04/07/2025
NAAN EO AN H.E. PRESIDENT HILDA C. HEINE ILO RAININ AN RI EONOD
Ṃōṇōṇō ilo Raan in an Aolep Ri-Eọñwōd, ñan aolep armej ro ilo Ṃajeḷ in, jān eañ ñan rak im ijoko otemjej.
Rainin, jej kautiej jukjukin pād eo an aolep ri-eọñwōd, ṃaan im kōrā ro rej ruj wōt ke ejjañin tak aḷ, rej peran im ribuk meto ko rōḷḷap, im dāpij wōt ṃanit kein ad im rej kwaḷọk wōn kōj. Ilo raan in kakkije in, ejjab juon ien ṃōṇōṇō wōt kōn eọñwōd, ak ej barāinwōt juon menin kaṃṃoolol kōn jeṃjerā ko ikōtaad ilo jukjukin pād kein ad, ṃanit in ad eṃṃan, im lọjet eo ad.
Kōj jej jet armej in lọjet, im meto in ad epād enañin aolep men ko bwinnid ñan mour in, ej naajdik kōj, jej ito-itak ie, im ej kakobaik kōj ippān doon. Ej juon menin an utiej būruō bwe in kile laḷ in ad eo ej make wōt ilo laḷ in ilo an kōjenolọk rainiin ñan ad kile aolep ri-eọñwōd ro, ṃaan im kōrā – juon wāween eo ej kaalikkar wōn kōj im ta eo jej kaorōke.
Ñan aolep ri-eọñwōd ro ṃaan im kōrā, kōjatdikdik ke enaaj juon iien kakkije eo eineeṃṃan, ekaṃōṇōṇō im jejjet ñan koṃ. Ij lewaj aō naan in nebar im kaṃṃoolol ñan Marshalls Billfish Club, Majuro Urōk Club, im aolep ro rej loloodjake im jipañ bwe raan in en maroñ bōk jikin jān iiō ñan iiō otemjej.
Ilo ad bōk koṇaad ilo ṃakūtkūt kein an raan in an aolep ri-eọñwōd, jen barāinwōt keememej bwe ej ad jimor eddo ñan kōjparok lọjet in ad im ej letok jeraaṃṃan ko jej amani. Jen wōnṃaanḷọk wōt ilo ad kōjparok mennin mour kein ilo lọjet in ad, im jen dāpij im kōjparoke ñan ro diktakūd tokālik. Wōda im jeraaṃṃan ñan aolep!
18/05/2025
13/10/2024
08/09/2024
05/09/2024
01/09/2024