01/08/2026
📢 PAHAYAG PARA SA LAHAT NG GUMAGAMIT AT MANLALARO SA ATING PLAZA‼️
Muli naming ipinapaabot ang pahayag na ito—hindi lamang para sa mga residenteng taga-Dicolor, kundi maging sa LAHAT ng mga dumadayo at naglalaro rito sa ating barangay plaza. Alam at kinikilala natin na ang ating plaza ay isang pampublikong lugar na malayang magagamit ng sinuman para magpalipas-oras at maglaro. Ngunit tila paulit-ulit na lang tayong bumabalik sa parehong usapin dahil sa paulit-ulit ding kapabayaan ng marami sa tamang pagtatapon ng basura.
Lagi na lamang nating naging problema ang mga iniiwang plastic ng palamig, bote ng tubig, at mga wrapper kung saan-saan. Tandaan po natin na ang kalinisan ng ating plaza ay direktang repleksyon ng inyong pagkatao bilang isang manlalaro at bisita. Hindi porket may mga opisyales at tagalinis tayong nag-aayos at nagpapanatili ng kaayusan sa plaza ay gawa na kayo ng mga bagay na hindi dapat gawin. Ang mga tagalinis ay nariyan upang gabayan at pangalagaan ang pasilidad, at hindi para maging tagalinis ng inyong kawalan ng disiplina at responsibilidad.
Respeto sa ating pampublikong pasilidad, respeto sa mga taong nagpapakapagod maglinis nito, at respeto sa iba ninyong kapwa na gumagamit din ng lugar. Sana ay hindi na natin kailangang umabot pa sa pagpapatupad ng mas mahihigpit na rules o limitasyon sa paggamit ng plaza bago tayo matutong maging disiplinado. Ang simpleng pagtatapon ng inyong basura sa tamang lalagyan ay malaking tulong na para sa ating lahat.
– Pamunuan ng Barangay Dicolor