CPN UML Central Publicity Department नेकपा एमाले केन्द्रीय प्रचार विभाग

यी हुन एमाले महाधिवेशनमा प्रतिनिधि छनोटका सात आधार

यी हुन एमाले महाधिवेशनमा प्रतिनिधि छनोटका सात आधार काठमाडौं, १९ कात्तिक । नेकपा (एमाले)को ११ औं महाधिवेशन प्रतिनिधि हुनका लागि पार्टीले सात वटा आधार तय गरेको छ । अन्त....

काठमाडौं । प्रधानमन्त्री केपी शर्मा ओलीले लगातार वर्षा भइरहेकोले बाढी पहिरोबाट सुरक्षित रहन देशवासीलाई आह्वान गर्नुभएको छ ।

संयुक्त राष्ट्रसंघको महासभामा भाग लिने क्रममा अमेरिकामा रहनुभएका ओलीले भेल, बाढी र पहिरोको जोखिमयुक्त ठाउँमा रहनु भएका सबैलाई सुरक्षा सतर्कता अपनाउन आग्रह गर्नुभएको छ । ओलीले अत्यावश्यक काम बाहेक लामो दूरीको यात्रामा ननिस्कन पनि अपिल गर्नुभएको छ ।

ओलीले उद्धारका लागि सबैलाई तयारी अवस्थामा रहन पनि आग्रह गर्नुभएको छ । ‘सबै सुरक्षा निकायका सुरक्षाकर्मी साथीहरू आपातकालीन मद्दतका लागि तयारी अवस्थामा रहनु होला’, ओलीले सामाजिक सञ्जाल फेसबुकमा लेख्नु भएको छ ।

ओलीले देशमा झरी पर्दा आफ्नो मनमा पहिरो गए जस्तै भएको उल्लेख गर्नुभएको छ । ‘म अमेरिकामा हार्वर्ड विश्वविद्यालयको कार्यक्रममा सहभागी हुन गइरहेको छु, यतिबेला नेपालमा देशभर भारी वर्षाले बाढी, पहिरो र डुबानका खबरहरू सामाजिक सञ्जाल र मिडिया मार्फत सुनिरहेको, हेरिरहेको छु, नेपालमा झरी पर्दा यता मनमा पहिरो गएजस्तो भइरहेको छ’, प्रधानमन्त्रीले लेख्नु भएको छ ।

जलवायु कार्यका लागि ऋण लिनु विकासोन्मुख देशहरूका लागि घोर अन्याय : प्रधानमन्त्री
काठमाडौं । प्रधानमन्त्री केपी शर्मा ओलीले जलवायु परिवर्तन हाम्रो समयको परिभाषित सङ्कट भएको बताउनुभएको छ ।
संयुक्त राष्ट्र संघको ७९ औँ साधारण सभामा आयोजित जलवायु फोरमको बैठकमा बोल्दै प्रधानमन्त्री ओलीले नेपाल युवा पहाडहरू भएको र कम विकसित देश भएकाले बढ्दो परिमाण र तीव्रतामा जलवायु प्रेरित प्रकोपहरूको सामना गरिरहेको बताउनुभयो । ‘हिमालयमा हाम्रो हिउँको विशाल भण्डार, अरबौँ मानिसहरूका लागि महत्त्वपूर्ण जीवनरेखा, खतरनाक मात्रा र गतिमा घट्दै छ, पछिल्ला महिनाहरूमा, यी प्रकोपहरूले २ सयभन्दा बढीको ज्यान लिएको छ, समुदाय र अर्थतन्त्रहरूलाई विनाशकारी बनाएको छ’, ओलीले भन्नुभयो ।
नेपाल जलवायु परिवर्तन सम्बन्धी घटनाहरूबाट सबैभन्दा बढी प्रभावित देशहरू मध्ये १० औँ स्थानमा रहेको ओलीले जानकारी गराउनुभयो । ‘यो एउटा गहन अन्याय हो, किनकि हाम्रो हरित गृह ग्यास उत्सर्जन न्यून भूमिका छ, हाम्रो ४६ प्रतिशत वन क्षेत्रले कार्बन उत्सर्जन रोक्नमा योगदान पुर्‍याउँछ, र हामीसँग हिमालयले प्राकृतिक रेफ्रिजरेटरको रूपमा काम गरिरहेको छ’, उहाँले भन्नुभयो ।
उहाँले प्रमुख उत्सर्जनहरूलाई जलवायु न्याय सुनिश्चित गर्न जिम्मेवारी लिन, वित्तीय स्रोतहरू प्रदान गर्न, प्रविधि हस्तान्तरण गर्न र विकासोन्मुख देशहरूलाई अनुकूलन र लचिलोपन निर्माणमा मद्दत गर्न आह्वान गर्नुभयो । ‘हामीलाई सजिलो पहुँचको साथ निष्पक्ष वित्त पोषण संयन्त्र चाहिन्छ’, ओलीले भन्नुभयो।
नेपाल पेरिस सम्झौताका लागि प्रतिबद्ध रहेको पनि ओलीले बताउनुभयो । नेपालले सन् २०४५ सम्ममा विश्वव्यापी लक्ष्यभन्दा पाँच वर्ष अगाडि नै शुद्ध शून्य उत्सर्जन हासिल गर्ने लक्ष्य राखेको उहाँले जानकारी दिनुभयो । उहाँले जलवायु प्रभाव र समाधानबारे छलफल गर्न विश्वव्यापी आवाजलाई एकसाथ ल्याउने उद्देश्यले नेपालले सन् २०२५ मा सगरमाथा संवाद आयोजना गर्न लागेको पनि उहाँले जानकारी दिनुभयो ।
जलवायु वित्त विकास वित्तका लागि अतिरिक्त हुनुपर्ने भन्दै ओलीले जलवायु कार्यका लागि ऋण लिनु विकासोन्मुख देशहरूका लागि घोर अन्याय हुने बताउनुभयो । जलवायु परिवर्तन मुख्यतया औद्योगिक राष्ट्रहरूले आफ्नो आर्थिक विकासको क्रममा जीवाश्म इन्धन जलाएको परिणाम भएकोले त्यसको जिम्मा पनि उनीहरूले नै लिनु पर्ने ओलीको धारणा थियो ।
जलवायु परिवर्तनको असरलाई नियन्त्रण गर्न विश्वव्यापी प्रयास आवश्यक रहेको उहाँले बताउनुभयो । त्यसको लागि नेपाल तयार रहेको ओलीले बताउनुभयो । ‘हामी मानिस र ग्रहको दिगो र न्यायपूर्ण भविष्य सुरक्षित गर्न हात मिलाऔँ’, उहाँले भन्नुभयो ।

स्वस्थ नेपाली समृद्ध नेपाल, सुखी नेपालीको पूर्व सर्त : प्रधानमन्त्री
काठमाडौं । प्रधानमन्त्री केपी शर्मा ओलीले स्वास्थ्य मानव कल्याण र जीवनको गुणस्तरको लागि आधारभूत विषय भएको बताउनुभएको छ ।
संयुक्त राष्ट्रसंघको महासभामा भाग लिने क्रममा अमेरिकाको न्युयोर्कमा रहनुभएका ओलीले माउन्ट सिनाई अस्पताल, डेभिस अडिटोरियम हेल्थ सेन्टर फर साइन्स एन्ड मेडिसिन न्युयोर्कले आयोजना गरेको कार्यक्रममा बोल्दै आज विश्वले धेरै स्वास्थ्य चुनौतीको सामना गरिरहेको बताउनुभयो । ‘विज्ञान र प्रविधिमा पर्याप्त सुधार भए तापनि आजको विश्वले धेरै महत्त्वपूर्ण स्वास्थ्य चुनौतीहरूको सामना गरिरहेको छ, महामारी, जलवायु परिवर्तन, पानी र खाद्यान्नको अभावले विश्वव्यापी स्वास्थ्य परिणामहरू सुधार गर्ने हाम्रो प्रयासहरूलाई असर गरेको छ’, उहाँले भन्नुभयो ।
उच्च र कम आय भएका देशहरू बिच स्वास्थ्य सेवामा ठुलो असमानता रहेको ओलीले बताउनुभयो । विकासशील देशहरू, विशेष गरी नेपालजस्ता अल्पविकसित देशहरूले आफ्ना जनतालाई आर्थिक, मानव संसाधन र प्रविधिको अभावमा स्वास्थ्य सेवा प्रदान गर्न सङ्घर्ष गरिरहेका ओलीले स्पष्ट पार्नुभयो । यी चुनौतीहरूलाई सम्बोधन गर्न समन्वयकारी विश्वव्यापी प्रयास, पर्याप्त लगानी र नवीन समाधानहरू आवश्यक रहेको ओलीले धारणा राख्नुभयो ।
यस पृष्ठभूमिमा, माउन्ट सिनाई अस्पताल प्रणाली जस्ता संस्थानहरूको भूमिका विश्वव्यापी स्वास्थ्य परिणाम प्रदान गर्न अझ महत्त्वपूर्ण हुने उहाँले बताउनुभयो । ‘मलाई यो कुरा गर्दा धेरै खुसी लागेको छ कि– माउन्ट सिनाई सबैभन्दा पुरानो र सबैभन्दा ठुलो शिक्षण अस्पतालहरू मध्ये एक भएको छ, संयुक्त राज्य अमेरिका भित्र मात्र होइन विश्वभरि स्वास्थ्य सेवा अगाडि बढाउनमा यो संस्था अग्रणी रहेको छ’, ओलीले भन्नुभयो ।
नेपालले पनि आफ्नो स्वास्थ्य सेवा प्रणालीलाई सुदृढ पार्न उच्च प्राथमिकता दिएको उहाँले बनाउनुभयो । नेपालको संविधानले नेपालका हरेक नागरिकलाई निःशुल्क आधारभूत स्वास्थ्य सेवाको अधिकार सुनिश्चित गरेको ओलीले जनकारी दिनुभयो । नेपालमा मातृ र बाल मृत्युदर घटाउन, सङ्क्रामक, सङ्क्रामक रोगहरू नियन्त्रण गर्न र ट्राकोमा उन्मूलन गर्न नेपालले पर्याप्त प्रगति गरेको ओलीले बताउनुभयो । ‘हामीले स्वास्थ्य परिणाम सुधार गर्न धेरै पहलहरू सुरु गरेका छौँ, जसले नेपाललाई यौन र प्रजनन स्वास्थ्य सेवा र अधिकारहरूमा विश्वव्यापी पहुँचमा अग्रगामी बनाएको छ’, उहाँले भन्नुभयो ।
नागरिकहरूलाई आर्थिक कठिनाइ बिना गुणस्तरीय स्वास्थ्य सेवा प्रदान गर्न सामाजिक स्वास्थ्य सुरक्षा कार्यक्रमको रूपमा राष्ट्रिय स्वास्थ्य बिमा कार्यक्रम (एनएचआइपी) सुरु गरिएको पनि उहाँले जानकारी दिनुभयो । प्रधानमन्त्रीको रूपमा आफ्नो दोस्रो कार्यकालमा हरेक गाउँ, नगरपालिकामा प्राथमिक अस्पताल स्थापना गर्ने निर्णय गरेको उहाँले स्मरण गराउनुभयो गरिब र वञ्चित समूहहरूलाई प्राथमिकताका साथ आधारभूत स्वास्थ्य सेवाहरू सुनिश्चित गर्न यो दृष्टिकोणलाई अगाडि बढाउन आफू अहिले पनि प्रतिबद्ध रहेको उहाँले स्पष्ट पार्नुभयो ।
नेपाली जनताको समग्र स्वास्थ्य प्रवर्द्धन गर्न नेपालले निरोगी नेपाल,स्वस्थ नेपालको दर्शन विकास गरेको ओलीले बताउनुभयो । ‘स्वस्थ नेपाली हाम्रो राष्ट्रिय आकाङ्क्षा समृद्ध नेपाल, सुखी नेपालीको पूर्व सर्त हो भन्ने कुरा भनिरहनु आवश्यक छैन’, उहाँले भन्नुभयो ।
नेपालले स्वास्थ्य परिणाम सुधार गर्ने दृष्टि र लक्ष्यहरू प्राप्त गर्न धेरै चुनौतीहरूको सामना गर्दै आएको ओलीले बताउनुभयो । स्रोत अभावका कारण, स्वास्थ्य सेवामा पहुँच विशेष गरी गरिब र सीमान्तकृत समुदायहरूका लागि महत्त्वपूर्ण मुद्दा बनेको छ उहाँले सुनाउनुभयो । ‘हामीले भर्खरै कोभिड १९ महामारी विरुद्धको लडाइँ जितेका छौँ यद्यपि, प्रभावहरू दूरगामी छन् र आउने वर्षहरूमा महसुस हुनेछन्’, ओलीले भन्नुभयो ।
थप बलियो स्वास्थ्य सेवा सुविधाहरू स्थापना गर्न र स्वास्थ्य आपतकालीन र भविष्यका महामारीहरू सामना गर्न अझ राम्रो तयारी गर्न साझेदारहरूबाट ठुलो समर्थनको आवश्यकता रहेको ओलीले बताउनुभयो । ‘यहाँ माउन्ट सिनाई अस्पताल प्रणाली जस्ता स्वास्थ्य सेवा सुविधाहरूमा विश्वव्यापी च्याम्पियनहरूको भूमिका आउँछ’, उहाँले भन्नुभयो ।
सो संस्थाको काठमाडौँ विश्वविद्यालय र धुलिखेल अस्पतालसँगको साझेदारीलाई प्रशिक्षण, अनुसन्धान र अनुसन्धानको माध्यमबाट राम्रो स्वास्थ्य प्रणालीका लागि व्यापक र गहिरो सहयोगको एक कदमका रूपमा रहेको ओलीले बताउनुभयो । उहाँले सहकार्य र सहयोगका लागि धन्यवाद दिनुभयो । नेपाली जनताको सेवा गर्न थप स्वास्थ्य संस्थाहरूसँग साझेदारी विस्तार गर्न नेपालमा सो उपस्थितिलाई सहज बनाउन आवश्यक काम गर्न नेपाल सरकार तयार रहेको उहाँले बताउनुभयो । ‘हामी तपाईँलाई नेपालमा थप स्रोत, ज्ञान, प्रविधि र नवीनता ल्याउन अनुरोध गर्दछौँ किनकि स्वास्थ्य सेवा सधैँ राम्रो छ’, उहाँले भन्नुभयो ।