28/10/2026
“စက်တင်ဘာလအတွင်း နိုင်ငံရေးအကျဉ်းသူများအား စောင့်ရှောက်မှုပေးခြင်း”
၂၀၂၆ ခုနှစ်၊ စက်တင်ဘာလတွင် နိုင်ငံရေးအကျဉ်းသူများအဖွဲ့မှ မြန်မာနိုင်ငံတွင်း နိုင်ငံရေးအကျဉ်းသူများ မတရားဖမ်းဆီးချုပ်နှောင်ခံထားရသည့် အကျဉ်းထောင် (၈) ထောင်ရှိ နိုင်ငံရေးအကျဉ်းသူ (၇၀) ဦးအား စျေးဘားထောက်ပံ့ခြင်း၊ အကျဉ်းထောင်အတွင်းရှိ နိုင်ငံရေးအကျဉ်းသူ (၁) ဦးအား ကျန်းမာရေးစောင့်ရှောက်မှုပေးခြင်း၊ လွတ်မြောက်လာသည့် နိုင်ငံရေးအကျဉ်းသူ (၂) ဦးအား ကျန်းမာရေးစောင့်ရှောက်ခြင်း၊ နိုင်ငံရေးအကျဉ်းသူ (၁) ဦးအား အရေးပေါ်စားစရိတ် ထောက်ပံ့ခြင်းများ ပြုလုပ်ပေးနိုင်ခဲ့ပါသည်။
မိသားစုဝင်များမှ ထောင်ဝင်စာပါဆယ်နှင့် စျေးဘားပေးပို့ရန် အခက်အခဲရှိနေသည့် နိုင်ငံရေးအကျဉ်းသူ (၇၀) ဦးအား တစ်ဦးလျှင် မြန်မာကျပ်ငွေ (၉၆,၈၉၉) ကျပ်နှုန်းဖြင့်လည်းကောင်း၊ အကျဉ်းထောင်အတွင်း ကျန်းမာရေးစောင့်ရှောက်ရန် လိုအပ်လျက်ရှိသည့် နိုင်ငံရေးအကျဉ်းသူ (၁) ဦးအား မြန်မာကျပ်ငွေ (၂၅၈,၃၉၇) ကျပ်နှုန်းဖြင့်လည်းကောင်း၊ အကျဉ်းထောင်အသီးသီးမှ ပြန်လည်လွတ်မြောက်လာသည့် နိုင်ငံရေးအကျဉ်းသူ (၂) ဦးအား ကျန်းမာရေးစောင့်ရှောက်မှုအတွက် တစ်ဦးလျှင် မြန်မာကျပ်ငွေ (၂၀၀၀၀၀) ကျပ်နှုန်းဖြင့်လည်းကောင်း၊ ပြန်လည်လွတ်မြောက်လာသည့် နိုင်ငံရေးအကျဉ်းသူ (၁) ဦးအား အရေးပေါ် စားစရိတ်အတွက် ထိုင်းဘတ်ငွေ (၁,၅၀၀) ဘတ်နှုန်းဖြင့်လည်းကောင်း ထောက်ပံ့ပေးနိုင်ခဲ့ပါသည်။
လက်ရှိတွင် မြန်မာနိုင်ငံတဝှမ်း အကျဉ်းထောင်များအတွင်း နိုင်ငံရေးအကျဉ်းသူ ၅၀၀၀ ဝန်းကျင် ဖမ်းဆီးခံထားရဆဲဖြစ်သည်။ အကျဉ်းထောင်များအတွင်းတွင် အမျိုးသမီးများသည် အကျဉ်းထောင်မှပေးသော ကျန်းမာရေးစောင့်ရှောက်မှု လုံလောက်စွာမရရှိခြင်း၊ ပြင်ပမှ လိုအပ်သော ဆေးဝါးများအား မရရှိနိုင်ခြင်း၊ သန့်ရှင်းရေးနှင့် သောက်သုံးရေအခက်အခဲများ၊ အမျိုးသမီးကျန်းမာရေးနှင့်ဆိုင်သော ဆေးဝါး/အကူအညီ လုံလောက်စွာမရရှိခြင်း၊ လူ့အခွင့်အရေးချိုးဖောက်ခံရမှုများ၊ နှိပ်စက်ညှင်းပန်းမှုများ၊ အကြောင်းအမျိုးမျိုးပြ ခြိမ်းခြောက်ခံရမှုများစသည့် ပြင်းထန်သော အခက်အခဲအမျိုးမျိုးကို ကြုံတွေ့နေရဆဲဖြစ်သည်။
နိုင်ငံရေးအကျဉ်းသူများအဖွဲ့သည် နိုင်ငံရေးအကျဉ်းသူများ၏ စားဝတ်နေရေးအခက်အခဲများ၊ ကျန်းမာရေးအခက်အခဲများနှင့် အကျဉ်းထောင်အတွင်း လူ့အခွင့်အရေးချိုးဖောက်ခံရမှု၊ ဖိနှိပ်ခံရမှုများကို ဖော်ထုတ်ပေးနိုင်ရန် ရည်ရွယ်ကာ ဖွဲ့စည်းထားခြင်းဖြစ်သည့်အတွက် အခက်အခဲအမျိုးမျိုးကြားမှ နိုင်ငံရေးအကျဉ်းသူများအရေးကိစ္စများကို မိတ်ဖက်အဖွဲ့အစည်းများ၊ မိဘပြည်သူများ၏ ကူညီထောက်ပံ့မှုများဖြင့် ဆောင်ရွက်လျက်ရှိပါသည်။
၂၀၂၁ ခုနှစ်၊ ဖေဖော်ဝါရီလ ၁ ရက် အကြမ်းဖက်စစ်တပ်အာဏာသိမ်းပြီးချိန်မှစ၍ ယခုလက်ရှိအချိန်ထိ မြန်မာနိုင်ငံ နေရာအနှံ့အပြားရှိ အကျဉ်းထောင်အသီးသီးတွင် မတရားဖမ်းဆီးခံထားရသည့် နိုင်ငံရေးအကျဉ်းသူများနှင့် ပြန်လည်လွတ်မြောက်လာသည့် နိုင်ငံရေးအကျဉ်းသူဟောင်းများကို အကူအညီပေးလိုပါက နိုင်ငံရေးအကျဉ်းသူများအဖွဲ့မှတစ်ဆင့် ဆက်သွယ်လှူဒါန်းနိုင်ပါသည်။
အောက်တိုဘာလ (၂၈) ရက်နေ့၊ ၂၀၂၆ ခုနှစ်။
နိုင်ငံရေးအကျဉ်းသူများအဖွဲ့။
#နိုင်ငံရေးအကျဉ်းသူ
