MCAA

ИРГЭНИЙ НИСЭХИЙН ЕРӨНХИЙ ГАЗАР ТҮҮХТ 101 ЖИЛИЙН ОЙН БАЯРЫН ХУРЛАА ХИЙЛЭЭ.

📌Монгол Улсад нисэх хүчин үүсэж хөгжсөний түүхт 101 жилийн ой, “Иргэний агаарын тээвэрчдийн өдөр”-ийн баярын хурал өнөөдөр (2026.05.25) ЗТЯ-ны “Их нүүдэл” танхимд боллоо. Баярын хуралд Монгол Улсын Их Хурлын гишүүн, Зам, тээврийн сайд Б.Дэлгэрсайхан, ЗТЯ-ны Төрийн нарийн бичгийн дарга М.Баярмагнай тэргүүтэй төлөөлөгчид, Иргэний нисэхийн ерөнхий газар, нисэхийн салбарын удирдлагууд, ахмад ажилтнууд, агаарын тээвэрлэгч байгууллагуудын төлөөлөл, албан хаагчид өргөнөөр оролцлоо.

📌Энэ үеэр Зам, тээврийн сайд Б.Дэлгэрсайхан иргэний нисэхийн салбарын нийт хамт олонд түүхт 101 жилийн ойн баярын мэндийг хүргэж, салбарынхаа хөгжилд үнэтэй хувь нэмэр оруулж буй агаарын тээвэрчдийн хөдөлмөр зүтгэлийг өндрөөр үнэлэн талархал илэрхийллээ.

📌Тэрбээр хэлсэн үгэндээ, Монгол Улсын иргэний нисэхийн салбар Олон улсын иргэний нисэхийн байгууллага (ICAO)-ын бүрэн хэмжээний аудит шалгалтад амжилттай хамрагдаж, аюулгүй байдлын хяналт, зохицуулалтын тогтолцоог олон улсын түвшинд өндрөөр үнэлүүлсэн нь салбарын төдийгүй улсынхаа нэр хүндийг өндөрт өргөсөн чухал амжилт болсныг онцлон тэмдэглэлээ.

📌Мөн энэхүү амжилт нь иргэний нисэхийн салбарын нийт хамт олны олон жилийн хөдөлмөр, сахилга хариуцлага, мэргэжлийн ур чадвар, хамтын ажиллагааны бодит үр дүн гэдгийг онцолж, цаашид олон улсын жишигт нийцсэн иргэний нисэхийн аюулгүй байдлын тогтолцоог улам боловсронгуй болгон, агаарын навигаци, нисэх буудлын үйлчилгээ, агаарын тээвэрлэгчдийн өрсөлдөх чадварыг нэмэгдүүлэх чиглэлээр бодлогын дэмжлэг үзүүлэн ажиллахаа илэрхийллээ.
Түүнчлэн салбарын сайдын зүгээс өнгөрсөн онд Монгол Улс агаарын тээврээр 2.4 сая зорчигч тээвэрлэж, дөрвөн улстай агаарын харилцааны хэлэлцээр шинээр байгуулан олон улсын 50, орон нутгийн 8 чиглэлд тогтмол болон захиалгат нислэг үйлдсэн нь салбарын өсөлт, хөгжил эрчимжиж буйг харуулж байгааг дурдлаа.

📌Мөн цаашид ИНЕГ-ыг төрийн байгууллагын тусгай чиг үүрэг буюу иргэний нисэхийн салбарын ажил мэргэжлийн онцлог, тодорхой чиг үүргийг Засгийн газрын бодлого шийдвэрийн дагуу илүү тодорхой болгож, холбогдох хууль эрхзүйн орчныг илүү боловсронгуй болгож, энэ салбарт ажиллаж буй алба хаагчдын ажиллах орчин нөхцөл, авч буй цалин хөлс, нийгмийн асуудлыг шийдвэрлэхэд онцгой анхаарч ажиллах болно гэсэн байр суурийг илэрхийллээ.

📌Баярын хуралд, Иргэний нисэхийн ерөнхий газрын дарга Э.Төрбаяр үг хэллээ. Тэрбээр “Миний бие ИНЕГ-ын удирдлагаар ажиллаад 1.5 жилийн хугацааг үдэж байна. Бага хугацаа боловч энэ хугацаанд бид салбарын 100 жилийн ойгоо амжилт бүтээлээр дүүрэн угтаж, 16 жилийн дараа Олон улсын иргэний нисэхийн байгууллагын иж бүрэн аудитын шалгалтад амжилттай хамрагдаж, урьдчилсан үнэлгээгээр амжилттай дүгнүүлсэн зэрэг олон чухал ажлуудын ард хамтдаа гарлаа. Энэ бүхнээс зорилго зүтгэл нэгтэй хамтарч ажиллаж чадвал бид салбартаа олон зүйлийг бүтээх нөөц боломж байгааг онцлон тэмдэглэж байна.

📌Монгол Улсын Засгийн газар болон ЗТЯ-наас иргэний нисэхийн салбарын техник технологи, хүний нөөцийг бодлогоор дэмжин ажиллаж буй онцгой цаг үед бид ажиллаж байна. Өнөөдөр бид түүхт 101 жилийн ойгоо тэмдэглэж байгаа нь иргэний нисэхийн салбарын хөгжил, дэвшлийн шинэ зуун жилийн эхлэл хэмээн үзэж байна. Цаашид бид олон улсын шалгалтын үнэлгээг ахиулахаас эхлээд хүний нөөцийн чадавхыг бэхжүүлэх, иргэний нисэхийн аюулгүй байдалд илүү анхаарч ажиллах, аялал жуулчлалыг хөгжүүлэх, үйлчилгээний чанараа сайжруулах, транзит нислэгээ нэмэгдүүлэх зэрэг олон чиглэлд ахиц гаргах боломжтой юм.

📌Түүнчлэн Монгол Улсын иргэний нисэхийн салбарыг бодлогоор дэмжин ажиллаж буй Улсын Их Хурлын гишүүн, Монгол Улсын Засгийн газрын гишүүн, Зам, тээврийн сайд Б.Дэлгэрсайханд болон ЗТЯ-ны удирдлагуудад гүн талархал илэрхийлье” гэв.

📌Энэ үеэр иргэний нисэхийн салбарт олон жил үр бүтээлтэй ажилласан нэр бүхий ажилтан, албан хаагчдад Төрийн одон медаль, зам, тээврийн салбарын шагнал болон сайдын нэрэмжит талархлын бичиг гардуулж хүндэтгэл үзүүллээ.

📌Монгол Улсад анхны нисэх онгоц 1925 оны тавдугаар сарын 25-ны өдөр газардсанаар үндэсний иргэний нисэхийн салбарын түүх эхэлсэн бөгөөд өнөөдөр тус салбар нь Монгол Улсыг дэлхийтэй холбосон стратегийн чухал салбар болон хөгжиж байна.

---оОо---

Тулгар төр байгуулагдсаны түүхт 2235 жил, Их Монгол Улс байгуулагдсаны 820 жил, Үндэсний эрх чөлөө, тусгаар тогтнолоо сэргээн мандуулсны 115 жил, Ардын хувьсгалын 105 жилийн ойг тохиолдуулан эрхэлсэн ажил, салбартаа өндөр амжилт гаргаж, эх орныхоо хөгжил дэвшилд үнэтэй хувь нэмэр оруулсныг нь үнэлэн ИРГЭНИЙ НИСЭХИЙН ЕРӨНХИЙ ГАЗРЫН НИСЛЭГИЙН СТАНДАРТЫН ГАЗРЫН Иргэний нисэхийн хяналтын байцаагч НОРОВЫН ЗАЯА-г “ХӨДӨЛМӨРИЙН ГАВЬЯАНЫ УЛААН ТУГИЙН ОДОН”-гоор шагнагдсанд халуун баяр хүргэе.

МОНГОЛ УЛС ОЛОН УЛСЫН ИРГЭНИЙ НИСЭХИЙН АЮУЛГҮЙ БАЙДЛЫН БҮРЭН ХЭМЖЭЭНИЙ АУДИТАД АМЖИЛТТАЙ ХАМРАГДЛАА.

Монгол Улс 2026 оны 4 дүгээр сарын 22-ны өдрөөс 5 дугаар сарын 4-ний өдрүүдэд Олон улсын иргэний нисэхийн байгууллага (ICAO) -аас зохион байгуулсан Олон улсын иргэний нисэхийн аюулгүй байдлын аудит хөтөлбөр – байнгын хяналтын аргачлал ( USOAP-CMA ) бүрэн хэмжээний аудитад амжилттай хамрагдаж, урьдчилсан байдлаар 74.96 хувийн үнэлгээ авлаа. Энэхүү үзүүлэлт нь дэлхийн болон Ази, Номхон далайн бүсийн орнуудын дундаж үнэлгээнээс дээгүүр үзүүлэлт юм.

USOAP-CMA аудитын аргачлал, протокол шалгах асуулгууд нь 2024 онд бүрэн шинэчлэгдсэн ба Монгол Улс 2010 оноос хойш 1 6 жилийн дараа шинэчлэгдсэн аргачлалаар анх удаа аудит шалгалтад хамрагдлаа. Энэхүү аудитад амжилттай хамрагдсанаар ICAO- аас Монгол Улсын иргэний нисэхийн аюулгүй байдлын хяналт зохицуулалтын тогтолцоо болон агаарын хөлгийн осол, зөрчлийг шинжлэн шалгах ажиллагаа олон улсын стандарт шаардлагыг хангасан болохыг олон улсад баталгаажуулав. Байнгын хяналтын аргачлалын хүрээнд өгсөн аудитын зөвлөмжүүд нь иргэний нисэхийн үйл ажиллагааг сайжруулахад шаардлагатай цаашдын арга хэмжээг тодорхойлох, аюулгүй байдлыг хангуулах, салбарын хөгжлийн бодлогыг боловсруулахад чухал ач холбогдолтой юм.

Энэ удаагийн аудитад Иргэний нисэхийн ерөнхий газар, Агаарын хөлгийн осол, зөрчлийг шинжлэн шалгах алба дараах 8 чиглэлээр хамрагдаж, 835 протокол асуулгын дагуу шалгууллаа. Үүнд:
Иргэний нисэхийн хууль, эрх зүйн зохицуулалт (LEG) ;
Иргэний нисэхийн хяналт зохицуулалтын байгууллага болон Агаарын хөлгийн осол, зөрчлийг шинжлэн шалгах байгууллагын бүтэц, зохион байгуулалт (ORG) ;
Агаарын хөлгийн осол, зөрчлийг шинжлэн шалгах үйл ажиллагаа (AIG) ;
Нислэгийн үйл ажиллагааны хяналт, зохицуулалт (OPS) ;
Агаарын хөлгийн нислэгт тэнцэх чадварын хяналт, зохицуулалт (AIR) ;
Мэргэжлийн үнэмлэхжүүлэлт (PEL) ;
Аэродромын хяналт, зохицуулалт (AGA) ;
Агаарын навигацийн үйлчилгээний хяналт, зохицуулалт (ANS) ;

Аудитын бэлтгэл ажлын хүрээнд Монгол Улсын Засгийн газар, Зам, тээврийн яамны дэмжлэгтэйгээр Агаарын хөлгийн осол, зөрчлийг шинжлэн шалгах алба, Иргэний нисэхийн ерөнхий газар, Чингис хаан ОУНБ, Иргэний нисэхийн үндэсний төв ТӨХХК, МИАТ ТӨХК, Аэро Монголиа ХХК, Хүннү Эйр ХХК, Изинис Эйрвэйс ХХК, Монголын нисэхийн академи ХХК, Монголиан Эйрвэйс Карго ХХК, Чингис Эйрлайнс ХХК зэрэг байгууллагууд амжилттай хамтран ажиллалаа.

https://mcaa.gov.mn/news/post1

ИРГЭНИЙ НИСЭХИЙН ЕРӨНХИЙ ГАЗРЫН ИРГЭНИЙ НИСЭХИЙН ХЯНАЛТЫН БАЙЦААГЧИЙН АЖЛЫН БАЙРНЫ СОНГОН ШАЛГАРУУЛАЛТАД УРЬЖ БАЙНА.

ЗАМ,ТЭЭВРИЙН САЙД Б.ДЭЛГЭРСАЙХАН ОЛОН УЛСЫН АУДИТЫН ШАЛГАЛТ (ICAO)-ЫН БЭЛТГЭЛ АЖИЛТАЙ ТАНИЛЦЛАА

📌Зам, тээврийн сайд Б.Дэлгэрсайхан өнөөдөр (2026.04.10) Иргэний нисэхийн ерөнхий газарт ажиллаж, Олон улсын иргэний нисэхийн байгууллага (ICAO)-аас хийх аюулгүй байдлын аудитын шалгалтын бэлтгэл ажилтай танилцаж, салбарын удирдлага, алба хаагчидтай уулзаж санал солилцлоо.

📌ICAO нь гишүүн орнуудын иргэний нисэхийн аюулгүй байдлын хяналт, зохицуулалтын тогтолцоонд байнгын хяналтын аргачлалын хүрээнд аудит хийж, дэлхийн нисэхийн аюулгүй байдлыг баталгаажуулдаг, олон улсын байгууллага юм.

📌Манай улс энэхүү бүрэн хэмжээний ээлжит аудитын шалгалтад 16 жилийн дараа дахин хамрагдах гэж байгаа багөөд ICAO-ын аудит шалгалт Монгол Улсад 2026 оны дөрөвдүгээр сарын 22-ноос тавдугаар сарын 7-ны өдрүүдэд зохион байгуулагдах юм.

📌Бэлтгэл ажлыг хангах хүрээнд Зам, тээврийн яам, Иргэний нисэхийн ерөнхий газар, Иргэний нисэхийн үндэсний төв зэрэг байгууллагууд "Ажлын хэсэг" байгуулан хамтран ажиллаж байна.

📌Энэхүү уулзалтаар ICAO-гийн аудитын хүрээнд Чикагогийн конвенцын хэрэгжилт, үндэсний хууль, дүрэм журмын мөрдөлт, аюулгүй байдлын хяналт, хүний нөөц, сургалт зэрэг асуудлаар аудитад шалгуулах нийт 836 асуултад дотооддоо үнэлгээ, зөвлөмж өгч ажиллаж буйг ИНЕГ-ын дарга Э.Төрбаяр танилцууллаа. Одоогийн байдлаар дотоод аудитын дундаж үнэлгээ 70.5 хувь, бэлтгэл ажлын хэрэгжилт 89.15 хувьтай байгааг албаныхан мэдээллээ.

📌Монгол Улс өнөөдрийн байдлаар олон улсын 32, орон нутгийн 8 чиглэлд нислэг үйлдэж байгаа бөгөөд 2025 оны байдлаар 27,580 хөөрөлт, буулт, 81,086 дамжин өнгөрөх нислэг бүртгэгджээ. 2010-2026 онд иргэний нисэхийн салбарын ачаалал 2.1 дахин өссөн үзүүлэлттэй байгааг танилцууллаа.

📌Мөн Ази, Номхон далайн бүсийн орнуудын аудитын дундаж үнэлгээ 66.6 хувь, дэлхийн дундаж 69.6 хувь байдаг бол манай улс энэ удаагийн аудитад бүсийн дунджаас дээгүүр үнэлгээ авах зорилт тавин ажиллаж байгааг албаныхан онцолж байлаа.

📌Монгол Улс 2010 онд ICAO-ийн "USOAP-CMA" бүрэн хэмжээний аудитын шалгалтад хамрагдаж, 86.45 хувийн үнэлгээг авч байсан түүхтэй. Мөн 2017 онд 2010 оны аудитын давтан үнэлгээнд хамрагдаж 88.39 хувийн үнэлгээг авч байсан туршлагатай. 2026 онд буюу 16 жилийн дараа ICAO-ийн USOAP-CMA бүрэн хэмжээний аудитын шалгалтад дахин хамрагдах гэж байгаа нь энэ юм.

📌Зам, тээврийн сайд Б.Дэлгэрсайхан (ICAO)-аас хийх шалгалтын бэлтгэл ажлын явцтай танилцаж, удаашралтай байгаа ажлуудыг эрчимжүүлэх, хууль, дүрэм журмын хэрэгжилтийг сайжруулах, нислэгийн аюулгүй байдлыг хангах тогтолцоог олон улсын шаардлагад нийцүүлэх чиглэлд анхаарч ажиллахыг иргэний нисэхийн салбарын удирдлагууд, ажлын хэсгийнхэнд үүрэг болголоо.

📌Мөн салбарын хүний нөөцийн чадавхыг бэхжүүлэх, мэргэжилтнүүдийн сургалт, дадлагыг тогтмол сайжруулах, байгууллагуудын уялдаа холбоог нэмэгдүүлэх, иргэний нисэхийн салбарын алба хаагч бүр нисэхийн салбарын аюулгүй байдал, хүний амь нас, үнэт зүйлсийн төлөө идэвх санаачлагатай, хичээл зүтгэлтэй, сэтгэлтэй ажиллах шаардлагатайг анхаарууллаа.

Монгол Улсын Засгийн газар, ЗТЯ-ны зүгээс бодлогоор дэмжин ажиллаж, тулгамдсан олон асуудлыг шийдвэрлэхийн төлөө анхаарал хандуулан ажиллаж байгааг онцлон тэмдэглэлээ.

Иргэний нисэхийн салбарт хамтын ажиллагаа өргөжиж, мэргэжилтэн бэлтгэх шинэ боломж бүрдлээ.

Иргэний нисэхийн ерөнхий газрын удирдлагууд БНСУ-ын Хансео Их Сургуулийн удирдлагуудтай албан ёсны уулзалт зохион байгуулж, хоёр талын хамтын ажиллагааг өргөжүүлэх чухал алхам хийлээ.

Уулзалтад Хансео Их Сургуулийн Ерөнхийлөгч Хам Ги Сон, Гадаад харилцаа хариуцсан дэд ерөнхийлөгч Ким Жин Ү, Аж үйлдвэрлэл–академик хамтын ажиллагаа хариуцсан дэд ерөнхийлөгч болон бусад төлөөлөгчид оролцсон байна.

Талууд уулзалтын үеэр Иргэний нисэхийн ерөнхий газар болон Хансео Их Сургуулийн хооронд хамтын ажиллагааны санамж бичиг байгуулж, иргэний нисэхийн салбарт хүний нөөц бэлтгэх, сургалтын чанарыг олон улсын түвшинд хүргэх чиглэлээр хамтран ажиллахаар тохиролцлоо.

Санамж бичгийн хүрээнд Олон улсын иргэний нисэхийн байгууллагын шаардлагад нийцсэн шалгалтын танхимыг хамтран байгуулахаар болсон байна. Мөн Улаанбаатар хот болон Дорноговь аймгийн Сайншанд суманд хэрэгжих “Бүсийн нислэгийн хөдөлгөөний удирдлагын төв байгуулах” төслийн хүрээнд нийт 40 нислэгийн хөдөлгөөний удирдагч бэлтгэх хэрэгцээ үүсээд байгаа бөгөөд эдгээр мэргэжилтнүүдэд шаардлагатай суурь онолын мэдлэгийг Хансео Их Сургуульд эзэмшүүлэхээр тохиролцов.

Үүнээс гадна, магистрын түвшинд тэтгэлэгтэй суралцах боломж бүрдүүлэх, оюутан солилцооны хөтөлбөр хэрэгжүүлэх зэрэг өргөн хүрээний хамтын ажиллагааг хөгжүүлэхээр талууд санал нэгдлээ.

Энэхүү хамтын ажиллагаа нь Монгол Улсын иргэний нисэхийн салбарын хүний нөөцийг чадавхжуулах, олон улсын стандарт, шаардлагад нийцсэн мэргэжилтнүүдийг бэлтгэхэд чухал хувь нэмэр оруулах ач холбогдолтой юм.

✈️Зам, тээврийн сайд Б.Дэлгэрсайхан БНСУ-ын Хансео их сургуулийн Ерөнхийлөгч Хам Ги Сон тэргүүтэй төлөөлөгчдийг өнөөдөр /2026.04.08/ хүлээн авч уулзлаа.

🔹Талууд Монгол Улсын иргэний нисэхийн салбарт хүний нөөцийн чадавх бэхжүүлэх чиглэлээр урт хугацааны хамтын ажиллагааг Хансео их сургуультай хэрэгжүүлэх талаар санал солилцлоо

ДЭЛГЭРЭНГҮЙГ ➡️ https://mrt.gov.mn/i/4980

АЛБАН ТОМИЛОЛТ-ОХУ: ЕВРОАЗИЙН ТЭЭВРИЙН КОРИДОРЫГ ХӨГЖҮҮЛЭХ БОЛОМЖ, ТУЛГАМДАЖ БУЙ АСУУДАЛ, ИРЭЭДҮЙН ЧИГ ХАНДЛАГЫН ТАЛААР ХЭЛЭЛЦЛЭЭ

"Олон улсын тээвэр, ложистикийн форум" ОХУ-ын Санкт-Петербург хотноо 2026 оны 04 дүгээр сарын 01-03-ны өдрүүдэд амжилттай зохион байгуулагдаж байна.

Тус форумыг ОХУ-ын Засгийн газар, ОХУ-ын Тээврийн яамнаас санаачлан зохион байгуулж байгаа бөгөөд Анхдугаар форум “Евразийн тээврийн коридорууд: интеграц ба тасралтгүй логистик" сэдэвт нэгдсэн хуралдаанаар (2026.04.01) эхэллээ.

Нэгдсэн хуралдаанд ОХУ-ын Ерөнхийлөгч В.В.Путин цахимаар мэндчилгээ дэвшүүлж, дэлхийн тээвэр, ложистикийн хөгжилд тулгамдсан асуудлын гарц шийдлийг олж, олон улсын тээвэр, дэд бүтцийн холболтыг дэмжих шинэ санал санаачилгуудыг гаргаж, хамтран ажиллах шинэ боломжуудыг нээнэ гэдэгтээ итгэлтэй байгаагаа илэрхийллээ.

Форумын хүрээнд "Логистик ба тээврийн салбарууд", "Дэлхийн холболт ба тээврийн коридорууд", "Дижиталчлал ба тээврийн ирээдүй" гэсэн гурван сэдэвчилсэн хөтөлбөрийн хүрээнд ойролцоогоор 50 гаруй арга хэмжээ зохион байгуулагдаж байна.

Форумыг нээж Оросын Тээврийн сайд Андрей Никитин хэлсэн үгэндээ "Орос улс түншүүддээ Их Евразиас хол зайд улс орнууд болон тивүүдийг холбосон өөр хувилбар, аюулгүй, технологийн дэвшилтэт маршрутуудыг санал болгож байна.

Форумаар дэд бүтцийн интеграци, хилийн боомт болон олон төрлийн тээвэрлэлтийг дижиталчлах, автоматжуулах, ложистикийн маршрутын тогтвортой байдал, хүнгүй тээврийн системийгашиглах талаар өргөн хүрээтэй хэлэлцэнэ. Энэхүү олон талт ажил нь Орос болон түнш орнуудын үндэсний хөгжлийн зорилтуудад хүрэхийн тулд засгийн газар хоорондын гол практик шийдвэрүүдийг зохицуулах, хөгжлийн хурдасгана гэдэгт итгэлтэй байна" гэж тэмдэглэн хэллээ.

Хуралдаанд панелистаар, ОХУ-ын Шадар сайд Виталий Савельев, Дмитрий Чернышенко, Тээврийн сайд Андрей Никитин, Санкт-Петкрбург хотын Захирагч Александр Беглов, Саудын Арабын Хаант Улсын Тээвэр, ложистикийн сайд Е.П. Салех бин Насер Аль-Джассер, Бүгд Найрамдах Узбекстан Улсын Тээврийн сайд Илхом Махкамов, БНХАУ-ын Тээврийн дэд сайд Шүй Чэнгуан, “Дело" корпорацийн Сергей Шишкаре нар оролцож байна.

Хуралд оролцогчид үндэсний тээврийн системийг дэлхийн ложистикийн сүлжээнд нэгтгэх, хил, боомтын холболтыг дэмжих, саадгүй ложистикийгхөгжүүлэх, Евразийн тээврийн системийг Африк, Ази, Латин Америк, Персийн булангийн орнуудтай холбох чадварыг нэмэгдүүлэхийн тулд салбарыг дижиталчлах талаар өргөн хүрээтэй хэлэлцэж байна.

Мөн тээвэр логистикийн салбарт хүний нөөцийг бэлтгэх, инновацийг нэвтрүүлэх, бүс нутгийн хэмжээнд тээврийн нэгдсэн цахим баримт бичгийн системийг нэвтрүүлэх зэрэг олон талт асуудлаар харилцан санал солилцож, хэлэлцүүлэг өрнүүллээ.

Хурлын үеэр Саудын Араб, Узбекстаны талаас олон улсын геополитикийн нөхцөл байдлаас дүгнэхэд далайн порттой улс орнууд цаашид зөвхөн усан замын хөгжилд бус төмөр зам зэрэг хуурай замын тээврийн маршрут, чиглэлийг хөгжүүлэхэд анхаарч, авто, төмөр, усан замын холимог тээвэрлэлтийг сайжруулахын төлөө хамтран ажиллах шаардлагатай байгааг дурдаж байлаа.

Харин ОХУ-ын төлөөлөгчид тээврийн хөгжилд нисгэгчгүй нисэх төхөөрөмж зэрэг орчин үеийн технологийн дэвшлийг нэвтрүүлэх шаардлагатай байгааг онцолж, энэ чиглэлээр БНХАУ сүүлийн жилүүдэд ихээхэн амжилттай ажиллаж байгааг онцоллоо.

Манай улс энэхүү арга хэмжээнд ОХУ-ын Тээврийн сайд болон ОХУ-ын Тээврийн яамны урилгаар оролцож байгаа бөгөөд Монгол Улсаас ОХУ-д суугаа Онц бөгөөд Бүрэн эрхт Элчин сайд Ө.Энхтүвшин, Зам, тээврийн дэд сайд Т.Ганболд тэргүүтэй салбарын төлөөлөгчид оролцож байна.