ОО СДСМ Струмица

Почитувана јавност.

ОО СДСМ Струмица јавно го прашува градоначалникот и локалната власт на ВМРО-ДПМНЕ: Како е можно за само шест месеци мандат, главна преокупација да биде личниот луксуз и купувањето на ново возило марка „БМВ“, вредно неверојатни 80.000 евра?

Јавно го прашуваме градоначалникот: Како успеа за само 6 месеци на функција да стигне до вакво луксузно возило, кое до пред половина година не можеше да си го дозволи?
Што ја направи разликата во неговите лични приходи веднаш штом седна во градоначалничката фотелја?
Кој е рецептот за вакво експресно богатење во период кога граѓаните едвај врзуваат крај со крај?

Додека Струмица се соочува со целосен застој и незапамтена стагнација, додека вработените во општината и јавните претпријатија не можат да ја земат својата чесно заработена плата и стравуваат за сопствената егзистенција, градоначалникот покажува тотална бесчувствителност и расипништво.
Личниот комфор и статус му се далеку поважни од проблемите на граѓаните и на луѓето кои работат за општината.

Во Струмица веќе половина година владее молк.
Нема ниту една нова инвестиција, нема нови проекти, ниту пак некаков развој.
Градот буквално стагнира на секое поле.
Наместо работа која толку многу ја ветуваа, јавноста е сведок на брзо збогатување и приватни луксузи.

Граѓаните јасно ја гледаат разликата.

Она што СДСМ со години наназад, со многу труд и посветеност го градеше, го уредуваше и го остави како траен белег на модерна Струмица, оваа неспособна локална власт не може ниту да го измие, ниту да го офарба.

Нивната неспособност е толку голема што не можат ниту да го одржуваат она што веќе им е оставено во наследство.

Бараме итни одговори на овие прашања и одговорност за ваквото недолично однесување.

Наместо за само 6 месеци да мислите на сопствениот возен парк и приватни возила од 80.000 евра, веднаш исплатете ги платите на вработените и почнете конечно да работите за интересите на градот.

Струмица не смее да биде заложник на нечии лични хирови.

СООПШТЕНИЕ ДО ЈАВНОСТА

Почитувани сограѓани, сопартијци и пријатели.

Сакам да ве информирам дека донесов одлука и поднесов оставка до претседателот на СДСМ, Венко Филипче да се повлечам од функцијата претседател на Општинската организација на СДСМ Струмица.

Оваа одлука ја носам со мирна совест и чисто срце, водена пред сè од лични причини.

Изминатиот период беше исполнет со многу работа, заеднички победи, но и предизвици со кои се соочувавме секогаш со крената глава и со мисла за доброто на Струмица.

Сакам да упатам огромна и искрена благодарност до сите членови, симпатизери, активисти и до моите најблиски соработници за огромната поддршка, довербата и енергијата што ја вложивме заедно.

Чест ми беше да ја предводам оваа организација и да работам со луѓе кои искрено го сакаат својот град.

На идниот претседател и на новото раководство им посакувам многу успех, мудрост и нова енергија во водењето на партијата на локално ниво.

Јас останувам тука, како пријател и поддржувач, секогаш подготвен да помогнам со своето искуство и знаење секаде каде што е потребно.

Со почит,

Марјан Даскаловски

Општинската организација на СДСМ Струмица ја информира јавноста дека за нов претседател на организацијата е назначен Др. Лазо Манев.

Со својот докажен професионален интегритет, општествена одговорност и посветеност, Др. Манев ја презема оваа одговорна функција со јасна цел за обединување, внесување на нова енергија и продолжување на успешните социјалдемократски политики во Струмица.

Неговиот ангажман ќе биде насочен кон зајакнување на тимот, отвореност кон граѓаните и будно следење на потребите на нашата локална заедница.

Воедно, ОО СДСМ Струмица упатува огромна и искрена благодарност до досегашниот претседател, Марјан Даскаловски, за неговото долгогодишно успешно водење на организацијата. Со својот голем труд, посветеност, мудрост и одговорност, тој даде исклучителен придонес во развојот на партијата и во бројните победи за доброто на Струмица.

Му посакуваме многу здравје и успеси во неговите идни професионални и лични предизвици, со уверување дека неговото искуство и понатаму ќе биде важен дел од нашиот заеднички пат.

Пред нас е период на посветена работа, заеднички ангажман и нови победи, во кои ОО СДСМ Струмица продолжува да биде силен глас и партнер на сите струмичани.

Со почит,
ОО СДСМ Струмица

Почитувани

Денес за жал не напушти засекогаш нашата другарка Зорица Димовска Митева.

Немаме зборови со кои може да ја опишеме тагата и празнината која ја чувствуваме сите ние.

Зорица беше голем борец, одличен наставник, прекрасна мајка и сопруга.

Како дел од семејството на СДСМ таа секогаш зрачеше со позитивна енергија и широка насмевка, човек потсетеник дека и кога е тешко може да се препроди се со насмевка и позитивна мисла.

Од раководството на партијата изразуваме длабоко сочувство до семејството.

Почивај во мир Зорице.

Почитувани земјоделци и почитувана јавност.

Ова се нашите сограѓани:

Блажо Крстев - раководител на Подрачната единица за земјоделство - Струмица.

Ефтим Орцев - советник на министерот за земјоделство Цветан Трипуновски.

Драги Памуков - советник на министерот за земјоделство Цветан Трипуновски.

Тројца луѓе од Струмица.
Тројца луѓе на струмичка земја пораснати.
Тројца луѓе кои во предизборието го газеа секое село - Куклиш, Градско Балдовци, Сачево, Муртино, Дабиле, Просениково - со ветувања што денес не се реализирани.

Ветуваа организиран откуп. Денес магацините се полни, откупувачи нема.
Ветуваа достоинствена цена. Денес зелката се откупува по 6-8 денари, компирот по 25.

Ветуваа заштита од увоз.
Денес пазарот е преплавен со странска стока во екот на нашата сезона.

Ветуваа навремени субвенции.
Денес земјоделецот не знае дали ќе ги види парите пред да го пушти семето за следната година.

Господа Крстев, Орцев и Памуков - вие сте од Струмица. Вие треба добро да знаете што значи струмичка нива.

Вие ги познавате луѓето (барем така се претставувате) лично - им бевте во домовите на слави ги повикувавте на митинзи.

Денес тие луѓе ве бараат - а вас ве нема.
Каде сте?
Каде сте кога зелката од Куклиш се продава по цена пониска од производната?
Каде сте кога компирот од Дабиле гние во магацин?
Каде сте кога младиот земјоделец пакува куфер за Германија затоа што во Струмица повеќе не може да живее од земја?
Кабинетите ви се удобни.
Платите ви се сигурни.

Струмичкиот земјоделец, тој што ве носеше на раце во кампањата, денес гледа во небо и се прашува со што ќе го храни детето.

Струмичкиот земјоделец памти што ветувате.

Од ветуваното ништо, напротив го уништивте и тоа што беше добро.

Во кабинетот на министерот и до вас остана само криминалот кој секојдневно се потврдува со пресуди.

Реагирајте навремено и брзо, затоа што секојдневно ја оставате државата и граѓаните гладни и сиромашни.

ОО СДСМ Струмица денес одржа исклучително продуктивен и инспиративен состанок со членовите на Извршниот и Надзорниот одбор од Струмица.

Имавме чест да оствариме средба со нашиот гостин од Централното раководство, Симона Цветаноски, при што заеднички ги дефиниравме насоките за наредниот период и ја зацврстивме соработката во рамки на нашата организација.

Состанокот беше исполнет со прогресивни идеи, конструктивни дискусии и јасна визија за понатамошен развој и унапредување на работата на партијата на локално ниво.

Денес го спомнуваме и одаваме почит кон ликот и делото на Гоце Делчев, кон човекот кој ја вгради идејата за слободна, праведна и достоинствена Македонија во темелите на нашата историја.

Гоце Делчев беше визионер, учител и борец.

Неговата мисла и дело и денес се патоказ, дека борбата за правда, еднаквост и напредок никогаш не престанува.

Нема отстапување од вредностите за кои се бореше Делчев.

Македонија мора да се гради со работа, чесност и грижа за секој граѓанин.

Нека е вечен споменот за Гоце Делчев.

СООПШТЕНИЕ ДО ЈАВНОСТА

Додека чесните граѓани на Струмица се борат за основна егзистенција, а младите си ги пакуваат куферите барајќи чаре во туѓина, во Општина Струмица на дело гледаме бесрамна, брутална и деструктивна партизација.

Борбата за Струмуца очигледно не беше за граѓаните, туку за удобно сместување на одредени фамилии.

Затоа, јавно го прашуваме градоначалникот:
Дали Општина Струмица има за цел да им служи на граѓаните или служи како приватна агенција за вработување на семејството на неговиот „секретар во сенка“?

Фактите се поразителни.

Главниот „архитект“: Господинот Мрнгозов, кој неофицијално дејствува како „секретар во сенка“ на Општината, не се задоволи само со таа моќ.
Тој дополнително е инсталиран и како член на Управниот одбор на ЈПКД „Комуналец“.

Сопругата: Згрижена на државна плата во Матичната служба.

Сестрата: Удобно сместена во јавното претпријатие „Струмица Гас“.

Таткото: Поставен за член на комисија, за да се осигура дека ниеден семеен интерес нема да биде пропуштен.

Ова е класичен пример на политички канцер кој ги јаде институциите одвнатре.

Која е пораката што ја испраќате до струмичани?
Дека за работа не треба диплома, знаење или труд, туку само да се биде дел од „правилното“ семејство блиско до власта?

Бараме итни одговори:

Кои се квалификациите на овие лица, освен нивната крвна врска со „секретарот во најава“?

Дали постои барем една институција во градот каде што не е инсталиран член на ова семејство?

До кога граѓаните ќе го плаќаат овој приватен семеен бизнис маскиран во локална самоуправа?

Дали вашите сопартијци за ова се бореа?

Време е да се стави крај на ова понижување на Струмица.

Одговорноста за овој скандал мора да биде итна и неотповиклива оставка!