Biblioteka Fetkin-Kavadarci

На денешен ден – 25 мај, се сеќаваме на Стале Попов

На 25 мај 1902 година во мариовското село Мелница е роден еден од најзначајните македонски раскажувачи и романописци – Стале Попов. Со своето творештво тој остави неизбришлива трага во македонската литература, претворајќи ги историјата, традицијата и духот на Мариово во книжевно наследство од непроценлива вредност.

Попов е автор на делата „Крпен живот“, „Толе Паша“, „Калеш Анѓа“, „Дилбер Стана“, „Шаќир војвода“, како и на бројни раскази и приказни за легендарниот Итар Пејо. Неговите дела ги оживуваат борбите, надежите и секојдневието на македонскиот народ, а преку богат народен јазик и автентични ликови создава книжевен свет кој и денес ја плени читателската публика.

Особено значајно е што Стале Попов беше меѓу првите автори кои по кодификацијата на македонскиот литературен јазик создадоа обемни прозни дела на современ македонски јазик, придонесувајќи за развојот и афирмацијата на македонската книжевност и културен идентитет.

Неговото творештво останува сведоштво за истрајноста, мудроста и достоинството на македонскиот човек, а неговите книги и денес се дел од културната меморија на Македонија.

Вечна му слава на Стале Попов – чуварот на мариовската душа и еден од столбовите на македонската литература.

📚✨ Честит 24 Мај – Денот на сесловенските просветители Свети Кирил и Методиј!

Денес го одбележуваме делото на браќата Кирил и Методиј – визионери кои во IX век ја започнаа својата просветителска мисија меѓу словенските народи. Создавањето на првото словенско писмо и ширењето на писменоста, образованието и духовните вредности оставија траен белег во историјата и културниот развој на словенскиот свет.

Нивната мисија не била само да ги пренесат буквите, туку и да им овозможат на луѓето да учат, да создаваат и да го чуваат своето културно наследство на сопствен јазик.

Нека нивното дело биде потсетник дека знаењето е најсилниот мост меѓу минатото, сегашноста и иднината. Да ги чуваме книгите, јазикот и писменоста – темелите на секое општество.

Честит празник!

Нови книги во библиотеката „Феткин“.

НОВИ КНИГИ

Со особена чест и искрена гордост денес ја примивме благодарницата за успешната соработка, поддршката и придонесот во работата на Општинско основно училиште Пере Тошев Росоман доделена по повод одбележувањето на патрониот празник.

Ова признание за нас претставува потврда дека заедничката посветеност кон образованието, културата и младите носи вистински вредности и резултати. Искрено им благодариме за укажаната доверба и соработката која ја градиме со заемна почит и ентузијазам.

Честитки по повод празникот, со желби за уште многу успешни проекти, инспиративни активности и плодна работа во иднина!

Библиотеката продолжува посветено да гради мостови на соработка со сродни институции, во интерес на заедницата и културниот развој.

📚🔥 БИБЛИОТЕКА ФЕТКИН – ЧУВАР НА ЗБОРОТ, ГЛАСОТ И ИДЕНТИТЕТОТ! 🔥📚

Денес го славиме она што нè поврзува, нè обликува и нè прави свои – македонскиот јазик. Во Библиотека Феткин Кавадарци, јазикот не е само средство за комуникација, туку жива традиција, културно наследство и темел на нашиот идентитет. Ние го негуваме, го чуваме и го пренесуваме на генерациите како највредно богатство.

Македонскиот литературен јазик, како стандарден облик, се оформува по Втората светска војна, со неговата официјална кодификација во 1945 година. Тој е резултат на вековна борба, љубов и посветеност на многу преродбеници, писатели и научници, кои верувале дека јазикот е срцето на еден народ. Од првите идеи за негово утврдување, до денешната негова широка употреба, македонскиот јазик останува сведоштво за истрајноста и духовната сила на народот.

5 мај – Денот на македонскиот јазик – не е само датум. Тоа е потсетник дека јазикот треба да се почитува, да се користи правилно и да се пренесува со гордост. Тој е нашата мисла, нашата песна, нашата приказна.

Да го чуваме, да го негуваме и да го сакаме македонскиот јазик – затоа што во него живее нашето минато, сегашност и иднина. 🇲🇰

📚✨ Гордост за Библиотека „Феткин“ – Кавадарци! ✨📚

Денес Библиотека „Феткин“ – Кавадарци учествуваше на поетската манифестација „Пролет, љубов, смеа“, во организација на Библиотеката „Гоце Делчев“ од Свети Николе.

Со особена радост ги споделуваме постигнатите успеси на нашите млади таленти:

🏆 Во категорија младинци до 18 години, ученичката од Гимназија „Добри Даскалов“, Ана Коцева, го освои ПРВОТО место.

👏 Во категорија млади поети од VI до IX одделение, ученичката од ООУ „Гоце Делчев“, Надица Блажевска, освои Пофалница за најдобра интерпретација.

Им честитаме на нашите учесници за одличните резултати, како и на нивните ментори Васка Петкова и Дијана Пачешкоска Ѓорѓиева за посветеноста и поддршката.

Гордост е во наше име да нè претставуваат вакви талентирани и инспиративни млади луѓе! 🌟

По повод Светскиот ден на книгата и авторското право, 23 април 2026 година, ЈОУ Библиотека „Феткин“ – Кавадарци упатува искрени честитки до сите љубители на книгата, автори, издавачи и читатели, кои со својата посветеност придонесуваат за негување и развој на пишаниот збор.

Светскиот ден на книгата и авторското право се одбележува од 1995 година, по иницијатива на УНЕСКО, со цел да се поттикне читањето, издаваштвото и заштитата на авторските права. Датумот 23 април е симболично избран бидејќи на овој ден во 1616 година починале големите книжевни имиња Мигел де Сервантес и Вилијам Шекспир, што му дава посебно значење како ден посветен на литературата и нејзиното влијание врз човештвото.

Оваа година, Библиотека „Феткин“ ќе го одбележи денот со креативна работилница со учениците од подрачното училиште „Пере Тошев“ од Сирково, под наслов „Книгата – прозорец кон светот: оживеј ги твоите омилени ликови од книгата“. Преку оваа активност, учениците ќе имаат можност да ја изразат својата имагинација, да ги доближат книжевните ликови до реалноста и да ја откријат магијата на читањето на еден поинаков, интерактивен начин.

Нашата цел е да ја поттикнеме љубовта кон книгата уште од најрана возраст, да создадеме навики за читање и да ги охрабриме младите генерации да ја препознаат книгата како неизвор на знаење, инспирација и личен развој.

Библиотеката „Феткин“ и понатаму останува отворен простор за сите генерации, место каде што книгата живее, а знаењето се споделува.

Со почит,
ЈОУ Библиотека „Феткин“ – Кавадарци