Purok Magsaysay-A

ENERO 13, 2022- HUWEBES
Unang Semana sa Ordinaryong Panahon
San Hilarion, Obispo ug Doktor sa Simbahan
(Green)
PUDYOT SA EBANGHELYO ❤️❤️👁️👁️🙏🙏
TINIUOD BA NGA ANG SAKIT USA KA SILOT GIKAN SA DIOS?
Sa panahon ni Hesus ang mga sanlahon giisip nga hugaw kaayo ug dakong makasasala. Ang ilang kahimtang gitan-aw nga silot gikan sa Dios. Gidid-an sila nga moduol sa mga tawo aron dili makatakod ug dili makahimong hugaw sa uban. Apan si Kristo wala mosunod ning maong mentalidad. Gani, gitugotan niya ang usa ka sanlahon nga moduol kaniya. Iya kining gihilam ug giayo sa iyang sakit – usa ka pagpakita nga ang sanlahon wala isalikway sa Dios. Nindot kini nga balita alang sa mga masakiton. Dili nila angay’ng isipon nga sila gipanghimaraot sa Ginoo. Kon duna man silay sala, mangayo sila’g pasaylo. Apan, hunahunaon nila nga sila duol sa kasingkasing sa Dios ug gusto niya nga sila mapasaylo ug mamaayo. (Bp. Abet Uy of Tagbilaran)
AMG PAGBASA GIKAN SA UNANG BASAHON NI SAMUEL (1 Sm. 4:1-11)
Niadtong higayona nakiggubat ang Israel sa mga Filistihanon. Nagkampo sila didto sa Ebeneser, ug ang mga Filistihanon didto nagkampo sa Apek. Naglaray ang mga Filistihanon atbang sa mga IsraeIita ug sa ilang panagsangka nabuntog ang Israel sa mga Filistihanon, ug upat ka libo ka Israelita ang nangamatay. Sa pagpauli sa mga tropa didto sa ilang kampo, ang mga pangulo sa Israel miingon, “Nganong gipabuntog man kita sa GINOO niining adlawa? Dad-on ta nganhi gikan sa Silo ang Sudlanan sa Kasabutan sa GINOO aron ubanan kita niya ug luwason gikan sa atong mga kaaway.” Busa nagsugo silag mga tawo pag-adto sa Silo aron pagkuha sa Sudlanan sa Kasabutan sa GINOO, nga maoy naghulagway sa mahimayaong trono sa GINOO nga Labing Gamhanan. Ang duha ka anak ni Eli, si Opni ug si Pinehas, mikuyog sa Sudlanan sa Kasabutan. Sa pag-abot sa Sudlanan sa Kasabutan didto sa kampo, naninggit ang tanang mga Israelita ug milanog ang ilang tingog. Sa pagkadungog sa mga Filistihanon sa singgit, miingon sila, “Unsa may buot ipasabot sa mga Hebreo nga naninggit man sila?” ug sa pagkasayod nila nga ang Sudlanan sa Kasabutan sa GINOO diha na sa kampo, nangahadlok ang mga Filistihanon ug miingon, “Ang mga dios miabot sa kampo.” Ug sila miingon, “Alaot kita kay walay nahitabo nga sama niini sukad masukad! Pagkaalaot nato! Kinsa may makaluwas kanato gikan niining gamhanang mga dios? Mao kini ang mga dios nga nagsakit sa mga Ehiptohanon pinaagi sa tanang matang sa katalagman didto sa kamingawan. Dili kita manga-hadlok ug magpakalaki kita aron dili kita maulipon sa mga Hebreo ingon nga kaniadto sila naulipon nato. Mosukol kita kanila. Busa nakig-away ang mga Filistihanon ug nabuntog nila ang mga Israelita, ug nanglayas ang mga Israelita, ug namauli na sa ila. Daghan kaayo ang nangamatay kay miabot ug katloan ka libo ka sundalo ang nakalas. Nailog ang Sudlanan sa Kasabutan sa Dios ug namatay ang duha ka anak ni Eli, si Opni ug si Pinehas.
ANG PULONG SA GINOO.
SALAMAT SA DIOS.
SALMO RESPONSORYO
Ps. 44:10-11, 14-15, 24-25
T. Luwasa kami, Ginoo, sa imong kaluoy.
Imo kami karong gisalikway ug gibutang sa kaulawan, ug wala na ikaw mouban sa among mga kasundalohan. Mitugot ka nga pasibogon kami sa among mga kaaway; silang nagdumot kanamo miamong-among kanamo sa ila lang gusto.
T. Luwasa kami, Ginoo, sa imong kaluoy.
Gihimo mo kami nga kabasulanan sa among mga silingan, Gibugalbugalan ug giyam-iran kanilang naglibot kanamo. Gihimo mo kaming sanglitanan diha sa kanasuran, usa ka kataw-anan taliwala sa katawhan.
T. Luwasa kami, Ginoo, sa imong kaluoy.
Nganong gitago mo ang imongnawong, gikalimtan mo ang among kagul-anan ug among kadinaugdaog. Kay nangapukan kami ngadto sa abo, ang among mga lawas giyatakan ngadto sa yuta.
T. Luwasa kami, Ginoo, sa imong kaluoy.
ALELUYA (Mt. 4:23)
T. Aleluya
Si Jesus misuroy sa tibuok Galilea ug nagtudlo sulod sa ilang mga sinagoga, ug nagwali sa Maayong Balita bahin sa paghari sa Dios, ug nag-ayo sa mga masakiton..
T. Aleluya.
ANG PAGBASA GIKAN SA EBANGHELYO SUMALA NI SAN MARCOS (Mk. 1:40-45)
May usa ka sanlahon nga miduol kang Jesus, miluhod, ug mihangyo sa iyang panabang. Siya miingon, “Kon buot ka, makaayo ka kanako.” Naluoy si Jesus kaniya, ug gihikap niya ang sanlahon ug miingon, “Buot ko. Mamaayo ka!” Dihadiha naayo ang sanlahon. Unya gipalakaw siya ni Jesus ug gipahimangnoan pag-ayo, “Ayaw kini isugilon kang bisan kinsa, apan adtoa dayon ang pari ug pagpahiling kaniya. Unya paghalad sumala sa gisugo ni Moises aron pagmatuod sa tanan nga naayo ka na.” Apan milakaw ang tawo ug nanugilon hinoon sa tanang katawhan mahitungod sa nahitabo. Hilabihan gayod niyang panugilon ug tungod niini, si Jesus dili na makapasayasaya pagsulod sa lungsod. Nagpabilin na lamang siya sa mga dapit nga awaaw ug nangadto kaniya ang mga tawo nga gikan sa nagkalainlaing dapit.
ANG EBANGHELYO SA GINOO.
DAYGON IKAW, O CRISTO.
🙏🙏🙏🙏🙏🙏🙏👁️👁️❤️❤️❤️❤️❤️❤️❤️