Royal Embassy of Cambodia in Yangon

ឯកឧត្ដម ចេង ម៉ានិត ឯកអគ្គរាជទូតកម្ពុជា អមដោយលោក សួស សង្វាត លេខាធិការទី១ នៃស្ថានទូត បានទទួលជួបសម្ដែងការគួរសមរបស់ឯកឧត្តម Segundo Martin Calero ឯកអគ្គរដ្ឋទូតនីហ្ការ៉ាកា នៅថ្ងៃទី២៣ ខែមេសា ឆ្នាំ២០២៦ នៅស្ថានទូតកម្ពុជា ទីក្រុងយ៉ាងហ្គូន។ ភាគីទាំងពីរបានពិភាក្សាពីការជំរុញកិច្ចសហប្រតិបត្តិការទ្វេភាគីររវាងកម្ពុជា និងនីហ្ការ៉ាកា លើវិស័យសេដ្ឋកិច្ច ពាណិជ្ជកម្ម វិនិយោគ និងទេសចរណ៍ ព្រមទាំងបានផ្លាស់ប្តូរទស្សនៈគ្នាលើបញ្ហាសភាពការណ៍សន្តិសុខ សេដ្ឋកិច្ច-សង្គម នៅប្រទេសមីយ៉ាន់ម៉ា និងអន្តរជាតិ។ ឯកឧត្តម ចេង ម៉ានិតបានជម្រាបជូនពីការវិវត្តថ្មីៗពាក់ព័ន្ធនឹងស្ថានភាពជម្លោះព្រំដែនកម្ពុជា-ថៃ និងបានស្នើភាគីនីហ្ការ៉ាកា និងសហគមន៍អន្តរជាតិជួយជំរុញភាគីថៃដោះស្រាយជម្លោះព្រំដែនជាមួយកម្ពុជាដោយសន្តិវិធី និងផ្អែកលើច្បាប់អន្តរជាតិ ដែលជាមធ្យោបាយសំខាន់បំផុតសម្រាប់ស្តារទំនាក់ទំនងមិត្តភាពទ្បើងវិញ និងសន្តិភាពយូរអង្វែងរវាងប្រទេសកម្ពុជា និងថៃ។

ទូលព្រះបង្គំយើងខ្ញុំជាមន្ដ្រីការទូត និងបុគ្គលិកទាំងអស់ នៃស្ថានឯកអគ្គរាជទូតកម្ពុជាប្រចាំសាធារណរដ្ឋសហភាពមីយ៉ាន់ម៉ា សូមគោរពបួងសួងដល់គុណបុណ្យព្រះរតនត្រ័យទាំងបី និងបារមីវត្ថុសក្ដិសិទ្ធិទាំងអស់ ដែលថែរក្សាព្រះរាជាណាចក្រកម្ពុជា​ និងទេវតាឆ្នាំថ្មី សូមមេត្តាប្រោះព្រំព្រះរាជសព្ទសាធុការពរជ័យថ្វាយ ព្រះករុណាជាអម្ចាស់ជីវិតលើត្បូង ជាទីគោរពសក្ការៈដ៏ខ្ពង់ខ្ពស់បំផុត សូមព្រះអង្គមានព្រះរាជសុខភាពល្អបរិបូរណ៍ទ្បើងវិញពីការព្យាបាលព្រះរោគទាំងអស់ និងមានព្រះជន្មាយុយឺនយូរជាងរយព្រះវស្សា ដើម្បីគង់ប្រថាប់ជាម្លប់ដ៏ត្រជាក់ត្រជំ និងសម្បូរសប្បាយ ដល់កូនចៅ ចៅទួត និងប្រជារាស្រ្តរបស់ព្រះអង្គជានិច្ចនិរន្តរ៍តរៀងទៅ 🙏❤️🙏🏻

នៅថ្ងៃទី១៣ ខែមេសា ឆ្នាំ២០២៦ ឯកឧត្ដម ចេង ម៉ានិត ឯកអគ្គរាជទូតកម្ពុជាប្រចាំប្រទេសមីយ៉ាន់ម៉ា និងមន្រ្តីស្ថានទូតកម្ពុជាបានចុះសួរសុខទុក្ខ ចូលថ្វាយបង្គំ និងបានប្រគេនបច្ច័យ ទេយ្យវត្ថុ និងចង្ហាន់ ព្រមទាំងរាប់បាតដល់ព្រះសង្ឃខ្មែរ-មីយ៉ាន់ម៉ា ចំនួន ២៨ អង្គ នៅវត្តខ្មែរ-ភូមាកម្ពុជរង្សី នៅទីក្រុង យ៉ាងហ្គូន។ យើងខ្ញុំទាំងអស់គ្នាសូមឧទ្ទិសកុសលផលបុណ្យជូនដល់ដួងវិញ្ញាណក្ខន្ធជីដូនជីតា បុព្វការីជន ញាតកាទាំង ៧ សន្តាន និងយុទ្ធជនពលីក្នុងសមរភូមិជួរមុខ ដែលបានចែកឋានទៅកាន់លោកខាងមុខ ព្រមទាំងបានបួងសួងសូមឲ្យប្រទេសកម្ពុជា ជួបតែសុខសន្តិភាព និងវិបុលភាព។
សូមអនុមោទនាបុណ្យគ្រប់ៗគ្នា 🙏🙏🙏

នៅថ្ងៃទី១០ ខែមេសា ឆ្នាំ២០២៦ ឯកឧត្ដម ចេង ម៉ានិត ឯកអគ្គរាជទូតកម្ពុជាបានចូលរួមអម ឯកឧត្តមកិត្តិសេដ្ឋាបណ្ឌិត ចម ប្រសិទ្ធ ឧត្តមប្រឹក្សាផ្ទាល់ព្រះមហាក្សត្រ និងជាប្រេសិតពិសេសរបស់រាជរដ្ឋាភិបាល ដើម្បីគាំទ្រដល់ការងារទំនាក់ទំនងជាមួយថ្នាក់ដឹកនាំ នៃបណ្តាប្រទេសសមាជិកអាស៊ាន និងប្រធានអាស៊ាន អញ្ជើញ៖ ១) ចូលរួមពិធីស្បថចូលកាន់តំណែងរបស់ប្រធានាធិបតី នៃសាធារណរដ្ឋសហភាពមីយ៉ាន់ម៉ា ដែលបានប្រព្រឹត្តទៅនៅវិមានរដ្ឋសភា Pyidaungsu Hluttaw នៅទីក្រុងណៃពិដោ និង ២) ចូលជួបសម្តែងការគួរសមជាមួយឯកឧត្តម មីន អោង ឡាំង ប្រធានាធិបតីមីយ៉ាន់ម៉ា នៅវិមានប្រធានាធិបតីមីយ៉ាន់ម៉ា និងឯកឧត្តម U Tin Maung Swe រដ្ឋមន្ត្រីការបរទេសថ្មីមីយ៉ាន់ម៉ា នៅសណ្ឋាគារ Jasmine។ នៅក្នុងជំនួបទំាងពីរនេះ ភាគីទាំងពីរបានពិភាក្សាអំពីការពង្រឹងពង្រីកកិច្ចសហប្រតិបត្តិការលើគ្រប់វិស័យបន្ថែមទៀតរវាងកម្ពុជា និងមីយ៉ាន់ម៉ា ជាពិសេសក្នុងផ្នែកពាណិជ្ជកម្ម វិនិយោគ និងទេសចរណ៍។

នៅថ្ងៃទី២៦ ខែមីនា ឆ្នាំ២០២៦ ឯកឧត្ដម ចេង ម៉ានិត ឯកអគ្គរាជទូតកម្ពុជា អមដោយលោក សួស សង្វាត លេខាធិការទី១ នៃស្ថានទូតបានទទួលជំនួបសម្ដែងការគួរសមរបស់ឯកឧត្តម Tarif Karim ឯកអគ្គរដ្ឋទូតប៉ាគីស្ថានប្រចាំនៅសាធារណរដ្ឋសហភាពមីយ៉ាន់ម៉ា នៅស្ថានឯកអគ្គរដ្ឋទូតកម្ពុជា នៅក្នុងទីក្រុង យ៉ាងហ្គូន។ ភាគីទាំងពីរបានពិភាក្សាពីការជំរុកិច្ចសហប្រតិបត្តិការទ្វេភាគីររវាងកម្ពុជា និងប៉ាគីស្ថានលើវិស័យសេដ្ឋកិច្ច ពាណិជ្ជកម្ម វិនិយោគ និងទេសចរណ៍ ព្រមទាំងបានផ្លាស់ប្តូរទស្សនៈគ្នាលើបញ្ហាសភាពការណ៍ សន្តិសុខ សេដ្ឋកិច្ច សង្គម នៅមីយ៉ាន់ម៉ា និងអន្តរជាតិ។ ឯកឧត្តម ចេង ម៉ានិត បានជម្រាបជូនពីការវិវត្តថ្មីៗពាក់ព័ន្ធនឹងស្ថានភាពជម្លោះព្រំដែនកម្ពុជា-ថៃ និងបានស្នើភាគី ប៉ាគីស្ថាន និងសហគមន៍អន្តរជាតិជួយជំរុញភាគីថៃដោះស្រាយជម្លោះព្រំដែនជាមួយកម្ពុជាដោយសន្តិវិធី និងច្បាប់អន្តរជាតិ។

ថ្ងៃទី១៧ ខែមីនា ឆ្នាំ២០២៥ ឯកឧត្ដម ចេង ម៉ានិត ឯកអគ្គរាជទូតកម្ពុជា អមដោយលោក សួស សង្វាត លេខាធិការទី១ នៃស្ថានទូត និង លោក គីម ប៊ុនសុជាតិ Chief Executive Officer of ACLEDA MFI Myanmar Co., Ltd បានទទួលជួបសម្ដែងការគួរសមរបស់លោកស្រី Khin Zin Mar Win, Vice President of uab Bank នៅស្ថានទូតកម្ពុជាទីក្រុង យ៉ាងហ្គូន។ ឯកឧត្តម ចេង ម៉ានិតបានជម្រាបជូនពីទំនាក់ទំនងល្អជាប្រវត្តិសាស្រ្ត និងទំនាក់ទំនងកាន់តែល្អប្រសើរថែមទៀតរវាងរដ្ឋាភិបាលនៃប្រទេសទាំងពីរក្នុងក្របខណ្ឌទ្វេភាគី អាស៊ាន និងអន្តរជាតិ និងពីស្ថានភាពសុខសន្តិភាព ការរីកចម្រើនសេដ្ឋកិច្ច និងសង្គម សក្តានុពលនៃការវិនិយោគនៅកម្ពុជា។ ឯកឧត្តម ចេង ម៉ានិតបានស្នើលោកស្រី Khin Zin Mar Win ពិនិត្យលទ្ធភាពនៃការពង្រីកកិច្ចសហប្រតិបតិ្តការធនាគារ uab ជាមួយដៃគូធនាគារនៅកម្ពុជា ដើម្បីផ្តល់ភាពងាយស្រួលដល់ការជំរុញទំនាក់ទំនងពាណិជ្ជកម្ម និងវិនិយោគបន្ថែមទៀតរវាងកម្ពុជា និងមីយ៉ាន់ម៉ា។

អបអរសាទរ ទិវាវប្បធម៌ជាតិ ៣មីនា លើកទី២៨ ឆ្នាំ២០២៦ ក្រោមប្រធានបទ យុវជនដើម្បីវប្បធម៌ជាតិ! 🇰🇭