YLI Young Learners Institute

20/09/2026

20/09/2026

အပိုင်း (၁)
ဆူပူအော်ဟစ်စရာမလိုဘဲ ကလေးတွေ သဘောကျမယ့် Non-Verbal Attention Getters (၃) ခု

မင်္ဂလာပါရှင်။ TEC ရဲ့ Teacher Training Series ကနေ ပြန်လည် ကြိုဆိုလိုက်ပါတယ်ရှင်။ ကျောင်းဖွင့်စ ပထမပတ်တွေမှာ ဆရာ၊ ဆရာမတွေ အကြုံရဆုံး စိန်ခေါ်မှုက ဘာဖြစ်မလဲရှင်။

ဟုတ်ပါတယ်။ "တီချယ်တို့ စကားပြောမယ်နော်၊ တိတ်တိတ်နေကြပါ" လို့ ဘယ်လောက်ပဲ အော်အော်၊ ကလေးတွေက ကစားလို့ ကောင်းတုန်း၊ သူငယ်ချင်းအသစ်တွေနဲ့ စကားပြောလို့ ကောင်းတုန်းပါပဲ။

အတန်းကို ငြိမ်စေချင်လို့ ခဏခဏ အော်ဟစ် ဆူပူရတဲ့အခါ ကျွန်မတို့လည်း အသံဝင် လူပင်ပန်းရသလို၊ ကလေးတွေနဲ့ ကြားမှာလည်း အစကတည်းက စိမ်းသက်မှုတွေ စတင်လာတတ်ပါတယ်။

Classroom Management စိတ်ပညာအရ ကလေးတွေကို "တိတ်တိတ်နေ" လို့ အမိန့်ပေးတာထက်၊ သူတို့ရဲ့ အာရုံစူးစိုက်မှုကို စိတ်ဝင်စားစရာ အပြုအမူတစ်ခုခုနဲ့ ဖမ်းစားလိုက်တာက ပိုပြီး ထိရောက်မှု ရှိပါတယ်။

ဒီနေ့မှာတော့ အော်ဟစ်စရာမလိုဘဲ ကလေးတွေရဲ့ အာရုံကို ချက်ချင်းရစေမယ့် လက်တွေ့ကျတဲ့ Non-Verbal Attention Getters (၃) ခုကို မျှဝေပေးချင်ပါတယ်။

(၁) စည်းချက် တုန့်ပြန်မှု ဖန်တီးပါ
ကလေးတွေကို နှုတ်ကနေ တိတ်တိတ်နေဖို့ အော်ပြောမယ့်အစား တီထွင်ဖန်တီးထားတဲ့ လက်ခုပ်သံ အတိုလေး တစ်ခု တီးပြလိုက်ပါ။ ပြီးရင် ကလေးတွေကို အဲဒီအတိုင်း လိုက်တီးခိုင်းပါ။ ကျွန်မတို့ဘက်က အသံကျယ်ကျယ် ထွက်စရာ မလိုဘဲ လက်ခုပ်သံရဲ့ စည်းချက်ကြောင့် ကလေးတွေက ကျွန်မတို့ဆီကို အလိုအလျောက် အာရုံ ပြန်ရောက်လာပါလိမ့်မယ်။

(၂) မီးခလုတ် သို့မဟုတ် ခေါင်းလောင်းသံကို သုံးပါ
အတန်းထဲမှာ ကလေးတွေ အရမ်း ဆူညံလာတဲ့အခါ အတန်းရှေ့က မီးခလုတ်ကို တစ်ချက်၊ နှစ်ချက် အဖွင့်အပိတ် လုပ်ပြလိုက်ပါ သို့မဟုတ် အသံချိုချို ခေါင်းလောင်းလေး တစ်ခုကို တီးလိုက်ပါ။ ကလေးတွေကို ကြိုတင်ပြီး "တီချယ် မီးအဖွင့်အပိတ်လုပ်ရင် သို့မဟုတ် ခေါင်းလောင်းတီးရင် တီချယ်တို့ဆီ အာရုံစိုက်ရမယ့် အချိန်နော်" လို့ ကတိကဝတ် လုပ်ထားခြင်းအားဖြင့် အော်စရာမလိုဘဲ အတန်းကို စနစ်တကျ ထိန်းကျောင်းနိုင်ပါတယ်။

(၃) လက်ဟန်ခြေဟန် အချက်ပြစနစ်
အတန်းရှေ့မှာ ရပ်ပြီး လက်ဖဝါးကို ဖြန့်ပြီး အပေါ်ကို မြှောက်ပြလိုက်ပါ။ ကလေးတစ်ယောက်ချင်းစီက ကျွန်မတို့ လက်မြှောက်တာ မြင်တာနဲ့ သူတို့ပါ လိုက်မြှောက်ပြီး စကားပြောတာကို ရပ်ရပါမယ်။ လက်ချောင်း (၅) ချောင်းရဲ့ အဓိပ္ပာယ်ကတော့ မျက်စိက ဆရာမကိုကြည့်၊ ပါးစပ်ကပိတ်၊ နားကနားထောင်၊ လက်တွေ ငြိမ်ငြိမ်ထား၊ ခြေထောက်တွေ ငြိမ်ငြိမ်ထားပဲ ဖြစ်ပါတယ်။

ဒီနည်းလမ်းလေးတွေက ကျွန်မတို့ရဲ့ တစ်နေ့တာ ကုန်ဆုံးမယ့် စွမ်းအင်ကို သက်သာစေရုံတင်မကဘဲ စာသင်ခန်းကို ပျော်စရာကောင်းပြီး စနစ်ကျတဲ့ ပတ်ဝန်းကျင်တစ်ခု ဖြစ်လာစေပါတယ်။

ဆရာ၊ ဆရာမတို့ကော ... အတန်းထဲမှာ ကလေးတွေ ဆူညံလာတဲ့အခါ အသံ မသုံးဘဲ ငြိမ်သွားအောင် ဘယ်လို နည်းလမ်းဆန်းလေးတွေ သုံးလေ့ရှိကြပါသလဲ။ Comment မှာ မျှဝေပေးသွားပါဦး။

ဆူညံနေတဲ့ အတန်းကို အော်စရာမလိုဘဲ ထိန်းသိမ်းပြီးပြီဆိုရင်တော့ နောက်တစ်ဆင့်အနေနဲ့ ကျောင်းဖွင့်စ ပထမဆုံးရက်တွေမှာ ကလေးတွေ အချင်းချင်းရော၊ ဆရာ၊ ဆရာမနဲ့ပါ အမြန်ဆုံး ရင်းနှီးသွားအောင် လုပ်ဖို့ လိုအပ်လာပါပြီ။

မနက်ဖြန် အပိုင်း (၂) မှာတော့ ပထမဆုံးရက်မှာ စာအုပ်ကြီးအတိုင်း တန်းသင်မယ့်အစား ကလေးတွေ အချင်းချင်း နာမည်တွေ အလွယ်တကူ မှတ်မိပြီး ရင်းနှီးပျော်ရွှင်သွားစေမယ့် Name-Learning Icebreakers အကြောင်းကို မျှဝေပေးသွားမှာမို့ စောင့်မျှော်ပေးကြပါဦးရှင်။

Teaching English with Confidence - TEC
(Transforming Education for Life.)

ကလေးတစ်ယောက်ချင်းစီရဲ့ ကမ္ဘာလေးကို အတူတူ နားလည်ပျိုးထောင်ပေးကြရအောင်။

20/09/2026