03/09/2026
***TSENABEN’NY VOLAMENA – BRIEVILLE***
🌱 Namelona indray ny lanjan’ny harena ankibon’ny tany ao amin’ny Kaominina Brieville ny Foire Tsenaben’ny Volamena, izay nanomboka ny voalohan’ny volana septambra ary hifarana ny 6 septambra ho avy izao.
🏘️ Tranoheva maro sy hetsika ara-kolontsaina ary ara-panatanjahantena no mandravaka izany, miaraka amin’ny fandraisan’anjaran’ny sehatra samihafa toy ny fifandraisana, ny fitsaboana ary ny fampindramam-bola eny ambanivohitra.
🤝 Ezahin’ny Kaominina, amin’ny alalan’ity hetsika ity, ny hampiroborobo an’i Brieville ho toerana fihaonan’ireo mpisehatra amin’ny volamena, ary hisarika mpandraharaha sy fampiasam-bola eny an-toerana.
👉 Nanatrika izany ny Centrale de l’Or de Madagascar (COM), notarihin’ny Tale Jeneraliny. Tafiditra ao anatin’ny paikady maharitra napetraky ny Fanjakana amin’ny fitantanana ny seha-pihariana volamena ny fampidirana ireo mpisehatra ho ao anatin’ny sehatra ara-dalàna, amin’ny alalan’ny karatra maha mpanivana sy mpanangona volamena, ary koa ny fanomezana fahazoan-dàlana ho an’ireo mpanondrana volamena.
✨ Kendrena amin’izany ny hametrahana rojom-pivarotana volamena ara-dalàna, manomboka amin’ny fitrandrahana ka hatrany amin’ny fanondranana, mba hahafahan’ny Kaominina sy ny faritra misitraka ny tamberim-bidy na “ristourne” sy ireo tombontsoa ara-toekarena mifandraika amin’ny fitrandrahana volamena.
👉 Nifanindran-dalana tamin’ny Tsenabe ny fihaonana tamin’ireo Ben’ny Tanàna eto amin’ny Distrikan’i Tsaratanàna. Nivoitra tamin’izany fa isan’ireo toerana mamokatra volamena betsaka i Brieville, izay ahitana mpanivana tombanana ho an’arivony sy mpanangona volamena maro.
📋 Nohazavain’ireo tompon’andraikitra teknika eo anivon’ny COM tamin’ireo Ben’ny Tanàna ny fombafomba momba ny karatra, ny fitsinjarana azy, ny faritra ahafahana miasa ary ny fe-potoana manan-kery amin’izany.
👉 Ny tanjona dia ny hanatsarana ny seha-pihariana volamena eny ifotony sy hampiroborobo ny famatsiana ara-dalàna, ka antenaina fa handray anjara lehibe amin’ny famatsiana ireo mpanondrana volamena ara-dalàna ny vokatra avy eto Brieville.
🤝 Nanotrona ny fanokafana ireo Ben’ny Tanàna avy amin’ny Kaominina manodidina, ny Lefitry ny Lehiben’ny Distrikan’i Tsaratanàna, ireo manam-pahefana misahana ny fandriampahalemana ary ny Ben’ny Tanànan’i Brieville.
✨ Ny Tale Jeneralin’ny COM no nanokatra tamin’ny fomba ofisialy ny Foire Volamena andiany voalohany teto Brieville.