26/09/2026
पछिल्लो समय नेपालभर भइरहेको निरन्तर वर्षाका कारण भक्तपुर जिल्लाका विभिन्न स्थानमा पहिरो, भू–क्षय तथा जमिन कटानको जोखिम बढेको छ। विशेषगरी भिरालो भू–भाग तथा जोखिमयुक्त बस्तीहरूमा वर्षाका कारण समुदायको जनजीवन तथा भौतिक संरचनामा समेत जोखिम उत्पन्न भएको देखिएको छ।
नेपाल रेडक्रस सोसाइटी भक्तपुर जिल्ला शाखाले जिल्लाका विभिन्न स्थानमा देखिएका जोखिमपूर्ण अवस्थाको अनुगमन तथा जानकारी संकलन गरिरहेको छ। प्रस्तुत तस्वीरहरू भक्तपुरका विभिन्न स्थानमा वर्षाका कारण देखिएको पहिरो तथा जोखिमपूर्ण अवस्थाका केही दृश्यहरू हुन्।
यस अवस्थालाई मध्यनजर गर्दै जोखिमयुक्त क्षेत्रका बासिन्दाहरूलाई सतर्क रहन, पहिरो तथा भू–क्षयको जोखिम भएका स्थानमा अनावश्यक आवतजावत नगर्न तथा सम्भावित विपद्का लागि पूर्वतयारी अवस्थामा रहन नेपाल रेडक्रस सोसाइटी भक्तपुर जिल्ला शाखा हार्दिक अनुरोध गर्दछ।
साथै, कुनै जोखिमपूर्ण अवस्था देखिएमा सम्बन्धित स्थानीय तह, सुरक्षा निकाय तथा नेपाल रेडक्रसका स्वयंसेवक/सम्बन्धित निकायलाई तत्काल जानकारी गराउन अनुरोध गरिन्छ।
सतर्क रहौँ, सुरक्षित रहौँ।
विपद्को जोखिम न्यूनीकरणमा सबैको सहकार्य आवश्यक छ।
