10/10/2026
IDAN AKA DAMKA AMANA GA WANDA BA TA CANCANCE SHI BA, TO A JIRA ALKIYAMA!
قال رسول الله ﷺ:
«إِذَا وُسِّدَ الْأَمْرُ إِلَى غَيْرِ أَهْلِهِ فَانْتَظِرِ السَّاعَةَ»
Ma’ana: Idan aka damka al’amari ga wanda bai cancanci rike shi ba, to a jira Sa’a.
Shugabanci ba mukami ne kawai ba, amana ce mai girman gaske a gaban Allah da al’umma. Malamai suna koyar da mu muhimmancin adalci, gaskiya, rikon amana da nauyin da ke kan duk wanda aka ba shugabanci.
Abin tambaya a nan shi ne: Idan muna girmama malamai saboda iliminsu da fahimtarsu game da nauyin shugabanci, me ya sa idan daya daga cikinsu ya fito neman yi wa al’umma hidima ta hanyar siyasa, sai a samu irin wadannan tambayoyi?
A Kano, Malam Ibrahim Khalil ya fito neman shugabanci. Idan an gudanar da zaben fitar da gwani, aka bayyana wanda ya yi nasara, amma daga baya aka ga wani suna a matsayin dan takara, to ya zama wajibi a yi bayani dalla-dalla kan matakan da aka bi.
Ba wai muna cewa ilimin addini shi kadai ne ke ba mutum cancantar shugabanci ba ne. A’a, shugabanci yana bukatar ilimi, kwarewa, gaskiya, adalci da kuma bin dokokin da s**a dace. Amma dole ne a mutunta tsarin da aka kafa, a kuma bayyana duk wani mataki da zai iya shafar hakkin dan takara.
Ba za a gina dimokuradiyya mai karfi ba idan tambayoyin da s**a shafi adalci ba su samun amsoshi ba.
Mutanen Kano suna da hakkin sanin abin da ya faru. ‘Yan jam’iyya suna da hakkin neman bayani. Kuma duk wanda yake da korafi yana da hakkin bin hanyar da doka ta tanada.
Mu daina mayar da siyasa tamkar wasa da burin mutane. Mu mayar da ita hidima, amana da adalci.
Allah Ya ba Kano shugabanni masu kishin jama’a, masu tsoron Allah, masu gaskiya da rikon amana. Amin.
SHUGABANCI AMANA NE, BA GANIMA BA!
Aminu Bala Aliyu
