الزجل المغربي

توحشتك يا لميمة
صبرًا ما فاد صبري
صبرًا ما فاد صبري
كي نشوف صورتك الزينة
ينوح ويضياق صدري
قاع ما ننساكش ها العوينة
مكوي وهاذاك قدري
معطوب هاذاك قدري
فراقك عجب بينا
الحمام بطل يجي

هاذا ما كان، ما كان
يا ما من ذاك الزمان
هاذا ما كان، ما كان
ويلي أنا من ذاك الزمان

العيد والمغفرة
ما كان من شاف فينا
ما كان من دق علينا
يا خاوتي نوضوا تصدوا
أما عاشت يتيمة
شافت عيني ونشهد
خدمت أمها بالقليلة
رفدت أمها وهي صغيرة
تطير من عشها
تغرد نروح نزور الليلة

توحشتك يا لميمة
صبرًا ما فاد صبري
صبرًا ما فاد صبري
نبغيك والرب داري
أكثر من أولاد أولادي

هاذا ما كان، ما كان
يا ما من ذاك الزمان
هاذا ما كان، ما كان
ويلي أنا من ذاك الزمان

الشاب عز الدين

*** *****

يالواحد لكريم ياعالم لسرار
بغيت نشكيك همي منين نبدا

جاك عبدك قانط يالغفار
دايم مكدر نكدا تجر نكدا

الناس نامت وانا دمعي حر مدرار
سال عل لخد حفر طريق وحدة

بجاه النبي محمد طه المختار
نتا لعالم مابقلبي محي الشدة

ماجاحد مامعتارض عَل لأقدار
يا القاضي من لا لقضاك ردة

كشف الهم من قلب بلاه لغيار
زاد كدر لعيش وطفى اللذة

غيث بالستر حتى تحد لعمار
أو رد الكيد فنحور دوك لعدا

ها لمسكين ولات وسادتو حجار
أو بايت إنين على خوى لمعدة

نحيل وسقيم بذات عامرة ضرار
مكابد الضيق فزمان جْبَّارْ وهْدى

أو قال فولدي نزرع الخير يثمار
فلدة كبدي وقرانو رجال غْدَّا

حتى التعليم هجر وخوى الدفتار
وتعز الشطيح والشتيف على لقعدة

صْبْر أيوب حنا فتناه بقنطار
والهم واضح جروح عل الكسدة

يازماني صفعني وقمش بالضفار
أو زيد فالجور علينا وتعدى

شكون يتلام وعلامن تطيح لوزار
وشكون لي خان الشعب وتعدى

هاكفوفنا للعالي كبار وصغار
هو يفاجي لهموم تسيح زبدة

يالسالخ من جوف الليل النهار
سوق لينافرحة تمحي الشدَّة

يالواحد لكريم ياعالم لسرار
شكيت همي ورضيت بالحكم وقضى

من سالك شكون خطاط لسطار
قل ياسين الجهوري أو عاد كي بدا

يا زمن الغلاء والأسعار العالية
آش درتي بالناس يا لص السوقِ والمتاجرِ
ولات الدراهمُ قليلة والحاجياتُ أكثرُ
وولا الفقرُ والحاجةُ يزيدُ يوماً على يوم

يا أهل الجشعِ والطمعِ والربحِ السريعِ
فين الرحمة والإنسانية والوفاء بالعهدِ
غرضكم الأرباح الوفيرة والثروة الكثيرة
وتخليو الناس في الأزمات والحيرةِ

يا أمةً تحترمُ القيم وتنادي بالأخلاقِ
واش ماكينش مِنكم من يرفعُ الصوتَ بصدقٍ وشجاعةٍ
ويحملُ راية العدل والأمانةِ
ويخدمُ الناس ويشفعُ لهم عند الربِ الكريمِ

يا ربَّنا أرسل الخلاص للناسِ في الأرضِ
وألهم قلوبَ المسؤولينَ بالرحمةِ والإحسانِ
واجعل الأمةَ تعودُ للمسارِ الصحيحِ
وتعيشُ في السلامِ والعدلِ والرحمةِ.

حلاق الحومة

حلاقْنا حلاقْ الحومة اليومْ ألقيتو زَعفانْ

ماشي مَنْ عادْتو مَقْلوبْ ليهْ الميزانْ

كَرْهُوهْ اصْحابْ الظُلْم ولَمْكرْ النَاسْيينْ الدّيانْ

قلبُ ماعَادْ إصْبَرْ تَمنى لوكانْ

يَهْلك الظالمين ما يخلي حَدْ إبانْ

يْوضَرْهم كِ وَضرْ قَوْم نوح أيام الطوفان

شَفَقْنا منْ حالو أو گلنا ليهْ نَعلْ الشيطانْ

گال انت ماعارَفْتي والو القَلْب عالمْ به الرحمانْ

لَوْ كان ألقيتْ ما نْحسّنْ زَغْبَة ولا نْقابَلْ إنْسانْ

يَهديكْ الله هذا حَالْ الخَلْقْ مَنْ زَمانْ

صَبَرْ راهْ ليامْ دايْزة ب للي كانْ

عرَفْناكْ رجل طيّبْ اوْمَنْ ناسْ الاحسانْ

للي خَصرْ خاطركْ نطلب ليه النيرانْ

عادْ ضحكْ وطلقْ البَشْرة وبيّنْ لينا أسْنانْ

أحَسّنْ لِيا راسي أفْرحْ أُخْرجتْ حَتّا أنا فرْحَانْ

هذا حلقنا إسمُ ماإخْفى يا لَخْوانْ

فحومتْنا معْروفْ ديمة زَرْبانْ
....
البعليوي عبد السلام
من ديوان ارتاج الكلمة

المشيب
خادمني الشيب الشباب
وقال لي إنت ياعجوز كذاب
امتى كنتي إنت شاب
ورماني من ورا الباب
قلت عد ياشباب
انا بعيش مع الشياب
والزمان هو السبب
قال الي الزمن....
اماشبعتي ياإنسان
واسمك من النسيان
خود نصيبك بالتمام
وتكلم عن الشيب بحترام
إنه نور ووقار من الرحمان
قلت مرحباً يضيف الزمان

زجل مصطفى اليعقوبي

بشيت نزور الدوار لقيت كلشي تبدل عليا
فين هديك الايام والكلسة على الصينية
والحرشة ديل الزرغ والزبدة البلدية
كانت المراة تحطب وكانت النية
دبا مبقيتي تفرق ملعروبية ملمدينية
وربيع على كل شكال كنت نخضر عينية
وليوما كلشي خرف بسباب الادوية
والمرا مرضعة دوار كانت الصحة قوية
وكان كلشي قانع وراضي بالقسمية
طارت البراكة ملي الحليب يتباع من دار
بعد ماكنت عندك بقرة تشرب فيها نتا وجار
وديك المحطة كلا وساكن في قطار
دبا كلشي تقسم شوفوا الزمان الغدار
والاتاي مشحر ومردود على المجمر
وليوم مبقات بنة ملي غاب الفاخر
فين الزرع في الكاعة يميمتي على منظر
غابت البراكة ملي مابقى يخرج عشور
تفكرت يامات رمضان والفيقة ديل السحور
والخضرة فيها البنة ملي كان الما بالبور
تقلبت اليام ملي ولا الكرموس يتباع في القور

عمر اللبان

+÷+÷+÷ زجلية ÷+÷+÷+
< كَفْ الجْمَرْ >
مَانِي مَجْدوبْ ، مَانِي بُوهَالِي
مَانِي ݣْنٓاوِي جَانِي حَالِي
هْوٓاسِي حَرْفْ جْمَرْ فَ دْخٓالِي
هُوَ الْمَالَكْ وَ انَا مَمْلُوكْ
يِحَرَّكْ لَدْخٓالْ بْلَا شْوَارِي
يِفَجَّرْ الْمَسْكُوتْ للِّي فَ قْرَارِي
يِفَيَّقْ الرَّاݣَدْ ؤُ بِيهْ نْرَارِي
بَكْلامْ مَنْظُومْ وَزْنُو مَحْبُوكْ
بِيهْ نْصَوَّرْ مَا فِيهْ نْعَانِي
بِيهْ نَرْسَمْ لُوحَا بَ لْوَانِي
بِيهْ نْتَرْجَمْ الْحَكْمَه فَ مْعَانِي
شَلَّا تَحْمَلْ مَنْ مَغْزَى مَفْرُوكْ
الْحَرْفْ مْنَحْتُو يِعَالَجْ قْضَايَا
مَاشِي نَكْسَبْ مْنُورَاهْ هْدَايَا
وَالاَّ بِيهْ نْبِيعْ رْخِيصْ رْجَايَا
وِيْعُودْ بَعْدُو وَجْهِي مَشْرُوكْ
مَا نَتْنَازَلْ وَ لَا نَحْدَرْ رَاسْ
مَا نْعُودْ ݣَدْرَة مَتْقُوبْتْ الْكَسْكَاسْ
نَجْرِي وَ الْحَقّْ حَتَّى يَعْلاَ سَاسْ
وَخَّا يْزَرْعُو مْسَامَرْ وُ شُوكْ
بْحَرْفِي نَفْضَحْ وُ نَكْشَفْ لَسْرَارْ
نْعَرِّي الْمَسْتُورْ وُ نَحْكِي مَا صَارْ
فْ دَهْلِيزْ بْلَادِي الْعَامْرَا بْ لَكْدَارْ
زْرِيبَة وْ لَقْطِيعْ فِيهَا مَنْهُوكْ
وَخَّا يَعْطِيوْ وِ يْغَدْقُو بَالْوَادْ
وَخَّا يْوَشْحُو بَرْقَابِي لَقْلَادْ
نَقْسَمْ مَا نْخُونْ بْعَهْدِي لَعْبَادْ
وَ لَوْ بْعَرْشْ وُ بْتَاجُو مَسْبُوكْ
حَرْفِي الْمَجْنُونْ عْلِيَّا غَالِي
هُوَ رْفِيقِي فَ نْهَارْ وَ لْيَالِي
فِيهْ شْقَايَا وُ رَاحَةْ بَالِي
وُ نْهَارْ يَهْجَرْ نْوَللِّي مَهْلُوكْ
هُوَ دْوَايَا لْجَرْحِي الْغَايَرْ
هُوَ بْخُورِي وَ الْمَجْمَرْ زَاهَرْ
هُوَ كْسَايَا فَ عْرَايَا حَاضَرْ
هُوَ دْرَهْمِي فَ الْيُومْ الْمَحْلُوكْ
غَادِي نَبْقَى لْأَجْلُو وَافِي
نْحَبُّو كَ شْرِيفْ طَاهَرْ وُ صَافِي
مَنْ قَلْبْ نَبْعُو نْشَرْبُو قْوَافِي
ؤُ بِيهْ نَسْقِي جْنَانِي الْمَهْتُوكْ
حَتَّى يَخْضَارْ عَرْشْ غْصَانُو
وَ تْعُودْ لَطْيَارْ لْ عَشْ حْضَانُو
تْغَنِّي لَرْبِيعْ فَاتَنْ بَ حْسَانُو
مَا تْخَافْ صَيَّادْ جْبَّادُو بَعْلُوكْ
======== ========
حسن العلوي مفهوم
مراكش (( أكتوبر 2016 ))

***شكون خلاك
شكون أصاحبي تركك ؤخلاك
تفرح بـنسمات بلادك ؤ تفخر بالهوية
نـار الفُسًاد والسراق كــاوياك
النهب والحكرة والتـمييز والـعنصرية
م كاين غ باك صاحبي ؤلشراك
فـخاخ لـجور والاتأ ، تًهميش وطبقية
لا ميزان لجمهم أو سمع شكاك
فقست بيوض لحرابي ؤ سنت الكيدية
هاجرلحُر ؤيقات غ لبومة معاك
تخنقت الأنفاس ؤتصدات ذيك العقلية
م بقاو حباب قاسهم جدام وياك
ذبحوا الرحمة،الطيبة، الوئام والحنية
فشكون أصاحبي خلاك ؤهناك
ؤشكون لغادي يطبطب عليك ؤ علي
عادت الدنيا غول ذيابها قصياك
لحال ظَلًم ؤسادت النزعة الحيوانية
صوراليأس في الدروب هلكاك
ؤلخلق عاد دينهم خواض وشيطانية
يد الظلام وجهالة حافة منعاك
لاأمل بقا غ وجع رًاس،لحالةهي هي
ضحكة هربت عاد ليأس سواك
غرقت لغابة ف المتاعب والميزرية
عاد لحريكَ والموت حل ؤفكاك
قتلوا فيك الطيبة ؤ زرعوا الهمجية
كره ولقيل بحال تابعة تابعاك
طبع ناس خسرنـفاق وطبع لجاهلية
ضربة لمزود ؤلعياقة وسلاك
م يحس بها غير رزين ؤمول قضية
م بقا غير صراخ ؤ واك واك
سفينة غرقهـا لبهوت و لقوم لـمعمية
لعقول الراشية هي لحبساك
بخبثها تحتال تصنع ليك ألف قضية
فاسمع ،صبر ؤرزانة دواك
محبة الباكور فايتة ، بل قـل لحظية
عفس على الضيم ؤ لأذاك
راه لغفلة سلابة ؤ قلة الصفا والنية
ؤ باش تفرح طهر مصفاك
لحقد ولحسد الكيد ولفردية ولأنانية
شكون أصاحبي تركك ؤخلاك
تفرح بنسيم بلادك ؤ تفخر بالـهوية
***الزجال والشاعر:أحمد الكندودي***

واللهِ شحال كنت جاهل
بللي حبك ماكان ساهل
ذقتو صبحت فيه حاصل
نتعذب و نقاسي معاه

حبك سكن فقلبي لداخل
يجري فيا طالع نازل
وانت قلبك عليا غافل
سامحة فقلبي و منخلاه

ماعرفت حبك هكدا عامل
ما عرفت بلي بحر حامل
ركبتو صبحت فيه واحل
غرق فيه قلبي و داه

مسهرني طول الليل كامل
ونهاري ك الورد الدابل
تمنيت حبك سم قاتل
بالحق سمك يا ماحلاه.

وانا قلبي عليه محاول
لا تظني عذابك به قابل
والله قلبي ما يستاهل
يوم ذاق حبك ما نساه.

التازي رضوان

الزجل المغربي السبب الأول في تدوين الدارجة المغربية 📝قد يتسائل الكثير متى ظهرت الدارجة المغربية وماهو أقدم نص تم تدوينة على الكتب بالدارجة المغربية ؟؟

الدارجة المغربية : هي لهجة من لهجات اللغة العربية ولكن تختلف كثيراً عن لهجة سكان المشرق العربي بسبب فرق الزمن في ظهور اللهجات و فرق المساحة الجغرافية بين المناطق .

متى ظهرت الدارجة : بدأت الدراجة المغربية في الظهور في عهد دخول عرب التغريبة الهلالية بعدما كان يتحدث المغاربة العرب الأشراف اللغة العربية الفصحى ويتحدث الامازيغ المغاربة باللغات الأمازيغية إلى جانب العربية الفصحى ولكن بعد انتشار عرب التغريبة الهلالية في القرن الخامس هجرياً فرضوا لهجات جديدة ممزوجة باللكنات الشرقية والمصرية والامازيغية وأساسها كلمات وحروف وقواعد عربية أصيلة حتى أصبحت الدارجة المغربية الأكثر انتشاراً في المغرب

متى دوّنت الدارجة المغربية : دوّنت الدارجة المغربية في فترة القرن 14 ميلادي وكانت عبارة عن ديوان للقصائد الزجلية للشاعر التاريخي الكفيف الزرهوني واسم الديوان (ملعبة الكفيف الزرهوني) ولهاذا يعتبر الزجل المغربي سيد الثقافة اللغوية المغربية وأول سبب دفع المغاربة لتدوّين لهجتهم الدارجة .

مصادر : موسى الشامي / ابن خلدون /أطروحة عبد المنعم في جامعة القاهرة / د الراضي دغفوس.

بحث : ايوب السحياوي

علمني زماني ننسى للي نساني ومنبقاش نعاني
نخلي أحزاني ونعاود نعيش من ثاني
واللي مشى وخلاني عمرو يفرح ولا يعيش هاني
ومغيلقاش كيف حناني خليه يبعد الى قدر غير ينساني
هو للي تبدل وولى أناني تيفكر غير فراسو وجفاني
اش غندير انا بهاد الحب اللي كرفسني وعياني
وهلكني فصحتي وكياني.
من حبيبي دقت الحلو والمر
الحلو مشى طعمو مع الدهر
ومابقيت متذكرلو غير المر
ياك بسبابو صرت مملوك من بعد ما كنت حر
ياك اللي طلبها مني تنحضرها ليه بلا مانتأخر
فالاخر يبدلني ويعشق واحد خر
محال غنلقى من يداوي جراحي وللكسر يجبر.
ممكن سؤال العمر
علاش خليتيني نحبك وانت ناوي الغدر؟
كنتي تمشي من الاول وحتى واحد فينا ما يخسر

التومي