடையாள அட்டையின் (NIC) இரு பக்கங்களின் தெளிவான ஸ்கேன்/புகைப்படம் (JPEG/PDF).
- தேவைப்படின், முகவரியை உறுதிப்படுத்த மின்சாரக் கட்டணப் பட்டியல் அல்லது வங்கி அறிக்கை.

படி 6: சமர்ப்பித்தல் மற்றும் TIN பெறுதல்
- விபரங்களைச் சரிபார்த்து "Submit" பொத்தானைக் கிளிக் செய்யவும்.
- ஒப்புதல் எண் (Acknowledgement Number) தோன்றும்.
- விண்ணப்பம் சரிபார்க்கப்பட்டதும் (சில வேலை நாட்களுக்குள்), உங்கள் TIN இலக்கம் மின்னஞ்சல் மற்றும் SMS மூலம் அனுப்பி வைக்கப்படும்.

【 3. முக்கிய இணையதள இணைப்புகள் (Links) 】
--------------------------------------------------------------------
• IRD முதன்மை இணையதளம்:
https://www.ird.gov.lk

• TIN ஆன்லைன் விண்ணப்பம் & சரிபார்ப்புப் பக்கம்:
https://eservices.ird.gov.lk

【 4. தேவையான முக்கிய ஆவணங்கள் 】
--------------------------------------------------------------------
• தேசிய அடையாள அட்டை (NIC)
• பயன்பாட்டில் உள்ள மொபைல் போன் எண்
• தனிப்பட்ட மின்னஞ்சல் முகவரி (Email Address)
====================================================================
நன்றி
மாவட்ட அரசாங்க அதிபர்
மன்னார்

31/10/2026

முசலி பிரதேச தேசிய பாடசாலையில் சிறப்பாக இடம்பெற்ற "அத்தம" தேசிய திட்ட நிகழ்வு!
மன்னார், [இன்றைய திகதி]:
"சுத்தமான இலங்கை" தேசிய திட்டத்தின்கீழ், நாடளாவிய ரீதியில் முன்னெடுக்கப்பட்டுவரும் "அத்தம" (Aththama) வேலைத்திட்டம் இன்றைய தினம் முசலி பிரதேசத்தில் அமைந்துள்ள தேசிய பாடசாலையில் மிகச் சிறப்பாக இடம்பெற்றது.
மன்னார் மாவட்ட அரசாங்க அதிபர் / மாவட்டச் செயலாளர் அவர்களின் தலைமையில் இடம்பெற்ற இந்நிகழ்வில், பிரதேச செயலக உத்தியோகத்தர்கள், பாடசாலை அதிபர், ஆசிரியர்கள், மாணவர்கள், திணைக்களத் தலைவர்கள், முப்படையினர், பாடசாலை அபிவிருத்திச் சங்கத்தினர், பழைய மாணவர்கள் மற்றும் பொதுமக்கள் என பலரும் பெருந்திரளாக கலந்துகொண்டனர்.
நிகழ்வின் ஆரம்பத்தில் உரையாற்றிய மாவட்டச் செயலாளர் அவர்கள், இத்திட்டத்தின் அடிப்படை நோக்கங்கள் மற்றும் அதன் பின்னணி குறித்து விளக்கமளித்தார். பண்டைய காலத்து கூட்டு உழைப்பு முறையான "அத்தம" எனும் கருப்பொருளை அடிப்படையாகக் கொண்டு ஆரம்பிக்கப்பட்டுள்ள இத்திட்டம், பொதுச் சொத்துக்களைப் பாதுகாக்கும் நற்பண்பை மாணவர்களிடமும் சமூகத்திடமும் வளர்க்கும் என அவர் குறிப்பிட்டார்.
மேலும் தனது உரையின் போது, இத்திட்டத்தின் பங்களிப்புப் பரிமாணங்கள் குறித்தும், நவீன தொழில்நுட்ப முறைகள் மற்றும் டிஜிட்டல் கண்காணிப்புச் செயலிகள் ஊடாக கிராமிய உட்கட்டமைப்பு மேம்பாடுகள் எவ்வாறு கண்காணிக்கப்படுகின்றன என்பது குறித்தும் விரிவாக எடுத்துரைத்தார்.
தொடர்ச்சியான பேணுகையும் தொழில்நுட்பக் கண்காணிப்பும்:
இதன்போது விசேடமாகக் கருத்துத் தெரிவித்த மாவட்டச் செயலாளர் அவர்கள், இத்தகைய சிரமதான நிகழ்வுகளுடன் மாத்திரம் நின்றுவிடாமல், பாடசாலையை எப்போதும் சுத்தமாக வைத்திருக்கும் செயற்பாட்டைத் தொடர்ச்சியாகப் பேணுவதற்குரிய வழிவகைகளை அதிபர், பாடசாலை அபிவிருத்திச் சங்கம் மற்றும் பழைய மாணவர் சங்கம் ஆகியவை இணைந்து முன்னெடுக்க வேண்டும் என வலியுறுத்தினார். அத்துடன், இப்பணிகளைத் தடையின்றிப் பேணவும், உரியமுறையில் மதிப்பீடு செய்யவும் தொழில்நுட்ப முறையொன்றும் இதற்காக அறிமுகப்படுத்தப்பட வேண்டும் எனவும் அவர் சுட்டிக்காட்டினார்.
உரைகளைத் தொடர்ந்து, வருகை தந்திருந்த அனைத்து தரப்பினரின் முழுமையான ஒத்துழைப்புடன் பாடசாலை வளாகம் மற்றும் அதனைச் சுற்றியுள்ள பகுதிகளில் மாபெரும் சிரமதானப் பணிகள் முன்னெடுக்கப்பட்டு, வளாகங்கள் தூய்மைப்படுத்தப்பட்டமை குறிப்பிடத்தக்கது.

30/10/2026

-
மன்னார் மாவட்டத்தின் 2ஆவது பிரதேச செயலாளர்கள் மாநாடு நானாட்டானில் நடைபெற்றது!
================================================================================
மாவட்ட நிர்வாகத்தின் வினைத்திறனை மேம்படுத்துதல், அபிவிருத்தித் திட்டங்களை விரைவுபடுத்துதல் மற்றும் பொதுமக்களுக்கான அரச சேவைகளை வலுப்படுத்துதல் ஆகியவற்றை மையமாகக் கொண்டு மன்னார் மாவட்டத்தின் 2ஆவது பிரதேச செயலாளர்கள் மாநாடு வெற்றிகரமாக நடைபெற்றது.
மன்னார் மாவட்டத்தின் 2026ஆம் ஆண்டிற்கான 2ஆவது பிரதேச செயலாளர்கள் மாநாடு, மாவட்ட அரசாங்க அதிபர் / மாவட்ட செயலாளர் அவர்களின் தலைமையில், நேற்று (29.10.2026) காலை 8.30 மணிக்கு நானாட்டான் பிரதேச செயலகத்தில் நடைபெற்றது.
மாவட்ட மற்றும் பிரதேச நிர்வாகங்களின் வினைத்திறனை மேம்படுத்துதல், பொதுமக்களுக்கான அரச சேவைகளின் தரத்தை உயர்த்துதல், அபிவிருத்தித் திட்டங்களை விரைவுபடுத்துதல் மற்றும் அரசாங்கத்தின் தேசிய வேலைத்திட்டங்களை வினைத்திறனுடன் நடைமுறைப்படுத்துதல் ஆகியவற்றை நோக்கமாகக் கொண்டு இம்மாநாடு கூட்டப்பட்டது.
உற்பத்தித்திறன் மற்றும் நிர்வாகச் சீர்திருத்தங்கள் பாராட்டு
மாவட்டத்தின் அரச நிறுவனங்களில் தொடர்ச்சியாக முன்னெடுக்கப்பட்டு வரும் நிர்வாகச் சீர்திருத்தங்கள், தர முகாமைத்துவ நடைமுறைகள், உற்பத்தித்திறன் மேம்பாட்டு முயற்சிகள் மற்றும் உத்தியோகத்தர்களின் அர்ப்பணிப்புடனான கூட்டுச் செயற்பாடுகள் குறித்து மாநாட்டில் ஆராயப்பட்டது.
கடந்த காலங்களில் பிரதேச செயலகங்களின் நிர்வாகச் செயற்பாடுகள், அலுவலக முகாமைத்துவம், உற்பத்தித்திறன், சேவை வழங்கல் மற்றும் பொதுமக்களை மையப்படுத்திய அணுகுமுறைகளில் குறிப்பிடத்தக்க முன்னேற்றங்கள் ஏற்பட்டுள்ளதாக மாவட்ட அரசாங்க அதிபர் சுட்டிக்காட்டினார்.
குறிப்பாக, மாவட்டத்தின் பிரதேச செயலகங்களில் சுழற்சி முறையில் நடத்தப்பட்டு வரும் பிரதேச செயலாளர்கள் மாநாடுகள், சிறந்த நடைமுறைகளைப் பகிர்ந்துகொள்ளவும், குறைபாடுகளை அடையாளம் கண்டு நிவர்த்தி செய்யவும், நிறுவனங்களுக்கிடையிலான ஒருங்கிணைப்பை வலுப்படுத்தவும் பெரிதும் உதவியாக உள்ளதாக அவர் குறிப்பிட்டார். பொதுமக்களுக்கான சேவைகளை மேலும் தரமானதாகவும், துரிதமானதாகவும், வெளிப்படைத்தன்மை மற்றும் பொறுப்புக்கூறலுடன் கூடியதாகவும் மேம்படுத்துவதற்கு அனைத்து உத்தியோகத்தர்களும் தொடர்ந்தும் அர்ப்பணிப்புடன் செயற்பட வேண்டுமெனவும் அவர் வலியுறுத்தினார்.
பிரதேச செயலாளர்கள் மாநாடுகளின் முக்கியத்துவம்
இம்மாநாடுகள் மூலம் மாவட்ட மற்றும் பிரதேச நிர்வாகங்களுக்கிடையிலான ஒருங்கிணைப்பு, பரஸ்பர அனுபவப் பகிர்வு, சிறந்த நிர்வாக நடைமுறைகளின் பரிமாற்றம் மற்றும் பொதுச் சேவைகளின் தர மேம்பாடு ஆகியவை தொடர்ச்சியாக முன்னெடுக்கப்பட்டு வருகின்றன.
அலுவலக முகாமைத்துவம் மற்றும் சேவை வழங்கல் தொடர்பான கள ஆய்வு
மாநாட்டிற்கு முன்னதாக, மாவட்ட அரசாங்க அதிபர் தலைமையிலான குழுவினர் நானாட்டான் பிரதேச செயலகத்தின் அலுவலகச் சூழல், நிர்வாக ஒழுங்கமைப்பு, அலுவலக முகாமைத்துவ முறைமைகள், தூய்மை மற்றும் பசுமைப் பராமரிப்பு நடவடிக்கைகள், பொதுமக்களுக்கான சேவை வழங்கல் ஏற்பாடுகள் ஆகியவற்றைப் பார்வையிட்டு ஆய்வு செய்தனர்.

குறிப்பாக, அரச நிறுவனங்களின் தூய்மை, பசுமையான அலுவலகச் சூழலை உருவாக்குதல், சுற்றுச்சூழல் பாதுகாப்பு, கழிவு முகாமைத்துவம், பொதுமக்களின் பங்கேற்பு மற்றும் நிலைபேறான தூய்மைப் பராமரிப்பு நடைமுறைகள் ஆகியவற்றை மேலும் வலுப்படுத்துவது தொடர்பில் கவனம் செலுத்தப்பட்டது. அத்துடன், தேசிய தூய்மை வேலைத்திட்டத்தின் கீழ் மாவட்ட மற்றும் பிரதேச மட்டங்களில் முன்னெடுக்கப்படும் நடவடிக்கைகளை ஒருங்கிணைப்புடனும் தொடர்ச்சியான கண்காணிப்புடனும் நடைமுறைப்படுத்துவதன் அவசியமும் வலியுறுத்தப்பட்டது.
நிர்வாக மற்றும் அபிவிருத்திச் செயற்பாடுகளின் முன்னேற்ற மீளாய்வு
தொடர்ந்து நடைபெற்ற மாநாட்டில், முன்னைய மாநாட்டில் எடுக்கப்பட்ட தீர்மானங்களின் அமுலாக்க முன்னேற்றம், நிறைவேற்றப்பட்ட பணிகள் மற்றும் தொடர்ந்தும் நடவடிக்கை எடுக்கப்பட வேண்டிய விடயங்கள் தொடர்பாக விரிவான மீளாய்வு மேற்கொள்ளப்பட்டது.
2026ஆம் ஆண்டிற்கான வரவு செலவுத் திட்டத்தின் கீழ் மன்னார் மாவட்டத்திற்கு ஒதுக்கப்பட்டுள்ள நிதி, கிராமிய வீதி அபிவிருத்தி உள்ளிட்ட அபிவிருத்தி வேலைத்திட்டங்கள், சமூக நலன்புரித் திட்டங்கள் மற்றும் பிரதேச செயலகங்களினூடாக முன்னெடுக்கப்படும் பொதுமக்கள் சேவைகள் தொடர்பாகவும் கலந்துரையாடப்பட்டது. மேலும், பிரதேச செயலகங்களின் நிர்வாகம், நிதி முகாமைத்துவம், திட்டமிடல், அபிவிருத்தித் திட்டங்களின் முன்னேற்றம், நலன்புரி உதவிகள், சேவை வழங்கலில் காணப்படும் சவால்கள் மற்றும் அவற்றிற்கான தீர்வு நடவடிக்கைகள் என்பன தொடர்பிலும் கவனம் செலுத்தப்பட்டது.
நானாட்டான் பிரதேசத்தின் அடிப்படைப் பிரச்சினைகளுக்குத் தீர்வு
நானாட்டான் பிரதேச செயலாளர் பிரிவில் அடையாளம் காணப்பட்டுள்ள அடிப்படைத் தேவைகள், பொதுமக்கள் எதிர்நோக்கும் பிரச்சினைகள், நிலுவையிலுள்ள அபிவிருத்திப் பணிகள் மற்றும் அவற்றிற்கான தீர்வுகள் தொடர்பாக விசேடமாக ஆராயப்பட்டது.
இவ்விடயங்களை உரிய திணைக்களங்கள் மற்றும் நிறுவனங்களின் ஒருங்கிணைப்புடன் முன்னெடுத்து, பொதுமக்களின் தேவைகளுக்குத் துரிதமான தீர்வுகளை வழங்குவதன் அவசியமும் வலியுறுத்தப்பட்டது.
உத்தியோகத்தர்களின் பங்கேற்பு
இம்மாநாட்டிற்கான ஏற்பாடுகளை நானாட்டான் பிரதேச செயலாளர் அவர்கள் சிறப்பாக ஒருங்கிணைத்திருந்தார்.
மாநாட்டில் மாவட்ட பிரதம உள்ளகக் கணக்காய்வாளர், மாவட்ட பிரதம கணக்காளர், மாவட்ட திட்டமிடற்பணிப்பாளர், , ஏனைய பிரதேச செயலாளர்கள், உதவி மாவட்ட செயலாளர், உதவிப் பிரதேச செயலாளர்கள், உதவித் திட்டமிடல் பணிப்பாளர்கள், கணக்காளர்கள் மற்றும் மாவட்ட, பிரதேச செயலகங்களின் உத்தியோகத்தர்கள் உள்ளிட்ட பலர் கலந்துகொண்டனர்.
மாவட்டத்தின் அரச நிறுவனங்களுக்கிடையிலான ஒருங்கிணைப்பை மேலும் வலுப்படுத்தி, உற்பத்தித்திறன் மற்றும் தர முகாமைத்துவ நடைமுறைகளைத் தொடர்ச்சியாக மேம்படுத்துவதன் மூலம், பொதுமக்களுக்கு வினைத்திறனானதும் தரமானதுமான அரச சேவைகளை வழங்குவதற்கான முக்கியமான கலந்துரையாடலாக இம்மாநாடு அமைந்தது.

28/10/2026

நானாட்டனில் பிரஜாசக்தி தேசிய வேலைத்திட்ட விழிப்புணர்வு செயலமர்வு!

கிராமிய மக்களின் வாழ்வாதாரத்தை மேம்படுத்தி, வறுமையை ஒழிக்கும் திட்டங்களுக்கு முன்னுரிமை வழங்க வலியுறுத்தல்

பிரஜாசக்தி தேசிய வேலைத்திட்டத்தின் கீழ், கிராமிய அபிவிருத்தித் திட்டங்களைத் தயாரித்தல், மக்களின் தேவைகளை அடையாளம் காணுதல் மற்றும் அவற்றுக்கு முன்னுரிமை வழங்குதல் தொடர்பான விழிப்புணர்வு மற்றும் வலுவூட்டல் செயலமர்வு இன்று (28) மன்னார் மாவட்டத்தின் நானாட்டன் பிரதேச சபை மண்டபத்தில் நடைபெற்றது.

சமூக அபிவிருத்திச் சபையினரை வலுவூட்டும் நோக்கில் ஏற்பாடு செய்யப்பட்ட இச்செயலமர்வில், சமூக வலுவூட்டல் அமைச்சர் உபாலி பன்னிலகே, பாராளுமன்ற உறுப்பினர் மயில்வாகனம் ஜகதீஸ்வரன், மாவட்டச் செயலாளர், திட்டமிடல் பணிப்பாளர் மற்றும் பிரதேச செயலாளர்கள் உள்ளிட்டோர் கலந்துகொண்டனர்.

இச்செயலமர்வின் போது, பிரஜாசக்தி தேசிய வேலைத்திட்டத்தின் நோக்கங்கள், கிராமிய அபிவிருத்தித் திட்டங்களைத் தயாரிக்கும் நடைமுறைகள், சமூகத்தின் உண்மையான தேவைகளை அடையாளம் காணுதல் மற்றும் கிடைக்கப்பெறும் நிதியைப் பயனுள்ள வகையில் பயன்படுத்துதல் தொடர்பாகக் கவனம் செலுத்தப்பட்டது.

கிராமிய மக்களின் பொருளாதார நிலையை மேம்படுத்தி, வறுமையைக் குறைப்பதுடன், நிலையான வாழ்வாதாரத்தை உருவாக்குவதற்கான திட்டங்களை முன்னெடுப்பதில் சமூக அபிவிருத்திச் சபைகளின் பங்களிப்பு முக்கியமானது என வலியுறுத்தப்பட்டது.

மேலும், கிராம மட்டத்தில் மக்களின் பங்களிப்புடன் அபிவிருத்தித் திட்டங்களைத் தயாரித்து, அவற்றை முறையாக நடைமுறைப்படுத்துவதன் மூலம் மக்களின் வாழ்க்கைத் தரத்தை உயர்த்த முடியும் என்பதும் எடுத்துரைக்கப்பட்டது.

இந்நிகழ்வில் பிரஜாசக்தி அமைப்புகளின் தலைவர்கள், செயலாளர்கள், உறுப்பினர்கள் மற்றும் தொடர்புடைய அதிகாரிகள் எனப் பலரும் கலந்துகொண்டனர்.

கிராமிய மக்களின் தேவைகளுக்கு முன்னுரிமை அளித்து, சமூகப் பங்களிப்புடன் அபிவிருத்திப் பணிகளை முன்னெடுப்பதற்கான முக்கியமான நடவடிக்கையாக இவ்விழிப்புணர்வு செயலமர்வு அமைந்தது.

ஊடகப் பிரிவு
மன்னார் மாவட்டம்