29/12/2025
နှစ်သစ်ကူးညမှာ စပျစ်သီးစားတာ ဒါမှမဟုတ် ဘစ်အနီဝတ်တာတွေက လူသိများပြီးသား Trend တွေဆိုပေမဲ့ တကယ်တော့ ကမ္ဘာ့အနှံ့မှာ ကျွန်မတို့ မထင်မှတ်ထားလောက်အောင် ထူးဆန်းတဲ့ ရိုးရာဓလေ့တွေ ရှိနေပါသေးတယ်။ တစ်နိုင်ငံနဲ့ တစ်နိုင်ငံ ကံကောင်းခြင်းကို ဖမ်းဆုပ်ပုံချင်း မတူကြပေမဲ့ အားလုံးရဲ့ ရည်ရွယ်ချက်ကတော့ နှစ်သစ်မှာ အရာရာ အသစ်ဖြစ်ပြီး အကောင်းဆုံးတွေ ဖြစ်လာဖို့ပါပဲ။ ဒီနှစ်မှာတော့ စပျစ်သီးစားရုံနဲ့ အားမရသေးဘူးဆိုရင် တခြားနိုင်ငံတွေက ဘယ်လိုထူးထူးဆန်းဆန်းတွေ လုပ်ကြသလဲဆိုတာ ကြည့်လိုက်ရအောင်။
၁။ ပန်းကန်ကွဲလေ ကံကောင်းလေ (ဒိန်းမတ်နိုင်ငံ)
ဒိန်းမတ်မှာတော့ နှစ်သစ်ကူးညဆို သူငယ်ချင်းတွေရဲ့ အိမ်ရှေ့မှာ ပန်းကန်ပြားတွေ သွားရိုက်ခွဲတဲ့ ဓလေ့ရှိပါတယ်။ အိမ်ရှေ့မှာ ပန်းကန်ကွဲတွေပုံနေရင် စိတ်ဆိုးဖို့နေနေသာသာ "ငါ့မှာ မိတ်ဆွေပေါပါလား" ဆိုပြီး ဂုဏ်ယူကြတာပါ။ ပန်းကန်ကွဲလေလေ၊ ရှေ့နှစ်မှာ ကံကောင်းလေလေလို့ သူတို့က ယုံကြည်ကြပါတယ်။
၂။ ခရီးထွက်ချင်ရင် Suitcase ဆွဲပြီး ပြေးပါ။ (ကိုလံဘီယာနိုင်ငံ)
ခရီးသွားရတာ ဝါသနာပါတဲ့သူတွေအတွက် ဒီဓလေ့က အလိုက်ဖက်ဆုံးပဲ။ ကိုလံဘီယာမှာတော့ ၁၂ နာရီထိုးတာနဲ့ ခရီးဆောင်အိတ် (Suitcase) အလွတ်ကို ဆွဲပြီး အိမ်ပတ်ပတ်လည် ပတ်ပြေးကြပါတယ်။ ဒီလိုလုပ်ရင် ရှေ့နှစ်ထဲမှာ ခရီးတွေ အများကြီး ထွက်ရလိမ့်မယ်လို့ အယူရှိကြတာပါ။
၃။ ကြက်သွန်နီနဲ့ ခေါင်းကိုရိုက်ပြီး နှိုးခြင်း (ဂရိနိုင်ငံ)
ဂရိလူမျိုးတွေအတွက် ကြက်သွန်နီက "ပြန်လည်ရှင်သန်ခြင်း" ရဲ့ သင်္ကေတပါ။ နှစ်သစ်ကူးမနက်မှာ မိဘတွေက သူတို့သားသမီးတွေကို ကြက်သွန်နီနဲ့ ခေါင်းကို ခပ်ဖွဖွလေးရိုက်ပြီး နှိုးလေ့ရှိပါတယ်။ အိမ်တံခါးမှာလည်း ကြက်သွန်နီတွေ ချိတ်ဆွဲထားပြီး ကျန်းမာရေးနဲ့ ကံကောင်းခြင်းတွေကို ဖိတ်ခေါ်ကြတာပါ။
၄။ အဟောင်းတွေကို ပြတင်းပေါက်ကနေ လွှင့်ပစ်ခြင်း (အီတလီနိုင်ငံ)
အီတလီနိုင်ငံရဲ့ တချို့မြို့တွေမှာတော့ နှစ်သစ်ကူးညမှာ အသုံးမလိုတော့တဲ့ ပစ္စည်းဟောင်းတွေ၊ အိုးခွက်ပန်းကန်ဟောင်းတွေကို ပြတင်းပေါက်ကနေ လမ်းပေါ်ကို လွှင့်ပစ်တတ်ကြပါတယ်။ "အဟောင်းတွေကို စွန့်ထုတ်မှ အသစ်တွေ ဝင်လာမယ်" ဆိုတဲ့ အယူအဆပါ။ (ဒါပေမဲ့ အောက်ကဖြတ်သွားတဲ့သူတွေကိုတော့ သတိထားရမှာပေါ့နော်)။
၅။ ရေခဲရေထဲ ငုတ်လျှိုးခြင်း (ကနေဒါနဲ့ အမေရိကန်)
ဒါကတော့ "Polar Bear Plunge" လို့ ခေါ်တဲ့ အေးစိမ့်နေတဲ့ ရေခဲရေထဲကို ငုတ်လျှိုးတဲ့ ဓလေ့ပါ။ နှစ်သစ်ရဲ့ ပထမဆုံးနေ့မှာ ဒီလို ရေအေးအေးထဲ ဆင်းလိုက်တာဟာ ကိုယ့်ရဲ့ စိတ်ဓာတ်ကို ကြံ့ခိုင်စေပြီး အညစ်အကြေးတွေကို ဆေးကြောသန့်စင်လိုက်တာလို့ ယူဆကြပါတယ်။
ကဲ... ကမ္ဘာတစ်ဝှမ်းက ဒီဓလေ့တွေထဲမှာ သင်ရော ဘယ်အချက်ကို အကြိုက်ဆုံးလဲ? စပျစ်သီးစားမလား? Suitcase ဆွဲပြေးမလား? ဘာပဲလုပ်လုပ် နှစ်သစ်မှာ အထာကျကျနဲ့ လှပနေဖို့ကတော့ အဓိကပဲပေါ့ 😉
