02/10/2026
HIGANTENG YELL 2026
Handa na ba kayo sa mas pinaingay, mas pinasigla at mas pinagrbong Higanteng Yell 2026!
MGA ALITUNTUNIN AT PAMANTAYAN
1. MGA KALAHOK
Bukas ang paligsahan sa lahat ng opisyal na delegasyon o kinatawan ng mga barangay, paaralan, organisasyon o grupo, at mga Tanggapan ng Pamahalaang Bayan ng Angono na kalahok sa Higantes and Arts Festival Grand Parade.
Ang bawat delegasyon ay maaaring magkaroon ng maraming kalahok. Hinihikayat ang aktibong pakikilahok ng mga opisyal, kawani, mag-aaral, miyembro, at iba pang kinatawan ng bawat delegasyon.
Walang itinakdang pinakamataas na bilang ng kalahok, basta't maayos na mapangangasiwaan ng grupo ang kanilang delegasyon at ligtas na maisasagawa ang pagtatanghal sa itinakdang lugar.
2. MGA ALITUNTUNIN SA PAGTATANGHAL
Ang bawat delegasyon ay magtatanghal ng isang orihinal na Higanteng Yell na nagpapakita ng pagkakakilanlan, pagmamalaki, pagkamalikhain, at pagkakaisa ng kanilang barangay, paaralan, organisasyon, o tanggapan.
Ang yell ay dapat na orihinal at hindi kinopya mula sa ibang grupo. Ang nilalaman nito ay dapat nakaugnay sa Higantes Festival, sining, kultura, tradisyon, at pagkakakilanlan ng Angono.
Ang bawat pagtatanghal ay dapat tumagal nang hindi bababa sa isang (1) minuto at tatlumpung (30) segundo at hindi lalampas sa dalawang (2) minuto.
Ang yell ay dapat bigkasin nang malinaw, malakas, sabay-sabay, at puno ng sigla at enerhiya. Maaaring samahan ito ng malikhaing galaw, pormasyon, at koreograpiya upang higit na maging masigla at kaakit-akit ang pagtatanghal.
Maaaring gumamit ng mga simpleng props gaya ng placards, banderitas, banners, at iba pang magagaan na dekorasyon, basta't hindi ito makahahadlang sa pagtatanghal, makapagdudulot ng pagkaantala, o magiging panganib sa kaligtasan ng mga kalahok.
Mahigpit na ipinagbabawal ang paggamit ng mga salita, kilos, kasuotan, o materyales na malaswa, mapanlait, diskriminatoryo, partidistang pampulitika, o hindi naaangkop sa diwa ng pagdiriwang.
3. PAMANTAYAN SA PAGHUHUSGA
A. Laki ng Delegasyon at Pakikilahok — 40%
Ibabatay sa dami ng aktuwal na kalahok sa delegasyon, kabilang ang mga opisyal, kawani, mag-aaral, miyembro, at iba pang awtorisadong kinatawan. Isasaalang-alang din ang aktibo at sama-samang pakikilahok ng buong delegasyon sa pagtatanghal.
B. Pagkamalikhain, Orihinalidad at Nilalaman ng Yell — 30%
Ibabatay sa pagiging orihinal at natatangi ng yell, malikhaing konsepto at presentasyon, at kaugnayan ng nilalaman nito sa Higantes Festival, sining at kultura ng Angono, at pagkakakilanlan ng delegasyon.
C. Koreograpiya at Koordinasyon — 20%
Ibabatay sa pagkakaisa, sabayang pagkilos, tamang tiyempo, pormasyon, koordinasyon ng mga galaw, at kabuuang organisasyon ng pagtatanghal.
D. Dating sa Manonood — 10%
Ibabatay sa sigla at enerhiya ng delegasyon, kakayahang makahikayat ng tugon mula sa mga manonood, presensya sa pagtatanghal, at kabuuang epekto ng presentasyon.
KABUUAN — 100%
4. PANGKALAHATANG ALITUNTUNIN
Inaasahan sa lahat ng delegasyon ang disiplina, paggalang, sportsmanship, at pagsunod sa mga alituntunin sa kaligtasan bago, habang, at pagkatapos ng paligsahan.
Ang anumang paglabag sa mga itinakdang alituntunin ay maaaring maging batayan ng kaukulang deduction o diskwalipikasyon, alinsunod sa pasya ng mga tagapangasiwa ng paligsahan.
Ang pasya ng Lupon ng mga Hurado ay pinal at hindi na mababago.
