16/10/2026
“ ७१ औं प्रहरी दिवस-२०८३ ” को अवसरमा विविध कार्यक्रम गरी सम्पन्न
=======================================
३० असोज २०८३, लमजुङ ।
“विपद्मा सारथी, संकटमा छहारी: प्रविधियुक्त नेपाल प्रहरी” भन्ने मूल नाराका साथ “ ७१ औँ प्रहरी दिवस-२०८३” को अवसरमा जिल्ला प्रहरी कार्यालय लमजुङको आयोजनामा वीर अमर प्रहरी प्रति श्रद्धाञ्जली अर्पण लगायतको कार्यक्रम सम्पन्न भयो, लमजुङ जिल्लाका प्रमुख जिल्ला अधिकारी श्री कृष्ण प्रसाद खनालज्यूको प्रमुख आतिथ्यतामा सम्पन्न उक्त कार्यक्रममा सहायक प्रमुख जिल्ला अधिकारी, विभिन्न सुरक्षा निकायका प्रमुखहरू, सरकारी कार्यालयका प्रमुखहरू, पूर्व प्रहरी संगठनका अध्यक्ष तथा पूर्व प्रहरी कर्मचारीहरू, नागरिक समाजका प्रतिनिधिहरू, पत्रकार, समाजसेवी, वीर अमर प्रहरीका परिवारजन तथा प्रहरी कर्मचारीहरूको उपस्थिति रहेको थियो ।
राष्ट्र र नागरिकको सेवामा आफ्नो अमूल्य जीवन उत्सर्ग गरी वीरगति प्राप्त गर्नुभएका वीर अमर प्रहरी सम्मान व्यक्त गर्दै एक मिनेट मौनधारण गरिएको थियो भने तत्पश्चात प्रमुख अतिथिज्यू लगायत उपस्थित महानुभावहरूले वीर अमर प्रहरी स्मारकमा पुष्पगुच्छा अर्पण गरी श्रद्धाञ्जली व्यक्त गर्नुभएको थियो ।
कार्यक्रममा जिल्ला प्रहरी कार्यालय लमजुङका प्रहरी निरीक्षक श्री नेत्र बहादुर थापाज्यूले स्वागत मन्तव्य राख्नु भएको थियो, यसै क्रममा जिल्ला प्रहरी कार्यालय तथा मातहतका कार्यालयहरूमा कार्यरत रही उत्कृष्ट कार्यसम्पादन गर्ने प्रहरी कर्मचारीहरूलाई कार्यक्रमका प्रमुख अतिथि प्रमुख जिल्ला अधिकारी श्री कृष्ण प्रसाद खनालज्यूबाट पुरस्कार प्रदान गरिएको थियो ।
कार्यक्रमको अन्त्यमा ईलाका प्रहरी कार्यालय, भोर्लेटारका प्रमुख प्रहरी निरीक्षक धुर्व प्रसाद शर्माज्यूले उपस्थित सम्पूर्ण अतिथि तथा महानुभावहरूमा संगठन प्रमुख प्रहरी महानिरीक्षकज्यू बाट प्राप्त प्रहरी दिवसको शुभकामना सन्देश वाचन गरी धन्यवाद ज्ञापन गर्दै नेपालीहरूको महान् पर्व विजयादशमी, शुभ-दीपावली, छठ तथा ल्होसार पर्वको शुभकामना व्यक्त गर्नुभएको थियो ।
